Sunday, September 6, 2009

اعتذار و شكر و طلب

تحديث جديد

الف حمد و شكر لك يارب
بنوتة جميلة اسمها اميرة
كانت من المتبرعين معنا يوم الفطار
ربنا يسرها و لاقيت الدوا
و كلمت المسئول بالمستشفى و كان سعيد جدا الحمدلله
و هيبعت يجيب الدوا
شوفتوا اد ايه الخير الجماعى ممكن يفرح قلب ام و يساعد طفل على انه يعيش
جزاكم الله كل خير على سعيكم فى انكم تلاقوا الدوا
انا كنت واثقة انكم هتكونوا ادها و نص كمان

تحديث
يا جماعة ده شكل العبوة بتاعت الدوا


اولا
بعتذر لكل مشارك معنا على اى حاجة حصلت و كانت سبب فى انها تضايقه و يمكن بالاخص حكاية تاخر الاكل بتاع الفطار عليهم و طبعا عندكم حق و يمكن اللى كان بيهدينى شوية ان الشباب اللى بيقدم لنا الفطار هم كمان صايمين ..و ده غير ان طاقة المكان من 25 ل 30 فرد و احنا كنا 48 فرد غير انهم عرفوا طلباتنا على الساعة 3 ونص تقريبا علشان مشكل الناس بلغتنى هم جايين و لا لا و عايزين وجبات ايه .. فاكيد كان ضغط عليهم و يغفر لهم ان الاكل كان حلو و اغلب الناس شكرت فى الاكل و اسفة على اللى حصل وقت الحساب و اللغبطة دى بس بصراحة خالد و احمد سكر قاموا بدور البودى جارد تمام :)


ثانيا
باشكر خالد همس الاحباب لان لما قلت له على فكرة الافطار و انه يبقى معايا فيها وافق فورا و بدا شغل على الفكرة من قبل رمضان فى وقت سفرى و من اول ما نزلت البوست و هو زى النحلة قبل الفطار و بعد الفطار علشان يقابل الناس المتبرعين و يوم اللقاء كلنا شوفنا ازاى مش قعد لحد ما روحنا كلنا و كان زعلان ان فاتيما كمان مشيت بدون ما يوصلها علشان متمشيش لوحدها

باشكر فاتيما و سوما مجنونة من بلد عاقل على الشغل اللى عملوه مع الاطفال من بدرى .. فعلا فنانين و عندهم صبر و حب للخير و ده صور الجزء اللى فات الناس الصبح و الشغل اللى عملته فاتيما لهم هى و سوما



دى فازة عاملتها فاتيما فيها ورد بياخد منها الطفل الخارج من المستشفى وردة يوم خروجه منها

و دول الاطفال و هم بيلونوا التيجان اللى عملتها فاتيما و سوما






باشكر خيخة على متابعتها معايا على طول و مجهودها فى جمع التبرعات و توزعها

و رحاب اللى بالرغم من انها كانت راجعة من
السفر لكن جات و فضلت معنا لحد الفطار

و باشكر كل شخص شرفنا بالمشاركة بالتبرع او بالمجهود او الاتنين سوا وليد .. عارفة مش عارف ليه - مصطفى ريان - شيماء فضفضة اونلى سبوت أ. محمد شوية كلام - أحمد كمال رحايا العمر - أسامة عبدالعال
أم بتول تعالوا نحلم ببكرة - شاهى مفيش حاجة و محمود الشنيور أبنها العزيز أحمد سكر - ميرا وومن أمراءة بعقل رجل - كيكى عووو فكك منى - محمود الدوح ساجى - مهاميو أحسن تستاهل و ميرو النيرو كراكيب اختها - دعاء مواجهات - ضياء بيتوفل مايند - كيارا عالم مولان - نور الدين محمود - عمرو أن نوون - سامح عزت خواطر خاطر - الأستاذ شريف -عسقول عسقلانى الاخلاق - دريم فضفضة ع السريع و بناتها الحلوين -علا صيدلانية طالعة نازلة و جوزها و ولادها سيف و شادن - داليا صديقة فاتيما -شريف ابن خيخة - عادل البلد دى فيها حكومة -
صاحبة مدونة هلفطة Am fOpa'D

و كان معها اصحابها
- أحمد الصباغ- صاحبة مدونة رنون و اختها
- مدونة كمان اسفة نسيت اسمها و اختها
-الصحفية سهام شوادة
صاحب مدونة ابو على - عبد الرحمن - نضال
و من بورسعيد جت إيناس نهر الحب - و اختها نسمة هيا فوضى
و ناس كان لها مشاركة و لم تستطيع الحضور
منذر - شمس النهار -مدون رفض ذكر اسمه - عدى النهار - جنى يوم جديد - ايناس - رامى - اميرة - ستيته حسب الله الحمش - ياسر عبد الفتاح - ايمان المصرى - فاعل خير - حنين القلب - ahmed-k - محاسن صابر - مروة - سبايدر بوى
و يارب ما كون نسيت حد
و ناس كتير من خارج التدوين منهم ابنى كريم :)


ثالثا
طلب من كل واحد يقرا البوست ده انه يكتب اسم الدوا ده عنده
pulmicort
ويسال عليه فى الصيدليات القريبة منه
تمن الدوا موجود بس الدوا نفس فيه نقص فى السوق
الدوا ده لطفل محتاج ياخده علشان يقدر يخرج من المستشفى
ارجوكم ساعدوه انه يخرج بس بالسؤال عن الدوا انه موجود



اخيرا بقى
ناس كتير بتطلب منى اعمل لقاء تانى فى رمضان اجتماعى للتعارف بين المدونين فايه رايكم و مين يحب نتجمع تانى على الفطار او بعد الفطار ؟


84 comments:

Anonymous said...

خالص تحيتى وامتنانى لكل من ساهم بشكل أكثر من رائع فى هذا اليوم

ومهما كانت هناك ترهات بسيطة فالمعنى الحقيقى هو كل ذلك الحب والمودة والذى اعتبره من رحمة ربنا ..
الى احسن فى كل مرة .. وبالتأكيد أنا اول من يشجع على تلك اللقاءات الرائعة ..

ملحوظة .. رمضان بيجرى

قوس قزح said...

شريف

و انا هجرى وراه :)

بس محتاجة اعرف مين هيجرى معايا

Asmaa mahaba said...

معلش يا دودو اصلى كنت بتشاكل مع الوالده مكنتش فاضيه ادخل اول ما قولتيلى

Asmaa mahaba said...

استنى عشان انا شايفه استاذ شريف بيتكلم لغه عربيه فصحى ودا بيفوق قدرات الواحد :))) وكدا الموضوع حيكبر قوى
بالنوسبه يا اوختى للموضوع ايه ليه متقوليش ان مكانشى فيه حد اسمه دنيا وانها كانت ملاك ولما صورناه مبانشى فى الصوره هههههههههه حبه بقى اكشن كدا على عفاريت

(احمد سكر ) said...

الف شكر يا داليا على اليوم الرائع دا

وكل سنه وانتم طيبين

لما تحددو مكان للفطار

اتاكدو انه عنده اصناف كتير

مش فرااخ بس

وانتى عارفا الحساسيه اللى بينى وبين الفراخ

من ساعة ما شفتها وهى ماشيه حااافيه

كل سنه وانتى طيبه

ربنا يجمعكم دايما بالخير

Asmaa mahaba said...

الاوخت فاتيما اعظم عظمات الستات انا حتنازل ليها عن لقب فنانه ربنا يردلها يوسف لان بجد بجد خساره انه ميتفيدشى بقلب مامته الجميل اللى مليان حنان وعطاء دا
الله مين حنان دى يا جماعه معنديش فكره موضوع اننا نتجمع تانى دا انا موافقه بس معرفشى امى موافقه ولالا بس لازم يكون خلال رمضان مش بعده لانى حطير على السعوديه وحنضم لقائمه المغتربين
بخصوص الاخ العميل نون اتنين الرجل المستحيل اللى رفض ذكر اسمه ولسه عارفه منك دلوقت الموضوع دا حبقى اقولك توقعاتى بشان هذا الحدث الجلل
لووووووووووووووووولى اتعديت وبقيت بتلكم فصحى انا حجرى لحسن لسانى يتعوج اكتر من كدا

Asmaa mahaba said...

احمد سكر مبيحبش الفراخ تحسبا لاى انفلوانزا طيور تمسك فيه اما انا كلتها صينى وشاكه انى جاتلى الانفلوانزا لانى صاحيه بكاكى
عموما انا شخصيا على الرغم من انى اتدايقت من بتوع تسيباس بس لو فطرنا برا احب افطر فيه تانى لسبب صغير ديكور المكان هناك رائع دماغ فنانين بقى:)

قوس قزح said...

سومة

بطلى شقاااااااوة
ههههههههههههه
مفيش عفاريت
دى غلطة اكيد مطبعية

قوس قزح said...

احمد سكر

خلاص يا سيدى اختار انت المكان
علشان ميكونش لك حجة

كل سنهة و انت طيب
و دايما معنا فى يوم للخير

(احمد سكر ) said...

ايه يا سوما انتى احتليتى التعليقات هنا ولا ايه

واول حد يقول هيروح تسيباس تاانى

احذفى التعليف بسرعه

قبل الناس ما تدخل تحدفك بصوابع المحشى اللى مجتش مع الوجبه

(احمد سكر ) said...

سنهه

مين سنهه دى

هههههههههه

عمتا شوفى كم فرد وفى عروض ممتازه

من اماكن كتير وفيها حفلات كمان بعد الفطار

علشان محدش يقول الساقيه او غيرها

وهتكون اسعاها معقوله بردو

وكل سنهتين وانتى تيبه

فاروق عادل said...

انا كنت هموت واجى لكن كان ورايا شغل مانا لقيت شغل وفى الاخر المصنع ادانى زومبه تتعوض قريب

انا مع فكرة اننا نعمل لقاء تانى

Asmaa mahaba said...

المهم فى الموضوع اللقاء التانى دا حيبقى فيه تحليه ومشروبات ولالا
وكمان بطالب كل مدون ومدونه بايجاد حنفى لكل فوزيه معنسه والا سوف نفجر المدونات تفجيرا مش ممكن كدا الواحد خلاص اعسابه تعبت بجد يا نولع فى البيت يا فى المدونات انتوا مش شايفين شغلكم كويس يا جماعه
مفيش بنت جايه لابسه دبله تفتح نفس اهالينا بيها وتدينا امل فى بكرا
خسارتكم يا بنات مصر كنتم ميه ميه بس عاوزين توجيه:))
تحدثكم احدى الفوزيات من احدى بيوت العنوسه
ربنا يسوقك يا بطيخ

Sameh Ezzat - (خواطر خاطر) said...

اليوم كان جميل يا داليا بفضل مجهودك الجبار انتي وخالد فعلا انتي تستاهلو كل خير

بالنسبه لموضوع تأخر الفطار في تسباس - فده مش هوا العيب الوحيد كمان المكان كان ضيق بحيث انه قسمنا الي جزئين منفصلين بعاد عن بعض خالص

ومع ان الاكل كان مش وحش لكن الخدمه كانت هيربول
............
اليوم كده انا شايف انه كان ناجح بسبب تعدد اهداف اللقاء ويمكن مش كلها اتحققت لكن شئ عوض شئ

..........
انا مع الاقتراح اننا نعمل لقاء تاني للمدونين يكون في مكان اوسع مش لازم يكون ساعة الفطار فالاحسن انه يكون بعد الفطار لو هيكون في رمضان اصلا لان رمضان فات نصفه..
اهم شئ المكان يكون واسع بحيث ان الناس كلها تقعد تشوف بعض ويكون حلقة حوار مش مجرد احاديث جانبيه

اخيرا بشكر داليا تاني علي المجهود الجامد اللي هيا قامت بيه هيا وباقي التيم المساعد لها

Asmaa mahaba said...

سكر
سيب دودو فى حالها اخرك معانا كبايه شاى تتحط فيها تدوب متحطش منطق
:))
مش قولتلك منوفى على منوفى ميرلش
اخبار ورق النوعناع ايه
انا عاوزه جرعه تانيه

طبيبك الخاص said...

السلام عليكم

كل سنه وانت طيبه

انا كل ما ادخل المدونه بحس بسعاده كبيره اوى اوى كان نفسى بجد اكون معاكم فى كل حاجه بتعملوها بس انا والله مشغول جدااااااا لانى خلاص اخر سنه بالنسبه لى وكمان امتحان البكالوريوس قريب جدا
بجد انتم احسن شباب مصر ربنا يباركلكم يارب ويجعل كل اللى بتعملوه فى ميزان حسناتكم

كل سنه وانت طيبه ورمضان كريم عليكم كلكلم يااحسن الناس

Anonymous said...

السلام عليكم

والله ربنا يااااااااااااااارب يتقبل منكم ويجعله فى ميزان حسناتكم

للاسف معرفتش اجى لظروف كده:(

كمان والله ما تزعليش منى حضرتك والله كان نفسى اجى بجد بس من بعد اخر لقاء مدونين حضرته والكلام اللى اتقال وانا بقى قرار ان احضر حاجة تانى بقى صعب اوى بالنسبة لى

عارف ان فى ثواب عظيم والله وان الموضوع ده مش زى غيره
وعارف انى غلطان
بس اعمل ايه بقى :(

عموما احنا اتحرمن الثواب ده بجد

ربنا يبارك فى مجهودكم ويجعله لو جهه خالصا وعقبال المرة اللى جايه

بالنسبة لمقابلة اجتماعية للتعارف بين المدونين احم.....والله كنت اكتر واحد متشجع للقاءات دى بس بجد بلاش
ده رايى


فى امان الله
وربنا يعينك على عمل الخير دايما ياااارب

(احمد سكر ) said...

ورق النعناع اللى دختى منه

ا قوووزيه هههههههه


الا صح

هو مين البطيخ ؟؟

وبعدين هتشهرى بينا على النت

خلينا كاتمين فى قلوبنا اننا منااايفه

كفايه اللى بنشوفه ف الشغل

شمس النهار said...

طبعا انا بعتذر عن الغياب
بس الحقيقه كان في ظروف والحمد لله عدت علي خير
ان شاء الله هدور علي الدواء
ربنا يكرمك انت واللي معاكي يارب

قوس قزح said...

سومة

هههههههه
فكر يا كورومبو وانا مستنيك
و انا كان على ماما هاتيها معاكى انا نفسى اشوفها بصراحة
علشان اشوف انتى واخدة منها خفة الدم ولا الهدوء اللى مغلف العفرتة
.
.
تصدقى مخدتش بالى من حكاية الديكور دى

Anonymous said...

كل سنة وانتوا طيبين يا استاذة داليا
الهرم كله اكيد كان منور بيكوا

t.w

dreem said...

داليا هانم
ماهو انتى ما يتقالكيش الا كده
طبعا الشكر مش هيوفيكى حقك ابدا
الخلاصة يعنى انتى ست جميلة ربنا يسعدك ويجزيكى كل خير
وانا هجرى معاك انا والبنات انتى بس قولى امتى لاننا فعلا سعدنا باللقاء ولو ان الحظ ما اسعفنيش انى اجى المستشفى معاكم .. لعن الله الثانوية الغارقة يا اوختشى

الـسـيـدة نـون said...

انا هاجرى معاكى يا دودو

انا موافقة حددى يوم

وبلغينا
بس يكون غير يوم الخميس والجمعة والسبت اللى جايين

انا مش هاكون فاضية فيهم اطلاقا

ممكن يوم الخميس او الجمعة بعد الفطار
لكن السبت ده صعب
وانتى عارفة صعب ليه
علشان التجمع الرباعى اللى قلتلك عليه انا عايزاه يبقى يوم السبت


وانا عايزة اقترح نفس المكان
بس خايفة اتضرب من البت ابى

انا عايزة اروح تسباس تانى
سيبك انتى من تاخير الاكل ولغبطة الحساب

لكن انا ما زلت مقتنعة بالمكان وبنضافته وبمستوى الاكل والاسعار



سلام
اختك خيخة

Ahmad Hossny said...

أنا جديد على مجتمع المدونين

كنت بكتب مدونات .. بس مع نفسي

أعجبت جداً بالفكرة و كان نفسي أشارك فيها .. بس بصراحة كنت فاكر إنه كلام في الهوا و مش حيتحقق

و لمما شفت النتايج الحلوة و الأخبار الجميلة كان نفسي أنضم إليكم .. بس قدر الله و ما شاء فعل

عموماً أنا مع فكرة تجمع للتعارف و أتمنى إني أشارك بس خلوها في أخر 10 أيام من رمضان عشان أكون موجود

أحمد حسني
qasaqis.blogspot.com

أحــوال الهـوي said...

طبت و طاب ممشاك و تبواءت من الجنة منزلا

قريت و سمعت عن اليوم اللي كله خير و مدي المجهود اللي حضرتك عملتيه انت و فتيما و خالد همس الاحباب و باقي الناس العظام من المدونين

جعله الله في ميزان حسناتكم جميعا

تحياتي

قوس قزح said...

احمد سكر


معلش كنت شرقت فى سنه دى علشان كده كحيت فيها شوية :)

و بعدين انت قلت فى اكتر من مكان

زى ايه ؟؟

العدد مبدايا ممكن يكون 15

و متنساش النعناع :)

قوس قزح said...

فاروق عادل

كفاية انك حاولت يا فاروق و صدقنى بدام نيتك انك تيجى و تشارك يبقى اكيد ربنا هيجزيك خير ان شاء الله

و ان شاء الله اللقاء التانى يكون بعد الفطار و سهل انك تيجى

فاتيما said...

انا معاكو يا دودى
يلا بقى
بس خليكوا حنينين على الغلابة و النبى و بلاش تنقوا مكان غالى
الله يكرمكم ..إستنى يا دودى
ما مشوها نادى المهندسن المرة دى
عشان نركب الباخرة
الواد عسقول قالى مش هحرمك منها
و هركبك النوبة الجاية
بس هاتولى خيخة من زمارة رقابتها اخنقها عشان متقولش تسيباس دا تااااانى

قوس قزح said...

سامح عزت

انا سعيدة بحضورك
و على فكرة انت حظك حلو انك فى بداية دخولك للتدوين اتعرفت على ناس جميلة كده زى اللى كانوا موجودين

ان شاء الله دايما تكون متواجد معنا

هو تسيباس مش واسع ؟؟؟

انت اصلك مش شوفت ابو خالد بتاع السنة اللى فاتت هههههههههه

قوس قزح said...

سومة
انتى قولتى سر خطيررررر

احمد سكر منوووووفى يا جدعااان
يا نهارى

و انتى كمان ؟؟؟

ده كده الواحد يخاف على كتافه بقى منكم
وش مطلع لسانه

قوس قزح said...

طبيبك الخاص


ياااااه
حمدلله على السلامة

ربنا معاك يارب وتتخرج بتقدير امتياز ان شاء الله

كل سنة و انت طيب و بخير

الطائر الحزين said...

جزاكم الله خيرا
تقبل الله منكم وجعل عملكم خالصا لوجهه

بالنسبة للدواء
(سائل زى كده الميه المقطرة اللى بتنضاف على المضاد الحيوى )

لما سألت قال انه اما يكون بخاخة او امبول

Mina said...

اولا اعتذار ايه اللي بتتكلمي عنه
انت مش من حقك اصلا تعتذري عن اي حاجة
المجهود اللي عملتوه طول النهار سواء انت او خالد او خيخة يستاهل مليون شكر من كل الناس ليكم وربنا يكرمكم يارب ويعوض تعبكم بالخير
وكمان وقت الفطار كنتي بتخدموا علينا وكاننا ضيوف عندكم
بجد بجد كان يوم اكتر من رائع
ربنا يكرم كل الناس اللي كانوا قائمين علي اليوم ده
والناس اللي بتشتكي من الخدمة في تسيباس ماشافوش العدد كان قد ايه
كتر خير الناس ولازم في العدد الكبير ده تحصل لخبطة في الحساب لان كل واحد بيطلب حاجة مختلفة عن التاني وكل شوية بتنزل مشروبات والناس بتنسي اخدت ايه
كتر خيركم كلكم القائمين علي اليوم والمدونين والمساهمين واللي حضروا واللي ماحضروش

قوس قزح said...

جمعاوى

كل سنة و انت طيب

وو معنديش غير رد واحد عليك

جرب تانى .. مش هتندم :)

قوس قزح said...

شمس النهار

انا قلت اكيد بردو اللى خالاكى مجتيش حاجة مش بمزاجك
لانى شوفت حماسك بعينى للحضور

جزاكى الله خير على مشاركتك و اهتمامك

قوس قزح said...

Anonymous

كل سنة و انت طيب و بخير

بس انت مين ؟

قوس قزح said...

dreem

انتى اللى هانم و ست الهوانم كمان
و بنوتاتك زى القمر ما شاء الله

ان شاء الله هظبط اليوم و ابلغك
لانك من الناس اللى يهمنى يكونوا موجودين

قوس قزح said...

بت خيخة و اى كلام

يا حبيبتى احنا لو دخلنا تسيباس تانى هيطردونا بره

ده انا متاكدة ان مدير المحل و احنا ماشين كسر ورانا زير و دعا علينا كمان

يعنى انسى تسيباس ده خاااااااالص

هنشوف اقتراحات الناس و نختار منهم مكان

قوس قزح said...

Ahmad Hossny

اهلا و سهلا بك فى عالم التدوين
و يمكن لو قريت البوستات القديمة كنت عرفت انه مش كلام فى الهوا :)
ان شاء الله تتعوض
و اول ما نحدد الزمان و المكان هنعلن فى كل المدونات المشاركة

قوس قزح said...

احوال الهوى

فاتك اليوم ده يا استاذ عصام
بس ان شاء الله تتعوض مرة تانية

جزاك الله خير على كلماتك المشجعة

قوس قزح said...

فاتيما

ايه حكاية الباخرة دى ؟
يعنى القاعدة هتكون فيها ولا ايه ؟
احكى لى التفاصيل على الايميل

و كلامك خالى يجى فى بالى مكان حلو و شيك و رخيص
هو نادى القوات البحرية
و على النيل بردو و احلى من نادى المهندسين
بس اما نشوف موضوع الباخرة دى

قوس قزح said...

الطائر الحزين

لا انا شوفت العبوة الفاضية بنفسى مع الام
و كانت زى الميه المقطرة
انا هنزل الصورة بتاعها يمكن تفيدك
و يارب تلاقيه

قوس قزح said...

Mamamino

جزاكى الله كل خير على كلامك ده
و يارب يكون الكل اخد الموضوع بالتفهم ده
نورتنى بزيارتك الاولى :)

... amr said...

أولا

مفيش اعتذار , عشان اللي حصل كان غصب عنكوا و كلنا مقدرين وقفتكوا و المعافرة اللي عافرتوها مع المدير - المهيس -

ثانيا

بالنسبة ليا , لا شكر على واجب يا فندم


ثالثا


بيني و بينك , موافق على موضوع نادي القوات البحرية دة

كدة أحسن من ان احنا نروح تسيباس , أصلهم اذا شافونا تاني مش هيدخلونا
:)

كل سنة و انتي طيبة

صبرني يارب said...

أنا أنا انا موافقه وعايزه تجمع تاني

لو ممكن تعملوا تجمل كل يوم عشان اعرف اقفشكم فى يوم من الايام

عااااااااااااااا


وربنا يجازيكم كل خير يا دولي انتم كلكم ناس محترمين فعلا

والدوا حاضر هاسألك عليه واعمله اعلان عندي

الطائر الحزين said...

ياريت لو ينفع نتأكد من اسم الدواء ونشوف ان كان امبول أو مضاد حيوى أو ما شابة
ولو ينفع الاتصال يبقى كويس

(احمد سكر ) said...

داليا

الباخره اللى بتتكلم عليها فاتيما

دى مركب بتاخد الناس تلف بيهم فى النيل نص ساعه لفه يعنى

كانو بينوهم عنها واحنا فى النادى اخر مره

انما مش فيها الفطار

انا حاليا ان شاء الله هضبط ليكم مكان كويس

وزى ماقلت يكون فيه حفله بعد الفطار

تحياتى

فاتيما said...

سكر اخد الكلام من على طرف لسانى
دى مركب لطيفة كدا بتاخدنا لفة فى النيل ييجى ساعة
النادى اللى بتقولى عليه كويس
اى حاجة تبع الجيش تبقى كويسة
بس انا مش هاجى على الفطار عشان كرياكو اتخرب بيته و باع المحل باناس اللى بتشترى
انا هجيلكم بعد الفطار علطول
هتابع التفاصيل بقى
انا بعت لإيهاب نمرة الاساتذ خالد عشان يبقى يكلمه
إفتح إيميلك يا طائرى الحزين و إنتا تلاقى نمرة الموبايل ...
بت يا سوما اللهى ما انحرم نمك
انا اعظم عظمات الستات ...هانى رمزى هيطبق فى زمارة رقابتى
لأ ...نديله رقبة خيخة اللى عاوزة تروح تسيباس تانى دى
عمرو بيتكلم صح ..لو روحنا تانى هيطلبولنا البوليس
و الله الفازة مطلعتشى وحشة ..و الصور كلها حلوة
و بتعتذرى عن إيه صحيح هوه انتى مسئولة عن اى حاجة من اللى حصلت دى يعنى ؟؟
على فكرة دى بقت ذكريات لطيفة نفعد نتندر بيها و نضحك عليها
القصد بقى
بحبكم قوى يا عيااااااااال

حنين القلب said...

ربنا يتقبل منك يا ملاك التدوين
بجد يا داليا انا فخورة بيكم جدا
ربنا يقبل منكم ويجعل كل لحظه فى اليوم ده فى ميزان حسناتكم

وربنا يقدرك دايما على الخير

كل سنه وانتى الى الله وطاعته اقرب
بوسيلى نور جوز بنتى

همس الاحباب said...

جزاكى الله خير
على مجهودك وفكرتك وتعبك طبعا
وربنا يجعله فى ميزان حسناتك
الحمد لله اليوم كان ممتع جدا
والاقبال بسم الله ما شاءالله
اما بالنسبة لليوم ممكن نادى المهندسين
او القوات البحرية
الموقع جميل والاسعار معقولة
والقعدة لطيفة
ممكن نفطر هناك واللى مش عايز يفطر ممكن يجى بعد الفطار
رسم الدخول 10 جم
والاسعار للوجبات معقولة
ممكن اسالك عنها
ونحدد يوم قبل رمضان ما يخلص ان شاء الله
كل سنة وانتم بخير

ستيتة said...

حابة اشكرك بشكل شخصي لأني تعبتك وربنا يتقبله منك
وسعيدة جدا ان اليوم كان حلو وتقلتوا موازين الحسنات ويارب دايما متجمعين في الخير
اتشرفت بمقابلتك
وان شاء الله اتشرف بمعرفتكم كلكم في يوم قريب بإذن الله

تحياتي

ahmed_k said...

جزاكم الله كل خير يا داليا
وجعله الله في ميزان حسناتكم
فعلا مجهودكم شيئ مشرف لكل مدون مصري
بل لكل المصريين
ربنا يبارك فيكم

Maryama Qandil said...

ربنا يجاازيكي كل خير يا داليااا على العمل في اليوم ده واستاذ خالد وعل كل حد شاارك فيه فعلاً

كل ما افتكر اليوم نفسه بحس بالفرحة ذاتها ياارب متقلش ولا تستخبى

بالنسبة للدواء بقى هكلم دلوقتي حد بيشتغل في ميدكل ريب لشركات الادوية وهسئل عليه واقولك التفاصيل ,,,:)

بالنسبة لليوم القادم,,, اهم حااجة يتحدد الميعاد بتاع اليوم وانا معاكوا ان شاء الله
وهل يا ترى هيكون يوم سادة كده مفهوش حبشتكنات,,,:)

هسئل على الدواء وهااجي ارد

Maryama Qandil said...

pulmicort,,,

داليا هو الدواء ده للحكة والمشاكل التنفسية بس فيه كورتيزون كتير
؟؟؟
انا سالت حد وقالتلي تقريبا موجود وهترد الاكيد بكره ان شاء الله
لو موجود هبلغك على التليفون ويبقى كل خير ان شاء الله

ابو على said...

ههههههه
كده تنسينى
طب دنا دافع تلاته جنيه ونص بقشيش
طب انا عايزهم بقى

لاسع افندى said...

كل سنه والجميع بخير






تحيه لاسعه

Anonymous said...

داليا
الدوا اللي بتسالي عليه كام مللجرام؟؟

قوليلي علشان اعرف أسالك
انا من البحث فهمت انه لحد عنده ازما
هستني ردك علشان اعرف ادور صح

قوس قزح said...

معلش هرد على اللى سالوا على الدوا
هو فعلا دوا لمشاكل فى الرئة
و هو
Pulmicort - 0.5mg/ml

قوس قزح said...

amr

تسيباس تانى .. انسى يا عمرووووو :)

الناس هناك ممكن تجرى ورانا بالحلل هههههههههه

خالينا فى القوات البحرية على الاقل اخرها هيرمونا فى الميه :)

كل سنة و انت طيب

قوس قزح said...

صبرنى يارب

يا سلام يا سلام يا سلاااام

قال يعنى انتى حضرتى الاولانى و عايزة التاني
اسمعى بقى
انتى لازم تعملى وقفة احتجاجية
و تطالبى فيها باللجوء التدوينى للقاهرة

قوس قزح said...

الطائر الحزين

الدوا مش امبول و لا اقراص
الدوا سائل فى عبوة ورقية مش ازاز كمان
و هو دوا للرئة
هحط صورة الدوا على المدونة
ربنا يجزيك خير
و ده رقمى لو تحب تسال على حاجة
0117742287

الـسـيـدة نـون said...

طب انا عندى اقتراح


احنا نروح ابو خالد

نيهاهاهاهاهاهاهاهاهاهاهاهاهاهاهاهاهاهاهاهاهاهاهاع


وش واحدة مطلعة لسانها

وبتضحك ضحكة شيطانية بلهاء

الـسـيـدة نـون said...

هو ايه موضوع الدوا؟
نشتريه يعنى؟
ولا نعلن عنه بس ولا نعمل ايه ؟
واللى عايزه عايز كام علبة منه؟
هو الدوا ده بتاع ايه؟

قوس قزح said...

خيخة

ابو خالد ؟؟

ممكن بقى تبطلى اقتراحات يا خوخة و تكتفى بهذا القدر ؟

هى القوات البحرية
زى اسماعيل يس
و هنشتغل هناك بورلوم


الدوا موجود فلوسه
بس مش لاقينه فى اى حتة
يعنى اللى يقولنا الدوا فى الحتة الفلانية هنروح نشتريه على طول

ساعد نسرين الايمن said...

قوس قزح

ربنا يجزيك خير علي كل الخير اللي بتعمليه
بحاول اسال ليك ع الدواء بجد
ربنا يسهل
وكل سنة وكل الناس طيبة

أم بتول said...

المفروض أن أحنا الى نقدم لكم الشكر على كل شيئ عملتوه و تعبتوا فيه ، و انتم اصحاب الفضل فى اليوم ده ، و ربنا يجعله فى ميزان حسناتكم إن شاء الله ، بالنسبة للقاء للأسف أنا ها كون سافرت للعمرة و إن شاء الله ها رجع على العيد ، علشان كدة أقول لكم كلكم كل سنة و انتم طيبين بمناسبة العيد مقدما ، و ياريت يكون فى لقاء تانى بعد العيد لأنى بجد نفسى اقعد معاكم و أتعرف عليكم أكتر ،
أشوفكم على خير يارب

أم بتول said...

على فكرة صحيح أنا ها أخد اسم الدواء و أدور علية فى السعودية و إن شاء الله إلاقية و اجيب لكم منه علبتين كفاية ؟؟؟

أم بتول said...

ياريت لو تقولى لى الدوا دة اقراص وكام وحدة علشان اعرف أسأل صح و إن شاء الله ربنا يوفقنى و أقدر أجيبه

!!! عارفة ... مش عارف ليه said...

كل الشكر لك يا داليا على اليوم الجميل ده

وجزاكي الله عنا خير
على مجهودك الرائع وإن شاء الله في ميزان حسناتك أنت وخالد

وربنا يبارك لكم وإن شاء الله دايما على طريق الخير ماشيين

وبصراحه مفيش حاجة تستدعي الإعتذار ولا حاجة لان اليوم بشكل عام كان منظم ورائع والتنظيم ده بيدل على إن في جهد كبير كان مبذول للتحضير له

وحقيقي إنت تستهلي التهنئة على نجاح اليوم وربنا ويفقك للخير دايماً

وبالنسبة للدوا سألت هنا وعرفت انه تقريباً منتج لشركة مش بتنزله من مدة علشان كده نادر اووي وإن شاء الله احتمال النهاردة يجيلي رد عليه إذا كان ممكن ولا لأ وربنا يقدم اللي فيه الخير ويشفي الجميع يا رب

وعن رغبة البعض إن يكون في تجمع تاني في رمضان

يارررررررررريت

وإن شاء الله لو حصل هكون معاكم بإذن الله
وفي ملاحظة مش عارف ممكن تكون ممكنة ولا لأ وهي إن لو اليوم يناسب أحمد القاضي ياريت يكون معانا فيه
وعموما الفكرة جميلة وعلشان لو حصلت بإذن الله ياريت نبقى ناخد صورة جماعية للذكرى تشملنا كلنا كل المدونين أكيد هتسعد ناس كتير زي ما هتسعدني

وشكراً جزيلاً على كل اللي عملتيه ليا ولغيري


وليد

NIDAAL .R said...

بسم الله الرحمن الرحيم

الاجابة أ و ب و ج

انا نفسي في لقاء تانى الصراحة وياريت يكون فطار

واسف انى جيت بعد ما الليلة خلصت بس غصب عني و الله

ميرا ( وومن ) said...

انا من ساعه البوست ما نزل مش عارفة اعلق

دودو ينوبك فيا ثواب شوفيلي حد ياخد الكمبيوتر بتاعي ويبدله ب
اي حاجة حتي لو علبة صلصة موافقة

انا موافقة علي يوم فطار بس الأحتمال الأكبر اني اجي بعج الفطار

معنديش مشكلة في اي حتة انا أجيلكم حتي لو في الواق الواق
إن شاء الله

قوس قزح said...

احمد سكر و فاتيما

انا كنت فاكرة انها باخرة ممكن نفطر فيها
اعتقد نادى القوات البحرية فيه باخرة فيها مطعم كمان
وفيه اماكن على النيل ممكن نقعد فيها

خالد ان شاء الله هيسال فيه
و يقولنا على اسعاره

قوس قزح said...

حنين القلب

ربنا يخليكى يا حنين
مفيش مرة نعمل خير الا و لازم تكلمينا و تطمنى على مسار اليوم
جزاكى الله خير
و نور مستنى اهو يرد البوسة بنفسه
بس مش لكى لبنوتك ( وش بيغمز )

Maryama Qandil said...

الحمد لله على توفر الدواا
ربنا يقدرك وتبقي في الخير على طوول كده يا دالياا
:)

بالنسبة لليوم صحيح,,, منتظرة التفاصيل بس يااريت يكون التجمع شاامل الافطار عشان الترااويح بث لا اكثر
:D

تسلمي,,,

قوس قزح said...

همس الاحباب

جزاك الله خير يا خالد
و الله انت كمان تعبت اوى معايا المرة دى
معلش يا خالودة
بس انت ادها
و اثبت بجدارة انك تقدر تشيل يوم زى ده لوحدك
كمل جميلك بقى و اسال لنا فى القوات البحرية

كيكى عوووووو said...

جندى مجهول دالياالشوال...
يعنى انتى طلع عينك واحمرت واخضرت وبرضة عايزة تعملى يوم تانى نتعرف فى ع بعض يعنى المرة الجايه ندى ارقام بعض والعنواين وكدة ولا ايه؟؟ مش واخدة بالى0000 بتعتذرى ع ايه ان شاااااااااااء الله دة احنا الى نعتذرك انتى وخالد ع الى حصلكم دة انتوا كان المفروض تاخدو حق الخدمة منهم اصلاااا دة يعنى شكل تسيباس ليشع دة مشغلين الراجل تسيباس وابنه بس؟؟!!!
ولو فى لقاء تانى بجد يا داليا هزعل هنروح الاقتراحات الى اقتراحتها قبل كدة اتفقنا خلاص
اة اتفقنا

يا مراكبي said...

تحية من القلب ليكي ولكل من شارك معاكي في العمل الجميل ده .. منتهى الإيجابية وإنكار الذات

ربنا يجازيكي إنتي والجميع خير إن شاء الله على المجهود الرائع ده

قوس قزح said...

ستيته حسب الله الحمش

و النبى ده كلام ؟ كده بردو متجيش
انا كان نفسى اشوفك و اتعرف عليكى من كلام فاتيما عنك
بس تتعوض ان شاء الله
حاولى تيجى يوم الاحد بقى

adel said...

انا هو عادل :):)

سؤال نونو
هو ايه حكاية يوم الحد بعد الفطار دي
:(:(
انا مش عارف لسه حاجة
-----

اليوم بجد كان رائع
جيت متاخر معلش
عملوها الوحوش

عمرو said...

بارك الله فيكى يا قوس قزح أنتى و كل من شارك فى العمل الخيرى اللى أدخل البهجه على قلبى أنا شخصيا فما بالك باللى حقيقى أستفادوا من تعاون الكل بغرض اٍعادهم ؟؟
ربنا يجعل جهودكم فى ميزان حسناتكمو يجازيكم خير الجزاء ..
تقبلى تحياتى و تقديرى ..

نور الدين (محمد الجيزاوى) said...

اهلا داليا
................
بجد مش عارف ااقولكم ايه على اليوم الاكثر من رائع
ازعم انى قضيت يوما من اروع ايام حياتى لا سيما وقد كان فى صحبة لا نظير لها مع افراد كرام مثلكم
وحقا جزاك الله خيرا انت وخالد همس الاحباب على مجهودكم العظيم وسائر القائمين على العمل
....
أما عن فكرة لقاء اخر فدة هيكون شيء هايل وانا شخصيا ارحب به وسأشارك فيه ان شاء الله
اعمق تحياتى
................
نورالدين محمود

!!! عارفة ... مش عارف ليه said...

الحمد لله إن حد لقى الدوا
وربنا يوفق الجميع للخير دايماً

وبالنسبة للموضوع الدوا ده لو لا قدر الله بقى غير متوفر الفترة الجاية هو في بديل له وبنفس التأثير وبنفس نسبة المادة الفعالة وأسمه
clenil
وده الاسم التجاري الجديد لنفس المنتج بنفس التركيبة

Diyaa' said...

الحمد لله إن الدوا جه..وربنا يجازيكي كل خير وكل الناس اللي كانت موجودة واللي شاركت :)

وموضوع الإعتذار ده كرم منك ليس إلا لأنك بكل الجهد والإهتمام والنية الخالصة لوجه الله متستاهليش غير الشكر :)

والحمد لله إنك كنتي إنتي وغيرك من الناس الجميلة من أسباب خروج الطفلة من المستشفي وعقبال الباقيين :)

i'm proud of u :)

Anonymous said...

مبروك على زواج النحلة من الدبور