Thursday, August 7, 2008

واجب الاسرار


انا معترضة

و مش عجبنى

و مش عارفة كمان الحل ايه

و ده مش بلادة

لكن تقدروا تقولوا عدم معرفة فعلا

بس علشان معزة الناس اللى طلبوا منى

و هم احمد كمال مدونة رحايا العمر

طارق الغنام مدونة بورسعيدى

فاتيما مدونة روح قلب ماما

مها زين مدونة انها الحياة

انا هحل الواااااااااااجب


و يا مها هم 6 بس مش 16 هجيب منين انا اجوبة !! ..الكتاب بيخلص بعد الاجابة الرابعة و هألف اتنين عليهم

لكن لحد 16 نو نو نو على راى الرايق


المهم ما علينا و ندخل فى الغم ..اقصد فى الاهم


أذكر اسم من طلب منك حل هذا الواجب ؟


مش هنقعد بقى كل شوية نجيب فى سيرة الناس :)


أذكر القوانين المتعلقة بهذا الواجب؟


القوانين هم الاسئلة


تحدث عن ستة أسرار قد لا يكتشفها من يقابلك للمرة الأولى ؟


وااااااااااحد
انا مش بحب الواااااااااااااااااجب و بكرهه و اعمل الحاجة من نفسى بس مش تكون غصب ..يعنى اللى قدامى اديله عينيا بمزاجى لكن مش غصب عنى

اتنين
انا بتنرفز بسرعة و ام شديدة اووى و لما كنت مديرة كنت صعبة بردو بس فى نفس الوقت بعرف ازاى اخلى اللى قدامى يقبل الشدة دى و يعرف ان هدفها عمل الصح مش اكتر

تلاتة

لما حد يخدعنى مش بتصدم فيه لكن بتصدم فى نفسى انى صدقته و انى تانى اديت الامان للناس بدون ما اعرفهم كويس اوى

اربعة
حالتى المزاجية بتتغير من حالة لحالة بسرعة و نتيجة اى حاجة هايفة ممكن خبر حتى لو مش يخصنى يقلب موودى تماما و يمكن ده من الاسباب اللى خاليتنى ابطل قراءة الجرايد

خامسة

خيالى واسع و لما حد بيحكى لى اى موقف بحس انى شايفاه و علشان كده بيعجبنى اوى بعض المدونات اللى بتوصف الاحداث بدقة لانى كأنى شايفها بجد معهم و منهم مدونة بابا ابو خالد

ستة

يا شوباب انا عندى زهايمر مبكر بنسى بطريقة غير طبيعية و ذاكرتى بتكون فوتوغرافية اكتر و علشان كده بفتكر الاحداث بالصورة مش بالحوار و ده كارثة لان فى ناس بتستغلها :(
دول اسرارى اللى ممكن متعرفهومش من اول مقابلة بس ممكن اقولهم فى تانى مقابلة و اعمله فى تالت مقابلة و الله اعمل هيبقى فى رابع مقابلة بعدهم ولا لا :)


حول هذا الواجب إلى ستة مدونين، وأذكر أسماءهم مع روابط مدوناتهم في موضوعك؟


هحوله لكل الناس اللى كانت موجودة يوم التبرع بالدم ماعدا طبعا اللى جاوبه قبل كده

بدام هم اصحاب واجب ;)


هييييييييييييييييييه بس خلاص
الحمدلله نجحـــــــــــــــــــت و جيبت 99.9 %

و الواحد من عشرة ده علشان اخر سؤال كسلت فيه شويتين


اللى يدخل بقى يجيب معاه ازازة شربات و يكون مانجة غير كده نووووووو

و على فكرة بقى انا هطلع غيظى فيكم و اعملكم تاج زى تاج الجزيرة


و كل واجب و انتم طيبين



33 comments:

ňįĝŗő said...

بالنسبة للسر التاني اللي هو بتاع الشدة و الحسم مع المرونة
مش عارف ليه أنا حسيت بكده فيكِ لما شوفتك و سمعت كلامك يوم التبرع
لأ استني كده
و ليه مش عارف ؟!!!
ده طبعاً نتيجة ذكائي الرهييييب و رهافة حسي الفااااائقة و قدرتي الشنيعة علـ .......
إحم .. إييييييه .. الواحد مش عاوز يبالغ في نفسه
ثم استني هنا
انت بتقولي انك جبتي 99.9% ؟؟!!
الواجب ده طالع بقاله 3 شهور تقريباً
يعني الترم الأول خلص
و الترم التاني خلص
يعني إحنا دلوقت في امتحانات الدور التاني
و محدش بيجيب في امتحانات الدور التاني أكتر من نص الدرجة

50% بس .. علشان الكسل و تأجيل واجب اليوم إلى الدور التاني



يلا سلام

قوس قزح said...

ههههههههههههههههه
طبعا الذكاء المحلاوى و رهافة حسه انت هتقولى عليه

انا شوفته بعينيا p:

و بعدين مين قالك ان الواجب ده تبع مجانية التعليم

دى ترمات خاصة يا فندم وكل واحد له حق الحل فى خلال سنة

يعنى 99.9 % بلا فخر

ولا انت عايز تزوغ من شربات المانجة ؟؟؟؟

Diyaa' said...

يا فتاح يا عليم يا رزاق يا كريم
الواحد لسه ما غسلش وشه
بس إيه الأمتحانات الغريبة دي
علي أيامنا كنا بنجاوب وبنستني النتيجة بعد كام شهر..بسم الله ما شاء الله مؤسسة تعليمية يخواتشي ؟
هو ده تطوير التعليم اللي بيقولوا عليه..التلميذ هو المدير والمصحح والناظر والوكيل والعميد وأمن الجامعة كمان لول
من النهاردة مفيش حكومة
أنا الحكومة
ممكن أعتبر نفسي كنت
invisible
يوم الجمعة وبالتالي مش موجود :P

صباح الصباح said...

انا كمان الذاكرة عندى فوتوغرافية .. ش باقدر افتكر ارقام بسهولة ابدا .. ولا اسماء الشوارع برضة.. بس بيكون جوايا صورة مطبوعة للمكان بالكامل حتى لوعديت علية من عشر سنين..
كل تاج وانتى بكل خير

appy said...

صباح كروته وكوسه يا ست الكوكوته
ايه النتيجه اللى بتطلع فى نفس ذاتيات الوقت ددي انتى ليكى واسطه فى الكنتروم هههههههههه
بصى بقى انتى جدعه اوي وانا بحبك اوي وعاقله اوي ويمكن يمكن هههه بتكملينى فى دي بما انى صاحبه خرفان وانتى عارفه
وانا قولت لكى بالنسبه لموضوع ام دي نفسى بما اتنيل ان شاء الله واطس فى معاميع مخي ابقى زيك
ربنا يكرمك يا رب وبقوللك ايه طلعي خروفى البمبى من دماغك هو مش راضى يجيلك ههههههههههههه

عصفور المدينة said...

أنا حاسس إني أنا اللي حليت الواجب ده ماعد موضوع الزهايمر الحمد لله ذاكرتي كويسة
ولذلك رأيي نحسم منك درجات الذاكرة

وومن said...

قوس قزح

لية بس التوريطة دي قال يا متبرعين يكفيكم شر اللي حالين الواجب متأخرين

طب مش حاحل بقي هه
هههههههههههههههههه

عموما اجابتك كلها تلقائية وبتفكرني بحد اعرفة قوي

همس الاحباب said...

ههههههههههه
بصراحة بحس انك زى ابلة الناظرة فى الفصل وسط اطفال ابتدائى
لالالالالا من غيرضرب
خليها شتيمة بس
وبعدين ما بلاش كوسة بقى من امتى النتيجة بتطلع قبل الامتحان
وايه 99.9 % ده نتيجة استفتاءاللى حصل عليها عبد الناصر فى الانتخابات ولا ايه بالظبط
بس نسيتى تقولى انك جدعة قوى وعاقلة ورزينة وايه كمان نسيت ..
بس بجد برافو عليكى انك حليتى الواجب وخلصتى عقبالى يا رب اصله حمض بصراحة عندى من 15 شهر
تحياتى

أحمد كمال said...

ياااه ، إنتي لسه فاكره ؟ و بعدين مش عيب تبقي داخله دور أغسطس و تعملي نفسك جايبة 99.9% ؟ ده الواجب ده لما قعد عندي كده كنت حاخللي الست اللي بتنضف تحطه في كيس و تديه لأي حد محتاج له . لأ و كمان ضاربه اسم البوست :)

المهم يا ستي أسرارك بتقول إنك إنسانة واضحة و دوغري ، و حكاية النسيان دي ليها علاج ، بس أنا مش فاكره دلوقت ، و بمناسبة الزهايمر إنتي فاكراني ؟ أصلك سألتيني على حاجة و بعدين اختفيتي في ظروف غامضة :)

كل واجب و انتي طيبة ، و عقبال كل واجب .

عايزه اتطلق و said...

الصور اليى فى المدونه سبحان الله فعلا وزى ما قولتى اليى عايز يشوف جمال ويتعلم تناسق الالوان يبص للطبيعه سبحان الله ..عارفه كان فرساتشى بيسالوه انت بتجيب الاحملر مع الاخضر ازاى قالهم من الطبيعه وجون جاليانو برضه بيقول انه بينزل احدث الالوان للموسم من الوان الزهولر واعصافير والطبيعه ككل شوفى سبحان الله الكل عائد برضه وراجع لربنا ..ده لنك مدونتى الجديده شرفينى بالزياره http://ayzaatalawa.blogspot.com

Sherif said...

من اجاباتك حسيت انك مديرة

يؤكد ذلك نشاطك الأخير مع آبى بؤجة الخير

طبيعى تكونى عصبية شوية .. صفة قائد أو مدير

لكنك متنوعة بأفكارك دائما .. أنت فعلا قوس قزح

المنسى said...

حلو أوى موضوع التاجات ده بيخلى الناس تعرف بعض أكتر
بس من أول يوم شفتك مش حسيت من ده كله غير بحاجة واحدة بس الشدة والحزم بس
ممكن يكون راجع لأننا متعاملناش مع بعض كتير
جايز
عامة كل واجب وأنتو اطيبين ومبسوطين
وبلاش مجموع 99.9 ده
عشان ده مش بيحصل فى أى مكان فى العالم غير فى مصر
وسلملى على الترماى

maha zein said...

ياه جيت متأخرة
وفاتني كتير
الحمد الله انك جاوبتي
طب ام شديدة وعرفناها
لكن طلعتي مديرة كمان
يا جامد يا جامد
بس قلبتينا انتي فى التاج ده
اه وربنا
قلبتينا قلبه كده سريعة
يعني المفروض في بتاع 16 صفة
بيعتيهم كده
ماشي
بس مسيري يجيلي تاج محرج وابعتهولك
هه بس بقه

قوس قزح said...

ضياء

لا مفر
متحاولش
المكان كله محاصر
هتجاوب يعنى هتجاوب
و احنا بعون الله شغلين 24 ساعة طوال ايام الاسبوع
هو احنا ورانا حد غيركم نطهقوا فى عيشته ( وش مطلع لسانه )

قوس قزح said...

صباح الصباح
الحمدلله على نعمة الذاكرة دى لان الذاكرة السمعية بتخلى الواحد مينساش الكلام حلو او وحش
فخلينا فى الصور احسن :)

اشكرك على مروروك

قوس قزح said...

appy

نيفر نيفر نيفر

الخروف ده هاخده يعنى هاخده
انا لونت لك الخرفان علشان اخد عينى على الخروف ده

و بعدين يعنى دى الكوسة فى كل حتة اشمعنى انا بقى
اعتبرها زكاة رمضان و عديها بقى :)

قوس قزح said...

عصفور المدينة

لا الدرجات دى مش على الكفاءة
دى على الصراحة و الاجابة الكاملة

بس علشان خاطرك ممكن نعمل خصم خاص :)

طارق الغنام said...

الرائعه قوس قزح
ماشاء الله عليكى
شخصيتك رسمتيها من قبل بقوس قزح
اليوم اكتشفت روعه وجمال قوس القزح من خلال تعريفك بنفسك
تقبلى تحياتى
وشكرى
وزعلان منك انتى مخاصمه مدونتى ولا ايه
عموما انا مااقدرش على الخصام
سلام

قوس قزح said...

وومن

لا مش توريطة ولا حاجة انا عارفة انك شجاعة من يوم التبرع
بس نبعد عن دراعك الشمال :)
يلا جاوبى و ورينى الشجاعة اللى انا عارفها عنك

و مقولتيش من الحد ده :)

قوس قزح said...

همس الاحباب

و الله انا حليته قبل ما ريحته تطلع

هو مش فريش اه بس مش بايظ بردو

يلا بقى شد حيلك و عايزين نعرف هتجيب كام
مش هتعرف توصل لرقمى انا اصلى كنت لجنة خاصة P:

قوس قزح said...

احمد كمال
احمد كمال
احمد كمال

اه الاسم ده مر عليا قبل كده
مش انت بردو الرجل الامير بتاع فاتيما ؟؟

بس انا منسيتش اهو و حليت الواجب يعنى الزهايمر لسه مش واخد حقه معايا

و طبعا اخد الرقم ده انت ناسى انك فى مصر ولا ايه
حتى لو كان دور تالت و رابع و كنت خلاص هبقى على الرووف ممكن اخد الرقم ده

و ربنا ما يأخرلك واجب :)

قوس قزح said...

عايزة اتطلق و ..

اسعدنى مرورك و اعجبك بمدونتى المتواضعة
و ان شاء الله ازور مدونتك حالا بعد التعليقات


تحياتى و

قوس قزح said...

شريف

ربنا يخليك يا شريف

اعتقد العصبية نتيجة الضغط الزيادة مع ضيق الوقت و قلة الحلول
فالواحد بيبقى عصبى

و يارب موضوع بؤجة الخير ده يكون سبب فى صفاء النفس و راحة البال

قوس قزح said...

المنسى

ماهو الواجب انى اقول اللى الناس مش هتحسه فيا من اول مرة
و اعتقد الشدة و الحزم دول ظهروا بس نتيجة النقاش اللى دار عن موضوع حملة ايناس نهر الحب

و يعنى جات عليا يا منسى انى ماخدش الرقم ده ماهو انا بردو فى مصر :)

و متنساش لو محلتيش الواجب يبقى بالف هنا و شفا اتفضل خده :))

جودت حسن said...

يقول الشاعر
ان هي الا واجبات كتبت علينا
و من كتبت عليه واجبات قام بحلها
..
لا بأس يا قوس قزح
اعجبتني اجاباتك
و تعجبت من لفظة ام شديدة
لا اثق تماما في ان الام من الممكن ان تكون شديدة
اؤمن بذلك اكثر مع الاب
لكن طالما انك كنتي مديرة فلا املك الا ان احترمك بشدة
فنحن قوم يقدس المناصب و تعشق الوساطة
سعدت بوجودي هنا

جودت

قوس قزح said...

مها زين

ليه يا مها بس
ده انا حتى بحبك
و قلت اقولك 6 اهو احسن من مفيش

16 ده كتيرررررررررررر

لو اعرفهم كنت قولت :)

عموما انا اللى هعملك تاج انما ايه
هه

قوس قزح said...

طارق الغنام
انا و الله مفصرة مع الكل حتى مع مدونتى

انا اسفة جدا وياريت ماتزعلش منى

و اشكرك على كلامك الجميل

قوس قزح said...

جودت حسن

لا متتعجبش من انى اكون ام شديدة

اعتقد ان فى وقتنا الحالى محتاجين نكون كده علشان نقدر نطلع جيل مش ضعيف و ملتزم

و ربنا يعين الكل

نورتنى بزيارتك :)

إيما ( أم البنين) said...

عشره على عشره...إيجابات هايله
وموضوع الزهايمر ده عندنا كلنا متقلقيش
تحياتي

إيما ( أم البنين) said...

رقائق في دقائق ..مدونه جديده تدعوكم لها إيما (أم البنين)..فيها نذكر بعض الرقائق التي تأخذ دقائق من وقتنا ..ونحصد بها
حسنات كثيرة..وندعو الله أن تكون خالصة لوجه الله تعالى..كما تتمنى
أم البنين مشاركتكم لتكتمل الإستفاده
المدونه على الرابط التالي:
http://rakaek.blogspot.com/

رندا said...

اية دة واجب ومذاكرة

تانى انتى مش قلتى انك خلصتى دراسة برضة هههههه
وبعدين قوليلى
فين هى بقى الشدة دى انتى قلبك جميل ياقمر
على فكرة الى بيقول على نفسة كدة يبقى جواة اجمل قلب واطيب قلب
وبعدين الزهايمر لا مش تقولى
انا شاكة اصلا ان فى حاجة فى الاكل
الكل بياكل من الحاجة دى علشان مش يفتكر الحال ماشى ازاى فى البلد
يعنى مقصودة ههههههههه
وبعدين هو بقى فى اسرار اصلا
ماالكل انفضح مع التيجان والاسرار دى
ردودك جميلة وصريحة اوى
هى دى داليا يامصر

بحبك ووحشتينى على الاخر

رندا

قوس قزح said...

ايما ام البنين
ربنا يخليكى
طيب الحمدلله ان مش انا لوحدى كان هيبقى شكلى وحش اوى :)


مدونتك جميلة اوى
و اخدت منها صورة البنت عملتها بانر :)

قوس قزح said...

رندا

انت كمان وحشتنى اوووووووووووى
الصيف بالرغم من انه اجازة لكن الكل مشغول

و بعدين بدام هم شاطرين و بيحطوا حاجات فى الاكل و المشروب
طيب ما يحطوا لنا حاجات تنمى الذكاء او تبعد الكسل
يمكن وقتها نتحرك و نبقى عالم تانى مش تالت

انت اللى قلبك ابيض بلون الياسمين و الفل
ربنا يخليكى ليا