Friday, June 25, 2010

حداد ..على خالد ام علينا





موته لى كان غير اى خبر تانى اسمعه عن التعذيب فى اى مكان فى مصر
كنت دايما اقول يمكن اللى حصل له التعذيب له نشاط سياسى او بلطجى او عمل حاجة تخليه يوصل لمرحلة انهم يعذبوه اقصد يأدبوه
لكن ان شخص يكون قاعد فى مكان و فجاة بدون مناسبة يتفتش و لما يسال ليه او يقول لا مش من حقكم ..ينضرب لحد الموت ؟
لا كده كتير ..كتير اووى ..يعنى رضينا نمشى جنب الحيط و سكتنا و بردو الحيط اتهد علينا ؟
ده سبب صدمتنا كلنا
ان المشى جنب الحيط مش هيحمينا ..كلنا كنا مطمنين اننا جنب الحيط و طول ما احنا جنب الحيط خلاص الدنيا هتمشى بأمان
كنا مطمنين ان ممكن يبقى فى ناس لو شافتنا بنتأذى ممكن تدافع عنا
كنا مطمنين ان اكيد فى حد هيعمل شغله بضمير و يرجع الحق لاصحابه
لكن
بموت خالد ماتت الشهامة
بموت خالد مات الامل فى العدل
بموت خالد مات الامان جوانا
بموت خالد ..اقول ايه بس ..ماهى بردو بلدنا و هتفضل عايشة وطنيتنا لها جوانا غصب عتا

ربنا يرحمك يا خالد و يرحمنا

7 comments:

Asmaa mahaba said...

هى الكرامه والشهامه اصلا ميته بقالها فتره مش من خالد بس
ربنا يرحمه ويغفر ليه ويدخله فسيح جناته

momken said...

الله يرحمه ويرحم ك موتانا

وينتقم من كل ظالم

بس فى حاجه

انتى تعتقدى كل شخص خارج على الانون هيموت ازاى

فى ساحه نضال...على حدود غزة مثلا...فى مظاهره ضد التوريث...فى طابور عيش حتى

؟؟؟؟؟؟؟؟؟؟

خالد عنده قضيتين مخدرات
وبالغ ورقه بانجو حسب التقرير
مرفود من الجيش بشهاده خدمه رديئه
سهران فى السيبر طول الليل

مش بطل قومى يعنى وطبيعى انه يموت ايما على ايد بلطجى تانى فى خناقه او بجرعه مخدرات زياده او على ايد الشرطه

اه بكره التعذيب
بس بكره البلطجه والاجرام اكتر

اه بكره استخدام النفوذ بس بكره الشوذوذ اكتر

انا اسندرانى
وزعلت اوى على الولد بس كنت زعلان عليه اكتر وهو عايش


الله يرحمه رحمه واسعه ويغفر له ولينا جميعا


تحياتى

قوس قزح said...

سومة
ايوه يا سومة
اكتر حاجة تقهر ان الناس كانت بتتفرج و جايين دلوقتى يقولوا فين الحق
و هو كان فين الحق وهو بيتاخد من صاحبه قدامكم ؟

قوس قزح said...

ممكن

ازيك عامل ايه ؟

عارف من كتر ما الواحد سمع عن قضايا بتتلفق علشان تبرر حاجات حصلت
انا مش مصدقة اى حاجة من اللى اتقالت على خالد
لما تسمع صاحبه و هو بيقول انه كان بيتحايل عليه ينزل
و انه مش كان بينزل اللى لما النت تقطع
حتى صاحب السايبر قال انه مش بيجى كتير
و هروبه من التجنيد ..مين منكم بيحب يتجند ؟ ما كل الولاد بتعمل البدع علشان تاخد اعفاء و بيكدبوا و بيجيبوا وسايط
لفافة البانجو اللى فى زوره ..الولد لو كان معاه بانجو مكنش بقى بالبجاحة دى مع المخبرين ..و بعدين بالعقل فى حد هيحط لفافة بانجو فى زوره ؟ ده الواحد لو حد بس صوباعه بيرجع و يجيب اللى فى بطنه ده بقى حطها و بيتكلم معهم و يقول الحقونى و كفاية ازااااااااى
الكدب فى الموضوع ده يا ممكن كبير اوى ..لدرجة انهم فاكرين اننا اغبياء جدااا و مش هنفهم حاجة ..بس للاسف ممكن نبلع اى حاجة

Mafrousa said...

بصى يا دودو انا مع ممكن فى كلامه
اولا الصورة اللى اتنشرت على النت و تناولتها كل الحف و الانت
ديه صورته بعد عمليه التشريح الاولى
يعنى مش نتيجة تعذيب
و بعدين اصلا اللى صور كده حرام عليه اصلا
لان الميت له حرمته
و ثالثا احنا مش عاوزين نصدق ان كلام الشرطة صح
و عاوزين نصدق انهم عذبوه لاننا ببساطه زهقنا من اسلوبهم و فاض بينا من تجاوزتهم
فمش عاوزين نصدق الصدق

Humman being said...

أنا قعدت فترة كبيرة جدا مكتبش حاجة فى مدونتى
وبصراحة كنت ناوية ألغيها تماما
بس أول ما قريت وسمعت عن الشاب ده لقيته بيطاردنى والله فى كل مكان .. على الانترنت والتلفزيون والجرايد
مقدرتش أمسك نفسى ورجعت تانى أكتب عاشان أقول حرااااااااااااااااااااام

ربنا يرحمه

محمد فاروق الشاذلى said...

أكتر حاجة غيظانى فى موضوع خالد الله يرحمه إن لما النيابة قررت تحقق فى الموضوع اتقدم اكتر من 100 شخص للشهادة.
كانوا فين بقى الـ 100 بنى آدم دول وهو بيضرب لحد ما مات؟؟؟؟
إحنا جرا لنا إيه؟
أخبارك إيه يا داليا؟ يارب تكونى بخير