Thursday, January 7, 2010

جحا و الحذر و البرود


كلنا عارفين قصة جحا و ابنه و حماره وانه مقدرش يرضى الناس ابدا مهما عمل وعن نفسى اعتقد انه قتل ابنه وقتل الحمار و انتحر فى الاخر علشان يرضى الناس


المهم يعنى انا اكتشفت ان اغلب البنات واقفين موقف جحا ده


بس مع مشاعرهم ..يعنى هى لما تحب مفروض تعمل ايه ؟ تحبس مشاعرها جواها و تفضل قدام حبيبها البنت الخجولة اللى مشاعرها سر جواها ولا تعيش مشاعرها معاه بطبيعتها و تقوله على احساسها البرىء به


طيب لو فضلت ماسكة مشاعرها و مش بتعبر عنها .. الولد هنا مش هيشوفها باردة ولا انها شايفة انه عريس لقطة و مفيش مشاعر ولا حاجة.. و لا مفروض يلجا لحل الفوازير لما تجيب له هدية ولا تهتم به و يصبر نفسه ان ده كله بدافع الحب مش بتجيب رجله ؟ طيب و هى هنا تعمل ايه فى المشاعر اللى جواها و عايزة تقولها له .. تقعد تسمع فى اغانى و تتخيل بقى و لا ايه ؟


فيها ايه لما البنت تقول اه بحب ..هى مشاعر الحب عيب ؟؟ طيب لو هى عيب ليه كل راجل بيكون نفسه يسمعها من حبيبته ..مش مفروض انك بتحبها ليه تخليها تقول كلام عيب ؟.. ما تصبر لحد ما تتجوزا و تبقى تقوله و انت و حظك بقى .. طيب افرضوا لما جات تقول الكلام ده جوزها محسهاش و حس انها بتقوله بس علشان ترضيه لانه مش متعود منها على اظاهر مشاعرها




و ان كان فى ولاد سافلين و بتستغل مشاعر البنات و بتعلب بها ده مش غلطة البنات انها اتعلقت بهم ..لان للاسف الولاد من النوعية دى بتعرف فنون التلاعب بالمشاعر كويسة اوى و خبرة.. و ممكن تكون البنت مش كده حتى لو اخدت حذرها منه بيكون هو عنده صبر اكتر منها و عارف امتى هى هتفتح حصون مشاعرها له و هنا مش كلامى عن حاجة وحشة تحصل انا بس باتكلم عن المشاعر عن كلام زى باحبك وحشتنى و مش عارفة اعيش من غيرك.. انا مش عارفة ليه بنحكم على البنت انها لما تحب وتعترف بده انها بنت مش كويسة ..هى المشاعر دى بايد الواحد ..لما انت تقابل واحد و تحس نفسك مش طايقه تستغرب نفسك و تشوف نفسك غلط ولا بتقول وقتها دى حاجة لله فى لله .. يعنى ايه لله فى لله ؟؟ يعنى اشمعنى انت لما حسيت بكده رجعتها للروحانيات و لما البنات تحسها نرجعها للاخلاق ؟؟؟ ليه وصلنا بناتنا انها تكون مرعوبة و خايفة تظهر مشاعرها حتى وسط صاحبتها تتكسف تقول انا باحب فلان ..حد يفهمنى هو الحب عييب ..ولا هو حلال للولاد و البنات لا .. طيب لو هو عيب ليه كلنا بنجرى نرد بمشاعرنا على بوستات فيها حالة حب من بنت او ولد ..ليه مش بنقول دى بنت مش كويسة بلاش نزورها ؟؟ ..ليه احنا مش عايزين نتغير من ايام جحا و حماره و مالينا التناقض ..حد يقولى انه مش حب ولا اتحب ولا انه مش نفسه فى ده الا بعد الجواز علشان ادعى عليه يتبهدل فى الحب و مش يعبره اللى بيبحبه الا لما يركب حمار زى جحا و تبقى فضيحته بجلاجيل .. و اللى متجوز اتحداه ان كان فاكر من الخطوبة غير خناقات الجهاز وسرقات الحب الصغيرة اللى بينه و بين شريكه




اخر الكلام اقول لكل بنت اقفى و قولى اه حبيت و مشاعرى حية ترزق و ده مش غلط لانى انسان باحس مش حيطة و مش هاكون معقدة و اخبى مشاعرى جوايا من الناس و يطلع عليا بعد كده ان البنت الشرقية من صغرها متربية على انها تكون باردة


منكم لله تربونا على شىء و نترعب منه طول عمرنا و فى الاخر تقولوا بنات باردة و خايبة و اقولك لكل ولد بيدور على واحدة عمرها ما حبت . اتجوز واحدة من غير مشاعر و مترجعش تقول دى ست باردة و تتهم الختان .. لا هى باردة علشان من صغرها متحذر عليها تطلق العنان لمشاعرها من غير ما حد يفهمها امتى تطلق العنان دى ..ده غير كمان بعد الجواز بيتقال للبنت اوعى لحسن يقول عليكى عندك خبرة ..قال يعنى خلاص متربية فى الضلمة ومش شافت حتى كليب بوسى سمير


و اقول لكل ولد بيلعب بمشاعر البنات .. داين تدان يا كابتن ..فى اختك فى مراتك فى بنتك .. و اخرك غالبا حاجة من اتنين يا تقع فى واحدة اشطر منك و تلبسك العمة ..يا تقع فى واحدة خام لدرجة انك تفتقد المشاعر معها و تكرها و تكره نفسك .. ومتنساش بردو داين تدان






ملحوظة اخيرة فى بوست عن استفتاء المدونات لسنة 2009 عند مدونة بسكوتة و الحمدلله ان اهم اللقاءات التدوينية طلعت كلها لقاءات خيرية

61 comments:

موناليزا said...

لا طبعاالاحساس بالحب لا عيب ولا حرام
ولكن
التعبير عن هذه المشاعر لاى حد هو اللى حرام
حتى لو كان خطيبها لانه لسه برضه رجل غريب عنها
إذا كان ماينفعش أصلا يخرجوا مع بعض لوحدهم فى فترة الخطوبة لانه حرام يبقى ازاى هتعبر له عن مشاعرها
ياريت كل الرجال اللى بيتهموا المرأة بالبرود يفتكروا " من أستعجل شئ قبل آوانه عوقب بحرمانه"وكل بنت تخاف من ربنا قبل ما تقول اى كلمة لحد هو لسه مابقاش زوجها

قوس قزح said...

موناليزا

حبيبتى انا عارفة ان فى الدين ملهاش انها تقعد مع خطيبها الا وسط الاهل
بس انتى شايفة ان العلاقات الموجودة بين الولاد و البنات ماشية على الدين ؟
شايفة اصلا ان حد بيختار شريكه على اساس دينه ؟؟
انا بس باستغرب ان كل شىء بقى عادى الا ان البنت تتكلم عن مشاعرها زى ما يكون فقدت عذريتها يها
انا عندى البنت تعبر عن اللى جواها احسن ما تخدع اللى قدامها بانها عمرها ما عرفت الحب كانه عار عليها
الحب مش حرام ..الطرق اللى بنسلكها فيه هى اللى بتخليه حرام او لا

الآمير أمير شهريار حسن الدين said...

السلام عليكم

احنا فى مجتمع شرقى تربى على عادات وتقاليد قديمة مرتبطة بالبيئة والدين لايمكن الخروج عنها لانها قاعدة اساسية مبنى عليها الاسس اللى بنحاول نخرج منها الان


من حق اكيد البنت تعبر عن مشاعرها بس فى حدود المسموح بيةلان لو تمادت هتكون فى نظر الخطيب او الحبيب انسانة لاتستحق تحمل اسمة

هو دة نظرة الرجل الشرقى وان كان البعض بعيد عنها اعتبر الخارجين شواز عن لقاعدة الاساسية

تحياتى

قوس قزح said...

الامير امير شهريار

اكيد طبعا فى حدود المسموح و كلامى هنا مش انها تفقد حيائها و لكن تعبر عن مشاعرها بطريقة مناسبة
و مش بس لخطيبها لكن احنا كمجتمع شرقى زى ما بتقول بنلاقى قليل اوى لما البنت تفضفض بمشاعرها دى لامها او اهلها عموما
و نلاقى اغلب العلاقات نتيجة الخوف من رد فعل الاهل بتبدا فى السر بهدف التعرف على شخصية الطرف الاخر ..لكن لو الناس تشوف ان لما البنت تعبر عن مشاعرها ده شىء طبيعى هنلاقى البنت بتحكى لاهلها
ده المجتمع الشرقى اللى بتتكلم عليه مش مخليها حتى تعبر عن مشاعرها فى اخد رايها فى الموافقة على العريس المتقدم لها
و طالعوا مثل السكوت علامة الرضا ..سكوت ايه و رضا ايه بس ما هى البنت اصلا مش من حقها تتكلم


تحياتى لك

العيسوى الصغير said...

داين تدان ولو بعد حين


دى دايما فى القصص والمسلسلات

اما فى الحياة فعادلة السماء اكبر من ان تظلم (واحدة) مثلا عشان اخوها ظلم واحدة
طب ايه ذبنها هى البت الاولى



اما الكبت والجواز فدا صحيح تقربيا 90%
هو الحب نفسه مش عيب ولا حرام بس اللى بيحصل تحت اسمه طبعا حرام
عامل زى اللى يقول الرسم مش حرام فيعقد يرسم بنات لبسة الهواء

....................

واحدة مفروسة said...

بصي يا دودو يا اجمل دودو
اولا انا بحبك :))) شوفي قلتلها اهو
بس لو مش قلتها انتى حاساها يعنى مش لازم انطقها
هو ده المغزى
ان البنت لما تحب مش لازم تقول بالكلام لان الكلام سهل، و مع كتره بيفقد مصداقيته.
لكن الاحساس بيكون اقوى، مش لازم تروح للولد و تقوله بحبك،لكن اكيد التصرفات بتبين انها مهتمه بيه
و يعنى لها شيء
ديننا لم يحرم الحب بل بالعكس ده امرنا بالحب
و كل الاديان السماوية تحث على المحبه
بس احنا اللى مش عارفين نوظف المسائل صح

يعنى البنت اللى بتحب ، مش لازم تقول بالكلام
مش لازم مسك الايدي و يحط ايده على كتفها و يمشي بيها على الكورنيش و هيه محجبه، ولا حتى مش محجبه.
لأ قعادة معاها فى وسط الاهل برضه حيحسسه انها بتحبه
و نفس الحكاية بالنسبة للولد فى حال اهتمامه بالبنت بيبان فى التصرفات مش لازم يقولها بحبك
مش لازم الكلام المعسول اللى بيطلع من اغلب الاولاد للبنات علشان يوقعوهم بس و بعد كده يدوروا على غيرها و غيرها

الحب شيء جميل يا داليا و كبت المشاعر بيخنق ساعات
بس الست بطبيعة الحال مشاعرها جياشة متدفقة
مش لازم تسيب لها العنان ،و من هنا كان دور الاهل اللى بيبقا زي الفرامل
لان البنت لو شافت ولد و حبته و قالتله بحبك و بموت فيك
و بعدين اتخانقوا و سابوا بعضو بعدين قابلت غيره و قالتله بحبك بموت فيك و بعدين اتخانقوا و سابو بعض

ده بقا اللى بيولد برود فى المشاعر
لكن او خنقت نفسها شوية و سيطرت على مشاعرها شوية
لما تتجوز عمرهاما حتكون بارده
بل بالعكس
و سبحان الله بجد زيها زي الصيام
انتى لو صايمة عن الاكل و حارمة نفسك
لما تيجي تاكلى بقا لو اكلتى لقمه مرشوش عليها دقه حتحسي بطعمها شهد
عرفت افهمك يا داليا ولا فرستك؟؟؟؟
انا مع الاعتدال فى المشاعر و الاعتدال فى اظهارها
لأن ده هو اللى بيولد البرود بانواعه
تحياتي ليكي

!!! عارفة ... مش عارف ليه said...

أنا كنت جاي أطمن بس

واشوف ايه الاخبار

هبقى اجي على أخر النهار كده أو الصبح ابص على موضوع

جحا والحذر والبرود .. على رواقة :)

سي يو

قوس قزح said...

العيسوى الصغير

طيب بلاش داين تدان
و نقول يمهل ولا يهمل
و ان ربك لبالمرصاد

يعنى اى انسان بيأذى انسان تانى له جزاءه و ممكن يكون جزاءه فى الدنيا
مش شرط ابدا ان عقابه يكون فى الاخرة بس
و ده علشان يكون عظة لغيره

وطبعا اى حاجة فى الدنيا ممكن يحصل تحت اسمها الحرام و الحلال
المهم اختيارنا احنا

تحياتى لك

قوس قزح said...

مفروسة
انا كمان باحبك اوى و ربنا الاعلم
بس ليه متبقاش قول و فعل ؟
ليه لما الواحدة تقول باحبك ده يقلل منها ؟
و هنا حيرتى
ليه تفضل تلجأ لالعيب و فوازير علشان توصل له رسالة انها بتحبه
مش باقول انها تروح تقوله الاول ولا انها تقولها لاى ولد قالها صباح الخير ..لكن ليه احنا نحب نسمعها و منحبش نقولها ؟؟ ليه لما البنت تحكى عن انها بتحب يبقى عملت عاملة ؟؟ و ليه لما يتقال حب يتفهم مسك ادين و تحسيس و كلام من ده ؟؟ هو مفيش حب راقى ؟

اما عن حكاية لو قالتها كل ما تحسها ده هيعمل لها حالة بردو ..فانا شايفة انها بدام حست بها اصلا يبقى مفيش بردو
و تكرر الحاجة ميقللش من قيمتها الا لو هى روتين مش اكتر
لكن لما تتقال او تتعمل علشان احنا عايزين كده و رغبة منا يبقى عمرها ما هيصيبها البرود
و الا يبقى البرود بعد الجواز طبيعى بقى عند الراجل و الست
و صعب اوى تقارنى المشاعر بالصيام ..لان ببساطة طبيعة البنت انها لو مش بتحب بتعيش الحب فى خيالها و بترسم فارس احلام لها لحد ما تلاقيه ..كلامى مش على حاجة غير المشاعر و التعبير عنها برقى ..يعنى مالهاش علاقة بحرمان او اشباع
انا كمان مع الاعتدال فى المشاعر
يعنى هى مشاعر مش تتقال لاى حد لازم نقولها لما نحسها اوى و يكون اللى قدامنا يستاهلها اوى
لكن مينفعش تتقال عمال على بطال ولا ينفع مش تتقال علشان بس مجتمعنا شايف انها لما تتقال تبقى غلط

نورتنى يا روسة :)

قوس قزح said...

عارفة مش عارف ليه

خد راحتك تماااااااااااما
الموضوع شكله هيطول
ههههههههههههههههههههه

اقصوصه said...

تناولتي في طرحك

موضوع شرقي بحت

بين رغبة ادم

في من تتجاوب معه

وبين سقوط حواء من عينه

حال ان تتجاوب!

قمة التناقض

التي لا تجدها سوى

في شخصياتنا الشرقيه!

abo-omar elmasry said...

عزيزتى قوس قزح: تسمحيلى اكلمك من وجهةنظر الولاد أو الرجالة... فعلا هى من حقها تحب وتعلن للعالم كدة وتعيش لحظة الحب بصدق وسعادة ولكن أعرفك أن أى شاب بيعرف جدا من إهتمام أى واحدة إذا كانت بتفكر فيه واللا لا ولو شايف أنه ممكن تكون فتاة أحلامه أو عنده مشاعر ناحيتها بيبدأ عالطول التصرف والكلام من غير هى حتى ماتفصح بلغة واضحة وكل الولاد عارفين كدة. لكن لو جينا وهى اتكلمت وعبرت وافصحت أعرفك أن أغلب الشباب بيأخذ كلامها مبرر للتمادى فى علاقة هو مش عايزها وأهى تجربة وعدت وماكنش فيه داعى أحرجها وكدة ومليون مبرر منه للتعامل بندالة معها . اسمحيلى مش تتعاملى أن الولد غبى ومحتاج الإفصاح عن مشاعر البنت فى البداية لأنه بيكون واعى جدا ليها من غير كلام ... لكن الوضع يختلف بعد هو مايتكلم ويبدأ الموضوع ساعتها فعلا بقى حقها تحبه وتعلن كدة وتعيش الحياة بدون خوف أو حذر مادام الموضوع بالكلام فقط بدون تمادى فى المشاعر لمستوى أعلى. وشكرا على مواضيعك الشيقة اللى بتفتحيها ونتكلم فيها وفى النهاية ده تبادل خبرات حياتية بنا هنا

قوس قزح said...

اقصوصة

التناقض مش هنا من الراجل الشرقى بس

لكن من المجتمع عموما
و بنشوف ده فى فرحة الام بابنها اللى بدا يحب و ممكن تشجعه كمان و تقابل البنت و تقربها منها
لكن لو بنتها قالت لها كده ممكن تحبسها فى البيت و تمنع عنها التليفون و النت و تقولها متكليمهوش ابداااا الا لما يتقدم رسمى

هى صاحبة ابنها مش بردو لها ام تخاف عليها ؟؟

ليه مشاعر الولد تثبت انه راجل و طبيعى
ومشاعر البنت تثبت انها خلاص عيارها فلت ؟؟

قوس قزح said...

ابو عمر المصرى

حضرتك فسرت كلامى انها تبدا هى بالمصارحة بمشاعرها للولد
و مش ده المقصود
انا باتكلم على مصارحتها بمشاعرها لامها مثلا عادى
و انها بعد الارتباط عادى تقوله كلام جميل بدون تطرف لشىء مش كويس

و مهما كانت الافعال بتبين ان الانسان اللى قدامك بيحبك
الا ان الكلمة نفسها لها جمال خاص
و فى نفس الوقت مش مطلوب تتقال عمال على بطال
تتقال لما تتحس و تتقال للشخص المناسب

Tamer Nabil said...

والله هو من حق البنت تعبر عن نفسها لكن فى حكاية المشاعر والحب اعتقد تكون حريصة وتعرف هتقولها لمين ويتحقها ام لا

مع خالص تحياتى

صيدلانيه طالعه نازله said...

كلامك جميل قوى فى البوست ده يا دودو لانى حاسه انه طالع من جوه قلبك
كلامك صح فعلا معظم شكاوى الرجاله اليومين دول انهم متجوزين ستات بارده بلا مشاعر و لا احاسيس بس و الله ده مش حقيقى بس هو بيبقى خجل اتربينا عليه كلنا و صعب نتخلص منه فى يوم و ليله بس للاسف بيضيع مننا لحظات حلوه كتيييييييييره و مش بينفع نرجعها تانى

راجى said...

موضوع جميل ولكن مثير للجدل والجدل يكون بلا حسم فيما دار حول المصطلحات التى لها عدد من التفسيرات يقدر بعدد سكان كوكب الارض
كما ان هناك خلط ما بين البرود وهو ما اصطلح على انه بخصوص الاستجابة الجنسية للانثى وبين الافصاح عن المشاعر
واخيرا ايوه كده خلينانتمتع بالمناقشات
مع تحياتى

sookra said...

اولا ازيك ياام هنا
عامله ايه
وحشانى بجد
ثانيا
كلامك صح لان لو البنت نطقت اصلا كلمه بعبه ياباب ممكن يبندقها
ههههههههههههههه
شويه جد بقى
صعب اوى وموش عارفه ليه البنت تقول انها بتحب فلان دى تبقه الخطيئه التى لاتغتفر ويسلام بقى لما تتجوز واحد موش بتحبه وتعيش معاه فى تعاسه واهلها يعينى يرجعوا يقولوا ياريتنا كنا جوزناها اللى بتحبه
وفى الموضوع دا كمان فيه تقاليد وموروثات يعنى تسمعى خدى اللى يحبك ولاتاخديش اللى تحبيه
طيب ليه مااخد اللى بحبه عشان حتى اتحمله واقدر اكمل معاه
لو اخدت اللى بيحبنى وانا موش بحبه اولا لاهابقى سعيده ولاهااقدر اسعده وهاتلككله وننفصل وندخل فى متاهات الطلاق والولاد اللى بيضيعوا فى النص
المواضيع كلها متشبكه فى بعضها
طولت عليكى بس كلامك مسنى وعشان كدا اتكلمت ورغيت
ايون انا رغايه
ههههههههههه

يــوم جــديد said...

دودو صاحبة العناوين التي أحبها
جحا والحذر والبرود
مش عارفة جبتي العنوان ده منين

الموضوع ده أنا شايفة إنه بيختلف من أسرة لأسرة
في أسر زي ما بتقولي البنت عندها لو قالت بحب يبقى عيارها فلت
لكن في أسر والحق يقال (وأسر متدينة كمان) لو بنتها قالت بحب كل اللي بيعملوه إنهم بيحرصوا على إن ده يكون في إطار يرضي الله
عشان ما يبقاش لعب
ولو الولد حب يتقال له اخطب ولما تخلص جامعتك وتشتغل اتجوز

صدقيني دا موجود ودا موجود
وأنا شفت من الاتنين نماذج مش قليلة أبدا
وبتفرق كمان في شخصية البنت نفسها
هي بنت مثقفة وواعية ولا ساذجة ويتضحك عليها بكلمتين
في بنات "عبيطة" وفاكرة نفسها ناصحة دي يتخاف عليها جدا من إنها تقول بحب
وفي بنات "عبيطة" وعارفة إنها عبيطة ودي هتخاف من أي تصرف وهتروح تقول لأهلها لأنها عارفة قدر نفسها
وفي بنات متزنين جدا ومش بيدوا مشاعرهم لأي حد لغاية ما يحسوا إنه يستاهل عشان ما يتصدموش
ودول ساعات الرجال بيبعدوا عنهم خوفا من عقلهم

المهم إن تعبير البنت عن مشاعرها بيختلف من أسرة لأسرة ومن شخصية لشخصية لها طبيعة تانية لكن في الآخر يبقى التعبير عن المشاعر متاحا للجميع وإن اختلفت وسائله لطبيعة التنوع البشري

حنين said...

السلام عليكم
بوست جميل ياداليا
احييكى عليه
وانا شايفه ان ممكن البنت تعبر عن حاله حب بحاجات كتير غير الكلام العين بتقول للحبيب قبل ما ينطقها السان والتعبير عن الحب اصدق من مجرد كلمه لان بجد الكلمه دى بعتبرها كلمه مقدسه والمفروض تتقال لما يتم الزواج لانها للزوج بتكون حلال لكن التعبير عن الحب شىء جميل وخصوصا لو بصدق بين الطرفين
انا طولت عليكى اسفه
تحياتى حنين

لجين أبو الدهب said...

الصراحة انا مستغربة شوية

حضرتك لو احتكتى شوية ببنات هذا الجيل

هاتلاقى النقطة دى انتهت تماما

انا الببنت كانت تقف وسط الفصل تقولى تقولى ياميس انا بحب بس مشكلتى مش عارفة اقنه اهلى بيه علشان لسه صغير

كلمة بحب دى زى عايزةاكل عايزة اشرب

يمكن بتتكلم عن جيل معين على البنات

وهى زى ما قلتى الغلط فى التربية

لان التربية الصح ان الام تفهم بنتها ان ياحبيبتى حرام كلام حب لحد غريب عنك الا جوزك بس تقوليلى له كل اللى فى قلبك وتعبر له عن حبك بالكلام

لازم الام تفهم بنته


ومفروض الراجل يفهم برده شوية

ان البنت اول راجل بتتعامل معاه هو

فلازم يكون خجل فى الاول شوية
لانها متعودة كله على جوا نادر لما تطلع حاجة بره

وهو ذكائه انه يخرج كل اللى جواها ويشجعها

معلش طولت ..

دمتِ بخير ..

قوس قزح said...

تامر نبيل

اكيد طبعا يا تامر لازم اى مشاعر تتقال للشخص المناسب
سوا كانت حب او غيره

اشكرك على مرورك

قوس قزح said...

صيدلانية طالعة نازلة
هو فعلا من قلبى لانى باشوف حالات كتير حواليا زى ما تكون تحدى اكتر منها حب
من ان الطبيعى لما يكون اتنين مرتبطين تكون مشاعرهم واضحة للطرف التانى
و مش فاهمة ليه ناس كتير بتشوف ان التعبير عن الحب قلة حياء ..مع ان ممكن التعبير عنه بطريقة راقيه و من غير قلة ادب يعنى
و اما عن الخجل هو مطلوب و جميل فى البنت بس مش ازيد من اللازم لدرجة انه يخنق الطرف التانى

نورتنى يا جميل

قوس قزح said...

راجى باشا

عندك حق طبعا فى ان الجدل ده مش هيخلص
لان المفاهيم كل شوية بتاخد شكل جديد
اما عن البرود هنا مفيش خلط ولا حاجة
و هاقولك ازاى
ترهيب الاهل للبنت انها تعبر عن مشاعرها
و انها لو عملت كده هتكون مش محترمة
و هتتفهم انها ذات خبرة
بيكون نتيجته انها تسكت و متقولش ايه بيضايقها و ايه بيعجبها بعلاقتها بجوزها
و هنا بتيجى على نفسها فى حاجات معينة و بيكون نتيجتها قلة الرغبة و اللى بتتفهم انها برود

و اخيرا مش تتعود على كده دى طفرة ههههههه
تحياتى

كلام عيب said...

للاسف نص حياتنا وقت ضايع فى حاجات فارغه و تافهه
مش عيب ان البنت تقول للى بتحبه كلمه بحبك طالما هو يستاهلها و يستحقها
لكن اضيع وقتى اعيط و انوح و اسمع اغانى نجاه و عبد الحليم لا مينفعش خالص فعلا
البرود فى المشاعر شعور مكتسب بيحصل لنا اما بنبطل نستعمل مشاعرنا و ركناها على جنب لكن لو سيبنا نفسنا و مشاعرنا تعبر عنا حنحس بالدفا فى الحياه و المشاعر و الدنيا حتبقى احلى بكتير

قوس قزح said...

سكرة الجميلة
انتى كمان وحشانى
و ان شاء الله ربنا ييسر و نتقابل تانى

موضوع ان الجواز يكون عن حب ده هاتكلم عنه البوست الجاى
لكن هنا انا باتكلم ان فضفضة البنت بمشاعرها للناس القريبة منها زى امها و اختها و خطيبها لام نتقبلها عادى و مش نشوفها بتقلل من قيمتها كبنت

و يارب ما يكون كلامى ماسك لانه جيه على جرح معين

انا باحب رغيك و بستناه فى اى وقت
تحياتى يا احلى سكرة

قوس قزح said...

يوم جديد

نورررررتنى بزيارتك يا جميلة
انتى فين ؟
بصى يا ستى
طبعا فى امهات فكرها بقى متفتح اكتر من الاول و بقوا يسمعوا لبناتهم و بيحاولوا يكونوا قريبين لهم و اصحاب كمان و يمكن تلاقيهم يشاركوا بناتهم فى قاعدتهم مع صاحبتهم
بس للاسف النسبة دى مش كبيرة زى ما انتى متخيلة
يمكن انتى شايفة انها كتير لان المجتمع اللى حواليكى كده
لكن هو مش كتير صدقنى

و ياريت فعلا كل بنت تكون عارفة امكانيتها ايه و تتعامل على الاساس ه ..و اكيد اللى يناسب واحدة مش يناسب التانية

بس فى وقت معين بتكون البنت مشاعرها لسه صغننة و مش بتستوعب التغير و هنا بتكون محتاجة تعبر عنها لاسرتها و يسمعوها بصدر رحب و يفهومها ..للاسف مجتمعنا نسبة كبيرة منه مفتقدة الحكاية دى

تحياتى لكى

صبرني يارب said...

بصي يا داليا انتى عارفه موقفي من موضوع المشاعر الى من غير خطوبه وجواز

مشاعر اه حلوه وجميله بس تكون قبل الخطوبه بشهرين ولا ثلاثه ماشي
انما نقعد نحب ونسنسن سنين ابسلوتلي نوت

وبرضه حكاية اصل المشاعر مش بايدينا

اه مش بايدنا يعجبنا شخص او ما يعجبناش

انما هاندخل فى حب يبقى بادينا ورجلينا وعقلنا وكل العفشه وحياتك

لو فضلنا احنا عموما ست ولا راجل بنت ولا ولد بنفكر نرضي المجتمع الى اصلا عنده مشاكل بشعه يبقى هانفضل تعساء للابد

وزي ما انتى بتقولي العكاك من دول يعك لما يشبع ويقولك لااااااا انا لما اتجوز هاتجوز واحده تكون خام معرفتش غيري

عندي له نهايتين

يا اما تطلع البنت دي عندها مشاكل نفسيه واجتماعيه و مش بتقدر تحس بالمشاعر ولو حست تكبتها ولو ما كبتتهاش تعبر عنها غلط


ياما تطلع هى خام وسليمه معافاه وتكون انت الاول

بس مش لازم تكون الاخير


اصل وما ربك بظلام للعبيد هانستهبل ولاايه

المجتمع كله بيموت فى البنت الحياه وبعدين يتهمها انها جثه

قطيعه بتعصبوني يا عياااااااااال

وحشاني موت

اه صحيح تعالى اقري القصه الى عندي وعايزه رايك اللوزعي فى الموضوع

لازم اجي اخدك من ايدك يعنى رخااااااامه دي والله

أحمد كمال said...

انتي بتنصحي مين بالضبط يا داليا؟ يا ريت البنات يرجع لهم الحياء زي زمان ، ما هم بيقولوا كل حاجة ، هم ناقصين؟ :)))

أنا رأيي كل حاجة في وقتها كويسة ، و يا ريت الكل يتقي الله قبل الزواج و بعده :)

تحياتي لك و للأسرة الكريمة

!!! عارفة ... مش عارف ليه said...

في البداية اعتذر لإني اتأخرت شوية

إنما على أي حال الحمد لله يمكن تأخيري ده خلاني اشوف وجهات نظر مبتاينة بالرغم من إن معظمها صح .. وصح دي نسبية طبعاً لأن مفيش حد يملك الحقيقة المطلقة

وكل واحد بيشوف جزء من الصورة حسب رؤيته لها

-----------

أتفق إجمالاً مع أحمد كمال في وجهة نظره

لأن البنت مبقتش البنت بتاعة زمان اللي ممكن تبقى واقفة محتاسة مش عارفة تعبر عن اللي جواها

لأن بغض النظر عن التعبير الصررررررريح بكلمة أنا بحبك

في مليون وسيلة تقدر تستخدمها البنت للتعبير عن إحساسها ده

والبنات ماشاء الله مبتغلبش أسلحتها كتير وفتااااكة

ومش قصدي حاجة وحشة ولا حاجة
إنما هناك من الأساليب افتكر كل بنات حوا في غنى عن إني أشرحها لها لأن معظمهن يدركها بالفطرة بالإضافة لهامش الحرية اللي بقت بتتمتع بيه البنات في الأيام دي للتعبير عن تلك المشاعر

نيجي بقى للجزء الآخر
افتكر ان في مشكلة فعلا عند الشباب بالنسبة لتعبير البنت عن حبها

لأن معظمهم ومنقدرش نطلق حكم عام لأن أكيد في بعضهم مستنير وهيستوعب
لحظة إعتراف البنت بحبها له

أما من لم يتسع أفقه لإدراك قيمة لحظة الإعتراف دي أفتكر إنه ممكن يعتبرها صيد ثمين وقع في شراكه وستأتي اللحظة المناسبة ليفتك بفريسته في الوقت الملائم

وهنا لا يؤخذ لوحده على فعلته بقدر ما تلام البنت على إعترافها بحبها لشخص غير جدير بها وإنه ليس ممن يستطيع إدراك قيمة ما في يمينه عندما فضلته هو عن غيره واختصته بإعترافها هذا

رغم كل المحاذير التي تمنعها من ذلك

علشان كده اللوم يوقع على الطرفين

الصياد .. والفريسة

مش عارف حاس إني طولت اوووي وعكيت شوية
إنما على أي حال هي جت كده والسلام

أقعدوا بالعافية

Wanda said...
This comment has been removed by the author.
شمس النهار said...

احساس الحب نفسه مش عيب ولا حرام

لكن له اصول

يعني لو بنت حبت ماينفعش هي اللي تسبق وتقول

وحتي لو المشاعر متبادله لازم التأكد منها انها صح وفي محلها وحب خقيقي
لافيه تجاوز والا صدمات

علشان اغلب الجيل مابيعرفش يفرق بين الحب والاعجاب

وصدقيني عمر ماحاجه هتتغير علشان اللي بتربي الولد ده واحده ست وبدل ماتربيه علي الصح برضه بتربيه علي الغلط
ابسط حاجه التفرقه في التربيه بين الولد والبنت
اغلب الامهات بتنبسط ان ابنها له صديقه ولو بنتها اتكلمت تلات اربع مرات مع ولد تقوم القيامه
حاجات كتير لازم تتغير
عايزه معجزه

البوست جميل جدا عجبني جدا
تسلم ايدك

سلامي

نهر الحب said...

تسلمى يا قوس قزح
على البوست اللى اكثر من هايل
بس يارب يعرفوا ينمو شعورهم بشكل كويس
ويكونو قادرين على الحب والعطاء
تحياتى وحبى
وحشيتنى

Sherif said...

عزيزتى قوس قزح
--------------
بوست مهم جدا وموضوع دقيق

المهم ياسيدتى سؤال .. لماذا اخذت موقف الدفاع الحامى عن المرأة وكأنها مغلوبة على أمرها؟

وفى أى صف سيدتى تريدينى ان اقف ؟ صحيح انه ليس خطأ على الاطلاق ان تعبر البنت عن مشاعرها بما يحلو لها .. وأحلى الاحاديث والقصائد بل وأرقها يأتى من امرأة

لديك سيدتى فيض هادر من المشاعر والاحاسيس الرائعةالمعنى والمبنى تكتبها المرأة .. وهنافى عالم التدوين بضغطة زر وليس بعيدا

ثانيا ليس هناك رجل رشيد او إمرأة -رشيدة أيضا- يعتقدان هناك بنت خام او ولد خام .. ففى ثورة المعلومات وفيها كليب بوسى سمير اصبح كل شئ واضحا معروفا للجميع وهذا تراكم للخبرات تجده ميسرا معروضا بلا معلم ومن هنا فان المدارك اكثر تفتحا

الحقيقة ان الطريق الى المرأة هو دائما قلبها ومشاعرها .. لكن المرأة بطبيعتها تحب ان تحتفظ لنفسها بغموض مثير لم يعلمها اياه احد .. يتفتح ورقة بعد ورقة كوردة مذهلة وفق ارادتها .. ووقتما ترغب هى

هى تحب ذلك ..ولاذنب للرجل فيه

تحياتى

مصطفى ريان said...

انا شخصيا مش شايف اي عيب لما البنت تحب واحد وتقوله انا بحبك بالعكس انا هحترمها جدا وهقدر انها كانت صريحه وعبرت عن مشاعرها
مش عيب ابدا البنت تعبر بالكلام وبالفعل .. هو في حاجه احلى من كلام الحب بين المحبين مايهمش بقي مين اللي يبدأ ولا مين اللي يقول للتانى الاول
بقول لكل بنت لما تحبى حد روحى وقولي له
وماتخفيش ولاتتكسفى مافيش فى الحب لا خوف لا كسوف ولا مين اللي يبدا
وهو لوكان بجد انسان كويس هيقدر ده وهتزيدي انت في عينه مش العكس
لك كل التحيه والود يا داليا

قوس قزح said...

حنين
و عليكم السلام

ميرسى على تحيتك الرقيقة

بصى اكيد تكرر اى حاجة فى الدنيا بيقلل من قيمتها و انا مش بقول ان البنت تبقى راديو تفضل تقول احساسها لحد ما الناس اللى حواليها تطفش منها
و لكن الغرض من البوست ان لما البنت تعبر عن احساسها بالطريقة اللى تريحها هى شخصيا و تختارها ..منجيش نقولها انتى غلطانة ..لا هى حست بحاجة معينة و عبرت عنها بطريقتها و خلاص

تحياتى

قوس قزح said...

لجين ابو الدهب

تصدقى ان البوست ده نتيجة احتكاكى بالجيل الجديد
و الحياء لسه موجودة عند بنات كتير و ده مش غلط
الغلط ان الكل يلوم على البنت لو فشل ارتباط منها علشان اثناءه عبرت عن احساسها

البنات الصغيرة مش عارفة تروح بمشاعرها فين و اغلب المجتمع عامل حالة كبت على مشاعرها
دايما نلاقى البنت تفضفض لصاحبة فى سنها
و يكون اختيارها لامها اخر اختيار

و بعدين فين الراجل اللى بيقدر خجل زوجته فى اول الجواز ؟
يعنى البنات بتصرخ فى الفصول باحبه يا ميس .. و الراجل هيقدر ؟

الاعتدال كويس

نورتنى بزيارتك الكريمة

قوس قزح said...

كلام عيب

البرود مش بيجى من الركنة
الركنة هنا بتحافظ على المشاعر لحد ما حد يحركها
البرود بيجى من الخوف من رد الفعل فبيحصل تقبل لوضع او لحالة غير مرغوب فيها
و هنا يظهر الرضا ده برود

قوس قزح said...

صبرنى يارب عليكى

يا صبرنى هو فى حد دلوقتى بيتجوز من غير ما يعرف اللى هيتجوزها ؟
الا لو زى فيلم جاى فى السريع

خالينا واقعين و نعرف ان الخطوبة تلات شهور ولا شهرين بتكون بس فى جواز الصالونات اللى كتير بيلجأوا له بس لما البنت سنها يكبر وفرصها تقل
لكن اغلب الجوازات بتكون عن طريقة معرفة الدارسة او الشغل او الجيرة
انا باتكلم على المعرفة دى
و مش بقول البنت تصرح بحبها الاول
لكن لو حست انها بتحب و قالت مش نعلق لها المشانق
خصوصا لو الانسان اللى بتحبه انسان مناسب

يعنى هو مى لازم تتجوز اسر
و كمان لازم تكون مش قالت له حاسة بايه ناحيته ؟
يعنى الواد يعرف منين ان حبيبها و مش مجرد عريس لقطة ؟


سيبى ايدى بقى
يا ساااااااتر

قوس قزح said...

احمد كمال

تعليقك ده يا احمد دليل على ان المجتمع مش متقبل ان البنت تقول مشاعرها و انها لما تقول يبقى كده المجتمع ضايع

انا مش بانصح البنات انهم يتخلصوا من حياءهم
لللاسف اغلب الناس فهمت كده
انا بانصح اننا نتعلم نسمع احاسيسهم
عدم سماعنا لهم هو اللى خالاهم كده
ما بين حالات كبت و حالات فجور
الصنف المعتدل ده بقى شاحح فى السوق يا احمد

و يارب الكل يتقى الله فى كل وقت و كل موقف
و هو اكيد هيوصل للطريق الصح

تحياتى

قوس قزح said...

عارفة ..مش عارف ليه

انا بس هسالك سؤال واحد

هو النصاب بيتعرف انه نصاب قبل ما ينصب علينا و لا بعدها ؟

نصاب يعنى محترف فى الخداع
يعنى الناس العادية اللى زيى و زيك يقدر يضحك عليهم

تفتكر فى الزمن المنيل ده اللى العنوسة فيه خالت كلمة هتجوزك لها اكبر قيمة فى العلاقات بين الولاد و البنات
هتقدر فيه البنت تكدب الولد و هو احتمال يكون جاد و هينقذها من دوامة العنوسة او ركوب السبينسة؟

المجتمع عيبه انه مش بيخلى الواحد على طبيعته
و دايما بيوجه لنا الطريق


تحياتى

قوس قزح said...

شمس النهار

كلامك تمام يا شمس
و بترتيب النتايج تلاقى

تربية غلط
تخبط فى المشاعر
اختيار خاطىء
شباب ناقم على الحب و الارتباط
جواز و السلام
طلاق
اطفال مهزوزة
و تربية غلط
و هكذا
تستمر الدايرة
بس للاسف كل مرة بتكبر



اعتقد جزء من البوست ده يخص حملتك لمجتمع نضيف

قوس قزح said...

نهر الحب

هنا دور البيت و الاسرة يا ايناس
يعنى لازم من صغرهم يتعلموا ازاى يعبروا عن مشاعرهم
و امتى و لمين

لازم نفتح عيونهم بدرى و الا حد تانى هيعمل ده

لما يحصل ده من الاسرة هتلاقى المشاعر تنضج و تبقى واضحة و مفهومة و نختار صح
بدل قصص الفشل المنتشرة دى

انتى كمان وحشتنى
ان شاء الله نتقابل قريب

قوس قزح said...

عزيزى شيرين

اولا : انت بتتكلم عن المرأة و احاسيسها اللى بتعبر عنها بوضوح فى كتابتها
ولكن نسيت شىء مهم
ان اغلب الكتابات دى بعيد عن عيون الاهل
خصوصا لو كانت لفتاة غير متزوجة
لانها ببساطة ستتحول حياتها لتحقيق مستمر او استخفاف بمشاعرها

ثانيا : معك حق لم يعد يوجد هذا الكائن الخام ..و لكن يوجد عكسه سيدى و هو الكائن الخائن ..و هنا بيكون الحرص من الوقوع فى شباكه اشد قيدا على المشاعر ..و تصبح المدارك واسعة و لكن مقيدة فى نفس الوقت فتنتشر حالات غريبة فى المجتمع لم نسمع عنها من قبل


و اخيرا
اجل المرأة تحب ان تكون غامضة
و ان يكون الطريق اليها ليس سهلا
و لكن اليس من حقها ان تختار هى متى تسقط اوراقها ؟
ام يجب عليها ان تسال المجتمع اولا او تغوص فى مفاهيم الراجل لتدرك مدى استيعابه لها ؟

من حقها وحدها ان تختار طريقة التعبير عما بداخلها بدون قيود متى تريد و كيفما تريد

و هذا هو هدفى من هذا البوست


تحياتى

قوس قزح said...

مصطفى ريان

بدأ البنت بالمصارحة بالحب صعب فى الشرق و لا يتقبله الطرفين
فطبيعة البنت و الولد الشرقيين اتفطمت على ان الرجل هو من يفصح اولا طالبا من الفتاة ودها و حبها

الراجل مشاعره اقوى من البنت و يقدر يستحمل الرفض و بيشوفه عاادى جدا لكن البنت متقدرش تستحمل رفض ولد لها و بتحس انها بقت رخيصة

صعب الخطوة دى يا مصطفى و لو حصلت من بنت لازم تكون متاكدة جدا ان الولد اللى قدامها هيفهمها صح و بيحترمها و بيحبها

سعيدة بزيارتك

سمكه واحده said...

اولا احب اقلك ان موضوعك مهم جدا جدا
ثانيا عاوزه احكيلك حاجه كده
ماما لما جت تتجوز بابا كانت خطوبه عباره عن كتب كتاب مفيش حاجه اسمها خطوبه يعني كتبوا الكتاب وكويس انه مكنش زفاف المهم كان اول مره تشوفه كان يوم كتب كتابها وكانت قاعده في الاوضه بتعيط فبقولها طيب ياماما كنتي بتعيطي ليه قالتلي عشان معرفوش ولا عمري شوفته بس الصراحه لما وربت باب الاوضه واختي شورتلي عليه قالتلي العريس هناك اهو بطلت عياط بقولها ليه يا ماما قالتلي لقيت ابوكي وسيم يابت فسكت
ههههههههههه فضحت الراجل والست اللي اويني في بتهم متقوليش لحد خليها في سرك عشان اعرف اعيش
طبعا الكلام ده مش صح مش بتفاخر بيه يعني طبعا مش عجبني خالص وفرق اجيال وتربيه ومعتقدات يعني بس بقلك شوفي زمان وفي نفس الزمن كان في غير كده طبعا مكنش كله كده يعني بردو حسب تربيه كل بيت ومعتقداته واسلوبه وتربيته بناته وكل جيل عن جيل بختلف ويتغير

سمكه واحده said...

الحب نفسه؟
مش عيييب خالص ولا حرام
المشاعر بكل انوعها بقي اسمي شئ في الدنيا
وبردو زي كل الناس ما قالت المشكله في توجيها وتروح فين وامتي وازاي
الدين اصلا بيدعوا للحب ده اسمي وارقي شئ في الوجود بس
انا عن راي انا يعني فيه شقيين
اولا المشاعر يعني حاجه خاصه بالانسان نفسه حاجه بتعته هو مش شرط ابدا ان حد يشاركه فيها وده ولا عقد ولا امراض ابدا ابدا والله لان دي حاجه ملكي انا
امتي تبقي مشتركه؟
في وقتها المناسب للشخص المناسب وهو مين الشخص ده غير زوجي
مهو اصل زي ما كل الناس ما بتقول ان الحب ده مش بأدينا بس ممكن اي حد يحب حد مش مناسب بس غصب عنه حبه ينفع بقي اعبر عن المشاعر دي لاي حد مش من حق اي حد
كمان في شق تاني
اي حاجه قبل الاحتكاك والمعامله اليوميه والمعاشره والمعايشه بتبقي تحت مسمي اعجاب واستلطاف وانبهار
عمر ابدا ما في حاجه اسمها حب هتيجي من نظرات او كلام او اسلوب غير من معايشه الشخص نفسه من موقف تحصل من حاجه اسمها
موده ورحمه فوق الحب ده نفسه
انا لحد دلوقتي وثقه ومتاكده الف الميه ان محدش عرف يعني ايه حب ومعناه كويس غير لو سالتي اي اتنين متجوزين
ياما حبوا بعض او عايشين والسلام تعرفي الحب من المتجوزين من المعامله اليوميه من خوفه عليها اهتمامه بيها حنانه عليها حبها ليه خدمته تسهر علي تعبه متتقرفش منه متزهقش منه يستحملها تستحمله يحسسها بالامان تحسسه بالحنان يفتقدها يفتقد ريحه اكلها تقتقده تفتقد صوته وشخطه وزعله وغضبه ومصلحته ليها يفتقد دلعها وقمصتها وهزرها وشقوتها
تفتقد كلامه ليها وعتابه يفتقد عكتنها ليه وغضبها يفتقد حجات كتير بتعملها عشان خاطره
فهماني ده اللي اقدر اقول عليه حب او لا
غير كده انبهار اعجاب تحت اي مسمي ومش من حق اي حد غير الشخص نفسه
اصلي دي فعلا مش بايد الانسان انه يحب شخص او يكره اخر
وكل حاجه بتجي في وقتها بتبقي اطعم واحلي وفيها بركه من عند ربنا لها سحرها الخاص ومذقها الللي بيستمر طول العمر
والله في بنات كتير جدا كانت جافه وخام زي ما بنقول وبقت ستات قمه في الرومانسيه والدلع والشقاوه والحب بعد ما كانت خجوله وتتكسف من خيالها بس ربنا بارك لها عشان حبت ترضيه ومشاعرها غاليه عليها


ان الحب بذرة .. بيزرعها الاعجاب

مبتكبرش الا بالاحتكاك والتعامل والمعايشة
عمرها ما تتحول شجره غير لوتسقي بسنين الحياه سويا

وحشتيني وبحبك
وش بيغمز)

بجد موضعك مهم اوي
اسفه لاطاله
بس يارب اكون قدرت اوصل فكرتي

قوس قزح said...

سمكة واحدة

انتى ايه مصحكى لحد دلوقتى ؟؟
انتى جاية بعد نص الليل تفضحى الناس ههههههههههههه


اولا وحشتنى

ثانيا ياريتها كانت بالوساااامة لكن للاسف الموضوع اكبر من كده

المهم فى موضوع الوسامة ده حاجة واحدة ان السلالة تطلع وارثها

يارب تكونى شاطرة و وارثها :))

قوس قزح said...

سمكة واحدة

العشرة مهمة اوى لمعرفة اى شخص فى الدنيا
و يمكن ده السبب اللى مش علشانه مش بافضل الخطوبة القصيرة
يعنى شهر و اتنين صعب اوى نحكم فيهم على شخص ما
و مينفعش بردو اقول بعد الجواز اعرفه
لان وقتها هاكون اخدت قرار الارتباط خلاص
الحل ان فترة الخطوبة تكون اطول شوية لا تقل عن 6 شهور
و ميزة المدة الطويلة ان فى احداث كتير ممكن نمر عليهم سوا
عزومات ..افراح .. احزان .. مشاكل
مش شرط يعنى خروج و فسح
بس الاختلاط العائلى مهم كمان
لان الشخص بيكون على طبيعته وسط اهله

اقولك
خاليكى معايا كام بوست اما نشوف الحكاية دى :)

سمكه واحده said...

اللي مصحيني لحد دلوقت حاجه لوقلتلك عليها هتموتي من الضحك
وهروب اصلا ووريا بلاوي بكره والله ومشغوله
اما ان حكيت عن الناس دي اللي عايشه معاها عشان موقف مستغربه منه وبضحك عليه وعندك حق طبعا مش بالوسامه بس الست لقت الرجل حلو تقول لاء هتبقي جوازه ووش كشر
انا بس بقلك علي الموقف نفسه وماما العسل اللي بسالها بطلتي عياط ليه
اما بقي عن اي حاجه تانيه فدي تسأليها هي بقي ولا هسالهالك بقي
):
موضوع الورث ده لا مبحبش اخد حاجه مش من حقي هههههه
وبعدين ليه الاحراج ده يعني
ماشي ماشي
وعندك حق يايرت كان موضوع وسامه الموضوع اكبر من كده بكتير انا بس افتكرت الموقف
اجري انام ياختي

mostafa rayan said...
This comment has been removed by the author.
mostafa rayan said...

وهو ايه اللي صعب الخطوه يا داليا مش التربيه الغلط اللي اتربناها ودخلها اهلنا فينا واحنا بدورنا بندخلها فى دماغ اولادنا بنربيهم على ان اي علاقه بالجنس الاخر عيب ..عيب تعلب مع زميلتك في المدرسه .. عيب تقعدي جنبك زميلك ..طلعنا بنخاف من بعض رغم اننا رجاله وستات بنكمل بعض
ياداليا البنت مش هتقول الكلمه دي إلا للراجل اللي بتحبه ومتأكده انه بيبدالها نفس المشاعر
ليه نضيع ايامنا في مين اللي يبدأ ما اللي يبدأ يبدأ يا ستى راجل ولا ست
ليه بنعقد السهل ونفضل نلف وندور حوالين الحاجه
هو يعنى يا داليا الستات في الوقت الحالي هيبقو احسن من امنا خديجه رضي الله عنها لماحست بحب تجاه سيدنا محمد عليه الصلاه والسلام وكان اصغر منها
ب 15 سنه بعتتله صديقتها وماكسفتش تعلن حبها وتصارحه بيه
احنا بس اللي غاوين نتعب نفسنا ونعذبها
اللي بيحب يقول يا جماعه راجل ولا ست مش مهم مين اللي يبدأ
بلاش تضيعو وقتكو واعماركو في اللف والدوران .. في الحب اقطع العرق على طول وقول لحبيبك انا بحبك في وشه من غير ماتتأخر ولا تتكسف ولاتقول انا ست ولا هو اللي يبدأ ولا مش عارف إيه
لك كل التحيه يا داليا

صباح الصباح said...

صباح الخيرات يا داليا

اولا جزاكى اللة كل خير على الانشط اللى بتعمليها من بؤجة وحاجات تانية

ثانيا للاسف معزم الولاد واخدين البنات مجرد عداد يعنى عرفت كذا واحدة وقعت فى كام واحدة ويقعدوا يتباهوا بكدة مع اصحابهم

فية ازمة اخلاق كبيرة

SAMS-1990 said...

عيني رأت مولود على كتف أمه

يصرخ تهنن فيه يصرخ تضمه

يصرخ تقول يا بني ما تنطق كلام

ده اللي مايتكلمش يا كتر همه

-------------------------------

ده رأى صلاح بك جاهين

و أنا موافق عليه بالتلاته

الجواز و سنينه said...

موضوع لذيذ جدا
تعرفى مره زمااااااااااااااااان سمعت واحده بتتكلم فى التى فى
بتقول لما تحبوا اجوازكم قولوا انكم بتحبوهم و عبروا عن كل مشاعركم
لو مش الطرف التانى طلعتيله كل مشاعرك هاتطلعيها لمين ؟
اعجبت جدا بالكلمه
بس اتضح ان القط بيحب خناقه
و طلع المثل بتاع حب و دارى و اكره و وارى
صحيح جدااااااااااااا
الناس القديمه دى ماكانتش بتقول كلام كده و خلاص دى خلاصه تجارب
بس برضوا لو قيت حبيبك ده يستاهل و كل ما اديته حب اداك كتير ما تضيعش عمرك و انت بتحبس مشارك بس الاول اتأكد انه يستاهل

شمس النهار said...

البوست كله ياجميله
من الحمله اللي عندي امل نبتديها قريب
مستنيه البانر كيمو هيعمله


ياريت المجتمع فعلا يبقي نظيف


كل ماده الدنيا بتبوظ اكتر

سلامي

ميرام said...

مش عارفه
حاسة ان المشكلة في عكس كدا
المشكلة ان التعبير بقى مشاع
(:
وكل بنت بتحس بذرة اعجاب بتقول بحب
المشكلة ان الحب بقى اصلا مجرد كلام
مين اي قال انها لو قالت بحبك او وحشتني تبقى عبرت!!!
بيتهيألي في حاجاات كتييييييير قوي توصل المعنى ده حتى لو مااتنطقتش
(:
كامل احترامي

قوس قزح said...

سمكة واحدة

ربنا يقويكى على اللى وراكى وتبطلى هروب منه :)

و ربنا يخليهم لكى

قوس قزح said...

مصطفى ريان

اقولك ليه صعبة
لان للاسف فى مجتمعنا لما بنت تكسر تقاليد مش بتتشاف انها متفتحة و بتحاول تصلح الغلط
لكن بيتشاف انها خرجت من دايرة الاخلاق
دايرة الاخلاق اللى هى الحاجة الوحيدة بيتحكم بها على البنت كويسة ولا لا
لا شخصيتها و لا فكرها ولا اى حاجة
قليل اوى من البنات اللى مش بيهمهم و بيقولوا
بس المهم ان وقتها الراجل مش يجى عليه يوم و يقولها انتى اللى فرضى نفسك عليا

عموما الخروج عن التقاليد مش الحل
لكن محاولة تطورها و استيعابها للتغيرات اللى بتحصل فى العالم كله ممكن يكون حل

تحياتى

قوس قزح said...

صباح الصباح

صباح السكر الملون :)

جزانا و اياكم

كلامك صح انا كمان لاحظت ده .. ان الموضوع بقى علاقة و السلام علشان ميتقالش عليا انى خايب

هى اتحولت من ازمة اخلاق لازمات نفسية فعلا

قوس قزح said...

sams-1990

و مين مش بيوافق على جاهين ؟

نورتنى بالزيارة