Sunday, August 22, 2010

الخير على ايديكم دايما

تحديث تانى عن مكان الافطار عن خالد همس االاحباب
تحديث
اسماء الادوية
المطلوبة
اولا : فيجام--امينو جلووبين ivig--ال 5 جرام ب 1170
ثانيا : وان الفا نقط سعر ة 186 جنية
ثالثا: مينارين اسبراى ب 115 جنية
رابعا: بنتازا ب168 جنية
خامسا: تينام
سادسا: كولشسين المستورد
سابعا بالميكورت-كالسيمات-ريميكاد حقن-الواحدة ب 3000 جنية



كل عام و انتم بخير
و رمضان كريم

يوم الخير فى رمضان اللى بنعمله باشوفه من احلى ايام المدونين فى السنة كلها
يمكن لان جو رمضان بيخلى كل واحد فينا مش محتاج تشجيع علشان يعمل الخير
او لان ربنا بيحب الاطفال فبيسر لعدد كبير منا انه يشارك فى اليوم ده
مش عارفة بالظبط ايه السبب اللى بيخلى اليوم ده رغم صيامنا و تعبنا ..يوم من احلى ايام السنة


فى دعاء سمعته من ناس فى المستشفى بيرن دايما فى ودانى ..ربنا ما يقطع لكم عادة
و علشان منقطعش العادة الجميلة دى
بيشرفنى ادعوكم ليوم خيرى فى رمضان نزور فيه الاطفال فى مستشفى ابو الريش
و نتجمع سوا على فطار ..حتى لو كان بيتاخر علينا او طعمه مش حلو اوى .. بس بيكون جميل بوجودنا سوا
يوم السبت 28 اغسطس


المرة دى التبرع هيكون مش محدد
يعنى كل واحد و قدرته
دوا - لبس - فلوس - لعب
و هنضيف اسماء بعض الادوية اللى المستشفى بتحتاجها دايما و فيها نقص عندهم
بخصوص نوعية الهدوم: الناس دي غلابة. يفضل بس أغلب اللبس يكون مشترك يعني ممكن للنوعين... لو مقاس كبير هيشمره و لو صغير هيلاقوا مليون حد يدوه له، لو صيفى هيلبسوا عليه حاجة يبقى شتوى ولو شتوى هيلبسوه على اللحم و يشمروا كمه
، ببساطة يعني ... و الله ما هتفرق معاهم

بخصوص الالعاب : ممكن الوان و كراسات رسم .. ممكن شطرنج أو سلم وتعبان أو دومينو .. دبدوب ممكن للأطفال وعروسة للبنات .. لعبة بتتزق زي العجل أو القطر ... ممكن لعبة المزرعة ... ممكن الصلصال للأطفال الكبيرة شوية ...

اما الفطار
فلحد دلوقتى المكان المقترح هو ابو العز بشارع بورسعيد
بس باب الاقتراحات مفتوح لو حد عنده مكان افضل و يكون قريب من وسط البلد

نداء هام جدا لكل انسان لا تستقل مبلغ التبرع ولا تخجل من تواضع القيمة مهما تكن حتى لو كان مبلغ التبرع جنيه واحد فالحسنة بعشرة امثالها الى سبعمائة ضعف والله يضاعف لمن يشاء .
بالنسبة االى عايز يبعت حوالة بنكية البيانات المطلوبة لارسال الحوالة هى :
المرسل اليه : خالد عثمان هاشم بكر
رقم التليفون : 0101345140
البنك المرسل اليه : بنك مصر - فرع الاورمان - او فرع الجيزة
واللى قريب من الجيزة او الهرم اوالدقى ممكن نتقابل وناخد منه التبرع فى اى مكان قريب منه .
ده ايميلات الناس المسئولة عن اليوم

و ده ارقام ممكن تبعتوا رسالة عليها او تسالوا على اى شىء خاص باليوم ده

داليا صاحبة مدونة قوس قزح
0148693432

خالد صاحب مدونة همس الاحباب
0101345140

اللى يقدر يعمل اعلان فى مدونته و يرفق معاه صورة اليوم يبقى جزاه الله كل خير

53 comments:

Mano said...

كل سنة وانتي طيبة
ورمضان كريم
ربنا يعينك علي فعل الخير دايما
دومتي بخير

همس الاحباب said...

كل سنة وانتى طيبة
وربنا ما يقطعلك عادة

reem said...

كل سنة وانتى طيبة يا داليا يارب
ورمضان كريم عليكى وعلى كل اسرتك الجميلة

وربنا يجازيكى كل خير يا وش الخير

بجد انتى من الناس اللى بحس انها اى شئ تمشي فيه بيكون فعلا فيه فايدة وخير ورضا من الله عز وجل

ان شاء الله هاكون معاكم وفرحانة جدا لان اول مره هاكون معاكم في رمضان وان شاء الله يكون يوم موفق باذن الله تعالى

mostafa rayan said...

كل سنة وانتي طيبة يا داليا وينعاد بالخيرعليكي وعلى كل احبابك
ربنا يتقبل منك سعيك لعمل الخير وان شاء الله اكون معاكو ويكون يوم جميل زي عادة لقائتنا
كل تحيتى ومودتى لك

زهرة الجنة said...

كل سنة وانتي طيبة يا دوللي
يارب ديما نفضل نتجمع علي خير

Sameh Ezzat - (خواطر خاطر) said...

سنه فاتت علي اول لقاء جمعني بناس بحترم عقولهم وبحب قلوبهم
الوقت جري بسرعه وبصراحه انا كنت مستني اللقاء ده من السنه اللي فاتت ..
كل سنه وانتي طيبه يا دليا
كل سنه وانتا طيب يا استاذ خالد
ربنا ديما يقدركم علي مساعده الناس وينضاف الي ميزان حسناتكم

لقاء رمضان فرصه مش ممكن اضيعها

كل سنه وكل الناس طيبه
اتنظركم في الموعد المحدد

**************
بخصوص الفطار
ارجو مراعاه اللي حصل السنه يعني لازم نعمل حسابنا ان العدد ممكن يكون كتير والمفروض ان الفطار هيكون زي ميتنج محتاجين نكون كلنا قاعدين في صاله واحد في مكان واحد
لان السنه اللي فاتت كان في تجمعات كده خلتنا مش عارفيين نتواصل كلنا سوا
..
سلام

اميرات الاسرار said...

كل سنه وحضرتك طيبه

ويارب يجازيكى خير على كل اللى بتعمليه

رمضان كريم

عاشقة القمر said...

ازيك
لك سنه وانتي طيبه

تقبل الله ممنا ومنكم
ملحوظه
ياريت نهاموا بطفل لقيط ايضا
بامسنين في اداره عاجز ايد فيهم صائمين
بيتام
ربنا يجعلها في ميزان حسناتكم

سومه...مجنونه فى بلد عاقل said...

ححاول اجى ان شاء الله ل كان عندى وقت لو مقدرتش اعذرينى انتى عارفه انا مشغوله ازاى شكرا قوى انك جيتى والله فرحت وكان الدنيا كلها جاتلى مفيش احسن من ان حد يحب حد ويعزه ويهتم بيه ومهم مبينهمشى مصلحه غير الحب فى الله فى الزمن دا ربنا يباركلك فى اولادك يا رب

P A S H A said...

ربنا يا رب يجازيكم ألف خير ويجعل هذا العمل في ميزان حسناتكم وحسنات كل مشارك اللهم آمين

كل سنة وأنتِ طيبة وبألف خير وصحة وسعادة إن شاء الله

رمضان كريم

۩

حـــلـــم كــــان said...

كل سنه وانتى طيبه يارب وبخير

ويارب يجزكم كل خير

ان شاء الله هيكون يوم جميل فى طاعه ربنا
وهيكون جميل يالموجدين

محمد ياسر said...

جميل جدا ربنا يقدرني واجي ان شاء الله و احاول اساهم بحاجة

ahmed_k said...

فعلا بيكون اليوم جميل بلمتكم وتجمعكم الطيب الكريم
أدعيلي اقدر اتواجد معاكم بإذن الله
وفقكم الله دوما لكل خير

мαησηα said...

كل سنة وانتى طيبة يا وش الخير وربنا يارب مايقطع لك عادة ابدا

مبسوطة انى هاشوفك اوى

ومبسوطة انى هشارك ف حاجة خير لاول مرة ف حياتى

جزاكى الله كل خير عنا ويجعله يارب ف ميزان حسناتك اللهم امين

قلب مصرى (محمد فاروق) said...

كل سنة وانتم جميعاً بخير، إن شاء الله أكون موجود فى اليوم ده وكمان نزلت بوست على المدونة عن اليوم وربنا يوفقنا جميعا لفعل الخير

فشكووول said...

السلام عليكم دودا
بارك الله فيك وجعل فيكم الخير اليى يوم القيامه
كل عام وانتم بخير بمناسبة رمضان
اعاده الله عليكم والعائله بالخير واليمن والبركات
رمضان كريم

جايدا العزيزي said...

جزاك الله عن امه رسول الله كل خير


حقيقى فكرة جميله وبسيطه

كل عام وانت بخير

اللهم اجعله فى ميزان حسناتك


تحياتى

الجواز و سنينه said...

كل سنه وانتى طيبه يا جميله
و ربنا يجعل كل اللى بتعمليه فى ميزان حسناتك ان شاء الله
انا برتب و الله انى اعرف اجى ان شاء الله
إلى ان نلتقى تحياتى

فاتيما said...

داليا

اولا
عاوزة اقولك انى و انا بنقى الغنوة للبوست كنت هحط الغنوة
بتاعة انغام دى
توارد افكار و احاسيس
و قلوب و اغانى و لا إيه بقى ؟!!

ثانيا
خلاص كتبت البوست
و تحت امرك ف اى حاجة تطلبيها
بفكر المرة دى نعمل للعيال
فوانيس كرتون
اصلى شوفتها ع النت
و عجبتنى
لو موافقة قوليلى ابتدى عمايل
ممكن تبقى تتوزع مع الفلوس
لو هيكون فيه اظرف زى المرة اللى فاتت .زو يا رب يكون فيه ان شاء الله


و اى حاجة
انا موجودة اهو
قولى بس و انا وراك يا زعيم


كل سنة و انتى وش الخير
يا حبيبتى
و مصدرة الفرح
الوان الوان

رمضان كريم بيكى و بخالد
و بكل الناس الطيبة
اللى بتيجى هنا


اشوفك على خير
يوم الخير
يا وش الخير
و ربنا ما يقطعلنا عادة

أع ـقل مـ ج ـنـونــة said...

جزاكم الله خيرا
ان شاء الله نكون معاكم
ربنا يعينكم دائما
رمضان كريم وكل سنة وانتم طيبين

ذو النون المصري said...

كل عام انتم بخير

Anonymous said...

كل سنة وانتى طيوووووووووووووووووووووووووووووووووووووووووووووووووووووووووووبة يااحلى دودى فى الدنيا دى كلها ربنا يكرمك انتى وكل المدونين والمسلمين كلهم ياااااارب
بجد تنظيم جميل والحاجة اللى هنتبرع بيها جديدة فى فكرتها وسهل فى تنفيذها ربنا يكرمكم بجد
انا نفسى قبل مااموت اروح اى عمل خير معاكم باقعد اخطط واحلم واقول ان شاء الله هاعمل وفى الاخر بتبقى احلام يقظة وغالبا مش بتتحقق
انا بس عايزة اعرف مستشفى ابو الريش دى فين بالظبط :D
الجهل وحش برده
بس انا مش من شرم فمعرفش حاجة فى مصر الجديدة ولا القديمة
دمتى بكل خييييييير انتى وكل حبايبك



هتستغربى من الاسم
بيطرية ومش بايدى

قوس قزح said...

مانو
و انتى طيبة و بخير
اشكرك على دعاءك
رمضان كريم علينا كلنا

تحياتى

قوس قزح said...

همس الاحباب

و انت طيب يا خالودة
و ربنا يبارك لك و يجزيك خير على مجهودك

قوس قزح said...

ريم

نورررتنى :)
و هتنورينا كلنا بحضورك
ان شاء الله يكون يوم جميل بكم و بخيركم
هستناكى يا جميل

قوس قزح said...

مصطفى ريان

وانت طيب و بخير دايما
و فى انتظارك
ان شاء الله يكون يوم ثوابه كبير لنا كلنا

قوس قزح said...

زهرة الجنة

و انتى طيبة و دايما معنا يا مرمور

قوس قزح said...

سامح

و انت طيب و بخير و دايما كل سنة معنا فى الخير

بالنسبة للموضوع الفطار
الصعوبة مش فى اننا نحدد مكان و نرتب فطار مناسب
المشكلة ان العدد افتراضى لحد يوم التجمع
ممكن جدا نعمل حسابنا على عدد و يجى عدد اقل او اكتر
و بعدين صعب تلاقى مكان مجمع الناس كلها فى ركن واحد
لان فى الغالب زوار المطاعم بتحب الخصوصية فبيعملوا حساب ان القاعدات تكون متباعدة
عموما لو مكان الفطار كانت قاعداته متباعدة ممكن نفطر و نتنقل فى مكان تانى

قوس قزح said...

اميرات الاسرار

و انتى طيبة و بخير
و جزاكى الله خير على دعاءك

قوس قزح said...

عاشقة القمر

كل سنة و انتى طيبة و بخير
و اهل السودان كلهم بخير يارب

ان شاء الله نحاول نعمل ايام خير اكتر و يكون فيها الفئات اللى اقتراحتيها

جزاكى الله كل خير

يا مراكبي said...

كالعادة قائدة لقوافب الخير للمدونين

كل سنة وانتي طيبة

وعقبال كل سنة دايما يارب

Anonymous said...

دودى القمر
هو اثتفثار بثيط يعنى
الادوية المطلوبة دى
بكمية قد ايه يعنى كام علبة
والحقن كام حقنة
عشان لو فى حاجة مطلوبة حد جابها ومش محتاجين غير واحدة محدش يجيبها تانى
فهمانى يادودو
لو زيادة الخير خيرين والموضوع مفهيوش ضرر
يبقى كويس وريحتينا


بيطرية المتخفية :)))

قوس قزح said...

سومة
ياريت تحاولى بجد
انا عارفة طبعا انك مشغولة
بس صدقنى لو جيبتى عمرو و جيتى هيكون يوم له طعم تانى لكم
وبعدين شكرا ايه اللى بتقولى عليه يا بنتى ..ده كفاية انك فكرتى انك تدعينى للحضور و ده كان عندى بالدنيا كلها
انا اللى باشكرك انك فكرتى فيا انى اكون معاكى فى يوم زى ده
ربنا يسعدك يارب و يحلى ايامك

قوس قزح said...

الباشا شريف

كل سنة و انت طيب
و هنستناك طبعا مفيش نقاش
ماهو انت من الناس اللى خلاص بتدبس معنا :))

قوس قزح said...

حلم كان

و انتى طيبة و بخير يارب
و اتمنى انك تقدرى تشاركى معنا يومها

قوس قزح said...

محمد ياسر

انت تشرفنا بحضورك و بمشاركتك
كل سنة و انت طيب

قوس قزح said...

احمد الغردقاوى

يا ررررررررررررررررررب تقدر تيجى يا احمد
حاول انت بس و ربنا يسهل لك

قوس قزح said...

مانونة

و انتى طيبة يا جميل
انا مبسوطة اكتر انى هاشوفك
و يارب مشاركتك المرة دى تكون مش الاخيرة

هتنورينا بجد

قوس قزح said...

محمد فاروق

و انت طيب يا ابو رقية
جزاك الله خير على البوست
و ده مش جديد عليك
هنستناك انت و رقية و والدتها ان شاء الله

أحــوال الهـوي said...

كل سنه و انتي طيبة

و كل خير بيجري بين ايديكي

و يارب يرزقني اتباع خطاكم لما فيه الخير

تحياتي

... amr said...

ممكن حد يكتب اسمي في قايمة اللي هيحضروا ان شاء الله ؟

قوس قزح said...

فشكول

و عليكم السلام يا خااال
كل سنة وانت طيب وبخير دايما يارب
و ياريت مرة الفرصة السعيدة تخليك تشرفنا بحضورك

الله اكرم :)

قوس قزح said...

جايدا العزيزى

جزاكى الله خيرا على دعاءك و تشجيعك
اهلا بكى نورتينى بالزيارة

قوس قزح said...

الجواز وسنينه

و انتى طيبة يا قمر
ياريت فعلا تشاركى معنا
هيكون يوم جميل بوجودك
تحياتى

قوس قزح said...

فاتيما
اه طبعا توارد و قلوب و بوستات و حضونات و كله :)

تسلم ايدك اللى دايما بتكون فوق ايدينا لعمل اى شىء جميل
و اعملى للولاد اى حاجة تحبها ..فرحتهم بشغلك معهم و لمتهم حواليكى بالدنيا
انا مووووووووووووووااافقة و اشجع و اشارك كمان :))

كل سنة و انتى احن ام يا طمطم للكبير قبل الصغير
و دايما فى قلوب كل الناس
قاعدة و مربعة حتى لو عملوا مش واخدين بالهم

حضن كبير اوووى لحد ما اخده بنفسى :)

قوس قزح said...

اعقل مجنونة
هنتستناكى ان شاء الله
و اهو نشوف ايه حكاية الجنان دى :))

كل سنة و انتى بخير و بصحة

قوس قزح said...

ذون النون المصرى

و انت طيب و بخير و سعادة

قوس قزح said...

بيطرية و مش بايدى

و انت طيبة و بخير يا جميــــــــــــل
اهلا اهلا بارق بنوتات
بصى يا قمر
المستشفى جنب القصر العينى الفرنساوى
و الادوية دى المستشفى بتحتاجها باستمرار
و بتكون الادوية دى مش متوفرة برغم ان فى منها ادوية مش غالية
بس هو فى نقص فيها
فزيادة الخير خيرين :)

هنستناكى بقى
اوعى مش تيجى
رمضان كريم

قوس قزح said...

احمد القاضى
ربنا يخليك يا احمد
و كل سنة وانت طيب و بخير يارب
و اتمنى تصادف مرة تكون معنا
علشان تشوف الخير اد ايه جميل

رمضان كريم

قوس قزح said...

احوال الهوى

و انت طيب يا دكتور
جزاك الله خير على دعاءك
دايما سباق بالخير

تحياتى

قوس قزح said...

عمرو
انت اسمك مكتوب فى البلاك ليست يا فندم من زمااان :))

فاتيما said...

ازيك يا وش الخير

انا حضرت الفوانيس الكرتون
و فاضل تتزوق
و الولاد يخلصوها
مش هتاخد من كل حد فيهم خمس دقايق بالكتير على فكرة
انا قصيتها و جاهزة ع التركيب

شوفى الفكرة هنا
http://www.areyes.net/vb/showthread.php?t=163583

معرفش المفروض آجى امتى
عشان نلحق نلمهم و يعملوها و نمشى
و لا الساعتين هيكفوا ؟!!

انا مش محتاجة اكتر
من نص ساعة معاهم
بس المهم يكونوا متجمعين بالفعل
مش زى المرة اللى فاتت
كانو شوية شوية بييجوا ...
و كداالوقت مش هيسعفنا


قوليلى آجى م الساعة كام
انا اجازة اصلا يومها
و تحت امرك
يعنى ممكن آجى من الساعة واحدة مثلاً
لو تحبى


شوفى ايه النظام
و ردى عليا قبل بكرة هنا
أو ف مدونتى مش فارقة

يلا سلاااااااااام مؤقتا

Haytham said...

جزاكم الله خيراً