Sunday, March 8, 2009

المشى على الزجاج



امبارح بعد ما نمت بساعتين حسيت بعطش شديد و ده نادر لما بيحصل و قلت يمكن نتيجة الجو التراب

قمت بدور على الشبشب برجلى مش لاقياه

فتحت اباجورة نورها خفيف ملاقيتش الشبشب و استغربت اومال انا جيت هنا ازاى

المهم قلت خلاص اقوم اشرب و الصبح اشوف الشبشب ده سرح فين لوحده

فتحت نور المطبخ و بمد ايدى اجيب كوباية راحت كوباية على حرف المطبقية وقعت و ادحرجت و هوب مائة حتة فى الارض

اتسمرت فى مكانى ..

دى كريستال ..

و انا حافية ..

يعنى لو اتحركت اكيد هأدوس على الازاز اللى فى الارض ..

فكرت و قلت امد رجلى اسندها على دولاب المطبخ و اشب شوية لحد ما اوصل لايد المقشة ..

و لسه بمد رجلى النور قطع ..

بقت الدنيا كلها كحل ..

لا شايفة ايد و لا رجل و لا مقشة ..

قلت مش هتحرك من مكانى و اكيد النور هيجى ماهو بيقطع و بعد اقل من خمس دقايق بيجى ..

فاتت الخمس دقايق ..

و فات عشر دقايق ..

قلت انده على جوزى ..

بس ده نومه تقيل يعنى ممكن العمارة كلها تصحى و هو يكون فاكر انى بنده عليه فى الحلم ..

طيب احاول اجيب المقشة ..

مديت ايدى فى كل الاتجاهات لاقيتنى هوقع حاجات تانية على الارض

و بعد مرور حوالى نص ساعة ..

كنت خلاص زهقت و تعبت و اعصابى باظت ..

اخدت قرارى بأنى امشى على الازاز و زى ما تيجى ..

ولان الواحد خياله بيشتغل فى الضلمة اكتر افتكرت فيلم سو الجزء الاول لما الرجل قطع رجله علشان يهرب من المكان

و كمان اتخيلت افلام الكرتون لما واحد من شخصياتها يمد رجله تدور على حاجة و يبقى شكلها زى الايد ..

و اقول لو امد رجلى تحسس كده على الارض ..

طيب انا هأحط رجلى بالراحة اوى و اول ما احس بحاجة بتشك رجلى اختار مكان تانى

و احاول بقدر الامكان اخلى خطوتى واسعة علشان اختصر الالم فى خطوتين ..

و توكلت على ربنا و دعيت ان بس لو انجرحت ميكونش جرح جامد او يقطع شريان او وريد ..

و بسم الله الرحيم الرحمن و مدت رجلى ..

النور جيه ..

هيييييييييييييييه ..

اول مرة احس بالفرحة اووى كده لرجوع النور صرخت زى الاطفال

و حمدت ربنا كتير لان اول خطوة كنت ناوية اخدها كانت مظبوطة تمام على ربع الكوباية اللى تحت السليم لانه تخين شوية و مش سهل يتكسر و كان واقف فى شموخ مستنى رجلى تنغرس فيه ..


ساعات مواقف كتير لو الواحد رمى حمله على ربنا و كان عنده ايمان كبير ان ربنا هيكون جانبه ..

ربنا مش بيكسف عبده ابدا ..


الحمدلله

104 comments:

واحدة مفروسة said...

هييييييييييييه اول تعليق

واحدة مفروسة said...

و التاني بقا ان شاء الله
اولا حمدا لله على سلامتك
ثانيا لو الشبشب بتاعك بيمشي و هو نايم ابقى اربطيه فى السرير
ثالثا حطي زجاجة مية جنبك على الكومود


نيجي بقا للمفيد
انتى سلمتى امرك لله و توكلتى عليه و قلتي بسم الله الرحمن الرحيم
و ديه الحاجات اللى ربنا قالنا عليها فى الغيبيات كلها
توكلى على الله و سمى بالله و خلى جواك ثقة انه معاكي
و هوه حيكون معاكي فعلا
ياريت الناس تعرف و بدل ما تتعب نفسها فى التفكير
ان ربنا موجود توكلوا على الله و هوه نعم الوكيل

حاجة على جنب كده
بعد ده كله شربتي ولا لسة عطشانة؟؟؟؟
و اوعي الموضوع ده كان الفجر و دخلتى نمتى تاني؟؟؟؟؟؟

اسامه عبدالعال said...

هههههههههههههههه
انا فرحان فيكى فرح

Appy said...

فهمت من الاول من اللى ورا الكلام
بس لقيتك فى الاخر كتباه
بس فيه ناس بتحسب خطواتها برضه ولازم تتعور ما هو انتى متضمنيش اللى قدامك ممكن يطلع زى الكوبايه شرير ويعورك
المهم ابقى فكرينى اضرب الشبشب ده
علشان بيمشى وبعدين بطلى الحركات القرعه دى عاوزه تفهمينى عندك شبشب وقال ايه بيمشى دا احنا دافنينه سوا انتى اصلام عامله زى بتمشى حافيه
اه نصيحه
لما تتحطى فى موقف زى ده ابقى اعملى السرير فيبريشن ووصلى له زراير فى كل البيت علشان تصحى جوزك

أنا إنسان said...

كان فيه حل تاني
تزقي برجلك الزجاج ولا ترفعيها ابدا
تزحفي بها حضرتك على السيراميك في خط متصل
ماكانتش رجلك ها تنخدش
!!!!!!!!!!
بس مبروك مجئ النور
أنار الله حياتك كلها

BAsMA said...

الحمد لله

حمدلله على سلامتك
حاجه رخمة اوى لما الكهربا تنقطع وخصوصا لما بتقطع فى اوقات غير مناسبة

يله ربنا ستر الحمد لله

صباح الصباح said...

دى المفروض تتحط فى مواقف وطرائف

هاهاىهاى

dodda said...

البوست حلو اوى يا دوللى

الحمد لله انك بخير
التوكل على الله فى الازمات شىء جميل
وربنا عمره ما بيكسف اللى يدعيه بصدق

وبس كمان المهم نكون بندعى فى السراء والضراء
وربنا يكرمك ويرضى عنك
اسأل الله ان يجعل لك
فى وجهك نور
وفى قلبك نور
اللهم نور السموات والارض
اللهم اجعل لها نور
امين

مـحـمـد مـفـيـد said...

يعني الراجل شقيان طول النهار وعايز ينام ساعتين
تفضحيه كده وتقولي نومه تقيل
كويس ان ام العبدين معندهاش مدونه كانت بقت زيك
:))

!!! عارفة ... مش عارف ليه said...

اجمل ما في الموضوع هو إنسانيته

وانه بيحصل لنا كلنا

ويمكن ميفكرش حد فينا يكتب بوست عليه

إنما أنت حطيتي اسبوت عليه

وخليتي أي حد يقراه يعيشه ويشوف نفسه فيه

وكل واحد كان بيخطي مع خطوتك لتفادي الالم


دومتي مبدعة
وليد

dreem said...

ازيك دودو
كل سنة وانت طيبة
فعلا .. من توكل على الله فهو حسبه
امبارح ميرو بنتى كانت بتدور على حاجة وهى ههههه من النوع اللى بيدور بعينه مش بأيده لقيتها بتقول
بتقول ولا سحر ولا شعوذة
بسم الله الرحمن الرحيم
وهوبا لقت اللى هيا عايزاه
قصره
ابقى خلى بالك وخلى قزازة مية جنبك يا اوختى والحمد لله على سلامتك
تحياتى

كيــــــــــــارا said...

فهمت المغزي يادودو

الايمان بالله نعمه

مهندس مصري said...

الحمد لله
و سواء الموضوع بسيط و لا وراه مغزى
الحمد لله

و من يتوكل على الله فهو حسبه

واصطنعتك لنفسي said...

تدوينتك رغم بساطتها من الخارج إلا إنها شدتني جداً وصصمت إني اعلق عليها

حسيت قد ايه الواحد ممكن يفكر ويحاول يحسب عشان ماياخدش خطوة غلط أو مش في مكانها ولكن يجي قدر الله بعلمه وفي لحظة يغير لنا الاتجاه ودوماً ما تكون هناك حكمة وراء الاحداث.. حكمة للنص ساعة اللي وقفتيها تفكرى في نص الليل ولوحدك والدنيا ضلمة
مااعتقدش اني ببالغ لو قلت ان في مشاعر كثير اكيد اجددت جواكي في اللحظات ده

احيي حضرتك بشدة لانك لم تمري بما حدث مرور الكرام

ونطلع من كل رغيي ده بأنك تحطي دايماً جنبيكي إزازة ميه :)))
.
.
إيمان

محمد عبد الغفار said...
This comment has been removed by the author.
محمد عبد الغفار said...

انا كنت داخل اقول تعليق

لقيت انا انسان قايله

دائماً هناك حلول اخرى ، مش التهور بس اللى بيعور انما محدوديه التفكير كمان بتعور

صبرني يارب said...

دوووووووووووولي

سلامتك يا جميل من كل شر
اجيبلك كشاف يا اختي هديه منى ليكى

ومعلش يااختي كده هما بعد الطفل التاني تحديدا نومهم بيتقل كده

وفعلا مش بس الحرص ولا الاخذ بالاسباب وانما كمان التوكل على الله


تحياتي ياقمر

micheal said...

صح جدا يا داليا..انا الفترة الأخيرة بقيت شايف أن مفيش داعي الواحد يقعد يحسبها كده..ما أنا طول عمري عمال بحسبها ..خدت ايه يعني
ولا حاجة بس عمري ما جربت أسيبها علي ربنا...طب ما الواحد يجرب
حيخسر حاجة يعني
تحياتي

فاتيما said...

إيه دا
ما شا الله
إنتوا عندكو الشباشب بتمشى لوحدها؟!!
طييييييييب
على فكرة بقى
البوست دا مكتوب عليا
صح ؟!!
أنا حاسة كدا
أصل النص ساعة بتوعك دول حصلوا معايا فى قصة حياتى
بس كانوا مطوليييين قوى معايا
لكن وصلت لنفس النتيجة دى فى الآخر
و مسلماها لله فى كل حاجة
و متفائلة خير
إنتو كنتوا فين بس من بدرى
لو كنتوا جيتوا من ييجى ست سبع سنين
هييييييه
كل شى بأوان
و دلوقتى اوان المشى على الزجاج
و لا هيهمنى حاجة
بحبك قوى يا وش الخير كله
يا قلب و عقل و جدعنة الدنيا

saragebaly said...

قوس قزح

انا كمان امبارح اول يوم احس فيه بالعطش مع اني مش بحب المية

بس مكنتش قادرة اقوم من السرير اجيب المية
قعدت ادعي اقول يارب مش اموت وانا عطشانة
وفكرت في ان المية دي نعمة كبيرة اوي من ربنا
وان من نعمة ربنا كمان اننا مش نموت واحنا عطشانين

الغريبة اني برضو مقمتش اشرب


رسالتك وصلت ومفهومة تمام

بس

ايه حكاية الشبشب الي بيمشي دة؟؟

الموضوع كدة خطر
لازم تلاقيله تفسير

=====

اقولك على حاجة

كل مقرا عندك حاجة بحس اد ايه انتي انسانة جميلة اوي من جواكي

مش مجاملة على فكرة


تحياتي ولجمل حب لاجمل قوس قزح

دمتِ بخير دائما

سارة

رندا said...

حمدالله على سلامتك ياقلبى
شباشب بتطير وازاز بيتكسر ونور بيطفى
مممممم
دولتى هو فى اية عندكوا
انتى لما النور قطع فضلتلى كتير مستينة ازااااى بقى انا لو النور قطع وتحتى شوك هتلاقينى اجرى انط من مطرحى اصلا هههه
وكنت تحولت الى فراشةههه ومش مشيت على الزجاج ولا حسيت بية اصلا
ياقلبى اكيد عدى عليكى الوقت كانة سنة عقابا ان جوزك نومة تقيل خلية يجيبلك تلاجة فى اوضة النوم نهنهنهنها شريرة انا
ونعم بالله يادولتى ايوة لازم نسلم امرنا لله ونوكلة فى كل شئ
كلة كوم ولو النور قطع
بقعد اقرا قران كتير وادعية كتير
اصلى عندى فوبيا من الموضوع دة بالذات
بحبك اوى

Sherif said...

حمدالله عالسلامة

قلقتينا بس الحمد لله

هل رأيت عزيزتى عظمة مافعله اديسون باختراعه المصباح؟

وهل ترين انه حقق الأمان للانسانية كلها .. فألغى الخوف من الظلام؟

جنّي said...

السلام عليكم

جميل ان نتعلم من كل احداثنا اليومية التوكل على الله ..

اما حكاية الشبشب ممكن بدل ما نربطه زي اقتراح واحدة مفروسة لان ممكن البسه واتكعبل نعلمه زي القطة ما ننده عليها بسبس ونقول للشبشب (....) علمو شباشبكم بطريقتكم ..بس ياريت محدش ينفذ الاقتراحين ويدعي علينا ويكون محدود التفكير زي ما قال محمد عبد الغفار

تحيتي

مسدس صغير said...

الحمد لله ربنا ستر
كله بقدر
حتى الكوب اللى انكسر
وسلملى على القمر
وكفاية كده عشان نقوم ننام
لاننا مش واخدين ع السهر.
تحيتى وخالص مودتى

عالم ماريونت said...

مش عارفة بس افتكرت اثر بيقول ان الواحد مفروض يسأل ربنا حتى الملح لطعامه
ومواقف كتير بتخلي الواحد يفتكر انه مقصر في حق ربنا ومع ذلك ربنا دايما معاه
بوست مميز ربنا يوفقك
وابقي اسمعي كلام واحدة مفروسة وخلي ازازة مية جنبك على الكمودينو
هههههههههههههه
رنا عاشور

محمد فارس said...

السلام عليكم ورحمة الله وبركاته
الاخت الغاليه
الف ممدا لله علي سلامتك
وحفظك الله من كل مكروه
وادام عليك الصحه والعافيه
وكمان نعمة البصر
واحسن شئ عملتيه انك افتكرتي ربنا
بس ياريت نفضل فاكرينه علي كول من غير كسر ازاز او كريستال
بس تصدقي انا زعلت علي الكبايه
هههههههههه
اوعي تصدقي سلامتك بالدنيا
مع تمنياتي لك بالصحه والسعاده

محمد عتلم said...

ايه الحظ المدوحس ده
بس الحمد لله ربنا ستر

سمكه واحده said...

فعلا الاعتماد علي ربنا سبحانه وتعالي
والثه واليقين في الله مهمه جدا
المغزي واضح جدا
ربنا يبارك فيكي
بس ايه يبختكوا يا بختكوا عندكوا شباشب بتمشي
بس احنا عندنا شباشب او ما بنصفر بتجري علينا جري
تحياتي يا حافيه القدمين
وش مطلع لسانه)

mahasen saber said...

ههههههههههههه مش بضحك عليكى يا داليا زى الشرير اسامه انما بضحك على تعليقه


اليى مع ربنا بيكسب طبعا ويا ريت بطل قصة اسامه يعرف كده

لا بجد يا داليا فعلا ساعات كتير الواحد بيحس انه لو مش ربنا كان زمانه بالسلامه واقع فى اى مصيبه

ربنا يجعلنا من الذاكرين ليه دايما
اللهم امين

وخلى بالك بعد كده يا قمر او بلاش تشربى مايه باليل طالما النتايج عواقبها كده

*البت المشمشية *حلوة بس شقية * said...

حمد لله ع السلامة
بس ايه الحظ ده
يلا بقه معلشى

سمكه واحده said...

كل سنه وانتي بالف خير يا جميله وديما محققه كل الي تتمنيه
وصلي علي رسول الله وعلي اله وصحبه وسلم انهارده طول اليوم اقل حاجه نعملها
اللهم ارزقنا حبه
بقلك ايه
قبل النور ما يقطع وتقعودي تتحججي وتتلككي قومي هتيلي حته حاجه حلوه من المطبخ اي حاجه اي حاجه عندكوا انا مش هقول لاء
طب عملين اكل ايه طيب
اي حاجه انهارده موسم حرام عليكوا
ربنا يبارك فيكي ويخليكي لكل اللي بتحبيهم

شمس النهار said...

الحمد لله انها عدت علي خير
وفعلا الحياه علمتني ان الواحد لما بيتركها علي جانب الله بتتحل بشكل عمره ماكان يحلم بيه

romansy said...

الحمد لله حصل خير
بس لازم نتوكل على الله ونعمل الشئ وربنا معانا

صيدلانيه طالعه نازله said...

الحمد لله يا دودو ان النور جه قبل ما تتهورى و تتعورى
ربنا يحميكى دايما منكل القزاز و الشوك اللى هيا شرور الدنيا و من توكل على الله وقاه

Gannah said...

حمدا لله على سلامتك يا داليا
عندك حق طريق الحياة فعلا مليان زجاج مكسور وسبحان الله ساعات كمان مش بنشوفه ولولا رحمة ربنا بينا كنا بقينا مليانين جروح
الحمد لله الذى يجيب المضطر اذا دعاه
تحياتى

قوس قزح said...

واحدة مفروسة

هييييييه اول رد على التعليقات
ههههههههههههههه

ضحكتنى بهيييييه دى



واحدة مفروسة اول مكرر :)

الله يسلمك يا جميل
الشبشب طلع خبيث و مستخبى فى الجنب التانى من السرير
او انا اللى مش بكون مركزة وانا داخلة انام ههههههه
انا عن ازازة الميه فمتضحكيش عليا لما اقولك بحب اشرب الميه يا نازلة من الحنفية يا من التلاجة لكن ازازة بره كده معدتى تقلب .. ليه معرفش .. بحس انها مش فريش ههههههه

التوكل على الله هو فعلا المهم فى الموضوع كله

طبعا شربت ده انا دمى نشف هههههههه
لا الحكاية دى كانت على الساعة 3 بالليل
لا تقلقى انا بلحق الفجر دايما الصبح مت انتى عارفة :)

قوس قزح said...

اسامة عبد العال

بكرة افرح فيك يارب و امشى فى جوازتك ههههههههههههه

قوس قزح said...

Appy

طبعا ما انتى عفريتة و لازم تفهمى من العنوان :)
اما عن الناس اللى بتحسبها صح و بتتعور فده هنا اختبار لهم هل بعد ما توكلوا على الله و اتعوروا هيعملوا ايه ؟.. هيقولوا لا خلاص كده مفيش توكل تانى ولا هيقولوا انا لله وان اليه لراجعون

الشبشب غلبان شكله كان خايف من الضلمة و مستخبى هههههههههههههه

و بعدين فيبرشين ايه ده الموبايل الصبح بيرن و بيعمل فيبرشين علشان يصحيه و بصحى انا و البيت كله وانا اللى افضل اصحيه و فى الاخر يقولى الموبايل ابن اللذينة ده مرنش هههههههههههه

قوس قزح said...

انا انسان

ماهو انت ماخدتش بالك ان انا بالفعل كنت رفعت رجلى من على الارض قبل النور ما يقطع و لما قطع معرفتش ارجعها مكانها فسندت بها على قدمى التانى و صعب طبعا حلك ده برجل واحدة

اشكرك على دعوتك الجميلة ربنا يكرمك بمثلها و اكثر

قوس قزح said...

BAsMA

الله يسلمك يا جميل
و الله هى حاجة رخمة انقطاع اى شىء اتعودنا عليه فى حياتنا حتى لو انقطع فى وقت مناسب برضه بنكون قلقانين انه يستمر انقطاعه

تحياتى لكى

قوس قزح said...

صباح الصباح

ههههههههههههههههه
انا بقول كده برضه

قوس قزح said...

dodda

الله يخليكى يا دودا

و الله يا دودا انتى لو تركزى كده هتلاقي الواحد غصب عنه لما بتحصل حاجة تفرح قلبه اوى بيقول الحمدلله و لما برضه بيشوف حاجة حلوة بينطق لفظة الجلالة الله
هى دى الفطرة اللى ربنا خلاقنا بها اننا نحمده و نذكره فى اى وقت

ربنا يكرمك و يعطيكى مثلا ما دعيتى به لى

قوس قزح said...

محمد مفيد

ساعتين ؟؟ مين قال انهم ساعتين ؟؟
دول مش بيقلوا عن 12 ساعة
و بعدين تفتكر التعب هو السبب ولا ده تعود نتيجة تكبير الدماغ ؟

قوس قزح said...

عارفة... مش عارف ليه

شكرا يا وليد على كلامك
و عموما السبب فى ده نصحيتك انى اسجل على طول و لو خطوط عريضة للفكرة اللى حابة اتكلم فيها علشان مش انسى

و انت عارف بقى الزهايمر :)

دومت صديق عزيز

راجى said...

الحل كان المشى على اربع
:))
الحمد لله ربع الكوباية محصلوش حاجة

قوس قزح said...

dreem

انا الحمدلله بخير
و كل سنة و انتى طيبة
تصدقى فعلا لما حاجة بتكون ضايعة منى بلاقيها اول ما اقول بسم الله الرحمن الرحيم و حتى لو ملاقيتهاش بكون نفسيا احسن و عندى ايمان انى هلاقيها

حكاية الازازة جنبى دى مش بحبها و لا بحتاجها كمان .. منه لله التراب ده هو السبب

تحياتى

حنين القلب said...

الحمد لله يا حبيبتى

فعلا ربنا مش بيكسف عبده
بس انتى كمان غلطانه الشبشب هيروح يتفسح لوحده فين يعنى ؟؟؟

المهم انك بخير ومش حصل ليكى حاجه

يا مراكبي said...

قصة غريبة جدا .. كل دي صدف حصلت مرة واحدة؟ غريبة جدا

عموما قدر ولطف .. وحمدالله على سلامتك

وإبقي إشتري شبشب .. أنا عارف إنك مكسوفة تقولي إن ما عندكيش شبشب بس ما فيش هنا حد غريب

kochia said...

الحمد لله انها جت سليمة

بس لازم الواحد يخلي عنده استراتيجيات لكل الظروف لو اضطر انه يتحرك في الضلمة

وكمان لو اخد القرار .. يتحمل النتيجة بشجاعة

ابقي خلي ازازة صغيرة جمبك علي الكوميدينو للحالات اللي زي كدة

تحياتي

أسوور said...

كان المفروض تمدى رجلك من الأول

اكيد مش هتنسى ابدا تطمنى على الشبشب قبل النوم

او اقولك فكرة

ابقى خدى معاكى ازازة مية حطيها جنبك وانتى نايمة

انا بعمل كدة على طول

اصلى جبانة موووووووووووووتو بخاف من الضلمة

تحياتى

همس الاحباب said...

ههههههههه
هههههه
يا شماتة ابلة ظاظا فيا
ههههههه
الحمد لله
على كل حال

الضاحكون said...

بصى بقى يا ستى نصيحه من الدكاتره الكبير الرايق
اولا يجب استنساخ الشبشب
بمعنى لابد وحتما ولازم يكون جنب السرير مش شبشب واحد ولا اتين بل ثلاثه علشان لو شبشب مشى لوحده تلاقى غيره ولو الاتنين مشوا تلاقى التالت
لان النور لو كان اتأخر للصبح كان زمانك بتدورى على كتب الساحر الهندى اللى بيمشى وينام على الازاز
مع خالص تحيات الضاحكون
عبده الرايق

الضاحكون said...

معلشى انا نسيت ثانيا
اما بقى ثانيا
ابقى املى ازازه ميه وخليها جنب السرير تحسبا لمكر النور وتوهان الشبشب
رابعا متخافيش من الازاز
نو
نو
نو
الازاز بيخاف من البنى ادم
امشى انتى بكل ثقه وكل الازاز المتكسر هيجرى من قدامك
تاسعا اشترى كشاف وخليه جنب السرير علشان تغيظى النور لما يقطع

maha zein said...

يا خراشتي

ذا سو ايه
طيب ما كنتي رجعتي بضهرك كده بسرعة

ولا الباب بعيد
طيب ما كنتي ...ولا كنتي ايه اكيد انتي اللى كنتي عايشة في الواقعة و ملقتيش اي حلول

عالم فاضية احنا والله
هنعد نديكي في حلول علي اساس انك يعني كنتي ناوية تنتحري وتضحي بنفسك

يلا حمد الله علي سلامة رجلك وسلامتك

يا تري بقه نطيتي وقعدتي تقولي النور جه النور جه

Arabic ID said...

عندك حق طبعا، ولكنك كنتى قلقانة وخايفة
وده خلاكى تفكرى كتير وتحاولى تلاقى حاجة تساعدك بس لأن الاختيارات مش فى جيبك ولا حتى متاحة امامك كان هناك اختيار وحيد وهو ان تأخذى خطواتك على هداية ليست بيدك ولا محسوبة
وعندها نلتى تلك الهداية والتى لم تنفى قلقك فى اول الأمر وخوفك ولكنها جاءت لتنقذك من خطوة قد كانت ستؤلمك
الحمد لله على سلامتك
تحياتى

Diyaa' said...

هيييييييييييييييييييييييييه

النور جيه :)

ربنا ينورلك حياتك وطريقك دايماً :)

وكويس إنك بصيتيلها كده

وزي ما الباشمهندس شريف قال

تسلم إيدك يا أديسون والله

الحمد لله

Diyaa' said...

صحيح ركبي للشبشب بتاعك جرس

عشان لما يفكر يروح هنا ولا هنا من غير إذنك

تسمعيه وهو بيتسحب وبالتالي تقفشيه مبكراً..وعلي فكرة كان ممكن أي فوطة أو قماشة أو صينية في المكان تنفعك

يعني القماشة تبقي كاسحة للزجاج وتمشي وراها

أو الصينية تبقي زي البساط السحري بتاع السندباد...حطيها وامشي بيها :)))


والله الخيال لذيذ أوي ..أنا كان ممكن أقف في الموقف ده بس عشان أتخيل ومش مهم النور ييجي إمتي

صعبة شوية الوقفة علي رجل واحدة دي

بس يلا الحمد لله ربنا ستر

Tamer Nabil said...

السلام عليكم

حمد الله على السلامة


ياما كتير الانسان بيتحط فى مواقف صعبة ولكن طول ما هو بيدعى ربنا بيكون الفرج قريب

بعد كدة خلى بالك من الشبب بقى


ربنا يكرمك

تحياتى

صوت من مصر said...

لونت المدونه بالارجواني لانه عشقي للالوان
ياستي ده في ناس بتاكل زجاج

قوس قزح said...

كيارا

شطورة يا كيارا
سعيدة بمعرفتك يوم التبرع
بس كان نفسنا نشوف الشقاوة :)

قوس قزح said...

مهندس مصرى

الحمدلله فعلا
و تصدق بمناسبة جملتك دى من توكل على الله فهو حسبه
فى ناس كتير لما بتقول حسبنا الله و نعم الوكيل ..الكل بيفتكرها بتدعى على حد .. مع انها فى الاساس مفروض تكون فى كل خطوة بنعملها و لو حد قالها لحد يبقى معنها مش وحش بالعكس ده لو اللى قدامنا مظلوم هيكون ربنا معاه و ينصره و يظهر الحق
مش عارفة ليه ساعات بنفهم كلام بمزاجنا

قوس قزح said...

و اصطنعتك لنفسى

اولا انا عجبنى جدا جدا جدا اسم البلوج بتاعك و كل ما اشوفه فى تعليق اقول هى دى الاسماء و لا بلاش :)
اسعدنى طبعا ان تدوينتى شدتك للتعليق عليها
كلامك فعلا حقيقة الخطوة هى دى اللى مفروض نتوكل على الله بعد ما نفكر فيها كويس جدا و ناخدها .. و نتيجة التوكل على الله بيكون جنبنا و يسهل حياتنا
طبعا افكار كتير مرت عليا و يمكن اكثرهم هى الحمد على نعمة البصر اللى الواحد مش بيعرف قيمتها الا فى مواقف زى دى وتخيلت عدم وجود نعم اخرى و يمكن ابسط من البصر و سبحان الله خلقه عظيم فعلا

لا انا قررت البس الشبشب و انا نايمة :)))

نورتنى بزيارتك ايمان

قوس قزح said...

محمد عبد الغفار

حمدلله على السلامة .. بقالك كتير غايب
بالنسبة لحل انا انسان ابقى اقرا ردى عليه
عجبتنى جملتك دى جدا .. ان محدوديه التفكير كمان بتعور
بس ساعات للاسف كلنا بنمر بالمحدودية دى و من غير ما نعرف و لا نعترف بها

قوس قزح said...

صبرنى يا رب

هو انتى دايما اول ما تدخل تصرخى كده !!!
بتسرعينى ههههههه

اه انا عايزة كشاف من اللى فيه كاسيت و بوتجاز

لا وحياتك ده من قبل الطفل الاول ههههههههه

بالظبط كده يعنى احنا نفكر و نقرر و الاهم نتوكل على الله بأيمان انه هيوفقنا للخير

نورتنى يا جميل و وحشتنى يا وحشة :)

قوس قزح said...

micheal

لا لازم تحسبها مينفعش نمشى كده بدون ما نفكر كويس جدا خطواتنا رايحة فين .. لكن بلاش التردد و لو نويت على خطوة سيبها على ربنا
و ربنا معاك و ان شاء الله يوفقك للخير فى كل خطواتك

قوس قزح said...

فاتيما
اه شوفتى الشبشب الشقى ههههههههههه
شكله صينى و عنده امكانيات هههههههه

وحشتنى يا طمطم اولا
و بحبك جدا ثانيا
و سعيدة ان البوست ده ممكن يكون القشة اللى شجعتك فى اخدك لقرارك بانك تنزلى بوست حبيبة
و ربنا يحفظك من المشى على الزجاج
و يمكن وجودنا فى حياتك دلوقتى يكون سببه اننا نخفف عنك شوية غياب يوسف
يارب النفوس تهدى و يكون فى فرصة لكى تشوفيه على الاقل مرة فى الاسبوع
انا كمان بحبك اوى يا صلة رحم التدوين
مووووووواه

قوس قزح said...

saragedaly

الحمدلله ان كان فى حد فجاة عطش بالليل كده معايا

الحمدلله ان ربنا حفظك من الموت عطشانة

و يظهر كل واحد بيحتاج لنعمة معينة بيعرف قيمتها

اما عن الشبشب فشكل جوزى كان عامل مؤامرة عليا هو و الشبشب هههههههههه

اقولك على حاجة

معنى كلامك ده ان انتى الاجمل و بدون مجاملة :)
ربنا يكرمك و يرضيك دايما

نورتنى

قوس قزح said...

saragedaly

الحمدلله ان كان فى حد فجاة عطش بالليل كده معايا

الحمدلله ان ربنا حفظك من الموت عطشانة

و يظهر كل واحد بيحتاج لنعمة معينة بيعرف قيمتها

اما عن الشبشب فشكل جوزى كان عامل مؤامرة عليا هو و الشبشب هههههههههه

اقولك على حاجة

معنى كلامك ده ان انتى الاجمل و بدون مجاملة :)
ربنا يكرمك و يرضيك دايما

نورتنى

قوس قزح said...

رندا

الله يسلمك يا جميل
شوفتى بقى الاكشن اللى عندنا
ابقى تعالى خدى حبة هههههههههههه

انا مش بخاف لما النور يقطع .. اصل الخوف هنا بيجى من الخيال فانا غالبا باخدها من قاصيرها و انااام ههههههههههه

تلاجة ليه بس ده انا بقلق اشرب دى فى السنة مرة .. اخليه يجيبلى احسن سرير فيبريشين على راى آبى ههههههههههههه

بحبك انا كمان اوى اوى

قوس قزح said...

sherif

الله يسلمك
اديسون ؟ ده الحج اديسون دى حبيبى هو و الحج كاريه و الحج ايكن و الحج بل و الحج سميث و الحج بامبرز و كتير غيرهم

كل مخترع و مكتشف ايان كان اختراعه او اكتشافه هو بيحقق جزء من الامان لنا او الفهم لامور كتير .. و هنا هو بينور البشرية كلها مش بس مجرد لمبة

نسيت ادعى لاديسون فى الضلمة .. المرة الجاية بقى بس يكون معايا كشاف هههههه

قوس قزح said...

جنى

و عليكم السلام
عايزنى اعمل الشبشب الشقاوة اكتر من كده ؟؟
طيب ما انا اجيب قطة و اعملها لما اصفر لها تجرى تجيب الشبشب
شوفت بقى عدم محدودية التفكير :))

تحياتى

قوس قزح said...

سدس صغير

هههههههه
كل ده من اللى حصل
قافية و شعر و زجل

كلامك معناه لى وصل
احلامك سعيدة بدون جدل

تحياتى

قوس قزح said...

عالم ماريونت

ممكن نكون مقصرين بس الاهم منكونش غافلين او مش فارق معنا

موضوع الميه جنبى ده صعب شوية
و متضحكيش عليا لما اقولك بحس طعمها مختلف زى البايت :)

نورتنى بزيارتك

قوس قزح said...

محمد فارس

و عليكم السلام و رحمة الله و بركاته
اشكرك على دعواتك لى
و الواحد بيحاول على اد ما يقدر انه يكون قريب من ربنا
و يفضل فاكره على طول
يا سيدى انا اصلا مزعلتش على الكوباية
و لا تزعل نفسك ههههههه
ربنا يكرمك و يحقق كل امانيك

قوس قزح said...

محمد عتلم

و الله يا شيخ ساعات فى حاجات بتقفل كده زى الدومنيو متفهمش ليه
بس فى الاخر بنقول الحمدلله

قوس قزح said...

سمكة واحدة

هههههههههههههههه
انا عايزة من الشباشب اللى عندكم
ماليش دعوة

نورتنى يا جميل

قوس قزح said...

محاسن صاير

اسامة ده بس اما اشوفه

انا بقول بلاش اشرب ميه خالص احسن و بلاش كوبايات و بلاش كهربا ههههههههههههههه

نورتنى يا جميل

قوس قزح said...

البت الشقية المشمشية الجميلة

شوفتى الحظ عامل ازاى ؟
و انتى كده مش تيجى تمسكى بايدى ولا حاجة بدل الشقاوة دى ؟؟

قوس قزح said...

سمكة واحدة

كل سنة و انتى طيبة يا جميل
هههههههههههههههههههه
تصدقى ان السنة دى مجيبتش حلويات المولد
و لا حتى دوقتها .. هتعرفى السبب فى البوست الجاى
يعنى لو عندكم هاتى حتة
بس انا يومها كنت عاملة فتة و لحمة
تعالى انتى بس وانا اعملك كل اللى نفسك فيه

قوس قزح said...

شمس النهار

تصدقى فعلا ساعات بصدق المثل اللى بيقول اللى تخاف منه ميجيش احسن منه
فى مواقف كتير الواحد بيشيل همها على الفاضى
مع ان فى حاجات تانية اهم هى اللى لازم نركز عليها

نورتنى

قوس قزح said...

رومنسى

الله يخليك
نورتنى بزيارتك

قوس قزح said...

صيدلانية طالعة نازلة

الحمدلله
ضحكتنى بتتهروى تتعورى دى :)
تنفع شعار للبنات اليومين دول
يحمينا و يحميكى انتى و كل احبابك

قوس قزح said...

جنة

الله يسلمك
هى الكلمة دى اللى بعتمد عليها
رحمة ربنا
اعتقادى ان الدنيا بدون رحمة ربنا كانت بقت جنهم تانية على الارض

تحياتى و ربنا يرحمنا جميعا
وحشتنى

قوس قزح said...

راجى باشا

اربع ؟ يعنى بدل ما اعور واحدة اعور الاربعة
شرير
لو عينك فى ربع الكوباية ممكن اجيبهالك عادى :))

قوس قزح said...

حنين القلب

الشبشب هركب فيه خلاص جهاز انذار علشان الاقيه
و لو حد حاول يلمسه يعمله فضيحة ههههههههههه

ربنا يخليكى يا جميل و يحفظك
و يستجيب لكل دعواتك

قوس قزح said...

يا مراكبى

شوفت بقى ..
ماهى لو مش غريبة مكنتش هتلاقيها مكتوبة هنا :)
و بعدين مش عايزة اقولك عندى من الشباشب
تلاااااتة
علشان متقولش عليا زى ثروت فى يوميات ونيس :)
بس ده لا يمنع انك و انت جاي من الحجاز تجيبلى معاك واحد هدية
هههههههههههه

قوس قزح said...

kochia

لا بالطريقة دى هخالى خوذة جنبى و كلاشينكوف و بيادة هههههههههههههه
المغزى ان الواحد لو لاقى نفسه فجاة كده فى موقف مش مستعد له .. يتوكل على الله بعد ما يفكر فى كل الحلول و الاحتمالات .. و هنا بقى ربنا اكيد بيستر

نورتينى بزيارتك العزيزة جدا

قوس قزح said...

اسوور

ايه الحكاية ؟
فى ناس كتير بتخاف من الضلمة ليه
هل علشان مش عارفين طريقهم ؟ ولا علشان خيالهم واسع و بيصور لهم حاجات تخوف ؟

و بعدين حكاية اطمن على الشبشب دى قبل النوم صعبة شوية
لانى قبل النوم بكون شبه نايمة من قبلها باربع ساعات
يعنى الحمدلله انى بلاقى نفسى الصبح فى السرير مش فى البانيو :)

نورتنى يا جميل

قوس قزح said...

همس الاحباب

انت بذات اياك تضحك
البوست ده قبل ما انزله جيت انت فى بالى و قلت ان دخل ضحك مش هسكت له
امنع الضحك
ماشى يا خالد اما اشوفك بس انت و ابلة ظاظا بتاعتك

قوس قزح said...

الضاحكون

يااااااااااااه الرايق فى المدونة
نورى يا ولاد الانوار الفوسفورى
و شغلوا الكاسيت على سلام صعيدى شحط محط
و ادخلوا بعده على تقسيم هادى و اسمعوا نصايح الدكاترة الكبير الرايق

اتفضل يا فندم .. قسم


استنساخ ؟؟ دايما جامد فى افكارك و متجدد
طيب مينفعش اعمل استنساخ لنفسى انا و هى تقوم تجيبلى الميه و خلاص !!!
و بعدين انا اخاف الشباشب تتصاحب على بعض و يعلنوا الحرب عليا ههههههههههه

و بعدين تصدق عند حق الازاز فعلا كان خايف علشان لما جيه النور كان قاعد يبربش كده و يبرقع

كلك افكار جبارة بصراحة يا بابتى

و نطلع من كل كلامك ده بحاجة واحدة بس
لما احب اشرب بالليل هغلس عليك و اخليك انت تعمل الساحر الهندى ههههههههههههههههههه

نورتنى يا رايق انت و الضاحكون

قوس قزح said...

الشقيقة قوس قزح
"
اولاً شكراً لك لزيارة مدونتى
"
ثانياً حقيقة مؤلم ما حصل لك من التداعيات المتلاحقه
و اللتى سببت لك الخوف و الترقب و الإنتظار الطويل
:
و انا اعتقد إنه شيء غريب الحدوث
و اكيد هو قدر .
لكن حقيقة شدتنى الأحداث و كنت اتابع و اترقب المشهد و كاننى أتبع فيلم ل هتش كوك
"
شيء مروع فعلأ
"
دمتى بود

صفـــــاء said...

يعنى فى الاول الشبشب ضاع
وفى التانى الكوبايه انكسرت
وفى التالت النور راح
لا دة انت فعلا تحمدى ربنا جدا لأن دى زى مسرح كان بيتجهز لحاجه وحشه بعد الشر
وحمد الله على سلامتك
وعادة بنرمى حمولنا على ربنا لثقتنا فى أنه مش هيكسفنا ولا يخذلنا
.

قوس قزح said...

maha zein

لا طبعا هنط ازاى .. يعنى بعد كل ده فى الاخر انط و يدخل الازاز فى رجلى ؟؟
و بعدين هو مش انتحار و لا حاجة
ده بس اختبار :)

قوس قزح said...

arabic ID

تحليل جميل
و زيارة اجمل
كلامك فكرنى بمثل بيقول
العبد فى التفكير و الرب فى التدبير
المهم فى الاخر الرضا بالتدبير ده ايان كان

تحياتى

قوس قزح said...

Diyaa'

تصدق حل فعلا مجاش فى بالى
لكن الصينية صعب
ده انا ممكن اخد حتة دين هدر على ضهرى

عموما المرة الجاية هبقفى اعزمك على الضلمة لما النور يقطع
علشان تعيش خيالك براحتك ههههههههههههههههه

قوس قزح said...

Tamer Nabil

و عليكم السلام و رحمة الله و بركاته
الله يسلمك
حاضر هبقى اجيب للشبشب حد يحرسه ههههههههههه

تحياتى

قوس قزح said...

صوت من مصر

يعنى رايك كنت اكله بدل ما امشى عليه :))

قوس قزح said...

قوس قزح

هو فعلا موقف نادر الحدوث
بس الحمدلله عدى على خير
سعيدة ان التدوينة عجبتك
بس ظلمت هتش كوك

نورتنى بزيارتك قرينى :)

قوس قزح said...

صفاء

الف حمد و شكر لك يا رب
انا عموما مش فيا حكاية التشاؤم و الا كنت من اول ما الشبشب اختفى كنت متحركتش من مكان
بس اهى تجربة الواحد مر بها و حس بنعم كتير من نعم ربنا
و عرف ان التوكل على ربنا يمكن يكون سبب رئيسى فى ان المشاكل تتحل بسلام

نورتينى

أ / أحمد عبد المنعم said...

بسم الله الرحمن الرحيم
دعوة عاجلة للزيارة
لزيارة مدونتى " أمــــى "
لرؤية هديتى لأمى فى يوم الأم
آسف لعدم التعليق على الموضوع الآن .

norahaty said...

ربنا ما يحرم حد من نور عينيه يارب
وينورها لكل حىّ(داخلى وخارجى)يارب

قوس قزح said...

احمد عبد المنعم

مفيش داعى للاسف
و انا بالفعل قريت كلامك
و هو كلام مؤثر جدا احييك عليه

قوس قزح said...

norahaty

يارب يا نورهاتى
و ينور لنا قلوبنا بالخير و الحب

mimi said...

أسلوبك حلو أويييييي
تحياتي