Friday, January 2, 2009


تحديث
و لكن بدون تعليق

السلام عليكم

ده أول بوست فى السنة الجديدة عن ميعاد لتجمع خيرى

والدعوة موجهة من إيناس صاحبة مدونة أوتار واللى بتمضى بإسم نهر الحب

الدعوة لزيارة الجرحى الفلسطينين بمستشفى الهلال الأحمرالمصري اللى في رمسيس

وعنوانها بالظبط كدة 34 شارع رمسيس بجوار جريدة الجمهورية

رقم تليفون المستشفى25750160

التجمع هيكون يوم الاربعاء الموافق 7 يناير الساعة 11 صباحا

هنتجمع قدام المستشفى وده رقم تليفون هيكون مع إيناس يوميها0188047779

يوم الأربعاء ده اجازة رسمى

التبرعات اللى محتاجينها

فلوس

ملايات سرير

لعب اطفال

ملابس وغيارات

عصاير

المستشفى مش محتاجة قطن او شاش أو الحاجات دى


و فى كمان دعوة من دعاء صديقة و جارة خيخة و اى كلام
لمشاركتها فى جمع تبرعات عينية لتوصيلها لأهل غزة

وده عن طريق لجنة الاغاثة اللى تبع نقابة الأطباء

و خيخة بالنيابة عنهاهتروح هى وإيناس يوصلوا التبرعات للنقابة

لجنة الإغاثة بتاعة نقابة الأطباء محتاجة كل ماتتخيلوه

بطاطين

قطن

ميكركروم

أطعمة معلبة

عصائر

شاش

مطهرات جروح

مضادات حيوية لإلتئام الجروح

يعنى أى حاجة هتنفع

فلو تحبوا تشاركونا بالتبرعات يبقى كتر خيركم ممكن جدا اللى هيجى المستشفى ومش هيقدر يروح بعد كدة نقابة الاطباء وعايز يبعت تبرع يبقى يديه لخيخة وايناس الحاجات وهم هوصلوها بالنيابة عنه

أخر حاجة اللى يحب يبعت تبرع لأهل غزة عن طريق الهلال الاحمرلازم يكون عامل كارنيه عضوية فى الهلال الاحمر وده بيتطلب خمسة جنيه و صورة للرقم القومى وش وظهر وعدد اتنين صورة شخصية وش وظهر

و بالكارنيه ده تقدروا تبعتوا تبرعات لأهل غزة مباشرة


ملحوظة : البوست ده منقول عن مدونة بنت خيخة واى كلام

و هو دعوة للمشاركة بايجابية فى مساعدة غزة

اتمنى مشاركاتكم حتى لو بالمجهود

26 comments:

صبرني يارب said...

دولي يا جميل

كان نفسي اجي بس امتحانات مريم انتى عارفه

هاشوف هاقدر ا عمل ايه وربنا يسهل

وحشاني يا بت

mony said...

ربنا يقدم اللي فيه الخير

maha zein said...

معاكي ان شاء الله
وهحاول اعلن عن الموضوع في مدونتي بردو
ربنا يقدرك علي فعل الخير
وبيتهيقلى دى اقل حاجة نعملها

قوس قزح said...

صبرنى يا رب

انا كمان عندى امتحانات
بس ربنا هيسهل ان شاء الله للناس اللى هتشارك بنية الخير و يخلى الواحد يقدر على ظروفه

انت كمان وحشتنى اوى

قوس قزح said...

مونى

يارب .. لان هدفنا الخير ليس الا


تحياتى

قوس قزح said...

مها زين

جزاكى الله كل خير
و فى انتظارك يومها ان شاء الله

تحياتى

سمكه واحده said...

ربنا يكرمك يارب بجد والله انتي حد جميل اوي وان شاء الله ربنا يقفدرنا علي فعل الخير ونعمل حاجه بسيطه ليهم ونحاول نعمل حجات منقفش نتفرج
كل اللي بيفكر بجد يعمل ايه مش نزعل شويه وخلاص
كل اللي اقدر اقولهولك
جزاكي الله كل خير

بنت الغربة said...

داليا ياحبيبتى
انا باحب الاسم ده قوى علشان على اسمى
المهم المجهود ده تشكرى عليه انت وخيخه
بس ياريت تقوليلى اللى فى الغربه زى حلاتى تعمل ايه؟؟؟؟
شوفى انا اقدر اساهم ازاى وانا تحت امرك ياجميل
تحياتى وكل سنه وانت طيبه

(احمد سكر ) said...

ان شاء الله معاكم

قلبا وقالبا

احمد

البت المشمشية حلوة بس شقية said...

يارب يارب يعودلك فى صحتك
ويجازيكى خير يارب
ياجميل

همس الاحباب said...

ان شاء الله
هاكون متواجد
وربنا يوفق الجميع

نهر الحب said...

شكرا لكى جدا يا داليا
بجد ربنا يجزيكى خير

ahmed_k said...

ربنا يوفقكم فعلا مجهود جميل ربنا يبارك في القائمين عليه
وإن شاء الله أقدر أشارك معاكم
بس عندي سؤال بالنسبه لطلبات الإشتراك في جمعية الهلال الأحمر صورة الرقم القومي وش وظهر و2 صوره شخصيه بس دي إزاي وش وظهر أنا كل صوري وش بس يعني متنفعش ههههههه

سلاااااااااااام

شفقة هانم واحسان بك said...

ازيك يا داليا؟
يارب تكونى بخير
ان شاء الله نحاول نيجى ونشارككم

قوس قزح said...

سمكة واحدة
جزانا و اياكم
يارب فعلا يكون اللى بنعمله يساعد الناس
مع انى عارفة انه مش كفاية .. بس مفيش فى ايدينا غير كده حاليا

تحياتى

قوس قزح said...

بنت الغربة
و انا كمان بحب طريقتك فى الكتابة
و بحب تعليقاتك بس انها قريبة من تفكيرى
يظهر اللى اسمهم داليا كلهم تفكرهم قريب من بعض

اما عن المساهمة من بره مصر هحاول اشوف طريقة و ابلغك بها

شكرا على اهتمامك
تحياتى و كل سنة وانتى طيبة

قوس قزح said...

احمد سكر

دايما سباق بالخير يا احمد
بس انا عارفة انك خارج مصر اليومين دول
ان شاء الله لما ترجع بالسلامة تبقى تزورهم

تحياتى

قوس قزح said...

البت المشمشية حلوة بس شقية

اشكرك على دعاءك الجميل زيك

تحياتى

قوس قزح said...

همس الاحباب
هتنورنا يا خالد زى كل مرة
ربنا يبارك لك فى همس و مامتها
و يجزيك على فعل الخير اللى دايما مش بتتاخر عنه

تحياتى

قوس قزح said...

نهر الحب

شكرا لكى انتى انك هتجمعينا لعمل الخير الجميل ده
و يارب دايما نتجمع على الخير

قوس قزح said...

ahmed_k

ههههههههههههههههههههه
و الله معرفش بقى اتصرف
ابقى خد صورة كمان بالقفا
او اسال خيخة هى بتتصور فين ههههههههههههههه

هتنورنا بمشاركتك يا احمد
حتى لو كانت بالقفا ههههههه

تحياتى

قوس قزح said...

شفقة هانم و احسان بيه

انا الحمدلله بخير وانتم ؟

هيسعدنا وجودكم معنا طبعا

ان شاء الله المحاولة تكون ناجحة و تقدروا تيجوا معنا

تحياتى

dodda said...

قوس قزح

ازيك؟؟
كل سنه وانتى افضل ان استطعنا ان نكون افضل

اتمنى انك تقولى ايه اللى حصل فى الزياره لاتى عايزه اروح يوم تانى

يا ريت رد سريع
شكرا
تقبل الله صالح اعمالكم

أحمد كمال said...

للأسف عرفت الميعاد متأخر جدا

جزاكم الله خيرا ، و يا ريت كل واحد يعمل اللي يقدر عليه


حسبي الله لا إله إلا هو عليه توكلت و هو رب العرش العظيم

قوس قزح said...

dodda

يا اهلا يا اهلا فينك يا بنتى .. عاملة ايه و الله وحشتنى
بصى يا ستى انا علشانك هنزل بوست بالتفاصيل ان شاء الله


و تقبل الله منك مقدما

قوس قزح said...

احمد كمال

و الله يا احمد انا امبارح كنت لسه بقول احمد غريبة انه مجاش .. بس مش هلومك لوحدك و هلوم نفسى معاك لانى ماتصلتش و بلغتك و انا عارفة ان ممكن شغلك يكون واخدت من التدوين شوية

عموما يا احمد انت دايما سباق بالخير و انا متاكدة انك ساهمت فى مساعدة اهل غزة بطريقة ما .. كفاية الرسايل المشجعة على الخير و المساعدة اللى بتبعتها لنا كلنا ..جزاك الله خير عليها و على محاولاتك الدايمة لاصلاح الذات

تحياتى