Monday, June 2, 2008

مملكة الالوان





جالى تاج من الغالية فاتيما روح قلب المدونين و احترت اخبيه فين و فجاة لاقيت تاج تانى وصلنى من الجميلة رودى و هنا اكتشفت ان انا مش اد التاجات دى ولازم بسرعة اخلص منهم



التاج الاول عن الاحلام


و ده من الغالية فاتيما



أذكر 5 أحلام تخص ماضيك كنت هتتخلى عن إيه فيها و هتتمسك بإيه لحد دلوقتى




اهم حلم دايما احلم به طول حياتى هو ان امى كانت تبقى لسه على قيد الحياة .. للاسف توفها الله و انا عندى حوالى 5 سنين و مقدرتش احس معها بالامومة .. و بتمر عليا لحظات كتير اوى بكون محتاجة لها و بتخيل وجودها معايا كان هيفرق اد ايه و اوقات تانى اقول يمكن فراقها و انا صغيرة ارحم كتير من فراقها و انا كبيرة و عارفة و حاسة هى ليا ايه .. و بستغرب اوى على الناس اللى مش حاسة بقيمة امها و بقيمة حضنها .. واعتقد الحلم ده هيفضل طول العمر جوايا




كنت بحلم اطلع فنانة - مش ممثلة ولا مغنية ما كل البنات بتحلم بده - يعنى كنت ابقى مبدعة فى مجال فنى يدوى .. يكون ليا فن من انتاجى من افكارى .. مثلا زى تمثال .. مبنى معمارى .. لوحة ..عقد من الفضة ..تصميم ازياء ، و الحمدلله قدرت احقق جزء منه فى حياتى و اشتغلت فترة جرافيك ديزاينر بس لسه حاسة الحلم ناقصه كتير اوى




ابقى ولد .. اه ابقى ولد .. غريبة دى ؟ ده بقى كان حلم نفسى فيه اوى اوى ..هتقولوا طيب ليه .. هقولكم مش علشان انا مش حابة انى بنت ..لالالا .. علشان الولد واخد حقه تالت و متلت فى مجتمعنا و دايما له حقوق اكتر مع ان فى بنات و الله ب 100 رجل .. اهو انا بقى كنت عايزة ابقى ولد بس بنفس دماغ البنت يااا سلااام كانت تبقى هايلة الحكاية دى .. و محدش يقولى روحى اعملى عملية لانه خلاص تو لييييييييت


اوقات كده تخدنى الجلالة و احلم انى اختفيت .. زى الافلام لما بطل يشرب حاجة او يلبس حاجة و يختفى و يعمل بقى كل اللى فى نفسه ..و اول حاجة هفكر فيها انى هروح ازغزغ كل الناس اللى عاملة جد و منشية كده لحد ما يترموا على الارض من الضحك ..و بعدها اروح على الناس المفترية اديهم بوكس فى وشهم و اعضهم و اخد حق الناس المظلومين منهم ..و بعد كده اشوف الناس بتتكلم عليا ازاى ورائيهم فيا ايه ..هروح بقى كل الاماكن اللى نفسى اروحها و اهيص و اجنن الناس



كتير اوى من الفررررراغ كنت بحلم احلام يقظة و كانت امنيتى ان الاحلام دى فجاة كده تتحقق - لو حلوة يعنى - و تبقى واقع و اقدر اتحكم فيها ... هو فى كده ابدا ؟؟ ياريت .. اما احلام صحيح



أذكر خمس أحلام تخص مستقبلك و ما تتمناه منه



اتمنى يكون اولادى ذرية صالحة و اربيهم كويس اوى على حب الخير و طاعة ربنا


اكون قريبة من ربنا اكتر من كده و اقدر اكون انسانة مسلمة مؤمنة


بحلم ان المصريين ترجع لهم كرامتهم و عزيتهم و يكون زماننا هو الزمن اللى العالم كله يفتكر مصر به مش زمن الفراعنة الله يرحمهم بقى اللى من سبعتلاف سنة


بحلم انهم يعملوا اختراع ينقل اى حاجة و اى حد من مكان لمكان عن طريق تفتيت الذرات و تجمعها تانى ، يعنى لا مواصلات و لا شوارع زحمة ولا دوشة و لا عادم ولا حتى مرور

اخر حلم و اكبرهم ان الاسلام يتفهم صح من كل الناس انه دين سماحة و سلام و حرية و حب و كل حاجة جميلة فى الدنيا



أذكر شخصين - على الأقل - متواجدين فى حياتك كنت تتمنى وجودهم من قبلهم


مش شخصين .. هم حاجتين
الموبايل .. لان كان فى حاجات كتير ممكن متضيعش منى لو كان معايا موبايل و اقدر اتابعها
المدونة .. لو كنت بدون من زمان كان فى شحنات كتير خرجت منى و كانت اكيد هتفرق معايا فى تكوين شخصيتى و اظن ان مدونة كل واحد منا فرقت فى شخصيته بالفعل



أذكر شخصين - على الأقل - غير متواجدين فى حياتك و تتمنى وجودهم مستقبلا فى حياتك و حياة أولادك



امى ثم امى ثم امى و بس



تهدى لمين التاج



رندا كلمة فى حياتى


عمرو النوبى


همس الاحباب


اسكندرانى اوى


شريف


ابو خالد




نيجى بقى لتانى تاج و هو من الجميلة رودى صاحبة مدونة بنوتة مصرية


اذكر عشر اشياء عن نفسك ؟


علشان اكون عادلة هقول خمس عيوب و خمس مميزات و مش هتكلم عن كل واحدة لان طبعا هعرف اتكلم عن المميزات احسن و اكتر


بس المهم ان الصفات كلها وحشة او حلوة تكون معتدلة فى الانسان علشان متقلبش بالعكس معاه


صفاتى هى
عصبية اوقات جدا لدرجة ان انا نفسى بقول على ايه ده كله



دماغى ناشفة و عنيدة و مش بقتنع بسهولة براى حد طول ما رائى عجبنى



قاسية فى بعض الاحيان و خصوصا لما حد يتهاون فى مسئولياته و بعتبره ضعيف و مدلع



لما حد بيعمل فيا حاجة تجرحنى مش بقدر اسامحه حتى لو اعتذر .. ممكن اتعامل معاه تانى بس بحس ان فى باب اتقفل بينى و بينه و جوايا بحس بلامبالاة ناحيته



بنقد بطريقة حادة و ساعات ساخرة ممكن تزعل الناس منى .. بس والله بيكون قصدى خير مش غلاسة او يعنى تقليل مقام

طيبة و بلتمس للناس عذرها فى افعالها ..بحط نفسى مكانهم و علشان كده مش بزعل بسهولة بس لما بزعل انسوا انى ارجع زى زمان



اجتماعية و بسيطة و بحب الناس و بعرف اتعامل مع كل النوعيات و الطبقات و معنديش كلاكيع فى التعاملات معهم



خدومة و بساعد الناس على اد ما اقدر لدرجة ممكن اجى على حساب ظروفى و حياتى و لو حد عزيز طلب منى حاجة ميهداش ليا بال الا لما اعملها له



صبورة و عندى قوة تحمل جامدة و اد المسئولية لو اتحطيت فيها



بحب الجمال اوى .. فى كل حاجة .. و بحب احسه لوحدى بعيد عن تعليقات الناس واحساسهم به علشان ساعات بيضيع عليا طعم اللحظة دى لو مش جواهم نفس احساسى



ابعت التاج لخمس اشخاص


انا هختار خمسة احب اعرف شخصيتهم اكتر مع ان فى ناس منهم عارفة انهم ممكن جدا مش يجاوبوا عليه بس اهى محاولة



امراة تقول الذى لا يقال


محمد عبد الغفار


عدى النهار


ممكن


كاميليا



71 comments:

بنوته مصرية said...

ربنا يرحم والدتك وولدي ويدخلهم فسيح جناته ويجمعنا بيهم في الفردوس الاعلي

اجابتك رقيقة اووي علي تاج فاتيما واحلام احلام بنوته جميلة ورقيقة

وانتي فعلا جدعه اووي وخدومه جداا وطيبة وفيه صفات احلي كمان مش هتكفي اوراق واقلام

ربنا يخليكي لي اولادك وزوجك ويهدي سرك

لكي محبتي
ميرسي يا قمر علي سؤالك علي عروسة ابنك

تيجي تشوف مفقوعه مع حماتها
هي دي الحماه ولا بلاش هههههههه

كاميليا said...

اول حاجة عايزة اسجل اعجابى باغنية البلوج

نيجى للتاج الأول

أحلام جميلة ربنا يحققها لك
يارب

التاج التانى
رقيقة اوي، باحسك هادية وناعمة

اما عن اهداء هذا التاج لى
اشكرك من قلبى انك تذكرتينى
انا جاوبت التاج ده قبل كده
كان فيه هوجة فى كل المدونات عاملها التاج ده
وكنت من ضمن الهوجة دى وقتها
:D

دمت بكل الوانك الجميلة
قوس قزح يعبر القلب
فيلون المساحات المظلمة
ويعطيها من الوانها لمسات فرح

تحياتي وحبى

رندا said...

دوللى

رحم الله والدتك
وادخلها مدخل صدق وطول ماليها ابنة جميلة زيك فاكراها وبتدعيلها
هى هتكون فى النعيم ان شاء الله

وردك فى البوستين حلوين قوى

بقى كنتى عايزة تبقى ولد
اتصدقى كنتى هتكونى ولد زى القمر برضة وكل البنات كانت هتجرى وراة هههه
و متشكرة على التدبيسة
بتاعة التاج هههههه

دمتى حبيتى قوى جدا

رندا

عبده الرايق said...

طبعا باين فعلا حتى من اسمك انك فنانه
قوس قزح
هو الوان الطيف بكل سحرها وجمالها
وانا حاسس فعلا ان عندك موهبه فنيه
اما حكايه الولد والبنت
فأظن ان فى بنات كتير اجدع من الف ولد
حتى ان فى بنات متحملات مسئوليه كامله

appy said...

ولد ولد ولد يا راجل ههههههههههه عموما انت مرحتش بعيد انتي فيك الصفات الجدعنه قوي بس فى شكل بنت قمرررررررررر
ربنا يرحم والدتك يا رب
وعلى فكره انتي قولتى عن نفسك اللى شوفته فيكي فى التاج يا حبيبي خالص

يا مراكبي said...

أخيرا قدرت أشوف البوست اللي إتكلمتي فيه عن حفل التوقيع .. بقى لي مدة كل ما أدخل المدونة هنا ألاقي بوست قديم وكأن المدونة معلقة أو مهنجة

المهم .. جميل عنوان البوست ده .. مملكة الألوان .. معبر جدا عن تنويعات التاجين اللي في البوست

قوس قزح said...

بنوتة مصرية

ههههههههههههههههه و الله مفقوعة مرارتها دى صعبانة عليا اوى

و ربنا يرحم اموتنا جميعا

و يخلى لكى نور يارب و تعوضك عن فقدان اى حلم فى الدنيا

و ميرسى لكلامك الرقيق عنى .. اخجلتنى و الله

قوس قزح said...

كاميليا

فعلا هى اغنية جميلة من احلى ما غنت انوشكا

امتى جاوبتى التاج ؟ انا دورت عندك ومالقيتش حاجة قبل ما ابعته

ياريت تبعتى ليا اللينك لانى احب اعرفك اكتر :)


دمت بكل الوانك الجميلة
قوس قزح يعبر القلب
فيلون المساحات المظلمة
ويعطيها من الوانها لمسات فرح


الله عليكى دايما لكى لمستك الرقراقة

نورتينى

قوس قزح said...

رندا

اللهم امين
ربنا يخليكى


هههههههههههه و مين قالك انى كنت هجرى منهم (*_^)

ده انا كنت هبقى ولد حنين اوى و مقدر ظروفهم جدا

و بعدين دى مش تدبيسة لكى يا جميل
ده انتى مليانة احلام .. يعنى مش محتاجة تفكير كتير و هتلاقى القلم بيكتب لوحده


دمتى ليا حبيبة و صديقة غالية

قوس قزح said...

عبده الرايق

بحس ان شخصيتك الحقيقة هى اللى بترد بها على بوستات الناس

ميرسى على حسن ظنك بيا

اما بالنسبة للبنات فهم فعلا متحملين المسئولية اكتر من الرجل و مع كده تحس انها درجة تانية فى بيت اهلها او بيتها و ان محدش مقدر تعبها

فاتيما said...

دوللى
إنا كمان كنت عاوزة أبقى ولد عشان نفس إسبابك
أخرج و أدخل على كيفى و أعمل ما بدالى و أقول أنا حر
بس حالياً فيه رجالة أكثر قهراً من الستات و فعلا فيه بنات أنضج و اجدع من ميت راجل
و حكاية الارجل الخفى دى برضو كانت من أحلامى لما قريتها زمان فى مجلة سوبرمان و لقيته بيتعذب أستغربت قوى ؟؟
و الصفات مشتركة بينا لأننا من نفس البرج عشان كدا قلبنا أبيض قوى لحد ما يقلب قلبة سودا
و بنتعامل سواسية مع أى حد المهم نكون مرتاحين و مفيش ضغوط علينا
و أنا متهيألى إنك أم هايلة و ربنا واصل فى عمر والدتك - الله يرحمها - فيكى و يديكى طولة العمر مع الصحة
و روح قلب المدونين دا وصف كبيييير قوى عليا يا دوللى
أنا مستهولش خالص
بس تسلميلى يا رب و منحرمشى منك
لازم تيجى يوم الجمعة و التفاصيل كلها عند خيخة نوران
يا رب تقدرى تيجى عشان نقضى يوم حلو مع بعض و تجيبى العيال
تحياتى يا سيدة الألوان

قوس قزح said...

appy

ربنا يخليكى يا ابى على كلامك الجميل ده

لو كنت ولد و اسلام سمع كلامك ده كان طار فيها رقااااااااب ههههههههههه

يارب يرحم جميع اموات المسلمين

نورتينى بزيارتك الكوكبية :)

قوس قزح said...

يا مراكبى

غريبة اوى الحكاية دى .. يمكن العيب عندك من السيرفر ؟؟

بس المهم ان الزيارة تمت فى الاخر غصب عن جوجل و اتباعه :)

اسعدتنى بالزيارة جدا

قوس قزح said...

فاتيما

ايوه كده نورى تانى المدونات .. غيابك كام ساعة كان محسوس اوى على فكرة


طيب تصدقى لو كنا ولادين واصحاب كنا هنكسر الدنيا ههههههههههههه

لا وكمان لو نبقى بنختفى ههههههههههههههههه ده كان حصلت كوارث


انت اللى ام جميلة و تستاهلى فعلا اللقب ده و بشهادة حب المدونين لكى

و هروح عند خيخة اهو اشوف المعاد حالا و يارب اقدر اجى

شرفتنى بزيارتك يا جميل :)

امرأة تقول الذي لا يقال said...

من عينيا والله حاضر (:
أول ما أخلص بس امتحانات عشان أعرف أمخمخ ((:
وأول ما أجاوبه هقول لك
ومتشكرة ليكي جدا بجد

ادم المصرى said...

والله يا فنانه القوز قزح انا البنات اى اعرفهم بجد اجدع من ميت شب عرفتو بيقفو جمبى ديما وعمرهم ميفكر انى شب وهما بنات فرى اوى مش عشان هما وحشين لا بس وصقين من نفسهم بس بجد مدونتك وبوستك عجبونى موت ياريت اتشرف بيكى فى مدونتى السلام ختام وامانه

قوس قزح said...

امراة تقول الذى لا يقال

انت لسه كل بتمتحنى ؟ ربنا يكون فى عونك
طيب انا مستنياكى تقولى انك جاوبتى التاج لان ده شىء هيسعدنى جدا :)

ربنا يوفقك

قوس قزح said...

ادم المصرى

اللى لحظته فعلا ان فى بنات كتير بتكون جدعة اوى مع صديقهم الولد .. و بردو فى اولاد كتير بيكونوا جدعين جدا مع صديقتهم البنت .. و الاغرب ان نفس الشخص ممكن يبقى ندل مع صديق من نفس نوعه .. هل اختلاف الجنس له علاقة بأظهار الجدعنة ؟؟


اشكرك على مرورك و انا فعلا زورت مدونتك قبل كده

تحياتى

همس الاحباب said...

اميرة الالوان
طب والله طلعت انى بافهم لما قولت عليكى اميرة الالوان
تاجين مرة واحدة يا ام نور
عامة ميرسى على التاج وده ثالث مرة يجينى يبقى لازم اجاوبه حكم التالتة تابتة
بس اجاباتك جميلة وصريحة قوى
والحمد لله انك طلعتى بنت
مين عالم لو طلعتى ولد كان حال البنات ايبقى ايه
وربنا يرحم والدتك
ويفرحك باولادك ويسعدك فى الدنيا والاخرة
تحياتى

عايش ولكن said...

اول زياره للمدونه
وبجد اعجبتنى جدا
اما بالنسبه للبوست والتاجين
اجاباتك فيهم موفقه لابعد الحدود
ربنا يرحم والدتك
تحياتى
علاء

سنووايت said...

شخصيتك فعلا قوس قزح :)
ربنا يرحم والدتك ويغفرلها ويجمعك بيها في الجنة ان شاء الله

علي فكرة تاج الأحلام لما وصلني حسيت انه صعب اوي ومش عارفة اجاوبه لحد دلوقتي بس انتي برافو عليكي جاوبته بأسلوب جميل
ورغم اني مبسوطة الحمدلله اني بنت بس كتير بأقول لو كنت ولد كنت عرفت اعمل كل اللي انا عايزاه بحريتي

باتمني لك حياة كلها الوان في الوان

عمرو النوبى said...

وااااااااااو
دليا بنت عمى
اية التاج الجميل ده يا قمر
بجد تحفة والاسألة جامده موت
وانا بشكرك انك اهدتينى التاج ده
واوعدك انى هجاوب على كل اسألتك فى الوقت المناسب
الى لقاء قريب فى بوست جديد يا داليا

فرنسا هانم said...

حبيبتى قوس قزح
اسمحيلى اسجل حضور بس
وسلام لكى

قوس قزح said...

همس الاحباب

اميرة الالوان مرة واحد
لا ده لقب انا مش قده

طيب يلا جاوب بقى لحسن يجى لك من حد رابع و ده فال وحش :))

ده انا لو كنت طلعت ولد كنت هخطف منك همس :)


ميرسى على مرورك و كلماتك الرقيقة

تحياتى

قوس قزح said...

عايش ولكن

نورتنى بالزيارة
الحمدلله ان المدونة عجبتك
و ان شاء الله تكون من زوارها الدائمين

قوس قزح said...

سنو وايت

ميرسى على كلامك

طيب تفتكر الحلم ده ليه بتحلم به البنات ؟
و ليه الولاد ميحلموش انهم يبقوا بنات ؟؟
مش ده دليل على ان حقنا ضايع ؟


ميرسى على مرورك

قوس قزح said...

عمرو النوبى

ربنا يخليك بنت عمك مرة واحدة ؟؟
ده انا ليا الشرف و الله

طيب يلا بقى ورينى شطارتك و جواب عليه و اهى فرصة الناس تعرف انت بتحلم بأيه

و على راى حبيبك
لو بطلنا نحلم نموت :)

قوس قزح said...

فرنساااااااااااااااا

تصدقى بجرى فى الرد على الناس علشان ارد عليكى
نوررررررتنى
نورتى النت كلها

حمدالله على سلامتك يا قمر المدونين
و يارب ما تمرى بألم تانى زى ده ابدااا

بحبك فى الله

اسكندراني اوي said...

اختي قوس قزح
اشكرك على انك فاكرني
طبعا انا لا اجرؤ على رفض التاج
ولكن سارد عليه حين تتاح لي فرصه

اشكرك مره اخرى
تحياتي

Tamer Nabil said...

كل تاج وانتى طيبة

وربنا يحقق ليكى كل احلامك

تحياتى

أم أحمد المصرية said...

صديقتي الجميله قوس قزح
انا مبسوطة جدا اني قرأت التاجين دول حسيت اني اعرفك اكتر احلامك حلوة و طيبة
و اسمح لي اضيف ميزة مهمة جدا لك قراتها رغم انك لم تكتبيها :
انك بتقدري تشوفي عيوبك و ده حاجة مش كير بيقدرو ا عليها
تحياتي و دعواتي تحقيق كل الاحلام

nigro said...

رحم الله والدتك رحمةً واسعة و أسكنها فسيح جناته و جمعك بها و بمن تحبين في أعلى عليين يا رب العالمين

أولاً احب اقولك إني كنت فاكرك لسه بنوتة .. يعني مش متجوزة
هتقوليلي و ده إيه علاقته بالموضوع؟
هأقولك إني أحيان كتير بأعتقد إن البنت بنعومتها و رقتها و هدوئها بتتغير بعد الجواز
إلا من رحم ربي
فلما لقيت كم النعومة و الهدوء ده في إجاباتك قلت إنك أكيد لسه مادخلتيش معترك الحياة
ربنا يحقق أحلامك و يسعد حياتك و يحرس أولادك

آه صحيح.. عجبتني قوي فكرة الإنتقال عن طريق تفتييت الذرات و تجميعها تاني
جامدة جداً .. تنفع فيلم

يلا سلام

wael said...

اجاباتك حلوه اوي
ربنا يرحم والدتك ويوفقك في حياتك وتكوني ام صالحه ان شاء الله
صحيح قبل ما انسى اغنيه البلوج حكايه

دعاء مواجهات said...

إجاباتك بسيطة وجميلة

انتى نفسك من جواكى رقيقة اوى

لكنى احب اقولك ان التسامح نعمة كبيرة اوى لاازم تحاولى

بيييس

نورتينى

نزلت البوست الجديد.

سومه...مجنونه فى بلد عاقل said...

قوز قوزح انتى قولتيلى فعلا كان نفسك تطلعى فنانه بس الفن فى القلب والعين وهو احساس مش فى اليد وبس
تحياتى ليكى سومه_87

Baker said...

شخصيه مليانه الوان بجد
تحياتى ليكى و للمدونه

نور said...

ربنا يرحم مامتك يا رب و نجتمع كلنا عند الحوض فى الجنه ان شاء الله
تعرفى انا نفسى برضه اتعلم نحت الخشب بس الظروف
من ال اللى انتى قولتيه عن نفسك
انا حاسه انك شخصيه لذيذه وف حتة السخريه انا كمان كده
و يا رب ربنا يحققلك احلامك كلها
سلام مؤقت

Coca said...

احلامك سكر اوي
وان شاء الله تحقيقها
احلي ما فيها انها انسانيه اوي
تحياتي

رئيس جمهوريه نفسى said...

ربنا يغفر ولدتك ويجمعك بيها فى الفردوس الاعلى باذن الله
وربنا يكرمك ويوفقك فى كل احلامك الى بتتمنى تحقيقها ان شاء الله مستقبلا ويعوضك خيرا عن احلام الماضى
وكويس انك عرضتى خمس عيوب وخمس مميزات التوازن مطلوب

ادم المصرى said...

قوز قزح هاى انا نزلت جزأ تانى من اميره بكل الناس اتمنا تعليقك عليها واتشرف بيكى تانى ونزلى شات بقه بدل الفضايح دى

قوس قزح said...

اسكندرانى اوى

المهم انك ادبست فيه و خلاص
شكل التاج عليك عجبك و طمعان فيه :))

لما تجاوب عليه ياريت تقولى


نورتنى بجد

قوس قزح said...

تامر نبيل

نورتنى و يارب احلامنا تحقق كلها


تحياتى

قوس قزح said...

ام احمد المصرية

انا سعيدة اكتر بوصفك ليا كصديقة و ده شىء اعتز به

و مش هضحك عليكى ده العيوب اللى الناس بتقولها عليا


نورتنى :)

قوس قزح said...

nigro

ياربى على كلامك .. بس عايزة اقولك حاجة بس علشان الصدمة
انا فعلا زى قوس قزح يعنى اوقات بكون مش ناعمة ولا هادية خااااالص

الفكرة دى بشوفها فى افلام الخيال العلمى الفضائى زى انتربريز و كده
و جاااااامدة جدا

نورتنى بأول زيارة لك :)

قوس قزح said...

wael

نورتنى يا وائل
و اشكرك على دعائك الجميل ليا

و اتفضل رابط الاغنية هدية منى لك

http://egyptian2.salmiya.net/songs/anoushk/ram/anoushk6.ram

قوس قزح said...

دعاء مواجهات

ما انا بسامح و بسامح و بسامح بس فى حاجات معينة لو حصلت استحالة اعرف اسامح
حتى لو انا عايزة اسامح مش بعرف بحس انى خلاص الشخص ده مكانته و مقامه نزل عندى و مبقدرش ارجع زى الاول

ميرسى على مرورك

قوس قزح said...

سومة .. مجنونة فى بلد عاقل

ماهو الفن لو مش فى شىء محسوس محدش هيعرف يشاركك فيه ولا يحسه
انا الفن ليا مش بس الشىء اللى ابدعه الفنان لكن شعور الناس به
يعنى مثلا انا رسمت لوحة حلوة بتكون احلى لما حد يحس بها اوى و تأثر فيه

نورتينى يا سومة جدا و سعيدة انى اتعرفت عليكى و شوفتك :)

قوس قزح said...

baker

نورتنى بزيارتك
و شكرا على كلماتك

تــــــــــ(حـنة)ـــــــر said...

انا اول زيارة و سعيدة بوجودى فى المدونة هنا على فكرة و يارب انتى كمان
وعايز اقولك احلامك جامدة قوى مش احلام بقى

ربنا يوفقك
وتحياتى

قوس قزح said...

نور
الصورة بتاعتك دى كل ما اشوفها احس بحزن غريب

يارب ما يكون جواكى الاحساس ده

واتمنى نكون اصحاب


تحياتى

قوس قزح said...

coca

اسعدتنى زيارتك الاولى ليا

و ميرسى على كلماتك الرقيقة

قوس قزح said...

رئيس جمورية نفسى

نورتنى يا محمود والله
و سعيدة جدا جدا انى اتعرفت عليك
و اتمنى ان ولاد بلدى كلهم يكونوا زيك كده
ربنا يبارك لك فى حياتك و مستقبلك

قوس قزح said...

ادم المصرى
و الله عندى شات .. هو مش باين ولا ايه ؟؟

و هاجى وراك اهو اشوف البوست :)

قوس قزح said...

تمر حنة

و انا كمان سعيدة بزيارتك
و يارب الاحلام كلها تتحقق لنا

نورتنى :)

الشنكوتي الكبير said...

قريت التاجات وعجبني ردودك قوي
خاصة التاج الأول
اما عن والدتك رحمها الله واسكنها فسيح جناته

يا بنتي قولي الحمد لله ان عندك ذكرى طيبه جواكي ليها
انا شفت ناس وجود امهم في حياتهم ذادهم حزن ومشاكل وحاجات كتير بايخه ويمكن هم كمان محرومين من حضن الأم اللي بتتكلمي عنه وامهم عايشه ربنا يهدي المسلمين والمسلمات لكن هنقول ايه همهم اكبر على الأقل انتي عارفه سبب البعد امر الله وقضائه
هم برده قضاء ربنا طبعا لكن لما تحسي ان عندك حاجه وزي قلتها كأنها مش موجوده ساعات بقولوا قلتها احسن

الحمد لله امي طيبه قوي
ربنا يحفظها
ابقي تعالي زورينا مره في اي حفله للساقيه نحضرها واجيبها معايا واعتبريها مامتك يا ستي هي بتحب الناس كلها وتبقي اختنا الرابعه بقى
ربنا يحفظك ويسعد ايامك يارب

سلاااااااااااااااااااااااااام
اخوكي ايهاب

صحفية روشة said...

النهاردة عيد ميلادى تعالو على مدونتى وسمعونى احلى هابى بيرث داى تو يووووووووو

دعاء مواجهات said...

ازيك ياجميل

القمر مختفى فين بس

نزلت بوست تطرفى مواجهاتى يهمنى رايك فية

بيس

nasimlibya said...

هههههههه كنت اتمني يكون في الوان للخطوط بس الله غالب الاسود سيد الالوان وباين انه دكتاتور في التعليق
بجد اعجبني اسم المدونة والمدونة قوس قزح اشتممت رائحة الالوان و الطبيعة النقية الصافية
تميزك واضح موفقة

momken said...

انا رائى فيكى ديما انك ممكن تكونى سفيره او وزيره الحجات الجامده دى
لان اجاباتك صعب اوى نشيلها ونقول نعمل افضل منها
مش هنعرف
طبعا اتاثرت جدا لما اتكلمى عن ولدتك رحمه الله عليها

عجبنى اوى احلامك
الى هى احلام كل الناس الطيبين
بس فى التاج التانى

انتى قلتى العيوب ورجعتى نقضتيها بالمميزات

بس برضه اجاباتك جميله وحلوة
وعادله جدا
اسال الله ان يبدل عيوبك التى لا اراها عيوب الى مميزات

تحياتى

maha zein said...

ربنا يبارك فيكي
اد ايه فرحت انك برغم اني مش باجي ولا بطل حتي
ولقيتك بتابعي عندي
بس خليكي فاكرة ده اتفاق بينلا اني هخلص متحاناتي واجي عندك لاجئة
طبعا التاجين احلي من بعض
وتحفة
وحبة اعرف هو التاج ده بيجيلك اذاي
يعني في شكل تعليق ولا ايه
قلت اسالك انتي بدل ما اسال الغريب ويقولوا عليا جهلة
ولا التاج بيتبعت عن طريق التمرير الي انتي عملتيه ولا ايه
بعدين بقه
انا حسة انك ام طيبة وده بسبب حرمانك من امك
مخليكي بتعوضي ولادك عن حاجة انتي الي افتقدتيها
وموضوع انك بتنقدي دي وممكن بسخرية صدقيني فعلا بتزعل ناس كتير
حاولي تتلافيها او تفهمي الي قدامك ان دي حاجة مش مقصود منها شر
والعصبية حاولي تقل شوية مع انها سعات بتكون جزء من تكوين الشخصية ويصعب ويستحيل تغيرها تماما
بعدين بقه بلاش تقسي علي حد حتي لو قصر
اد ايه القسوة سعات بتاثر في الناس اوي وبتخليهم يكونوا فكرة عن شخصية الانسان الي قدامهم بانه شديد وقاسي
وبخصوصو بقه امنياتك حسيت انك مش بتحلمي حاجة لنفسك انتي اوي في المستقبل
يعني كله كان مصر كان الاسلام كان ولادك
كنت حبة اعرف انتي من جواكي عوزة ايه لنفسك
وبخصوصو الخصام والزعل والذي منه ارجوكي خلي قلبك ابيض
اذاي بتوجدي الاعذار وفى نفس الوقت مش بتسامحي او تتعاملي زي زمان
يا ريت تحاولي تسامحي وتغفري
تصدقي ان الصفة دي عندي نصيبة مسيحة اني اسامح الى اذاني وبل بالعكس اساعده بشدة واتمناله الخير الدائم
بنات فاضية

وحبة اني اطلب منك وادعوكي انك تقولي رأيك في المشكلة التانية فى مدونة اقلع همومك
بجد اد اسه رايك كان مؤثر في المشكلة الي فاتت
وطبعا رأيك يهمنا لانه بيعبر عن خبرة شخصيتك
يلا اهي محاولة للتخفيف عن الناس
لعله يبقه في ميزان حسناتنا
استنيني بعد يوم 16 اكون خلصت

•√أريـ السمر ـج√• said...

الله يرحم والدتك و والدينا و جميع المسلمين


ثانيا تطلعى فنانة ده حلم معقول مع رقتك و هدوءك .. أنما رجل دي مش قادرة أستوعبها حبتين :)

أسعدنى التواجد بينن ألوانك الناعمة
دمتى بكل الخير و الود

قوس قزح said...

الشنكوتى الكبير

الحمدلله على كل شىء ، بس فعلا الناس اللى بتقول عليهم دول مش هيعرفوا قيمة الام الا لما يتحرموا منهم حتى لو كانت ام قاسية فقسوتها لها اسبابها اكيد التى لا يرونها
وانا موافقة يا سيدى اشاركك حضن الوالدة انتى بس قولى معاد مرواحكم للساقية و انا اجى جرى :))

ربنا يخليك يا ايهاب و يخلى لك والدتك و يسعدك بها

قوس قزح said...

صحفية روشة

كل سنة وانتى طيبة و عقبال 100 سنة

قوس قزح said...

دعاء مواجهات
انا جاية حالا بعد ما ارد على باقى التعليقات ان شاء الله

قوس قزح said...

nasimlibya
رقة تعليقك كانت كاللون الوردى الجميل و ان كانت حروفه سوداء

سعيدة ان مدونتى البسيطة اعجبتك :)

قوس قزح said...

ممكن

وزيرة او سفيرة مرة واحدة
طيب قول مديرة و لا بتاعت علاقات عامة الاول :)
ميرسى على كلامك عن احلامى
اما عن العيوب و المميزات فتصدق انا كتبت من غير ما اقارن
بس ممكن يكون فى الناس الصفة يمنها و شمالها يعنى ممكن اكون هادية بطبعى بس لما تتنرفز بتبقى فى منتهى العصبية

و يارب عيوبى تتحول لمميزات فعلا

بس انت مش واخد بالك انك مقولتيش موقفك ايه من قبول التاج !! ؛)

قوس قزح said...

مها زين
يا بنوتة انتى مش قلنا متجيش الا لما تخلصى ؟؟
و الله يا مها انا بحاول على اد ما اقدر انى اقلل من عيوبى بس كتير مبعرفش

و اما عن المسامحة فانا بقدر و اسامح اه كتير بس فى حاجات بتحصل تحسى انها بتجرحك و فى الوقت ده مبعرفش اسامح من جوايا ابدا حتى لو كنت مضطر انى اتعامل تانى مع الشخص مثلا لاى سبب زى صلة الرحمة


و حاضر انا جاية اشوف ايه حكاية المشكلة التانية دى و يارب اقدر افيد

و ذاكرى و بلاش نط فى المدونات :)

قوس قزح said...

•√أريـ السمر ـج√•

اسعدتنى معرفتى بك و من زيارتى لمدونتك عرفت انها مدونة محتاجة وقت و تركيز و متابعة فاعذرنى حتى استطيع ان اكون متابعة جيدة و ليس فقط مضيفة لتعليق و خلاص


اشكرك على كلماتك الرقيقة

Sherif said...

جرافيك ديزاين .. من هنا جه قوس قزح؟

تبقى ولد ؟؟ أقول لك .. الحمدلله انك مش ولد .. ليه؟

لو فردة كاوتش نامت منك فى السكة .. ماحدش هايسأل فيك ..

لو لاقدر الله - ربنا يبعد عنك كل شر - عمل مشكلة وراح القسم .. سيادتك اللى هاتروح تجيبه

لو بنتك أو اختك فيه خناقة بينها وبين جوزها .. لازم سيادتك تشوف حل معاه

لو اتخرجوا من الجامعة دور على كل معارفك عشان تساعدهم على وظيفة

لو عملت مشروع صغير وفشل .. تأكد ان سيادتك اللى قلبك هايقف

حينما يفشل اى حد من الأسرة .. هايتسند عليك .. لو انت اللى فشلت .. هاتتسند على مين؟

اقول كمان؟

اجمل حلم .. مش بس ليكى .. لينا كلنا .. طاقية الاخفاء

تحياتى لاحلامك الجميلة الصافية وربنا ينولك ماتتمنيه مستقبلا

قوس قزح said...

شريف

لا قوس قزح جيه الاول و من زماااان من وقت ما كنت بحاول اقلد لوحات والدى الزيتية بألوانى الشمع و انا عندى 8 سنين :)

ماهو انا لو اقولك عايزة ابقى ولد ليه هنحتاج بوست تانى ، بس هقولك ليه فى كلمة واحدة .. الحــرية
و على فكرة كل المواقف اللى ذكرتها ممكن جدا الست تقدر تتحط فيها لو مفيش فى حياتها الشخص اللى تقدر تعتمد عليه

جميل فعلا حلم الاختفاء بس المهم لما تختفى هتعمل ايه ؟



اشكرك على مرورك و على قبولك التاج والاجابة عنه

Baha'i Family - اسرة بهائية said...

كلامك مؤثر عن والدتك ربنا يجعلها دائما فى الجنة
جرافيك ديزاينر ، احنا قرايب بأة:)
تبقى ولد!! اعتقد ده حلم كل بنت من شعوب العالم الثالث:)
الانتقال الآني ،، اكيد كنت بتقرأى روايات ملف المستقبل:)

بالنسبة للصفات كل انسان لديه مميزات وعيوب ورحلتنا فى الحياة ماهى الا وسيلة لكى نحسن بها من انفسنا ونطور بها ارواحنا
سعيدة بك وبمدونتك