Friday, June 12, 2009

تاج خردة


اولا

انا عارفة انى مقصرة فى دخول عالم التدوين و بقالى كتير مش بزور حد بس هى حالة كده غريبة - مش زهق منكم و الله - بس انتم كل يوم بتفقسوا زيادة عن اللزوم ..يا جماعة الريدر خلاص رافض يتحمل اكتر من كده و بستعين بريدر الجيران ..ده غير بقى احساسى انى مش قادرة اقرا و اتفاعل مع اللى بقراه ..معرفش ده حالة تشبع و لا لامبالاة و لا ايه بالظبط ..المهم يعنى اعتبرونى فى اجازة وهمية .. انا هنا بس مش هنا


ثانيا


عندى تاج من زمااان و ضميرى وجعنى انه مرمى كده و بقى خردة و هو من قطتى الجميلة ميرا صاحبة مدونة حاجات تغيظ و هى اخدته من صاحبة مدونة مخنوقة .. و بصراحة انا شاكة كده ان هو السبب فى الحالة اللى انا فيها فقلت اخلص منه و ارميه على اى حد تانى

هههههههههههه


******


اسمك ؟

داليا


المشهورة به وسط اصحابك ؟

بين المدونين ..قوس قزح

بين غير المدونين .. دودو


سنك ؟

و الله السؤال ده لاى واحدة خارج العشرينات بيضايق سوا اصغر او اكبر

المهم يعنى انا فى التلاتينات


مجال دراستك ؟

لغة عربية و دراسات اسلامية

و دبلومة فى التنمية البشرية مع وقف التكميل


اسم مدونتك ؟

انظر الصفحة اعلى


الصورة الرمزية لمدونتك بتعبر عن ايه ؟

و الله الصورة كانت لبنوتة صغيرة ملفوفة فى شال ملون و اختارتها لتلت اسباب البراءة اللى فى البنت و الالوان اللى معرفش ليه مخى متبرمج على اساسها و ان البنت فيها شبه من بنتى .. بس من كام يوم قررت اغيرها بسبب تعليقات سخيفة عليها ..و اختارتها لجنية قوس قزح يمكن لانها خيالية زى عالم التدوين


هل فكرت فى اغلاق مدونتك ؟ و السبب ؟

اه فكرت كتير بصراحة و اللى بيخلينى اتراجع حاجة واحدة .. التجمعات الخيرية اللى ممكن يكون سبب فيها المدونة دى

اما عن السبب فهو كل مرة مختلف بس واحد من الاسباب و يمكن ده اللى موجود حاليا انى مش ملاحقة اتباع الناس و مش قادرة ارد على حد و حد لا


ايه رد فعلك لو حد قل ادبه عليك فى التعليق ؟

و الله لو هو داخل يقل ادبه و يسيب تعليق شتيمة و يمشى فبحذف التعليق و مش بعتبره شخصى

لكن لو داخل علشان يقل ادبه و هو قاصدنى شخصيا ..فدى الحمدلله محصلتش لحد دلوقتى


اسوء مدونة ؟

دول بقى نوعين من المدونات

الاولى اللى بدخلها اول مرة و اقرها و اخرج منها زى ما دخلتها يعنى بدون ما تعلم جوه عقلى بأى فكرة ..هنا بحس انها سيئة و مش بدخلها تانى

و النوع التانى هو المدونات اللى بتصرخ .. يعنى تحس انك سامع حد بيردح و يزعق و خلاص لمجرد لفت النظر له .. غالبا الناس دى معندهاش فكر ..عندها لسان بس

لكن لو السؤال ده علشان اقول اسمه بعينه ..فهنا اقول مينفعش اقول لان للاسف الاسوء ده متغير و كل كام يوم بكتشف اسوء جديد


هيحصل ايه للايميل بتاعك لما تموت ؟

يحصل اللى يحصل هو انا وقتها هكون فى ايه و لا فى ايه هههههههه


السفر بالنسبة لك ايه ؟؟

كل الناس هتقول ان السفر احلى متعة و انه و انه

لكن انا شايفة ان السفر متعته فى رفقاء السفر

يعنى يهمنى الناس اللى معايا اكتر من المكان اللى احنا فيه

و يبقى طبعا جميل لو الناس بحبهم و المكان جديد و رائع


المود بتاعك ؟

زى الوان قوس قزح بالظبط ..كل يوم بلون .. بس ربنا الحمدلله مدينى نعمة انى اقدر اعمل كنترول على موودى و محدش يحس به غير القريبين منى بس ..من الاخر كده بعرف البس ماسك وقت اللزوم


بتعمل ايه فى وقت فراغك ؟؟

يعنى ايه وقت فراغ اصلا ههههههه

اهو انا بحس نفسى زى ام العروسة فاضية و مشغولة ..و مفيش حاجة تشغلنى وابدا فيها و اكملها ..لان قبل ما تكمل بنشغل بحاجة تانية

بس عندى هوايات كتير لما بيكون لى مزاج بعملها و اغلبها هوايات يدوية


الاكلة المفضلة ؟

اى اكلة معمولة كويسة و بحرفنة بتبقى حلوة .. زمان مكنتش باكل كل انواع الخضار .. لكن دلوقتى عادى المهم الطريقة


الصفات اللى ورثتها عن والدك ؟

انى اكون اجتماعية .. لبقة .. لاماحة ..حريصة فى اعطاء ثقتى للناس


الصفات اللى ورثتها عن والدتك ؟

الشكل .. السمع اكتر من الكلام و احتواء اللى قدامى مهما كان ..الهوايات ..كل ده راى الناس لانى مش عارفة هى كانت صفاتها ايه


اكتر ست حاجات بتكرها ؟

هقولهم عن صفات فى البشر

ان حد يفتكر نفسه اذكى من الكل .. بكره نوعية الغباء ده

التكبر و الغرور و المنظرة

الكدب لمجرد الكدب

استغلال المشاعر بكل انواعه

اقتحام خصوصية الغير بدون اذن

الاستظراف


اكتر ست حاجات بتحبها ؟

الاجابة بردو عن حاجات مش اشخاص

الالوان

اسكندرية و البحر

الفسح و الخروج مع ناس بحبهم

الناس الطيبة ..اللى بتحسهم قريبين من قلبك من اول ما تشوفهم

الحضن المليان حنان ..و مش بقصد حضن الرغبة

بفرح لما بشوف اتنين بيحبوا بعض بجد


شخصيتك نوعها ايه ؟

لا معرفش اجاوب على سؤال زى ده لان مفيش صفة واحدة ممكن الواحد يصف بها شخصية حد


الشغل بالنسبة لك ايه ؟

استقلال فى كل حاجة


لماذا دخلتى عالم التدوين ؟

كنت بقرا كتير للمدونين و لاقيت ناس منهم اختفوا و كان نفسى ارد عليهم فقلت الحق اقول اللى فى نفسى للباقى


اجمل كلمة اتقالت فى وصف مدونتك ؟

بحب كلمة فاتيما اوى .. وش الخير

ياريت فعلا تكون مدونتى وش الخيرللناس


اهمية التعليقات بالنسبة لك ؟

بيهمنى اعلق عند الناس اكتر ما هم يعلقوا عندى ..و يمكن كتير يلحظوا ان تعليقات ممكن تكون افضل من انى اكتب بوست


احسن بوست كتبته ؟

هو مش احسن بوست لكن اكتر بوست كتبته و انا متأثرة به هو بوست اطفال ابطال


افضل بوست قراته ؟

فى كتير بصراحة و صعب تحديد بوست معين


افضل مدونة قراتها ؟

السؤال ده اجابته على الريدر ههههههه


النت بالنسبة لك ايه ؟

عالم تانى بعيشه بجانب الواقع ..يمكن الواقع اهم منه ..لكن العالم على النت ميزته انه اختيارى و دى مش موجودة فى الواقع


تمرر التاج لمين ؟

بما انه تاج خردة

و ملبوس من كل الناس تقريبا

و محدش مجاوبش عليه

فانا هحطه على باب المدونة صدقة للى محتاجه لحد معاد البؤجة علشان احطه فيها

.

.

سلام بقى و متنسوش حكاية الاجازة الوهمية

يعنى اى حد عايزنى يقول جزر هاجى على طول :)


33 comments:

romansy said...

حمد الله على سلامتك
يا قوس قزح نورتى مدونتك من جديد
التاج مش خرده ولا حاجه زى الفل اهو وبعدين اوقات كتير الانسان بيحتاج وقت علشان نشوف اللى اللى عاوزينه فيه كلام بيمون جوانا مش عارفين نقوله ولا نعيده
بس اخهو لازم نحاول اننا نقول اى حاجه

karim said...

فعلا بقاليك كتير غايبة ولا حتى بشوف تعليقاتط فى المدونات الاخرى, المهم عوداا حميدا مع انة قصيراا, تحياتى

همس الاحباب said...

حمدلله على السلامة
ونورتى المدونة من جديد
وربنا يطمنا عليكى دايما
ومبروك التاج عليكى
تحياتى

عمرو said...

الحمد لله على السلامه و نتمنى تكونى فى البلوجر دايما ..
التاج لطيف و اٍجاباتك مقنعه و متزنه و بتنم عن شخصيه عاقله و متوازنه ..
بارك الله فيكى و تقبلى تحياتى و تقديرى ..

شمس النهار said...

ازيك
طبعا انت بتوحشي البلوجر
وان شاء الله تتخطي الحاله دي وبصراحه كان جه وقت علي البلوجر كله عنده احباط ويأس واكتئاب
المهم
التاج مش خرده والا حاجه
اجاباتك جميله ولطيفه جدا

وومن said...

انا جيييييييييييت اهو نياااااااو

بس كدة يا دودو خليتي التاج بتاعي خردة وكمان صدقة

يالا صدقة صدقة كلة بثوابة يا وش الخير

بس ايه الإجابات دي انتي دمااااغ يا دودو

وصريحة وهادية ومقنعة

وخدي وقتك خالص وبراحتك خالص بس متتأخريش قوي ماشي

Mohamed Hamdy said...

التاج ده رغم انى قريته عند ناس كتير الا ان اجاباتك عليه ادته طعم مختلف

تحياتى ليكى واهلا ديما بعودتك الغاليه

mahasen saber said...

انتى فعلا وش الخير يا داليا

وفعلا اجتماعيه جدا جدا فاكره اول اجتماع احضره معاكوا كنت عامله ازاى

ربنا يبارك فيكى وفى كل من تحبين
انتى رائعه بجد

MaNoOoSh said...

عااااااااااااااااااا


يعني انا التاج اللي مررته لميرا هو اللي نحس عليكي
عااااااااااااااااااااا


لا بقى ارجعى تانى.. لحسن كدة كبستي جامدة قوي

!!! عارفة ... مش عارف ليه said...

رغم إجاباتك المرحة على التاج

إلا إن هناك لمحة ما من الآسى

هل السبب هو الاجازة الوهمية؟

أتمنى أن لا تتطول إجازتك أكثر من ذلك

فإن لحضورك بين المدونين بريق خاص

ربما يتم إختزاله في كلمة فاتيما

"وش الخير"

كيــــــــــــارا said...

هههههههههههههههه

حلوه اوي تاج خرده دي

بس برده الصوره الاولانيه احلي

ام هند اجاباتك جميله خالص خاصة في السن فهماني يانصه ههههههههههه

حمد الله علي السلامه ياقمر

سمكه واحده said...

جايه اسلم واقولك انك وحشتيني جدا
بقالي كتير وزوتكيش
التاج جميل
واجباته جميله
اتمنالك كل خير يا ايه؟
وش الخير زي ما فاتيما بتقول
تحياتي

أم أحمد المصرية said...

انا لسه كنت جاية ازورك و اقول لك فينك من زمان و اعزمك علي كوب شاي عندي :)))
لقيتك بتردي علي سؤالي اللي ما ساتلتوش علي العموم الحالة دي كاس و داير علي المدونين مستنينك لما ترجعي لنا ياوش الخير
اما التاج الخردة فعاد له اللمعان باجابتك الجميلة

*البت المشمشية *حلوة بس شقية * said...

انا كمان لغه عربية

blue-wave said...

اجابات جميله
استمتعت بالمدونه فى اول زيارة
وبعدين التاج مش خردة ولا حاجه دا زى الفل اهو:))
تحياتى

راجى said...

جزر

قوس قزح said...

ههههههههههههه
انا اهو يا راجى

خيررررررررررررررر ؟

قوس قزح said...

رومانسى
الله يسلمك يا رومانسى
ميرسى على زيارتك اللى اسعدتنى

و هى حالة ان شاء الله تروح لحالها

اشكرك

قوس قزح said...

كريم

نورتنى باول زيارة لك
و شىء يشرفنى انك كنت واخد بالك من تواجودى و غيابى

تحياتى لك

مهندس مصري said...

إجابات حلوة و تنم عن شخصية جميلة بيحبها مدونين كتير قوي

ربنا يكرمك و يجازيك خير عن كل الخير اللي بتعمليه

و برضه نقول جزر
بس الرد يكون في مدونتي
:)

فاتيما said...

دوللى يا حبيبتى
متقوليش بقى ...صحيح ؟!!!
يعنى التسميات بتاعتى ممكن تعجب حد ..!!
طب لمعلوماتك بقى أنا بلاقيها طالعة من قلبى كدا تلقائياً و معرفش بتلزق فى لسانى إزاى بعد كدا
انا حسيتك وش خير
و نفسك كلها رضا
وفيكى شجن نبيل
و معجونة بقلب و عقل و جدعنة الدنيا و وحشتونى قوى قوى يخربيت كدا
انا عمالة افشش فشاش من البرفان بتاعك و بفتكرك علطول
و بما إن سيادتك بتحبى الحضن اللى بجد
ليكى منى حضونة كبيرة و جميلة زيك
يا وش الخير كله
ب ح ب ك
و بوسيلى العيال

يا مراكبي said...

أحلى فقرة هي الأولى .. المدونين بيفقسوا .. هههههه

دي حقيقة على فكرة .. بسم الله ما شاء الله العدد بقى رهيب .. لكن كل ده كويس .. القاعدة كل ما تكبر تلاقي القمة بتعلى لفوق أكتر

جزر

عاليا حليم said...

ههههههههه

حلوة بتفقسوا دى

يا ستى ربنا يكون فى عونك اكيد يعنى مشغولة إحنا عارفينك صاحبة واجب ما بتتاخريش

:)

إجاباتك حلوة و متوقعة من إنسانة عطوفة و معطاءة زيك

تحياتى

Diyaa' said...

متشكرين يا وش الخير :D
معرفش ليه بس حسيت بكده :D

بت خيخة وأي كلام said...

لما اجرب كدة

جزر

بت خيخة وأي كلام said...

طب ممكن خيار
ولا هو مافيش غير جزر

بت خيخة وأي كلام said...

طب لو هتيجى فعلا
ياريت تجيبى معاكى
بعشرة قروش خش

بت خيخة وأي كلام said...

انا اساسا داخلة علشان اقولك واحشتينى

وعايزة اقولك على حاجة


انتى صوتك حلو يا بت يا دودو

مش قصدى حلو يعنى نحنوح وفيه مرقعة

انا اقصد حلو
يعنى مؤثر

فيه جدية كدة وفى نفس الوقت فيه حنان الامومة


وبس خلاص

جزر بقى
لما نشوف هتيجى امتى


سلام
اختك خيخة

بت خيخة وأي كلام said...

جزر

جزاااااااار


جزاااااااااااااااااااار


جزر بقى

قوس قزح said...

معلش يا خيخة
الجزر كان شاحح

يظهر موود التدوين اتنقل للواقع

لكى عندى كيلو جزر

قوس قزح said...

معلش هو تعليق جماعى
بس احب اقول لكل البنوتات انتم وحشتونى اوى
و لكل الولاد ربنا يخليكم و ميرسى على سؤالكم

بت خيخة وأي كلام said...

دودو
مش امبارح برضه كان عيد ميلاد احمد جوزك؟


انا فاكرة يوم ماكنا فى اللقاء الحريمى
انك قلتيلى انه 28 يونيو

لو غلط قوليلى
علشان انا عملالكم تهنئة خيخية عندى
فلو غلط قوليلى اروح امسحها وماحرجش نفسي

وكل سنة وانتوا طيبين لو ماكنتش غلط

قوس قزح said...

لا يا خوخة دى عيد ميلاد بنتى هنا اللى 28 .. انا جوزى عيد ميلاده 1-7

ربنا يخليكى على انك فاكرة ان فى مناسبة فى اليوم ده