الدرع و النبوت

على قناة ديسكفرى الخاصة بتناول الاختراعات و الاكتشافات كان فى من يومين موضوع عن السترة الواقية من الرصاص

و السترة دى زى ما كلنا عارفين ان الرصاص لايمكن اختراقها و يصل لجسم الانسان لكن اللى ميعرفوش البعض ان السترة دى بيكون سهل ان يخترقها اى شىء حاد زى الخنجر او الابر او اى شىء له حرف مدبب

المهم الجماعة بتو ع الاختراعات الخاصة بالحكاية دى قعدوا يعملوا تجارب كتيرة جدا لحد ما قدروا يتوصلوا لمادة جديدة خفيفة فى الوزن و مرنة و ميزتها انها بتتحول لمادة جامدة جدا زى السيراميك مجرد ما اى حاجة تحاول اختراقها

اه و الله

يعنى المادة دى ملوا بها قطعة سفنجة و كان شكلها عادى زى اى سفنجة فى الدنيا لكن مجرد ما حاولوا انهم يغرزوا فيها اى حاجة زى سكينة او ابرة و بمجرد ما ذرات المدة دى تتحرك كل الذرات دى تتحد مع بعضها و تعمل زى الجدار الصلب و تتنى طرف السكينة او الابرة و متعديش من السفنجة

و علشان يتاكدوا اكتر انها تستحمل جابوا واحد من المارينز و معاه قوس ( مش قوس قزح لا قوس بجد ) و سهم مصنع بطريق انه يكون قوى جدا و سريع جدا و عملوا تجربة على السترة الواقية القديمة و فعلا السهم اخترقها بسهولة لحد نصه ، غيرواها بالمادة الجديدة و جربوا تانى لكن السهم بمجرد ما خبط فيها اترمى على الارض كانه خبط فى حيطة و عمل علامة بسيطة فيها ميزيدش عمقها عن اتنين ملم

و بعد تجارب عديدة اخدت شهور منهم - خدوا بالكم من عديدة و شهور دى - قرروا ان المادة دى يتحقن بها كل سترات الوقاية من الرصاص

و مش بس كده لكن كمان قرروا انهم يعملوا منها قفازات يستخدمها الاطباء اللى بيتعملوا مع مرضى الامراض المعدية

و كمان الناس اللى بتتعامل مع جمع الزبالة و تقسيمها و الناس اللى بيشتغلوا امن و بيضطروا يفتشوا شنط الناس

كل ده علشان يحافظوا على حياة الانسان اللى بيقدم خدمة لبلده

ايجابياٌ انا

ايجابياٌٌ انا

ده احساسى بعد يوم بؤجة الخير امبارح و بعد ما شوفت اد ايه ممكن حاجات بسيطة لنا تكون كبيرة اوى لغيرنا

و اد ايه قدرنا نسعد ناس عايشة مش تحت خط الفقر لكن عايشة تحت خط الحياة و نكون ايجابين مش بس نبص نظرة شفقة و عطف

و كانت نتيجة اليوم حوالى 20 بؤجة كبيرة و 48 شنطة رمضان

وحبيت ابلغ رسالة و اقول لكل اللى شارك معنا

اولهم الاستاذ احمد كمال اللى كان هو السبب فى توفير المكان و تعرفنا بالجمعية

خيخة اللى كانت من اكبر المساهمين

آبى شريكتى الجميلة و بطوطها

ابو المدونين ابو خالد

ايناس و اختها نسمة

جنة

شريف

ايما ام البنين و زوجها ابو البنين

احمد الصباغ و اللى عمل جروب على الفيس بوك

محمد ابن حجر العسقلانى

احمد الباحث عن الحقيقة

فاتيما

خالد همس الاحباب

احمد سكر

شيماء فضفضة

مها زين و صديقاتها نبيلة وهبة

احمد سوو

ميرا وومن

اسماء سومة

كريم يوميات مطلق

قلب مصرى و زوجته

رودى
شكراااا و جزاكم الله خير عن حضوركم و مشاركتكم معنا و ايجابيتكم الجميلة اللى كانت بنفس راضية و محبة لتكرارها و الاهتمام بمعرفة كيفية المساعدة اكتر

و اقول للناس اللى مقدرتش تيجى و مع كده شاركت و ساهمت معنا

محمد فوزى و هو تانى اكبر مساهم معنا

الربان

Ahmed_k

حنين القلب

الطائر الحزين
شكرا انكم برغم بعدكم لكن سعيتوا و شاركتم معنا و بعد المكان مكنش سبب او عائق قدامكم

و اقول لكل شخص بيعمل اى حاجة بيساعد بها اهل مدينته او بيساعد بها انسان غيره محتاج .. شكرا انك ايجابى و

مش واقف مكتف ايدك

و اقول كل شخص كان عايز يشارك و مقدرش لظروف غصب عنه .. لسه الفرصة الموجودة و تقدر تشارك و تكون ايجابى و تحس بكلمة شكرا فى عيون اللى حواليك و مش مشاركة مادية شارك بوقتك او بعلمك او حتى انك تدل على عمل الخير و تشجع عليه

بقول لكل واحد بيقول شعارات رنانة و افكار سمعها وهو بيتفرج على الدش و هو بياكل كنتاكى و يشرب بيبسى ولا قراهم فى جريدة ولا فى موقع و هو فى مكتبه فى التكييف و قال يعمل بيهم شخصية علينا ..طـــظـ فى شعاراتك اللى وراها شخصية سلبية اخرها تحضر حفلات للشهرة ولا لقاءات للتعارف و كل واحد عارف بطحته بقى

و بقول لكل شخص بيستسلم و يقول مفيش فايدة .. مفيش فايدة منك انت و خاليك لابس غما التور اللى بيلف فى ساقية السلبية

و بقول لكل سخص مش شارك معنا امبارح .. فاتك كتيرررر

و بقول لكل انسان .. ساعد غيرك انه يعيش كانسان و كن ايجابى

و اخيرا احب اقول للناس اللى تحب تكون ايجابية معنا ان المرة الجاية ان شاء الله هتكون قبل العيد و يكون يوم للاطفال المرضى بالسرطان كل واحد منا يعيد على طفل منهم بطريقته اللى يفضلها و التفاصيل هنقولها قريب بأذن الله

بؤجة الخير

تحديث

النهارده شوفت الجامع اللى هنتقابل فيه وانا فى طريقى من الدائرى لوسط البلد

الجامع وسط بيوت متهالكة و عشش

و من بيت فى البيوت دى لمحت بنت صغيرة واقفة فى شباك له حديد و مدة ايديها بتحاول تمسك الهوا

البنت شبه البنت اللى فى البانر ملامحها تايهة تحت سواد على وشها من عدم النضافة بس هى طفلة

يمكن اد بنتى او اصغر كمان عايزة تلعب و تفرح و معندهاش اى شىء تلعب به غير الهوا

بس حتى الهوا كتير عليها و كان اليوم الجو حر و مفيش هوا

قلبى اتعصر عليها و دعيت فى سرى انها تكون من الاطفال الموجودة يوم البؤجة

و طول اليوم بحاول ابعد بفكرى عنها لحد ما دخلت دلوقتى عند مها زين

ارجوكم اقروا البوست ده و انتم تعرفوا احساسى

الاحداث اللى مرت على البلد فى الايام اللى فاتت كتيرة اوى و كلها بتخلى الواحد عايز يعمل حاجة يساعد بها

من اول ما اتاخد بالشمال من الناس اكتر من اللى اخدوه باليمين تحت اسم العلاوة

و بعدها قانون المرور اللى هيخلى الناس تدفع اكتر و اكتر

بعدها الناس اللى بتموت من غير تمن و تسيب وراها ايتام و ارامل

و اخرهم دخول رمضان و مع كده صمموا ان تكون المدارس فى رمضان و الناس متلحقش تفوء من رمضان للمدارس للعيد

كل الضغوط دى على الشعب بتخلى كتير منا يبقى عايز يساعد

خصوصا لما الواحد يسمع ان فى بعض العرب بيشتروا كميات من العيش و يسبوه للناس الغلابة امام الحسين كل يوم و دول ولاد بلدنا و احنا اولى بهم

وفى كتير شايفين المساعدة هى اننا نغير النظام و نغير اللى ماسكين البلد

و ده علشان يحصل ممكن ياخد سنين هتكون الناس الغلابة كتير منها مات و كتير انحرف

و قعدت افكر ايه ممكن نعمله و يساعد الناس الغلابة اللى هم تحت خط الفقر بمراحل

و بصيت لحال ناس كتير منهم لاقيت ان حالهم لا يمت للادمية بصلة

السكن : عبارة عن عشش او شقق شرك

اللبس : بواقى من هدوم ناس اعلى منهم مستوى و اللى هم بردو فقرا زيهم

الاكل : لا يختلف كثيرا عما يقدمه بعض الاغنياء لحيوانتهم الاليفة و مواشيهم

المجتمع : اخلاق منهارة نتيجة الاحتياج و الجوع لكل انواع الغرائز و اولاد شوارع و انتشار السرقات و التسول و غيرهم

و دايما فى دخول شهر رمضان الكريم بيهتم اوى الناس بعمل موائد رحمن و شنطة الخير اللى بيكون فيها بعض من الاغذية و علشان كده فكرت فى حاجة تانية غير الاكل ( و اللى مش هو الهدف الوحيد فى رمضان و كمان ده مفروض طول السنة ) و اقدر اعمله بسهولة انى اوصل للناس دى بعض من الملابس قد تقى بعضهم من برد الشتا او تسترهم

و بمرورى على المدونات لاقيت الكل جواه نفس حالتى و انه عايز يعمل حاجة و عايز يساعد و مش عايز يكتفى بالكلام

ففكرت فى بؤجة الخير و ان بدل ما اكون فرد واحد ليه ميكونش كلنا نساعد و نشارك و كل واحد يفتح دولابه و يطلع كل الهدوم اللى زيادة عن حاجته او اللى بطل يستخدمها و يعملها فى بؤجة و يجى يشارك بها

و اول ما عرضت على العزيزة آبى الفكرة انها تكون فى مدونة بيكيا رحبت بها و عرضت كمان ان جزء من الحاجة يتخزن عندها فى البيت و انها تروح تستلم من السوبر جيب الحاجات اللى مدونى المحافظات ممكن يبعتوها خلاله

ولان رمضان كتير منا بيكون محتاج لاى وقت فيه علشان يصل الرحم او يرتاح او يقيم عبادة معينة فضلنا انها تكون قبل رمضان

و ادى التفاصيل
اليوم الجمعة 22 اغسطس الساعة 11 الصبح

المكان مسجد زهراء مصر القديمة فى الزهراء

خريطة المكان

هنا الطريق من على كورنيش المعادى و المربع الازرق ده البنزين اللى قبل دخلة المعادى و المربع الاحمر هو مكان المسجد و الخط الاخضر بيوضح الطريق

و هنا الخريطة لمحطة مترو الانفاق اللى اسمها الزهراء و لونها بالازرق اما اللون الاحمر فهو لمكان المسجد

و ده سهل اوى للناس اللى هتستخدم المترو

فى حالة ان حد تاه ممكن يتصل على الارقام دى

0124433543

الاستاذة صبرية جمعية صحبة خير

0120667739 - 0106011712

الاستاذ احمد سكر صاحب مدونة احمد سكر

0101345140

الاستاذ خالد صاحب مدونة همس الاحباب

و هنكون هناك لحد وصول اخر حد قال انه ناوى يشارك و يجى اليوم ده

و ده البانر اللى يحب يحطه فى مدونته اعلان للبؤجة و يعمل له لينك على المكان ده

http://bekyaforsale.blogspot.com/2008/08/blog-post.html

دى بعض المدونات اللى نشرت موضوع بؤجة الخير او موضوع مشابه او موضوع شجعنى على الفكرة

مدونة بيكيا

مدونة آبى بلانت

مدونة رحايا العمر بوست هل انت مستعد ، بوست على الهامش

مدونة بت خيخة و اى كلام بوست يلا نعمل بؤجة

مدونة واحة الفكر و القلم هل اصبحت القطط اكرم من اولاد الشوارع ؟؟

مدونة مصر يا موكوسة .. يا مزارع الكوسة موتى وهم احياء

مدونة زعر نحن و اطفال الشوارع

و اللى يعرف مدونات اخرى يبلغنى

شوية ملاحظات

متنساش ان الهدوم دى رايحة لوجه الله يعنى لازم تكون تليق بانك تقدمها لربنا

المكان مفتوح للناس اللى مش هتقدر تيجى فى نفس اليوم لمدة اسبوع و بعد كده هيعمل شنطة الخير للى بردو يحب يساهم فيها

اللى مش عنده ملابس شايف انها تصلح او فعلا اتبرع بها ممكن يشارك ماديا و نجيب بها لبس جديد للاطفال على العيد

مش شرط تكون الحاجات هدوم و بس ممكن ملاية او فوطة او حتى مفرش

اللى مش قادر يجى و عنده حاجات ممكن يكلم جمعية رسالة و هى تيجى لحد بيته و تاخد منه الحاجة و بردو بتوزعها على الايتام و الفقراء

ارجو من كل شخص يقول هشارك يكون ناوى بجد يجى علشان نكون عارفين كمية الحاجة ايه و الاشخاص اللى ناويين يحضروا و نرتب صح

اخيرا بوجه شكر خاص لمدونى بورسعيد لانهم غيروا معاد اللقاء مخصوص لما عرفوا احتياجى لليوم ده لعمل البؤجة

واجب الاسرار

انا معترضة

و مش عجبنى

و مش عارفة كمان الحل ايه

و ده مش بلادة

لكن تقدروا تقولوا عدم معرفة فعلا

بس علشان معزة الناس اللى طلبوا منى

و هم احمد كمال مدونة رحايا العمر

طارق الغنام مدونة بورسعيدى

فاتيما مدونة روح قلب ماما

مها زين مدونة انها الحياة

انا هحل الواااااااااااجب

و يا مها هم 6 بس مش 16 هجيب منين انا اجوبة !! ..الكتاب بيخلص بعد الاجابة الرابعة و هألف اتنين عليهم

لكن لحد 16 نو نو نو على راى الرايق

المهم ما علينا و ندخل فى الغم ..اقصد فى الاهم

أذكر اسم من طلب منك حل هذا الواجب ؟

مش هنقعد بقى كل شوية نجيب فى سيرة الناس :)

أذكر القوانين المتعلقة بهذا الواجب؟

القوانين هم الاسئلة

تحدث عن ستة أسرار قد لا يكتشفها من يقابلك للمرة الأولى ؟

وااااااااااحد
انا مش بحب الواااااااااااااااااجب و بكرهه و اعمل الحاجة من نفسى بس مش تكون غصب ..يعنى اللى قدامى اديله عينيا بمزاجى لكن مش غصب عنى

اتنين
انا بتنرفز بسرعة و ام شديدة اووى و لما كنت مديرة كنت صعبة بردو بس فى نفس الوقت بعرف ازاى اخلى اللى قدامى يقبل الشدة دى و يعرف ان هدفها عمل الصح مش اكتر

تلاتة

لما حد يخدعنى مش بتصدم فيه لكن بتصدم فى نفسى انى صدقته و انى تانى اديت الامان للناس بدون ما اعرفهم كويس اوى

اربعة
حالتى المزاجية بتتغير من حالة لحالة بسرعة و نتيجة اى حاجة هايفة ممكن خبر حتى لو مش يخصنى يقلب موودى تماما و يمكن ده من الاسباب اللى خاليتنى ابطل قراءة الجرايد

خامسة

خيالى واسع و لما حد بيحكى لى اى موقف بحس انى شايفاه و علشان كده بيعجبنى اوى بعض المدونات اللى بتوصف الاحداث بدقة لانى كأنى شايفها بجد معهم و منهم مدونة بابا ابو خالد

ستة

يا شوباب انا عندى زهايمر مبكر بنسى بطريقة غير طبيعية و ذاكرتى بتكون فوتوغرافية اكتر و علشان كده بفتكر الاحداث بالصورة مش بالحوار و ده كارثة لان فى ناس بتستغلها :(

دول اسرارى اللى ممكن متعرفهومش من اول مقابلة بس ممكن اقولهم فى تانى مقابلة و اعمله فى تالت مقابلة و الله اعمل هيبقى فى رابع مقابلة بعدهم ولا لا :)

حول هذا الواجب إلى ستة مدونين، وأذكر أسماءهم مع روابط مدوناتهم في موضوعك؟

هحوله لكل الناس اللى كانت موجودة يوم التبرع بالدم ماعدا طبعا اللى جاوبه قبل كده

بدام هم اصحاب واجب ;)

هييييييييييييييييييه بس خلاص
الحمدلله نجحـــــــــــــــــــت و جيبت 99.9 %

و الواحد من عشرة ده علشان اخر سؤال كسلت فيه شويتين

اللى يدخل بقى يجيب معاه ازازة شربات و يكون مانجة غير كده نووووووو

و على فكرة بقى انا هطلع غيظى فيكم و اعملكم تاج زى تاج الجزيرة

و كل واجب و انتم طيبين