Monday, May 5, 2008

هات حريتى تاخد حريتك


الحرية

من منا لا يبحث عنها

و يتمنى ان يكون حر من كل قيوده

لكن اتدرى انك من تحبس نفسك و تمنع حريتك بيدك ؟؟

تعالى اقولك ازاى

لازم تعمل حدود لانسانيتك محدش يقرب منها

لازم يكون لك مساحة خاصة لك لوحدك تعيشها بحرية

و فى نفس الوقت تحترم حدود غيرك و تفهمها

يعنى مثلا

لو انت زوج ليه مفترض ان زواجك سجن لحريتك ؟

ليه تفترض ان زوجتك هى مجرد شخص بيراقب تصرفاتك فى البيت وبره البيت ؟ ليه ميكونش فى مساحة لكل واحد فيكم و خصوصية محدش يقرب منها ؟

ليه الزوجة تفترض ان الزوج لو حر اكيد هيبقى خاين ..هو المحبوس و المتراقب ميقدرش يخون ؟

ليه نقول كل حماة فى الدنيا عايزة تتحكم فى فينا ليه منقولش دى ام و نتعامل معها كأم

طيب هو لو مامتك قالت انت لازم تساعدنى فى ده و فى ده تبقى مساعدة عن طيب خاطر و لو حماتك قالت ده يبقى جبروت منها ؟

ليه بنزعل من اولادنا لو قالوا اه بنفرح بخروج مع اصحابنا اكتر .. الله هو انت مش برده زيه و بتفرح بخروجك مع اى جروب من ايام المدرسة او الجامعة و بتهرب من البيت اول ما تلاقى خروجة معهم ؟

ليه لما البنت تحب لازم تعمل جدار مسلح حوالين مشاعرها علشان عيب تقول انها حبت لامها او ابوها ؟ هو انتم اتجوزتوا ازاى و عايشين ازاى !! من غير حب ؟؟

ليه نزعل من حد بيدارى على شمعته مع اننا ممكن نعمل زيه و اكتر ؟

ليه تحب تعرف اخر الاسرار الخاصة لغيرك هو انت تحب حد يعرف اسرارك ؟

ليه نستغرب لما حد كبير يقول عايز اتجوز و اعيش حياتى .. هو انت لو كنت مكانه هترضى تعيش وحيد علشان الناس متقولش عليك خرفت ؟

و حاجات كتير غير كده بنشوفها عادى و هى بتاخد من حريتنا و حرية غيرنا

لازم نفكر ايه لنا و ايه علينا

مينفعش احب الحرية لنفسى و انا مش قادرة اديها لغيرى

منعك لحرية غيرك كأنك بتقول من حق اى حد كمان يمنع حريتى

و الحرية لو عايزها و عايز تحس بها اعرف معانها و حدودها و اديها للى حواليك الاول هتلاقى حريتك رجعتك

حرر نفسك من انك تكون تابع لمنهج معين و عيش حياتك بمنهجك انت

حرر قيودك من بعض التقاليد و العادات اللى مالهاش معنى

حرر تفكيرك و عقلك

كون انسان بالفطرة زى ما ربنا خلقك

كن حر تكن انسان سعيد

33 comments:

cenotaph said...

انا ليه الشرف اني أبأه أول تعليأ كلامك عقلاني جدا و انا مؤمن بيه لاننا عملنا الblogs بتاعتننا عشان نلاأي مساحه للحريه.كملي على طريأك ده ان شاء الله هتبأي أحسن كاتبه في الدنيا

Sherif said...

Rainbow العزيزة

دعوت لك فى الكعبة بأن يصلح الله لك حالك .. ويرزقك من أوسع الأبواب .. ويحفظك من كل شرّ

اللهم تقبل دعاء

Rainbow said...

cenotaph

انا اللى شرفنى مرورك و ياريت فعلا يكون كل واحد دخل عالم التدوين هدفه انه يبحث عن الحرية مش انه يخنقها

تحياتى

Rainbow said...

شريف
حمدلله على السلامة
بجد والله دعيت ليا ؟
ربنا يكرمك يا رب
و يتقبل كل دعاءك لكل الناس

و تكون عمرة مقبولة ان شاء الله

اهو ده عيبه said...

اولا مدونتك جميلة وبكل الوان الدنيا
مشكلة اغلب الناس انها مش فاهمه ان حدود حريتها تنتهى عند حرية الاخرين
وان من حقهم يدخلوا فى حياه غيرهم لكن حياتهم هما قدس الاقداس اللى مش من حقى اى حد يتخطاه
وللاسف ده طبع موجود فى الشرقيين اكتر من غيرهم اضافه الى عدم وجود خصوصية وحب الاحكام المسبقه على الناس
تحياتى ليكى

دكتور مستكنيص said...

بحس اننا دايما اللي بنخنق حريتنا بايدينا حتي لو كان ده في هيئة كبت لحرية اللي قدامنا لاننا كون اني عند وقت ودماغ اني اخنق علي مراتي او ولادي او جاري يبقي انا بقتطع من الوقت اللي بخصصه لنفسي ولتكفية جوانب حياتي الكتير اوي او بمعني اصح بقلل من حريتي وانا عن نفسي احلي اوقاتي مع الناس اللي حواليا اما ببقي مشغول وناجح في اللي بعمله بحس اني نسمة خفيفة اما بقي لو العكس فربنا مايوريكي
تحياتي

رئـــــيسـة حزب الأحلام said...

السلام عليكم
الحرية اي انسان يتمناها وقد يظل الانسان يبحث عنها فهناك من يفهم الحرية بمعنى التخلى عن التقاليد والعادات وهناك من يرى انها التحرر من العاصى فالمعاصى ايضا قيود تكبل الانسان والحرية هى احساس الانسان بادميتة

appy said...

الحريه لها اسقف لو فهمناها بجد هنبقى مبسوطين
اكتر حاجه ان اللى قدامك يحط فى دماغه انك بتخنقى عليه مع ان مش ممكن يكون قصدك كده ابدا
انتى رقيقه خالص
بس كلنا المفروض نجاوب على ليه دى ونفهما علشان نحل مشاكلنا ونتغير

محمد عبد الغفار said...

محدش يعرف ياخد حريه حد غير نفسه

Rainbow said...

اهو ده عيبه

كلامك صح 100 فى ال 100 و قلت نقطة مهمة و هى ان للاسف فى الشرق التطفل و الفضول على الغير اكتر من الغرب

سعدت بمرورك

تحياتى

Rainbow said...

دكتور مستكنيص

يارب تفضل ناجح و مشغول على طول :))

معلش اعذرنى فى سؤالى هو يعنى ايه مستكنيص ؟؟


تحياتى

Rainbow said...

رئيسة حزب الاحلام
مفهوم الحرية فعلا بيختلف من شخص لاخر
لكن الكل يبحث عنها مهما اختلف مفهومها له و لكى يجدها يجب ان لا يكون سجان لها


تحياتى

Rainbow said...

عزيزتى ابى

الحب ساعات بيخنق الحرية يا ابى من غير ما نحس و نكون فكرين نفسنا اننا بنحافظ كده عليه
علشان كده لازم نعرف حدود حرية اللى قدامنا ايه و ايه بيحس انه تدخل فى حريته و المعرفة مش عيب ولا غلط

انت ارق .. زى الفراشة

تحياتى

Rainbow said...

محمد عبد الغفار
للاسف فى بعض الحالات يكون الانسان تحت حكم انسان لا يرحم

تحياتى

Sherif said...

يعجبنى جدا طريقة تفكيرك وتحليلك للأمور
فكلها تتسم بالغقل والحكمة

سعيد بمرورى على مدونتك

الربان said...

تحياتي

في رأيي ان الحرية اجمل ما في الكون...

و لنعلم ان الحرية اما أن تُسعد او تُشقي....تسعد من تعامل معها صح..و تُشقي من أخطأ في تعامله معها...

التفاهم و الحب الأسري خير حماية للحرية
و مساحة من الحرية مطلوبة لكل من الزوج و زوجته...

الحماه.. لو تعاملنا معها كأم ستكون
الامور ايسر و أجمل بكثير...لكن المشكلة
ان يعض الناس يتعامل بغير هذا...و ايضا بعض الحموات يتسببن في فقد الثقة
بينهن و بين الاخرين.

افضل حماية للبنت..و الولد ايضا..ان يتم تشجيع و تحفيز كل منهما علي ان يكون له قنوات اتصال مفتوحة مع الام
و الاب و الاخوة....حتي في حالة الحب.

تحياتي و تقديري

Rainbow said...
This comment has been removed by the author.
Rainbow said...

شريف

انا اللى اسعد بزياتك لمدونتى ده شرف ليا

و اشكرك على كلماتك الرقيقة

تحياتى

Rainbow said...

الربان

دائما تعليقك يكون تحليل وافى

اشكرك على اهتمامك بكل صغيرة و كبيرة فى ما تحدث عنه

تحياتى

أبو خالد said...

أختى الفاضلة/صاحبة مدونة قوس قزح
أعجبنى تحليل حضرتك لمغزى الحرية
و أعجبنى قولك " حرر نفسك من انك تكون تابع لمنهج معين و عيش حياتك بمنهجك انت
حرر قيودك من بعض التقاليد و العادات اللى مالهاش معنى
حرر تفكيرك و عقلك
كون انسان بالفطرة زى ما ربنا خلقك
كن حر تكن انسان سعيد "
ولى تحفظ بسيط هو أن نكون طوال الوقت
عباد لله تعالى لأن هذا هو السبب فى و جودنا فى الحياة
دمتى إنسانة تملكين فكر راقى .

Rainbow said...

سيدى الفاضل ابو خالد

لك الحق كل الحق فى تحفظك ، فمن فطرة الانسان اللتى خلقها الله بداخله منذ ولادته فطرة التوحيد و ما نحن سيدى خلقنا الا لنعبده الواحد الاحد

تحياتى لك
على فكرة اسمى داليا بدل صاحبة مدونة قوس قزح :)

الإتربي اللولبي said...

عندك حق ف كل اللي قلتيه عن الحريه

بس لو ابتدت الحريه من فوق هايبقى لها طعم تاني .. الشعب دلوقتي مخنوق بلقمة عيشه .. عشان كده كل واحد بيحاول يتدخل ف حياة غيره عشان يحس بالسيطره و بالتالي بالحريه المزيفة

مدونتك تحترم

و اعتبريني أحد زوارك المستديمين

و شكرا على مرورك عندي

سلام عليكم

سكــر said...

ليه الزوجة تفترض ان الزوج لو حر اكيد هيبقى خاين ..هو المحبوس و المتراقب ميقدرش يخون

تصدقى

انا جبت اممحمد تقرأ الجمله دى بالذات

تحياتى

موضوعك جميل جدا

تقبلى مرورى

احمد سكر

Rainbow said...

الاتربى اللولبى
تفتكر هتبدا من فوق ازاى اذا كان الاساس مش فاهم ايه هى حرية ولا بيحترمها

ليس هناك مبرر لسلب حرية الاخرين

يشرفنى ان تكون دائما من زوار مدونتى

تحياتى و شكرا لك

Rainbow said...

سكر

امممم هى ام محمد بتعمل معاك ايه بالظبط ؟؟
يارب بس تصدق هى كلامى لانه عن تجربة من خلال ناس كتير

ربنا يخليكم لبعض
و اشكرك على مرورك

تحياتى

momken said...

ايه الجمال ده
كلام يتاق بالدهب
فعلا الحريه هى ان تمنح الحريه للاخر
قال رسول الله صلى الله عليه وسلم
(لايؤمن احدكم حتى يحب لاخيه ما يحب لنفسه)
صدق رسول الله صلى الله عليه وسلم
انا شايف لو كلنا تحركنا من منطلق الحديث ده
هنرتتتتتتاح اووووى

البوست بتاعك جميل جدا
وانا بمنتهى الحريه
باقر بانى معجب بكلامك جدا وبطريقه تفكيرك الحره جدا

تحياتى

Rainbow said...

عزيزى ممكن

شرفتنى جدااا بزيارتك
اعتقد لو احنا تحركنا من منطلق الاسلام هنرتاح اكتر
لو اخدنا سماحة الرسول وسنته قدوة لنا اكيد هنبقى افضل كتير

اشكرك على الحديث الذى لخص ما كنت اريد قوله

تحياتى و مودتى

همس الاحباب said...

اجمل شىء فى الوجود الحرية بلا شك
الحرية اسمى الامنيات
حتى الطيور والعصافير بتحب الحرية مهما وفرنا لهم الاكل والماء وكل ما يحتاجونه
بس هى غريزة وبنحب الحرية
وطبعا انا متفق معك فى كل كلامك
وتحليلك لواقعنا ومشاكلنا الملموسة
تحياتى وتقديرى
خالد

رندا said...

انا جيت اهو زى ماوعدتك

وفعلا من اول لما قريت البوست قلت
انت قلب حساس بالفطرة
تختنقين من عدم الحرية
وتسئلين لماذا من فرض القيود ؟

راى فى الشخصى

عندما تخنقنا الدمع وتطلب منا الحرية هل بيدنا ان نطلق عنانها

عندما نختنق بحب ليس بيدنا تركة
هل بيدنا ان نطلق سراحة

عندما نختنق باسراب الوهم
فهل بيدنا ان نستشعرفى البادئ اوهامة

فلا بيدنا هذة الحرية
ولا نستطيع ان نتلمسها
ومع كل هذا

اذا سمعنا كلمة بحبك فنظل اسرا لهذة الكلمة ولا نطلب الحرية

وعندما تهمس الاحرف طريق قلوبنا فلا نطلق لها اى حرية بل نجعلها بداخلنا اسيرة العفوية

عجبا على دنيا نطلب فيها الحرية
ونطلب فيها العبودية

هذا رائ الشخصى ممكن اكون غلط وممكن صح ولكن هذا هو الواقع

بوست هايل دمتى بكل حرية

رندا

Rainbow said...

خالد
اسعدنى مرورك
و دمت حرا


تحياتى

Rainbow said...

رندا
وجعتى قلبى
و البوست الجديد رد على كلامك

اشكرك على مرورك و احساسك

تحياتى و حبى

محمد عبد الغفار said...

اياً كان كل ما يستطيع السيطره عليه هى مظاهر الحريه

اما حريتك الحقيقية ففى عقلك وقلبك ولا سلطان لأحد عليهما

Rainbow said...

محمد عبد الغفار
فى ناس بتعرف تعمل غسيل مخ و كمان غسيل قلب
ده طبعا غير غسيل الجيوب المستمر لنا :)