مملكة الالوان

جالى تاج من الغالية فاتيما روح قلب المدونين و احترت اخبيه فين و فجاة لاقيت تاج تانى وصلنى من الجميلة رودى و هنا اكتشفت ان انا مش اد التاجات دى ولازم بسرعة اخلص منهم

التاج الاول عن الاحلام

و ده من الغالية فاتيما

أذكر 5 أحلام تخص ماضيك كنت هتتخلى عن إيه فيها و هتتمسك بإيه لحد دلوقتى

اهم حلم دايما احلم به طول حياتى هو ان امى كانت تبقى لسه على قيد الحياة .. للاسف توفها الله و انا عندى حوالى 5 سنين و مقدرتش احس معها بالامومة .. و بتمر عليا لحظات كتير اوى بكون محتاجة لها و بتخيل وجودها معايا كان هيفرق اد ايه و اوقات تانى اقول يمكن فراقها و انا صغيرة ارحم كتير من فراقها و انا كبيرة و عارفة و حاسة هى ليا ايه .. و بستغرب اوى على الناس اللى مش حاسة بقيمة امها و بقيمة حضنها .. واعتقد الحلم ده هيفضل طول العمر جوايا

كنت بحلم اطلع فنانة - مش ممثلة ولا مغنية ما كل البنات بتحلم بده - يعنى كنت ابقى مبدعة فى مجال فنى يدوى .. يكون ليا فن من انتاجى من افكارى .. مثلا زى تمثال .. مبنى معمارى .. لوحة ..عقد من الفضة ..تصميم ازياء ، و الحمدلله قدرت احقق جزء منه فى حياتى و اشتغلت فترة جرافيك ديزاينر بس لسه حاسة الحلم ناقصه كتير اوى

ابقى ولد .. اه ابقى ولد .. غريبة دى ؟ ده بقى كان حلم نفسى فيه اوى اوى ..هتقولوا طيب ليه .. هقولكم مش علشان انا مش حابة انى بنت ..لالالا .. علشان الولد واخد حقه تالت و متلت فى مجتمعنا و دايما له حقوق اكتر مع ان فى بنات و الله ب 100 رجل .. اهو انا بقى كنت عايزة ابقى ولد بس بنفس دماغ البنت يااا سلااام كانت تبقى هايلة الحكاية دى .. و محدش يقولى روحى اعملى عملية لانه خلاص تو لييييييييت

اوقات كده تخدنى الجلالة و احلم انى اختفيت .. زى الافلام لما بطل يشرب حاجة او يلبس حاجة و يختفى و يعمل بقى كل اللى فى نفسه ..و اول حاجة هفكر فيها انى هروح ازغزغ كل الناس اللى عاملة جد و منشية كده لحد ما يترموا على الارض من الضحك ..و بعدها اروح على الناس المفترية اديهم بوكس فى وشهم و اعضهم و اخد حق الناس المظلومين منهم ..و بعد كده اشوف الناس بتتكلم عليا ازاى ورائيهم فيا ايه ..هروح بقى كل الاماكن اللى نفسى اروحها و اهيص و اجنن الناس

كتير اوى من الفررررراغ كنت بحلم احلام يقظة و كانت امنيتى ان الاحلام دى فجاة كده تتحقق - لو حلوة يعنى - و تبقى واقع و اقدر اتحكم فيها ... هو فى كده ابدا ؟؟ ياريت .. اما احلام صحيح

أذكر خمس أحلام تخص مستقبلك و ما تتمناه منه

اتمنى يكون اولادى ذرية صالحة و اربيهم كويس اوى على حب الخير و طاعة ربنا

اكون قريبة من ربنا اكتر من كده و اقدر اكون انسانة مسلمة مؤمنة

بحلم ان المصريين ترجع لهم كرامتهم و عزيتهم و يكون زماننا هو الزمن اللى العالم كله يفتكر مصر به مش زمن الفراعنة الله يرحمهم بقى اللى من سبعتلاف سنة

بحلم انهم يعملوا اختراع ينقل اى حاجة و اى حد من مكان لمكان عن طريق تفتيت الذرات و تجمعها تانى ، يعنى لا مواصلات و لا شوارع زحمة ولا دوشة و لا عادم ولا حتى مرور

اخر حلم و اكبرهم ان الاسلام يتفهم صح من كل الناس انه دين سماحة و سلام و حرية و حب و كل حاجة جميلة فى الدنيا

أذكر شخصين - على الأقل - متواجدين فى حياتك كنت تتمنى وجودهم من قبلهم

مش شخصين .. هم حاجتين
الموبايل .. لان كان فى حاجات كتير ممكن متضيعش منى لو كان معايا موبايل و اقدر اتابعها
المدونة .. لو كنت بدون من زمان كان فى شحنات كتير خرجت منى و كانت اكيد هتفرق معايا فى تكوين شخصيتى و اظن ان مدونة كل واحد منا فرقت فى شخصيته بالفعل

أذكر شخصين - على الأقل - غير متواجدين فى حياتك و تتمنى وجودهم مستقبلا فى حياتك و حياة أولادك

امى ثم امى ثم امى و بس

تهدى لمين التاج

رندا كلمة فى حياتى

عمرو النوبى

همس الاحباب

اسكندرانى اوى

شريف

ابو خالد

نيجى بقى لتانى تاج و هو من الجميلة رودى صاحبة مدونة بنوتة مصرية

اذكر عشر اشياء عن نفسك ؟

علشان اكون عادلة هقول خمس عيوب و خمس مميزات و مش هتكلم عن كل واحدة لان طبعا هعرف اتكلم عن المميزات احسن و اكتر

بس المهم ان الصفات كلها وحشة او حلوة تكون معتدلة فى الانسان علشان متقلبش بالعكس معاه

صفاتى هى
عصبية اوقات جدا لدرجة ان انا نفسى بقول على ايه ده كله

دماغى ناشفة و عنيدة و مش بقتنع بسهولة براى حد طول ما رائى عجبنى

قاسية فى بعض الاحيان و خصوصا لما حد يتهاون فى مسئولياته و بعتبره ضعيف و مدلع

لما حد بيعمل فيا حاجة تجرحنى مش بقدر اسامحه حتى لو اعتذر .. ممكن اتعامل معاه تانى بس بحس ان فى باب اتقفل بينى و بينه و جوايا بحس بلامبالاة ناحيته

بنقد بطريقة حادة و ساعات ساخرة ممكن تزعل الناس منى .. بس والله بيكون قصدى خير مش غلاسة او يعنى تقليل مقام

طيبة و بلتمس للناس عذرها فى افعالها ..بحط نفسى مكانهم و علشان كده مش بزعل بسهولة بس لما بزعل انسوا انى ارجع زى زمان

اجتماعية و بسيطة و بحب الناس و بعرف اتعامل مع كل النوعيات و الطبقات و معنديش كلاكيع فى التعاملات معهم

خدومة و بساعد الناس على اد ما اقدر لدرجة ممكن اجى على حساب ظروفى و حياتى و لو حد عزيز طلب منى حاجة ميهداش ليا بال الا لما اعملها له

صبورة و عندى قوة تحمل جامدة و اد المسئولية لو اتحطيت فيها

بحب الجمال اوى .. فى كل حاجة .. و بحب احسه لوحدى بعيد عن تعليقات الناس واحساسهم به علشان ساعات بيضيع عليا طعم اللحظة دى لو مش جواهم نفس احساسى

ابعت التاج لخمس اشخاص

انا هختار خمسة احب اعرف شخصيتهم اكتر مع ان فى ناس منهم عارفة انهم ممكن جدا مش يجاوبوا عليه بس اهى محاولة

امراة تقول الذى لا يقال

محمد عبد الغفار

عدى النهار

ممكن

كاميليا