رمادى

بعد الحفلة و فرحتنا بها نيجى للجد بقى

بالرغم من ان يوم حفلة توقيع كتاب مدونات مصرية للجيب من احلى الايام اللى مرت على المدونين الا ان دايما الحلو ميكملش

عدم التنظيم وسوء اختيار المكان كان سبب فى ان اليوم يكون شاق علينا

نرجع بالاحداث شوية لورا

على الفيس بوك كان موجودة جروب خاص بالحفلة و فيه تقدر تقول انك ناوى تروح او لا ولاقيت حوالى 200 و شوية قالوا انهم رايحين ده غير اللى لسه مش متاكدين و الرقم ده مفروض يساعد القايمين بالتنظيم للحفلة فى الاعداد لها

لكن للاسف الواضح انها كانت دعوة عامة بدون ما يكون مترتب لها

يعنى من الحاجات اللى كان اختيارها سىء

التوقيت : كان مفروض يكون الساعة 7 لان فى ناس كتير بتخلص شغلها 6 او بتخلص 5 و مشوارها و الزحمة مش هيخلوهم يوصلوا فى ساعة

المنطقة : وسط البلد مكان صعب لأى حد معاه عربية لانه مش هيعرف يركنها بسهولة او انه يركنها فى جراج التحرير و يمشى

المسافة دى فى الحر

المكان : مكتبة عمر بوك استور بردو اختيار سىء لان المكتبة متستحملش وجود اكتر من 50 شخص

ده غير حاجات تانية زى

التنظيم الداخلى للمكان لازم يكون فى اعداد من الكراسى تناسب اعداد الناس لازم لما نجمع عدد كبير كده يكون المكان فيه تهوية مش بقول تكييف و لكن تهوية جيدة ده حتى من الناحية الصحية مش كويس

لازم لما اقول لحد تعالى علشان لك حاجة نازلة فى كتاب اوفر له ركن فيه مكتب و كرسى و اقلام علشان يقدر يوقع للناس و يكتب لهم

اهداء و هو قادر يفكر مش يكتبه و هو ساند على الحيطة ولا على رجله

لازم يكون فى حجرة او ركن مخصص للمناقشات الجانبية يعنى لما تلاتة اربع يحبوا يتناقشوا فى شىء موجود فى الكتاب يلاقوا الجو

المناسب انهم يعرفوا يعملوا ده

لازم لما يطلع اى شخص يلقى كلمة توفر له ان يكون صوته مسموع و يكون واقف فى مكان مريح و واضح للكل مش يبقى هيتكعبل

فى الاسلاك و الناس

لازم يكون فى خدمة - و مش بقول بوفيه- بس ابسط حاجة تقدر تقدم للناس فى الحر ده ازايز ميه و مناديل و كمان يكون فى حمامات مناسبة للجنسين

اما عن المشادة الكلامية اللى حصلت فى وقت كلام صاحب دار النشر حسينا منها ان القائمين على الحفلة مع على دراية كافة ازاى يوجهوا موقف زى ده و ازاى يتعملوا معاه و ازاى لما يتحل يكون جميع الاطراف راضية بالحل ده

اكيد كل واحد منا لمس حاجة من الحاجات دى و يمكن اكتر كمان فياريت المرة الجاية يكون التنظيم افضل من كده علشان التجمع يوصل للهدفه الاساسى و هو ان المدونين يقربوا من بعض و يكون فى نقاش بينهم

ملحوظة : انا معرفش مين المسئول عن التنظيم ولا اقصد بكلامى ان اقلل من شأنه و لكن هى بعض الملاحظات لى كمشاركة مش اكتر

اجمل اللقا

كان جويا حالة من التردد انى اخد الخطوة دى

خوفت ان اللى رسمته فى خيال لما يتصدم بالواقع و يلاقى انه مختلف تمام يحصل حالة من اللخبطة النفسية و احس انى بكلم حد معرفوش

و كان لما حد يسال مين منكم رايح حفلة توقيع كتاب مدونات مصرية للجيب كنت بقول هحاول علشان عارفة انى ممكن فى اخر لحظة اقول لا خاليه عالم افتراضى و بس

لكن اخدت قرارى انى لازم اروح لما اابى دخلت عندى و سابت لى تعليق انها هتروح لان نازل لها حاجات فيها .. قلت هروح علشانها و علشان ابارك لها

وصلت المكان المحدد فى تمام الساعة 6.30 لاقيت يافتة مكتوبة عليها اسم المكتبة و لاقيت فى ناس واقفة على السلم .. قلت اكيد الناس دى مكسوفة تدخل او لسه بيتعرفوا .. طلعت و دخلت المفرمة اقصد المكتبة

بصراحة لما دخلت و اخدتنى قوة الدفع لحد جوه افتكرت وقتها فيلم ابو العروسة لما عمل فرحة بنته فى الشقة و قلت الحقى نفسك و خدى ساتر و اقفى على جنب علشان اى حد يزقنى كده ولا كده اكون فى ضل الحيطة .. و بدا صاحب دار النشر الكلام فى الميكرفون بعد تجريبه ببس و تش و صلى على رسول الله

و لحد هنا و قررت انى امشى بعد ما حسيت بزغللة و حرقان فى العين و انسداد فى القناة اللولبية السمعية مع نقص حاد فى الاكسجين و انتشار روائح مسيلة للدموع ..ده غير صوابع رجلى اللى بقت سوى الارض من كتر ما انداس عليها

قلت خلاص ادور على ابى ولو ملاقيتهاش همشى نو واى

دخلت اوضة تانية وانعكس اليوم 180 درجة

وقبلت ناس كتير اعرفهم -اعرف مدونتهم - واد ايه كان ده يستاهل فقدان السمع و الصوابع و غيرهم

قبلت محمد عبد الغفار اللى حوارى معاه مكملش 10 دقايق و مع كده لو حد يسمعه يقول دول اصدقاء من 10 سنين

اابى و خطيبها - ربنا يسعدهم - و اللى اكتشفت انها برغم ثورتها و بتنجانها لكن بتتكسف جدا و وشها بيحمر

رودى - بنت مصرية - و بنتها الجميلة نور اللى كنت لابسة جزمة سندريلا

فاتيما -روح قلب ماما - و اد ايه حسيت انها قوية برغم ظروفها .. ربنا يعينها

و احمد سكر اللى فعلا زى السكر و اد ايه هو اخ و خدوم جدا

سووووو و بخفة دمه خطف المصاصة من ايد نور بنت رودى و قالها هاتى دى باليشكولاتة و اكلها منها

و سوسو - مفقوعة مرارتها - اللى عرفت ليه حماتها بتعمل فيها كده .. لان شكلها طيب جدااااااااااااااااااو زى القمر ماشاء الله - لها حق تغير فيفى منها

و ناس تانية كتير بس مقدرتش لضيق الوقت انى اتكلم معهم زى خالد همس الاحباب - محمد مفيد - رئيسة حزب الاحلام - كلاكيت تانى و تانى - اهوده عيبه - همسات عشق- مى بهاء- برنسيس دودو - و القادم اجمل - يوميات عيل مصرى

و كانت المفاجاة الكبيرة اوى اوى ليا

انه يقرر يسافر و ينزل القاهرة علشان يحضر معنا الحفلة

مكنتش مصدقة انه ممكن يعمل كده و تخيلت انه من الشخصيات اللى تحب تكون بعيدة عن التجمعات نتيجة لنبرة الحزن اللى بحسها فى كلامه

لكن عملها و جيه و شارك معنا

بابا ابو خالد شكراً من قلبى انك اسعدتنا النهارده و خاليتنا نشوفك

انت فعلا نعم الاب لنا

كان نفسى اشوف فرنسا ربنا يشفيها

و اشوف نوران بت خيخة و اى كلام

و راندا و كاميليا و شيرين و كتيييييير غيرهم

فعلا انا كنت غلطانة لما تردد انى اروح و ياريت كل واحد متردد يعرف ان هو الخسران ولازم المرة الجاية يشارك و يجى

فعلا كان يوم من الايام اللى بيظهر فيها قوس قزح

ميرسى لكم اوى و بحبكم اوى

هى فى الالوان كالأحمر

كشعلة النيران الحمراء التى تقفز بجنون فوق اسطح البيوت الريفية محدثة حريقا لعنان السماء .. تتقافز افكارها فى عقول من يقرا لها محدثة ثورة ضد السلبية

كالقلم الاحمر الجاف الذى نصحح به الصواب من الخطأ .. تصحح هى مفاهيم نعرفها و نمر عليها مرور الكرام و لكن معها نقف و نستمع و نفهم اكثر و اكثر

كالورد الاحمر البلدى نشم معه عبير مصرنا الحبيبة .. معها احس بعبق المراة المصرية بمعنى الكلمة

كالبطيخ الاحمر فى ليلة صيف حارة ننشده ليرطب جوفنا و ينعشنا .. خفة دمها تروح عن قلوبنا و تسحرنا

كنادى الاهلى و اعلامه الحمراء و فرحة مصر بفوزه فى بطولة افريقية او عربية .. فرح المدونون بعودتها سالمة الينا

هانم تتربع فى قلوبنا بجلبابها الاحمر .. و هى تبتسم و تقول قاعدة على قلوبكم

سلامتك من كل الالام فرنسا

الحب و الحرية

انا اسيرة مشاعرى

فقلبى ملك يمينك

و عقلى تحاوطه اسوار

تمنعه من الهروب بعيدا عنك

يتملكنا الحب فنصير اسرى له و نوهب حريتنا لمن نحب عن طيب خاطر

وقد نتألم ان شعراً ان هذا المحب لا يريد تلك الحرية و قد نختنق ان اخذها و لم يشعر بغلوها

و لكن اليس الحب هو الحرية ؟

الحب هو الحرية فى التعبير عن مشاعرى لك

الحب هو الحرية فى انى اعطى لك كل شىء بدون حساب

الحب هو الحرية فى ان اعيش احلامى معك كما يحلو ليا

الحب هو الحرية فى ان تعطنى ثقة كاملة و لا تشك فى مشاعرى ولا تختبرها فهى ملك لك بأرادتى

الحب هو الحرية فى ان تمتكلنى و فى نفس الوقت ان تشعرنى انى حرة

فقمة الحب ان تملك مشاعرى ثم تردها لى مضاعفة من خلال مشاعرك

الحب بدون حرية لا بد له ان يموت ان يختنق

ان لم يشعر المحب ان قلبك هو مسكنه و وطنه فلن يكون ابدا ساكناً له مهما اقمت من اسوار و ابواب لكى تسجنه بمشاعرك و تصرفاتك

الحب يموت بالامتلاك

عندما اعطى لك مشاعرى لانى احبك لا تاخذها على انها حق مكتسب لك و تنتظره دايما .. لا .. انها كالتاج اضعه على عرش قلبك حتى ترفعنى بجواره كالملكة او اكون سلطانة عليه .. فأن لم تفعل ذلك خسرت قلبا كنت يوم ملكاً عليه لانه مات من شدة العبودية

حرر من يحبك من عبودية حبه لك بأن تشعره بأنه يملكك

حرر من يحبك و اعطيه حريتك كى يردها لك

عيش حب حر

و اعلم ان حرية الحب هى حرية القلوب و ليس الجسد

فالجسد ياخذه الحرية بورقة تكتب امام الشهود

و لكن القلب لا يأخذ حريته الا بوعد قد يكون من نظرة عين او ابتسامة حانية

لا تمتلك القلوب فهى ملك لك بأمر خفى من الرحمن

واحبها كما يحلو لك لكن بدون ان تقبض عليها يداك

هات حريتى تاخد حريتك

الحرية

من منا لا يبحث عنها

و يتمنى ان يكون حر من كل قيوده

لكن اتدرى انك من تحبس نفسك و تمنع حريتك بيدك ؟؟

تعالى اقولك ازاى

لازم تعمل حدود لانسانيتك محدش يقرب منها

لازم يكون لك مساحة خاصة لك لوحدك تعيشها بحرية

و فى نفس الوقت تحترم حدود غيرك و تفهمها

يعنى مثلا

لو انت زوج ليه مفترض ان زواجك سجن لحريتك ؟

ليه تفترض ان زوجتك هى مجرد شخص بيراقب تصرفاتك فى البيت وبره البيت ؟ ليه ميكونش فى مساحة لكل واحد فيكم و خصوصية محدش يقرب منها ؟

ليه الزوجة تفترض ان الزوج لو حر اكيد هيبقى خاين ..هو المحبوس و المتراقب ميقدرش يخون ؟

ليه نقول كل حماة فى الدنيا عايزة تتحكم فى فينا ليه منقولش دى ام و نتعامل معها كأم

طيب هو لو مامتك قالت انت لازم تساعدنى فى ده و فى ده تبقى مساعدة عن طيب خاطر و لو حماتك قالت ده يبقى جبروت منها ؟

ليه بنزعل من اولادنا لو قالوا اه بنفرح بخروج مع اصحابنا اكتر .. الله هو انت مش برده زيه و بتفرح بخروجك مع اى جروب من ايام المدرسة او الجامعة و بتهرب من البيت اول ما تلاقى خروجة معهم ؟

ليه لما البنت تحب لازم تعمل جدار مسلح حوالين مشاعرها علشان عيب تقول انها حبت لامها او ابوها ؟ هو انتم اتجوزتوا ازاى و عايشين ازاى !! من غير حب ؟؟

ليه نزعل من حد بيدارى على شمعته مع اننا ممكن نعمل زيه و اكتر ؟

ليه تحب تعرف اخر الاسرار الخاصة لغيرك هو انت تحب حد يعرف اسرارك ؟

ليه نستغرب لما حد كبير يقول عايز اتجوز و اعيش حياتى .. هو انت لو كنت مكانه هترضى تعيش وحيد علشان الناس متقولش عليك خرفت ؟

و حاجات كتير غير كده بنشوفها عادى و هى بتاخد من حريتنا و حرية غيرنا

لازم نفكر ايه لنا و ايه علينا

مينفعش احب الحرية لنفسى و انا مش قادرة اديها لغيرى

منعك لحرية غيرك كأنك بتقول من حق اى حد كمان يمنع حريتى

و الحرية لو عايزها و عايز تحس بها اعرف معانها و حدودها و اديها للى حواليك الاول هتلاقى حريتك رجعتك

حرر نفسك من انك تكون تابع لمنهج معين و عيش حياتك بمنهجك انت

حرر قيودك من بعض التقاليد و العادات اللى مالهاش معنى

حرر تفكيرك و عقلك

كون انسان بالفطرة زى ما ربنا خلقك

كن حر تكن انسان سعيد