Wednesday, December 17, 2008

تلاتة فى واحد .. ربنا معاكم

النهارده البوست تلاتة فى واحد و ربنا معاكم بس اوعدكم مش هكتب حاجة لحد السنة الجاية
اول واحد من ارض الاحلام
بوست مفروسة فى الارض الاحلام عمل جوايا حالة خاليتنى افكر اعمل لكم تاج و التاج ده عن مرور سنة فاتت و قرب دخول سنة جديدة علينا ان شاء الله
اسمه
على ارض الاحلام
الاحلام لك ايه ؟ و بتشغل من تفكيرك اد ايه ؟
لما بتحلم بتحلم بشخصيتك الحقيقة ولا بشخصية وهمية نفسك تكونها ؟
لما بتحلم بحاجة بتسعى لتحقيقها فى الواقع ولا بتكتفى انك تعيشها فى احلامك ؟
ايه الحلم المستحيل لك انه يتحقق ومع كده بتحلم به ؟
ايه الحلم اللى كان نفسك فيه و قدرت تحققه ؟
سنة 2008 حققت فيها احلام ؟
يتحلم بايه يتحقق سنة 2009 لك و للناس و لبلدك و لدينك ؟
احلامك ايه لمدينة البلوجرية و هل حققت فيها احلام كنت بتتمناها ولا لا ؟
تحب تعرف احلام مين و تهدى له التاج ده ؟
التاج ده لكم واحد فيكم هدية و هحاول ابعته لاكبر عدد ممكن علشان نعرف احلام بعض و نحاول نساعد بعض على تحقيقها
التانى
هو دين عليا من العيد من اكتر من مدون
هرد فى السريع على تاج العيد قبل ما اللحمة تخلص و طعم فرحة العيد يروح

ماذا يمثل لك العيد ؟ وما أكثر شئ يبهجك في مظاهر العيد ؟
العيد لى هو الفرحة اللى بنشارك فيها ناس كتير و اكتر شىء بيسعدنى فى العيد هو التهنئة من الناس لبعضها و ان دى الفرصة اللى نقول لبعض فيها ان احنا فكرينكم بس الدنيا وخدنا حبتين

اوصف لنا طقوسك في العيد .. من ليلة العيد لآخر يوم ؟
فى العيدين الصغير او الكبير لازم اكون فى بيت العيلة
و طبعا الصغير بعد الصلاة لازم الفطار كحك العيد و اخوانه
و الغدا يكون اى نوع من انواع الاسماك سوا الطازة او المدخن او المخلل مش عارفة ليه
العيد الكبير الصلاة و تكبيرات الاحرام احلى حاجة فيه و بعد كده الدبح و الفطار و الغدا و العشا و اى وجبات فى النص لحمة لحمة لحمة
و باقى ايام العيد بتكون غالبا زيارات عائلية او القاعدة فى البيت مش بحب اخرج فى العيد لاى مكان علشان الزحمة

احكي لنا أطرف موقف حصلك في العيد ؟
كان فى وقت قالوا الخروف البلدى صحته تعبانة و قرارنا نشترى الخروف الاسترالى .. شكله طبعا مختلف و لحمه كمان بس الغريب انه اشقى من الخروف البلدى لان فى بيتى القديم كان فى جنينة حطيته فيها زى ما كنت متعودة احط الخروف البلدى الغلبان لكن ده كسر فرع الشجرة المربوط فيه و كسر السور الخشب و جرى فى الشارع و طبعا كان نص الناس فى الشارع بتجرى وراه لحد ما عرفوا يمسكوه و قضى الليلة لتانى يوم الصبح و هو مربوط رجليه و ايده و مع كده كان بيحاول بردو يهرب
يعنى حتى الخرفان البلدى مكسورة بخاطرها و راضية بالحال

بتحرص على تهنئة الأهل والأقارب والأصدقاء بالعيد .. ولا مش بتهتم ؟؟
دى احلى حاجة فى العيد هى التهنئة ولازم اقوم بها حتى و لو برسالة موبايل

مين أول حد تزوره أو تكلمه في التليفون /الموبايل عشان تهنيه بالعيد ؟
غالبا بابا و حماتى و بقى العيلة بعدهم

إيه الفرق بين العيد الحالي .. وعيد (أيام الطفولة ؟
الفرق كبير .. زمان كان العيد لى انى العب و اجرى و اخد عيديات اد كده و كل همى ازاى افرح نفسى بكل الطرق
دلوقتى العيد هو ان اخلى اولادى يلعبوا و يجروا و ادفع عيديات اد كده و كل همى ازاى افرح غيرى بكل الطرق

كلمنا عن ذكرياتك في العيد
و الله الزهايمر يا جماعة مش هيخلنى اعرف افتكر كتير غير الاكل و العيديات هههههه

تفتكر الحياة من غير عيد .. هتفرق كتير ؟؟
هى ناقصة نكد علشان يكون مفيش عيد ده هم دول الكام يوم اللى الواحد بيقيس عليهم ايام السنة

إيه أجمل رسالة تهنئة بالعيد وصلتك .. بتقول إيه ؟؟ ومن مين ؟؟
باحمل حروف..و بصوت ملهوف ..و انا مكسوف ..اعمل معروف ..حتة لحمة م الخروف
و ده كانت من احمد سوو عجوز عنده تلاتين
و طبعا مرديتش عليها لان كنا مش دابحين خروف و احب اقوله المرة الجاية يغير كلمة خروف بكلمة المدبوح

احم احم .. لسه بتاخد عيدية ؟؟ من مين ؟؟ وبتديها لمين ؟
اه باخد عيدية طبعاااا .. العيدية اللى ولادى بياخدوها نياهاهاهاها
و بدى عيديات غالبا للاطفال اللى اقل من 15 سنة
علشان هم دول الغلابة اللى مش بيعرفوا ياخدوا حقهم من اهليهم فى حكاية المصروف

إيه رأيك في التاج ؟
تاج جميل تسلم ايد اللى طبخه .. اقصد اللى عمله
تحب تمرره لمين من المدونين ؟ اذكر على الأقل 10
خلاص للاسف العيد فات .. السنة الجاية بقى ابعته ان شاء الله
التالت و الاخير و علشان يكون ختامها سكر و علشان اكيد زهقتم
ارد على بوست ابى بتنجانى و عجبانى عن الشوزات المتطايرة بحاجة خفيفة
و ده عبارة عن ميل جالى عن التعليقات اللى اتقالت بعد حادث الحذاء الشهير
الأمريكان يطورون الطائرات إف 16 إلى مقاس إف 45.
استعداداً لضربة قاسية للمدابغ.
اجتماع فى الرباط "لفك الجزمة" الحادة التى نشأت عن ضرب الرئيس الأمريكى.
الصحفى العراقى يتعرض لـ "كعب دائر".
زلط يعلن مسئوليته عن الحادث.
أحذية الدمار الشامل تهدد أمريكا.
الفريق الطبى للرئيس بوش يعالجه من حادث الحذاء بجرعة "بنعل لين".
الرئيس الأمريكى يقول لضاربه: كان يمكن أن أرد "ببلغة" ثانية.
الرئيس الأمريكى أصبح "مركوب على الرف".
الرئيس الأمريكى يسأل كونزاليس "كوتشى فين يا كوندى" وأنا بانضرب.
العراقيون يطالبون بعمل تمثال لـ "باتا".
القوات الأمريكية تخرج من العراق بـ "لبيسه".
تحويل الطريق أمام البيت الأبيض لـ "فردة واحدة".
ما هو الشراب المفضل للرئيس بوش.
يقال إن حذاء الزيدى ذات رائحة نفذاة.
ضرب بوش لتلميع صورته.
بوريتانيا تعلن تضامنها مع الزيدى.
اجتماع دولى لرؤساء الدول "المحاذية" للعراق.
العراقيون يودعون بوش:عليك "النعلة".
المالكى يطلق على حملة مواجهة المتطرفين "نعل" الصحراء.
بوش فى طريق عودته نجا من "البوت" بأعجوبة.
المارينز ينقذ بوش وينعله فى "صندل" بحرى.
الصحافة الأمريكية بوش بين المطرقة والسندان.
مساعدو بوش "شمعوا الفتلة".
تضارب الأنباء: هل الحذاء لزق أم خياطة؟!.
هل ضرب الصحفى بوش بفردتين "شمال".
العراقيون يشربون "الكلة" احتفالاً بضرب بوش.
بوش يرفض تشبيهه "بشجرة الدر".
تخليد ذكرى ضرب بوش تحت اسم "معركة الكنادر".
الصحفى العراقى كان يسمع أغنية "جوز ولا فرد" قبل الحادث.
هل كان حذاء الزيدى بدون طيار.
الكثير من الأمريكان يصابون بـ "جزمات قلبية". 33-الديمقراطيون يطلقون على الرئيس الأمريكى المخلوع "جورج شوز".
الصحافة الأمريكية: فشل زيارة الورنيش الإعلامى.
فريق من الـ CIA يطير للعراق لبحث كل "جوارب القضية".
خطاب بوش الأخير فى العراق كان "جازماً".
البيت الأبيض يمنع اصطحاب الصحفيين للمحمول والأحذية فى المؤتمرات الصحفية.
كونزاليس رايس تقول: "لا حذاء للديمقراطية".
إلى جورج بوش القاطن فى البيت الأبيض "الحذاء فيه بوذ قاتل".
تونى بلير: أنا "مقاسى مثل بوش".
ساركوزى: أشعر بالضيق الذى يعانيه الرئيس الأمريكى.
ما حدث للرئيس الأمريكى "غرزة" فى وجه الإدارة الأمريكية
أوباما يرفض الشراب فى صحة بوش.
بوش يودع البيت الأبيض بزيارة "الجلدى" المجهول
فحص الصندوق الأسود لحذاء الزيدى.
الفيفا تحسم الجدل، الزيدى يحتاج فردة ثالثة ليصبح هاترك.
أطباء بوش ينصحونه بتعاطى "منقوع صرم" لتفادى مضاعفات الحادث
بوش لحرسه الخاص: أنتم براطيش
ما حدث للرئيس الأمريكى سيجعله "مركوب".
بعد محاولة صد الضربة عن بوش، المالكى مرشح لحراسة مرمى المنتخب العراقى.
البنتاجون يستعين بـ "صراماتى" لتتبع أثر مخططى العملية.
جماعة كعب وفصائل أبو وردة يعلنان تضامنهما مع الزيدى.
"قالب" جديد للعلاقات الأمريكية العربية.
"هافان" تحتفل بما حدث للرئيس الأمريكى
بعد الحادثة المقاومة العراقية "كعبها" عالى على الأمريكان.
أوباما يستعين بـ "نايك" وزير للخارجية نكاية فى بوش.
أديداس تدرس توسيع استثماراتها فى المنطقة العربية.
المنظمة العالمية للطاقة تمنع تخصيب اليورانيوم وتفصيلة الأحذية فى بوشهر.
السفير الأمريكى بالعراق يضرب "بوذ" فى وجه المالكى.
كوبا تعلن 14 ديسمبر عيداً للحذاء العالمى لحقوق الإنسان.
بوش يطلب من القاهرة نسخة من فيلم "حافية على جسر من الذهب".
منظمة الأحذية العالمية "الفاو" تعلن رفضها للحادث.
الشريط الكامل للحادث يذاع فى "أحذاء 24 ساعة".
هيفا وهبى تنافس بأغنية "بوش الواو".
قبل رحيله: بوش يخسر "الجلد والسقط" فى العراق.
يالهوووى انتم لسه بتقروا ... ده انا زهقت
سلاااام قبل ما حد يفكر يحدفنى بحاجة من اللى فوق

26 comments:

Mohamed Hamdy said...

بوست جميل وخفيف .. وعلى فكره مش طويل او يمكن اسلوبك جميل مش بيخلى الواحد يحس بطول البوست

تحياتى ليكى وعيد سعيد ولو انها متاخره

~*§¦§ Appy §¦§*~ said...

همووووووووت من التهييس اللى احنا فيه بجد وضحكت لما عنيه دمعت غير كده منه لله البصل بقى
المهم يا ستى موضوع الاحلام والحركات دى انا قولت لفرفوستى انا بحلم بوجبه كنتاكى وعربيه فور باى فور وشوفتى مش طماعه اهو واطلبا هامر هههههههه
هرد لكى على تاج الاحلام علشان منك انتى تدبيسه مقبلوه يا حجه بجد

ويا مفتريه العيد الكحك بس من اول يوم الله يرحم اللى من نص رمضان واكله اتنين كيلو كحك ههههه
وبعدين الخروف الاسترالى متربى على المانيكير والباديكر وبيلعب تنكوندو ولا تكلوندو انا عارفه اسمها ايه دى
هو كده انما البلدى كبيره صفيحتين فيهم اسمنت وعصايا يلعب بيهم ههههه
ابعدى عن الخرفان بانواعها احسن لكى

اما الاجابه على البوست بتاعى انتى سوسه فهمتى الغرض من الموضوع بجد الله ينور عليكى يا ريسه
بجد

راجى said...

كل عام وانتى طيبة

قوس قزح said...

محمد حمدى

انت يا محمد كنت واقف على الباب ولا ايه ؟؟ :)

نورتنى بزيارتك و انت كده مدبس فى التاج لا مفر ده انت اول تعليق

قوس قزح said...

appy

اهو ده عيب ان الواحد بيحكى لكى على حاجة .. و بعدين اتنين دول بتوع رمضان .. ده غير بتوع العيد هههههه

لا ما انا خلاص توبت قولت البلدى يوكل و مش هسيب الخروف البمبى بعينك

اما عن البوست بتاعك انا قلت ارد عليه بالتفاصيل هنا علشان عنك كنتى هتطلعى الخرفان من طول الكومنت

مستنة الاجابة على التاج و معه طبق بامية هههههههه

قوس قزح said...

راجى

لا مفر انت جيت برجلك لحد هنا و اتدبست خلاص فى التاج
يمكن نسرق منك شوية احلام ولا حاجة :)

و كل سنة وانت طيب وسعيد

وومن said...

دودو

ههههههههههههههههههههههههههههههههه

بجد مش قادرة يخرب عقلك كنت مخبية كل دة فين

الناج بتاع العيد حلو قوي والحمد لله علي نعمة الخروف البلدي اللي مش هانغيرة ابدا

كل جزمة قصدي كل سنه وانتي طيبة يا قمرة

dreem said...

انا جيت اهه
ونبتدى
على ارض الاحلام الاحلام ليا هى الامل فبكرة احلى لكل اللى حواليا بس ما بتشغلش تفكيرى كتير لانى دايما واثقة فرحمة ربنا وعارفة ان بكرة لازم يكون احلى
لما بحلم اكيد بحلم بشخصيتى الحقيقية وما نفسيش اكون شخصية تانية
لما بحلم بأى حاجة او بتمناها بحاول احققها ولو ما عرفتش بفهم ان ده كان فيه الخير ليا وبحمد ربنا بس اكيد بكون زعلت شوية قبلها
الحلم المستحيل اتحقق خلاص وما بقيتش احلم بيه !
الحمد لله رب العالمين انا حققت كل اللى بتمناه الا القليل جدا على المستوى الشخصى وده بلاقيله تعويضات تانية الحمد لله
بالنسبة لاحلامى ف2008 : فانا احلامى كلها فبناتى والحمد لله ربنا كارمنى
احلامى ف2009 متركزة برضه فالبنات وامى واخواتى
البلد بحبها وما بحبهاش وما بحاولش ادخل فتفاصيلها لان مفيش فايدة
فالدين بجد نفسى البنى ادمين يراعوا ضمايرهم فكل تصرف بيتصرفوه وده مش هيحصل الا لما يقربوا من ربنا
ماعنديش احلام لمدينة البلوجرية لانى مش مقتنعة ان البلوجرية ليهم مدينة يمكن القرف من الظروف او افتقاد شوية حاجات ومحاولة التغيير خلى فيه بلوجرية
وما كانش ليا احلام لما بقيت بلوجرية غير انى افضينى
التاج ده بقى انا ههدية لقوس قزح علشان ادبسها زى ما دبستنى
وسلامو عليكو

Dr Ibrahim samaha said...

جميل أن نحلم والأجمل ان نحقق الحلم

ولقد كتبت موضوعا عن الأحلام

http://mar7om.blogspot.com/2008/05/blog-post_20.html

وجاوبت تاج عن الاحلام

http://mar7om.blogspot.com/2008/05/blog-post_25.html

اهو حد عندك حجة :)

وكل سنة وانتى طيبة

اما بالنسبة للتعليقات جبتيها متأخر

كنت عايزها من زمان

تحياتى

همس الاحباب said...

كل سنة وانتى طيبة
وبوست خفيف زى صاحبته
تسلم الايادى
تحياتى

مسدس صغير said...

ايه الجزم دى كلها دا بوش ده لو كان حيطه كان ولع...جميل اوى التاج ده والبوست كله..تقبلى تحيتى

maha zein said...

بعد محاولة صد الضربة عن بوش، المالكى مرشح لحراسة مرمى المنتخب العراقى
جمددددددددددة

ده مين ابن اللذينا اللى لحق يعمل الايميل ده
وربنا واحد دماغه رايقة جدا

افيهات تحفة كلها
وفي الجون
وكل سنة وانتي طيبة بأقتراب العام الجديد

بقه يا مؤمنة مش فاكرة حاجة من ذكريات العيد غير العيدية والاكل
اقول ايه
تنسي كل حاجة الا الحجات المهمة
نسيتي تاكل نستي تشربي؟
اومال نسيتي ذكريات العيد ليه

واحدة مفروسة said...

بوست جميل زي صاحبته
و مليان و دسم
بصي انا شخصيا بحلم بحلم اغلب المدونين اللى عارفني عارفينه من المدونه التانيه بتاعتي ارض الاحلام
بحلم بدنيا هاديه و سلسة
عارفه يا داليا لو و انتى بتطلبي اي حاجه او بتعملى اي خدمه لاي حد و رسمتي بس ابتسامه صغيره على وشك
كل حاجه بتمشي و مش بيبقى فيه عقد
بحلم انى ازرع شجرة فى كل مكان فى الدنيا
انتى عارفه انك لو فى اي مكان فى الدنيا ديه و معاكي نواية بلح او تمر و غرستيها فى الارض و تسمي و انتى بتحطيها بتطلع زرعه بمشيئة الله
انتى عارفة ان الزرع بيمتص التلوث؟؟
نفسي فى كل حاجه قلتها فى البوست بتاعي
انا بحلم بشخصيتي الحقيقية
لاني لما دخلت التدوين كان بشخصيتي الحقيقية مع اختلاف الاسم و السن المجهول
ههههههههههههه
بحلم لمدينة البلوجرية
انها تطلع المواهب الحلوة المدفونة
من صحفيين كويسين احسن من اللى
بنسمع عنهم
على الاقل يكونوا صادقين
و لا نعمل كلنا جريدة اسمها جريدة البلوجرية
هههههههههههههه
بحلم ان المدينة تطلع دكتور زي زويل
و بحلم انها تطلع شاعر...
الشباب بكل اعماره دايما بيشكي ان مافيش حد بيسمعه
و احنا موجودين نسمع لبعض
و ننصح بعض

و الاهل اغلبهم بيشتكوا ان ولادهم طول النهار فى الشارع
ههههههههههههه
ففرصة اننا نتجمع فى المدينة
منها نقول كلمه مفيدة
او رأي يؤخذ بيه
او نقرأ معلومه
او نضحك مع حاجه تضحك

اما الحلم المستحيل انه يحصل و بتمنى من كل قلبي انه يحصل
ان اسرائيل تختفى
هههههههههههه
يجيلها فيضان و لا زلزال و اي حاجه تخفيها
و على فكرة مافيش حاجه مستحيله
طول ما في ربنا سبحانه و تعالى
تحياتي
و كل سنة و انتى طيبه و صحبتي

صبرني يارب said...

دولي انتى بتوحشلنا ؟؟؟
ساكته ساكته وبعدين تقولي كل الى عندك

لا تؤجل عمل اليوم للغد يا دولي

وكل ده بسبب الرغي بتاعك مخليك مش فاضيه للبلوج
هههههههههههههههههههه

بس ايه النكت دي كلها يا امي

هما لحقوا يألفوها طيب
ههههههههههههههههههه

البت المشمشية حلوة بس شقية said...

هههههههههههههههههههه
ايه يابت الرغى ده كلو
انا عينى وجعتنى من كتر القرايه
بس ولا يهمك
كفايه بس انى موت على نفسى من الضحك

mony said...

هههههههههههههه


ثلاتة علي واحد كفااااية


جرعة دسمة جدا

بس دمها خفيف موت

كل ديه تيجان؟؟

طيب لبستيهم ازاي كده مرة واحدة


عموما شكرا يا ستي علي التاج
هحاول اجاوب عليه اول ما اروح بيتي العزيز علشان انا عند مامتي و قاعدة علي الكمبيوتر دلؤتي غصب و اقتدار


و حلو اوي الافيهات اللي اتعملت علي حادث الجزمة

تسلم ايدك يا جميل

Anonymous said...

سأضطر اعلق لانه عجبني
جميل وخفيف وسهل الهضم وخالي من الدسم ومفيد لمرضي القلب
عبد الجليل

kochia said...

حلو الخروف الاسترالي ده
لا يقهر
المهم طعمه كان ايه؟؟؟

وعجبني كمان الحاجات بتاعة بوش والجزمة دي
حلوة

تحياتي

الربان said...

تحياتي

اجابات التاج جميلة...كب سنة وانت بالف خير و سلام...و الجميع كذلك.

نما الي علمي ان نقابة الصحفيين ستصرف
لكل صحفي جوز حذاء خاص بالمؤتمرات الصحفية.

وان الادارة الامريكية تشترط الان علي كل عربي يريد زيارة امريكا ان يقدم ما يثبت انه حافي القدمين لمنحة التأشيرة....

ايضا البنتاجون رصد مبالغ طائلة لتطوير اسلحة مضادة للاحذية الطائرة...

في اجتماع عاجل للمجامع اللغوية العربية تم الاتفاق علي الغاء مادة" حذا "...و منها يحذو حذوا...و ايضا حذاء...اقول تم الاتفاق علي الغاء هذه
المادة من المعاجم العربية...

تحياتي و دمت بالف خير

EmY said...

ايه ده مش هاتكتبي لاول السنه ليه لسه بدري

تعرفي انا دايما احلم احلام عجيبه مريبه بناس غريبه مالهاش اي علاقه بيا مره ببابا الفاتيكان و مره عمرو موسي بيبقي حرب مش حلم

بوش اتبهدل يا منز بجد بريستيجه راح في الوبا

كل سنه و انتي طيبه

يا مراكبي said...

يااااه

ده بوست طويل جدا بجد .. ممكن فعلا يكفينا لحد آخر السنة زي ما إنتي قولتي

هههههه

كل عام وأنتم جميعا بخير وإن شاء الله تتحقق كل أحلامكم على خير

كيكى said...

وحشتينى
**********
جميل اوى البوست الى انتى مألفه طب مش حلة على اول واحدة!!!1
*********************
وتاجك الى حليته
هقولك عييييييييييييد سعيييييييد سابقا
وانتى دايما متهنية وفرحانة وبتجرى وراء الخرفان وبتاكليهم عند فى ابى بقى
هههههههههههه
كل سنة وانتى دايماب خير ياقمر
عووووووووووووووووووووو

جنّي said...

السلام عليكم

الاول اقولك اجاباتك موفقة وثانيا التالتة تابتة بجد وجامدة كمان انا ها اضمك لاتحاد العتقية لصناعة الصرم والبراطيش اصل اللي زي بوش كترو اوي في بلادنا ومحتاجين صرم كتير لمواجهتهم ..

سلام

الإتربي اللولبي said...

العزيز قوس قزح

آسف على التأخير الفترة اللي فاتت لظروف خارجه عن إرادتي

أحلى حاجه في التلاته موضوع الجزمه ده

بجد أنا لسه بادمع من الضحك

يستاهل بصراحه

و يا ريتني كنت معاهم .. أنا جزمتي داخله على 52 مش 45

تحياتي و تقديري

السلام عليكم

Gannah said...

ازيك يا داليا
يارب تكونى بخير
وحشانى جدااا
فكرتينى بالعيد فى بيتنا
الخرفان دى طلعت حكاية الاحسن زى ما آبى بتقول ابعدى عنها بانواعها
اما موضوع بوش فبجد احنا شعب مالوش حل بيتهيألى انهم الفوا النكت بعد اللى حصل بدقايق
والله الواحد كان نفسه تيجى فى الهدف
الاحلام كتير يا داليا اصل لو محلمناش الدنيا هتبقى صعبة قوى
الاحلام بتدى الامل فى بكرة احلى
ربنا يصلح حال بلدنا وحال ناسناوحالنا
تحياتى

Soooo said...

يالهوي
ياخراشي

بتشرديلي عشان قلتلك عايز حتة لحمة صغننه من الخروف
يافضيحتي في وسط موائد الرحمن

الرئيس الأمريكى يسأل كونزاليس "كوتشى فين يا كوندى" وأنا بانضرب

هههههههههههههههههه
دي انا قريتها واتقلبت عالارض كما الصرصار البلدي من كتر الضحك


ربنا يسعدك ويكرمك دنيا وآخره





سلامووووووووووووز