البؤجة مكسب و خسارة

تصدقوا مش عارفة اكتب بوست و اقولكم ايه اخبار البؤجة

يمكن لانى حاسة انا زى التايهة و مش فاهمة

على اد الفرحة باليوم ده و باللى قدرنا نساعد به الناس

على اد حزنى ان التجمعات دى اديت الفرصة لظهور قالوا و قالنا

تفتكروا التجمعات دى كانت غلط ؟؟

تفتكروا الخير مش محتاج لها ؟؟

تفتكروا الافضل اننا نفضل ورا الشاشة و بس ؟؟

ولا المفروض العكس

ان الواحد يعمل التجمع و مالوش دعوة بالتفاصيل بين الناس بدام هدف الخير بيتحقق ؟؟

ان التجمعات ده ممكن تعمل عملية غربلة للناس و يظهر مين اللى بيوقع بين الناس و مين اللى بيجيب سيرة الناس و يشتمهم ؟؟

ان التجمعات دى تخلى كل واحد فينا يحس بالرضا عن نفسه انه مع مجموعة بتعمل خير ومش خروجة بنات و ولاد علشان نرغى و لا نظبط جوزات و صوحبية ؟؟

حاجات كتير ملغبطانى و كلها عكس بعض

بس انا عن نفسى حاسة انى كسبت من التجمعات دى

حتى لو كنت من خلالها عرفت ان فى نفوس وحشة و نفوس اللى يهمها من التجمع شىء تانى غير الخير

انا عندى انى اكسب صديقة عمر يستاهل اوى قصدها ان اشوف الف وش وحش

انى اكسب حسنة واحدة و دعاء لى او لاولادى يستاهل اوى انى كنت اعمل التجمعات دى و ان كان هدف البعض مش الخير

ان فى يوم من الايام احكى لاولادى انى كنت ايجابية و حاولت اعمل حاجة اساعد بها غيرى يستاهل اوى ان استحمل اتعامل مع ناس و اشجعهم على الخير و انا عارفة ان ممكن اوى فى ضهرى يقولى عليا كلام

انا لحد دلوقتى كسبانة .. المهم تفتكروا الاستمرار هيزود المكسب ولا البعد عنه فى الوقت ده غنيمة

انا بعتذر يا استاذ احمد كمال ان كنت خيبت املك فى بوست كنت متوقعه منى بس فعلا جوايا حاجة انطفت قللت الطاقة و الحماس .. اعذرنى

و بعتذر لكم كلكم عن حيرتى دى اللى ضيعت بهجة يوم خير زى ده

بس فى ناس تانية ممكن تحسوا اليوم معهم :

فاتيما صلة رحم المدونات

خالد همس الاحباب

مش خيخة ولا اى كلام

فنانة مفروسة اند متغاظة

البؤجة الشتوية

احب افكركم تانى ان البؤجة يوم الجمعة ان شاء الله 28 نوفمبر

و ان كل المطلوب منك انك تشارك بأى حاجة عندك مش محتاج لها زى اللبس او الاحذية او الشنط او بطاطين او حتى لعب اطفال و اقلام و كراسات و ادوات تلوين

و ممكن مشاركتك تكون بالحضور فقط و نقل الصورة للاخرين فالدال على الخير كفاعله

لان ممكن من مشاركتك معنا و التحدث عنها يصل صوتك لاخرين قد يكونوا من زوار مدونتك او معارف متابعين لك

و اللى يحب يشارك بتبرع مادى عن طريق رقم حساب بنكى فده رقم الحساب البنكى لجمعية صحبة خير

129/1/66371

بنك مصر

فرع المنيل

و اللى ناوى يحول مبلغ عليه ياريت بس يبلغنى علشان اطمنه ان التحويل تم

و هنا موقع حلم اسطبل عنتر

و هنا الجروب على الفيس بوك

و على فكرة الموقع عليها منتجات من انتاج المشغل هناك ممكن تساعدوا من خلال شراءها

معادنا هيكون من الساعة 11 الصبح حتى الساعة 2

ولا يفوتكم ثواب صلاة الجمعة جماعة مع اصدقاءكم من المدونين فهى تقرب بين النفوس

المكان مسجد زهراء مصر القديمة فى الزهراء

خريطة المكان

هنا الطريق من على كورنيش المعادى و المربع الازرق ده البنزين اللى قبل دخلة المعادى و المربع الاحمر هو مكان المسجد و الخط الاخضر بيوضح الطريق

و هنا الخريطة لمحطة مترو الانفاق اللى اسمها الزهراء و لونها بالازرق اما اللون الاحمر فهو لمكان المسجد
و ده سهل اوى للناس اللى هتستخدم المترو

فى حالة ان حد تاه ممكن يتصل على الارقام دى
0124433543
الاستاذة صبرية جمعية صحبة خير
0120667739 - 0106011712
الاستاذ احمد سكر صاحب مدونة احمد سكر
0101345140
الاستاذ خالد صاحب مدونة همس الاحباب

0106252126

الاستاذ محمد فاروق صاحب مدونة قلب مصرى

0181432403

رقم هيكون معايا يومها ان شاء الله

و ياريت كل مدون يقدر ينزل بوست عن الموضوع النهارده او بكرة علشان نبلغ اكبر عدد ممكن يكون جزاه الله خير

اما عن المسرحية فللاسف المسرحية هتتأجل لبعد العيد و ده لان فى نفس اليوم هيكون فى يوم الالف طفل

و اليوم ده بيتجمع فيه اطفال الشوارع من ايتام او غير الايتام من مناطق عشوائيات مختلفة و جمعيات خيرية مختلفة و بيكون التجمع فى اى مدرسة من المدارس و هدف اليوم ده هو اندماج الاطفال مع المجتمع لانه للاسف بالرغم من محو امية البعض منهم و مساعدتهم على الحصول على عمل بتظهر مشكلة اندماجه مع المجتمع و بتكون النتيجة رجوعه مرة اخرى لما كان عليه

اليوم ده بتكون فيه مسابقات مختلفة من مسابقات دينية او ترفيهية او فنية او رياضية

و بيكون مشارك فيه متبرعين بتكون مهمتهم التنظيم و التحكيم و الاشراف على الاطفال

التجمع السنة دى هيكون فى مدرسة نيو جينيريشن فى طريق مصر الاسماعيلية و فى باصات هتكون موجودة الصبح من الساعة 8:30 امام مسجد الزهراء او دار التربية بجوار كوبرى ثروت فى الجيزة او مبنى التليفزيون

اللى يحب يشارك في اليوم ده يا ريت يبلغنى و انا احاول ارتب له مع مدام غادة جبر المسئولة عن الجمعية

جزاكم الله كل خير

بريق اللقاء

نسعى الى اللقاء الاول و ننتظره
و نستعد له بأبهى الملابس و العطور
و تسرق الساعات من عيوننا نظرات متلهفة لمرورها
و يتسأل لساننا بماذا انطق .. ااكون جاد ام مرحاً
و نلتقى
و تشتعل الحواس كلها
و تصبح فى قمة نشاطها حتى تخزن كل شىء
نغم الصوت الهامس و صدى الضحكات
ملامح الصورة و انعكاس الالوان
رائحة لا نُدركها و لكن يدركها العقل
لمسة سلام او فراق
و نتذوق كل كذلك فى اقل من دقائق
و ياتى القلب بسلطانه و هيلمانه و يرقب من بعيد
و فجاة يصدر قراره بالقبول قالاً اهدى ايتها الحواس ففى عوالم اخرى كنا قربين
او بالنفور راافضا ان يعلن السبب و يرجعه دائما انه قرار السماء
و قد يصل به الحال للصراخ معلن ان هذا هو من انتظره
انتبهوا .. و تتسارع دقاته لتدفع الحواس للعمل بكل طاقة لها

و نتيجة لهفته تُشحذ الحواس طاقتها بكل قوة مؤثرة على وظائف اخرى فتنطلق الحروف على غير هدى و ترتعد الاطراف خوفا من صراخ القلب و تتجمد

و تتعدد القاءات
منهم من يفقد بريق اللقاء و تصبح لقاءاته لنا مجرد واجب او تعود و نصبح نتهرب منها

و منهم من اصبحنا معهم نشعر براحة فى اللقاء و يصبح البريق هالة تجذبنا لها بالوانها المحببة ننتظرها

و منهم من نستعد للقاءه بكل الحواس بأمر خفى من القلب مهما طال الانتظار و كأن بريقه لنا فلاش مصور محترف للقطة نادرة الحدوث نُصبح نتمناه

و بين الهروب

و الانتظار

و التمنى

تُبنى الذكريات

ارجو منكم الدعاء

عَن ابى الدرداء رضى الله عنه أَنَّهُ سمِعَ رَسُولَ اللَّهِ صَلّى اللهُ عَلَيْهِ وسَلَّم يَقُولُ : (ما مِن عبْدٍ مُسْلِمٍ يَدعُو لأَخِيهِ بِظَهرِ الغَيْبِ إِلاَّ قَالَ المَلكُ ولَكَ بمِثْلٍ) رواه مسلم

وعَنْهُ أَنَّ رسُول اللَّه صَلّى اللهُ عَلَيْهِ وسَلَّم كانَ يقُولُ : (دَعْوةُ المرءِ المُسْلِمِ لأَخيهِ بِظَهْرِ الغَيْبِ مُسْتَجَابةٌ ، عِنْد رأْسِهِ ملَكٌ مُوكَّلٌ كلَّمَا دعا لأَخِيهِ بخيرٍ قَال المَلَكُ المُوكَّلُ بِهِ : آمِينَ ، ولَكَ بمِثْلٍ) رواه مسلم

ارجوك منكم الدعاء للطفلة ملك اسلام ابنة المدون انا جعان صاحب مدونة الله .. الوطن .. ام الخلول

جزاكم الله كل خير

كل سنة و انتى فى قلبى

دايما بعد بوست الخير مش بحب انزل اى بوست تانى لحد ما يجى اليوم المحدد للخير ده

بس المرة دى صعب ان يجى عيد ميلاد اغلى صديقة ليا عرفتها بسبب هذا العالم الافتراضى و لكن معرفتها بها بدات واقعية من غير ما اقولها كل سنة وهى طيبة و قريبة من قلبى دايما

اليوم اللى بيمر عليا من غير ما اتكلم معاكى او حتى بس اعرف انتى فين بحس ان فى حاجة ناقصانى و كأنى فى حالة انتظار دايما و بحس ان كل حاجة بعملها بسرعة علشان لحظة لقانا تيجى

استغربت لما الناس شافونا و قالوا اننا شبه بعض .. و ضحكت لما صديقة لنا قالت صوتكم فى التليفون واحد

و بفرح لما اكتشف انى بحب اللى انتى بتحبيه و انك لكى طقوس معينة انا كمان بحب اعملها

اكتر حاجة عجبانى فى علاقتنا عرفنا بعض لاول مرة بشخصيتنا الحقيقية مش الافتراضية

و بعد كده كل واحد بقى يزور فى مدونته كأى مدون عادى و كأن شخصيتنا التدوينة ملهاش علاقة بصداقتنا

احلى وقت بيمر عليا فى يومى لما نتجمع انا و هى مع اصحابنا من العالم الافتراضى على الشات و نتضحك و نهرج و نتناقش و ننصح بعضنا

صديقتى الغالية

مفروسة

كل سنة و انتى فى قلبى زى ما انتى

و اتفرج يا سلام

قوس قزح : صباح الخير يا آبى
أبى : صباح النور
قوس قزح : شوفتى الجو بقى برد ازاى
آبى : لا عادى يمكن بس بالليل
قوس قزح : لا لا بقى برد و لازم تطلعى الشتوى بقى
آبى : لا مش دلوقتى لسه بدرى
قوس قزح : خلاص قدامك لحد يوم 28 نوفمبر
آبى : اشمعنى اليوم ده
قوس قزح : علشان ده اليوم اللى هنعمل بؤجة فيه
آبى : لا لو كده يبقى انا هطلع الشتوى حالااا

ايه رايكم تشاركوا معنا تانى فى يوم بؤجة خير ؟
و المرة دى مختلفة لان كل واحد هيكون بالفعل مطلع الهدوم الصيفى و الشتوى فى نفس الوقت و بيبدل دى مكان دى
يعنى لو لاقيت حاجة صيفى طول الصيف مستخدمتهاش يبقى مش هتستخدمها و حطها فى البؤجة
و لو فى حاجة شتوى اى حاجة لبس او بطانية او حتى احذية لاقتيها لاى سبب مش محتاجها حطها فى البؤجة
فى ناس هتقول صيفى ايه اللى فى الشتا .. هقولهم الناس الغلابة ممكن تلبس كذا حاجة فوق بعض و كلنا بنشوف الولاد اللى فى الشارع بيلمعوا العربيات ازاى بيكونوا لابسين حاجة نص كم و تحتها حاجة بكم علشان تدفيهم
و اى حد عنده حاجة غير اللبس مثلا ادوات منزلية او لعب او شنط او حتى سجاجيد ممكن يشارك بها

و اللى هيقول لا معنديش حاجة تنفع للبؤجة و كل الحاجات بستخدمها هقوله اشترى بطانية حتى لو بتاعت طفل صغير و هاتها يدفى بها طفل من برد الشتا و تدفيك انت يوم الدين

ده غير كمان يومها الاطفال هناك هيعرضوا لنا مسرحية من تمثليهم و تاليفهم

و اتفرج يا سلام على الاطفال اللى مكنوش بيلعبوا الا بالزبالة و هم بيحاولوا يقدموا فن لنا
وعلشان كده وجودنا مهم جدا لهم علشان يعرفوا ان تعبهم فى التحضير للمسرحية الناس فعلا قدرته و جات تشوفهم
و تذاكر المسرحية بمبلغ رمزى و هو 5 جنيه و ده بس علشان يحسوا اننا جينا و كمان دفعنا علشان نتفرج على شغلهم
و العائد المادى من التذاكر هيستفيد به الاولاد فى حاجة تانية

يعنى اللى مش هيقدر يشارك فى البؤجة ممكن يحضر المسرحية
المسرحية مدتها حوالى نص ساعة
وهيكون ميعاد عرضها من الساعة 2:30 ظهرا


هنروح ان شاء الله نفس المكان اللى روحناه قبل كده
جامع الزهراء اللى فيه جمعية صحبة خير وصف المكان بالتفاصيل هنا
و هيكون تجمعنا هناك من 11 الصبح
اللى يحب يجى و يصلى فى الجامع هناك صلاة الجمعة اهلا به
و اللى يحب يجى بعد الصلاة هنكون فى انتظاره
بس يفضل يكون الناس كلها حاضرة على الساعة 2 الضهر

و اخر حاجة فرحت جدا لما عرفتها
ان الجمعية قالت ان البؤجة اللى عملنها كانت احسن ملابس وصلت لهم من سنين
ياريت تانى نحاول نكون ايجابيين و كمان بمستوى كويس
و متنسوش تبلغوا كل اللى تعرفهم فالدال على الخير كفاعله

و احب افكركم

بيوم 7- 11 و ده يوم التبرع بالدم بدعوة من مدونة خيخة

و يوم 14 - 11 و ده يوم لعمل خيرى بدعوة من مدونى بورسعيد و التفاصيل هتكون هنا او على الفيس بوك هنا

و اخيرا

اتمنى يا بابا ابو خالد تقدر تيجى و تشارك معنا كعادتك فى عدم التأخر فى فعل الخير .. يارب تيجى