Thursday, August 11, 2011

رمضان كريم يا ابوريش


كان نفسى السنة دى نعمل شىء مشترك زى شنطة الخير او افطار او اى حاجة كده
بس المدونين بقوا زى اللؤلؤ المنثور كل شوية منهم متجمعين فى حتة
سوا فى البلوجز او فى الفيس بوك او تويتر
و كل مجموعة بقى لها افكار خاصة بها
ده غير الكم الهائل من المدونين جداد اللى لسه ميعرفوش يعنى ايه يوم ابو الريش
علشان كده قلت نخليها المرة دى دعوة مفتوحة بأى تبرع تحبه
لعب للاطفال ..مبلغ مالى ..حلويات و عصاير .. ادوية ..ملابس العيد
لكن لما كلمت مديرة المستشفى حسيت من كلمها ان المستشفى فى ازمة لانها معتمدة على التبرعات
و قالت لى بالحرف احنا محتاجين فلوووووس و لما تيجوا ممكن نجمعها و نشوف هنعمل بها ايه
واضح ان الفترة اللى فاتت انشغل ناس كتير عن عمل الخير و كانوا مركزين فى حال البلد و فى يا ترى اللى جاى ايه و هيكون ازاى

توقعات الناس اللى حواليا بتقول ان الناس اللى هتيجى مش كتير و مش هيكون زى كل سنة
بس بلاقينى اردد جوايا جملة
رمضان كريم
رمضان كريم يا ابوريش
و ان شاء الله هيكون كريم على الاطفال زى كل سنة و كتير هيشاركوا معنا

كل واحد يحب يشارك معنا فى الخير يشرفنا يوم السبت 20 اغسطس قدام المستشفى الساعة 3

اما بخصوص الفطار بعد المستشفى .. ففى خلال يومين تلاتة هيكون خالد همس الاحباب شاف مكان مناسب للفطار للى يحب يفطر معنا

29 comments:

مونتي بوكيه ورد said...

كل سنه وانتي طيبة يا داليا ودايما سباقه بالخير انتي وكل نجوم المدونين ال بحبهم ومش هقدر انسي الجو الجميل السنه ال فاتت ومنونه و شفقه هانم واحسن بك و ولاء و رامي و ايناس و خيخه و كيارا و الباغ و كيمو وفقري ووليد وهمس الاحباب و بنوته مصرية و محمود اسمعني شكرا و كل الحلوين ال كانوا منورين و الاطفال ال كانوا فرحانين بزياراتنا .. كان جو حلو اوي نفسي اكرره معاكم وهنا في المنصورة زي ما وعدتهم في مستشفي الاورام باذن الله هقول لندي الياسمين هي تقدر تنظم اليوم دا ويسعدنا تشريفكم معانا
انا كان نفسي تعملوه يوم خميس او جمعه عشان نقدر كلنا نشارك .. لان السبت يوم اساسي لشغل كتير منهم انا وزميلتي بتكون اجازة اليوم دا .. ومايمنعش ان نقدر نشارك معاكم بدام الميعاد اتحدد بأي طريقة نقدر نوصل بيها للاطفال الحلوين
وبالتالي فانا هعمل شير عنيد في المدونة باذن الله وفي الجروب علي الفيس و علي الاكونت بتاعي باذن الله و نحاول في الفترة دي نجمع علي قد ما نقدر عشان عيونهم .. يارب ساعدنا واشفيهم هما وكل مريض يارب
ويارب يعينك دايما في فعل الخير يا قوس قزح مليان خير

P A S H A said...

كل سنة وانتي طيبة وبألف خير ودايما سباقه في عمل الخير ربنا يتقبل منكم صالح الأعمال ويجعله في ميزان حسناتكم اللهم آمين رمضان كريم

قوس قزح said...

و انت طيب يا محمد يارب و بخير
كنا نتمنا تكون معنا
بس انت عارف الجمعة بقى صعب يتعمل فيه تجمعات علشان فى الغالب بيكون فى حاجة فى التحرير
ان شاء الله تتعوض و نتقابل على الخير دايما

رمضان كريم

قوس قزح said...

و انت طيب يا شريف
ان شاء الله تقدر تشارك معنا انت و عروستك الجميلة

رمضان كريم

عاشقه الرومانسيه said...

كل سنه وانتى طيبه يادودو
ربنا ما يقطع لكم عاده ابدا :)
ان شاء الله هيكون افضل من كل سنه
لان ربنا عالم ان النيه خير ياحبيبتى

Remas said...

كل سنة وانتى طيووووبة يا دوللي
ويارب دايما مجمعانا في الخير
يوم ايو الريش بقى الكل ينتظره في رمضان واصبح فعلا من علامات رمضان المميزة
وباذن الله يكون العدد كويس
ويكون اليوم مفيد للأطفال

ربنا يقدرك دايما على الخير يا وش الخير يا وحشااااااااااااني كتييييييير

شمس النهار said...

داليا الجميلة
كل سنة وانتي طيبة
وان شاء الله اشارك معاكم
وربنا مايقطعها عادة
ويكرمك ياحبيبة

همس الاحباب said...

كل سنة وانتى طيبة وربنا يجعله فى ميزان حسناتك وان شاء الله هيكون يوم خير باذن الله بس غاوية تدبيس وخلاص هههه

saragebaly said...

ربنا يعينكم في فعل الخير ويكون في ميزان حسناتكم يااااارب

كل عام وانتم بألف خير ورضا من الله يارب
رمضانك كريم على قلوبكم جميعا :)

سارة

قوس قزح said...

عاشقة الرومانسية

و انتى طيبة يا حبيبتى
ربنا يتقبل منك دعاءك ياررررررررب و تفضل عادة كل سنة

كان نفسى تشرفنا السنة دى بس عارفة انه صعب فى الصيام

رمضان كريم

قوس قزح said...

reem

يسمع من بوءك ربنا يا ريم و نقدر فعلا ان شاء الله نعمل شىء للاطفال
حتى لو جمعنا المبلغ و يروح لحالة او اتنين
هيكون ايه فى الدنيا اغلى من انقاذ روح من الموت ؟
ان شاء الله رمضان كريم يا ريمو و مش هيبخل علينا :)

قوس قزح said...

شمس النهار

يارب تكونى تقصدى حضورك مش بس مشاركتك
لانك من الشخصيات الجميلة اللى ممكن تشجع كتير يجواو يشاركوا
ده غير انك بجد وحشتنى اوى و نفسى اشوفك واتكلم معاكى مش يكون زى كل مرة خمس دقايق و اجرى :)

رمضان كريم

قوس قزح said...

همس الاحباب

ههههههههههههه ايوه طبعا لازم ادبسك يا خالد
مين تانى غيرك ممكن يستحمل جنانى و صويتى علشان الخير؟

ربنا يخليك و يكرمك يارب

رمضان كريم

قوس قزح said...

saragebaly
وانتى طيبة يا سارة و بخير
الله اكرم
شكرا على الدعاء الجميل
جزاكى الله كل خير :)

hend anwar said...

كل عام وانتى بخير

الطائر الحزين said...

كل عام حضرتك بخير

ربنا يتقبل منكم صالح العمل

مونتي بوكيه ورد said...

جزاك الله كل خير علي الوانك الجميلة ويارب تلونوا الوان الطيف ابتسامه عليو جوه الاطفال البريئة و تدتوحدوا فيا لدعاء ليهم ربنا ينجيهم ويشفيهم يارب وان شاء الله احاول اكون موجود و اشارك وهعمل نوت ودعايه من اليوم لليوم الجميل دا
ربنا يوفقكم
:))

... amr said...

شغاااااااااااااااال باذن الله :)))

كل سنة و انتوا طيبين

Noha Saleh said...

كل سنة وانت طيب

ورمضان كريم
ربنا يتقبل منا ومنكم صالح الاعمال

شفـقــة و إحســــان said...

كل سنة وانتى طيبة يا دوللى ورمضان كريم
واللهى لسه من كام يوم بسال ايناس بقولها هى داليا هتعمل يوم ابو الريش امتى
ربنا يكرمكم يارب ويباركلك
ان شاء الله هنحاول جاهدين انا وسى احسان افندى نحضر

قوس قزح said...

sun of free dom
و انت طيب و بخير يارب

قوس قزح said...

الطائر الحزين

و انت طيب و بخير
و اشكرك على متابعتك دايما لايام الخير

قوس قزح said...

مونتى بوكيه ورد

كل سنة وانت طيب و عقبال 100 سنة الاول

و اشكرك على البوست الجميل اللى عملته
جزاك الله كل خير

قوس قزح said...

...amr
تماااام :)

كل سنة و انت طيب

رمضان كريم

قوس قزح said...

Noha Saleh

و انتى طيبة و بخير

الله اكرم

قوس قزح said...

شقفة و احسان

و انتى طيبةيا جميل و رمضان كريم علينا يارب
ربنا يخليكى انك فاكرانى بالخير

و يارب تقدرى فعلا تيجى لانك من الناس اللى اتعودنا على وجودها فى اليوم ده

Tamer Moghazy said...

كل سنة وانت ديما سباقة للخير يا داليا..
بجد نفسي ابقى معاكوا واقابلكوا بس للاسف ظروفي مش ها تسمح بالتواجد في القاهرة..!!

كل سنة وانت بكل الخير والسعادة اللي بتتسببي بيها للي حواليك :)

عمرو said...

ربنا يجعله فى ميزان حسناتك اٍن شاء الله
المشكلة مش بس فى مستشفى أبو الريش المشكلة بقت عامة تقريبا فى كل الأماكن اللى بتقوم بأعمال خيرية كمان .. دور الأيتام و المسنين و المرضى النفسيين بل وصلت كمان للبيوت
أزمة مالية اٍقتصادية طاحنة جعلت المتبرعين و أهل الخير أكثرهم لا يملك حتى ما يفتح به بيته أصلا يعنى مش مسألة اٍنشغال أو هكذا أظن
شايف اٍنه بالتزامن مع حملات الخير لأطفال أبو الريش و غيرهم أن يكون فيه حملات أصلا للمتبرعين القدامى و الجدد و حثهم على اٍقتسام ما لديهم - و اٍن كان قليلا نسبيا - مع المستحقين لأموال الزكاة و الصدقة و ده مش عيب أبدا لأن حثهم و تشجيعهم على فعل الخير له ثواب كفاعله
ربنا يوفقك للخير دائما و كان الله فى العون

راء said...

استاذة داليا

كل زيارة لابو الريش وانتي طيبة
أنا من السنة اللي فاتت وكان نفسي اجي بس ظروف الدراسة مكنتش مناسبة بس ان شاء الله هاجي مخصوص لأني معايا تبرعات من ناس وهوديها للمستشفى بنفسي

معتقدش هكمل اليوم بس هاجي المستشفى اكيد

رضوى