Friday, September 5, 2008

خير و فطار



من مشاركتنا فى يوم البؤجة عرفنا كلنا ازاى ان ممكن حاجة بسيطة لنا تسعد غيرنا و فى نفس الوقت كل واحد فينا كان فرحان انه ساعد غيره و ده انا شوفته فى عيون الناس كلها الموجودة و يومها اغلب الناس كانت بتسال ازاى تانى نساعد و امتى



النهارده جاية اقولكم على باب خير تانى و ان شاء الله يكون عددنا اكبر من المرة اللى فاتت و اقولكم بردو على الافطار التدوينى فى نفس اليوم

بالنسبة للجزء الاول فالنهارده الخير هيكون للمرضى من الاطفال الفقراء




كلنا لما بنشوف طفل بيبكى بنضايق و بيصعب علينا



و لما يكون بيبكى من الالم او من المرضى بنكون مش عارفين نخفف عنه ازاى و بنحاول نساعده بأى طريقة



لكن تخيل لو فى طفل مريض بمرض جامد و كمان معندوش امل فى الشفاء لانه ببساطة فقير و معندوش اللى يساعده و مع كده مش بيبكى لانه اتعود على الغلب من صغره و الرضا بقضاء الله ،بس انت تقدر ترسم على وشه بسمة .. هتتتأخر ولا هتمد له ايدك ؟؟




الاطفال فى مستشفى ابو الريش بتترواح اعمارهم من حديثى الولادة لحد سن 12 سنة و حالاتهم المرضية مختلفة من فشل كلوى لمرضى القلب لمرضى الصدر و غيرهم



و المستشفى دى من اكثر المستشفيات فى مصر اللى بتستقبل حالات من مرضى الاطفال للعلاج مجانا و فى نفس الوقت هى اكتر مستشفى مش بيوصل لها مساعدات و ده نتيجة انها مش وخدة حقها من الاعلام



و علشان كده وقع اختيارنا عليها بعد ما كنا قلنا ان الخير القادم للاطفال مرضى السرطان لكن فضلنا ان مساعدتنا تكون للاكثر احتياجا بسؤال ناس كتير من دكاترة و اخصائيين اجتماعيين




فبناشد كل القلوب الرحيمة انها تشارك معنا فى رسم بسمة على شفاه الاطفال المرضى



و ده هيكون يوم السبت 13 سبتمبر الساعة 3 نتقابل قدام المستشفى و هى قريبة من القصر العينى الفرنساوى

و دى خريطة لمكانها

اللون الاخضر هو المستشفى

و اللون الازرق ده شارع القصر العينى

و اللون الاصفر ده شارع الكورنيش

و اللون الموف ده القصر العينى الفرنساوى

و اللون الاحمر ده محطة السيدة زينب لمترو الانفاق



و المشاركة هتكون هدية منك للطفل بمناسبة رمضان او العيد زى لبس العيد او لعبة او عيديته او حتى لو مش قادر ممكن تشترى شوية حلويات لهم و انت قدرتك بس حدد لنا هديتك هتكون ايه و ابعت لنا ايميل بها و كمان لازم تكون جاد لان حرام نعشم طفل برىء بهدية و فى الاخر متوصلش له



و صعب اننا من دلوقتى نحدد اعمار الاطفال لان بسؤال المستشفى لاقينا ان الاطفال ممكن تدخل و تخرج من المستشفى فى خلال يومين تلاتة




علشان كده يوم الخميس هنعمل زيارة للمستشفى و نحدد الحالات اللى اكثر مرضا او احتياجا و نبلغ كل واحد باسم الولد اللى هتكون هديته موجهة له




تذكر ان الاطفال احباب الله و ان الرسول الكريم قال عن انس رضى الله عنه : { أيما رجل يعود مريضا , فإنما يخوض في الرحمة فإذا قعد عند المريض غمرته الرحمة قال : فقلت : يا رسول الله هذا للصحيح الذي يعود المريض فما للمريض ؟ قال : يحط عنه ذنوبه }
فلا تتاخر عن زيارة احباب الله و عن ان تغمرك الرحمة فى هذا الشهر الكريم




و ارجو كل اللى يدخل يساعدنا على نشر الموضوع بانه يضيف البانر ده عنده و يبعت الموضوع لكل الناس اللى يعرفهم






اما الجزء التانى من اليوم هيكون ان شاء الله الفطار فى محل فى وسط البلد اسمه ابو خالد

و هو بيقدم كباب و كفتة و فراخ مشوية و حمام ده غير الشوربات و الرز و السلطات و الطواجن يعنى الاكل هيناسب كل الاذواق ان شاء الله و الاسعار ممكن تكون فى المتوسط 50 جنيه للفرد كل واحد حسب اللى هيطلبه



و دى بعض صور للمكان و ياريت بردو اللى هيشارك فى الفطار يقولى على الايميل علشان نحاول نبلغ المكان بعدد الناس بالتقريب
















انا بشكر كل من العزيز سوو و خالد همس الاحباب لانهم تعبوا معايا فى اختيار المكان و الصور الخرافية دى من عدسة سوو






فى انتظار ايميلاتكم على



kouskoza7@hotmail.com


butterfly_549@hotmail.com



وتانى اقولكم متنسوش ان الاطفال احباب الله فمتتاخروش عن زيارة احبابه و كل سنة وانتم طيبين و مش ناسيين


57 comments:

ahmed_k said...

ربنا يكرمك ويبارك فيكي
على الأفكار الفله دي
ولو عايز أشارك معاكم بس مش عارف ظروف المجيئ
ممكن تفسريلي أكتر أيه ممكن تكون الهديه
ولو ما جيتش أبعتها
وأمر أحمد سكر لله
يتعب شويه بقى
بس الصوره مش واضحه في أيه نوعية الهديه
لأنها برضو بتعتمد على سن اللي رايحالو


بجد ربنا يكرمكم
وكل عام وانتم بخير

قوس قزح said...

ahmed_k

دايما سباق فى الخير يا احمد
جزاك الله خير

انا عملت تحديث علشان سؤالك
كل الحكاية ان صعب نحدد دلوقتى لو لبس مثلا ايه هو المقاس علشان كده هنزور المستشفى قبلها بيومين و نبلغ كل واحد ناوى يجيب لبس بالمقاس المطلوب و اسم الطفل اللى هياخد الهدية
و لو الهدية مش لبس يبقى اختارها زى ما تحب من اول حديثى الولادة لحد 12 سنة لان كل الاعمار موجودة فى المستشفى

و ياريت احمد سكر يقدر يشارك معنا فى الموضوع ده كمان و نبعته الترجمان تانى :)
جزاك الله خير

Anonymous said...

من الجميل استاذة داليا ان تكوني سباقه للخيروهذة شيم الكرام فقد قال تعالي "وما تقدموا من خير تجدوة عند الله" اشد على ازرك وازر من يشاركوكي واعتقد ان المجتمع التدويني سوف ينهض بمصر يوما ما
عبد الجليل

bos bos said...

جزاك الله كل خير
وفعلا لازم كل واحد يقدر يعمل حاجة يعملها

Gannah said...

داليا
جزاك الله خيرا وجعله فى ميزان حسناتك
ان شاء الله هيكون يوم ناجح جدااااااااا
بصى يا دودو انا من الناس اللى بشوف ان الدواء للمحتاج يكون اولوية ثم تأتى الهدايا الأخرى يعنى احيانا يكون هناك طفل يحتاج لدواء لا توفره له المستشفى وفى هذا الحالة يكون الدواء مقدم على الهدية
يعنى يا ريت وانت بتسألى تعرفى الحالات اللى محتاجة دواء وطبعا دا ميمنعش ان احنا نجيب هدايا
أنا ان شاء الله متفائلة خير بعد ما شفت يوم البؤجة وقد ايه كان ناجح
ربنا يكرمك يا دودو
انى احبك فى الله
تحياتى

Bob said...

بجد كان الله فى عونك
وربنا يوقفك فى طريق الخير دايما يارب
ورمضان كربم
بهاء

اسكندراني اوي said...

جزاكم الله خير على الافكار الرائعه دي
تمت اضافه البانر في صدر المدونه وان شاء الله نقدر نحصل على القليل من الثواب
تحياتي لكي ولكل المشاركين

Soooo said...

انا معاكي قلبا وقالبا يا دوللي

ولو حد عايز يبعت اي تبرعات عينيه او نقديه انا مستعد اروحلو لغاية عنده .. ولو اني بافضل انه هو اللي يجبها بنفسه عشان على الاقل يحس بفرحة الاطفال وهو معاهم

وربنا يوفقك ويسعدك ويهيئلك اللي فيه رضا ربنا عنك في الدنيا وفي الآخره يارب




سلاموووووووووز

صوت من مصر said...

عارفه اسم البلوج فكرنى باغنيه بحبها ؟
الناس دولاب الوان واحترت فى الاوان ملقتش انا لونى وعشان اعيش انسان لايق مع الاوان بدلت غيرت انا لونى ؟
بالنسبه للبوست ربنا يزيدك حسنات ؟

Soooo said...

انا عملت تحديث في اخر موضوع منزله وربنا يارب يعمل اللي فيه الخير





سلاموووووووووز

Jack Sparrow said...

اما اولا
فجزاك الله خيرا على التذكرة و الدعوة الى عمل خير ما يفيد في إزالة ما نقوم به من سوء كل يوم حتى دون ان ندري

و اما ثانيا
فأنا اعشق الطعام لدرجة انني لن أأتي
اذ كيف ستسمح نفسي الرقيقة برؤية عشرات البشر و هم يلتهمون الطعام " حبيبي " دون رحمة :((
ناهيك على اني لا احتكم الا على مبلغ سبعين جنيه و هي زادي طوال الشهر
:D
اسألكم الدعاء اذا
و جهد مشكور لكل من عاونك

تحياتي

همس الاحباب said...

اوك
علم وجارى التنفيذ
وكده تخلينى اقطع الاجازة اللى اول مرة اخدها من 10 سنين
بس مش خسارة فيكم
انا جاااااااااى
مع انى بافضل التبرعات النقدية فى تلك الحالات نظرا للحالة المادية لتلك الاطفال واسرهم
ولا مانع من بعض الهدايا كل حسب مقدرته وانا يا ستى متبرع لعدد 2 طفل بهدية معنوية والاخر ماديا
وانا فى انتظار الرد
تحياتى

Diyaa' said...

أنا بفضل الهدية النقدية يشتروا بيها علاج
ولكن أي حاجة بسيطة تفرحهم مش خسارة برضه..عموماً أنا مبتدئ في علم الهدايا والكلام ده..هبقي أستشير وأرد عليكم

وجزاكم الله كل خير وكتر من أمثالكم
وهي دي أقل حاجة تتعمل في شهر رمضان

بالتوفيق دايماً في عمل الخير :)

قوس قزح said...

عبد الجليل
اشكرك على كلماتك الكريمة
و يارب فعلا يكون التدوين هو سبب من اسباب النهضة لمصر

تحياتى

قوس قزح said...

bos bos

اشكرك على مرورك
و جزانا و اياكم

قوس قزح said...

Gannah
طبعا الدوا من الاساسيات اللى هنساعد بها لو ينفع
و علشان كده احنا نروح قبلها نشوف حالات الاولاد ايه
و ربنا يسهل و نبلغكم بالحالات و كل واحد مقدرته
انا كمان بحبك فى الله و يارب احساسك يكون صح و يكون العدد اكبر

تحياتى و محبتى

قوس قزح said...

bob
جزاك الله خير
و اشكرك على دعائك الجميل

تحياتى

قوس قزح said...

اسكندرانى اوى

جزاك الله خير على اضافة البانر
و هينوبك ثواب ان شاء الله
فالدال على الخير كفاعله

تحياتى

قوس قزح said...

sooooo

ربنا يخليك يا سوو انت نعم الاخ و الله
و بشكرك على التحديث عندك و على اقتراحك و تبرعك انك تروح لحد الناس تاخد تبرعهم

جزاك الله كل خير

قوس قزح said...

صوت من مصر

حلو كلامها اوى
طيب مش كنت تقول اسمها ؟

قوس قزح said...

soooo

التحديث فعلا جميل يا سوو و جزاك الله خير

قوس قزح said...

Jack Sparrow
اولا
جزاك الله خير

ثانيا
على راى سوو جوزين جنهات تشارك بهم حتى لو بحلويات او عصير لاى طفل مش هيكونوا كتير عليك
فكر تانى تشارك حتى لو فى زيارة المستشفى
و على فكرة عمل الخير ممكن يفتح لك ابواب خير اكتر كانه استثمار يعنى :)

تحياتى

قوس قزح said...

همس الاحباب

و الله انا عارفة انك انسن شهم و مش هتتأخر حتى لو وراك ايه
اما عن التبرعات النقدية فدى لازم تسلمها بنفسك للمسئول عن الطفل علشان قانونا مينفعش حد ياخد تبرعات من الناس بدون ما يكون له موافقة عى كده
و ده السبب اننا بناخد تبرعات غير الفلوس
و هرد عليك الخميس ان شاء الله بالليل

قوس قزح said...

ضياء

جزاك الله خير
و بصراحة انا عندى المهم الزيارة بتاعت المستشفى اكتر من الفطار
لكن هى فرصة بردو اننا نقعد و نتكلم و كل واحد يوقل احساسه باليوم و لو فى افكار لعمل الخير اكتر

هنستناك ان شاء الله

أحمد كمال said...

السلام عليكم و رحمة الله

جزاك الله خيرا دائما على مشاريعك يا فندم .

من فضلك إعملي حسابي معاكم في الزيارة ، أما الفطار فلسه مش متأكد .

أنا أضفت البانر في رحايا العمر ، و ربنا يوفقك و يكون يوم جميل .

تقبل الله من الجميع صالح الأعمال .

وومن said...

داليا

كل سنة وانتي طيبة كل سنة وانتي في طريق الخير

انشاء الله ربنا يكتبلي نصيب وابقي معاكم

خالص مودتي وتحياتي

وليد الاسلام said...

جزاكم الله خيرا اتمنى المشاركة معاكم وربنا يجعلنا سبب لابتسامة الاطفال

قوس قزح said...

احمد كمال

جزاك الله خير
و انت معمول حسابك يا فندم مش قبل ما تقول :)
ان شاء الله الخميس ابعت ايميلات للناس كلها بالحاجات المطلوبة

و فكر فى الفطار لانه فرصة تتكلم مع الناس عن ازاى يستغلوا وقتهم و يستفيدوا بحياتهم باسلوبك المحبب للنفس

جزاك الله خير

dina said...

ربنا يجازيكم كل خير يا رب و يتقبل منكم و يرزقكم الاخلاص فى النية

قوس قزح said...

وومن

ده المتوقع منك يا ميرا
انتى دايما بتكونى من اول المشاركين فى الخير
جزاكى الله خيرا

قوس قزح said...

وليد الاسلام

انا سعيدة جدا بك يا وليد لانه برغم من وجودك فى مدينة تانية لكن هتيجى تشارك معنا

فاهلا بك معنا
و جزاك الله خيرا

قوس قزح said...

dina
جزاكى الله خيرا
وتقبل دعائك يارب

(احمد سكر ) said...

السلام عليكم ورحمة الله وبركاته

ان شاء الله معاكم

وبالنسبه للاستاذ ahmed_k

ياباشا انت تؤمر

ومفيش اى تعب

دى ااقل شىء الواحد بيعمله

ربنا يجازيكم كل الخير يارب

احمد

hend...hanady said...

كل سنة وانت طيبة وربنا يوفقكم على عمل الخير

Hossam said...

hello
ur really have a kind heart
i think ur heart is effusive of sensations
hope god bestow you as u want to bestow impoversished ppl
hope eb a frinds
c u
bye bye

فاتيما said...

دوللى
ازيك يا حبيبتى
معلش متاخرة عليكى
بس كعادتك بتمشى فى الخير
أنا هسميكى وش الخير
دا لقبك من الآن فصاعدا
لأن الخير بييجى على وشك يا داليا
ربنا يقدرك دايما
كان نفسى آجى بس للأسف مش هينفع
المرة الجاية إن شاء الله
سلامى لكل اللى رايح
و لكل اللى هيحضر الفطار الجماعى
ربنا يتقبل منكم كلكم
تحياتى يا حبيبتى

كراكيب عادل said...

هايل يا دالياربنا يكتر من امثالكم

ياريتني في مصر كنت اكيد هكون معاكم

وكمان فطار جماعي

بنت سيناء..سويركية وافتخر said...

ماشا الله ما شا الله ياريتنى اسكن عندكم

كيكى said...

لولىىىىىىىىىىىىىىىىىىىىىى
لوىىىىىىىىىىىىىىىىىىىىىىىىى
لوىىىىىىىىىىىىىىىىىىىىىىىىىىىىىى
اخيرا وصلت ياردالة
هيييييييييييييييييييييية
وفى اية
فعل الخيرررررررررر
لولىىىىىىىىىىىىىىىىىىىىىىىى
ازيك ياداليا عاملة اية؟
واحشنى والله
ربنا ياحبيتى يجزيكى على فعل الخير
اممممممممممممممممممممممممممم
الهدايل زى مثلا دبدوب
ولا فانوس
بحيث يناسب الاعمار دى ها
؟
قوليلى...ووضحى اكتر
وان شاء الله خير يا حبيتى
ر مضااااااان كريم
امواااااااااااااة
عووووووووووووووووووووووووووو

مصري بالغربة said...

شكرا على المجهودات ديه يا جماعة المدونين

وانا نفسي فعلا والله اكون معاكم بس انا للاسف بره مصر

يا ريت تبلغوا تحياتي لجميع الاطفال بالمستشفى

مهندس / محمود مرسي

مقاطعـــــــــــــون said...

http://mokat3een.blogspot.com/
شارك حمله مقاطعون نحن نرفض اى قرش يدفعه العرب للتتربح من ورائه اسرائيل وغيرها رافعه شعار ان العرب يستفيدون من وراء شركاتهم ولا تتسببوا فى قطع ارزاق الناس انهم يضغطون علينا بلقمه خبز
فسحقا لاى لقمه تاتينا منهم فى مقابلها الاف يموتون من اموالنا شارك ولا تتردد
وجزاكم الله كل خير

meshmesha said...

ربنا يكرمك ويجازيكى خير ويجعله فى ميزان حسناتك يارب.
بس انا هقترح اقتراح يمكن بيه اقدر اساعد فى ترتيب الزيارة:
1- يتحدد مثلا عدد الأطفال .
2- يتحدد عدد الزوار.
3- يتحدد شكل الهدايا المقدمة من الزوار.
4- تقسم الهدايا المقدمة من جميع الزوار فى أكياس بالتساوى بحيث يشمل كل كيس جميع الهدايا المقدمة (على سبيل المثال : لعبة - عصير - حاجة حاجة - فلوس - لبس - دوا ....) وده عشان محدش من الاطفال يبص لحاجة واحد تانى والاطفال بتفرق معاهم اوى الحاجات دى ونفيستهم محتاجة دعم مش محتاجة تتأذى ولو بحاجة صغيرة...

ده مجرد اقتراح وطبعا انا معرفش خطتكوا شكلها ايه، ولو عايزينى فى اى حاجة انا تحت امركوا

ضى القمر said...

اختى الغاليه
كم جميل موضوعك وتنويهك ده
اللهم اجعله فى ميزان حسناتك يارب
جزاكِ الله خيرا ..
واتمنى ان استطيع مساعدتكم بما استطيع
أجمل تحيه لكِ اختى

المحارب المتيم said...

السلام عليكم

أولا انا سعيد جدا بالمجهود اللى بتبذلوه ده ودى حاجة فى ميزان حسناتكم بإذن الله

أما عن مشاركتى فأنا مش عارف لأننى بعيد قوى اليومين دول عن القاهرة

بس هحاول آجى ولو مقدرتش فأعذرينى

ورمضان كريم

قوس قزح said...

احمد سكر

ان شاء الله تقدر تيجى زى ما بتتمنى و متكونش مسافر يومها

و جزاك الله خير على عرضك بالنسبة لاحمد و الترجمان :)

قوس قزح said...

hend...hanady

وانت بخير و سعادة
و اشكرك على مرورك


تحياتى

قوس قزح said...

hossam

thnx for ur visit and ur delicate words

being my frind is my pleasure

Happy Ramadan

قوس قزح said...

فاتيما
ربنا يخليكى
المهم انك بتنورنى بزيارتك
و ان شاء الله المرة الجاية تكونى معنا

كل سنة وانتى طيبة و بخير و يوسف فى حضنك

قوس قزح said...

كراكيب عادل

جزاك الله خير على تشجيعك
و ان شاء الله تكون معنا مرة من المرات اثناء زيارتك لمصر

و نعمل يومها غدا جماعى :)

قوس قزح said...

بنت سيناء..سويركية وافتخر

ربنا يخليكى
و انتى ممكن تعملى الخير عندك
اكيد فى مستشفيات و ملاجىءعندك تقدرى تروحى لها و تعيدى على الاطفال

شكرا على مرورك

قوس قزح said...

كيكى يا شقية انتى
هو انتى يا تيجى بفرح يا تيجى تخضينى

مش هتبطلى الشقاووة دى بقى

انتى كمان وحشتنى

و ان كان على الهدايا هاتى اللى يعجبك لو هى من الالعاب
و يوم الخميس ان شاء الله هنزل تحديث بعد زيارتنا للمستشفى بالحاجات المناسبة للولاد


عوووووووووووووووو انتى :)

صباح الصباح said...

ان شاء اللة جاى المرة دى
مش ممكن الفرصة الجميلة فى الشهر الكريم دة تضيع

عايزه اتطلق و said...

ياه قد ايه شئ جميل انا كدون زميل بلغنى بالموضوع ده بس للاسف مش هقدر احضر معاكوا وده لان ماما استحاله توافق وهتقولى عندك الزقازيق وفلان وعلان وبنت فلان والحاجه كذا فانا عارفه الرد وانا عذراها وكمان لانها بتخاف عليا اسافر بعبد الرحمن لمكان بعيد عن الزقازيق لوحدنا ...مهو ده من الضريبه اليى المطلقه بتدفعها برضه خطواتك بحساب ..
بس ربنا يوفقكوا ويجعله فى ميزان حسناتكو وانا بقه وصحبتينى مع نفسنا والحالت اليى فى الزقازيق..
بعدين انا وحشه اصلا ومبحبش اعمل خير ..بس يا قوس ربنا يكرمك فعلا ويجعله فى ميزان حسناتك..

دعاء مواجهات said...

ازيك يادليا ياقمر

انا بعون الله جايه

وجايبه هدايا ل3 أطفال

ان شاء الله

سلااام

someone in life said...

مرحبا

انا ارسلت لحضرتك ايميل و انشالله يكون وصل انا موجوده معاكم انشالله و ايميلي موجود في البروفايل لو ايميلي مش وصل

منتظرة ردك جزاك الله خيرا

تحياتي

Abd-Alrahman said...

الفكرة جميلة جدا
وانشاء الله هكون معاكم فيها
وجزاكم الله خيرا كثيرا ورفع مقامكم بها في اعلي علين امين امين


تحياتي

NAGWA said...

أنا نجوى سعيد (صباره)
يسعدنى أنى أنضم لقافلة المدونين الخيرية .......ولكنى أعتذر عن الحضور والدتى مسنه وبحاجه لوجودى المستمر تقريبا مبخرجش الله لا يحرمنى أجركم ويزيدكم وبدعوكم للتواصل معى وتشريف مدونتي وأسجل إعجابي بكم جميعا