Tuesday, April 8, 2008

بمبى مسخسخ




من اسبوع و انا بيحصل ليا حالة شحن وطنى لحد ما السيجنل عندى بقى تمام و قررت انضم بكل ثقة للاضراب
و كان قرارى انى مخروجش من البيت ولا اعمل اى مكالمة تليفونية ولا اشترى اى حاجة ولا حتى اخلى الاولاد يروحوا المدرسة
و زوجى عارض ده بشدة و قالى انا هروح طبعا شغلى
شركتى ذنبها ايه ماهى لسه مزودة مرتبى من شهرين
و انا بكل وطنية و مشاركة فعالة قعدت اديله محاضرة عن مشاركة الناس الغلابة و مساعدتهم حتى لو انت مش محتاج

و قررت اكون ايجابية و اتصل بكل قرايبى و معارفى و ادلهم على الاضراب و فوايده مستعينة بقصة عمر بن الخطاب رضى الله عنه عن مقاطعة المغالين فى الاسعار

يوم الاضراب الصبح سمعت رن المنبه للمدارس قلت لا و الف لا النهارده اضراب يا جدعان
و صحى زوجى استعدادا للشغل و مسك الجريدة الصباحية و قالى مكتوب ان الحياة ماشية طبيعى و منتظمة و مفيش اى شىء
قلت له كددددددددب دى جريدة بتطلع الفجر عرفوا منين يعنى !!؟؟ هم بيقولوا كده علشان الناس تتشجع و تنزل شغلها
و نزل و سابنى


قعدت افهم الولاد ليه احنا مروحناش المدرسة و اهمية الوقوف ضد الجشع و مساعدة الغير
و طول اليوم مشغلة اغانى وطنية علشان الهب مشاعر الوطنية عندهم
و بدات التليفونات
كل ما التليفون يرن اجرى و اول سؤال ليا ايه اخبار الاضراب
و كانت الاجابة واحدة: اضراب ايه ؟ المصريين دول بوء انتى بتصدقى

قلت فى نفسى لا اكيد العمال هم اللى عاملين الاضراب فى المصانع و كده
و يشاء الحظ ان يتصل بيا ابن عمى و هو بيشتغل فى مصنع كبير و قالى كله تمام يا فندم العمل منتظم و ماشى زى الفل
قلت يبقى مفيش غيرنا ستات البيوت هم اللى قلبهم ضعيف و بيساعد بدون تفكير عملت حركة خبيثة و اتصلت بالسوبر ماركت و سالته لو هطلب حاجات هتجيلى بعد اد ايه قالى لا يا ست الكل مش قبل ساعتين اصل عندى طلبات كتير النهارده

اصيبت بصمت رهيب لحد ما رجع زوجى من الشغل بابتسامة عريضة
و هو بيقولى اخبار الاضراب ايه؟؟
عملت نفسى مش سامعة و وشى بقى لونه بمبى مسخسخ زى بالظبط فضيحة المصريين و اضرابهم
و قلت له ما تيجى ننعشى بره و نفرفش شوية وسط الناس

18 comments:

Arabic ID said...

على رأيك
والطيبين صدقوا
===========
أنا لست ضد فكرة الإضراب
ولكن ما كانش فى وعى كفاية بأهميتها
====
تحياتى لك

همس الاحباب said...

النتيجة مش سلبية زى ما انتى متخيلة
النتيجة شبه ايجابية لانها اول مرة
والشوارع فعلا كانت رايقة وكانها يوم الجمعة
بس خطوة محسوبة ليكى مع انى ضد الاضراب السلبى
تحياتى ليكى
وتقبلى مرورى
خالد

maha zein said...

اولا اسلوبك لذيذ جدا وتحسيه من القلب للقلب علطول
ثانيا حلوة اوي حتة الاغاني الوطنية الي بتلهلبي بيها مشاعر اولادك فكرتيني بفيلم احنا بتوع الاتوبيس
جئت لاشكرك علي تعليقكك عندي وانا هكمل قراية في بوستاتك بس حبيت اقولك اني بحب الاسلوب ده في الكتابة الي بيكون سلس وسهل ولذيذ
تحياتي وتقديري

Rainbow said...

arabic id
ميرسى على زيارتك
انا كمان مش ضد الاضراب بس فعلا لازم يكون بوعى و كمان صعب اوى شعب كامل يعمل اضراب
لازم تكون فى نواة و تنجح و الكل يكمل

تحياتى و مودتى

Rainbow said...

همس الاحباب

شدنى لنى اروح لمدونتك اللوجو بتاعك و كنت فى الاول فاكرة انه لمدونة بنت
و انا بقى بموت فى شجن الحب علشان كده قلت اشوف ايه وحشتنى دى :)

المهم
الشوارع كانت رايقة بسبب العاصفة
لكن 80% من الناس كانت فى شغلها عادى
و 15 % عملوا زيى كده و قعدوا فى البيت
و اعتقد ال 5% الباقين كانوا فى المحلة

انا اتمنى يكون الاضراب زى مقاطعة الدنمارك يعنى مش انقطاع عن العمل و لكن مقاطعة كل السلع الغالية محدش هيموت لو منع نوعين تلاتة من الاكل

المشكلة الحقيقة هى رغيف العيش صعب ده نعمل مقاطعة عليه :(

تحياتى و مودتى

Rainbow said...

مها زين

ربنا يخليكى و شرفتنى بالزيارة
انت اللى اسلوبك جميل بجد و شدنى
وجعتى قلبى مع البنوتة بائعة القطار
و دمعتى عيونى من الضحك على الفستان الفوشيك :))
اللى يعمل كده فى الناس يبقى اكيد دخل قلوبهم و قعد و اتربع كمان :)

تحياتى و مودتى

كاميليا said...

صديقتى الجميلة

انا مع همس الاحباب فى رأيه
النتيجة مش كانت سلبية
بالعكس .. ايجابية وجدا كمان
وهتشوفى قريب شوية تغيرات
إن شاء الله

تحياتى وحبى

appy said...

ههههههههههههه يا عينى عليكى

بس والله فيه ناس نزلت غصب عنهم بس بجد فيه ناس كتير مرحتش فمتتكسفيش قوى

المهم اللى بعد الاضراب ولا انتى متبعتيش احداث المحله

نورتينى يا قمر هناك فى الكوكب

همس الاحباب said...

طب الحمد لله
انا اللوجو هو اللى شدك
تعرفى انى كنت هاغيره
بس دلوقتى لا اسيبه هههه

ويا ترى المدونة عجبتك
ولا اللوجو بس
تحياتى ليكى
خالد

monaliza said...

فكرتينى بمحمد صبحى "قلت ياواد طنش خالص ههههههههه
بس اكيد وبعد اللى حصل فى المحلة بالذات بقى عندك امل انه مش انتى لوحدك اللى عملتى اضراب

Desert cat said...

هو حضرتك ساكنة فين
اصل الشوارع كانت فاضية فعلا فى القاهره وفى اغلب محافظات الجمهورية زى طنطا كمان ومسمعتيش عن اللى حصل فى المحلة
النتيجة ايجيابة بالنسبة لاول مرة والحمد لله
حسك معانا بقى يوم 4/5
تحياتى

عاليا حليم said...

يا بنتى أنا أتهريت تريأة تانى يوم الأضراب ده فى الشغل\حسسونى انى أنا لوحدى الى كنت مضربة فى البلد كلها

مفيش تكافت و لا تشجيع خالص

تحياتى

Rainbow said...

كاميليا
يارب تكون فى اى نتيجة بدون وفاة حد او اصابة حد او حبس حد :(

تحياتى و مودتى

على فكرة اسمك بحبه :)

Rainbow said...

appy

نورتنى بزيارتك الكوكبية
ايوه طبعا موضوع المحلة ده رفع راس الواحد وية بس كان نفسى يكون بدون خساير او عنف

Rainbow said...

همس الاحباب

اللوجو و المدونة طبعا

بس عايز الحق
اللوجو فعلا بناتى شوية :)

Rainbow said...

موناليزا

شرفتنى بزيارتك
اه والله ده انا غلبت محمد صبحى و عملت فيها احمد عز فى فيلم الشبح :)

بس الحمدلله بعدها عرفت انى مش لوحدى

Rainbow said...

Desert cat
انا ساكنة فى منطقة هادية اصلا بس كانت الاخبار بتيجى ليا من المكاتب و الشركات من اصحابى و قرايبى و كان الكل منتظم فى الشغل يمكن بس العاصفة الترابية خلت الناس متعملش مشوار يومها فالعدد قل كتير فى الشوارع

و ربنا يستر على 4/5

Rainbow said...

عاليا حليم

كنتى تعالى اتعشى معنا يا عاليا و خلاص
اهو بردو الواحد يحس انه عمل حاجة فيها مشاركة :)