Saturday, January 10, 2009

اطفال ..ابطال

نورهان ..فتاة فى التاسعة من عمرها ذات شعر ذهبى و بشرة بيضاء و عيون عسلية فى الصف الرابع الابتدائى تملك ابتسامة تسرق القلوب و خجل رقيق يطل من عيونها مع لمعة ساحرة .. يخفى نحول جسدها ملابسها التى تتكون من اربع قطع صيفية حتى تشعر بالدفء
تمسك بين اناملها لعبة صغيرة لشخصية المراة الخارقة .. تحدثت معها عنها و عن اعجابها بها و كيف انها تتمنى ان تكون فى يوم من الايام مثلها خارقة لا تتأثر بأى الم
نورهان طفلة نزيلة فى مستشفى ابو الريش للاطفال مريضة بمرض الذئبة الحمراء .. الذى ياكل ببطىء شديد فى اعضاء جسمها و يتوقع الاطباء فى حالتها انها فى السنة السابع عشر قد تكون عروسة تزف الى السماء
تعالج نورهان كل فترة لمدة خمس ايام عن طريق الحقن اربع مرات يوميا بحقن الفيجام الخاصة بنقص المناعة و سعر الحقنة الواحدة 525 جنيه .. ولان اهل نورهان بسطاء ماديا ولان نوعية الدوا الباهظة الثمن لا تستطيع المستشفى توفرها ..يلجا العاملين فى المستشفى كل مرة لجمع التبرعات حتى تستطيع نورهان العيش بضعت اشهر حتى الانتكاسة التالية لتبدأ رحلة البحث مرة اخرى عن الدوا
اليوم استطاعت نورهان استكمال كورس الخمس ايام للعلاج لتخرج غدا لامتحان اللغة العربية و تعود مرة اخرى للمستشفى لمعرفة نتائج التحاليل
*******
منى.. طفلة فى الرابعة من عمرها تتمتع بالملامح المصرية الجميلة من بشرة سمراء و شعر اسود و عيون واسعة سودا ..و جسم لا يتعدى الخمس عشر كيلو جرام .. تستمع للحوار الدائر بيننا ولا تعى غير انها تريد ان تلعب و تجرى كباقى الاطفال .. لديها مشكلة فى عمودها الفقرى ..ترتدى دائما مقوم للضهر مثل القميص من البلاستيك الجامد و تقوم بالعلاج الطبيعى فى المستشفى ..و لكن كل فترة يصبح القميص مصدر ضيق لها فى التنفس و النمو و ذلك لصغر حجمه فلابد لها ان تغيره بمقاس اكبر.. و لكن كيف و سعر القميص الجديد يترواح ما بين ال 500 و ال 600 جنيه .. فتنتظر منى و تتحمل على نفسها حتى تمد اليها يد الخير بقميص جديد
*******
ادهم ..فى الرابعة من العمر يشبه كثيرا الاطفال المصرية اللمضة التى يتم اختيارها لادوار السينما .. ولكنه للاسف لا يستيطع ان يتمتع بتلك اللماضة فهو لا يتحرك ولا يعى ما حوله لانه يعانى من مشكلة ما فى الاعصاب ..و حتى يراه والده طفل طبيعى باع كل ما يملك - و هو موظف بسيط - حتى يستطيع علاجه .. ولكن مازال ادهم طريح الفراش عديم الحركة فى انتظار رحمة الله و رحمة المتبرعين له لاستكمال طريق العلاج
*******
احمد حسن رضيع كان من احتياجاته علب لبن لا يستطيع اهله توفرها له تمن العلبة 31 جنيه .. وبالسؤال عنه كان الرد .. ربنا اتولاه برحمته .. البقاء لله
زيارة قصيرة لمستشفى ابو الريش لا يسعنى القول بعدها الا الحمدلله على نعم لا نشعر بها و الدعاء لاهلك يا مصر بالرحمة فهى تجوز على الميت و الحى

26 comments:

واحدة مفروسة said...

يااااااااااه يا دليا
الدنيا مآسي و الله
ربنا يرحمنا جميعا
و ربنا يجازيكي كل الخير على اعمال الخير اللى بتعمليها

mahasen saber said...

عارفه يا داليا انا كل ما بشوف حالات كده او ااقرا عنها معرفش بتخيل نفسى مكانها ليه
وبخاف بخاف قوى على ابنى ليحصله شئ

ربنا يصبر اهاليهم ويعينهم
عارفه انا كنت اعرف طفله صغيره عندها سبع سنيين كانت بتسافر تاخد جرعات علاج كيماوى تخيلى طفله مريضه بالسرطان ويتيمه بتسافر مع مرات ابوها المهم اتصاحبنا وكنت شايفه فيها بنتى اليى مخلفتهاش وبعدين غبت عنها شهور لان اصلا وسيلة السؤال كان المقابله فى المواصلات والتليفون وبسال عليها عرفت انها ماتت
عارفه على قد ما حزنت على قدما قلت دى اكيد رحمه من ربنا بيها

مش عارفه يا داليا بحكى ليه عنها بس افتكرتها قوى من الالات دى

ربنا يعافيهم ويخفف الامهم ويحمي اولادنا ويبارك فى صحتهم
اللهم امين

~*§¦§ Appy §¦§*~ said...

يا يا دوللى نقلت حالتهم خلتينى فى عز النار اللى انا فيها عندي امل تخيلى لما اطفال زي دول بكل اللى فيهم يدونى امل انا طلعت هفا اوي عااااا

ماما أمولة said...

اللهم اشفيهم واشف كل مريض اللهم امين

الحمد لله

رئيس جمهوريه نفسى said...

ربنا يشفى كل مريض ان شاء الله ويقدرك على فعل الخير ويجعله فى ميزان حسناتك ان شاء الله

dodda said...

الحمد لله الذى عافانا مما ابتلى به غيرنا
وفضلنا على كثيرمن خلقه تفضيلا


يا ريت تبقى تاخدينى معاكى

شفقة هانم واحسان بك said...

طبعا الحمد لله مائة الف مرة على كل النعم اللى ربنا انعم علينا بيها
وربنا يدينا الصحة والعافية والستر يارب
وربنا يشفيهم ويشفى كل مريض امين يارب
تحياتى

صبرني يارب said...

داااااااااااااااااااليا
يا وجع قلبي يااااااااني

نهر الحب said...

داليا
اولا جزاكى الله خيرا
وجعلة الله فى ميزان حسناتك يارب العالمين
هكلمك فى التلفون ونتكلم عن الحالات

Mohamed Hamdy said...

طبعا الحمد لله وكل حاجه

بس احنا مينفعش دورنا يقف عند مجرد اننا نحمد ربنا انه لم يبتلينا بما ابتلى به الاخرين .. يعنى كون احنا سلام هم مرضى ده له معنى مهم اننا لازم يكون لنا دور فى اللى بيحصل ونشارك باى حاجه حتى لو بعرض الحالات دى زى انتى ما عملتى

المهم لازم تحرك

Diyaa' said...

يا رب آمين
والحمد لله الذي عافانا وبجد ربنا يصبر أهلها وربنا هيوعد الملايكة دول بالجنة
ونفسي اللي بيصرفوا ملايين في حاجات ملهاش لزمة يقروا الكلام ده ويحسوا بقيمة ال500 جنيه في منع الألم
عارفة اللي يوجع أكتر إيه
إني مقدرش أعمل ليهم حاجة غير الدعاء
بس هحاول أفكر في أي حاجة
ربنا يكون في عونهم
وربنا يبارك فيكي علي نقل الصورة دي
يمكن توصل لحد في قلبه خير ويقدر يساعد

البت المشمشية حلوة بس شقية said...

الحمد لله الذى عافنا مما ابتلى بهى غيرنا وفضلنا على كثيرا من خلقه تفضيلا

romansy said...

يارب يرحمنا
ونحمد بنا على النعم اللى مديهلنا
يارب

ربنا يقويكى على فعل الخير

همس الاحباب said...

الحمد لله على كل نعمه
الحمدلله الذى عافانا
ربنا يشفيهم
اصعب حاجة انك تلاقى طفل مريض وبيتالم
حاجة بجد صعبة
ربنا يكرمك ويجازيكى خيرا
ممكن اقتراح بسيط
ليه منعملش لقاء شهرى ونتبرع فيه للاطفال المحتاجين
كل حسب مقدرته
وممكن نلفت نظر اناس من اهل الخير لتلك الحالات
اتمنى انه يتحقق هدفنا
تحياتى

وومن said...

دودو

الحمد لله الذي عافانا مما ابتلي به الاخرين

ربنا يرحمهم برحمته ويرحمنا احنا كمان

mony said...

الحمد لله الذي عافانا مما ابتلي به غيرنا و فضلنا علي كثير ممن خلق تفضيلا



ربنا يشفي كل مريض يا رب



و يشفيهم و يصبر قلب اهلهم



و يرزقهم برزق من عنده

Sherif said...

زيارة بسيطة .. أو تبدو كذلك .. عميقة الألم .. موجعة للقلوب

صحيح .. الحمد لله على نعماه .. والحمدلله أكثر على معاونته لنا وتيسيره السبل لفعل الخير .. وأهل الخير كثيرون .. يسعون كما الملائكة لعمل أى شئ .. ويبذلون أقصى ما فى وسعهم

لكن يبدو أن أقصى مافى جعبتهم أصبح لايكفى .. ولايصلح لشئ مع كثرة من يحتاجون ليد مساعدة مطمئنة كريمة

لكننا فى النهاية لانملك الا الدعاء الى الله ان يعيننا على عمل الخير .. وعلى شكره .. وأن يدخلنا برحمته فى عباده الصالحين

Gannah said...

السلام عليكم
اهم حاجة فى عمل الخير الاستمرارية
فجزاك الله خيرا لمتابعة زيارة المستشفى
وكان نفسى اكون معاكم فى زيارة جرحى فلسطين
كمان انا عجبتنى جداا فكرة المكتبة
انا متابعة يا دودو
ومعجبة جداا بنشاطك انت وآبى
ربنا يكرمكم
تحياتى

د. إيمان مكاوي ( أم البنين ) said...

داليا..حبيبتي في الله
جزاكم الله خيرا على ما تقومن به
وأريد منك بما أنك لك صله بمن يذهب للجرحى أو بمن يوصل مساعدات لغزه ..أن تنشري أنهم يحتاجون الطعام أكثر من أي شيء ..فلا يوجد طعام في غزة ..وهذا ما عرفته من أهلهم هنا في السعودية
تحياتي لمجهوداتكم

الازهرى said...

الحالات موجودة فى المستشفيات مثل هذا
كثيرة
ونحاول ان نعاونهم بقدر المستطاع
ولكن فى النهاية نجد انفسنا عاجزين امامهم
فندعوا الله ان يخفف عنهم
ونحمد الله الذى عافانا مما ابتلى به كثيرا من خلقه

قوس قزح said...

الاول باعتذر ل يا مراكبى ان تعليقه معرفش ليه اتحذف و انا بنشر التعليقات
و كان تعليقه الاتى :


ربنا يبارك فيكم جميعا

وده مش غريب عليكم بجد

ومش أول مرة تسعوا في الخير

...........
انا بشكرك على تشجيعك و و بعتذر عن اختفاء التعليق
و انا متاكدة انك لو معنا كنت هتكون من اول الناس اللى هتشارك معنا فى الخير
زى ما بيقولوا هذا الشبل من ذاك الاسد .. ربنا يبارك فى والد حضرتك

تحياتى

قوس قزح said...

واحدة مفروسة
ربنا ما يضرنا ابدا فى حد عزيز علينا ولا نشوف المآسى دى لانها صعبة اوى :(

........

محاسن صابر
انا نفس الشىء بتخيل نفسى مكان الام و بلاقى نفسى مش هقدر استحمل اشوف حد من ولادى كده .. ربنا يحفظ اولادنا جميعا يارب

.........

appy
ايوه يا آبى هناك تحسى اد ايه احنا مرفهين جنبهم اوى اوى .. و مع كده بنشكى .. شوفتى بقى اد ايه احنا فى نعمة و مش حسين بها

.........

ماما امولة
اللهم امين

............

رئيس جمهورية نفسى
جزاك الله خير انت كمان يا محمود على رغبتك و اصرارك فى المساعدة

قوس قزح said...

dodda
الحمدلله حمدا كثيرا على نعمة الصحة

ياريت ده انتى تنورينى و كمان بصراحة الزيارة لوحدى صعب اوى
بس انا للاسف معرفش اوصلك بطريق مباشر علشان ابلغك .. لو فى وسيلة اوصلك بها يا ريت تبلغنى بها لو تحبى


.........


شفقة هانم و احسان بيه
الحمدلله و ربنا يتقبل دعاءكم


........

صبرنى يا رب
مهما اقولك مش زى ما تشوفى
ماكنش وجع قلب بس ..ده كان وجع روح:(


........

نهر الحب
جزانا و اياكم
و انا فى انتظار مكالمتك لان فعلا الاطفال دول محتاجين لايدينا كلنا مع بعض علشان نساعدهم

.......

محمد حمدى

انت شكلك كده يا محمد هتدبس معنا فى الجروب المشارك دايما :)
و انا موافقة على كلامك جدا و ان شاء الله قريب نعمل زيارة تانية للمستشفى

dodda said...

داليا انا دلوقتى بفتح البلوج علطول فى اى وقت قوليلى ونتفق على ميعاد نروح فيه

ربنا يكرمك ويأجرك الدال على الخير كفاعله

عاشــــــ النقاب ـقــــة"نونو" said...

الحمد لله الذي عافانا
ربنا يصبر اهاليهم ويشفيهم
الدور الايجابي
ليا اقتراح
بما ان دراستي خاصة بالعمل الاجتماعي فكنت بشوف الاخصائيين اللي بيشتغلوا بذنة وضمير بيبقوا معاهم تليفونات رجال اعمال خيريين لما بيعوذوا تبرعات بيتصلوا بيهم ويقولولهم عاوزين اد كدة لكدة وفيه رجال اعمال كتيرة بتبقى مش عارفة توظف زكاتها ازاي فممكن بتركزها في حتة واحدة المشكلة اللي ممكن تقابلنا وتتحل برضه باذن الله ان الاخصائيين بتوعي دول كانوا بيدوهم ايصالات بزكاتهم علشان يبقى الوضع قانوني
احنا بقى ممكن في نطاق الاسر والمعارف وكدة نشوف الاغنيا ونطرح الفكرة كل واحد في محيطه يعني وممكن اللي يحب انه يكون الموضوع دة مبلغ شهري يبقى كويس
وانتي تمسكيه
حاجة تانية
برضه كل واحد في شغله وقت قبض المرتب لو خصص خمسة جنيه شهريا منه ومن اصدقائه هتجمع مبلغ كويس وانتي برضه تكوني همزة الوصل وتودي الفلوس دي للاولاد اللي بتحتاج حاجات شهرية
وما اظنش اي مدون ومدونة هيبخل بخمسة جنيه شهري ونشر الفكرة بين اصدقاء العمل والمحيطين
عارفة هيلاقيهم بعد كدة يدوروا هما عليه
وربنا يوفق يارب

koukawy said...

الحمدلله الذي شفانا و عفانا و فضلنا علي كثير من خلقه