Saturday, July 18, 2009

ليه بقينا كده ؟


الو ايوه يا حبيبى
انت فين دلوقتى
متخفش يا عين امك
جوز اختك جاى لك فى الطريق
طمني يا حبيبى كان معاك حاجة كده ولا كده
طيب الحمدلله الف حمد و شكر لك يا رب
----
ايوه يا محمد
انت فين يا اخويا
جيبت رخصة الماكنة من البيت ؟؟
طيب بسرعة و النبى يا حبيبى
لحسن الواد يا كبد امه زعلان اوى
بس خد فلوس معاك عشرات فكة .. متوزعش اكتر من عشرة يا محمد
-----
ايوه يا احمد
اخوك كلمك ؟؟
لا خلاص انا هخليه يسيب الشغلانة دى
بلا طيار بلا هباب
ده كل شوية يبهدلوه حسبى الله و نعم الوكيل
طيب اجرى روح له اهو برضك تبقى جنبه و طمنه

-----
ايوه يا حبيبتى
جوزك نزل
فطمتيه انه ميقعدش يصرف لى بال 500 جنيه زى المرة اللى فاتت
زعلان ليه ؟ علشان نزل لاخوك
هو الدكتور قاله ايه امبارح
علشان كده بيطلعه عليكى الموكوس اكمن العيب منه
معلش يا حبيبتى خالينا فى اخوك اهم
لا انا سيبت الشغل و جاية فى الطريق اهو

-----
انت فين يا حبيبى
حولوك فين ؟.. نيابة المرور
200 جنيه .. ولا يمهك يا حبيبى
مش مهم الفلوس المهم انت يا ضنايا
ولا تزعل نفسك يا عبده اهدى يا حبيب امك




المكالمة دى كانت من ست فى الباص -واضح انها بتشتغل فى بيت - بتطرح كام سؤال جم فى بالى وقتها
ليه بنتكلم فى التليفون بصوت عالى اوى كده و نخلى الناس تعرف تفاصيل حياتنا ؟
ليه ممكن ندفع رشوة اذا كان الغرامة اقل ؟
ليه الرجل لما يكون العيب فى الانجاب من الزوجة يذلها و لما يكون منه يطلع عقده عليها ؟
ليه بقى مفيش احترام بين الابن و الام و بقى عادى انها تعرف انه بيتنيل ياخد مخدرات ؟
ليه بدام شغلته خطر و ممكن تكون سبب فى حادثة له و لغيره يكون ماشى غايب عن الوعى ؟
ليه بدام امنا شقيانة فى البيوت علشان توفر قرش نصرف فلوسنا على مخدرات و رشاوى ؟
ليه ظباط المرور ممكن يبهدلوا بتوع الدليفرى رايح جاى و محدش منهم يقرب من ولد راكب هارلى ولا ريسينج ؟
ليه بنستسهل الحرام و ليه بنيجى على الغلابة و ليه مبقاش قلبنا على بعض .. ليه بقينا كده ؟؟؟




26 comments:

ابو على said...

انتى جاوبتى ع السؤال ومختيش بالك
>> المكالمة دى كانت من ست فى الباص <<

ست

ست

لا تعليق بقى:d

dreem said...

ليه يا دودو دخلتى فى سكة ال ليه ؟
السكة دة مالهاش نهاية ولا حتى اجابة مقنعة وبتفتح ابواب مالهاش نهاية
ربنا معاكى وخلى بالك من الضغط
عامة ,, نصيحة اخوية
لا تسألو عن اشياء ان تبد لكم تسوئكم
صدق الله العظيم
فيه حاجات بتبقى كده مالهاش اجابة الا انها نتاج امراض نفسية وتربية غلط وشوية عقد نقص
وفيه حاجات ليها اجابات بس بتوجع اوى اكتر من سؤالنا عنها .. ليه
فبلاش تركزى
ربنا يخرجنا منها على خير
تحياتى

حـــلـــم كـــان said...

بقينا كده عشان الدنيا مبتجيش الا على الغلابه متنفعش تجى على الكبار متجيش

يعنى انت مره شفت واحد من الناس اللى بتاع المرور مش بيوقفهم دول راكن العربيه وبشترى عيش من الطابونه لما يعملها يبقا بتاع المرور يوقفه

منــار فايد said...

بقى برضو الست اللي كانت معلا صوتها
تلاقيكي كنتي راميه ودانك معاها
ههههههههههههه
بهزر طبعا
انت معاكي حق في ناس بيحلالها الكلام في التلفونات في العربيات
فاكره مره كنت راكبه وراجل في اخر الميكروباص باعلى صوت عنده بيتخانق مع مراته وبيشتمها وبيسب في اهلها
ومره كمان كانو اتنين صبيان بيتكلموا باعلى صوت عندهم عن الليله اللي قضوها امبارح مع ميرفت
وبلاوي اكتر واكتر
شكرا على الموضوع
عارفه انا عن نفسي وده حقيقي ماما لما تبقى تكلمني وانا في اي مواصله تقولي صوتك متغير وبوطي صوتي لدرجه هي مش سامعاه
بصراحه ببقى مكسوه اوي مش عارفه ليه
مع انها مممكن تكون مكالمه ثانيه واحده ومافيش موضوع اصلا

انا رغايه
سلام

المهندس said...

اختصر .. واقول لحضرتك الاجابة ؟ ... عشان احنا في مصر ... في فترة تفوق في السواد فترة احتلال الهكسوس لها ... بس للاسف مفيش احمس.
السلام عليكم ... واسف اني لم ابدأ حديثي بالتحية او السلام ... ولكن حضرتك تسألت .. وكان لابد من الاجابة مباشرة

karim said...

اولا الناس بتتكلم بصوت عالى علشان مش مقتنعين ان الصوت هايوصل فى الزحمة والدوشة مع انة بيوصل ودة عادى, الباقى كلة اجابتة مجتمع فاسد بس وكمان حكومة زى الفل والياسمين, تحياتى

Empress appy said...

علشان بقينا بنستسهل بقينا فى زمن التيك واى
ونسيتى تقولى ليه لما حد يتنازل عن حاجات علشان اللى قدامه التانى ميقدرهاش فيه حاجات كتير بقت كده

قوس قزح said...

ابوعلى

يعنى ايه ست ..ست ..!!!

قوس قزح said...

dreem

انا و الله كتير بشوف و بسمع و بسكت علشان عارفة ان الحكاية اكبر من حل لحالة فردية و محتاجة لسنين

تقدرى تقولى انها فضفضة على السريع :)

نورتنى يا جميل

Mafrousa said...

عارفه ليه يا دودو بقينا كده؟
علشان كله اتلخبط على بعضه
مافيش رابط ولا ظابط
مافيش مباديء ولا قيم
مافيش اصول و جزور
احنا بنقلد تقليد اعمي اي حاجة و كل حاجة
و برقع الحيا اتشااال من زمان
زمان كانت الست او الراجل يتكسفوا يتكلموا كل اللى سمعتيه بصوت عالى
دلوقتي عادى مافيش كسوف على عينك يا تاجر
و بعدين هيه عارفه ديتها ترش قرشين و خلاص
ربنا يلطف بينا فى الزمن ده

ميرا ( وومن ) said...

طب تصدقي انا عمالة اقرا واقول هي جابت الحوار دة منين ؟!!!!
ثم جاءت الإجابة الوحيدة المنطقية الميكروباز

لو عملت بوست علي كل حاجة بشوفها في الميكروباسات هاعمل مدونة لوحدها

ليه سؤال غير منطقي يا دودو لأنها اولاً لو دروتي عليها هاتلاقيها صوتها عالي ولو بتتكلم مع اللي جبنها الميكروباس كله هايعرف برضة ايه الموضوع ومفيش مانع حد يتدخل يدلي برأية في الموضوع

ثانياً دة نوع من انواع الفشخرة يعني ست بتشتغل في بيت وابنها سواق دليفري وبترتب لدفع الرشاوي وكأنها خبرة وكأنها دة كل يوم بيحصل
طب دة مخلكيش تسألي هي يا تري شغلانة الدليفري دي بيكسب منها قد ايه علشان كل مرة يتمسك يدفع 200 جنية غرامة غير الرشاوي

وغريبة برضة انهاىمش مستغربة ان ابنها معاه حاجة كدة ولا كدة ؟؟؟
انا بدل ما اسـأل ليه؟ سألت أزاي ؟
ليه دي مش هاتوصلنا لحاجة

متبقيش تركبي ميكروباسات تاني يا دودو

الـسـيـدة نـون said...

انا مش هاعلق على البوست ده

انا جاية اقولك ان البوست بتاع عتمة حلو اوى انا قريته متأخر
وحلوة الصورة اللى انتى حاطاها مع البوست
كانت بتنجانة هانم كانت من فترة عاملة بوست اسمه تقريبا سرداب الحياة

كلامك فى بوست العتمة ينفع اوى يكون تعليق على بوست بتنجانةهانم
او يكون استدراك للبوست



دلوقتى ممكن اعلق على البوست ده بقى

الست دى معرفتش تربى عيالها كويس
العيب مش ان الام تعرف ان ابنها بيشرب مخدرات
لاااااااااااااااااا
العيب ان الواد اساسا يشرب مخدرات

بنت الست مش متربية برضه
لييييييييييه؟
علشان طلعت سر جوزها للغريب حتى ولو كانت امها
ماينفعش ابدا اسرار البيوت تطلع برة



سلام
اختك خيخة

الـسـيـدة نـون said...

انتى بتقولى ليه ندفع رشوة لما ممكن الغرامة تكون اقل

فى بعض الناس مش فارق معاها تدفع كام
هى الفكرة انهم مش عايزين يتقال عنهم انهم خدوا غرامة او اتعاملهم محضر او كل الحاجات دى

انا مش فاهمة اوى القصة اللى حصلت
بس خلينا نتخيل ان الواد كان هيتعمله محضر وكانت الغرامة متين جنيه

يدفع متين جنيه ويتعمله محضر
ولا يدفع خمسمية جنيه ومايتعملهوش محضر وتفضل صفحة سوابقه نضيفة؟

اكيد هيختار الرشوة وتفضل صفحة سوابقه نضيفة


ولو انى اشك ان الواد ابن الست دى معندهوش سوابق
ده اكيد كله سوابق منيلة بنيلة


سلام
اختك خيخة

عين فى الجنة said...

فكرتينى بصديقى الامريكى ، كان معجب جدا بالشعب المصرى وتصرفاته وحركات الايدين والصوت العالى والحميمية فى الحوارى والمناطق الشعبية وكان بيرجع الظاهرة دى الى جو حوض البحر المتوسط والحر اللى بيدفع الناس للخروج من البيوت والالتقاء فى الخارج
وكان بيقارن المصريين بشعب السويد مثلا اللى عايشين كل واحد مع نفسه ولما يتكلموا يوشوشوا بعض وازاى البرد رامى ظل من الكآبة عليهم
فدى طبيعتنا وهى طبيعة متناقضة وفيها ازدواجية ولكنها بتاعتنا احنا

ahmed_k said...

الكلام بالصوت الحياني كده بتكون صفه أصيله في الشخص لو حاول يخفض صوته حيتلجلج وميحطش منطق لأنه إتربى على كده من صغره ده لو في تربيه أساسا
ليه ممكن ندفع رشوة اذا كان الغرامة اقل ؟ ده بقى يا ستي عبط بعيد عننا وعن السامعين ,أللي بعده

ليه الرجل لما يكون العيب فى الانجاب من الزوجة يذلها و لما يكون منه يطلع عقده عليها ؟
لا مش دايما لو في حب والست محسستهوش إنها متأثره بالموضوع ده بالتأكيد حيختلف الوضع بس لو كان راجل ناقص ونص كم حيطلع عنيها سواء بيخلف ولا لأ

ليه بقى مفيش احترام بين الابن و الام و بقى عادى انها تعرف انه بيتنيل ياخد مخدرات ؟
لأنها طلعت لقت أبوها وأخوها بيتنيلوا كده وممكن يكونوا بيتاجروا في الكيف فالموضوع بالنسبالها حيكون عادي جدا لأن الوسط أساسا ملوث فالعيب لو طع من أهل العيب ميبقاش عيب ..أللي بعده

ليه بدام شغلته خطر و ممكن تكون سبب فى حادثة له و لغيره يكون ماشى غايب عن الوعى ؟
ليه بدام امنا شقيانة فى البيوت علشان توفر قرش نصرف فلوسنا على مخدرات و رشاوى ؟
أيه الأسئله الغريبه دي يا داليا ؟؟
يا ماما الجواب باين من عنوانه يا شيخه متدقيش على الأمور دي هههههه

ليه ظباط المرور ممكن يبهدلوا بتوع الدليفرى رايح جاى و محدش منهم يقرب من ولد راكب هارلى ولا ريسينج ؟
أخخخخخخ جينا على الكلام الكبير مين هارلي وريسينج ده ؟؟ دي ماركات عجل ولا أيه ؟؟؟

ليه بنستسهل الحرام و ليه بنيجى على الغلابة و ليه مبقاش قلبنا على بعض .. ليه بقينا كده ؟؟؟
بعدنا عن ربنا فسلطنا على بعضنا البعض
الحل في العوده للدين لأنه المنظم الحقيقي للتعامل بين الناس

يا داليا بطلي والنبي تغيبي كتير وتطلعيلنا ببوستات تتعب صوابعنا كتابه هههههه

سلااااااام يا أختي

مـحـمـد مـفـيـد said...

الاستسهال واللا مبالاه
تمكنوا منا فأصبح حالنا هكذا

يا مراكبي said...

عشان ما فيش دولة ولا سلطة ولا قانون فكل واحد بيدير الحتة اللي هو ماسكها بمزاجه هو وبالتالي الناس بقت بتحاول تتعامل مع الاسلوب ده هي كمان بطريقتها هي

كله بيسلك نفسه بأي شكل وخلاص .. ما هو مافيش مرجع لأي حاجة في البلد دي .. كل واحد يعمل اللي هو عايزة

قوس قزح said...

حلم كان

لا طبعا الواحد من دول مش بيفكر العيش اللى بين ايديه جاى منين
هو بيفكر بس القمح الدرجة التالتة اللى استورده ازاى يبيعه على انه قمح فاخر

قوس قزح said...

شباك موارب

ههههههههههههههه لا ده حتى هى كانت مش قاعدة جنبى و كانت قاعدة ورايا بكرسيين

انا زيك كده محبش ارغى فى تاكس و لا اتكلم فى التليفون وسط ناس غريبة

لكن فى البيت بقى ممكن ارغى ساااااعة هههههههههههه

نورتينى بزيارتك :)

قوس قزح said...

المهندس

اشكرك على الاجابة و على التحية
و فى انتظار احمس يمكن الاحوال تتعدل شوية
و ان كان الحل بايدينا مش بايد فرد منتظر :)

تحياتى

قوس قزح said...

karim

امممم
طيب ليه بنعلى صوتنا فى البيت لما نستقبل مكالمة من بره مصر ؟
واضح انه مفهوم غلط موروث
مبروك يا عريس :)

قوس قزح said...

Appy

لو على نسيت ايه .. فانا نسيت كتير ..ماله الزهايمر ؟؟ اهو بيريح البال بردو و يعمل دماغ من غير حاجة كده ولا كده تودى فى داهية :)

قوس قزح said...

واحدة مفروسة

عندك حق و الله
بس انا بستغرب لو كلنا عارفين الغلط فين و ايه اسبابه .. ليه مش بنصلحه حتى لو مع نفسنا و مع الناس اللى حوالينا
لو كلنا عارفين الصح و بنشجعه ليه مش موجود الصح و بقى الغلط كتير
و الناس اللى بتعمل الغلط دى جات منين !!!
و لو احنا بس اللى كويسين هنعمل ايه طيب فى نفسنا لما بعد شوية نكون احنا اللى مش طبيعين و معقدين !!

ربنا يرحمنا و يفتكرنا قبل ما يجى زمان زى ده

... amr said...

ممممممم ... أسئلة عبثية :) متاسف يا داليا بس اجابة أسئلتك دي هيتطرق الى مواضيع و مواضيع أهمها التربية و العادات و التقاليد

بس على فكرة .. مش الستات بس اللي بيحكوا تفاصيل حياتهم على الملآ سواء في المواصلات أو في التليفونات .. رجالة كتير بتعمل كدة للأسف

قوس قزح said...

وومن

امممم .. بس هو مكانش ميكروباص
ده باص المدينة .. يعنى غالبا محدش بيتكلم فيه و هادى
و مستوى اغلب الناس فيه مينفعش معاه الفشخرة عليهم

و اعتقد اجابة ليه مش هتفرق كتير عن اجابة ازاى
الاسباب و الطريقة وجهين لعملة واحدة

انا مش بركب ميكروباصات خالص ياقطتى
بصراحة بخاف من اللى بسمعه عن السواقين بتوعها

قوس قزح said...

بت خيخة و اى كلام
فعلا بوست عتمة يحمل نفس معنى بوست ابى
و ان كان هى اتكلمت فيه باستفاضة اكتر

اما بالنسبة للست
فهى نفسها فى حاجات كتيرة فى التربية فاتتها فبالتالى معرفتش تربي اولادها عليها

القصة و ما فيها ان ابنها اتمسك سايق بدون رخصية لانه ناسيها فى البيت و هيتعمل له مخالفة
بس فى مناقش خاصة بالبوست ده عرفت ان ممكن سبب اللجوء للرشوة مش الغرامة هى انها بتشترى الناس اللى هناك علشان مش يستلموا ابنها كل شوية ... يعنى نظام اطعم الفم تستحى العين

اعتقد وجهة النظر دى مناسبة اكتر
خصوصا ان زى ما قلتى الولد شكله سوابق اصلا

نورتينى