Friday, April 17, 2009

البؤجة الجديدة



اولا
ميعادنا اول مايو ان شاء الله للبؤجة
الجمعة 1 مايو
الساعة 11 صباحا
عند مسجد الزهراء بجوار محطة الزهراء لمترو الانفاق
فى نفس المكان للبؤج السابقة
و فكرة البؤجة هى - للى مش شارك قبل كده - انك و انت بتبدل الملابس الشتوى بالملابس الصيفى تشوف ايه اللى انت مش محتاجه منها يكون ضاق عليك او خلاص زهقت منه او موضته خلاص فات اوانها و تجمع الحاجات دى مع اى حاجة تكون مش عايزها فى بيتك ملايات - فوط - احذية - ادوات منزلية - اى حاجة انت مستغنى عنها و نروح كلنا لعشوائيات اسطبل عنتر و نديها للناس هناك فى جمعية صحبة خير و هم بيخدوها و بيعملوا بها معرض للاسرة الفقيرة و تتباع لهم الحاجات باسعار رمزية و المبلغ اللى يتجمع من المعرض بتستغله الجمعية فى عمل خيرى تانى و ده علشان الناس اللى هتتباع لهم الحاجة تحس انها دفعت فيها و انها مش شحانة و بعد التبرع ان شاء الله هنتجه للازهر بارك و تكون فرصة للترحيب بمهندس مصرى لوصوله لمصر و كمان نشوف اقتراح عند خيخة لعمل صدقة جارية لمنذر اللى قام بعمل عمرات لناس كتير .. بس اللى عنده اقتراح بمكان تانى غير الازهر بارك يقول

تانى حاجة

فى كل لقاء للتبرع بنتجمع بعد اللقاء فى اى مكان علشان نتعرف على بعض اكتر لكن انا لاحظت ان اغلب الحوارات اللى بتكون قايمة فى اللقاء ده حوارت كلها شخصية ..جميل طبعا اننا نحاول نقرب من بعض لكن فى نفس الوقت مفروض مننساش ان اللى كان السبب فى تعارفنا هو الجانب الفكرى .. يعنى ليه بعد التبرع ميكونش لقاءنا زى حفلات السمر و لها جدول كمان يعنى اللى بيحب الشعر يشارك معنا و اللى يحب يناقشنا فى قضية معينة او موقف معين يطرحه و اللى عنده موهبة فنية يعرفنا عليها ..كأننا بالظبط بندخل مدونة و نقول تعليقنا عليها ..كده هندى فرصة للى عنده موهبة ما يعرضها و هيكون اللقاء له هدف اكبر


تالت حاجة
المشاركات فى التجمع لاحظيت انها بتقل ..يمكن هناك اسباب كتير و كل واحد عنده اسبابه .. بس السبب دى اكيد مش دائم ..يعنى السبب اللى مخلاش حد يشارك المرة دى مش شرط انه يكون موجود المرة اللى بعدها .. بس يمكن الناس بتكون مش عارفة امتى التجمع التانى علشان كده فكرنا اننا نخلى التجمع يكون اول جمعة من كل شهر ..هنرتب و نعمل جدول سنوى بالنشاط اللى هيقام فى اليوم ده . علشان كل واحد يكون عارف قبلها بفترة كافة و يختار كمان اليوم المناسب له ..و كمان اللى مش قادر يشارك فى التبرع يقدر يشارك فى التجمع اللى بعد التبرع


رابع حاجة
ياريت اللى عنده افكار لاعمال خيرية او اماكن هو شايف انها تستحق المساعدة او حتى اسر معينة ياريت يقولنا .. وبردو اللى يحب يشارك معنا فى القاعدة اللى بعد التبرع بموهبة عنده او موضوع ياريت يبلغنا و ممكن تكون لقاء مخصوص لعرض افكاره ... بس و النبى بلاش السياسة و الجدال فى الدين


اخيرا

اللى عنده استعداد يعمل تجمع خيرى يقولنا و احنا ان شاء الله هنشارك معاه .. لان الهدف هو نشر الخير فى كل المدونات من كل المدن . .و خير مثلا على ده مدونة نهر الحب اللى نقلت فكرة الخير لمدينتها جزاها الله كل خير
و جزاكم الله كل خير

53 comments:

Anonymous said...

نشكركم على العطاء المتجدد

عبد الجليل

همس الاحباب said...

جزاكم الله خيرا
وجعله فى ميزان حسناتكم
وجميلة جدا الافكار المتعلقة بيوم البؤجه
وسهل تنفيذها ان شاء الله
وانا على نفسى ناوى اعملكم يوم بؤجه فى اسوان فى شهر 6 او 7
ايه رايك
فكرة جامدة مش كده
بس المهم حضرتك تنورينا
تحياتى

*البت المشمشية *حلوة بس شقية * said...

ربنا يديكى يا دودو على اد الخير ده
ويعوضك فى ولادك كل خير
يارب

جنّي said...

السلام عليكم

جميلة لقاءات المدونين واجمل منها اعمال الخير المرتبطة بهذه اللقاءات .. ولكنها تحتاج لتنظيم اكتر من ذلك ..

عدم وجودي في مصر يمنعني من الحضور

مسدس صغير said...

جزاكم الله خيرا
ان شاء الله نشارك ان قدر لنا ذلك.
اسأل الله ان يجعله فى ميزان حسناتك.

Asmaa mahaba said...

انا حنفسن عليكم
تعالى شوفى الفيلم بتاعنا فى المدونه بسرعه:)))))

Ahmed Kamal said...

جزاك الله خيرا يا داليا على كل الخير ده ..

و أتمنى أن أراك في البؤجة القادمة إن شاء الله

شمس النهار said...

ان شاء الله انا معاكم وهجمع هدوم من القبيله
بس انا مااعرفش اسطبل عنتر ده فين ممكن نتجمع في مكان الاول وبعدين نروح او اقابل حد من المشتركين اديهم الحاجه اللي معايا شوفي ايه المناسب وعرفيني تليفوني مع ابي
وربنا يكرمكم باللي بتعملوه

قوس قزح said...

عبد الجليل

بشكرك على اهتمامك و متابعتك
و ان شاء الله تقدر تشارك معنا

قوس قزح said...

همس الاحباب

اسواااان
يا مفترى
طيب انا موافقة بس هديك البؤج انت اللى توصلها كلها
و هتاخد ثواب التوصيل
بس هنخلى الميعاد بتاعها فى شهر اغسطس فى رمضان علشان تاخد ثواب مضاعف

قوس قزح said...

الشقية المشمشية

ربنا يخليكى يا جميل
بس نفسى تحاولى تشاركى معنا

فكرى كده يمكن تقدرى

هستنى ردك
تحياتى

قوس قزح said...

جنى

و الله احنا هنحاول المرة دى نتفق مع بعض ان الموضوع يكون منظم اكتر من كده

دعواتك لنا
و ان شاء الله لما تنزل مصر تقدر تشارك معنا

تحياتى

قوس قزح said...

مسدس صغير

انت تنورنا بمشاركتك معنا ان شاء الله

جزاك الله كل خير

قوس قزح said...

سومة .. المجنونة من بلد عاقل

طيب ليه النفسنة دى

اما نشوف ايه حكاية الفيلم ده

قوس قزح said...

احمد كمال
حمد لله على السلااااااااااامة
ايه كل الغيبة دى ؟؟
انا عموما كنت هتصل بك علشان اقول على الميعاد
بس الحمدلله انك رجعت

هنستناك ان شاء الله
نورت عالم التدوين

قوس قزح said...

شمس النهار

هكون سعيدة جدا انى اشوفك معنا مرة تانية

و المكان سهل جدا
و ممكن نتقابل عند محطة مترو الانفاق اللى اسمها الزهراء

و ان شاء الله هخلى آبى تكلمك و تتفق معاكى

تحياتى

مهندس مصري بيحب مصر said...

هي محطة الزهراء دي على أنهي خط مترو وفي أي إتجاه
أصل أنا بأركب المترو من محطة شبرا الخيمة
أعمل إيه و أروح فين بالضبط ؟

الطائر الحزين said...

ان شاء الله اكون موجود
===========
عندى اقتراح ان نخصص مثلا اسرة بعينها او اسرتين ويكون لهم مثل راتب شهرى يمنعهم من مد اليد

mimi said...

طبعا يشرفني أشترك معاكم
بس فين اسطبل عنتر ده؟
ياريت التجمع يكون في مكان معروف وفي ساعة محددة علشان محدش يتأخر
عندي اقتراحات كتيرة...
هكتبها وابعتها
وربنا يتقبل إن شاء الله

عيله مفتريه سابقا said...

مازلتي كما انتي يا ذات الروح النقية والشفافه

اشتقت اليكِ ..ولأعمال الخير والتبرع وبؤجة الخير

داليا اتمنى من الله ان تكونى فى خير حال ..

دامت طيبتك :)

الإتربي اللولبي said...

ربنا يجزيكي كل خير يا داليا

آسف على التأخير

بس جاتلي فترة ما كنتش متواجد فيها ع النت قد كده

قرأت كل جديدك

و ربنا يوفقك

سلام عليكم

micheal said...

أتمني أني أكون معاكم في اليوم ده وإن كنت أشك بشدة للأسف
تحياتي

Gannah said...

أنا من قترة مجتش يا داليا لكن أنا متابعة من خلال الريدر..يارب يكون لقاء ناجح وفكرة ترتيب جدول للاجتماع اللى بيتم بعد البؤجة ده شىء جميل ويمكن يشجع ناس كتير كانت بتخاف من اللقاءات دى لانها زى ما قلتى كانت بتبقى شخصية..الأجندة السنوية كمان شىء رائع واتمنى اشارك معاكم ان شاء الله فى البؤجة لقادمة
جزاكم الله خيرا
تحياتى لك ولكل من يشارك فى عمل الخير

ahmed_k said...

أنا كنت بفكر أقترح تجمع في الغردقه
بس يا ترى حتيجوا ولا حكون لوحدي أنا والعبد لله وأبوحميد أللي هو أنا برضو
ولقيت إنها ممكن تتحول لمصيف يعني نوع من الترفيه برضو ههههه
كنت إتكلمت مع آبي وسكر في الموضوع ده
بس الفكره صعبه على المدونين حبتين
أنا ممكن أعملها لمدونين البحر الأحمر وقنا واللي يحب من باقي المحافظات وغالبا لو حضر حد حيكون أنا ومحمود الريس بس فقلت بلاش دلوقتي ههههه
المهم نتكلم جد بخصوص يوم البؤجه أنا عرفت إمبارح بس لأن جهازي كان عطلان
فححاول بإذن الله أتواجد معاكم ولو مأمكنش يبقى أمر أحمد سكر لله يروح للسوبر جيت أو لو كان مسافر حتصرف بإذن الله المهم حشارك معاكم بإذن الله

وربنا يجعلكم دايما ساعين في الخير

تحياتي

rovy said...

السلام عليكم

ازيك يا داليا ؟
جزاكى الله كل الخير و كل من معكى
ربنا يكرمكم و ييسر لكم كل الامور

دمتى سباقه للخير

تحياتى

فاتيما said...

يا وش الخير
ازيك يا حبيبتى
أنا جاية إن شاء الله
و جايبالك معايا طقم مطبخ و طقم أوضة نوم عشان تكملى البيت ...
البت خوخة قالت نادى المهندسين
إيه حكاية الازهر بارك دى بقى ؟
لو رايحين فين معااااااااكم
بوسة و حضونة يا حبيبتى

mahasen saber said...

ازيك يا داليا

للاسف انا مش هقدر ااحضر اللقاء ده حظى عسر زى القاء اليى قبله
حفلة توقيع كتاب استاذ شريف

الظروف معاندانى الايام دى بس ان شاء الله تتصلح

المهم انتى كويسه وبخير

والله وحشتينى جدا يا دايا من مره واحده بس شفتك فيها

قوس قزح said...

مهندس مصرى

محطة الزهراء على خط مترو حلوان المرج
يعنى لو بدلت للمترو من التحرير او رمسيس هتركب اتجاه حلوان
هى تقريبا رابع محطة بعد ما المترو يطلع من النفق
فى رقم موبايل على البوست لو يومها تحب تتاكد من الطريق

قوس قزح said...

الطائر الحزين

يشرفنا حضورك لاول مرة معنا مع انها مش اول مرة تشارك
بالنسبة للاقتراح هو جميل جدا و نتناقش فيه يوم البؤجة ان شاء الله

قوس قزح said...

mimi

اسطبل عنتر ده فى منطقة زهراء مصر القديمة
و التجمع هيكون الساعة 11 الصبح
عند مسجد الزهراء اللى جنب محطة مترو الانفاق بتاع الزهراء
و فى رقم موبايل على البوست لو حد تاه و لا حاجة

انا فى انتظار اقتراحاتك

قوس قزح said...

عيلة مفترية سابقا

اهلا اهلا
المدونة نورت
فينك يا بنتى
و الله انتم من اول الناس اللى ساعدت على عمل الخير ده
ياريت تقدرى تشرفينا بحضورك
لانك وحشتنى فعلا

تحياتى

قوس قزح said...

الاتربى اللولبى

ياااااااااه
عاش من شافك
انت من ساعة الخطوبة و انت مشغول

المهم انك بخير
و مش تغيب تانى كتير كده

قوس قزح said...

micheal

لا مفيش حاجة اسمها اشك دى
تعالى و انا اعزمك على نيسكويك :)

هنستناك

قوس قزح said...

Gannah
جنة وحشتنى و الله
انتى من اكتر الناس اللى مفتقدة مشاركتها معنا
انتى و بابا ابو خالد
و الله جروب بورسعيد كله
الاجندة السنوية دى هتساعد الناس انها تعرف ايه مناسب لها فى الوقت و تشارك فيه و تعمل حسابها عليه
انتى هترجعى امتى بقى ؟
ياريت تكونى هنا فى رمضان
لانى بفكر اعمل فى رمضان ان شاء الله يوم لافطار صائم
و اتمنى تكون معنا فيه

تحياتى و مودتى

قوس قزح said...

رئيس تحرير

و عليكم السلام و رحمة الله و بركاته
ربنا يوفقكم و تكون مجلة من افضل المجلات الالكترونية
و انا شوفت الموقع و فيه شغل جامد
ولو لاقيت نفسى قادرة اشارك مش هتاخر

تحياتى

قوس قزح said...

ahmed_k
بص يا احمد
انا موافقة على اقتراح الغردقة بس بشرط
تعزمنا عندك 3 او 4 ايام
يوم نعمل عمل خيرى
و يوم او يومين تعمل لنا رحلة سياحية بحرية
و يوم راحة

لكن رايح جاى فى نفس اليوم صعب جدا جدا جدا

اما عن البؤجة المرة دى
انا مش عارفة ظروف احمد سكر ايه لان شغله مالوش مواعيد
عموما فى رقم موبايل على البوست
ممكن ندبس آبى تجيب الحاجات من السوبر جيت

تحياتى

قوس قزح said...

rovy

و عليكم السلام و رحمة الله و بركاته

ازيك انتى يا روفى
مش ناوية تشرفنا فى القاهرة بقى ؟
جزاكى الله كل خير على تشجيعك
و ان شاء الله تعملوا يوم بؤجة عندكم فى اسكندرية
حتى و لو كان عددكم صغير
فكرى فيها و شجعى الناس عندك

تحياتى

قوس قزح said...

فاتيما

ازيك يا صلة الرحم
انتى تنورينا دايما
و اليوم مالوش طعم من غيرك

مش عايزة اقولك فرحت اد ايه باللعبة
قاعدة لحد ما نامت تلعب بها

خيخة غيرتها للازهر بارك
احنا قلنا نغير المكان و مش كل مرة نروح المهندسين ده
غيرى انتى كمان المكان عندك علشان الناس مش تتلغبط

بوسة و حضن جاااامد لحد ما اشوفك و اخدهم بجد

قوس قزح said...

محاسن صابر

ده احنا اللى حظنا وحش بقى
ياريت تحاولى تيجى و لو نص ساعة
اليوم طويل يعنى ممكن تزوغى فى اى وقت فيه
و هاتى معاكى بيرو كمان

انتى كمان وحشتنى و الناس كانت سعيدة بوجودك يوم التبرع بالدم

... amr said...

معاكم ان شاء الله

الساعة 11 عند المسجد اللي جنب المحطة
مش كدة ؟

ربنا يسهل

قوس قزح said...

amr

بالظبط كده

هيشرفنا وجودك

تحياتى

momken said...

جزاكى الله خيراً

وسترك بستره الذى لا ينفذ فى الدنيا والاخره


تحياتى

Unknown said...

جزاكم اله خيرا على المجهود
وعمل الخير ووفقكم الله يارب العالمين
داليا انا بجهز نفسى انى اجى بس ادعى لى
لانى اصيبت بفيروس نادر فى عينى
ولو متحسنتيش مش هقدر اجى

فدعواتك

!!! عارفة ... مش عارف ليه said...

بسم الله ماشاء الله
التعليقات قوية أووي
والتفاعل إيجابي والحمد لله
وده بيؤكد قول سيدنا محمد صلى الله عليه وسلم
"الخير في أمتي إلى يوم الدين"

والحكاية كلها الناس بس عايزة اللي يوجهها ويقول لها على الطريق
والحمد لله ربنا مقدرك على ده
وإن حضورك يكون مميز بين المدونين
أنت وناس كتير بتشاركك نفس الحماس والجهد

وجزاكم الله عنا كل خير

وأخيرا

شكراً جزيلاً على موضوع "أجمد بوست" دي

بصراحه كانت مفاجأة جامدة بالنسبة لي

وده أكيد مش غريب من قوس قزح

وبعتذر عن تأخيري مرة تانية
إنما والله غصب عني

خالص تحياتي وتقديري
لشخصك المعطاء

وليد

حماده زيدان said...

جروب جريدة الصباح العربي بيت المدّونين العربي
http://www.facebook.com/home.php#/group.php?gid=78080770039

ahmed_k said...

السلام عليكم
إزيك وإزاي أ/ أحمد
أهل الرياض بيسلموا عليكم نفر نفر

إمضاء/ أخوكي....ألا بصحيح أسمه أيه؟

micheal said...

كل سنة وأنتي طيبة

dreem said...

كل سنة وانتى طيبة يا دودو ربنا يبارك لك فى عمرك وفيما اعطاك

Anonymous said...

كل سنة وانتى طيبه يا داليا وعقبال 100 سنه فى سعادة ان شاء الله وانتى محققة كل أحلامك في الحياة ولله أقرب شكرا يا داليا على كل حاجه

ahmed_k said...

أنا جاي أسلم بس وأتطمن

الربان said...

تحياتي


كل سنة و انت طيبة بمناسبة ذكري يوم ميلادك...عقبال 101 سنه...كفاية كدا
عشان الضرايب ... :)


تحياتي و تقديري

أم أحمد المصرية said...

بقي لك زمان ما كتبتيش بس قلت اجي اقول لك كل سنة و انت طيبة بعد ما عرفت من ابي

Unknown said...

اية يا بنتى
فين التورتة
وانا قلت اجى اكل براحتى
كل سنة وانتى طيبة وعقبال مليون سنة يارب