Sunday, May 25, 2008

رمادى

بعد الحفلة و فرحتنا بها نيجى للجد بقى
بالرغم من ان يوم حفلة توقيع كتاب مدونات مصرية للجيب من احلى الايام اللى مرت على المدونين الا ان دايما الحلو ميكملش
عدم التنظيم وسوء اختيار المكان كان سبب فى ان اليوم يكون شاق علينا
نرجع بالاحداث شوية لورا
على الفيس بوك كان موجودة جروب خاص بالحفلة و فيه تقدر تقول انك ناوى تروح او لا ولاقيت حوالى 200 و شوية قالوا انهم رايحين ده غير اللى لسه مش متاكدين و الرقم ده مفروض يساعد القايمين بالتنظيم للحفلة فى الاعداد لها
لكن للاسف الواضح انها كانت دعوة عامة بدون ما يكون مترتب لها
يعنى من الحاجات اللى كان اختيارها سىء

التوقيت : كان مفروض يكون الساعة 7 لان فى ناس كتير بتخلص شغلها 6 او بتخلص 5 و مشوارها و الزحمة مش هيخلوهم يوصلوا فى ساعة
المنطقة : وسط البلد مكان صعب لأى حد معاه عربية لانه مش هيعرف يركنها بسهولة او انه يركنها فى جراج التحرير و يمشى
المسافة دى فى الحر
المكان : مكتبة عمر بوك استور بردو اختيار سىء لان المكتبة متستحملش وجود اكتر من 50 شخص
ده غير حاجات تانية زى
التنظيم الداخلى للمكان لازم يكون فى اعداد من الكراسى تناسب اعداد الناس لازم لما نجمع عدد كبير كده يكون المكان فيه تهوية مش بقول تكييف و لكن تهوية جيدة ده حتى من الناحية الصحية مش كويس
لازم لما اقول لحد تعالى علشان لك حاجة نازلة فى كتاب اوفر له ركن فيه مكتب و كرسى و اقلام علشان يقدر يوقع للناس و يكتب لهم
اهداء و هو قادر يفكر مش يكتبه و هو ساند على الحيطة ولا على رجله
لازم يكون فى حجرة او ركن مخصص للمناقشات الجانبية يعنى لما تلاتة اربع يحبوا يتناقشوا فى شىء موجود فى الكتاب يلاقوا الجو
المناسب انهم يعرفوا يعملوا ده
لازم لما يطلع اى شخص يلقى كلمة توفر له ان يكون صوته مسموع و يكون واقف فى مكان مريح و واضح للكل مش يبقى هيتكعبل
فى الاسلاك و الناس
لازم يكون فى خدمة - و مش بقول بوفيه- بس ابسط حاجة تقدر تقدم للناس فى الحر ده ازايز ميه و مناديل و كمان يكون فى حمامات مناسبة للجنسين
اما عن المشادة الكلامية اللى حصلت فى وقت كلام صاحب دار النشر حسينا منها ان القائمين على الحفلة مع على دراية كافة ازاى يوجهوا موقف زى ده و ازاى يتعملوا معاه و ازاى لما يتحل يكون جميع الاطراف راضية بالحل ده
اكيد كل واحد منا لمس حاجة من الحاجات دى و يمكن اكتر كمان فياريت المرة الجاية يكون التنظيم افضل من كده علشان التجمع يوصل للهدفه الاساسى و هو ان المدونين يقربوا من بعض و يكون فى نقاش بينهم
ملحوظة : انا معرفش مين المسئول عن التنظيم ولا اقصد بكلامى ان اقلل من شأنه و لكن هى بعض الملاحظات لى كمشاركة مش اكتر

75 comments:

Empress appy said...

كلامك مظبوط جدا وده اللى هيراعوه فى المرات الجايه يا جارتى العزيزة وده اللى قولت لهم بس علشان اول مرة كانوا مخضوضين بجد ههههههههههههه
اما المشاده الكلاميه فواضح ان بتوع الحوار المتمدن اللى هما عاملوا الموضوع ده مش تريقه اسمهم كده فعلا معندهمش اى تمدن وجايين يبوظوا الدنيا بس صاحب الدار لم الموضوع وقال لهم بعد الحف نتكلم
نوعد سيادتكم نوصل لهم وجهه نظرك ونعمله عندكم فى الجنينه ههههههههههههه

واحد من البلد دى said...

مع إنى ماكنتش معاكم بس ليا ملحوظة صغيرة على التنظيم لاحظتها من متابعتى لمدونات أصدقائى..
أبسط شيئ كان ممكن يعمله المنظم..
إنه يجيب كروت فاضية و لما يحضر المدون يسأله المنظم عن إسم مدونته ثم يكتبه فى الكارت الفاضى و يكون هذا الكارت بمثابة (البادج نيم)للمدون علشان ما يجيش كل مدون يبحلق فى اخوه المدون و يقول فى نفسه يا ترى بقى الأخ ده....يطلع مييييييين..؟؟؟؟؟
تحياتى لكى و مشكورة لمرورك و تعليقك

أم أحمد المصرية said...

صديقتي قوس قزح بردوا بحسدكم انكم قدرتم تذهبوا و تحضروا التجمع ده و زي ما قلت لصديقتي عاشقة النقاب المرة القامة التجمع في اسكندرية و انتم اللي حتيجوا عندنا ماشي :)

Anonymous said...

كلام ينم عن عقلية عملية منظمة

أعتقد ان الاستاذ محمد مفيد هو منسق الحدث كله وببعض المعاونين بالامكان ذلك .. حتى لو بفلوس بسيطة .. 200
مشارك رقم كويس

همس الاحباب said...

اختى العزيزة /ام نور
طبعا احييكى عاى تلك الملاحظات الغاية فى الاهمية
ووفرتى عليه الكتابة عنها فى بوست مستقل
واحب اضيف ملاحظة بسيطة ولكنها غاية فى الاهمية من وجهة نظرى
وهى توفير بدجات تحمل اسم صاحب او صاحبة المدونة لسهولة التعارف
مش مهم الاسم الشخصى كفاية اسم المدونة حتى لانقع فى احراج وخصوصا مع الاخوات المنتقبات وغيرهم
انا منذ الساعة السادسة والنصف حتى الثامنة فى المكتبة لم استطع التعرف على اشخاص بسبب الزحام وعدم وضوح الهوية الشخصىة للمدون والمدونة
لذلك اتمنى من القائمين مراعاة بعض اوجه القصور التنظيمية
مع قبول وافر تقديرى واحترامى لمجهودهم الرائع
تحياتى
خالد

تامر حسين said...

اتمني يتراعي كلامك في المرات القادمه ونسمع عنكم كل خير يا رب
تحياتي

خواطر رئيس شاب said...

يبدوا انهم ما كانوش متوقعين الاقبال ده كله

ان شاء الله المرات الجاية يراعوا الموضوع ده

صبرني يارب said...

أنا اول مره ازور مدونتك وكمان ما حضرتش الحفله
بس من كلام الناس وتوقعي للامر حاسه انك محقه فى كلامك جدا

وما حدش بيتعلم بلاش ان شاء الله المره الجايه تكون احسن بس بلييييز استمروا

وبرضه هاحقد عليكى زي ما حقدت على الناس الباقيين انك روحتي وانا لا

رندا said...

عارفة ياداليا

انا سمعت قبل الزيارة دى عن زيارات اخرى
عارفة الكل قال ان مفيش اكثر من 20 شخص راح يعنى فعلا اكيد اول مرة يلاحظوا الاقبال الهائل دة
واكيد سوف يراعوا بعد الاقبال الى حصل كل كلامك ومعاكى كل الحق فعلا فى اختيار المكان وكلامك مظبوط
ايوة فعلا خليهم يظبطوا كلة علشان
رندا رايحة المرة الى جاية ههههههه
لا وكمان يحطوا تكييف اصلى مش بحب الحر هههههههه

ياجامد برافوا عليكى وعلى تحليلك بجد

دمتى حبيبتى قوى

رندا

(احمد سكر ) said...

كل الكلام دا انا قلتله لاحمد

قبل الحفله

وهو فعلا مكنشى متوقع العدد دا كله

هو نفسه اتخض

اول مادخلنا سوى

هههههههه

ان شاء الله يراعو الموضوع دا فى المرات القادمه

تحياتى

اخيكى احمد سكر

Soooo said...

يابنتي ده صحاب المكتبه نفسهم اتخضو
ده اكتر عدد كان بيجي اي حفل توقيع كان بيبقى خماشر تمانااشر نفر

بس اعتقد انهم خدو بالهم من كلامك .. وهيصلحو الموضوع ده بانهم مايعملوش اي حفل توقيع تاني

وبعدين خدي هنا

و بعدين سو ايه لا لا ده عجوز و عنده 30
احنا نجوزها نور و نعمل قفلة فى البلد :))

بقى كده .. يعني انا ذنبي ايه ان نور خطيبتي اتولدت بعدي .. ها .. ذنبي ايه

الحب مش بيعترف بالسنين
الحب بيعترف بالمصاصات
شفتينا واحنا بنبدل مصاصاتنا مع بعض
يااااه
قمة الرومانسيه




سلامووووووووز

قوس قزح said...

appy
ياريت على الاقل الجونينة عندى هوا و واسعة بدل الحر اللى كان هيفطسنا زى البط هههههههههههههههه

انا اعتقد الناس دى جاية علشان موضوع احمد مهنى اكتر من الكتاب

اما بالنسبة للمرة الجاية فواضح انهم متعلموش و عاملين تانى الخميس الجاى فى نفس المكان :(

قوس قزح said...

واحد من البلد دى

اولا نورتنى بالزيارة

و ثانيا عندك حق فى حكاية ال ID
لان الناس مكنيتش عارفة بعض

قوس قزح said...

ام احمد المصرية

يا سلام انتى تأمرى بس تعزمينا بقى على فسحة حلوة فى اسكندرية



ده غير اكلت السمك



و غير الفسحة فى البوغاز عند القلعة




و غير التمشية على الكورنيش



و غير الايس كريم بتاع عزة



و غير الشوبينج فى محطة الرمل




و العشا بقى فى جرين بلازا


بسيطة بس انتى قولى امتى وانا اجى فوريرة هههههههههههههههههه

قوس قزح said...

sherif
بس للاسف حاولت اكون منظمة فى البوست و المسافات بين السطور لكن معرفتيش و كان معلق

شكرا على المعلومة
و فكرة طبعا كويسة ان كل واحد يدفع رسوم اشتراك
بس تفتكر حضرتك ان الكل هيرحب فكرة زى دى ؟

قوس قزح said...

همس الاحباب

فعلا يا خالد دى نقطة مهمة
خصوصا ان فى ناس بتحرج تسال اللى قدامها هو مين
و كان ممكن ابسط شىء يعملوا ID لاصحاب المدونات المشاركة فى الكتاب علشان نعرف مين مشارك


تحياتى

قوس قزح said...

تامر حسين

صاحب الصوت الاصيل
نورتنى بزيارتك السرعة

و ياريت لما يكون فى تجمع تانى تشارك معنا و فرصة نسمع صوتك لايف :)

قوس قزح said...

خواطر رئيس شاب

اعتقد ان كان هدف الجروب بتاع الفيس بوك انهم يعرفوا كام شخص ناوى بجد يروح

بس واضح انهم برده كانوا شاكيين :$

قوس قزح said...

صبرنى يا رب

نورتينى بزيارتك ليا
و ان شاء الله فعلا تكون المرة الجاية افضل من المرة دى

و النقد هنا هدفه اننا نكون افضل علشان نستمر

طيب ايه رايك تتشجعى و تيجى بس من غير ما تكونى انتى اللى سايقة :))

قوس قزح said...

رندا
صديقتى الغالية
تعالى انتى بس و انا اجيب لكى تكييف متنقل هههههههههه
او اجيب لك عبدين سود من بتوع ايام زمان اللى كانوا بيهوى على السلطان بريش النعام ههههههههههههههههههههه


اعتقد ان لو حسبنا عدد المشاركين فى الكتاب بس هيطلع اكتر من 20

عموما فعلا محدش بيتعمل ببلاش

قوس قزح said...

سكر

ياريت فعلا يكون كلامك صح و ياخدوا بالهم

بس زى ما قلت انه عامل تانى يوم الخميس الجاى حفلة فى نفس المكان
و ممكن الناس اللى مقدروش يحضروا يكونوا متواجدين
يعنى العدد بردو غير معروف و ممكن الغلطة تتكرر


نورتنى اخى العزيز

قوس قزح said...

سوووووووووووووووووو

انت جيبت الكلام ده منين ؟؟ انت باعت جواسيس ورا البنيه ولا ايه ؟ من اولها كده ؟؟

و بعدين مش معنى البنت نفسها حلوة و بتعطف عليك و بتدوقك من مصاصتها انك تعيش فى قصة حب خيالية

عايزة اقولك ان البنت وافقت خلاص لما سالتها تتجوزى نور ابنى
قالت اه
اينعم كان فى ايدى شيكولاتة جلاكسى بس اكيد مخديتش بالها منها


سو بجد نورتنى و يارب يكون كلامك صح و ياخدونا المرة الجاية مثلا فى دريم بارك :))

دعاء مواجهات said...

حقولك زى ما قولت لحببايبى الكتييير اللى لاقيتهم راحوا

بجد كان نفسى اوى اكون موجودة بس ف نفس الوقت الواحد كان قلقان وخايف مايلاقيش حد يعرفوا خصوصا انى لسة جديدة نسبيا ف المجاال

تحياتى لكل كلمة قولتيها

نورتينى ديما

فاتيما said...

دوللى
متفقة معاكى تماماً
و أختلف مع الناس اللى بتقول إنهم إتفأجو ...
يا جماعة عنصر المفاجأة لا يتناسب خالص مع كلمة تنظيم
المفروض يكونو دارسين جمهور المستفيدين من هذا الكتاب
و قبل ما يعزموا حد ييجى يشوفوا الحد الأقصى اللى المكان يتحمله و يدعو بدعوات خاصة بقى او يختارو مكان تانى أنسب
أنا معاكو إنها البداية و دايما يبقى فيه لخبطة فى الاول
بس دى دار نشر محترمة موش لسه سنة أولى نشر
يعنى ناس محترفة
بس كفاية و الله إنهم جمعونا برضو
بس أتمنى يتلافو العيوب اللى قولتى عليها يا ودللى
كمان الإخراج الفنى للكتاب تعبان قوى
و كان من الأفضل محتوى الكتاب يكون عن مدونة واحدة كل مرة احسن عشان شخصية كل مدون تظهر بقوة
يا ريت يعملوا كدا فى المرات الجاية
و تحياتى يا فندم

محمد عبد الغفار said...

رغبه المدونين للقاء والتعارف واخلاصهم لها هو السبب الوحيد لنجاح الحفل والأيجابيه الوحيده فيه والتى طغط على اى شئ اخر

قوس قزح said...

دعاء مواجهات
المرة الجاية متخفيش و مش هتلاقى مشكلة فى ان اى حد ميعرفكيش
انا مكنتش قبلت حد قبل كده و مع كده كانت الناس جميلة اوى معايا بالرغم من انهم كلهم عارفين بعض تقريبا

ان شاء الله المرة الجاية اشوفك

تحياتى

قوس قزح said...

فاتيما

تصدقى انا بردو شايفة حكاية انهم اول مرة دى حجة ضعيفة
و ان العدد اللى جيه اكتر من تواقعتهم
ده ابسط شىء يشوفوا عدد الناس اللى قالت اه اكيد جاية على الفيس بوك
و الناس اللى منشورة لها حاجات

اما بالنسبة للكتاب اعتقد ان غلافه مناسب لانه من عينة الكتب الصغيرة للجيب
يعنى ممكن تاخديه معاكى اى مكان و ده لازم يكون صغير و وزنه قليل و مرن

و فكرة طبعا ان يكون فى كتاب لكل مدونة بس لازم يكون تكون المدونة لها اكتر من عشرين موضوع و يكون اغلبهم يستاهل النشر و اعتقد ده مش سهلة تواجده لان المدونات جزء كبير منها فضفضة عن موقف شخصى و ممكن يكون غير مناسب للنشر

نورتينى بزيارتك الغالية

قوس قزح said...

محمد عبد الغفار

عندك حق لان اغلب ملاحظاتى دى اخدت بالى منها قبل اللقاءو التعرف على المدونين

Tamer Nabil Moussa said...

كلامك صحيح

واتفق معاكى

وانا فى حالتى دى لولاا رامز عباس جاب ليا كرسى كنت وقعت من طولى عشان رجلى المكسورة

اتمنى اشوفك المرة الجاية واتعرف بحضرتك


تحياتى

اهو ده عيبه said...

ازيك يا دوللى

اولا سامحينى اذا كنت نسيت او دماغى تاهت اننا اتكلمنا

ثانيا كل اللى قلتيه كلام صح واتمنى انه يؤخذ فى الاعتبار فى مرات قادمه

وجميل اننا نقول الايجابيات والسلبيات علشان نتفادى اللخبطة اللى حصلت دى
بس على الرغم من كل ده كان يمو جميل وكفايه اننا كلنا اتقابلنا

تحياتى

قوس قزح said...

تامر نبيل

الف سلامة عليك
الله يكون فى عونك ده احنا رجلنا سليمة و كنا هنقع من طولنا من الحر و الزحمة

ان شاء الله تقوم بالسلامة و نتجمع تانى


تحياتى

Unknown said...

هو فعلا كان فى نقص ما
يعنى بس الاهم ان المدونين اجتمعوا على حلم قدروا انهم يحققوه فى الاول وبعدين
هتيجى النواحى التانية واكيد ان شاء الله المرات اللى جاية هتكون افضل

تقبلى تحياتى

قوس قزح said...

اهو ده عيبه

ازيك يا دوللى
يا ستى و لا يهمك كلنا من الزحمة كنا تايهين

ايوه فعلا لازم نعرف السلبيات ايه و نغيرها مهو مش معقول هنسكت كمان فى العالم الافتراضى و انا معتبرة الحفلة دى من كتر ما هى جمع الحب بين الناس انها مش من الواقع و انها جزء من العالم الافتراضى

و يا رب يتكرر و يكون احلى

تحياتى

كلاكيت تانى وتانى said...

كلامك صح وانا برضة دة كان رااىى بس فرحة اللقاؤ طغت ع الجميع كمان كان فية مشكلة فالكتاب المفروض كل كاتب اللى يختار اللى يتحط يعنى يتم اختيار مدونة محددة ويتبعت لصاحبها ايميل يرشح افضل ما فى مدونتة ويستعد للرد ع الاسئلة وتكون التدوينة بتعبر عنة وعن اتجاهاتة عشان الافادة كمان لازم تكون اللقاءات دى وسيلة لتعريف المدونين ببعض لما بتبقى فمكان واسع ومريح وانا بفضل انهم يتفقوا مع ساقية الصاوى ع انها تنظم الحفلات دى افضل مكان ثقافى وواسع ويبقى فية رسم دخول لتحسين الحدمة والمشروبات
ياريت حد من المنظمين يقرا دة ويحاول ينفذة
بوست جميل يا حبيبتى اشوفك بخير
تحياتى

قوس قزح said...

هيثم الدهشان

سعيدة بزيارتك
و سعيدة انى اتعرفت عليك

المهم ان القائمين على التنظيم يعرفوا ايه الحاجات اللى كانت مضايقة الناس علشان يقدروا يتفادوها المرة الجاية


شرفتنى بمرورك

قوس قزح said...

كلاكيت تانى و تانى

انا بصراحة معرفش اختيار المواضيع فى الكتاب تمت ازاى لكن لو تمت بدون ما يكون المدون له راى فى اى من البوستات اللى تتنشر دى طبعا حاجة مش مفروض تتعمل
لان المدون اكتر واحد يحكم على شغله و يقدر يعرف انهى بوست بيعبر عنه

اما ساقية الصاوى فى طبعا من اجمل الاماكن فى مصر لاى اجتماع ثقافى و فيها اكتر من مكان ممكن يتم فيه الاجتماع ده

ياريت بجد يوصل كلامنا للناس دى

نورتينى :)

الربان said...

تحياتي

اولا مبروك تجمعكم العظيم...و دايما علي الخير ان شاء الله.

واضح من كلام حضرتك...ان المنظمين كانت
هذه المرة الاولي لهم...و لهذا شاب التنظيم و الترتيب بعض القصور...لكن بالتأكيد هي تجربة مفيدة للجميع.

تحياتي و تقديري

momken said...

عندك حق
انا قعدت دقيتين ومصدقت ناس طلبتنى قولت اروح امريكين وارجع تانى
مرجعتش بسبب الزحمه والدربكه

ربنا يهدى الجميع
ويخلصنا من عشوائيه التعامل

تحياتى

Asmaa mahaba said...

انا مجيتش اصلا بس انا عن نفسى بحس ان بلحه المعز خروف مش بيقولوها كدا
وعموما النقد فى حد زاته مادام حيرفع من الكفاءه يبقى مفيد اتمنى تتعدل المره الجايه ان شاءالله ممكن يعملوها فى جنينه الازهر هههههههه بس بلاش خميس وجمعه وسبت عشان الدخول غالى
تحياتى ليكى سومه_87

ابو لمعه 2008 said...

طبعا ناصحه كاتبه لون مدونتى مفيهاش اسود
لان قوس قزح
او الوان الطيف مفيهاش اسود
اول زياره
ارجو ان تتقبلينى ضيفا لمدونتك

mohamed said...

معاكي حق ..
انا مهتمتش بين جوا ولا بيقولوا ايه
وحتى كنت مستغرب الناس اللي بتخلص شغلها 7 دي هتيجي ازاي

بس هو كان يوم جميل ببعض الناس اللي فيه

أم أحمد المصرية said...

صديقتي قوس قزح دخلت لرؤية جديدك فلم اجد لعل المانع خير و ادعوك لرؤية جديدي

أسوور said...

قرر رئيس مجلس ادارة الجريدة مشكورا أن يتبنى كل ما يكتبه المدونون
وان يفرد مساحة لا بأس بها لبوستات البلوجرز
كما وافق على نشر البوستات المرشحة بتوقيع كتابها وصورهم
وذلك ايمانا منه بقوة التدوين وبأنها صوت المصريين
***
على كل مدون يرغب فى نشر مقالات - تحقيقات - قصص - نقد - ادب - شعر - سياسة او أى كتابات لم يرد ذكرها
ان يرسل البوست المرشح مذيل بتوقيعه وعنوان المدونة والإسم الحركى ان اراد
مرفق بصورة شخصية له
على الإيميل التالى

amyasser@hotmail.com

أو ترك اللينك الخاص بالبوست والمعلومات الخاصة بالمدون فى تعليق على العنوان التالى

www.amyasser.blogspot.com

تحت عنوان خاص لجريدة الأسرة العربية
الجريدة تصدر الإثنين من كل أسبوع

بنوته مصرية said...

والله عندك حق فعلا

وزي ما قال اخي واحد من البلد دي

احنا كنا بنعرف بعض بلعافية ههههههههههههه

ياريت ينظمو الحفلة الجاية

بنوته مصرية said...

صحيح يا قمر ليكي تاج عندي تعالي خدية

تحياتي

بنوته مصرية said...

هههههههههههههه

لسة شايفة كلام سوو

شكلة بيراقب بنتي لاء مينفعنيش الراجل الشكاك هههههههههههه

كلاكيت تانى وتانى said...

http://motalaka-with-out-fear.blogspot.com/
ياريت تزورى مدونتى الجديدة مع صديقتى فوضى الحواس

Soooo said...

و بعدين مش معنى البنت نفسها حلوة و بتعطف عليك و بتدوقك من مصاصتها انك تعيش فى قصة حب خيالية
---
يالهوي عالمدونات اللي هتولع ياجرعان
ده الحاج سبوت وابنه الاستاذ بلوج مش هيلاحقو عالدم اللي هيبقى للركب فيكي يانت

لكن ولا يهمني
كصة حبنا اعزم من ايتها كصه
----

وبخصوص التنظيم لحفلات التوقيع اللي جايه
انا اقترحت على القائمين بالموضوع ده حاجه ماعرفش اذا كانت تنفع ولا لأ
قلتلهم لو في حاجه زي كده .. في اماكن تانيه واسعه وكبيره وفيها كل اللي قلتي عليه .. زي مثلا مكتبة المجلس الاعلى للثقافه في الاوبرا ودي سهل ان مدير دار النشر يكلمهم بصورة رسميه ويعرض عليهم الحدث ويوضحلهم انها تجربة جديده وفريده من نوعها
وفي كمان مكتبة خان الساقيه .. في ساقية الصاوي .. واعتقد ان القائمين بالموضوع ده في ساقية الصاوي مش هيعترضو

الحكايه ومافيها انهم بجد بجد ماكانوش متوقعين العدد ده

ده انا كنت هناك النهارده ماكانش في غيري وابراهيم واتنين جم غلط



سلامووووووووز

عروسة ننوسة said...

بجد كلامك صح جدا انا بردوا كنت موجودة هناك وللاسف مقدرتش اقعد فترة طويلة لان المكان كان زحمة وحر جدا ..انا معاكى فى كل ملاحظة قلتيها ...اشكرك

Ehab said...

نورينا برايك في البوست الجديد

سلاااااااااااااااااام

رئيس جمهوريه نفسى said...

انا بصراحه ما تعملتش مع الحدث علشان اقيم الى حصل بس يارب يارب المره الجايه تكونى احلى ويارب ااقدر اجى ان شاء الله

عًٍمًرٌٍوٍ آلنْوٍبٌَِى said...

التنظيــــم من اكتر العيوب الموجوده فى بلدنا

اتمنى انهم ياخدو بالهم فى المرات الجاية

علشان الغلطات دى مش تتكرر تانى

تحياتى

رئيس جمهورية اسوان العربية

واتمنى انك تشرفى المدونة بتاعتى المتواضعة

قوس قزح said...

الربان

الله يبارك فيك و يا رب المرة الجاية اتشرف بمعرفتك
هى فعلا قد تكون اول مرة بهذا العدد و المرة الجاية هى اللى هتحكم بجد عليهم

اكيد كلنا استفدنا بمعرفة بعض و ده كان اهم حاجة

تحياتى و نورتنى

قوس قزح said...

momken

لا مش ممكن .. انت كنت موجود ؟؟؟
طيب ليه مستنتش شوية
يا خسارة كان نفسى اتعرف عليك .. بس بقى ايه جاب عمر بوك استور
للاميريكين :)

يارب المرة الجاية تكون مش عشوائية

تحياتى

قوس قزح said...

سومة
هههههه المثل اسمه بصلة المحب خروف
بس خاليه بلحة المعز اشيك على الاقل ههههههههههههههههههههه

اعتقد ان فى النوعية دى من الحفلات يفضل مكان مغلق بس لا يمنع انه يكون مكيف و واسع ، او ممكن مكان له جزيين جزء مقفول علشان الندوات و كده و جزء تانى مفتوح للتعارف و الخدمات

اسعدنى مرورك

قوس قزح said...

ابو لمعة

طبعا ناصحة :))
و يا هلا بك فى اى وقت

بس هو انت تقرب لعبده الرايق ؟؟


مدونتك مختلفة و شقية

مبروك عليها

تحياتى

قوس قزح said...

mohamed
تصدق ان فى كتير مهتموش باللى اتقال من صاحب دار النشر او حتى تابعوا كلام المدونين و ده نتيجة الحر
حتى بعض المشاركين فى الكتاب بموضوع لهم من الحر و الزحمة و عدم وجود مكان مناسب لكتابة اهداء على الكتاب فضلوا انهم يمشوا


تحياتى

قوس قزح said...

ام احمد المصرية

شكرا جداااا على سؤالك
بس بصراحة كنت مزوغة كام يوم كده :)

اشكرك لمتابعتك الجميلة

قوس قزح said...

اسوور

اشكرك على المعلومة

تحياتى

قوس قزح said...

بنوتة مصرية


انا بردو بقول كده من اولها شك و بتاع .. مينفعش ابدااا

و بعدين تاج يا رودى !!! ده انا لسه مستجدة و فاتيما قامت بالواجب و بعتت ليا تاج و لحد دلوقتى ماسكاه و مش عارفة اخبيه فين .. يبقوا فجاة كده اتنين .. اروح انا بهم فين دول :'(


هروح اشوف ايه حكايته ده و يارب يطلع هو بتاع فاتيما

ميرسى على التاج

قوس قزح said...

كلاكيت تانى و تانى

انا جاية وراكى اهو حالا :)

قوس قزح said...

ههههههههههههههههههههههه

جم غلط ازاى يعنى ؟ تايهين فى العمارة ولا ايه ؟؟

وبعدين هو اللى راح مرة هيروح تانى ؟
ده لو قلت ليا وصلوا المكتبة بشقة على النيل خلاص توووبة

بس حلوة فكرة الاوبرا دى ياريت بجد يهتموا و يشوفوا اماكن زى دى

----------
حاج اسبوت مين و ابنه بلوج مين

ده انا ام جوجل صديقتشى الروح بالروح
هخليها تقف على اول السيرفر و توزع دعوات الخطوبة
و على فكرة انا عاملة حسابى و سميته نور الدين علشان اللغبطة P:

بتحب المراوح استاند ولا بوكس ولا حائطى ؟ اصلى شايفة دخان و انت عارف الحر بقى :))

نورتينى يا سووو و انا وصلت الحلقة السابعة

قوس قزح said...

gannah

نورتينى بزيارتك
و اشكرك على مشاركة الراى :)

قوس قزح said...

الشنكوتى الكبير

بس كده انت تأمر :)

سلاااام

قوس قزح said...

رئيس جمهورية نفسى

ان شاء الله يا محمود
انا كنت موجودة وقت مكالمتك للمجموعة اللى قاعدة فى البورصة و شوفت ازاى الناس دى كانت فرحانة بك و بتحبك

يارب فعلا المرة الجاية تكون وسطنا علشان تحس بالمشاعر دى بنفسك

تحياتى

قوس قزح said...

عمرو النوبى

واضح ان الجنوب قريب هيبقى منفصل و كله جمهوريات :))

اشكرك على مرورك و زيارتى لك تمت بالفعل
و مدونتك تستحق الزيارة :)

رئـــــيسـة حزب الأحلام said...

كلامك فى الجون وفعلا جميل منك انك تقولى الملاحظات دى عشان الحفلات القادمة تكون اكثر تنظيما وجميل حكاية البادج اللى دى اليها واحد من البلدى
جزاك الله خيرا اختى

Empress appy said...

انتي فيم يا قمر مختفيه

قوس قزح said...

رئيسة حزب الاحلام

نورتينى بزيارتك
و يارب يكون الكلام وصل لحد من القائمين على التنظيم
هههههههههههه حلو التنظيم دى هنروح كلها فى داهية بعدها ..اللى اسمه مكتوب هنا يستخبى بقى

قوس قزح said...

ابى
انا لسه كنت عندك مش شوية
ربنا يخليكى يا جميل على سؤالك

ابقى خدى ايميلى من الفيس بوء و ضفينى عندك

سلام يا جميل

Ahmed Al-Sabbagh said...

جميل اوى

بس نراعى الاتى

ان مكان وسط البلد ربما يكون صعب شوية للى معاهم عربيات بس ما حدش ينكر انه مناسب للغالبية العظمى من الناس تخيلى لو عملناه فى مصر الجديدة مثلا او شبرا او الطريق الصحراوى : )

ثانيا دى سلمة اولى فى تجربة وكان لازم يبقى فيها اخطاء زى دى
انا حاولت قدر امكانى انظم واجيب كراسى زيادة واجيب مية
وكنت متوقع ان العدد يوم ما هيبقى كتير ان 100 واحد هما اللى هيجى
وده من خلال تجارب حفلات توقيع سابقة
لكن خاب ظنى
ووافقت على اقتراح مكتبة عمر بوك ستورز
مع اننا كنا نتمنى نعملة فى ساقية الصاوى
واكيد ان شاء الله لو ربنا كتب لنا نعمل اعداد اخرى هيكون فى كلام تانى

وبما كلامك جميل وموضوعى جدا فاتمنى تكتبى بوست ولو صغير عن الكتاب نفسة ونسمع رأيك لان رأيك يهمنى

تحياتى

أحمد الصباغ

Tamer Nabil Moussa said...

ازيك اختى العزيزة

اخبارك اية

فينك مش باينة

تحياتى

قوس قزح said...

احمد الصباغ

شكرا على استجابتك السريعة

انا بس احب اوضح ان نقدى مش هدفه شىء غير ان المرات الجاية نتفادى اللى حصل
بالنسبة لوسط البلد انا عارفة انها مكان مناسب لانها ببساطة وسط المدينة
لكن بردو فى اماكن كتير سهل الوصول لها
و اللى ناوى يجى مش هتفرق معاه وسط البلد من مصر الجدية
ده فى ناس كتير كانت جايبة من محافظات تانية فاظن مش هيفرق معها وسط البلد من مصر الجديدة او الزمالك

طبعا من التجارب السابقة لك كل الحق تتوقع عدد اقل .. لكن انت ناسى ان المرة دى المدونين هم نفسهم اصحاب العمل

اشكرك على ثقتك فى رائى و ان شاء الله هقولك رائى فى الكتاب بموضوعية

اشكرك على زيارتك :)

قوس قزح said...

تامر نبيل

انا اهووو

كنت مزنوقة فى تاجين مرة واحدة :)

Sara said...

أنا مرحتش اللقاء الجميل ده واللى بجد كنت بتمني اني اروحه على الرغم اني مش معروفة في العالم التدويني خالص
بس انا لي في التنظيم وتقدري تقولى لي خبرة فيه
فانا عارفة انك بتقولى العيوب دي بنية حسنة عشان الناس تتلافها بعد كده وعشن كده انصحك توصلي الكلام ده ليهم وفي نفس الوقت تعذريهم لاني بجد عارفة ومجربة حكاية انك تنظمي حدث او حفلة لاول مرة وانتي مش محترفة يعني هاوية