Monday, November 19, 2012

الرحمة

تحديث هام
تم تأجيل ميعاد البؤجة ليوم 7 ديسمبر نتيجة احداث محمد محمود و التحرير
ياريت كل واحد يبلغ اللى يعرفه


لما كنت باسمع حديث الفرسة اللى من رحمة ربنا بترفع حافرها عن وليدها
كنت باستغرب ليه اختار الحديث الحصان مش الانسان
هل لان الانسان مفيهوش رحمة الحيوان ولا ايه
لكن دلوقتى بقيت اشوف الموضوع بشكل تانى
ان اختيار الحصان ما هوالا دليل على مدى رحمة ربنا
ان الحيوان اللى معندوش عقل يخليه يفكر ايه هيستفيده من ابنه ولا مثلا هيكون له سند ولا هيشيل له اسم  ..لمجرد بس انه جزء منه .. حس بالرحمة ناحيته
فما بالكم كمان لما الرحمة ترتبط بالعقل
ترتبط بمشاعر بتتمنى الاهل تعيشها مع طفلها و احلام بتتمنى تتحقق
اكيد هى هتكون ارحم
و لما بافكر فى رحمة ربنا
و انها اضعاف رحمة الارض بمية مرة
بتاكد ان رحمته واسعة اوى
لو قيست احساسى انا كأم لاولادى
ازاى مهما عملوا ممكن اسامحهم
ازاى بالتمس لهم العذر
ازاى لما يتألموا باموت من الخوف عليهم
ازاى و انا باعاقبهم بيكون قلبى بينبهنى انى اخد بالى مش آذيهم
ان كل الاحاسيس دى
اضعاف اضعافها .. هى رحمة ربنا بعباده
قلبى يطمن ..و ادعى برحمتك يارب حاسبنى.. برحمتك  قبل عدلك
طول ما الانسان كويس من جواه .. وربنا يعلم ده .. لازم يكون عنده عشم فى رحمة ربنا


الكلام اللى فوق ده بوست لاقيته فى الدراف من البوستات اللى باكتبها ومنشرهاش
بس لما قريته لاقيت ان انا مش محتاجة اكتب حاجة عن البؤجة الشتوية خلاص

ببساطة البؤجة نوع من انواع الرحمة بينا و بين بعض 





عايز تشارك فيها
تنورنا يوم 30 نوفمبر 

من الساعة 11 الصبح لحد 2  بالكتير

التجمع هيكون فى جمعية صحبة خير بمسجد زهراء مصر القديمة 20 شارع احمد خيرى فوق كافتيريا السرايا بعد محطة مترو الزهراء بحوالى 100 متر تقريبا
قبل التجمع بكام يوم هاحط التليفونات اللى ممكن تتصلوا عليها علشان تعرفوا تفاصيل اكتر 

12 comments:

بـت خـيـخـة وأي كـلام said...

:)

جزاكي الله خير يا داليا
ودايما متجمعين في كل خير


اشوفك على خير إن شاء الله

سلام
اختك خيخة

Mafrousa said...

يااااااااااااه ده مافيش احسن من رحمة ربنا يا دودو
و دايما مجمعة الناس على فعل الخير
ربنا يجعله فى ميزان حسناتك
:)

Baskouta said...

يارب دايما مجمعة الناس على الخير
وان شاء الله يكون يوم موفق
:)

قوس قزح said...

خيخة
معنى كده انك ناوية تيجى ؟؟ :))

قوس قزح said...

مفروسة

ربنا يخليكى يا روسا
فعلا رحمة ربنا كبيرة جداااا
و بيكون عند حسن ظننا به

قوس قزح said...

بسكوتة
مرسيه يا جميل

يارب انتى تكونى بخير

محمد عبد الغفار said...

ناجح ومقبول انشاء الله

قوس قزح said...

محمد عبد الغفار
يارب ان شاء الله :)

يا مراكبي said...

الرحمة

حاجة كده منزوعة من قلب كل حد بيوصل فوق .. مش عارف ليه وازاي

ومش عارف بيعيشوا ازاي وهما ظالمين وعارفين ان فيه عقاب في الآخرة

وألا مش عارفين دي كمان أصلاً

عاشقه الرومانسيه said...

قافله الفيس ليه ؟؟؟؟؟؟؟؟؟

ahmed_k said...

فين الجديد ؟؟؟؟؟

P A S H A said...

كل سنة وحضرتك طيبة وبألف خير وصحة وسعادة ورضا وراحة بال وسلام وإن شاء الله يكون عام جديد سعيد عليكي وعلى أسرتك الكريمة وتحققين فيه كل ما تتمنين
:)

أطيب تحياتي