Monday, November 22, 2010

البؤؤؤؤؤؤؤؤؤجة يا جدعاااااااان


كل سنة و انتم طيبين و دايما متجمعين على الخير
طبعا اغلبنا خلاص عرف نظام البؤجة
و بيجهز لها كل ما يطلع هدوم شتوى او صيفى
و الناس الجديدة اللى لسه متعرفش عنها حاجة اقولهم دوسوا هنا ده بوست قديم فيه كل التفاصيل و بعده كمان بوست عن نتايج اول البؤجة هنا
او هنا عند خالد همس الاحباب المسئول الحالى عن البؤجة

الحاجة اللى احب ااكد عليها تانى و تالت و عاشر
الناس هناك يا جماعة تحت خط الفقر
يعنى اى شىء و اى حاجة ممكن تشارك بها
هدوم صيفى شغال
هدوم شتوى شغال
ملايات ماشى
لعب اوكى
حتى لو حاجات بلاستك
اى شىء هيكون لهم شىء مهم

فى شىء تانى مهم
الجمعية هناك بترحب بأى حد يتطوع معها فى تقديم خدمات للناس
حتى لو ساعة فى الاسبوع
زى تعليم الولاد الكتابة و القراءة
توعية الناس هناك
تطوع اطباء للكشف على حالات ما
كورسات كمبيوتر
اى حاجة ممكن يستفيد بها الناس هناك من خبرة اى حد فينا

ميعادنا يوم الجمعة 10 ديسمبر
من الساعة 10 الصبح لحد 2 او 3 بالكتير
التجمع هيكون فى جمعية صحبة خير بمسجد زهراء مصر القديمة 20 شارع احمد خيرى فوق كافتيريا السرايا بعد محطة مترو الزهراء بحوالى 100 متر تقريبا
و ده تليفون خالد همس الاحباب 0101345140
و يومها هيكون معايا الرقم ده 0148693432

اشوفكم على خير يا اهل الخير

29 comments:

Empress appy said...

اولا ربنا يجازيكى خير يا حبيبتى ويجعله فى ميزان حسناتك
ثانيا انتى بتعمليها قبل عيد ميلادى بيوم ليه بقى علشان هتيجى تحتفلى معايا يا ريت هاتى كل الناس وتعالى
ربنا يوفقكم يا رب

momken said...

كل عام وانت وش الخير

تحياتى

قوس قزح said...

ربنا يخليكى ياآبى

ماهى السنة اللى فاتت كانت يوم عيد ميلادك ولا نسيتى ؟
ياريت ينفع يا رحاب كنا جينا و الله
كل سنة و انتى طيبة يا حبيبتى
و يارب نتجمع على الخير تانى

قوس قزح said...

ممكن
و انت طيب و بخير يارب
اشكرك على مرورك

همس الاحباب said...

جزاكى الله خيرا وجعله فى ميزان حسناتك
دوما سباقة بالخير والدعوة اليه
تحياتى

قوس قزح said...

خالد
ازاى بقى انت صاحب الدعوة
و انا مجرد بس بساعد على نشرها
ان شاء الله ناخد جميعا ثواب عليها يارب

mostafa rayan said...

جزاك الله خيرا وربنا يتقبل مننا كل الاعمال الصالحة
ان شاء الله اكون معاكو في اليوم دة ويبقي يوم جميل زي بقية ايام الخير اللي بنشارك فيها

re7ab.sale7 said...

السلام عليكم ورحمة الله وبركاته والله من غير ما كنت تدخلي مدونتي انا كنت ناوية اجي واكتب لك هنا انت والاستاذ خالد لاني شوفت الميعاد ولقيته ان شاء الله مناسب معايا وان شاء الله اجي واجيب اي حاجة وان مجبتش اكيد هنشوف مبلغ صغير انا وصحباتي غادة ورانيا ورضا واحمد وحمادة ويمكن كمان اي من اصحابنا في الكلية ربنا سهل ان شاء الله...ودايما يقدركم علي فعل الخير وكفاية اني بجد اتعلمت منكم ده بس ظروفي بعدي عن القاهرة هي السبب والله معلش بس ان شاء الله اجي

Ramy said...

بأذن الله

هاجى بس أدعولى أعرف أفلفص م الشغل

و هاجى بأذن الله

و شكراً ع الدعوة المخصوصة

(:

شمس النهار said...

كل سنه وانتي طيبه ياجميلة

وان شاء الله نعمل بؤجه حلوة

وكويس في وقت اهو كبير نقدر نعمل حاجه

ربنا يجزيكم كل خير
ويوفقكم

:)

فشكووول said...

السلام عليكم
والله موضوع رائع ..
بس فيه صعوبات وخصوصا للناس اللى بتسافر
احنا عندنا فرع لجمعية رساله وحاروح اودى لهم بؤجه واعتبر انى جيت معاكم
ايه رأيك؟
تحياتى

nirfana said...

جزاكم الله خيرا
بإذن الله نكون معكم فى هذا اليوم
بالتوفيق يإذن الله

nirfana said...

جزاكم الله خيرا
بإذن الله سنكون معكم فى هذا اليوم
من ستر مسلما ستره الله يوم القيامة
ربنا يوفقكم

ghada mOhsen said...

هلا أستاذة داليا وجه الخير
^^

إن شاء الله راح أحاول أجي مع شلة الخير زمايلي

بجد بحب صحبتكم أوي أوي
ربنا يبارك فيكم
^_^

قوس قزح said...

جزانا و اياك يا مصطفى
ما شاء الله عليك كل يوم خير بتحاول تيجى
يارب دايما تشارك معنا
و كل يوم خير و انت معنا

قوس قزح said...

رحاب صلاح
الله يا رحاب دى خبر جميل جدا
انا سعيدة انى هاشوفك و انك هتشاركى معنا
وكمان مشاركة ايجابية جماعية
جزاكى الله خير
ويارب تكون يوم خير و ذكرى للخير دايما لكى

قوس قزح said...

رامى

لا لا لا مفيش حجج
مفيش شغل
خد يومها اجازة انا باقولك اهو
علشان مش تزوغ منا
لا تيجى متاخر و لا تمشى بدرى
هنستناك :)

قوس قزح said...

شمس النهار

بيقولوا كل واحد له نصيب من اسمه
و انتى ماشاءالله لكى نصيبين
نصيب من اسمك الحقيقى
و نصيب من اسمك التدوينى

طول ما فى ناس زيك فى الدنيا يا شمس اكيد ربنا هيوفقنا :)

قوس قزح said...

فشكوول

و عليكم السلام
يعنى مش هنعرف نجر رجلك مرة للقاهرة و لا ايه ؟
مينفعش الكلام ده
و الحجة بسيطة جدا
كل ما يكون فى مشقة كل ما الثواب يكون اكتر
ولا ايه رايك ؟ :)

تحياتى
اه صحيح
هات سومة معاك :)

قوس قزح said...

نيرفانا

هتنورينا ان شاء الله
جزاكى الله كل خير
تحياتى

قوس قزح said...

غادة محسن
يا ريت يا غادة فعلا تيجى
المهم فى تجماعات الخير الصورة اللى بتتنقل بعد التجمع
وكل ما كان عدد المشاركين اكتر
كل ما الصورة دى اتنشرت اكتر
و انتشر الخير معها و ممكن غيرنا يتشجع و يعمله

هستناكى يا جميل :)

يا مراكبي said...

وكالعادة دايما قائدة للخير
بسم الله ما شاء الله

ربنا يزيدكم من خيره ويخليكم دايما مصدر سعادة للمحتاجين

جزاكم الله خيرا

قوس قزح said...

يا مراكبى

و الله تشريفك لى بيسعدنى جدا
لانى عارفة اد ايه انت مشغول
و مع كده بتحرص دايما انك تتمنى لنا الخير و تشجعنا عليه

أسير الجراح said...

السلام عليكم اسف لو السؤال بايخ


يعنى ممكن المساهمة تكون مادية


لانى ان شاء الله جى من اسكندرية

وجازاكم الله كل خير

وبارك الله فى اعمالكم

وجعلها فى ميزان حسناتكم


مودتى وتقديرى

اسير الجراح

مدونة الأمل said...

السلام عليكم و رحمة الله و بركاته

أتمنى أن تقبلوني ضيف خفيف في مدونتكم

تقبلو سلامي و تحياتي و مروري اخواني الأعزاء

همسات وبحــ الحياه ــر said...

كل عام وانتم الي الله اقرب هذا عام جديد وعلى عملك شهيد فبادر بالسعى والتجديد .......اللهم اجعله عاااام يعز فيه الاسلام والمسلمييييييين ......ولا تنسوا احب الصيام الي الله بعد رمضان صيام شهر محرم ولا تنسونا من صالح دعائكم اللهم احسن خاتمنتنا

بعتذر عن تقصيرى معاكم

Manamino said...

كل سنة وانت طيبة
ويارب سنة جميلة وسعيدة عليكي

Anonymous said...

وكانت هذه المادة مثيرة للاهتمام للغاية ، وخصوصا أنني كنت تبحث عن أفكار يوم الخميس الماضي هذا الموضوع.

ahmed_k said...

ربنا يكرمكم يا داليا
وما يقطعها عاده جميله جدا ومليئه بالخير والود والتلاحم بين شباب يمثلون خيرة شباب هذا الوطن
وأعتذر عن عدم المشاركه لو ان حزين جدا لهذا السبب
ولكن قدر الله وما شاء فعل