عيد سعيد

بعطر الورد اهديكم

و انا بالعيد اهنيكم

موائد الرحمن

لو ادان المغرب ادن علينا فى الشارع و لسه قدامنا وقت على ما نفطر عمرنا ما بنفكر نقعد على مائدة رحمن و نفطر مع ان المفروض انك لما تعمل كده بتخلى صاحب المائدة ياخد ثواب افطارك و فى نفس الوقت بتشارك ناس يمكن اقل منك فطارهم و بتحس بجو رمضان فعلا فى وجودهم ماهو رمضان مش انك تاكل خشاف و كنافة و قطايف لكن انك تحس بالفقير ازاى بيجوع و فى الاخر بياكل لقمة قليلة و ممكن تكون بايتة كمان .. ياريت نغير مفهومنا ان موائد الرحمن للفقراء بس وانها عيب و نعرف انها موجودة لكل انسان ادن عليه المغرب و مفيش فطار قدامه لاى سبب

اما بقى عن موائد الرحمن اللى بتعملها بعض الفنانات و الرقصات و بتتباهى بانها افخر مائدة فهنا انقسم راى الدين فيها لرأيين

الاول ان الله طيب لا يقبل الا طيباً و ان المال اللى بتقام به الموائد دى حرام و بكده هى موائد محرمة و طعامها حرام

و التانى ان الله غفور رحيم و ان من حق كل مسلم انه يطلب العفو و المغفرة فى رمضان بالصدقات و غيرها و بكده فهى موائد حلال

انا بقى بشوف الحكاية دى من وجهة نظر الصائم الفقير لو قدامى مائدة رحمن يعنى اكل لوجه الله و انا جعان وقتها مش هفكر الاكل ده مصدره ايه لكن اللى يهمنى ان الاكل ده من حقى اكل منه لانه لله و ربنا محلله ليا

اما بقى عن اصناف الاكل اللى بتتقدم على الموائد المنتشرة هى عبارة عن معلقين شوربة لسان عصفور و طبق رز صغير و طبق خضار صغير و بيكون فيه قطعة لحمة و كوباية عصير .. طبعا الاكل ده ممكن يكون حلو اوى لفقير بيفطر لكن سؤالى هنا هو مش مفروض لما نطعم صائم نطعمه من نفس اكلنا .. يعنى ياكل زى ما بناكل من الصوانى و المحاشى و البط و الفراخ و الحمام و الحلويات و البقلاوات و المكسرات

هل لو انا بفطر 100 اى كلام احسن ولا افطر 20 من نفس اكلى احسن

يمكن كتير يقول 100 احسن طبعا

لكن انا شايفة ان ده شهر فى السنة للناس دى تاكل اكل كويس من نفسها

ده غير كمان ان لما اعمل مائدة بالشكل ده ممكن اكون قدوة لغيرى انه يكون بنفس المستوى

المائدة مش انى اقطع خضار على لحمة و ارميه فى حلة و اغرف لكل واحد معلقتين تلاتة

المائدة انى اتعب و انا بجهز و احضر الاكل ده و اكلفه لان اللى هيجى ياكل عندى ده ضيف الرحمن

ده لما الواحد بيجى يزوره حد مهم بيكون مش عارف يعمل ايه ولا ايه فما بالكم بضيف الله سبحانه و تعالى

الحاجة اللى فرحانة بها فى موضوع مؤائد الرحمن

الشباب اللى بشوفه بيجهز و يحضر الموائد و الشباب اللى بيقف فى الاشارات يوزع بلح او عصير او ميه

الشاب ده سهل له اوى انه يكون فى نفس الوقت ده قاعد مستنى الاكل قدام التليفزيون بس هو اختار انه يعمل كده

ده معناه ان فيكى يا مصر شباب زى الفل و مش شبابك هم بس اللى بيدخلوا على اليوتيوب يعملوا كليب هايف ولا يصورا بنات ولا هم اللى واقفين على النواصى يتحرشوا باللى رايح و اللى جاى

شبابنا مش كده

فى شىء مهم اوى بالنسبة لموائد الرحمن

و هى النية

لو اى حد عامل المائدة دى بنية اى شىءفى الدينا غير افطار الصائمين لوجه الله يبقى مش هياخد ثواب الافطار ده

يعنى لازم اى حد يشارك فى الموائد دى لازم يخلص النية انها لوجه الله تعالى علشان يتقبل الله منه

فى سؤال اخير

ليه موائد الرحمن بتتعمل فى رمضان بس

ليه محدش بيفكر يعملها و لو يوم الجمعة من كل اسبوع طول السنة

مش بردو يوم الجمعة ده عيد من اعياد المسلمين

ليه بنعمل الحاجة و احنا مش بنفكر انها تستمر و انها مرة و عديت و عملت اللى عليا

حاجة بقى غايظنى جدا و مالهاش علاقة بالموضوع

لما يبقى فى فتوى ان ممثلة زى صابرين ممكن تلبس باروكة و هى بتمثل لو الدور تطلب ده و بكده تبقى محافظة لسه على حجابها.. وقتها ايه يمنع باقى المحجبات تلبس بواريك و يبقى كل واحدة منهم لها دور بيتطلب كده .. هى مش الباروكة تعتبر زينة و تبرج بردو ولا احنا هنتحايل على الدين فى حاجة زى دى ؟؟

حسبى الله و نعم الوكيل

تجربة الخير للخير

تحديث

ياريت كل واحد عنده اقتراح او مكان محتاج او حتى شاف حاجة معجبتوش و يحب انها تتغير يقول فى تعليقه و نحاول مع بعض نوصل

لافضل الحلول

............

كنت بافضل دايما بعد اى يوم تبرع متكلمش عن اليوم و اسيب تفاصيله للناس اللى شاركت علشان اعرف انطباعهم عن اليوم و اعرف ايه عيوبه
و مميزاته

لكن بناء على طلب الاخ العزيز احمد كمال حبيت اتكلم عن الخطوات اللى عملتها انا و ابى و غيرنا علشان اليوم يطلع كده و الحاجات اللى كان مفروض نتفادها
و يمكن يكون تجربة خير لحد غيرنا و يعمل الخير فى بلده او مدينته او فى منطقته

و هبدا بجزء جزء

المكان

يفضل اختيار مكان يكون غير معروف اعلاميا لان الاعلام بيقدر يوجه نظر الناس للمكان و بالتالى بيجى له مساعدات كتير

السؤال عن المكان الاكثر احتياجا و ده ممكن من خلال طبيب بتتعامل معاه او جمعية اتبرعت لها او حتى حد معرفة مهتم بعمل الخير

يفضل زيارة المكان قبل توجه التجمع له و التعرف على المسئول عن العلاقات العامة او الاخصائى الاجتماعى للمستشفى

ان كانت المستشفى كبيرة يفضل تحدد اكثر الاقسام احتياجا للتبرع زى عمليات القلب و المخ و الكلى و الكبد

يفضل اختيار وقت الزيارة بعيد عن اوقات الزيارة العادية و عن ايام الاجازات حتى يكون سهل توزيع التبرع بهدوء و بدون احراج للمرضى

الدعاية لليوم

لا نكتفى بعمل بوست او اعلان فى المدونة لان كده هيكون متروك لمن يراه بالصدفة

يجب ارسال ايميلات لكل الناس

عمل جروب على الفيس بوك بالموضوع

عمل بانر ينشر فى المدونات المشاركة

اعلام كل من شارك فى خير سابق او كان يتمنى المشاركة بترك تعليق فى مدونته للمشاركة

مهمة كل من يشارك ان يقوم بالدعاية لليوم وسط مجتمعه و لا ننسى ان الدال على الخير كفاعله فالمشاركة ممكن جدا بعمل الدعاية و جمع اكبر قدر من المتبرعين

التبرعات و الهدايا

الادوية

معرفة الادوية مسبقا من المستشفى او الدكتور المسئول عن الحالة

التاكد من كتابتها صح و التاكد من المطلوب منها ان كان حقن ولا كبسول ولا شراب( و اظن كلنا شوفنا ان اللغبطة اللى حصلت فى اسماء الادوية كانت عاملة ازاى ) و يفضل نسخ ورقة الاسماء و توزعها على المتبرعين

عدد علب من نفس الدوا افضل من علبة من انواع مختلفة لان الطفل بيحتاج لعلاجه اكتر من علبة دوا للشفاء و ممكن علبة لا تفيد لانها لا تكفى للعلاج فيلجا الدكتور للدوا البديل اللى غالبا بيكون اضعف فى تاثيره

التبرع المادى

و ده افضل تبرع للطفل لانه بيسمح له بحرية الاختيار و استغلال المبلغ فى اللى فعلا محتاجه

يفضل تجميع المبلغ من المتبرعين و تقسم بالتساوى فى اظرف و يتم توزعها على الاطفال

ممكن عمل اظرف مميزة يكون فيها المبلغ اكبر للحالات الاشد احتياجاً بدون ما يشعر الاطفال بانه مميز

اللعب

اختيار لعب تكون مناسبة لسن الطفل و تكون من غير بطاريات علشان متكونش مكلفة له بعد كده

تكون العاب لا تشجع على العنف يعنى نبعد عن المسدسات و الخناجر

تكون اللعب اسعارها بسيطة لانها مجرد رمز بسيط للفرحة و الاهم منه الدوا و التبرع المادى

تكون اللعب كلها متشابه فى الشكل و ممكن تكون مختلفة فى الالوان علشان محدش من الاطفال يبص للعبة فى ايد طفل تانى

الحلويات و العصائر

تكون حاجات مضمونة و معروفة و متاكدين من تاريخ صلاحيتها

تكون حاجات مش محتاجة تلاجة ولا تسخين

يتم التنبيه على المرافق للطفل بسؤال الطبيب الاول قبل ما ياكلها الطفل لان فى حالات بيكون ممنوع تاكل اى حاجة

و اخيرا تشجيع المتبرعين بنقل تفاصيل اليوم لكل من يعرفه

توجيه الشكر لكل مشارك و توضيح نتيجة عمله حتى يشعر بقيمة عمله و اهميته

يارب اكون قدرت افيدكم بتجربتى

و اى حد حابب انه يعمل يوم تجمع للخير انا تحت امره فى اى مساعدة

من اجمل الايام و احنها

امبارح كان يوم حلو اوى و قدرنا كلنا اننا نسعد و لو بقدر بسيط اطفال كتير


و كلنا حسينا اد ايه الناس فى المستشفى مش مصدقة ان العدد ده اتجمع بدون ما يكون تبع جمعية او رابطة و كمان استغربهم اكتر ان فى كتير منا كان اول مرة يشوف بعض و كل واحد بيقول للتانى اسم غريب غير اسمه


النهارده انا روحت المستشفى تانى لان جالى تبرع جديد وكان لازم اوصله و فى نفس الوقت الصيدلية بتاعت المستشفى استلمت الادوية و كانت طالبة منى انى اروح استلم منهم جواب بالاستلام


و كان فى بعض الادوية غلط قمنا بتبدلها من صيدلية خارج المستشفى دايما بتتبرع لهم و مكنش عندهم مانع يبدلوا بالادوية الصح


وقمت بمقابلة دكتورة رشا عمار نائب مدير المستشفى و كانت سعيدة جدا باللى احنا عملناه و استغربت بردو اننا افراد و مش تبع جهة معينة و قالت ياريت ناس كتير تعمل زيكم و ياريت تزورنا تانى لو مرة فى السنة


و اديتنى جواب شكر بأسم المدونين المصريين


و حبيت انشر لكم نسخة من الجواب لان الجواب ده شكر لكل واحد شارك فى اليوم ده سواء كان مدون او غير مدون

يمكن الصورة مش واضحة لانى عملتها اسكان فى سيبر - و دى اول مرة ادخل سبير فاعتمدت على صاحبه فى الاسكان - و ان شاء الله احاول اعملها اسكان تانى بصورة اوضح و اعملها لينك للدون لوود لكم

انا بشكركم جميعا باسم الاطفال و امهاتهم

و ان شاء الله ربنا يتقبل منا اليوم ده و يقدرنا اننا نكرره مرة تانية

و بقول لكل شخص شارك

بحبكم فى الله

ملحوظة

فى ناس طلبت منى عدم ذكر اسمائها من اللى شاركوا معنا لو نزلت بوست و علشان كده مقدرتش اقول اسماء حد شارك لانه مينفعش اقول اسماء و اسماء لا

بس احب اشكر بالاخص

كل واحد عمل دعاية او جروب على الفيس بوك للموضوع

و كل واحد وصل لنا تبرع من حد

و كل واحد ساعدنا فى التقسيم الهدايا و الفلوس

و كل واحد ساعدنا فى توصل الهدايا لكل طفل

تحديث :

دى اسماء الادوية تانى و عليها ادوية جديدة

zovirax 250 mg or 500 mg vail

diflucan vail

L carnitine cap.

ventolin inhalar

meronem 1/2 gm or 1 gm vail

sodium bicarsbonate 8.4% amp.

rimactan syrup

Indral amp.

nor-adrenaline amp.

vancomycin 1/2 gm vail

tienam 1/2 gm vail

ventolin amp.

تحديث هام

معلش حبيت انزل التحديث فى بوست منفصل علشان يظهر على الريدر للناس

النهارده روحت انا و آبى مستشفى الاطفال

و شوفنا حالات الاطفال فى المستشفى الموجودين فى اقسام جراحة القلب و المخ و الاعصاب و الفشل الكلوى و الرعاية

طبعا مش هقول على الحالات اد ايه هى صعبة لان ده هتشوفوه بعنيكم

لكن المهم انكم تعرفوا هم محتاجين ايه

اولا

فى بعض الادوية فيها نقص فى المستشفى و يمكن كمان قص فى السوق كله

و منها ادوية اسعارها لا تتعدى الخمسة جنيه

هقولكم على اسمائها

بس المطلوب ان اللى يجيب منها يحاول بدل ما يجيب انواع مختلفة يفضل انه يجيب كمية من نوع او اتنين

كل واحد يدور فى الصيدليات اللى جنب بيته او فى منطقته

الادوية هى

حقن zovirax 250 mg or 500 mg

diflucan حقن
L carnitine cap
ventolin inhalar
meronem 1/2 gm or 1 gm حقن
sodium bicarsbonate 8.4% امبول
rimactan syrup
Indral amp
امبول nor-adrenaline

لو فى اى لغبطة فى الهجاء اعذرونى لان انتم عارفين خط الدكاترة بس اكيد الصيدلى هيعرف

ده بالنسبة للادوية واللى هتدخل صيدلية المستشفى

و اللى هيقدر يوفر الدوا بعد الميعاد معندناش مشكلة اننا ناخده منه و نوصله للمستشفى بعد كده

اما عن اللى يحب يجيب هدايا للاطفال نفسهم

فالاطفال حوالى 50 طفل

اعمارهم من سن سنة لحد 6 سنين

و فى خمس اولاد عمرهم 12 سنة

و بلاش تحتاروا فى ان اللبس لولد و لا بنت

حاولوا بقدر الامكان ان اللبس يكون ينفع للاتنين

لان بصراحة فى اطفال عاملة عمليات فى المخ و حالقين شعرهم و مقدرناش نحدد هم ولاد ولا بنات

و اللعب نفس الشىء لان السن لاطفال صغيرة و ممكن تشتروا لعب تنفع للجنسين

اما اللى يحب انه يتبرع بمبلغ كعيدية لهم فالافضل انه يقسم المبلغ فى اظرف و يوزعها على كذا طفل

المستشفى هى ابو الريش اليابانى قريبة جدا من محطة السيدة زينب بتاعت مترو الانفاق

اللى ينزل من المحطة ينزل ناحية القصر العينى

و يتجه من المحطة شمال فى اول يمين هيلاقى المستشفى على شماله على طول جنب كوبرى

و تذكروا ان شهر رمضان ، شهر الصيام والقيام ، والبرّ والإحسان

يقول المصطفى ـ صلى الله عليه وسلم ـ :( أفضل الصدقة ، صدقة في رمضان) رواه البيهقى

وانطلاقا من قول النبى صلى الله عليه وسلم
عَن النُّعْمَانِ بْنِ بَشِيرٍ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: ( مَثَلُ الْمُؤْمِنِينَ فِي تَوَادِّهِمْ وَتَرَاحُمِهِمْ وَتَعَاطُفِهِمْ مَثَلُ الْجَسَدِ؛ إِذَا اشْتَكَى مِنْهُ عُضْوٌ تَدَاعَى لَهُ سَائِرُ الْجَسَدِ بِالسَّهَرِ وَالْحُمَّى )(1).

خالينا نرسم بسمة امل للاطفال المرضى الموجودين هناك ونيتنا كلنا ادخال السرور على قلوب الاطفال
امتثالا لقول النبى عليه الصلاة والسلام
(من ادخل على اهل بيت من المسلمين سرورا لم يرض الله له ثوابا دون الجنه )

فنيتنا كلنا اننا ندخل السرور عليهم ده علشان ربنا يتقبل مننا وجهدنا ميروحش هدر وكل سنة وانتوا طيبين وللخير فاعلين وللجنة ساكنين

اى سؤال او استفسار انا تحت امركم

kouskoza7@hotmail.com

خير و فطار

من مشاركتنا فى يوم البؤجة عرفنا كلنا ازاى ان ممكن حاجة بسيطة لنا تسعد غيرنا و فى نفس الوقت كل واحد فينا كان فرحان انه ساعد غيره و ده انا شوفته فى عيون الناس كلها الموجودة و يومها اغلب الناس كانت بتسال ازاى تانى نساعد و امتى

النهارده جاية اقولكم على باب خير تانى و ان شاء الله يكون عددنا اكبر من المرة اللى فاتت و اقولكم بردو على الافطار التدوينى فى نفس اليوم

بالنسبة للجزء الاول فالنهارده الخير هيكون للمرضى من الاطفال الفقراء

كلنا لما بنشوف طفل بيبكى بنضايق و بيصعب علينا

و لما يكون بيبكى من الالم او من المرضى بنكون مش عارفين نخفف عنه ازاى و بنحاول نساعده بأى طريقة

لكن تخيل لو فى طفل مريض بمرض جامد و كمان معندوش امل فى الشفاء لانه ببساطة فقير و معندوش اللى يساعده و مع كده مش بيبكى لانه اتعود على الغلب من صغره و الرضا بقضاء الله ،بس انت تقدر ترسم على وشه بسمة .. هتتتأخر ولا هتمد له ايدك ؟؟

الاطفال فى مستشفى ابو الريش بتترواح اعمارهم من حديثى الولادة لحد سن 12 سنة و حالاتهم المرضية مختلفة من فشل كلوى لمرضى القلب لمرضى الصدر و غيرهم

و المستشفى دى من اكثر المستشفيات فى مصر اللى بتستقبل حالات من مرضى الاطفال للعلاج مجانا و فى نفس الوقت هى اكتر مستشفى مش بيوصل لها مساعدات و ده نتيجة انها مش وخدة حقها من الاعلام

و علشان كده وقع اختيارنا عليها بعد ما كنا قلنا ان الخير القادم للاطفال مرضى السرطان لكن فضلنا ان مساعدتنا تكون للاكثر احتياجا بسؤال ناس كتير من دكاترة و اخصائيين اجتماعيين

فبناشد كل القلوب الرحيمة انها تشارك معنا فى رسم بسمة على شفاه الاطفال المرضى

و ده هيكون يوم السبت 13 سبتمبر الساعة 3 نتقابل قدام المستشفى و هى قريبة من القصر العينى الفرنساوى

و دى خريطة لمكانها

اللون الاخضر هو المستشفى

و اللون الازرق ده شارع القصر العينى

و اللون الاصفر ده شارع الكورنيش

و اللون الموف ده القصر العينى الفرنساوى

و اللون الاحمر ده محطة السيدة زينب لمترو الانفاق

و المشاركة هتكون هدية منك للطفل بمناسبة رمضان او العيد زى لبس العيد او لعبة او عيديته او حتى لو مش قادر ممكن تشترى شوية حلويات لهم و انت قدرتك بس حدد لنا هديتك هتكون ايه و ابعت لنا ايميل بها و كمان لازم تكون جاد لان حرام نعشم طفل برىء بهدية و فى الاخر متوصلش له

و صعب اننا من دلوقتى نحدد اعمار الاطفال لان بسؤال المستشفى لاقينا ان الاطفال ممكن تدخل و تخرج من المستشفى فى خلال يومين تلاتة

علشان كده يوم الخميس هنعمل زيارة للمستشفى و نحدد الحالات اللى اكثر مرضا او احتياجا و نبلغ كل واحد باسم الولد اللى هتكون هديته موجهة له

تذكر ان الاطفال احباب الله و ان الرسول الكريم قال عن انس رضى الله عنه : { أيما رجل يعود مريضا , فإنما يخوض في الرحمة فإذا قعد عند المريض غمرته الرحمة قال : فقلت : يا رسول الله هذا للصحيح الذي يعود المريض فما للمريض ؟ قال : يحط عنه ذنوبه }
فلا تتاخر عن زيارة احباب الله و عن ان تغمرك الرحمة فى هذا الشهر الكريم

و ارجو كل اللى يدخل يساعدنا على نشر الموضوع بانه يضيف البانر ده عنده و يبعت الموضوع لكل الناس اللى يعرفهم

اما الجزء التانى من اليوم هيكون ان شاء الله الفطار فى محل فى وسط البلد اسمه ابو خالد

و هو بيقدم كباب و كفتة و فراخ مشوية و حمام ده غير الشوربات و الرز و السلطات و الطواجن يعنى الاكل هيناسب كل الاذواق ان شاء الله و الاسعار ممكن تكون فى المتوسط 50 جنيه للفرد كل واحد حسب اللى هيطلبه

و دى بعض صور للمكان و ياريت بردو اللى هيشارك فى الفطار يقولى على الايميل علشان نحاول نبلغ المكان بعدد الناس بالتقريب

انا بشكر كل من العزيز سوو و خالد همس الاحباب لانهم تعبوا معايا فى اختيار المكان و الصور الخرافية دى من عدسة سوو

فى انتظار ايميلاتكم على

kouskoza7@hotmail.com

butterfly_549@hotmail.com

وتانى اقولكم متنسوش ان الاطفال احباب الله فمتتاخروش عن زيارة احبابه و كل سنة وانتم طيبين و مش ناسيين

اللهم تقبل منا رمضان