شخابيط

شجرة الحياة
خطوطها شخابيط
لو قلت لى
طول الخط سعيد
اقول فى بالى بيدارى خيبته
و لو قلت لى
طول الخط تعيس
اقول فى بالى مش مقدر عيشته
خط الحياة بياخدك لفوق اوقات
تحس ان مفيش فى السما غيرك
و ينزل بك اوقات
تقول يارب ارحمنى ماليش غيرك
يا طالع و نازل
الخط لو يستقيم
تكره حياتك و تمل
ما الحلو متعرفوش حلو
الا لما تدوق طعم المر

هنعيد وهنفرفش .. بس مش هنتحرش

فى كتير من المدونات دعوة لعدم التحرش فى العيد
و بيتكلموا عن المتحرش و ازاى هو انسان خسيس
و ازاى لازم نحس بالامان و نطلع من رمضان لسه محافظين على القيم الروحانية اللى فيه
و ده لينك الجروب صاحب الدعوة

لكن انا عايزة اتكلم عن حد تانى
عن الشخص اللى بيتفرج على التحرش و لا كأنه بيتفرج على فيلم اكشن
و مش بيحاول يساعد البنت اللى بيتحرشوا بها
و ده شوفته فى الفيديو بتاع التحرش سوا فى العيد او الاستاد
الشباب واقف يتفرج عاااادىجدا و منهم اللى مبتسم زى ما يكون لاقى فرصة يتفرج على موقف زى ده

ان كان المتحرش انسان مريض نفسيا فالشخص المتفرج لا عنده نخوة و لا شهامة و لا رجولة بالاضافة انه جبان

المصيبة هى ان كان المتحرش شخص واحد فالشباب اللى بتتفرج بيكونوا مئة

هى اللامبالاة هتوصل بينا لفين
محتاجين ايه يحصل قدامنا علشان نتحرك و نقف جنب انسان محتاج مساعدة
و ياترى لما نساعد هنساعد المتحرش و لا المتحرشة بها
كلمة و انا مالى هتفضل تكبر لحد ما تتلف حوالين رقابتنا
و نلاقى فى يوم من الايام المتحرشين بيهاجموا البيوت زى الحرامية و هم عارفين ان رجالة البيت هتعمل نفسها نايمة

انا مش هنادى بان هعيد و افرفش بس من غيرتحرش
لكن هنادى بان هعيش و اموت من غير ما اشوف تحرش و اسكت

لقاءنا التالى

تحديث
اسعار وجبات الفطار فى المكان من 45 ل 50 جنيه
للى يحب يسبق و يفطر هناك

.
.
بعد الاستفتاء على موضوع اللقاء تانى
وترحيب الكل به تقريبا
هيكون فى لقاء تانى ان شاء الله يوم الاحد 13 سبتمبر
بعد الفطار فى نادى القوات البحرية
و هو على النيل بجوار سوفتيل الجزيرة - شيراتون الجزيزة سابقا
و اقرب محطة مترو انفاق له هى محطة الاوبرا

النجمة فى الخريطة هى مكان النادى

و اسعار النادى معقولة جدا
و اللى يحب يفطر هناك ان شاء الله خالد هيجب لنا تفاصيل الاسعار و وجبات الفطار بكرة

الدعوة مفتوح للكل
و اللى يحب يعزم حد معاه من غير المدونين اهلا و سهلا به

اعتذار و شكر و طلب

تحديث جديد

الف حمد و شكر لك يارب
بنوتة جميلة اسمها اميرة
كانت من المتبرعين معنا يوم الفطار
ربنا يسرها و لاقيت الدوا
و كلمت المسئول بالمستشفى و كان سعيد جدا الحمدلله
و هيبعت يجيب الدوا
شوفتوا اد ايه الخير الجماعى ممكن يفرح قلب ام و يساعد طفل على انه يعيش
جزاكم الله كل خير على سعيكم فى انكم تلاقوا الدوا
انا كنت واثقة انكم هتكونوا ادها و نص كمان

تحديث
يا جماعة ده شكل العبوة بتاعت الدوا


اولا
بعتذر لكل مشارك معنا على اى حاجة حصلت و كانت سبب فى انها تضايقه و يمكن بالاخص حكاية تاخر الاكل بتاع الفطار عليهم و طبعا عندكم حق و يمكن اللى كان بيهدينى شوية ان الشباب اللى بيقدم لنا الفطار هم كمان صايمين ..و ده غير ان طاقة المكان من 25 ل 30 فرد و احنا كنا 48 فرد غير انهم عرفوا طلباتنا على الساعة 3 ونص تقريبا علشان مشكل الناس بلغتنى هم جايين و لا لا و عايزين وجبات ايه .. فاكيد كان ضغط عليهم و يغفر لهم ان الاكل كان حلو و اغلب الناس شكرت فى الاكل و اسفة على اللى حصل وقت الحساب و اللغبطة دى بس بصراحة خالد و احمد سكر قاموا بدور البودى جارد تمام :)


ثانيا
باشكر خالد همس الاحباب لان لما قلت له على فكرة الافطار و انه يبقى معايا فيها وافق فورا و بدا شغل على الفكرة من قبل رمضان فى وقت سفرى و من اول ما نزلت البوست و هو زى النحلة قبل الفطار و بعد الفطار علشان يقابل الناس المتبرعين و يوم اللقاء كلنا شوفنا ازاى مش قعد لحد ما روحنا كلنا و كان زعلان ان فاتيما كمان مشيت بدون ما يوصلها علشان متمشيش لوحدها

باشكر فاتيما و سوما مجنونة من بلد عاقل على الشغل اللى عملوه مع الاطفال من بدرى .. فعلا فنانين و عندهم صبر و حب للخير و ده صور الجزء اللى فات الناس الصبح و الشغل اللى عملته فاتيما لهم هى و سوما



دى فازة عاملتها فاتيما فيها ورد بياخد منها الطفل الخارج من المستشفى وردة يوم خروجه منها

و دول الاطفال و هم بيلونوا التيجان اللى عملتها فاتيما و سوما






باشكر خيخة على متابعتها معايا على طول و مجهودها فى جمع التبرعات و توزعها

و رحاب اللى بالرغم من انها كانت راجعة من السفر لكن جات و فضلت معنا لحد الفطار

و باشكر كل شخص شرفنا بالمشاركة بالتبرع او بالمجهود او الاتنين سوا وليد .. عارفة مش عارف ليه - مصطفى ريان - شيماء فضفضة اونلى سبوت أ. محمد شوية كلام - أحمد كمال رحايا العمر - أسامة عبدالعال
أم بتول تعالوا نحلم ببكرة - شاهى مفيش حاجة و محمود الشنيور أبنها العزيز أحمد سكر - ميرا وومن أمراءة بعقل رجل - كيكى عووو فكك منى - محمود الدوح ساجى - مهاميو أحسن تستاهل و ميرو النيرو كراكيب اختها - دعاء مواجهات - ضياء بيتوفل مايند - كيارا عالم مولان - نور الدين محمود - عمرو أن نوون - سامح عزت خواطر خاطر - الأستاذ شريف -عسقول عسقلانى الاخلاق - دريم فضفضة ع السريع و بناتها الحلوين -علا صيدلانية طالعة نازلة و جوزها و ولادها سيف و شادن - داليا صديقة فاتيما -شريف ابن خيخة - عادل البلد دى فيها حكومة -
صاحبة مدونة هلفطة Am fOpa'D
و كان معها اصحابها
- أحمد الصباغ- صاحبة مدونة رنون و اختها - مدونة كمان اسفة نسيت اسمها و اختها
-الصحفية سهام شوادة صاحب مدونة ابو على - عبد الرحمن - نضال
و من بورسعيد جت إيناس نهر الحب - و اختها نسمة هيا فوضى
و ناس كان لها مشاركة و لم تستطيع الحضور
منذر - شمس النهار -مدون رفض ذكر اسمه - عدى النهار - جنى يوم جديد - ايناس - رامى - اميرة - ستيته حسب الله الحمش - ياسر عبد الفتاح - ايمان المصرى - فاعل خير - حنين القلب - ahmed-k - محاسن صابر - مروة - سبايدر بوى
و يارب ما كون نسيت حد
و ناس كتير من خارج التدوين منهم ابنى كريم :)


ثالثا
طلب من كل واحد يقرا البوست ده انه يكتب اسم الدوا ده عنده
pulmicort
ويسال عليه فى الصيدليات القريبة منه
تمن الدوا موجود بس الدوا نفس فيه نقص فى السوق
الدوا ده لطفل محتاج ياخده علشان يقدر يخرج من المستشفى
ارجوكم ساعدوه انه يخرج بس بالسؤال عن الدوا انه موجود



اخيرا بقى
ناس كتير بتطلب منى اعمل لقاء تانى فى رمضان اجتماعى للتعارف بين المدونين فايه رايكم و مين يحب نتجمع تانى على الفطار او بعد الفطار ؟