Wednesday, July 29, 2009

ازاى نسامح بعض





فى حاجات كتير بنختلف فيها عن بعضنا

و منها حاجات ممكن تكون سبب فى سوء تفاهم بينا و تعمل مشاكل كمان

و اوقات بيحصل موقف من حد بنحس بعده اننا اتجرحنا منه و مش ممكن نسامحه ابدا بعدها

بس لازم قبل ما ناخد القرار نعرف حاجات مهمة اوى خصوصا لو جيه و اعتذر عن تصرفه

مفيش انسان مبيلغطش او بتحطه الظروف فى موقف تخليه يخرج عن شعوره و يكون رد فعله يجرح اللى قدامه
.
.
ممكن يكون الانسان اللى جرحنا شايف ان تصرفه عادى و يكون فعلا مش قاصد ده و احنا بس اللى مش شايفين الاختلاف اللى بينا و بينه و يمكن ده نلاحظه فى اختلاف الالفاظ من مدينة للتانية و ازاى ممكن تكون جارحة لودن حد و حد لا
.
.

مش معنى ان الانسان غلط مرة انه لازم يكرر نفس الغلطة ..لازم ندى فرصة تانية للى قدامنا و نشوف هل فعلا اتعلم من غلطه ولا لا
.
.
مش لازم نربط التسامح بالمعاملة ..يعنى لو فى شخص انا مش عارفة او مش قادرة اتعامل معاه لاسباب زى اختلافه فى تربيته عنى او اخلاقه او بيئته و غلط فيا و اعتذر ..هنا التسامح معاه مش معناه انى لازم تكون علاقتى قريبة اوى به
..لكن المهم اننا نكون من جوانا مسامحينه

و من اهم الحاجات اللى لازم ناخد بالنا منها ان لما حد يغلط فينا او قدامنا مش كفاية اننا نسامحه لكن مهم اوى اننا ننسى و منقعدش كل ما تيجى سيرته نفتكر له الموقف ده و نحكيه للناس

خالينا نحاول فى الاشهر الكريمة دى نسامح كل الناس اللى زعلتنا و نحاول احنا نكون البادئين بالخير

جميل اننا نسامح حد لما يعتذر و الاجمل اننا نسامحه من نفسنا


البوست مشاركة لدعوة من البنت المشمشية للتسامح فى كثير من المدونات

30 comments:

موناليزا said...

ازيك يا دودو عاملة ايه ياحبيبتى يارب تكونى بخير
--
دعوة غالية فعلا
وكنت كتبت موضوع سابق عن نفس مضمون الفكرة
http://monaliza110.blogspot.com/2009/01/blog-post_25.html

فاروق عادل said...

بوست جميل ياداليا وانا كتبت بوست برضه عن نفس الموضوع

*البت المشمشية *حلوة بس شقية * said...

بجد يا دودو تسلم ايدك على الكلام الجميل ده
وشكراانك لبيتى دعوتى فى المشاركة معانا

عمرو said...

التسامح من أجمل و أعلى القيم فى الحياه و الاٍنسان المتسامح اٍنسان راقى بأخلاقه و صفاته ..
لكن فيه بديهيات و أساسيات لا يجوز التسامح فيها أبدا حيث لا مكان فيها للتسامح كخيانة الوطن مثلا ..
تقبلى تحياتى و تقديرى على هذا البوست الجميل و يا رب تسود ثقافة التسامح المفتقده بين الناس دايما ..

Appy said...

مبعرفش ومقدرش

Sherif said...

عزيزتى داليا
------------
قد يمكن للانسان ان يخرج عن شعوره .. وينفعل فى لحظة غضب .. ليس معنى ذلك انه خطأ لا يغتفر .. فكلنا بشر .. ووارد ان يحدث لنا جميعا هذا

التسامح الحقيقى هو فى ان يستقبلك المتلقى بهدوء وابتسامة فلا يلومك .. والاجمل ان يتمكن من ان يعيد اليك ابتسامتك وحبك للدنيا مرة أخرى
فقط لانه يحبك ويقدرك ويراك بقلبه ويسمعك أيضا .. فيتجاوز عن كل هذا فأنه لا يبقى فى النهاية الا المشاعر الحقيقية .. لاننا فى النهاية آدميون

وفى النهاية .. مااسهل الكلام .. واصعب العمل

بوست جميل

صبرني يارب said...

ما حدش قالي على الدعوه دي

دعوه جميله جدا جدا

عارفه فى حديث عن الرسول عليه الصلاة والسلام يا دولي

جميل اوي

اذا جائك اخاك متنصلا فانصره ظالما او مظلوما

صدق رسول الله

متنصلا : يعنى معتذرا

رغم ان فى بعض الرويات اضعفته الحديث ده

الا انى شايفاه فعلا دعوه مش بس للتسامح لكن كمان لحفظ الكرامه
يعنى خلاص ان جالك حد يعتذر حتى لو كان هو الى غلطان اقبل اعتذاره حفظا لكرامته يعنى

ربنا يكرمك يا دولي انتى والبت المشمشيه

مش تقلولي يا جدعان ولا عشان انا بقيت اغيب عن البلوج اهيء اهيء اهيء

همس الاحباب said...

تسلم الايادى
التسامح نعمة من الله سبحانه وتعالى لعباده
والتسامح لغة القوى وليس الضعيف كما نتصور لان القدرة على التسامح اسمى واعلى شانا من الانتقام
تحياتى

مـحـمـد مـفـيـد said...

مفهوم من اسمي المفاهيم التي في ظل الحياه والروتين اليومي فقدناه
لابد وحتماً تدرب انفسنا علي العمل به

دعوه رائعه بجد

بت خيخة وأي كلام said...

امممممممممم

التسامح حلو وسهل
وكلمة حلوة تمسح كلمة وحشة اتقالت

لكن
ساعات
غصب عن الواحد
بعد ما يسامح
تلاقيه مع اول زعلة
افتكر للطرف التانى
الحاجة اللى كان مزعله فيها
وتلاقى الواحد بيقول للتانى
فاكر لما عملت وعملت وعملت

طب يا عم ايوة انا فاكر
واعتذرتلك وانت سامحتنى
بتجيب القديم ليه بقى؟

هى الفكرة انه بيجيب القديم لانه متوقع انه بدل سامح اللى قدامه يبقى المفروض انه مايزعلهوش تانى ومايكررش الحاجة اللى ضايقته تانى

فعلشان كدة بيجيب القديم لان الطرف التانى استهان بكلمة انا مسامحك

وراح ضارب تانى

هو انا علشان سامحتك تقوم تضرب تانى؟



عموما مش عيب ان احنا نسامح
لكن فيه حاجات ماينفعش نسامح فيها
وفيه ناس ماينفعش معاهم التسامح لانهم بيستهينوا بيه
ويضربوا تانى
فيضطرونا غصب عننا
نفكرهم اننا سامحناهم
على افعالهم السودا اللى عملوها زمان


فكرتينى بقصيدة لا تصالح
بتاعة امل دنقل
كان بيقول فيها

لا تصالحْ!
ولو منحوك الذهبْ
أترى حين أفقأ عينيكَ
ثم أثبت جوهرتين مكانهما..
هل ترى..؟
هي أشياء لا تشترى


يمكن كلامى رخم وسلبي يا داليا

لكن من جوايا انا معاكى ومع الدعوة الجميلة للتسامح

ودايما بقول لاى اتنين زعلانين مع بعض بقولهم جرى ايه ما تسامحوا ما تكبروا دماغكم ماتعتذروا وتقبلوا الاعتذار وتبوسوا راس بعض وخلاص

ليه لزمة النكد والزعل
والخصام


بس مش عارفة ليه كلامى فى اول التعليق لا يدل على اقتناعى بمسالة التسامح رغم انى مقتنعة بيها
بس هى يمكن حالة نفسية هباب
مأثرة عليا وعلى كلامى مخلياه يطلع مافيهوش ريحة التسامح


سلام
اختك خيخة

اقصوصه said...

القدره على التسامح

هبه من السماء

جعلنا الله من موهوبين :)

عاشقة القمر said...

حاجه كويسه جدا التسانح خاصة يبد اء التسامح انا بجد دايما مسامح بس حصل موقف من من اقراب ناس لي بجد حاولت انو سامحها لان لا اسفه مش قدرت خالص
يعني خاصة اذا احدحرج مش ظن احد يقدر ينسي

karim said...

نتمنى ان نكون متسامحين بحق لكى نستطيع الاستمرار فى حياتنا, تحياتى

زهرة الكاميليا said...

سلام الله عليك ..

كيف حالك ؟

مررت للسلام ..

كل عام وأنت بألف خير
رمضان كريم

أحببت أن أكون أول من يهنئك بقدومه.


ربى يحفظك
أنت ومن تحبين

hager za3bal said...

جميل اننا نسامح حد لما يعتذر و الاجمل اننا نسامحه من نفسنا

بجد كلامك هو اللي جميل .. :)
عارفه يا داليا
هو بيبان في الاول ان صعب اوي نسامح وكده .. بس مع الوقت ولما الواحد بيعيد حساباته بيلاقي نفسه مسامح ..

بس المشكله بتكمن في الشخص اللي غلط ده ..
ممكن يعتذر ساعتها فعلا الواحد بيسامح وهو راضي ومبسوط .. لكن ممكن الشخص ده يتمادي في تصرفاته بشكل يخلينا متقززين من اننا نسامحه ..

بس بجد
اتعلمت ان التسامح ده سمه من سمات قوة شخصية اي حد بيعرف يتسامح بجد ..

:)

تحياتي

سمكه واحده said...

اذيك يا جميل
يارب تكوني بخير عامله ايه؟
كل سنه وانتي في منتهي السعاده
ربنا يبارك فيكي
كلامك كله حكم يا شيخه روحي قلبي وربي رضيين عنك
وحشتيني جداااااا
رمضان كريم
تحياتي

أحــوال الهـوي said...

طبعا كلام حضرتك جميل و فيه نضج و وعي

و ياريت كل الناس تنظر للامور بنظرة محايده و دائما نعطي الف عذر لاصحابنا قبل ان نغضب منهم

ساعتها هنعتاد التسامح و نقلل فرص خسارة اصحابنا و احبابنا و نجد السعادة بتحب تقرب منا

تحياتي

حسن حنفى said...

لو الانسان مش اعطي فرصه للي قدامه وقاطعه من اول غلطه تجرحه هيقاطع كل الناس حتي نفسه

فَراشة حُزيران - دُعاء مصاروة said...

تدوينة جميلة جدّا :)

الله يكرمك ويبارك فيك يا رب

سومه...مجنونه فى بلد عاقل said...

عشان انتى قلبك ابيض وزى السكر بس فى حاجات كتيره اسف عمرها ما تصلحها زى اهانه الكرامه والكذب وانك تحسى انك اتطعنتى فى ضهرك
التسامح جميل جداا ويا رب يرزقنا التسامح

♥ Am fOpa'D ♥ said...

ياااه,,, دعوة تسامحية

التساامح اتقال فيه كلام كتير واتكتب فيه كتب كتير
على الغرم من كده بيفتقده كثير

التسامح مش ضعف من الواااحد بل هو قوة

بس حتى لو الوااحد سامح الي قدامه وخلى التجربة المسيئة للزمن في هامش النسيان اكيد مش هتتمسح من الذاكرة
فنقتنع ان التساامح اولوية لصحة نفسية عقلية سليمة

كل سنة وانتي طيوبة,,,
رمضان كريم

محمد عتلم said...

كل سنه وانتى طيبه بمناسبة شهر رمضان الكريم

assafo anaroze said...

داليا
يسعد الله صباحك
التسامح صفة و خلق عظيم لا يتصف به الا الكرام
و لنقتدي بالرسول الكريم و الذي خلقه القران
حينما تعامل مع اهل قريش يوم فتح مكة بالحلم و اتلصفح الجميل
جاءه قريش يوم فتح مكة فقال لهم : ما انا فاعل بكم قالوا اخ كريم و ابن اخ كريم قال: اذهبوا فانتم الطلقاء
مودتي

سمكه واحده said...

جيت تاني اهو يادي الدوخه
بدوخ انا والف والمشوار طويل من مدونه لمدونه ياربي الطريق واعر والجو حر
كل سنه وانت طيبه وبخير وسعيده انتي واسرتك وكل احبابك
رمضان كريم
فينك؟
يارب تكوني بخير

سومه...مجنونه فى بلد عاقل said...

كل سنه وانتى طيبه يا حماتى وشكرا على رساله امبارح معلش الرصيد والله مشطب كتر الف خيرك ديما كدا سباقه بالخير والجميل

عاشقة القمر said...

كل عام انتي بخير تقبل الله ممنا ومنكم
تصومي تفطري علي الخير
سعدت جداااااا بازيتك لي في مدونتي

ahmed_k said...

كل سنه وأنتي طيبه يا داليا
وبعوده عليكي رمضان بكل خير وصحه وأمان وسعاده
وحضريلنا كده بؤجه بعد العيد ماشي

رمضان كريم

hasona said...

السلام عليكم

كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
وتدبر معانيه وفهم علي النحو الصحيح
ورطب ألسنتنا بذكرك يا الله

قوس قزح said...

انا اسفة انى مقدرتش ارد عليكم بس كنت مسافرة و الله
كل سنة و كلكم طيبين و متسامحين و اقرب لله
و جميل ان ناس كتير شاركت فى الموضوع ده
جزاكم الله كل خير

أبو كريم said...

ياريت كلنا نسامح بعض مكنش بقى فى أى خلاف مابين اى حد وأى حد وخصوصا أولى الأرحام إلى هيقفوا قدام ربنا والرحم هيشكوهم لله والناس مش حاسه بالمصيبه دى اللهم أرزقنا التسامح والعفو على من أسئنا لهم