Wednesday, July 2, 2008

بيكا للخير


اوقات كتير بنكون عايزين نعمل خير و مش عارفين ازاى و لمين
و اوقات تانية بيكون عندنا حاجات مش محتاجينها بس حالتها ممتازة و بردو مش عارفين نعمل فيها ايه و خصوصا لو غالية او قيمة




النهارده انا عندى حل لكم




كل اللى عليك هو انك تقول عايز اشارك معاكم سواء عايز تعمل خير او عايز تستفيد بالحاجات اللى عندك و تبعها


فى اليوم النسائى قررنا نعمل مدونة بسيطة اسمها بيكا للبيع كان همها ان اى كراكيب زيادة فى كل بيت تتباع فيها .. منها نتخلص من الكراكيب اللى فعلا بتأثر على الحالة النفسية من غير ما نشعر و فى نفس الوقت اللى محتاج لحاجة يكون سعرها كويس او مش فارق معاه انها تكون نص عمر بس حالتها كويسة يستفيد بالشراء


و دى مش فكرة جديدة فمثلا من اشهر المواقع للبيع و الشراء على الانترنت هو موقع ال اى باى و ده اغلب الحاجات المعروضة فيه مستعملة او جديدة بس مش مناسبة لصاحبها او حتى ناس بتشترى الحاجات بالجملة و تبعها عليه بالقطاعى


يعنى بمنتهى البساطة انت كسبان


اولا هتتخلص من كراكيب


ثانيا هتكسب فلوس من البيع


ثالثا لو انت شارى هتشترى بسعر اقل


!! طيب لو انت مش بتحب تشترى المستعمل او مكسوف من البيع


هنا هنقولك تعال اعمل خير اشترى الحاجة و اديها لحد فقير او اى يتيم .. او بيع الحاجة و ادى فلوس بيعها لاى بيت محتاج معونة


قوم دلوقتى افتح دولابك و شوف كام حاجة انت بتستخدمها منه و كام حاجة ممكن تستفيد بها لو حطتها فى مدونة بيكا للبيع او للخير


و متخفش و تقول ايه يضمن .. لان الناس اللى عاملين المدونة ناس معروفة و لها اسمها و تخاف عليه

و الحاجة هتكون معروضة قدامك و اسعار المزاد قدامك

و لو اتبرعت بفلوسها هيوصلك على ايميلك صورة من ايصال التبرع للمكان اللى راحت له الفلوس


اما اذا كنت مكسوف من انك تبيع او تشترى فبردو متقلقش لان من حقك متقولش انت مين الا للمسئولين عن المدونة


و من حق البايع كمان يختار بين ان الحاجة تنزل مزاد و تتباع لاعلى سعر او انه يحدد سعر معين للحاجة

ملحوظة : فى اول مزاد على المدونة بعض الناس اخدوا الموضوع هزار و ده شىء عادى بين الاصحاب لكن دلوقتى الموضوع اصبح له جانب خيرى و هنا صعب ان يكون الهزار موجود .. ياريت كل شخص يدخل المزاد يكون جاد فى عرضه



و اخيرا دى لائحة بشروط و قوانين المدونة هنا

35 comments:

Ehab said...

جميله قوي الفكره دي بجد
بس انا مش عارف انا عندي حاجه تنفع ولا لأ
عموما هاراجع كده المور وربنا يسهل انشاء الله
ربنا يجعله في ميزان حسناتكم جميعا ويحفظ كل من ساهم في الفكره

ياريت فعلا كل واحد يفكر بيإيجابيه كده كان زمان مجتمعنا ده اتغير كتييييييييييييير قوي عن اللي احنا وصلنا ليه دلوقتي

سلاااااااااااااااااااااام
اخوكي ايهاب

Doba said...

فكرة متميز للغاية وسأشارك لما أقدر أشارك معاكم ولكن اتمنى لكم التوفيق وأن يتقبل الله صالح أعمالكم

تحياتى
هبة

قوس قزح said...

الشنكوتى الكبير

ايهاب نسيت اقول فى البوست ان اول تعليق هناخد منه نص دولابه للخير هههههه

يلا بسرعة شوف ايه مش محتاجه و اعرضه للبيع او للخير

سلاااااام

قوس قزح said...

doba
نورتينى بمرورك
و مستنين مشاركتك علشان تاخدى الثواب معنا ان شاء الله

تحياتى

Ahmed Kamal said...

أولا و بدون مقدمات لو في غرامة على خامس تعليق حاسحبه فورا !

ثانيا مبروك مشروع البيكيا ، و إن شاء الله الغلابة يستفيدوا معاكم .

ثالثا حصل بينا توراد بوستات عند فاتيما :) أرجو المعذرة !

•√أريـ السمر ـج√• said...

حقيقي فكرة أنها تبقى بيكا للخير روعة .. لأن فعلا فى ناس كتير بتحتاج اشياء مهملة عندنا و بتعنى لها كتير


دمتى بكل الخير
و اسعدنى المرور

NilE_QueeN said...

فكره مفيده جدا
ربنا يوفقكم

ftafeet said...

3ala fekrah begad hayel awe elmawdo3 dah
isa awel ma anzel masr ha7awel asa3edko


nonaaaa

قوس قزح said...

احمد بصراحة عايزة اقولك ان الجاكت بتاع البدلة اللى فى الصورة داخل فى الغرامة حتى لو كنت التعليق ال 100

ايه حكاية توارد الخواطر معاك !!
حكيم روحانى حضرتك !!؟ :)

قوس قزح said...

أريـ السمر ـج

هى من الاول فكرة خير بأننا نساعد بعض بحكاية البيع ده
ويمكن لان هدافها من الاول خير ربنا خالنا نتوسع لخير اكبر
و ياربنا نقدر عليه بمساعدتكم

اسعدنى مرورك جدا :)

قوس قزح said...

نيل كوين
شكرا لمرورك بمدونتى
و يارب تقدرى تستفيدى من الفكرة دى معنا

تحياتى

قوس قزح said...

فتافيت

انتى هيحصلك سطو مسلح على حاجاتك و من غير تفاهم :)
عايزاكى تدورى على الالعاب الشقية بتاعتك القديمة و تطلعيها و تجهزيها كده علشان نشوف بنوتة امورة يتيمة تلعب بها

ده مهمتك لما ترجعى ان شاء الله يا جميل

Unknown said...

داليا بحييكى بجد انتى وكل المشاركين فى المدونة لانكم عملتوا حاجة فعلية على ارض الواقع غير ناس كتير مقدرتش تعمل ده


تقبلى تحياتى

موناليزا said...

جميلة الفكرة وان شاء الله تجد صداها قريبا
اعاننا الله جميعا على فعل الخير

ادم المصرى said...

جعل الله ذالك العمل فى ميزان حسناتك

فكرة كويسه والصراحه احنا بنعملها بالكلية

مشكور اخى للفكرة الحلوة

قوس قزح said...

هيثم الدهشان

اشكرك على تشجيعك و على كلامك
و ياريت فعلا الناس تشارك معنا فى عمل الخير

قوس قزح said...

موناليزا

جميلة الفكرة اه بس واضح ان الاهتمام بها قليل للاسف :(

شكرا لمرورك

قوس قزح said...

همس الاحساس

طيب جميل جدا انك عايشة التجربة دى يا ريت تقولى لنا هل هى ناجحة و لا لا

و هل ممكن نساعد فيها كمان و لا ايه

شكرا على زيارتك الاولى و اتمنى متكونش الاخيرة

محبط افندى said...

السلام عليكم

مدونة محبط أفندى

مدونة ..بس للمحبطين ..
ومين فينا مش محبط من حاجة ؟؟

بس يلا بينا ..نحاول اننا نخرج من الاحباط دة

ونشوف اخرتها ايه!!

ونعيش مع الامل ..وياااارب
:)

نتمنى من الجميع المتابعه .. والمشاركة ..والمساعده


الميل ..
amohbat@yaho.com

عدى النهار said...

فكرة البيع والشراء أونلاين ممكن تنجح جدا فمصر مع الوقت وبناء الثقة فى الموقع

بمناسبة تعليقك على بوست "وحدة قياس" قرأت هنا إجابة على سؤالي عن المبلغ اللي دفعه صاحب أرض مدينتي فى المتر.. طبعاً قبل ما يصبح إسمها مدينتي

maha zein said...

طبعا فكرة جبارة ورائعة ولو كان الحال مش هيمشي سريع في الاول في كمية الناس الي هتستجيب الا ان المدونة انشاء لالله يكون ليها صيت وتحقق ما تتمنوه
ربنا يجازيكمعلي نواياكم
وكنت حبة اسألك علي حاجة
لو انا عوزة اغير مكان بوستات
يعني اخلي بوست فوق بوست او انشر درافت كنت كتباه زمان بس عوزاه يجي في الاول اعمل ايه وخاصة ان الأيديت مش فيه بيست يعني مش عرفة اعمل الحاجة كوبي
لاني بعد ما نزلت اعلان مدونتكم نزلت تاني يوم بوست بتاع المشملة وكان الحل الوحدي عشان البوست الجديد يطلع فوق خاصة وانه كان درافت قديم هو اني اخلي الاعلان بتاع المدونة درافت لحد ما اتصرف
انا اضايقت اني شيلته علطول قبل ما الكل يشوفه
اتمني تفيديني افادكم الله
وبجد تحياتي لكل شخص بيحاول يعمل خير في الزمن ده

الإتربي اللولبي said...

وصلني تنويه عن المدونة دي من مها زين

ربنا يتقبل منكم و يجزيكم خير اللهم آمين

ياريت يا رينبو تقرأي الإعلان اللي في مدونتي

و بالتوفيق مرة تانيه

سلام عليكم

همس الاحباب said...

عامة هى فكرة رائعة جدا
وربنا يوفقكم للخير دائما
الحج عبدالغفور والعائلة

Ahmed Kamal said...

أين أنتي ؟

dodda said...

رينا يكرمك ويوفقك للخير

اهو ده عيبه said...

دوللى ازيك
اولا سعيده جدا لما عرفت انك هتنورينا فى بورسعيد
ان شاء الله تيجى بالسلامه
واحب اعرف ايه اليوم اللى يتناسب معاكى علشان نعمل فيه لقاء للمدونين
ابو خالد بيقولى الخميس او الجمعه
لو انتى موجودة لحد الجمعه يبقى يستحسن لانه مناسب لجميع الاطراف
وكمان سامعه ان سوو وخالد همس الاحباب ورودى جايين
فهل الجمعه يناسبكم كلكم ولا ايه؟
ياريت تردى على فى اقرب فرصه علشان اظبط الحكاية
2hodah3yboh@gmail.com
وشرفتوا ونورتوا مقدما

قوس قزح said...

محبط افندى

يعنى احنا بنشجع الناس و نقول فى امل و انت جاى تتكلم عن الاحباط :))

عموما اول ما يحصلش يا فندم و احس انى هيجيلى احباط هاجى عندك على طول

شرفتنى بمرورك

قوس قزح said...

عدى النهار

اولا سعيدة بزيارتك جدا

ثانيا يارب تنجح فعلا لان الفكرة دى لو اطبقت على المجتمع كله فى اى مكان هتحل مشاكل كتير اوى
بس للاسف فى حالة تكاسل او عدم ثقة ربنا الاعلم

ثالثا شكرا على اهتمامك :)

قوس قزح said...

مها زين

انا اسفة لسه حالا شايفة سؤالك :(
هروح جرى ارد عندك

قوس قزح said...

مها زين

انا اسفة لسه حالا شايفة سؤالك :(
هروح جرى ارد عندك

قوس قزح said...

الاتربى اللولبى

انا قريت الاعلان عندك و مبروك على الفكرة الجميلة دى
و يارب تنجح هى كمان

فعلا لو افكار المدونات الحلوة نجحت هتخرس اى حد يقول علينا ناس هايفة او مدنسة

قوس قزح said...

همس الاحباب

ربنا يقدرنا يا خالد على التكملة فيها
ادعلنا
و اعمل حسابك انك تشارك ان شاء الله حتى لو بهمس هههههههه

قوس قزح said...

احمد كمال

وشى منك فى التراب يا احمد
طبعا لما العمة تختفى فى ظروف غامضة كده وقت الشدة لك حق تسال

و على راى محمد عبد الغفار انا اعلق اذن انا موجود
مشيها تعليقات بس لحسن اختك مزنوقة اليومين دول

قوس قزح said...

DODDA
يارب يا دودا
دعواتك و دعايتك لنا بقى

قوس قزح said...

هو ده عيبه
اولا البقاء لله فى الكمبيوتر بتاعك

ثانيا انا رديت عندك علشان اضمن انك تشوفى التعليق

سعيدة اوى انى هشوفك تانى :)