Tuesday, November 17, 2009

لقاء الخير

تحديث بالتفصيل

يوم البؤجة هو 11 ديسمبر

معادنا من الساعة 11 الصبح حتى الساعة 2
10 و نص بتوقيت فاتيما :)

مكان اللقاء هو مسجد زهراء مصر القديمة فى الزهراء
و بعد كده هنتحرك للمقر الجديدة للجمعية و هو قريب جدا من المسجد

دى خريطة لمحطة مترو الانفاق اللى اسمها الزهراء و لونها بالازرق اما اللون الاحمر فهو لمكان المسجد
و ده سهل اوى للناس اللى هتستخدم المترو



فى حالة ان حد تاه ممكن يتصل على الارقام دى

الاستاذ خالد صاحب مدونة همس الاحباب
0101345140




و ياريت كل مدون يقدر ينزل بوست عن الموضوع يبقى جزاه الله خير علشان نبلغ اكبر عدد ممكن

..



كتير كتبوا عن يوم المنصورة و يمكن كان مفروض انا كمان اكتب عنه علشان تعيشوا معنا حالة الفرحة و السعادة و الخير اللى اتجمعنا عليهم
انا نفسى كنت متوقعة من الحالة دى انى اقدر اكتب عن اليوم بس مش عارفة ليه مش قادرة ، باحس ان من كتر اللى جوه الواحد هو مش عارف يقول ايه
هقول انطباعات سريعة عن اليوم
المنصورة محسيتش فيها انى بعيد عن القاهرة .. كأنى ماشية فى شوارع القاهرة عادى جدا.. بس النيل عندهم احلى
طبعا كان نفسى نروح مكان فيه وز و بط و حقول
خضرا مش لان المنصورة اقاليم و لازم تبقى كده بس قلت ممكن صبرنى يا رب تكون عاملة لنا مفاجاة و تاخدنا فى قرية من القرى اللى تبع المنصورة
بس مع كده كان يوم جميل و روح الود بين الناس كانت واضحة جدا بالرغم من انهم اول مرة يتقابلوا
فعلا التدوين غريب فى الحكاية دى بيخلى الواحد يتعامل مع اى حد مدون فى الواقع كانه واحد من عيلته حتى لو كان مش بيدخل عنده ولا شاف البلوج بتاعه .. يعنى فى مجموعة كبيرة من الحاضرين انا كنت اول مرة اسمع عن اسماء البلوجز بتاعتهم و مع كده كأنهم اصحابى و بنتعامل كأننا نعرف بعض من زمان

الناس اللى حضروا ك
لهم ناس جميلة

كنت سعيدة انى شوفت رحيل وحبتها اوى ,, اد ايه البنوتة دى روحها جميلة
و كمان ليساندرا.. بنوتة واضح ان لها شخصية مميزة و فيها رزانة و حياء نحب نشوفهم فى بنات مصر كلهم
عجبنى اوى حضور مامت اميرة من كوكب مهجور و مامت بنوتة مش عايزة تكبر لان ده معناه كبير اوى يا جماعة
ان فى امهات عارفين ازاى يكونوا قريبين من بناتهم و يكونوا اصحاب لهم و فى نفس الوقت غير متشددين و خلاص بدون فهم و بيشاركوا بناتهم اهتمامتهم و ده مهم اوى
.. لان دى الطريقة الوحيدة دلوقتى علشان نحافظ على بناتنا ..و البنتين ما شاء الله عليهم ربنا يحفظهم
فكرونى ببنوتات فضفضة على السريع الامورات زى مامتهم ربنا يخليهم لبعض

الولاد كلهم محتاجين تغذية مش عارفة ليه مع ان السمن البلدى متوفرة فى الدقلهية كلها

ساسو و سول و عاشقة و غليانة و الشعب لابد له حكومة و كل البنوتات الموجودين يومها روحهم حلوة اوى و حبوبين و مفيش حد منهم الا لما شارك فى كل حاجة على اد ما يقدر

صبرنى يارب ..اكتملت صداقتى بها لما شوفتها و زعلت فى نفس الوقت لان على اد ما الواحد قرب من الناس دى اوى على اد ما هيكون البعد عنهم صعب ..لان للاسف مش بيقدروا يتواجدوا فى كل لقاء بسبب ظروف الحياة و السفر

المهم يعنى انا كنت فرحانة اوى
و الصحبة اللى كانت معايا وقت رحلة السفر من اقرب الناس لقلبى و كأنى مسافرة مع اخواتى .. بس كنت مفتقدة وجود ناس معينة متعودة دايما يكونوا معنا ..

اوحش حاجت
ين بقى فى اليوم
كان خبر حادثة احمد سكر ..ربنا يشفيه يارب و يعوضه عن عربيته خير ..الانسان ده فعلا خدوم و محترم و نعم الاخ و انا قلت له قبل كده انه من الناس اللى مش لازم اوجه لها دعوة فى اى لقاء او تجمع لانه من الناس اللى تدعو الناس معايا .. و دى حقيقة فى ناس فعلا باحس اننا واحد انهم واقفين معايا على نفس الناحية من الدنيا و بنمشى سوا فى نفس الاتجاه

تانى حاجة الرجوع من المنصورة كان وحش جدا جدا جدا .. السواق بتاع البيجو عنده 19 سنة يا جماعة ..يعنى لسه من بتوع البلاى استيشن اللى فاكر نفسه فى نيد فور اسبيد ..ماله السوبر جيب !!!


المهم انا ليه باكتب دلوقتى عن يوم المنصورة ؟
علشان اقولكم و اقولهم الدور عليكم يا حلوووووووووين

علشان تشرفونا يوم البؤجة

و اللى هيكون يوم 11 ديسمبر ان شاء الله
و ده هيكون فى نفس الوقت عيد ميلاد آبى هانم بتنجانى
و عيد ميلاد الاستاذ احمد كمال صاحب مدونة رحايا العمر


و اللى هيسال ايه البؤجة دى .. هقوله روح هنا و انت تعرف
http://kouskoza7.blogspot.com/2008/08/blog-post_12.html

افتكروا و انتم بتقروا بوست البؤجة ان البرد مش بيرحم حد و ممكن يكون سبب فى وفاة طفل صغير مش لاقى غطا كفاية له
فى الوقت اللى عندنا فيه حاجات كتير اوى مش بنحتاجها و بتقول لنفسنا خاليها مركونة يمكن نحتاج لها
صدقونى اللى بيتبرع بحاجة ربنا بيعوضه عنها بحاجات اكتر
و التبرع ممكن يكون بأى شىء عينى او مادى


اقولكم على حاجة
انا بكره الغربة علشان بتبعد الناس عن بعض
و باكره عدم الامان اللى بيكون جوانا للناس المجهولة عنا فبيخلي بعض الناس متقدرش تشارك معنا فى الواقع او تكتفى بالمشاركة فى اللقاء الحريمى بس


يلا روحوا بقى دوروا عندكم ايه تتبرعوا به

72 comments:

شفـقــة و إحســــان said...

ايه يا قمر الكلمتين الاخرنين الجمال دول واللهى كلك رقة وخير بجد يا داليا
ربنا يجازيكى خير يارب
وان شاء هاجى يوم البؤجة
وحشتينى

فاتيما said...

حنونة كعادتك
و مميزة فى وصفك
لأى شىء يا دوللى
و متفقة معاكى جدااااااا
فى حكاية الناس اللى بتوحشنا
و اسباب الغياب او البعاد
يمكن دا سبب تالت اصيل
لحضورى اغلب التجمعات
اول سبب
انى بحبكم بجد
و من قلبى و بتوحشونى فعلا
و تانى سبب
انى عاوزة اكون انسانة نافعة و بعمل حاجة لغيرى قبل نفسى
و تالت حاجة
انى بحس بينكم بأمان مبحسوش تقريباً مع حد تانى
و لا عندى استعدادا تقريباً
إنى أحسه مع حد تانى غيركم ....
علم و ينفذ
يا وش الخير كله
و يوم 11 لو ربنا مد فى عمرى
هتلاقينى من اوائل الحاضرين
إن شاء الله
دايما ربنا يوقفك
و يسخرك لعمل الصالح
و يقعد للعيال يا رب
أكيد
اومال انا عاوزة اناسبك ليه ؟
مش لله يعنى !!
بوسة و حضونة يا حبيبتى

Aиgel said...


مساء الخير يا قمري

ولا وش الخير زي ما كل أحبابك بيقولولك (:

وحشتيني يا دودو
ربنا يا رب يجازيكم كل خير يارب ويعينكم على فعل الخير
بجد فعلاً عمل حلو أوي بجد
ويارب دايماً متجمعين في الخير

وتبقوا دايماً أغلى الحبايب زي البوست اللي فات (:

دمتِ بخير يا دودو

Angel love

Aиgel said...


وكل سنة وآبي طيبة مقدماً

(:

دموع كابر said...

ربنا يقدركم دايما على فعل الخير

فاتيما said...

يووووووه نسيت اقول
كل سنة و آبى بألف خير
قوام عدت سنة ...معقول!!!
و حاجة تانية
إيه؟
امممممم
آه ..النيولوك حلو مبروك عليكى
انا بحب اللون الاخضر و الزتونى بدرجاته
فنانة يا قوس قزح
مش محتاجة اقولها يعنى
بوسة و حضونة يا وش الخير

بوبو said...

فعلا زي ما قالت فاتيما.. حنونة كعادتك.. انا خلاص اخدت عنك الانطباع دا ومش هتنازل عنه.. الحنية وطيبة القلب
ليا كام سؤال كدة لاني اول مرة هحضر بؤجة الخير:
ينفع هدوم تخص الواد عمر ابني فيما قبل عمره الحالي وهو سنتين؟ يعني هتكون هدوم بيبي
الحاجة التاني: التبرعات تكون لبس وفلوس بس؟ يعني لو محتاجين اكل وشرب والذي منه ادونا خبر برضه.. ولا الفلوس احسن؟
عموما اعملوا حسابي انا باذن الله تعالى هاجي سواء مع سي كينج توت وسي عمر اوز من غيرهم
بوسة يا قمر ليكي وللكتاكيت اللي سرقنا الشوكلاتة بتاعتهم

Asmaa mahaba said...

هاااااااااااااااااااتى بوسه انا جايه يوم 6 تتاتاااا يا رب ماما ترضى
تخلينى انزل معاكم يا رب
مش سامعه امين
قولى امين
ييييييييييييييييييييييه انتى نمتى ولا ايه يا حماتى:))

Asmaa mahaba said...

السنه دى مش زى كل سنه يعنى انا مش موجوده حكون على جبل عرفه ان شاء الله فى الحج حقترح اقترح على اللى عاوز يكسب ثواب
فى ايتام ودور للمسنين محدش بيعيد على الناس دى يا دودو وبيفرحوا قوى لو حد افتكرهم بمجرد كل سنه وانتوا طيبين
لو حد يكسب ثواب فى يوم عرفه وياخد نفسه يزور كم ملجأ ولا اتنين حيجازيه ربنا كل خير
فى جمعيه اسمها جمعيه الورشه فى الزمالك هى لو عاوزين العنوان بالظبط اجيبهولكم هى كل سنه قبل كل عيد بينزلوا دور مسنين وملاجىء اللى عوز يشارك ومش حيعرف يروح لوحده وعاوز يبقى فى مجموعه يقولى
انا حاطه قائمه بالجمعيات فى جروب سفينه نوح ع الفيس بوك وحنزل باذن الله قائمه بالملاجىء وعناوينها للى حابب يروح
والاهم من الملاجىء بصراحه هى دور المسنين الناس دى محدش بيفتكرها خالص يبقى كفايه عليهم حضن حنين

عاشقه الرومانسيه said...

ان شاء الله يكون يوم جميل ومفيد
وربنا يجعله فى ميزان حسناتكم
وانا من الناس اللى ينطبق عليها موضوع السفر والبعد
علشان كده مش هقدر اشوفكم
كان نفسى قوى اكون معاكم
كل سنه وابى بخير وطيبه
اهى طلعت قوس زيى
(:

Lyssandra said...

داليا
متشكرة جداً لكلامك الطيّب عني :)

سعيدة إنه كان انطباعك
:)

بالنسبة ليوم البؤجة
باتمني طبعاً لو أقدر آجي
لكن مش عارفة ظروفي وقتها
هايسعدني جداً لو أقدر أقدم شئ بسيط في يوم زي ده

تحياتي :)

Lyssa

صبرني يارب said...

دووووووووولي يا حياتي

يارب يارب يارب اعرف اجي

لعلمك انا مجهزه الهدوم

واقول يا اجي معاكم لو ما عرفتش اوديها اي جمعيه هنا

انتى جدعه يا دولي

Cute Kitty **sookra said...

دودو
حبيبتى
ازيك وعاملين ايه الكتاكيت الصغيرين
طبعا ياستى اديكى تاخدى ثواب وكمان تاخديلك اجازه منهم
ههههههههههههه
ربنا يسهل واقدر اجى

أم بتول said...

ربنا يجعل كل أيامك خير ، أن شاء الله معاكم ، و ربنا يتقبل منك كل عمل قدمتيه أو بتساعدى فيه ، فعلا وش الخير

ميرا ( وومن ) said...

يا نيو لوكاتك يا دودو

جامد قوي النيو لوك دة

وكل سنة وآبي طيبة وبخير وإن شاء الله ربنا يكتبلنا نصيب وأبقي معاكم اليوم ده

اقصوصه said...

الله يجزاكم حسب نياتكم يا رب

ameen said...

صراحه كلامك جميل جدا جدا جداا


بس انا ذكرياتى مع المنصوره مش بحب افتكرها

حسبى الله ونعم الوكيل


عموما انتى انسانه غايتك نبيله جدا


وربنا يوفقك يارب
وازاى نقدر نساعدك

mahasen saber said...

اكيد لازم يكون يوم جميل لان اليى فيه اجمل ولانه فى الخير

يا رب دايما متجمعيين فى كل خير يا اجمل مدونيين المعموره

بس قلقتينى يا داليا وزعلتينى على احمد تخيلى لسه عارفه منك
لا حول ولاا قوة الا بالله
ربنا يعوضه خير

الـسـيـدة نـون said...

اللى انا اعرفه ان بتنجانة هانم
عيد ميلادها 12 ديسمبر
مش 11 ديسمبر

انتوا هتلغبطونا ليه بقى ؟


ما تتاكدوا الاول من عيد ميلاد البتنجان
قبل ما تكتبوا تواريخ غلط وتكبروا بتنجانتنا يوم على الفاضى


هو انا ينفع أجي و اخلى نيتى خالصة لعيد ميلاد البتنجان

اصل انا بصراحة ماليش مزاج اشارك فى العمل الخيرى

انا عايزة اخرج من بيتي بنية عيد ميلاد بتنجانتي



كل بؤجة وانتي طيبة يا دودو
وكل سنة وبتنجانتنا طيبة

واشوفكم على خير ان شاء الله


سلام
اختك خيخة

الـسـيـدة نـون said...

ايه الاحراج ده

بتحطوا نفسكم فى مواقف بايخاااااااااااااااااا

اهوا طلع عيد ميلاد البتنجانة يوم 11 ديسمبر فعلا

وشكلى بقى زبالة
وعملت فيها البت الفت النت الست اللى ذاكرتى قوية

وطلعت خيييييييييييييخة
كما عودتكم



اذن وجب الاعتذار عن التعليق اللى فوق ده علطول


سلام

اختك خيخة

Anonymous said...

مهزلة مصرية جزائرية بقلم عبد البارى عطوان

تحتل اربع دول عربية المراتب الاولى على قائمة الدول الأكثر فسادا في العالم، اضافة الى افغانستان، حسب منظمة الشفافية الدولية، ولكن لم يخطر في بالنا مطلقا، ان تستخدم انظمتنا الرياضة من اجل تحويل الانظار عن فسادها ودكتاتوريتها القمعية، وبذر بذور الكراهية بين ابناء الأمة الواحدة، مثلما شاهدنا في الايام العشرة السوداء الاخيرة، التي بدأت وانتهت بمباراتي فريقي مصر والجزائر، في تصفيات نهائي كأس العالم الصيف المقبل في جنوب افريقيا.

نحن امام حرب حقيقية، وعمليات تجييش اعلامي ودبلوماسي لم يسبق لها مثيل، وكل هذا من اجل الفوز في مباراة كرة قدم بين فريقي دولتين وشعبين شقيقين، من المفترض ان الفائز من بينهما سيمثل العرب جميعا في هذه المسابقة الكروية الدولية.

عندما قرأت انباء عقد الرئيس حسني مبارك اجتماعا طارئا لاركان دولته، ابتداء من مجلس الوزراء ومرورا بقائد جهاز المخابرات، وانتهاء برئيس هيئة اركان الجيش المصري، تبادر الى ذهني ان مصر على ابواب مواجهة مصيرية مع اعداء الأمة والعقيدة......

باقى المقال فى صفحة الحوادث بالرابط التالى

www.ouregypt.us

قوس قزح said...

شفقة و احسان
المرة دى لو مش جيتى بزعلة بجد
علشان انتى بقالك كتير مش بتشاركى معنا
و اعملى حسابك هاعمل لك امتحان لغات
و اشوف الغياب ده جيه بفايدة ولا لا

:)
نورتينى و سلامى لاحسان بك

قوس قزح said...

فاتيما

انتى اللى كلامك احن منه مفيش
عازفة اوتار القلوب
انتى كمان بتوحشينا يا طمطم
و اى لقاء من غيرك مالوش طعم الحنان ابدا
هستناكى و اخد البوسة و الحضن اللى بجد :)

قوس قزح said...

angel

و انتى طيبة و بخير يارب
و ان شاء الله تقدرى مرة تيجى و تشاركى معنا
لانك من الناس اللى احب اشوفها

جزاكى الله خير على دعاء و تشجيعك

قوس قزح said...

دموع كابر

جزاكى الله خير
و يارب تكونى احسن و من غير دموع :)

قوس قزح said...

فاتيما
و انتى طيبة يا جميل
و دايما متجمعين على الخير و الحب

و اتفضلى يا طمطم مش يغلى عليكى
بس انتى ما شاء الله بلوجك من البلوجات المميزة

انتى اللى فنانة بجد :)

قوس قزح said...

BoBo
يا هلاااااااا
نورتنى باول زيارة بجد
انا كنت سعيدة اوى بوجودكم معنا
و كنت سعيدة اكتر بوجود عمر
اما عن التبرعات فممكن اى شىء
حتى لو مش ملابس
ممكن ادوات منزلية
بطانية
مفرش
فوط
اجهزة كهربائية
اى حاجة

ان شاء الله يكون يوم جميل و تشرفينا بحضورك
و بوسة لعمر كبيرة لحد ما اشوفه :)

قوس قزح said...

سومة

مفيش حاجة اسمها ماما مش توافق
ماما مش توافق هاجى انزلك من بيتكم غصب و اقتدار

يعنى مش معقول السفر ده كله و فى الاخر مش تيجى

هاتى مامتك معاكى


اما عن الجمعيات و الدور اللى بتتكلمى عنهم
ابعتى و انا انزلهم مع البوست
يمكن حد يحب فعلا يزورهم

و ادعى لمصر كلها يا سومة فى الحج
ان ربنا مش يحوج ناسها لحد
و يكون قلبنا على قلب بعض
ادعى يا سومة ان الخير اللى بنعمله يكون نواة حاجة كبيرة و يبقى كل واحد قادر من نفسه بيساعد الفقير

ترجعى بالسلامة حبيبتى و حج مبرور ان شاء الرحمن

قوس قزح said...

عاشقة الرومانسية
تبدلى ؟
انا موافقة على البعد لو انا فى اسكندرية
لكن كده باحقد عليكم


ان شاء الله فى يوم من الايام تقدرى تشاركى معنا
محدش عارف بكرة ظروفه ايه يمكن تشاركى و تجيبى معاكى اولادك كمان :)

قوس قزح said...

Lyssandra

انتى تستاهلى اكتر من كده كمان خصوصا بعد ما عرفت انك صاحبة هوايات جااااااااامذة جدااااااااا

و يارب يارب تقدرى تيجى
هتكون فرصة الناس تتعرف على بنوتة شخصيتها جميلة زيك

قوس قزح said...

صبرنى يارب

اووووووعوا
محدش يمسكنى
اصل الرد على التعليق ده خناقة


نعععععععععععااااااااام ؟
يمكن تقدرى تيجى ؟؟؟؟؟؟
لا لا لا
انسى يا ماما
انتى هتيجى غصب عنك
انا باقولك اهو
اتصرفى
شوفى اى حل
ان شاء تهددى جوزك بالاكياس بتاعت البؤجة انها لو راحت هتتحول لاكياس لغرض تااااانى
هو هيفهم و يسيبك فورا .. و يمكن للابد ههههههههههههه

اسمعى
نتكلم جد بقى
لازم تيجى
اتصرفى

هستناكى

قوس قزح said...

sookra

ازيك انتى يا قمر
انا بخير و الكتاكيت الحمدلله بيكاكو و عفاريت
و تصدقى اه
يوم الخير ده رغم انه مرهق
لكن ارحم بكتيررررر من شقاوة الكتاكيت و نكشهم :)

قوس قزح said...

ام بتول
طبعا يشرفنى حضورك و مشاركتك جدااا
بس المرة دى لازم نقعد مع بعض اكتر لان المرة اللى فاتت ملحقتش اقعد معاكى
و الله انتم كمان وشوش خير ..كفاية انكم مش بتتاخروا عن فعل الخير ابدا
يارب دايما يجمعنا الخير

Anonymous said...

من جلب الصحرا اه والله
ازيك ايه الاخبار
ربنا يوفقكم ويعينكم ان شاء الله
تحياتى يا فندم
ونتقابل فى بؤجه تانيه ان شاء الله

بسمه عبدالباسط said...

إن شاء الله أحاول أكون موجودة اليوم ده ولو مقدرتش هبعت الحاجات بأى طريقة

Anonymous said...

كل عام وانت بخير وصحه وسعاده انتى والاسره الكريمه وكل احبائك
وبالراحه على الخروف المسكين

Anonymous said...

كل عام وانتم بخير
عبد الجليل

Tamer Nabil Moussa said...

ازيك قوس قزح اخبارك اية

كل سنة وانتى طيبة

عيد سعيد عليكى وعلى اسرتك الكريمة

مع خالص تحياتى

ابو على said...

كل سنه وانتى طيبه
رشاد وخيرى وبدوى

فاتيما said...

كل سنة و إنتى
وش الخير
الذى يشع
نوراً
و دفئاً
و حبا
و خيراً لا ينقطع
كل سنة و إنتى
بتنشرى ألوان السما السابعة بكل ما فيها من بهجة و فرحة و عطاء
كل سنة و إنتى
و احمد و العيال
بألف خير يا حبيبتى
يا قلب و عقل و جدعنة الدنيااااااا

يا مراكبي said...

دايما قائده لقوافل الخير .. ربنا يباركلك

وكل سنة وإنتي طيبة وبخير وصحة وسعادة

قوس قزح said...

وومن

اتفضلى يا قطتى
ميغلاش عليكى

و طبعا ان شاء الله هتكونى معنا

كل سنة وانتى طيبة

قوس قزح said...

اقصوصة

جزانا و اياكم .. شكرا لمرورك

قوس قزح said...

AMEEN
هو عموما المكان مالوش ذنب بالاحداث اللى فيه
و يمكن يبقى لك ذكريات حلوة فى يوم من الايام فيه ان شاء الله

اما عن كيفية المساعدة هى بجمع اى شىء فى بيتك انت مش محتاجه و بتحضر معنا اليوم و ينسلمه منطقة اسطبل عنتر

شكرا لزيارتك الاولى

قوس قزح said...

Mahasen saber

كان نفسى تكونى معنا يومها
و الله كنت هتتبسطى جداااا
انا قضيت يوم جميل
يارب تقدرى تيجى البؤجة
علشان انتى بقيتى وحشة و مش بتيجى
و انا زعلانة منك

قوس قزح said...

بنت خيخة و اى كلام

ههههههههههههه معلش يا خوخة
تعيشى و تاخدى غيرها
انا عموما كنت جايبة الخبر من المسئولين شخصيا
علشان الذاكرة عندى ضايعة انتى عارفة

المهم انتى اخبارك ايه ؟
كل سنة وانتى طيبة

قوس قزح said...

رحلة بحث

اكيد الصحرا نورت بوجودك فيها يا محمد
و همتك بقى يا بطل تخليها خضرا
و متسالش ازاى ولا تقولى انه مش تخصصك ههههههه
اتصرف عايزنها تبقى خضراااا
لما ترجع ان شاء الله لازم تيجى زيارة قاهرية لنا

Anonymous said...

الله يسهلك

قوس قزح said...

bos bos
كل سنة وانتى طيبة
و ان شاء الله تقدرى تنورينا

قوس قزح said...

قيس بن الملوووووح

و انت طيب و بخير يارب
نورتنى بجد بزيارتك
انا سعيدة بها جدا :)

قوس قزح said...

رحلة بحث

ايه ده زيارتين فى بوست واحد ؟؟
لا لا ده تقدم ملحوظ
واضح ان الصحرا هتخليك تتابع البلوجز
كل سنة وانت طيب و بخير دايما

ahmed_k said...

بإذن الله بإذن الله بإذن الله أقدر آجي وأشارك معاكم في اليوم ده
ربنا يبارك فيكم على مجهوداتكم الجميله والمتتابعه دي

فاتيما said...

سلامتك مل البرد
يا وش الخير كله
ألف سلامة يا حبيبتى

بعبعه said...

تحياتي ليكى وربنا يجعله فى ميزان حسناتك ان شاء الله انتى وكل المدونين النشطين الحلوين دول

ربنا يخليكم لبعض

اتمنى تشرفينى بالزياره وتجاوبي على استطلاع الراي الى عندي

متشكره اوي

فاتيما said...

يا وش الخير
اولااااا
اخبار الصحة إيه
و البرد راح و لا لسه؟
سلامتك ألف سلامة يا حبيبتى
ثانياًاااا
وحشتينى قوى و نفسى أشوفك جدا
و دا ينقلنا لثالثاًاااا
و هى إن
الجماهير تنادى و بتقولك
البؤجة ف معادها زى ما هوه
و مكانها المعتاد و لاّ حصل تغيرات؟!!
عشان اكتب بوست عندى
اصيح
و اسيح
و اشرد
و كل المصطلحات اللى من شانها تلم الناس إن شاء الله
فى اليوم الحلو دا على حسك
و حس آبى الجميلة
هاه
أفيدونا دام فضلكم

فاتيما said...

يوه
نسيت البوسة و الحضونة
مش ماشية غير لما اسيبهمولك

همس الاحباب said...

كل سنة وانتى طيبة
والف سلامة عليكى
الحال من بعضه
انا من العيد وانا بودع
بس الحمدلله
نشوفك على خير يوم البؤجة
تحياتى

Ahmed Kamal said...

تخيلي أنا ماشفتش البوست ده إلا دلوقت لما فاتيما قالت عليه؟

كل بؤجة و انت طيبة ، و ربنا يتقبل و يجعله في ميزان حسناتك ، مش متخيل إن سنة عدت على مفاجأة تورتة السنة اللي فاتت :)))

ياريت تكوني اتفقت مع غادة كمان تكون موجودة علشان تحكي آخر نشاطات الجمعية ، و ربنا يكرم و يكون التجمع أكتر من كل المرات اللي فاتت

خالص تحياتي لك و جزاك الله خيرا

P A S H A said...

السلام عليكم ورحمة الله وبركاته

- أولاً : جزاكم الله كل خير ووضع هذا العمل الانساني النبيل في ميزان حسناتكم.

- ثانياً : أنا بجد بجد فخور بعملكم ده واتمنى أشارك معاكم - ولو بمجهودي – وكان نفسي أحضر معاكم لقاء المنصورة بس قدر الله وما شاء كان والحمد لله إنكم قررتم تعملوا الموضوع ده عندنا ، عندنا فين وأنا مين وأقدر أساعدكم إزاي That’s The Question !!
- أنا يا ستي "شريف" أو P A S H A صاحب مدونة "هجايص" سابقاً ومش ده المهم دلوقت، الأهم إن أنا ساكن في "دار السلام" وهي المحطة اللي بعد محطة "الزهراء" على طول ، وبيني وبين المسجد تقريباً 15 دقيقة مشي !
- ثالثاً : أنا تحت أمركم في أي استفسار أو معلومة سواء عن المكان أوالمواصلات بخلاف المترو أو الأماكن القريبة منه ، عرفوني بس خطة عمل اليوم إزاي وأنا إن شاء الله هاحاول أساعدكم على قد ما أقدر ، والله المستعان
- بالنسبة للمشاركين من خارج القاهرة نصيحة مهمة جداً .... المترو ثم المترو ثم المترو لإن دي منطقتنا وأنا عارفها ههههههه ، يعني اللي هاييجي زراعي ينزل محطة كلية الزراعة – قبل موقف عبود – ويركب المترو ويغير الإتجاه في محطة أنور السادات (التحرير) ويركب اتجاه حلوان ويعد على صوابعه 4 محطات وينزل في الخامسة "الزهراء" وهايخرج من المحطة ويمشي يمين تحت كوبري "الزهراء" زي ما هو واضح في الخريطة ، اللي جوه القاهرة بقى إممممم يركب أي أتوبيس أو ميني باص رايح "أثر النبي" وهاينزل برضه محطة مترو "الزهراء" هايلاقي المحطة قدامه هايعدي بس يا دوب السلم العلوي وينزل يمين ويكمل – على فكرة بتاع العصير اللي قدام المحطة مش حلو ما حدش يشرب عنده – أما بقى اللي جاي من الجيزة يركب ميكروباصات "دار السلام - الكوبري" - ده لو لقاها – مش "مطبعة كورنيش" !! من عند بنك القاهرة في "ميدان الجيزة" ،، أو من "السيدة زينب" برضه ميكروباصات "دار السلام – الكوبري " واللي معاه عربيه ويحب ييجي "دائري" طبعا هاينزل نزلة "الزهراء" ويلف من ع الكورنيش ويطلع كوبري "الزهراء" ده لو جي من "مدينة نصر" أما القادم من "أكتوبر" أو "الهرم" ينزل نزله "المعادي" التانيه ويلف من عند البنزينه يمين هايلاقي الكوبري في وشه واللي جاي من "وسط البلد" يمسك الكورنيش على طول لحد ما يلاقي " قسم شرطة مصر القديمة" على الشمال ويبدأ يهدي وعند البنزينه اللي عند الإشارة هايعدي يلاقي الكوبري في وشه وم الآخر هو المترو !! وعلى فكرة اسمها "زهراء مصر القديمة " مش "زهراء المعادي" ولا "زهراء عين شمس" واللي ينسى يقول "الزهراء" اللي قبل "دار السلام" !!

P A S H A said...

- بالنسبة للأماكن القريبة اللي ممكن يتقعد فيها ونقول إنها محترمة وقريبة وكويسه ورخيصة ،، ده ســؤال وجيه !! الفكرة بس إن المكان محكوم بالمترو والتحرك منه بالمواصلات صعب شويه ،، عموما ً نبدأ بالأقرب :
1- نادي المحامين النهري اللي على كورنيش "المعادي" وده أقرب مكان – ممكن نغلس ونكلم حد يقعدنا في المطعم اللي تحت – المسافة تقريباً مشي ربع ساعة . الدخول فيه مع محامي وببلاش – ما لكوش دعوة أنا هابقى ألم جنيه من كل واحد وأدخلكم على الأقل نجيب حق الكارنية ههههههههه

2- فيه كازينو في "المعادي" أمام مستشفى القوات المسلحة في قلب النيل – رسم الدخول بخمسة جنية - ما روحتوش بس أسمع أنه كويس – هاسأل لكم عليه برضه.

3 – حالياً ما فيش في ذهني مكان محدد ،، بس برضه معرفة عدد المشاركين – ولو تقريبياً – بتخللي الواحد يقدر يحدد المكان ،، وكمان برنامج اليوم هايكون إزاي !!

وصدقوني طالماً في الخير هاتلاقوا إن شاء الله ربنا مييسرها وهايبقى يوم زي العسل ، وكفايه تشريفكم لينا بجد ،، هاتنورونا ،، ربنا يبارك فيكم يا رب.


ده الإيميل بتاعي لأي استفسار : sherifpasha78@yahoo.com

ويا ريت حد من اللي منظمين اليوم يتواصل معايا عشان أقدر أنسق معاه .
والسلام عليكم ورحمة الله وبركاته
أخيكم
P A S H A

حنين said...

السلام عليكم
جزاكى خيراانا اول مره اجى مدونتك وسعيده ان اشوف خير بيتجمع عليه المدونين وانا اتمنى ان اكون معاكم بس عندى بنوته وولد صغيرين يارب اشوهم زى داليا ويارب تشوفى زيهم بس ما يعطلوكيش زيى وتكملى دايما فعل الخير ربنا معاكم ويوفقكم

أ / أحمد عبد المنعم said...

بسم الله الرحمن الرحيم

الأخت الفاضلة: قوس قزح

كل عام وأنتم بخير

لم أزر مدونتك من فترةوقد جئت اليوم لأرى خيرا وفيرا تساعدون فى نشره
أخبرتنى نهر الحب بهذا اليوم
وأتنمى من الله أن أستطيع الحضور

قوس قزح said...

ahmed-k
ان شاء الله تقدر تيجى
بس انت اخلص النية لله و ربنا هيسهل لك الخير ان شاء

قوس قزح said...

فاتيما
الله يسلمك ياطمطم
انا احسن الحمدلله
ربنا يخليكى لى

قوس قزح said...

بعبعه
جزاك الله خير على تشجيعك

انا فعلا بحاول اتابع مدونتك على اد ما اقدر لانها مختلفة بجراتها عن باقى المدونات
بس بالمسبة للاستفتاء انا شايفة ان اغلب الاجابات هتكون مكررة
قليل اوى لو فى اختلاف و اعتقد دول هم اللى مفروض يجابوا عليه
نورتينى بزيارتك

قوس قزح said...

فاتيما

انت كمان وحشتنى اوى و الله
بس بيصبرنى كلامك فى بوستاتك
و تعليقاتك
بتحسسينى انك بتخدينا فى حضنك
ربنا يخليكى لنا

ان شاء الله انا نزلت التحديث المطلوب اهو
و اعتقد انك الحمدلله شوفيته
معلش اسفة على االتاخير

عاشقة القمر said...

دايما بقول لنفسي ياريت بو كنت في مصر حضر تجمع بس ربنا مشارادة انو حضر معاكم تجمعوا بارغم قعدت ثلاث شهور مش حصلت شي
اهقول لكم ربنا يجعلها في ميزان حسناتكم
ربنا يقدركم علي عمل الخير

قوس قزح said...

همس الاحباب

كل سنة وانت بخير و طيب و اخ كريم دايما
و الف سلامة عليك انت كمان
و ان شاء الله نتقابل على خير

قوس قزح said...

احمد كمال
كل سنة و انت طيبة يا احمد
و عقبال 100000 سنة

اه انا اتفقت مع غادة و ان شاء الله هنروح للمقر الجديد بتاع الجمعية نتفرج عليه

يارب تقدر انت كمان تشارك معنا حتى لو بحضورك و كلامك مع الناس

momken said...

صدق رسول الله
( الخير فى امتى الى يوم الدين)


جزاكم الله خيرا وكفاكم شرا
وجعل جزائكم من جنس اعمالكم


تحياتى

Dr. Ibrahim said...

الله جيتى عندنا المنصورة مش تقولى كنا فرشنا الارض ورد :)

همس الاحساس said...

ربنا معاكى
بسى للاسف متزعليش مقدرش اروح بسبب درستى
بسى هدعى ليكم