Saturday, July 26, 2008

تحديث طويل شوية


كنت ناوية اعمل تحديث للبوست اللى فات برسمة الكاركاتير دى






لكن الكلام اللى فى قضية الاسبوع فى الاهرام - اللى هى جريدة تبع الحكومة - لاقيته كمان يستاهل النشر

فقلت لازم بوست لوحده و دى اجزاء من الموضوع

‏يقول الدكتور فاروق محمد رشوان إخصائي الجراحة العامة بمستشفي دار السلام‏:‏ إن الشنطة الطبية الموجودة حاليا في الأسواق‏,‏ خاصة سوق التوفيقية‏,‏ شنطة لا أحد يستطيع استعمالها حتي الأطباء أنفسهم‏,‏ وهي غير مطابقة تماما للمواصفات التي أعلنتها الإدارة العامة للمرور‏,‏ فالمحتويات التي بداخل الشنطة‏,‏ سواء كانت معتمدة أو غير معتمدة‏,‏ عبارة عن شاش‏,‏ وقطن طبي معقم‏,‏ وشاش مفزلن‏,‏ ومادة مطهرة‏,‏ وهذه المواد المطهرة تحتوي علي نسبة كحول تتطاير سريعا وتفقد مفعولها قبل استخدامها‏,‏ وكذلك الشاش المفلزن يتلف ويجف مباشرة بعد أسبوع من وضع الشنطة الطبية بالسيارة وارتفاع درجة حرارة الجو‏,‏ فإنني أعتقد أن فكرة الشنطة تعتبر فكرة خاطئة ولا تزيد عن كونها فرض جباية علي المواطنين وأصحاب السيارات‏,‏وبصفتي طبيب جراح أؤكد أنه إذا حدث في الطريق العام ـ لا قدر الله ـ مكروه لأي سائق سيارة‏,‏ فإنني لا أستطيع مساعدته علي الإطلاق‏,‏ لأن الذي يستطيع مساعدته لابد أن يكون طبيب عظام يستطيع التعامل مع الحالة مباشرة‏,‏ وبالنسبة للشنطة التي حددتها وزارة الصحة مع الإدارة العامة للمرور بأنها شنطة مصنوعة من معدن لا يصدأ‏,‏ فما هي هذه الشنطة المصنوعة من المعدن الذي لا يصدأ‏,‏ إلا إذا كانت مصنوعة من البلاتين؟‏!




‏وينبه الدكتور مجدي موسي صليب وكيل أول وزارة القوي العاملة ومدير المركز القومي للدراسات والسلامة والصحة المهنية إلي أن هناك صعوبة بالغة في استعمال هذه المحتويات‏,‏ ولابد من وجود تعاون مشترك بين وزارة الصحة والإدارة العامة للمرور‏,‏ مع ضرورة إتاحة الوقت الكافي ومنح مهلة زمنية قبل التفتيش عليها حتي يستطيع المواطن أن يتعرف علي الشنطة ومحتوياتها‏,‏ وشرائها من أماكن مخصصة مثلما يحدث لطفايات الحريق‏.


‏ ويقول محمد بيومي حمدان‏(‏ بائع بالتوفيقية‏):‏ إن الشنطة التي تباع حاليا بالسوق من المورد نفسه الذي يوزع علي جميع الباعة‏,‏ والشنطة بجميع محتوياتها تباع بسعر‏75‏ جنيها‏,‏ وهذه الشنطة ترتفع كل يوم‏,‏ وأتوقع أن يصل سعر الشنطة في أول أغسطس عند تطبيق القانون إلي أكثر من مائة جنيه‏,‏ والمثلث ارتفع سعره من‏10‏ جنيهات إلي‏45‏ جنيها‏,‏ لأن المورد يرفع السعر كلما ازداد الطلب علي شراء الشنطة والمثلث‏,‏


ويقول الدكتور عبدالرحمن شاهين وكيل أول وزارة الصحة‏,‏ والمتحدث الرسمي‏:‏ بالنسبة للمواصفات الخاصة لحقيبة الإسعافات فتتضمن أن تكون مصنوعة من مادة معدنية غير قابلة للصدأ‏,‏ وأن يسهل حملها باليد أو علي الكتف‏,‏ ويمكن غسلها وتطهيرها‏,‏ وأن تكون محكمة الغلق‏,‏ ومقسمة من الداخل‏,‏ ويكتب عليها حقيبة إسعافات أولية‏,‏ وأن تضم قائمة بالمحتويات وكتيب الإسعافات الأولية‏,‏ وأن تشتمل علي‏:3‏ أربطة شاش‏10‏ سم‏,‏ و‏3‏ أربطة ضاغطة‏10‏ سم‏,‏ و‏5‏ باكتات شاش معقم للجروح‏,‏ و‏5‏ باكتات دريسنج معقم‏,‏ و‏5‏ باكتات شاش فازلين للحروق‏,‏ و‏5‏ باكتات شاش معقم للعين‏,‏ و‏100‏جم قطن طبي‏,‏ و‏2‏ بكرة شريط لاصق‏(‏ بلاستر طبي‏5‏ سم‏),‏ ومقص صغير‏,‏ وزجاجة سائل مطهر بيتادين‏,‏ و‏5‏ أطقم قفازات طبية‏(‏ لاتكس‏),‏ و‏2‏ رباط مثلث‏(‏ لكسور عظمة العضد والترقوة‏),‏ و‏1‏ ملاية حروق‏,‏ و‏2‏ كيس ثلج‏(‏ تنشط عن طريق الفرك‏),‏ وبطارية إضاءة حجم متوسط‏.‏


ويقول اللواء كامل ياسين مدير الإدارة العامة للمرور بالجيزة‏:‏ إن وزارة الصحة وضعت مواصفات قياسية لشنطة الإسعافات التي يستعملها قائد السيارة‏,‏ وهذه الشنطة سوف تطرح بالأسواق عن طريق وكلاء معتمدين لبيعها بفاتورة رسمية معتمدة‏.‏أما بالنسبة لتطبيق القانون فسوف يتم تطبيقه من أول أغسطس‏,‏ لكن ضباط المرور سوف يراعون روح القانون لحين الاتفاق مبدئيا علي الشكل

الأمثل لهذه الشنطة‏,‏ وسوف تتم محاسبة ومعاقبة كل المخطئين‏,‏ وسوف يتم تنفيذ القانون عليهم ‏.



و دى صورة المحروسة الموجودة فى السوق حاليا و حالتها لا تصر حلاق ولا مزين


65 comments:

ساعد نسرين الايمن said...

لا ولسه نازلة شنطة جحا كمان

رئيس جمهوريه نفسى said...

اولا احب اوضح حاجه بس انى تقريبا معدن التتانيوم لا يصدا والمعدن ده مرتفع الثمن لانه بيدخل فى صناعه الاستنالس والصلب بنسب معينه وبمعنى انى الشنطه تكون من معدن لا يصداء حيكون ثمنها حاجه تفرح القلب الحزين بجد ده بخصوص مواصفات الشنطه الخارجيه
الملحوظه التانيه اذا كانت الشنط اللى موجوده فى السوق غير مطابقه للمواصفات اللى اتحددت هئيه الرقابة على الاسواق فين والحكومة سايبة الشنط تتباع ليه اذا كان حيتم رفضها عند الفحص ويطالب الناس بشنط مطابقة للمواصفات
ثالثا: المثلث العاكس الى ارتفع سعره من 10 جنيه ليصل الى 45 جنية متساب سداح بداح ليه سعرة كل يوم يغلى ولحساب مين والحكومة مش قبل ما تقر القانون تشوف حتستورد ولا حتوفر المتطلبات من فين ولا هى جبايه على البشر
رابعا: هل من المعقول انا ارفع سعر البنزين وبعدين ادخل الناس فى التزام بشنطه اسعاف ومثلث عاكس وكمان لسه الارقام الجديده الى الناس نطالبة بدفع ثمنها كمان مصاريف الترخيص بالاضافه الى متاخر الغرامات الى من الهوي الطائر كل ده مش نوع من الاعباء على المواطنين من قبل الحكومة الى بتراعى محدودى الدخل
خامسا: على طريقة جاءت تكحلها عمتها نتخيل انى لاقدر الله واحد عمل حادثه واتكسر العمود الفقرى بتاعه فى حالات بيكون ممكن علاج الكسر بس بشرط انى اى حركة غلط لاقدر الله بتودى لقطع فى النخاع الشوكى لاقدر اللة وتسبب شلل ودى لايمكن يعرفها غير متخصصين وخاصة التعامل مع الحالات دى هل افراد عاديين ممكن يتعاملوا مع الحالات دى واذا كان التعامل حيتم بشكل موقت لحين وصول الاسعاف مثال فى طريق قنا الغردقه المسافة ممتده لحوالى 180 كيلو قد تقل او تزيد مفيش نقطه اسعاف تستقبل حالات حرجه وبالتالى على ما يتم الوصول لقنا او سفاجا او الغردقه بتكنون على احسن تقدير الحالة ساءت
مرة من قريت عن حادثه تمت على طريق الغردقه القاهره كان شخصيه مصريه ومعاه واحده اجنبيه تم نقل المصري لمستشفى الغردقه والاجنبيه اتبعتت ليها اسعاف طائر علشان تروح القاهره رغم انى الحالة الخطره للمصري مش للاجنبية وفى الاخر نو كومنت

عصفور المدينة said...

هما يعني لحقوا فرقعوا فلوس الخوذ والأحزمة
اخترعوا بند جديد وموضوع جديد لاستهلاك اوقات الناس فيه
خلاص خلصنا من تقسيم المحافظات وسعر البنزين والعلاوة وكادر الموظفين وحرايق القطارات والخوذ والأحزمة وسعر الحديد و
Egypt 2010
وانفلونزا الطيور وسفاح المعادي ووو
وكل هذه المواضيع التي يشغلونا تخترع بين الحين والآخر والغريب إن كل موضوع من دول لازم نكون احنا غرمانين فلوس فيه

حسبنا الله ونعم الوكيل

نعكشة said...

طيب هيا ية المشكلة لو عملوها شنطة بلاستك قوي

احم احم

بس صراحة انا شايفة ان الشنطة دية تبقي موجودة اة
بس مش عامة الشعب اللي يستخدموها

يعني مثلا لو فية دكتور في الجوار هو اللي يستخدمها
و نظرا لأن المصريين شع الفهلوة و الحداقة
فكل واحد هيستخم شنطتة

بالنسبة لكلمة الدكتور الجراح اعتقد اني فهمت ان الشنطة دية مشروع فاشل

مع انيييييييييي

كنت فاكرة انها حاجة كويسة

يلا ربنا يستر

دمتي سالمة

سلامٌ عليكي

Ahmed Kamal said...

نظرا لعدم وجود حل يمنع الحوادث خالص خالص ، بيقولوا مشروع القانون اللي بعد ده حايشترط شراء عكازين من المعدن الذي لا يصدأ ، و كرسي بعجل معدنهم لا يصدأ أيضا ، و نقالة معدنية و لكنها لا تصدأ ، و سلم لي على حضرة الباشا الصغير .. قصدي المورد .

SaSo said...

سيبك انت م الشاش والتلج والفازلين
دول اللى جامدين اوى
"قائمة بالمحتويات وكتيب الإسعافات "

على اساس ايه يعنى,اسيب الحادثه واتسلى بقراءه الكتيب؟!!

فيه اقتراح ظريف بردو بضروره ان كل عربيه يكون فيها كفن مغلف وجاهز للاستعمال
ىن زى مانت بتقول كده الحقيبه موش هتفيد ف حالات كتير فيبقى الكفن جاهز عشان تتكل على الله خفيف خفيف بدل ورق الجرايد والمنظر الغير حضارى ده

خالد كامل said...

انا برضه مش عارف شنطة اسعافات أولية ايه اللى بيتكلموا عنها ؟؟
طب كام واحد بيعرف يستخدم اللى فيها فعلاً ؟؟
ربنا يستر علينا ... بكرة يفرضوا علينا ميكانيى معين كلنا نصلع عنده عربياتنا
سلام

Unknown said...

انا قلت يجولي
ياما بيضحكوا على الناس
واعشاب تجيب الخلف قال
بصي يا جميل
اي حد يتعور ابعتهولي وانا عشان خاطرك بس
اعمله تخفيض
بس خلينا نسترزق
الشنطه دي هتوقف حالنا

Unknown said...
This comment has been removed by the author.
عمرو الطاروطي said...

قريت تعليقك على مدونتي سألت نفسي.. مين دي اللي عندها رؤية ثاقبة لما وراء الكلمات؟.. وقريت تعليقك في مدونة "فبدال ما نطق" وقلت.. لا، دي حد جامد
ايه الافترا دا؟.. رديتي على قصيدة بقصيدة تانية.. بتكملها في المعنى وفي نفس الجو
بجد
انتي عندك حاسة مرعبة.. متستهونيش بيها

اما بخصوص موضوع الشنطة
احب اسألك: انتي عندك عربية؟
معندكيش؟.. طيب متعملي زي الغالبية العظمى من الشعب المقهور الذي تبلغ اقصى طموحاته، مش امتلاك عربية.. لا.. مجرد الحصول على توصيلة تروحه بيته بسرعة لما يخلص شغله الساعة اتنين الضهر..سيبي الملك للمالك.. مالنا احنا ومال سيرة العربيات دي؟
اما لو كنتي من الرأسماليين الجشعين اصحاب العربيات، احب اقولك يا هانم.. يعني راكبين عربيات كمان ومش عاجبكم؟.. ما تدفعوا 75 ولا حتى ميت جنيه.. ولا هيا الفشخرة حاجة كدة ببلاش

يا قوس قزح
يدك + القلم = سلاح مضاد لليأس
keep in touch

Ehab said...

يا نهار ابيض كل ده هيبقى موجود في الشنطه ده ابويا كده هيبيع العربيه ويستريح وبصراحه ويريحني
المهم يعني كل ده هندفعه ونشتريه ومع ذلك الدكاتره بتقولك مش هتنفعنا ببصله

كتنا نيله في حظنا الهباب

طب ولامؤاخذه يعني هم الساده اللي اقترحوا الموضوع ده نقلوه من انهي بلد وهل بيطبق بنفس الطريقه وهل عندهم نفس المشاكل ولا دي سبوبه مصريه خالصة الصنع
ربنا يسترها علينا

سلاااااااااااااااااااااااااام
اخوكي ايهاب

Empress appy said...

هو انا مش قولت لكى متكتبش فى الموضوع ده
هااااااا طيب شوفى مين هيعلمك السواقه بقى ولا ادلو لكى بمعلوماتى الثمينه النفيسه المريعه اللى بتدخل فى شجرة
يا حبيبتى قانون المرور كله تحفه ما عدا الشنطه وعموما احنا هنستوردها وبعدين هحولها لعلبه ميك اب اهى تحفظه بالمرة هههههههههههههههههه

Empress appy said...

معلش هرد على محمود رئيس الجمهوريه



يا محمود المثلث العاكس مهم جدا جدا
وده لسبب بسيط قوى
ان لما فى الضلمه حد يقف حد ممكن يجى وهوووب يقوم خابط فيه وفيه حاجه تانيه المفروض نسيوها الجاكت الفسفورى والله خاصه لبتوع النقل اللى بيغيروا عجله وتيجى برضه حد هوب يشلهم او واحد من دول نايم تحت عربيه او حاجه وقعت فى الضلمه وبيدور عليها
هو كل العيب فى الشنطه وبس وعموما هى لها مواصفات ثابته والحكومه نفسها قالت اللى فى السوق مش مطابقه ونبهت على الناس وقالت محدش يشتريها ونشرت فى كل الجرايد وقالت انها هتصنعها واللى مطابقه هيبقى عليها ختم الوزراة ومدت تلات شهور على بال ما تصنعها وعلى بال ما الناس تستوردها

رئيس جمهوريه نفسى said...

قوس قزح استاذنك فى رد على ابى
موضوع المثلث العامس انا عارف كويس استخدامه انا مش بناقش مدي نفعة انا بناقش انى الحكومه تسيب الشعب عرضه للاستغلال على يرتفع ثمن المثلث ل 350% فى ااقل من شهر ومتنسيش انى المثلث العاكس بيتطلب اضاه تعالى شوفى طرق الصعيد مش مضاه واغلب السواقين مبيضوش النور بالليل
فى كل بلاد العالم بيبقى فى حارات للطواري بحيث لو عطلت السياره بتروح على الحارة دى وتركن شفتى دى فى اى طريق مصري
قبل ما يتعمل تعديلات على قوانين المرور او اى حاجه زى كدة المفروض يكون عندنا طرق يا ابى والله اعظم طريق فى الصعيد بيكون اتجاهين بس رايح جاى وبعدين القانون يقولك النقل الثقيل يلزم يمين اذا كان الطريق كله شمال حيلزم يمين ازاى

tarek alghnam said...

الرائعه دولى
امممممممممممم
كل الموضوع ان الشنط دى زى احزمه الامان صفقه وليها ناسهت وحشدوا عليها فى الاول وترجع ريما لعادتها القديمة وتظل ديكور بالسيارة
فين الثقافه اللى عندنا علشان نستعمل دة ولا غيرة
بس هى ارزاق
تحياتى ليكى
ويارب دايما متألقه

تامر حسين said...

علي فكره الشنط دي ما هي الا مجرد تشغيل لوزاره الصحه عشان يعلو مرتباتهم شويه زي بالظبط ما حصل ساعه حزام الامان
لما كان مرمي بيتباع بتلاتين جنيه
ولما طلع القانون الجميل
بقي بيتباع بميه وخمسين جنيه وكمان قمه في الرداءه
ولسه بكره هنلاقي حوار جديد وجديد اومال يعني الناس هتقعد ساكته كده
لازم يكون في قانون مرور جديد وتعديلات جديده عشان الناس تمشي عالعجين ميلخبطهوش
وبكره هتلاقي من ضمن شنطه الاسعاف حته عجين عشان اختبار العجين الي مبيتلخبطش
زغرتي يالي منتيش غرمانه لولولولولولوييييييي
تحياتي
ومستني بقيه الناس عندي في المدونه بتاعتي عشان اتملت تراب

maha zein said...

انا بصراحة معرفش عن الشنطة دي غير من مدونة مفروسة
ومش مهتمة
عادي يعني
سواء الواحد معاه شنطة ولا مش معاه عادي مش فارقة
كده كده هينداس وهيموت خاصة لما يوصل المستشفى
عموما انا غيبت عليكي ومقرتش الموضوع قبل التحديث ببسبب فرح اختي
وبخصوص التبرع بالدم
انا اصلا وزني خمسين كيلو
وانا الدكتور بيقول لا مينفعش وزني يتبرع
قالى انتي تروحي تتبرعي بالعظام احسن صراحة
فمش عرفة انا مش هقدر اتبرع معاكم
ده غير اني عندي حالة هستيريا من الحقنة
يعني عمرى ما اخد حقنة ابدا
ولما جيت اخد واحدة في سناني لما كنت بحشي ضرسي
كنت هيغمن عليا
وجابولي عصير
وكنت فضيحة
اذاي بقه ممكن اتخيل حقنة موجودة في ايدي وبتشفط دمي
معرفش
اسفة بجد
*******
انا بقه دخلة مخصوص اهديكي التاج الي عندي في المدونة
انا عوزاكي تجاوبي عليه
عوزة اعرف عنك كتير
عوزاكي تفضفضي فيه براحتك اوي
بليز تقبليه مني
تحياتي ليكي

قوس قزح said...

ساعد نسرين الايمن

شنطة جحا ؟؟
دى هتبقى زى مسمار حجا كده ؟؟

هو احنا ناقصين جحا ما كفاية علينا على بابا و الاربعين حرامى

قوس قزح said...

رئيس جمهورية نفسى

يا محمود و هى العربيات عربيات رش ولا فناطيس ميه ايه يعنى اللى هيخلى الشنطة تصدى اوى كده
تانى حاجة الحكومة ملهاش دعوة ان كانت الناس بتبيع المضروب ولا لا
هى لها دعوة انك يا اما تشترى الشنطة من المرور او متشتريش و تدفع الغرامة
ثالت حاجة اغلب العربيات الحديثة و الغالية - يعنى الناس اللى الحكومة قالت انها عايز تاخد منهم للفقير - اغلبهم بيكون فى العربية مثلث عاكس .. من الاخر كده اللى هيشترى المثلث الناس الغلابة .. هو مهم جدا بس لازم يرعوا ان اغلب اللى هيشترى الغلابة السواقين و الموظفين اللى معهم عربيات قديمة و صغيرة
رابعا الحكاية انهم هيستردوا العلاوة من الناس بس جنيه ورا جنيه ورا جنيه
خامسا فى حالات فعلا لو بس اتحركت من مكانها خلاص اتقضى عليها
اما عن تاخر الاسعاف و الافضلية بين المصرى و الاجنبى ده موضوع كبيررررررر اوى

نورتنى يا محمود بفضفضك دى

قوس قزح said...

عصفور المدينة
كويس انك واخد بالك من الدومات اللى بندخل فيها
و هنخرج من شنطة الاسعاف على شنطة الخير الرمضانية على شنطة المدرسة

شكلنا هنبقى تجار شنطة فى الاخر

قوس قزح said...

نعكشة
لا طبعا مش شىء كويس ابدااا
لان احنا غاويين نفتى و نعمل دكاترة من غير شنطة
تخيلى بقى كمان لما يبقى معنا الشنطة
و يقعد كل واحد يتفاخر انه انقذ فلان و علان من الموت

و بعدين صعب يكون القانون ده على الدكاترة و هم ذنبهم ايه لو مش معاهم الشنطة يدفعوا غرامة افرضى انا دكتور تحاليل ولا دكتور اسنان ولا حتى دكتور نسا
اتحمل ليه مسئولية حادث قد يكون فيه حالات حرجة فوق مستوى دراستى و شغلى
الاسهل يعملوا على كل رخصة مبلغ للاسعاف على الطريق و يعملوا اسعاف بجد بقى مش عربية الموتى متهالكة دى

قوس قزح said...

احمد كمال
انا بقول الاحسن يطلعوا قرار ان العربيات تتحول كلها لعربيات اسعاف و خلاص
و كل واحد مسئول عن روحه بقى

قوس قزح said...

saso
لا والنبى بلاش الافكار دى لحسن حد يسمعها و ينفدها بجد هههههه

الخوف ان الكيب دى يكون له امتحانات و مجموع وقت عمل الرخصة :)

قوس قزح said...

مهيج الجماهير

على ما اظن لسه فى افكار كتير فى جراب الحاوى بكرة نعرفها

اشكرك على مرورك

قوس قزح said...

لماضة
ده على ما ابعته اسكندرية هيكون فيص فى السكة
تعالى انتى عندنا و نعملك كشك اسعافى على كوبرى 6 اكتوبر الزباين عليه كتير
فرحت بزيارتك لماضة و بلماضتك :)

همس الاحباب said...

الشنطة شكلها شيك
وتنفع فى اغراض اخرى
وطالما من معدن لايصدا يبقى اتسرق وتتباع برده خلى الشعب يعيش
والحكومة كمان
اذا كان من اولها والشنط كلها غير مطابقة للمواصفات
طب جبتوها ليه يا بنى ادمين
هى من الاخر سبوبة
ويجعله عامر
اما المثلث ده يا ترى
ده مثلث برمودا بقى
ولا ايه اللى ثمنه بيتضاعف كل يوم
تحياتى وربنا يصبرنا

Unknown said...

للاسف
مفيش معايير ثابتة للحفاظ على صحة المواطن يعنى المفروض قبل
الشنطة ما تنزل السوق كانت تبطقت عليها معايير السلامة
مش اى حاجة وخلاص
واكيد فى ناس اشترتها على انها يعنى شئ مفيش بعدة وميعرفوش اخطارها

قوس قزح said...

عمرو الطاروطى

حاسة مرعبة
امممم على كده انا اخوف اوى :)

بص يا سيدى هرد على استفسارك معنديش عربية و هشترى قريب ان شاء الله و مش هتفرق ال 100 جنيه
اللى فارق بس انى مش عايزة حد يلعب فى عداد عمرى بحتة شنطة عبيطة :)


شكرا على المعادلة و اتمنى انها تتحقق :)

قوس قزح said...

الشنكوتى الكبير

و الله على ما سمعت ان مفيش الشنطة دى فى اى مكان فى العالم و انها فكرة مصرية ميه فى الميه

و الله يا ايهاب بالطريفة دى العربيات واقفة على الناس بخسارة و الموصلات بقت احسن

الاحسن تخلى بابا يقلبها ميكروباص بالنفر

تحياتى اخى العزيز

قوس قزح said...

appy
ماهو انا خايفة من الشنطة علشان كده يا ابى ان انت اللى هتعلمنى و لو سلبت فى شجرة هتجربى فيا الشنطة :))

بس ابقى خاليكى حونينة عليا

تصدقى فكرة انها تبقى علبة ميك اب دى حلوة اوى
و يا سلام بقى بعد شوية يعملوا منها شنطة الوان للستات و الشاش اللى فيها يكون لونه بينك ولا فوشيا هههههههههههه
و الله عالم فاضية ما عارفة تخترع لنا ايه ولا ايه

قوس قزح said...

appy تانى
عندك حق فى ان المثلث مهم لان فعلا ممكن العربية تعطل و تبوظ فيها ضفيرة الكهربا و بكده يكون مفيش اى حاجة تبينها بالليل خصوصا فى الطرق الضلمة
يعنى المثلث مهم جدا جدا جدا

اما عن مواصفات الشنطة
يعنى بالذمة حد يقول القانون و ينفذه و هو لسه مش مستعد له
فين هم من ساعة ما اتوافق على القانون
و ليه ميتأجلش تطبيقه لحد ما يستوردوا ولا علشان يلحقوا قبل السنة ما تخلص !!!

قوس قزح said...

رئيس جمهورية نفسى
عندك حق
ليه فكروا فى اللى هيحصل بعد الحادثة و مفكروش فى اللى ممكن يكون سبب فيها

اقولك ليه
قبل الحادثة = الحكومة تدفع فلوس
بعد الحادثة = الناس تدفع فلوس

سهلة اوى

هنقول الحكومة مزنوقة و الدنيا غالية عليها كمان
طيب قدامهم فرصة اهو من غرامات القانون الجديد ولا الغرامات علشان الاحتفال بعيد الشرطة السنوى !!!

قوس قزح said...

طارق الغنام

يارب تكون مجرد ديكور فى العربية
اتمنى ذلك
و ان كان على السبوبة كان فى حاجات كتير تانية تبقى سبوبة

نورتنى بمرورك

قوس قزح said...

تامر حسين
لولولولوى
اصلى مش غرمانة :)
عجبنى اوى التكاتف اللى بين الوزرات و ان كل وزارة بتساعد التانية
و الحمدلله انها جات فى وزارة الصحة
تخيل لو كانت جات فى وزارة الزراعة كان ومنهم طلبوا تشجير السقف و الباك يارد للحفاظ على موود السواق

ايوه لازم تشوف حل فى التراب ده لانى بصراحة مستخسراها .. تأجرهالى قانون جديد ؟؟؟ :)

قوس قزح said...

مها زين
اولا مبروووووووك
و مش هقول عقبالك علشان مش تقولى لا
ثانيا انا زيك و عندى هسس من الحقن و وريدى بيهرب منى و بيقعدوا يجروا وراه و يمكن يلحقوه فى قدم رجلى
مش شرط انك تتبرعى
تعالى نتقابل يومها مع الناس و هم عاملين حفلة بعد التبرع

ياريت تقدرى تيجى


اخر حاجة
كده بردو
ده تاج ده
16 ؟؟
اجبهم منين دول
ياريت كان عندى
انا يادوب تلاتة اربع
ينفعوا ؟

قوس قزح said...

همس الاحباب
يعنى هم مستنين الشنطة علشان يسرقوا
تصدق الناس سرقت ايه من عربية جوزى
المسامير اللى بتبرط الطاسات فى العجل
مسااااااااامير
و سابوا الطاسة


ربنايكون فى عونا و هم كل شوية يضيقوا الدنيا على الناس كده

قوس قزح said...

نهر الحب

انا اعتقد ان اقتراح الشنطة ده جيه فى الوقت الضايع
علشان كده مقدروش يستوردها بسرعة
بس يستوردها منين ده مفيش النطام ده غير عندنا

طبيبك الخاص said...

والله فكره ان يكون هناك شنطه اسعافات اوليه موجوده فى السياره دى شى جميل جدا لانها هتساهم بشكل كبير فى اسعاف حاله ناس كتيره لحين وصولهم الى اقرب مستشفى..بس دى لازم تكون شنطه للاسعافات وليس للابتلاءات

Empress appy said...

رئيس جمهوريه نفسى
===============

انا رديت عليك على الماسنجر
بس هنا علشان الناس
طبعا المثلث فسفورى مش محتاج نور على الطريق محتاج نور العربيه اللى جايه وبس خلاص

و القادم....أجمل said...

ماالشنطة زي الفل أهي
مكتوب عليها
first aid

طيب ماهي تشطيب لوكس

إنتوا كده ميعجبكوش العجب

:\

----------------
saso رد
و ردك عليه وهمي
هههههههه
----------------

و الله الواحد معارف يقول ايه

لنا الله

:(

بنوته مصرية said...

هههههههههههههه

انا مش عارفة ايه حكاية الشنطة دي

يعني هو اللي هيعمل حادثة هيقعد كدا علي جمب والدنيا والعه ويطهر الجروح بتاعته ويربط شاش

طيب ميعلمونا بقي بلمرة ازاي ندي حقن وازاي نعمل عمليات
ايه الناس دي اما المستشفي راحت فين وعربية الاسعاف ام سارينه عاليه
والنقاله راحت فين وريحه البنج كل ده خلاص هنستغني عنه بلشنطة

انا معي ابي لو جبت الشنطة دي هحط فيها الميك اب علي الاقل نور متعرفش توصلة هههههههههههههههه

لسة ياما هنشوف من القوانين الجاية

Anonymous said...

أعتقد أنه كان يجب عمل توعية على طرق استخدام المواد دى قبل فرضها

ثانيا الموضوع متكامل .. طرف منه قائد السيارة .. فين بقى الطرق النظيفة والبلاعات المقفولة والاشارات الدالة وغيره؟

ربنا يستر فعلا

داليا ..قوس قزح said...

طبيبك الخاص
طبعا انت حقك تعجبك الفكرة ماانت هتعرف تتصرف بالشنطة و حتى لو مش استخدمتها فى حادثة هتنفعك فى شغلك :)

داليا ..قوس قزح said...

appy

عندك حق بس محمود قال ان حتى العربيات مش منورة نورها على الطريق
و الفسفورى لازم له اضاءة علشان ينور

فعدم وجود نور فى الشارع و كمان العربيات بدون نور يبقى المثلث هيعكس ايه ؟

داليا ..قوس قزح said...

و القادم .. اجمل

طبعا لكى حق تكونى متفاءلة
و يارب يكون فعلا القادم اجمل :)

داليا ..قوس قزح said...

بنوتة مصرية

ياريت فعلا يعملوا كورسات لاسعافات الاولية
على الاقل فى الحاجات البسيطة

انتى ممكن تخلى الشنطة هتنفع نور لما تروح الحضانة تعملها لانش بوكس :))

داليا ..قوس قزح said...

sherif

الحاجات اللى بتكمل الموضوع فيها دفع فلوس
لكن الشنطة و المثلث فيها لم فلوس

تفتكر الحكومة هتمشى فى انهى سكة ؟

shaimaa samir said...

السلام عليكم ورحمة الله وبركاته

يشرفنى دعوتكم لحضور حفل توقيع ديوانى الاول
اطياف الصمت

وذلك فى الثانى من شهر اغسطس
يوم السبت القادم باذن الله
الساعة 7
بمكتبة طلعت حرب


يشرفنى حضوركم جدااااا


قوس قزح
عايزة اشوفك فعلا
بجد بالله عليكى حاولى تيجى

اهو ده عيبه said...

ايه شنطة الحاوى دى اللى لازم تبقى ضد المايه وضد النار وضد الحشرة والفار
دول عاملينها بمواصفات على مقاس المورد اللى اكيد هيكون وحيد اوحد وهيحتكر سوق الاسعافات زى ما قبله كان فيه سوق الخوز والاحزمة والطفايات
المساله تفريغ لجيوب الناس مش اكتر
والدليل ان بعد فترة العملية بتهدى والالتزام بيقل وبترجع ريما لعادتها القديمة بس المهم المورد عمل القرشين
والكل نابه من الحب جانب
وبعدين فى كل الاحوال يفهم ايه سواق الملاكى او السرفيس فى الاسعافات او تطهير الجروح او اى حاجه من الكلام ده
ده ممكن ييجى يساعد يؤذى اكتر خصوصا فى حاله الكسور والحروق
المساله كلها جر فلوس من الناس وخلاص
ربنا يرحمنا برحمته

Asmaa mahaba said...

انا عاوزه اعرف ايه مشكله الشنطه البلاستيك وحشه ؟؟كخه؟؟ لازم تيتانيوم صحيح اقرع ونزهى
والحجاج مفتشين وزاره الصحه بيلعبوا كوره فى المكاتب ولا ناقص نديهم رشوه هم كمان عشان يقفشوا الناس وياخدوا بالهم من شغلهم
دى خيبه ايه دى
تعلن شركه سوميتكو للمصنوعات الطبيه المضروبه عن بيع شنطه الاسعافات الاوليه باتنين ونص ان شاء الله
ونحن نحطم الاسعار تحتيما:))
تحياتى ليكى سومه_87

Asmaa mahaba said...

يا جماعه مش انتوا تقصدوا امثلث اللى لما العربيه تقف يحطوه سبحان الله دا انا بصنعه هو كمان وابيعه باتين ونص صينى بس ميه ميه
متقلقوش اللى تعوزوه رخيص استوردوه من الصين باتنين ونص

Asmaa mahaba said...

عندنا كمان شنط ومرايل مدارس وشوزات انما ميه ميه وكراريس واقلام ومساطر لزوم السنه الدراسيه
وبرفانات حريمى ورجالى ومايوهات بكينى ومحجبات وبواريك مستعاره ودباديب
لمولى بس انتوا الفلوس وانا اخدهم واطفش على برا
تاجره الشنطه سومه_87

Diyaa' said...

لا لا لا لا لا مش ممكن
يا عزيزي كلنا لصوص
جملة محمود عبد العزيز مش فاكر في فيلم إيه..بس عادي الريس عشان يسرق لازم يسيب الباقي يسرق
الغرض مش ننوس عينين كل واحد بيعمل حادثة..عاتشي ده تحديد النسل محتاج عبارات تغرق كمان
الغرض فعلاً لم شوية اتاوات لأن الميزانية مش كملت مطالب قائد كتيبة كلاب حماية عصابة ال40 ألف حرامي..واللي كلاب الأمن المركزي تبعه مش هيكفيهم الميزانية الرهيبة اللي بياخدها أصلاً فلازم المزيد
واللي هيكسل ومعاه فلوس..وماله..اللي مش معاه فلوس..يبيعوه اللي وراه واللي أدامه عشان يمشي ورا القانون الشكلي الجديد وشوية وهيبيعوا الشحنة اللي فيها عمولة محترمة ودمتم
متاخديش في بالك يا شيخة
إنها مصر..شعب يعجبك لكن إدارة يخجل إبليس من مقارنتها بيه
المهم طولت..السلام ختام
وشكراً للإهتمام..وميلك الصح هنا مش في الورقة :( والسلام عليكم

Mafrousa said...

والله يا اخت قوس
انا كنت عارفه ان الموضوع ده شكله حيدخلنا فى مخالفات لا حصر لها
ربك بستر
انا لسه مش اشتريتها لغاية لما يشوفولهم صرفه
حاجه تفرس

د/اجدع بنوته said...

والله موضوع الشنطه غبىىىىىىى

بشده كمان

والاغبى منه قانون المرور

والاغبى والاغبى النمر الجديده

لا حول ولا قوة الا بالله

صباح الصباح said...

اللى بيحصل دة بيفكرنى ايام ما التحف بتوع المرو قالوا يا حزام امان والناس كانت بتموت بعضها على شراة لدرجة انة بقى بيتباع سوق سودة وهوة لا مستورد ولا حاجة وعمول تحت السلم .. منظر يعنى
بصى الموضوع كلة كومبينة.. واللة السبت اللى فات عديت على كشك اجيب حاجة ساقعة وكان فية عربية حلو كدة راكنة فى الممنوع والبنت صاحبتها كانت بتجيب سجاير من الكشك نفسة الراجل العسكرى فاضل لازق للعربية واتفضلى يا هانم وفى الاخر غمزتة باللى فية النصيب .. ورشوة عينى عينك .. وفى عز الضهر.. وسلملى ع الحكومة

عبده الرايق said...

اسعفات اوليه ؟؟؟؟؟؟؟؟؟
دى اسعافات اجباريه
من جيبونا
ههههههههههههههههه
ههههههههههههههه
ههههههههههههههه
ايه الصوره دى ؟؟؟؟؟
قصدى على صوره مدونه الضاحكون
رغم انى متبهدل وفرنسا شايلانى
الا انها صوره جنان
فعلا فنانه
تسلم ايدك

المنسى said...

قوس قزح
رغم إنى مهتمتش أوى بقانون المرور ده
يمكن عشان معنديش عربية أو عمرى ماسقت عربية
ويمكن عمرى ماهعملها وأجيب عربية هههههههههههه
جايز
بس أكيد إنتى عارفة أن كل حاجة فى بلدنا لا تصر مزين ولا حلاق
تحياتى ليكى
إنشاءالله مش هتكون أخر زيارة

momken said...

عارفها وحافظها كويس مش محتاج صوره ابوها

الغريب بقى هو فى حوادث العربيات ينفع الشاش والقطن والحجات البدائيه دى
امال لو واحد اتزحلق نعمل ننفخ فى عينه

انا كل خوفى لاحسن يلزمونا نعين طبيب عضام او طوارىء فى كل سياره
ويكون الطبيب موجود طوال فتره القياده

ويجعله عامر

ذو النون المصري said...

اعتقد ان الموضوع كله مجرد فرصه للبعض للتربح
و لا اعتقد ان الشنطه ممكن تفيد بغير
الشاش و القطن الموجود فيها
خاصة ان الناس غالبا ما يتركون المصاب بلا مساعده حين قدوم الاسعاف وا عتقد ان في ذلك بعض الصحه

ادم المصرى said...

يلا

ربنا يسماحهم

مفيش شىء غير حسبى الله ونعم الوكيل

قوس قزح said...

شيماء سمير

انا سعيدة اوى باللى سمعته عنك يوم الحفلة
و زعلت انى مقدرتش اكون من الناس الموجودة معاكى يومها

ان شاء الله فى الديوان القادم هكون اول الحاضرين

قوس قزح said...

اهو ده عيبه

داليا كلامك صح جدا

و بكرة هنسمع و نعرف الفكرة دى مين اللى وراها لما تفشل

قوس قزح said...

سومة .. مجنونة فى بلد عاقل

لا هنا مفيش حدش هيشترى منك :))

روحى يلا على مدونة بيكا يمكن حد يشترى الخردة دى منك :)

نورتنى بخفة دمك

Anonymous said...

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html