Saturday, September 4, 2010

الخير فى المدينة الباسلة



انا عارفة انى مفروض اكتب بوست عن احداث امبارح بما ان شكل كده مفيش حد ناوى يكتب
و بما ان انا مش عارفة ليه حاسة النهارده كأنى مخدرة و نص نايمة و الفص الشمال من مخى مهنج
فانا كل ما افك من التهنيج هاكتب شوية
و هابدا باهم حاجة


هبة
الحمدلله المبلغ كان ازيد من تمن الجبيرة و الزيادة دى ايناس هتشترى بها بامبرز للبنت
و كمان هتروح معهم للدكتور و تدفع تمن الجبيرة




احداث اليوم بقى


اتحركنا انا و رودى و ساجى على الساعة 10 و نص
و الطريق كان جميل و هادى
وصلنا على 1
كان فى استقبلنا ايناس العزيزة
قدام جمعية كفالة اليتيم
و على فكرة بورسعيد اغلبها مفيهاش يو تيرن يعنى لازم يا تدخل يمين يا شمال يا توصل لاخر الشارع
لفنا لف علشان ندخل شارع الجمعية

وقفنا شوية لحد ما اغلب الناس جات و دخلنا الجمعية
المبنى جميل جدا و نضيف جدا
و اوض الاطفال تحفة
و متقسمة بطريقة فيها خصوصية للبنات عن الولاد
و ناس كتير اوى بتروح بتبرعات

لعبنا مع الولاد و عملنا مسابقات
و فرقعوا بالونات كتير
كل شوية نتخض منها
دبسونى فى انى اعمل لهم مسابقة تتوزع فيها جوايز ..و اللى نفعنى انى افتكرت منهج بنتى و سالتهم فيه و الكل بقى يجاوب فى نفس واحد و الكل تقريبا اخد جوايز



هم لهم مواعيد محافظين عليها
بمجرد ما الساعة بقت 3 الامهات هناك اخدوا الولاد لاوضهم علشان يرتاحوا شوية قبل زيارة جروب تانى من الجامعة
و دى صور للمكان من تصوير الفنانة ساجى









نزلنا كلنا
و كل واحد اختار المكان اللى هيطلب منه الفطار من قوايم للمطاعم مع نسمة و عبد الحميد
علشان نتجمع كلنا فى نادى هيئة قناة السويس و نفطر سوا
و اتفضلوا مشكورين عبد الحميد و احمد سكر باللف على المطاعم لطلب اوردرات الناس
و الباقى اتجهوا لنادى الهيئة
بس رودى قالت لا انا عايزة سمك ولازم اشوفه بنفسى و اختار
روحت انا و هى و ساجى لمطعم اسمه الجندى نختار اكلنا
طبعا مش هاحكى عملوا فى الويتر ايه
بس غالبا هو قرر انه ميجيش يشتغل فى بورسعيد تانى لانه من كفر الشيخ و جاى يشتغل رمضان بس هناك
ببساطة قاعدنا اكتر من ساعة علشان نختار بس هناكل ايه
و بين كل اختيار و التانى نلغى واحد او نغيره



رودى بعد ما سيبنا المطعم قالت عايزين عيش
اصل العيش هنا بيتاخد هدايا للناس و ناس كتير موصيانى اجيب لهم
دورنا على الفرن و نزلت تجيب عيش
ساجى قالت لى هو انتى مش ست بيت بردو انزلى هاتى ده عيش تحفة
رودى قالت لى لازم تشترى شنط تحطى فيها
اديت الراجل 5 جنيه و قلت له ب 4 جنيه عيش و جنيه شنط
اووووم ايه
الاقى الراجل مطلع لى طاولة من بتوع العيش دول و يقولى العيش بتاعك اهو
ب 4 جنيه عيش تقولوا تساوى كام رغيف بققققققققققققققى


80

رغيييييييييييييييييييف
احمدك يارب


و الرغيف اد ايه بقققققققققققققى

اد الرغيف ابو جنيه هنا

طبعا رودى كمان اشترت و بقت شنطة العربية ولا فرن متحرك و ريحة العيش كانت هتخلينا نفطر





روحنا بعد كده لنادى الهيئة على القناة
و انا شوفت الميه و روحت بصراحة سيبتهم و قاعدت على المرسى و نزلت رجلى فى الميه و كل شوية حد منهم يتشجع و يجى يقعد جنبى وفضلت قاعدة لحد ما بقوا يحلفوا ان الادان ادن علشان اقوم ..اصل الميه كانت دافية وجميلة و المنظر يجنن


و المفاجاة الحلوة على الفطار ان كان فى عصير قصب.. اينعم كان بقى اسود ..بس كان طعمه هايل
و الاكل كمان كان حلو اوى



بعد ما فطرنا قاعدنا بقى بين طعم قبلى و بحرى
بين نخيل و قهوة امجد الاهوجى
و بحر و شبك احمد شلبى
و منافسة جميلة بينهم فى الاشعار
احنا المستفيدين منها طبعا
بس ما شاء الله الاتنين عندهم موهبة فظييييييييييييييييييييعة



و بعد الطعم الحلو ده قررنا نرجع بقى علشان كان الوقت اتاخر
و الحمد الله طريق الرجوع مكنش وحش اوى
بس انا بخاف من السفر بالليل عموما



مين بقى حضر معنا

انا هاقول على اللى اعرفهم لان فى ناس كانوا مشاركين مش مدونين
طبعا ايناس و نسمة حوريات بحر بورسعيد
عبد الحميد و اللى اثبت لنا جدعنة شباب بورسعيد و كرمهم
ماما امولة اللى الحمدلله رب العالمين صحتها بقت احسن
بابا ابو خالد اللى برغم انشغاله لكن جيه شارك بتبرع و رحب بنا و مشى
سارة رحيل و مش هاوصفها كفاية تقرا كلام امجد جوزها - اللى كان معنا بردو - عنها ربنا يسعدهم يارب ليساندرا ملكة الاساطير و الخواطر
ابراهيم العدوى صاحب مجلة رؤية مصرية
محمد الغرباوى و اخته و طلع عنده عذر قوى جدا لعدم حضوره لقاء القاهرة ..ربنا يرحم جدته و يدخلها جناته
احمد شلبى صاحب مدونة د.زيفاجو
و بنات من جروب متطوع فى كل مكان و مشيوا بعد زيارة الجمعية

ده غير ساجى و رودى و احمد سكر و انا طبعا



الحمدلله الصحبة اللى سافرت معهم كانت جميلة
و المكان اللى روحنا زورناه كان نضيف جدا
اهل بورسعيد كانوا هيشلونا من على الارض شيل
الاكل كان رائع
و الجو و المكان كانوا تحفة
و اهم من كل ده

اننا قدرنا نقف جنب ام بتحاول بكل ما تملك انها تحافظ على بنتها
رمضان كريم
و عيد سعيد عليكم اهل الخير

بوست عن اليوم عند ساجى

هنا

26 comments:

همسات وبحــ الحياه ــر said...

انا اول تعليق ولا ايه

همسات وبحــ الحياه ــر said...

انا بحسدكم والله
نفسى اتجمع معاكم كدا
عشان عملت مشروع شجعنى شكرا
اكيد هتكونى اول مشجع انا واثقه من كدا ههههههه

قوس قزح said...

ايوه انتى اول تعليق :)
انتى كنتى على الباب ولا ايه

همسات وبحــ الحياه ــر said...

اه والله دا انا طلعت اول تعليق

ههههههه

كل سنة وانت طيبة
دى تهنئه مقدما للعيد :)

همسات وبحــ الحياه ــر said...

اه شوفتى

يابنتى احنا فى الخدمة على طول

حطى البوست تلاقينى وراكى هههه

انا معروف عنى كدا من زمان
:)

Ramy said...

بجد ربنا معاكى

و يوفق كل اللى تعب فى اليوم ده

ربنا يديكى على التعب دة

انا اسف ع الخضة بس الحمد لله انا احسن كتير دلوقت

بيكم(:

شكرا ليكى

و الأغنية حلوة (:أنا بحبها

Unknown said...

داليا انتى نورتى بورسعيد بجد انتى وردوى وساجى وسكر
والغرباوى وابراهيم وايمان وسما وسارة وامجد
كلكم نورتونا وشرفتونا جدا

بس بما انى مصابة ببرد جامد
لازم هنا اشكر الناس اللى شاركة من غير ما تجى
قلب قطة
خالد همس
واشكر ناس تانية انا مش عرفاهم
والحمد لله زى مانتى قلتى احنا معنا مبلغ اكثر من 3000
هجيب بجزء منه بامبرز
والباقى هيطلع عديات للفقراء

عشان نبقى ارضينا اكبر جزء من الناس
بجد شكرا لكم وجزاك الله كل من شارك خيرا حتى لو كانت مشاركتة دعوة بالتوفيق لنا
او بشفاء هبة

نورتونا يا شباب الخيررررررررر

Anonymous said...

جزاكم الله خير
جزاكى الله كل خير يا وش الخير

Sagy said...

اولا تسلم ايدك وميرسي على الكلام الجميل الى كتبتيه وعلى فكرة انا بفكر جديا أحكى فى بوست عن امبارح وياله يمكن يخلينى اعرف اقول حاجة.

ثانياً فنانة اية بس يا فنانه
ديه حاجة بالصدفة كده على ما تفرج

يارب دايما مع بعض

ويارب دايما موصلين الخير لأصحابه

قوس قزح said...

دموع القمر
و انت طيبة و بخير

و يارب تكونى اول تعليق فى كل المدونات

تحياتى

قوس قزح said...

رامى
اهلا اهلا
اهو كده
دايما منور فى البلوج
سيبك من الغياب ده انا جربته و مكنش حلو بالمرة

هو الالبوم ده فى كام اغنية حلوين :)

قوس قزح said...

رامى
اهلا اهلا
اهو كده
دايما منور فى البلوج
سيبك من الغياب ده انا جربته و مكنش حلو بالمرة

هو الالبوم ده فى كام اغنية حلوين :)

قوس قزح said...

نهر الحب

طيب الحمدلله يا ايناس انك فكرتى فى حكاية العيدية دى
كل سنة و انتى طيبة
و يارب دايما ايامك كلها خير و محبة
انا باشكرك شكر خاص على اليوم الجميل ده

قوس قزح said...

الحب الجميل
جزانا و اياكم
شكرا يا جميل على الدعاء :)

قوس قزح said...

سجسوجة
اخيراااااااااااااااااا
نورتنى عم بلوجر يا جميل
ايوه يلا اتشجعى و اكتبى
انتى اسلوبك جميل
هاستنى البوست بتاعك

r said...

بورسعيد من أجمل الاماكن اللى زرتها وأهلها الكرم والذوق كله يعنى فاكره انى لما نزلتها المكوا اللى كانت معايا باظت ونزلت اصلحها مع واحده صحبتى عند راجل غالبا اسمه عم حسن فى الشارع التجارى لما عرف اننا من الصعيد جبلنا كركديه بيسموه عناب فى بورسعيد على حسابه ومارديش يخلينى ادفع فلوس التصليح لمجرد انه اشتغل شويه فى المنيا
ربنا يكرمك يا داليا وكل اهل الخير اللى راحوا كان نفسى احضر بس بورسعيد صعبه اوى عليا
كل سنه وانتى طيبه وربنا يتقبل كل سعيك وكل الاخوه اللى شاركوا بأحسن الجزاء ان شاء الله

Anonymous said...

وانا قاعد مستنى اقول حد يقول بقى ورجعت الف فى المدونات ولا لقيت اى حد كتب
برافو عليكى يا داليا
اولا كان من ضمن اسباب حضورى اللقاء دا بجد انى اشوفك واعتذر عن لقاء القاهره اللى كان نفسى احضره
اليوم اكثر من رائع منظم البلد جميله جدا الناس والمجموعه كلها جميله بجد
عاوزين ايه اجمل من بحر وناس ظريفه وحبوبه وروحهم حلوه وشعر وجو جميل
وعلى رأى ساره ويبقى الود هو سيد الموقف
شكرا لايناس - نسمه - والفارس الغوار عبد الحميد
داليا شكرا حضورك وتفهمك للعذر
ساجى ورودى وماما اموله واحد سكر
اتشرفت بمعرفتكم بجد وان شاء الله اشوفكم تانى
امجد القهوجى - احمد شلبى شكرا يا فنانيين وربنا يكرمكم ويوفقك بجد بتقولوا شىء له قيمه ومختلف
سما - ساره - ابراهيم ربنا يديم اللقاءات واشوفكم دايما
معذره يا داليا دا مش كومنت دا بوست
تحياتى

Sagy said...

دولى حبيبتى
كتبت البوست
واتعصبت فى الفورماتينج
لو فيه حاجة قوليلى بقى
واللينك اهو
http://oasisagy.blogspot.com/

يارب يكون لطيف
:))))

قوس قزح said...

بسنت
و الله يا بسنت ساجى بتسال على مكان فيه كنافة رد عبد الحميد البورسعيدى قالها جايبين كنافة و بلح الشام
فقلت له تهريج يعنى لا انا عايزة لقمة القاضى لاقيته فعلا بعد الفطار جايب لى لقمة القاضى
ناس فعلا اهل كرم و ذوق
كانوا مش عارفين يعملوا ايه لنا
و عجبنى كمان انهم بيساعدوا بعض يعنى الجمعية دى بتاعت الاطفال واحد من اهل بورسعيد هو اللى عاملها

طبعا بورسعيد بعيدة عليكى انا عارفة ..كفاية انك شرفتنا والله فى القاهرة
جزاكى الله كل خير

قوس قزح said...

رحلة بحث

و هو انت جاي تكتب البوست هنا ليييييييييه ؟
يا خرااابى على الكسل
ما تكتب يا ابنى بوست عندك علشان الناس تشوف ايام الخير الحلوة و تتشجع تشارك

الهدف من البوستات دى مش الحمى اد ما هو التشجيع على الخير
يلا يلا
خد الكام كلمة بتوعك دول و حطهم عندك :)


انا كنت سعيدة بوجودك يا محمد و فرحت انى اتعرفت على اختك ..شخصية لطيفة اوى و طيبة ..دايما تجيبها معاك ان شاء الله

عاشقة القمر said...

سلام عليكم ورحمة الله تعالى وبركاتة
ربنا يجعلها في ميزان حسناتكم
جزاكم الله الجنة

Diyaa' said...

جزاكم الله كل خير :)

و ب 2 جنيه عيش بقى معاكي
:D

Lyssandra said...

ملكة الأساطير مرة واحده ؟؟
:))))))
ربنا يخليكي يا داليا يارافعه من روحي المعدنية
ههههههههه

بجد اليوم كان جميل جدا
ومبسوطة اني بقيت باعرف اشوفك حتي لو علي فترات كبيرة
محظوظة إني قابلتك ومبسوطة أوي اني كنت مع الجروب الأكتر من جميل
كل الناس الحلوة اللي شوفتها لأول مرة
ساجي ورودي وعبد الحميد ورنا وأحمد سكر وأحمد كمان من بورسعيد
سعيدة اني قابلتهم واتمني لو تتاح فرص تانيه كتير

إيناس ونسمة
كل مرة أقابلهم اكتشف فيهم حاجه جميلة أوي
شكرا استضافتنا وكرمكم معانا
ودايما نتقابل علي خير

سارة حبيبتي وأمجد الوجه السمح
محمد وإيمان وابراهيم ليهم معايا مغامرات
ههههههههه
دوختهم معايا والله
مش هاحكي بقي علي البهدله
بس يكفي الثلاثي ده في اي مكان عشان ماحسش بغربة أبداً ولا حرج

بابا أبو خالد .. كنت محظوظة اني لحقته يومها
مبسوطة أوي بالكلام اللي قالهولي وده شهاده باعتز بيها
ربنا يكرمك يارب واشوفك دايما علي خير

ماما أمولة .. أطيب ابتسامة
وأحلي روح
ربنا يديم بينا المحبة والود
مجرد وجودك معانا كان كافي لاشاعة جو ألفة وطيبة وأمان

طبعا يا داليا مش هاحكي عنك
انتي عارفه اللي فيها :)

يارب ماكونش نسيت حد
للجميع شكراً ليوم جميل
وأتمني دايما نتقابل علي خير

------

داليا انا هاسيب عندك الرساله دي
لأني مش هاكتب بوست
لو فكرت هابقي اجي اخد كوبي ;)

سلام

Kiara said...

فرحانه بجد ليكو

تعرفي الاطفال دول نعمه

عارفه حسيت الكلام اللي انتي كتبتيه عن احساس مامة هبه لما واحد شغال مساعد تمريض ابنه عنده 3 سنين والمفروض يعمل عملية اوبن هارت وعارفه تمنها عامل ازاي وشغالين نجمع تبرعات من كل مكان

انا مش قدرت ابص لعنين باباه مابالك مامة هبه لان الام احن من الاب

ربنا يسعد الناس ويشفي كل المرضي يااااااارب

شمس النهار said...

الحمد لله ان اليوم كان جميل
وبحسدكم انكم قابلتوا ماما اموله
:))

انش اء الله دايما اجتماعات المدونين تبقا في الخير وللخير

كل سنه وانتم طيبين

تحياتي

همسات وبحــ الحياه ــر said...

كل سنة وانت طيبة ياقمر