Wednesday, July 23, 2008

حلاق الصحة الحديث

بالرغم من ان ماليش فى السواقة و معنديش عربية لكن موضوع شنطة الاسعاف دى استفزنى جدا و حسيت انه موضوع فاشل بكل المقاييس
الشنطة اولا محتوياتها ما بين شاش معقم و قطن و لاصق طبى و مقص صغير و مطهر و جوانتيات معقمة و كيس تلج و بطارية
صغيرة
طبعا من الواضح ان المحتويات دى فى اى حادثة عربية استخدمها هيكون بالظبط زى ما تدى واحد مهندس مثلث و مسطرة و جردل و تقوله ابنى هرم
و بعدين الحاجات دى مش لها مدة صلاحية !! مش لها درجة حرارة معينة تتحفظ فيها ؟؟ طيب تاكسى ماشى الساعة 2
الضهر فى زحمة ميدان الجيزة ورامى الشنطة ورا جنب انبوبة الغاز فى شنطة العربية تفتكروا درجة الحرارة مناسبة لحفظ الحاجات دى ؟؟
هل الشنطة دى ممكن نشتري الحاجات اللى فيها احنا ولا لازم من المرور نفسه علشان تكون مطابقة لمواصفتهم ؟؟
و هل فعلا الحاجات اللى فى الشنطة لو روحنا اشترينها من اى صيدلية هيكون تمنها نفس التمن ؟؟ الله خدوا بالكم ايه يعنى لو طلعت
ارخص متهزروش ده اكيد فرق تمن الشنطة الحديد المسلح و انتم عارفين العز اللى احنا فيه و اسعاره
و لو الشنطة دى سعرها مثلا 50 جنيه و هيشتريها 30 مليون واحد يعنى حوالى 1500000000
هو المبلغ ده مينفعش نعمل منه اسطول اسعاف طائر بدل الشنط دى ؟؟
طيب خلاص جيبنا الشنطة لولولوى
و هووب حصلت حادثة على الطريق ..و انا لامواخذة سواق تاكسى على اد حالى و خريج محو الامية ..و نزلت جرى و معايا الشنطة ..مثلا الحالة كانت للمصاب عنده نزيف داخلى وكسر و كدمات (ده طبعا مش تشخيص السواق )..و فتحت الشنطة و لبست الجوانتى المعقم .. طيب و بعدين .. انا هعمل ايه بالحاجات اللى فى الشنطة هشخص الحالة على اساس ايه .. الدم نازل من انهى حتة في المصاب مثلا و احط عليها الشاش و القطن !! ولا اصب المطهر عليه و يبقى كده فلة و يموت طاهر !!
الخوف بقى انهم بعد كده يطلبوا وجود مساعد يكون بجوار السائق يعنى ممرضة متمرسة مثلا يكون لها عداد خاص بها يحسب لها ساعات العمل و اهى فرصة لحل مشكلة البطالة فى مجال التمريض و مشكلة الازواج اللى بيشتكوا ان مفيش قلب حنين بيسمع لهم و شركة صناعة العدادات تكسب و العدادت تكون صلب بردو ده العز و المتانة اساسى فى حياتنا يعنى مكسب لجميع الاطراف
احنا كنا زمان بنحارب حلاق الصحة و بنقول للناس كلها متتعملش معاه و انه سبب فى حالات وفاة كتير
النهارده بالشنطة دى بندى كل واحد بيسوق الحق انه يكون حلاق صحة و يمكن كمان طبيب تحت التمرين فينا
ملحوظة : هو الموتوسيكل بردو له شنطة و لا كفاية عليه كيس نايلون ؟؟
معلومة : فى بوست لى يا جماعة فى مدونة فرنسا و الرايق لو حد يحب بعد الغم ده يضحك شوية

17 comments:

رئيس جمهوريه نفسى said...

طيب انا لاحظت حاجه فى وسط التجهيزات فى ثلج طب ده مش حيبقى مياه من كتر اللف الغريب بقى انى فى خبر فى جورنال النهارده بيقول انى فى شنط غير مطابقة للمواصفات فى السوق اوعى حد يشتريها وخبر امبارح بيقول انى الشنطه تمنها حيكون اربعين جنيه طب ازاى المطهر 10 جنيه كيس قطن 5 جنيه جونتى مطهر 3 جنيه مقص متوسط 2 جنية والمفروض انى فى علاقه كسور دى لوحدها ب20 جنيه طيب وباقى التجهيزات وسعر الشنطه الفاضيه اذاى ده كلة ب40 او 50 جنية الموضوع مش اكتر من سبوبة اصلا لانى فى مصر مفيش طرقات مطابقة للمواصفات علشان يكون فى عندنا شنط اسعاف مطابقه للمواصفات بس اموت اوعرف مين ابن المحظوظه فى البلد دى الى خد توكيل الشنط والمثلثات العاكسة

محمد عبد الغفار said...

انت بتحسبيها بالعقل تؤ تؤ تؤ

هما محسبوهاش كده خالص ، دى فلوس لازم تندفع فرده وتوصل فى الأخر لحد معين باى طريقه بقى

اللى يزعل ان المفروض فيه شفافيه اكتر من كده كانوا يقولوا هندفع فين ولمين ونرح ندفعها من سكات واما نقف فى لجنه نوريهم الأيصال ويادار مدخلك شر

قوس قزح said...

رئيس جمهورية نفسى

التلج ده بيكون مجهز انه يشتغل لما يتفرك فى الايد جامد

و بعدين السعر لو اقل من السوق متنساش انهم بيشتروا جملة و صينى

و الله احساسى ان كل الحكاية واحد شاف الشنطة دى بره و قال يعمل فيها بيزنس علينا

بس سيبك من كل و قولى
تقدر تمسك حقنة و تدخلها فى قلب حد لو قلبه محتاج ده فى حادثة ؟
تقدر تمسك دراع محروق و تطهره و تلف عليه شاش ؟
و لو قدرت انت حد غيرك هيقدر ؟

قوس قزح said...

محمد عبد الغفار

ما كل واحد بقى حسب امكانياته
انا بحسبها بالعقل و هم بيحسبوها بحاجة تانية

و بعدين انت عايز تتدفع على الجاهز ما تتعب شوية يا اخى فى حب مصر :)

Ahmed Kamal said...

موضوع المرور كله مايستهلش التفكير فيه طالما كله ماشي بالتظبيط ، يغيروا القانون يحطوا حزام يحطوا شنطة ، برضه حاتفضل حوادث الطرق سيف مسلط على رقاب الجميع ، و ماحدش مستعد يواجه الحقيقة و يقول إن فساد الجهاز هو سبب كل البلاء .

سيبك إنتي بكرة تطلع فتوى بتقول إن الشنطة دي مستحبة شرعا ، و إن حلاق الصحة عمل شرعي إذا كانت الشنطة من المرور .

حسن حنفى said...

بوست مميز
no comment

همس الاحباب said...

بوست فى الجووون يا دولى
بجد انتى جبتى من الاخر
هى يا ستى عبارة عن سبوبة لاهل الخير والعز
يمصوا دم الشعب اذا كان فاضل دم اصلا
مرة حزام امان ومرة شنطة حلاق ولسه ياما نشوف
بس بجد لا قدر الله وحصلت حادثة
وصاحب السيارة كان اصلا دكتور
مش انسان عادى كمان
تخيلى ممكن يقدر يقوم باسعاف نفسه
ولا حتى واحد جنبه
اعتقد صعب جدا بل مستحيل ناهيكى عن الشخص ده غير مهيا وغير مدرب
النتيجة اتكون ايه
كان ممكن يفرضوا رسوم او اتاوات ويعملوا بيها وحدات اسعاف مجهزة
او اسعاف طائر زى ما بتقولى
بس ننهب ازاى ونسرق ازاى
لازم بطريقة نجيب الريحانى والخروف
تحياتى وتقديرى

فاتيما said...

يا دوللى
إنتى بتتكلمى فى إيه بس ؟؟
كل دا جدل لا طائل منه
إحنا الأول نشترى الشنطة و المثلث
و الفلوس تستف فى البنك
و بعديييييييييين
بعد كام سنة كدا ييجى حد
يثير النقاش حول هذا الموضوع
و يقول مكنلوش لازمة و الله
زى تدفع الأول اللى عليك
و بعدين تبقى تتشتكى براحتك
ردوا
مردوش
مش مشكلتنا
المهم إنتى جاية يوم التبرع بالدم نشوفك و لا إيه ؟؟؟

قوس قزح said...

احمد كمال

القانون القديم لو كان اتنفذ صح مكناش محتاجين الجديد ده و كان حال المرور اتعدل ولا كنا نفكر فيه
اللى بفكر فيه من التعديلات الجديدة هو الغرض من الشنطة دى

واما عن الفتوة فالشنطة دى رجس من عمل الشيطان :)

قوس قزح said...

حسن حنفى

اشكرك
و سعيدة بزيارتك

قوس قزح said...

همس الاحباب
ماهو ده اللى مجننى يا خالد
احنا كمصريين بنعشق حاجة اسمها الفتى ( الفتوة) يعنى اى حاجة نقول اه نعرف طبعا و ليه لا
يعنى يا عينه امه اللى هينصاب فى حادثة هتلاقى كل السواقين بالشنط جايين جرى و كل واحد عايز يجرب بخته فيه

ده ابسط حل ممكن يتعمل انهم يشوفوا اكتر الطرق اللى بيحصل عليها حوادث و تركن فيها عربية اسعاف بصفة دايما

ماهم قرفنا باللجان و عربيات البوكس الركنة فى كل حتة

يركنوا عربية اسعاف كمان مش فارقة

قوس قزح said...

فاتيما

لا يا فاتيما لااااااا
المرة دى خالوا ارواح ناس تحت ايد ناس ممكن يكونوا جهلة

عايزين فلوس يطلبوا شنطة عدة
او شنطة هاند باج فيها استخدامات الواحد الشخصية علشان لما يتحبس بدل الغرامة
لكن دى لاااا

و انا مش هقدر اجى يوم التبرع
ده يوم 1 اغسطس
و انا لسه مجيبتش شنطة يا ستى :)

و انتى كمان اركبى المترو اصله من غير شنطة

و القادم....أجمل said...

حسبي الله و نعم الوكيل

بصي يا ريت تقترحوا عليهم
يحطوا واحد ميزو أصدي دكتور إمتياز
في كل عربية
و أهو يدولوا في اليوم 10 جنيه
و الله هتفرق معانا
:\

هما عايزين يلموا فلوس
بأي أي طريقة

الإسعافات الأولية دي
أساسا ليها دورات و موال كبير
مش معقول شنطة بالمواصفات
الخااااانقة" دي"
تقوم بيها

حسبي الله



المهم مدونتك عسولة اوووووي
و معلش أعذريني إتأخرت في الزياة
بس الجايات أكتر إن شاء الله
إحترامي و حبي
يا سكر إنتي

:)

maha zein said...

هابي بيرز داي تو يو
سمعت ان عيد ميلادك كان او هيكون
كل سنة وانتي بصحة وسلامة يا ام صوت جميل
وبيضحك علطول
هستني اعرف عملتوا ايه في اليوم الجميل بتاع شفط الدم ده
في بوست لذيذ
بجد كنت اتمني اجي معاكم
بس جدت ظروف واضطرينا نروح لاختي قبل الصلاه عشان نساعدها لانها كانت عزمة ناس
اعذريني اختي بقه وومجبورة اقف معاها
بس اكيد هتتعوض
ربنا يسعدك
ويبارك في اولادك وفي سنين حياتك
وكل سنة وانتي طيبة تاني
الا لو دي كانت اشاعة

د/اجدع بنوته said...

هههههههههههههههههههههههه

والعجله مش هيبقى ليها برطمان بلاستيك حتى

ههههههههههههه وعجبتنى اوى يموت طاهر دى

ادم المصرى said...

حسبى الله ونعم الوكيل

ربنا يستر علينا


بعد كده الوحد يسوق العربيه بهد
وء بدل البهدله ده

قال شنطه قال ده مش شنطه ده خنقه ونهب لفلوس الناس

الإتربي اللولبي said...

إزيك يا رينبو

عامله إيه ؟

آآآآآآآآآآآآسف على النومه اللي كنت فيها

بس الظروف

بالنسبه لشنطة الهيروين .. إحم .. الإسعافات .. فأنا من وجهة نظري إن ليها فايده عالية جدا .. و هي إن لو معانا في العربيه طفل رضيع نعمل له من مكوناتها كافوله ... و أهو كله فدا التسلخات

تحياتي و تضامني في حالة الاستفزاز

سلام عليكم