اولا
انا عارفة انى مقصرة فى دخول عالم التدوين و بقالى كتير مش بزور حد بس هى حالة كده غريبة - مش زهق منكم و الله - بس انتم كل يوم بتفقسوا زيادة عن اللزوم ..يا جماعة الريدر خلاص رافض يتحمل اكتر من كده و بستعين بريدر الجيران ..ده غير بقى احساسى انى مش قادرة اقرا و اتفاعل مع اللى بقراه ..معرفش ده حالة تشبع و لا لامبالاة و لا ايه بالظبط ..المهم يعنى اعتبرونى فى اجازة وهمية .. انا هنا بس مش هنا
ثانيا
عندى تاج من زمااان و ضميرى وجعنى انه مرمى كده و بقى خردة و هو من قطتى الجميلة ميرا صاحبة مدونة حاجات تغيظ و هى اخدته من صاحبة مدونة مخنوقة .. و بصراحة انا شاكة كده ان هو السبب فى الحالة اللى انا فيها فقلت اخلص منه و ارميه على اى حد تانى
هههههههههههه
******
اسمك ؟
داليا
المشهورة به وسط اصحابك ؟
بين المدونين ..قوس قزح
بين غير المدونين .. دودو
سنك ؟
و الله السؤال ده لاى واحدة خارج العشرينات بيضايق سوا اصغر او اكبر
المهم يعنى انا فى التلاتينات
مجال دراستك ؟
لغة عربية و دراسات اسلامية
و دبلومة فى التنمية البشرية مع وقف التكميل
اسم مدونتك ؟
انظر الصفحة اعلى
الصورة الرمزية لمدونتك بتعبر عن ايه ؟
و الله الصورة كانت لبنوتة صغيرة ملفوفة فى شال ملون و اختارتها لتلت اسباب البراءة اللى فى البنت و الالوان اللى معرفش ليه مخى متبرمج على اساسها و ان البنت فيها شبه من بنتى .. بس من كام يوم قررت اغيرها بسبب تعليقات سخيفة عليها ..و اختارتها لجنية قوس قزح يمكن لانها خيالية زى عالم التدوين
هل فكرت فى اغلاق مدونتك ؟ و السبب ؟
اه فكرت كتير بصراحة و اللى بيخلينى اتراجع حاجة واحدة .. التجمعات الخيرية اللى ممكن يكون سبب فيها المدونة دى
اما عن السبب فهو كل مرة مختلف بس واحد من الاسباب و يمكن ده اللى موجود حاليا انى مش ملاحقة اتباع الناس و مش قادرة ارد على حد و حد لا
ايه رد فعلك لو حد قل ادبه عليك فى التعليق ؟
و الله لو هو داخل يقل ادبه و يسيب تعليق شتيمة و يمشى فبحذف التعليق و مش بعتبره شخصى
لكن لو داخل علشان يقل ادبه و هو قاصدنى شخصيا ..فدى الحمدلله محصلتش لحد دلوقتى
اسوء مدونة ؟
دول بقى نوعين من المدونات
الاولى اللى بدخلها اول مرة و اقرها و اخرج منها زى ما دخلتها يعنى بدون ما تعلم جوه عقلى بأى فكرة ..هنا بحس انها سيئة و مش بدخلها تانى
و النوع التانى هو المدونات اللى بتصرخ .. يعنى تحس انك سامع حد بيردح و يزعق و خلاص لمجرد لفت النظر له .. غالبا الناس دى معندهاش فكر ..عندها لسان بس
لكن لو السؤال ده علشان اقول اسمه بعينه ..فهنا اقول مينفعش اقول لان للاسف الاسوء ده متغير و كل كام يوم بكتشف اسوء جديد
هيحصل ايه للايميل بتاعك لما تموت ؟
يحصل اللى يحصل هو انا وقتها هكون فى ايه و لا فى ايه هههههههه
السفر بالنسبة لك ايه ؟؟
كل الناس هتقول ان السفر احلى متعة و انه و انه
لكن انا شايفة ان السفر متعته فى رفقاء السفر
يعنى يهمنى الناس اللى معايا اكتر من المكان اللى احنا فيه
و يبقى طبعا جميل لو الناس بحبهم و المكان جديد و رائع
المود بتاعك ؟
زى الوان قوس قزح بالظبط ..كل يوم بلون .. بس ربنا الحمدلله مدينى نعمة انى اقدر اعمل كنترول على موودى و محدش يحس به غير القريبين منى بس ..من الاخر كده بعرف البس ماسك وقت اللزوم
بتعمل ايه فى وقت فراغك ؟؟
يعنى ايه وقت فراغ اصلا ههههههه
اهو انا بحس نفسى زى ام العروسة فاضية و مشغولة ..و مفيش حاجة تشغلنى وابدا فيها و اكملها ..لان قبل ما تكمل بنشغل بحاجة تانية
بس عندى هوايات كتير لما بيكون لى مزاج بعملها و اغلبها هوايات يدوية
الاكلة المفضلة ؟
اى اكلة معمولة كويسة و بحرفنة بتبقى حلوة .. زمان مكنتش باكل كل انواع الخضار .. لكن دلوقتى عادى المهم الطريقة
الصفات اللى ورثتها عن والدك ؟
انى اكون اجتماعية .. لبقة .. لاماحة ..حريصة فى اعطاء ثقتى للناس
الصفات اللى ورثتها عن والدتك ؟
الشكل .. السمع اكتر من الكلام و احتواء اللى قدامى مهما كان ..الهوايات ..كل ده راى الناس لانى مش عارفة هى كانت صفاتها ايه
اكتر ست حاجات بتكرها ؟
هقولهم عن صفات فى البشر
ان حد يفتكر نفسه اذكى من الكل .. بكره نوعية الغباء ده
التكبر و الغرور و المنظرة
الكدب لمجرد الكدب
استغلال المشاعر بكل انواعه
اقتحام خصوصية الغير بدون اذن
الاستظراف
اكتر ست حاجات بتحبها ؟
الاجابة بردو عن حاجات مش اشخاص
الالوان
اسكندرية و البحر
الفسح و الخروج مع ناس بحبهم
الناس الطيبة ..اللى بتحسهم قريبين من قلبك من اول ما تشوفهم
الحضن المليان حنان ..و مش بقصد حضن الرغبة
بفرح لما بشوف اتنين بيحبوا بعض بجد
شخصيتك نوعها ايه ؟
لا معرفش اجاوب على سؤال زى ده لان مفيش صفة واحدة ممكن الواحد يصف بها شخصية حد
الشغل بالنسبة لك ايه ؟
استقلال فى كل حاجة
لماذا دخلتى عالم التدوين ؟
كنت بقرا كتير للمدونين و لاقيت ناس منهم اختفوا و كان نفسى ارد عليهم فقلت الحق اقول اللى فى نفسى للباقى
اجمل كلمة اتقالت فى وصف مدونتك ؟
بحب كلمة فاتيما اوى .. وش الخير
ياريت فعلا تكون مدونتى وش الخيرللناس
اهمية التعليقات بالنسبة لك ؟
بيهمنى اعلق عند الناس اكتر ما هم يعلقوا عندى ..و يمكن كتير يلحظوا ان تعليقات ممكن تكون افضل من انى اكتب بوست
احسن بوست كتبته ؟
هو مش احسن بوست لكن اكتر بوست كتبته و انا متأثرة به هو بوست اطفال ابطال
افضل بوست قراته ؟
فى كتير بصراحة و صعب تحديد بوست معين
افضل مدونة قراتها ؟
السؤال ده اجابته على الريدر ههههههه
النت بالنسبة لك ايه ؟
عالم تانى بعيشه بجانب الواقع ..يمكن الواقع اهم منه ..لكن العالم على النت ميزته انه اختيارى و دى مش موجودة فى الواقع
تمرر التاج لمين ؟
بما انه تاج خردة
و ملبوس من كل الناس تقريبا
و محدش مجاوبش عليه
فانا هحطه على باب المدونة صدقة للى محتاجه لحد معاد البؤجة علشان احطه فيها
.
.
سلام بقى و متنسوش حكاية الاجازة الوهمية
يعنى اى حد عايزنى يقول جزر هاجى على طول :)
.jpg)
