Tuesday, August 12, 2008

بؤجة الخير

تحديث
النهارده شوفت الجامع اللى هنتقابل فيه وانا فى طريقى من الدائرى لوسط البلد
الجامع وسط بيوت متهالكة و عشش
و من بيت فى البيوت دى لمحت بنت صغيرة واقفة فى شباك له حديد و مدة ايديها بتحاول تمسك الهوا
البنت شبه البنت اللى فى البانر ملامحها تايهة تحت سواد على وشها من عدم النضافة بس هى طفلة
يمكن اد بنتى او اصغر كمان عايزة تلعب و تفرح و معندهاش اى شىء تلعب به غير الهوا
بس حتى الهوا كتير عليها و كان اليوم الجو حر و مفيش هوا
قلبى اتعصر عليها و دعيت فى سرى انها تكون من الاطفال الموجودة يوم البؤجة
و طول اليوم بحاول ابعد بفكرى عنها لحد ما دخلت دلوقتى عند مها زين
ارجوكم اقروا البوست ده و انتم تعرفوا احساسى


الاحداث اللى مرت على البلد فى الايام اللى فاتت كتيرة اوى و كلها بتخلى الواحد عايز يعمل حاجة يساعد بها

من اول ما اتاخد بالشمال من الناس اكتر من اللى اخدوه باليمين تحت اسم العلاوة

و بعدها قانون المرور اللى هيخلى الناس تدفع اكتر و اكتر
بعدها الناس اللى بتموت من غير تمن و تسيب وراها ايتام و ارامل

و اخرهم دخول رمضان و مع كده صمموا ان تكون المدارس فى رمضان و الناس متلحقش تفوء من رمضان للمدارس للعيد

كل الضغوط دى على الشعب بتخلى كتير منا يبقى عايز يساعد
خصوصا لما الواحد يسمع ان فى بعض العرب بيشتروا كميات من العيش و يسبوه للناس الغلابة امام الحسين كل يوم و دول ولاد بلدنا و احنا اولى بهم

وفى كتير شايفين المساعدة هى اننا نغير النظام و نغير اللى ماسكين البلد


و ده علشان يحصل ممكن ياخد سنين هتكون الناس الغلابة كتير منها مات و كتير انحرف


و قعدت افكر ايه ممكن نعمله و يساعد الناس الغلابة اللى هم تحت خط الفقر بمراحل

و بصيت لحال ناس كتير منهم لاقيت ان حالهم لا يمت للادمية بصلة


السكن : عبارة عن عشش او شقق شرك


اللبس : بواقى من هدوم ناس اعلى منهم مستوى و اللى هم بردو فقرا زيهم


الاكل : لا يختلف كثيرا عما يقدمه بعض الاغنياء لحيوانتهم الاليفة و مواشيهم


المجتمع : اخلاق منهارة نتيجة الاحتياج و الجوع لكل انواع الغرائز و اولاد شوارع و انتشار السرقات و التسول و غيرهم




و دايما فى دخول شهر رمضان الكريم بيهتم اوى الناس بعمل موائد رحمن و شنطة الخير اللى بيكون فيها بعض من الاغذية و علشان كده فكرت فى حاجة تانية غير الاكل ( و اللى مش هو الهدف الوحيد فى رمضان و كمان ده مفروض طول السنة ) و اقدر اعمله بسهولة انى اوصل للناس دى بعض من الملابس قد تقى بعضهم من برد الشتا او تسترهم


و بمرورى على المدونات لاقيت الكل جواه نفس حالتى و انه عايز يعمل حاجة و عايز يساعد و مش عايز يكتفى بالكلام



ففكرت فى بؤجة الخير و ان بدل ما اكون فرد واحد ليه ميكونش كلنا نساعد و نشارك و كل واحد يفتح دولابه و يطلع كل الهدوم اللى زيادة عن حاجته او اللى بطل يستخدمها و يعملها فى بؤجة و يجى يشارك بها



و اول ما عرضت على العزيزة آبى الفكرة انها تكون فى مدونة بيكيا رحبت بها و عرضت كمان ان جزء من الحاجة يتخزن عندها فى البيت و انها تروح تستلم من السوبر جيب الحاجات اللى مدونى المحافظات ممكن يبعتوها خلاله






ولان رمضان كتير منا بيكون محتاج لاى وقت فيه علشان يصل الرحم او يرتاح او يقيم عبادة معينة فضلنا انها تكون قبل رمضان


و ادى التفاصيل
اليوم الجمعة 22 اغسطس الساعة 11 الصبح


المكان مسجد زهراء مصر القديمة فى الزهراء

خريطة المكان


هنا الطريق من على كورنيش المعادى و المربع الازرق ده البنزين اللى قبل دخلة المعادى و المربع الاحمر هو مكان المسجد و الخط الاخضر بيوضح الطريق





و هنا الخريطة لمحطة مترو الانفاق اللى اسمها الزهراء و لونها بالازرق اما اللون الاحمر فهو لمكان المسجد


و ده سهل اوى للناس اللى هتستخدم المترو



فى حالة ان حد تاه ممكن يتصل على الارقام دى


0124433543

الاستاذة صبرية جمعية صحبة خير


0120667739 - 0106011712

الاستاذ احمد سكر صاحب مدونة احمد سكر


0101345140

الاستاذ خالد صاحب مدونة همس الاحباب

و هنكون هناك لحد وصول اخر حد قال انه ناوى يشارك و يجى اليوم ده

و ده البانر اللى يحب يحطه فى مدونته اعلان للبؤجة و يعمل له لينك على المكان ده

http://bekyaforsale.blogspot.com/2008/08/blog-post.html


دى بعض المدونات اللى نشرت موضوع بؤجة الخير او موضوع مشابه او موضوع شجعنى على الفكرة

مدونة بيكيا

مدونة آبى بلانت

مدونة رحايا العمر بوست هل انت مستعد ، بوست على الهامش

مدونة بت خيخة و اى كلام بوست يلا نعمل بؤجة

مدونة واحة الفكر و القلم هل اصبحت القطط اكرم من اولاد الشوارع ؟؟

مدونة مصر يا موكوسة .. يا مزارع الكوسة موتى وهم احياء

مدونة زعر نحن و اطفال الشوارع

و اللى يعرف مدونات اخرى يبلغنى

شوية ملاحظات

متنساش ان الهدوم دى رايحة لوجه الله يعنى لازم تكون تليق بانك تقدمها لربنا



المكان مفتوح للناس اللى مش هتقدر تيجى فى نفس اليوم لمدة اسبوع و بعد كده هيعمل شنطة الخير للى بردو يحب يساهم فيها



اللى مش عنده ملابس شايف انها تصلح او فعلا اتبرع بها ممكن يشارك ماديا و نجيب بها لبس جديد للاطفال على العيد


مش شرط تكون الحاجات هدوم و بس ممكن ملاية او فوطة او حتى مفرش

اللى مش قادر يجى و عنده حاجات ممكن يكلم جمعية رسالة و هى تيجى لحد بيته و تاخد منه الحاجة و بردو بتوزعها على الايتام و الفقراء

ارجو من كل شخص يقول هشارك يكون ناوى بجد يجى علشان نكون عارفين كمية الحاجة ايه و الاشخاص اللى ناويين يحضروا و نرتب صح

اخيرا بوجه شكر خاص لمدونى بورسعيد لانهم غيروا معاد اللقاء مخصوص لما عرفوا احتياجى لليوم ده لعمل البؤجة

67 comments:

Anonymous said...

فكرة جيدة وبارك الله فيكي
عبد الجليل

Empress appy said...

احلى قوس قزح فى الدنيا ربنا يكرمك يا رب ويجعله فى الميزان بتاع حسناتك
حلو الخريطه اوى والله تصدقى هجيب بطوط ونمشى عليها هههههههههههههه

ايوه شوفتى انتى بتركزى اما انا بتنجانى هتقولى ليه اعملى هلخبط الناس واوديهم دارفور بدل ما يجوا عندنا هههههههههههههه



حبيبى ميرسى بجد على اللوك الجديد بتاع المدونة سكر مقالب خالص

قوس قزح said...

عبد الجليل
اشكرك على اهتمامك و ردك
و كنت اتمنى ان تستطيع المشاركة معنا

تحياتى

قوس قزح said...

آبى
بطوط هتعرف تمشى عليها كويس دى شطورة اوى

و متخافيش الناس خلاص بقت تفهم كلامك و اتعودوا عليه :)

و العفو يا ستى انتى بس قولى و انا اغير على طول :))

ميرا ( وومن ) said...

قوس قزح

ربنا يبارك لكل من يسعي في الخير

انشاء الله انا معاكم وميرسي قوي علي الخريطة فعلا فكرة هايلة

قوس قزح said...

وومن
اشجع بنوتات المدونات :)

فى انتظارك ان شاء الله
و جزاك الله كل خير

Asmaa mahaba said...

قوس رنيلى او ايبى قبلها بيوم وانا حاجى ان شاء الله معلش عشان الزهايمر رنه بس متتصليش عشان رصيدك ههههه انتى عارفه انتى حماتى وانا احب احافظ على فلوس نور
وححاول اجمع اللى اقدر عليه ان شاء الله
وعاوزه يومها اقترح عليكم موضوع كدا نعمله فى رمضان
تحياتى ليكى سومه_87

Diyaa' said...

تسلم إيدك بجد :)

وربنا يجعله في ميزان حسناتك
وما نتحرمش من جوجل إرث
لول

وما زلت مصمم..الناس بتهرج لما يقولوا منقدرش نعمل كده في رمضان..فرحة الأطفال باللبس هتكون أكتر قبل العيد وكلنا متأكدين من كده

كانت ممكن تبقي يوم الجمعة الأخير في رمضان نروح بدري ونرجع علي الفطار ..عادي الناس تستحمل يوم في سبيل ثواب أكتر وفرحة أكتر للي رايحينلهم ..بس للأسف الأغلبية دوروا علي روقان بالهم بس :(

(احمد سكر ) said...

ربنا يوفقك ياداليا على فعل الخير

والدال على الخير كافاعله

ان شاء الله ربنا هيجازيكى كل الخير وهيجعله فى ميزان حسناتك

وبجد الخريطه هايله

مش محتاجه اى مساعده

لانها توضيحيه

اشوفكم على خير هناك ان شاء الله

تحياتى

ابو محمد

كاميليا بهاء الدين said...

جدع يا دوللي

جزاك الله خير
عن كل فاعل خير

كل عام وانتى الى الله اقرب

تحياتى لك وللصديقه الجميلة اابى

Moustafa` said...

جاي بإذن الله وخصوصا غني شاركت ف توائم للبؤجه بس شديد الإسم
----
هلفح بؤجتي ونعمل الازم ونوصل بعون الله
ربنا يكرمكوا يارب . سلامي كتير

قوس قزح said...

سومة
انا هرن عليكى كل يوم علشان كل يوم تقومى تلمى شوية من اخواتك و الجيران و باقى العيلة

يعنى كل رنة ببؤجة

و هنستنا نسمع اقتراحاتك ان شاء الله بومها

على رنات بقى :)

قوس قزح said...

ضياء
متزعلش اوى كده يا سيدى
ان شاء الله ممكن نعمل واحدة كمان للعيد
بس تكون هدوم جديدة و للاطفال بس
يعنى كل واحد يشترى و لو طقم واحد لطفل صغير و نتجمع و نوزعه على الاطفال

ان شاء الله يا ضياء ربنا يسهل و نقدر و نتعاون قووول امين

قوس قزح said...

احمد سكر

انا اللى عايزة اشكرك على موافقتك الفورية بأن رقمك يكون من الارقام المساعدة للناس للوصول للمكان


و الحمدلله ان المكان سهل و واضح لك و الا كانت تبقى كارثة و تتوه الناس معاك :)

قوس قزح said...

كاميليا

ربنا يخليكى
و كل سنة وانت سعيدة و محبوبة اكتر من الناس

و لو كنتى هنا كنت زمانى قلت لك هاتى بؤجة المانى و تعالى :)

يارب نشوفك قريب يا رب

قوس قزح said...

ساجى

و احنا فى انتظار بؤجتك المبجلة :)

جزاك الله كل خير

و الاسم شديد علشان يلزق جامد :)

محمود حسن العدل said...

قوس قزح
بوست جميل وفكرة اجمل
الله يبركلك بجد
الخريطة واضحة اوى مش محتاجة اى استفسار
تسلم ايدك
تحياتى

محمود حسن العدل said...

قوس قزح
بوست جميل وفكرة اجمل
الله يبركلك بجد
الخريطة واضحة اوى مش محتاجة اى استفسار
تسلم ايدك
تحياتى

همس الاحباب said...

ربنا يبارك فى حضرتك
ويجزيكى خيرا
فكرة رائعة ومجهود تشكرى عليه
وربنا يقدرنا جميعا على فعل الخيرات
تحياتى وتقديرى لاجدع اخت فى الدنيا
على فكرة البانر عندى فى المدونة
بعد اذنك يعنى

Ahmed Kamal said...

جزاك الله خيرا يا فندم ، و تمت إضافة البانر

إلى اللقاء إن شاء الله

عيله مفتريه سابقا said...

بارك الله فيك وعليك يا دودى بجد
الله على دى دعوة للخير
بصى انا هحاول جاهده اكون معاكم وهحط البانر
لانى عارفه والدتى فى عندها هدوم كتير هنتقى الاحسن منها
ويارب يديم المعروف هبقى اكلمك فى الموضوع ده

سلامى يا قمر

Mahmoud البطراوى said...

قوس انا ربنا يسهل واقدر اجى بس لو لا قدر الله مقدرتش ممكن يكون فى ارقام حساب او حتى بالبريد
عشان الناس الى عايزه توصل فلوس ومش تقدر تيجى
او حتى المبلغ الى هيتبرعوا بيه صغير وهيضيع فى المواصلات منه شويه

لو فى يبقى ياااااااريت تقولوا عليه

bastokka طهقانة said...

ربنا يرزقنا و اياكم الاخلاص في القول و الفعل و العمل و يتقبل منا صالح الاعمال


تحياتي

صباح الصباح said...

ربنا يكرمك ويجازيكى خير على المجهود الجميل دة.. عن نفسة ان شاء اللة جاى وسجلت المعاد فى الكالندر وباذن اللة هاكون قبل المعاد هناك
شكرا جزيلا لكل من سياتى لهذا العمل الجميل

Unknown said...

دي فكرة هايلة جدا
كان نفسي فعلا أحضر لحاجة زي دي الناس بتصعب عليا و بشوف قدامي حاجات يلين لها الحجر

أنا رغم زن يوم الجمعة ده صعب عليا أوي الخروج فيه لكن ححاول بأي طريقة و لو ماعرفتش حبعت حد بالحاجة بدالي و حبعت رساذل محمول كمان لكل المدونين و الغير مدونين الي أعرفهم
بجد فكرة هاياة تسلمي عليها
كده الشعر بالفقراء يبقي فعل مش ندوات و رغي و كلام

حنين القلب said...

داليا
ربنا يجعل كل خير فى ميزان اعمالك
وربنا يوفقك لما يجب ويرضى
باذن الله انا معاكو

يوميات فنانه مفروسه جداا said...

Bravooooooo 3aleky ya dody

ma3ko en shaaallah

bosa leky la7ad mashofek

salam ya 2amar

الربان said...

تحياتي

ربنا يوفقكم و يثيبكم عن عملكم الخير هذا خير الجزاء....

هذه ايجابية مطلوبة و محببة الي النفس
ياريت الجماعات و الاحزاب و من ينفق علي اشياء فارغة طلبا للدنيا، ان يدعموا هذه الافكار الايجابية البناءة.

تحياتي و تقديري لحضرتك و لكل من يشارك
بالعمل و الجهد او التبرع.

قوس قزح said...

محمود العدل

يبقى ان شاء الله تعرف تيجى و تشارك معانا :)
جزاك الله خير

قوس قزح said...

همس الاحباب
ربنا يبارك فيك
و اشكرك على المساهمة برقمك
كل يوم بتثبتى فعلا انك انسان جميل و اخ بجد

معلش الله يخليك ابقى كل يوم نضف البانر و لمعه و متنساشتسيب النور بالليل منور عليه :P

قوس قزح said...

احمد كمال

اسمح لى انا اللى اشكرك جداااا
و سبب الشكر هيبان فى اللقاء ان شاء الله :)

قوس قزح said...

عيلة مفترية
مفيش هحاول دى
فى انا جااااااية
و تجيبى اخوكى معاكى كمان
اصل انتى وحشتنى و بتخلى الجو جميل اوى بروحك الجميلة المرحة

اوعى متجيش فيها حق عرب دى :)

قوس قزح said...

بطوط حبوب
انا سعيدة بزيارتك جدا
نورتينى

تانى حاجة للاسف مفيش حساب او كده
و مش مهم الفلوس كتيرة او قليلة المهم المشاركة دى لوحدها فيها ايجابية و كمان ممكن القليل لك كتير لغيرك

و قرش على قرش ممكن نعمل حاجة

فى انتظارك ان شاء الله

قوس قزح said...

طهقانة
عارفة انا حسيت فى تعليقك ده انه غالى عليا عارفة ليه
لان دى اول مرة الاقيكى مش قولتى اورفوار و قلتى تحياتى

اشكرك على زيارتك اللى لها طعم مختلف :)

قوس قزح said...

صباح الصباح

انا سعيدة انك هتشارك معنا
و انا كمان هفكرك تانى ان شاء الله

جزاك الله كل الخير

قوس قزح said...

عاليا حليم

انا سعيدة بحماسك جدا :)
و ياريت الكل يعمل زيك كده و يبلغ الناس
و ياريت كمان تقدرى تيجى لن ممكن تكون فى فرصة اننا نتعرف اكتر على جهود الجمعية فى مساعدة العشوائيات

تحياتى

قوس قزح said...

حنين القلب
بجد هتقدرى تشاركى معنا ؟
ياريت
و لو صعب عليكى السفر ممكن تعملى يوم عندك للبؤجة فى اسكندرية او تبعتى بؤجتك فى السوبر جيت وآبى عندها استعداد تستلمها

قوس قزح said...

يوميات فنانة مفروسة

و انا فى انتظارك يا اجمل فنانة

جزاك الله خيرا

قوس قزح said...

الربان

انا عارفة ان لولا غربتك كنت هتبقى اول حد يشارك معنا

بس ان شاء الله المرة الجاية تكون معنا

اشكرك على مساندتك للخير فى مدونة بيكيا

تحياتى

maha zein said...

انا هشارك انشاء الله
وهاجي
واحل اساهم باى حاجة
انا بيصعب عليا اوي الناس دي
بحبهم اوي
بتمني اعمل خير
بشكركم كلكم
اوي
والصورة بتاعت الاعلان مؤثرة اوي
حرام والله كنت هعيط
بجد
ربنا يكرمكم
وانا هعلن عنها عندي بردو عشان الناس تشوفها
وهقول لاصحابي
وهحاول اخليهم بردو يشوفوا اللبس الي عندهم
ويشوفوا ممكن يساهموا بايه
ربنا يبارك للناس دي
ويعطيهم ويرزقهم

موناليزا said...

ربنا يكرم كل من فكر وعمل على تنفيذ هذه الفكرة
وعندى اقتراح للى خارج مصر
وهو ان كل واحد يقدر يساعد المحتاجين من الشارع الذى يقنط فيه او الاحياء المجاورة

ahmed_k said...

أختي الكريمه
ربنا يكرمكم علي الفكره الرائعه دي
ولو بحق كل منا أدي ما عليه تجاه هؤلاء الأطفال لما أضطروا للسرقه ليجدوا ما يقتاتون به أو ما يسترهم
أنا عن نفسي سأقوم بجمع ما أمكنني من أصدقائي وأقاربي في الغردقه
ولو لم أستطيع الحضور سوف أرسلهم لكم علي إحدى شركات الشحن لتوزيعهم

بارك الله في جهدكم المشكور
وتقبلي خالص تحياتي

Anonymous said...

السلام عليكم..فكره نبيله ربنا يكرمكوا جميعا بس المهم اليى يطلع حاجه يطلعها عليها القيمه وتنفع تتلبس لان فى بداية السنه دى عملنا حاجه مشابهه وكان الهدف منها طالبات الجامعه اليى حالاتهم تحت تحت الصفر وللاسف لا عرفنا نتصرف فىالهدوم اخيط المتقطع تلاقى القماش اصلا دايب ...السيده عائشه كانت لما بتطلع صدقه بتعطرها عشانبتوصل لايد ربنا الاول ..ؤنا يكرمكوا ويوفقكوا ويجعله عمل خالص لوجهه سبحانه وتعالى ..فى رعاية الله وامنه..

Gannah said...

كل سنة وانت طيبة
الحقيقة نهر الحب كلمتنى كتير عنك وقلت على الاقل الواحد يشارك مشاركة معنوية طالما مش هيقدر يشارك مشاركة فعليه
احلى حاجة ايجابيتك ربنا يكرمك
كلنا بنشوف الحاجات دى بس مين فينا بيتحرك هو ده الفرق
اتمنى لك التوفيق واتمنى ان اراك قريبا فى بورسعيد
تقبلى خالص احترامى وتحياتى

د. إيمان مكاوي said...

حبيبتي في الله
جزاك الله خيرا ..وتقبل منكم وجعله في ميزان حسناتكم
وعلى فكره الأولاد الزعاريييييير ..أولادي كتبوا عن الموضوع ده في مدونتهم واستخدموا البانر بتاعكم ..أكرمكم اللهوجزاكم خير الجزاء
تحياتي

مصر يا موكوسه .....يا مزارع الكوسه said...

فكره حلوه بس انا عملاها بالفعل

Bob said...

ربنا معاكم
بهاء

قوس قزح said...

مها زين
بوستك رائع يا مها
انا مش عارفة اقولك ايه
جزاك الله خير

قوس قزح said...

موناليزا
فعلا البلد فيها ناس كتير اوى محتاجة مساعدة
و سهل اى حد يوصل لهم
ودلوقتى لو بصينا جوه كل عيلة كبيرة هنلاقى فيها حد محتاج و الاقربون اولى بالمعروف

تحياتى

قوس قزح said...

ahmed_k
اشكرك على اهتماك و تشجعيك و ممكن لو مقدرتش تيجى تبعتها فى السوبر جيت و احنا نستلمها هنا

جزاك الله كل خير

قوس قزح said...

عايزه اتطلق و

و الله احنا قلنا ياريت الحاجة تكون نضيفة و مش متبهدلة لانها لله و كلمة لله دى مش كلمة سهلة زى ما الكل فاكرها
بالعكس دى مفروض تكون الحاجة لله من اطيب الحاجات

بس ربنا يعين الناس و يقدروا
محدش بردو عارف ظروفهم ايه

قوس قزح said...

Gannah
اشكرك على تشجيعك و مشاركتك
و نهرالحب من الناس اللى شرفت انى عرفتهم و اتكلمت معهم
و هى كمان كلمتنى عنك :)

نورتينى بزياتك
تحياتى

قوس قزح said...

ايما ام البنين

ما شاء الله عليهم
ربنا يبارك فيهم و يكونوا من الاولاد الصالحين ان شاء الله

اسمحلى اضيف مدونتهم مع المدونات اللى اتكلمت فى الموضوع ده

Ahmed Al-Sabbagh said...

اشكرك لاهتمامك فى توجية الدعوة

وجزاكى الله كل خير

وان شاء الله هاجى

ياريت لو تكتبى ملخص صغنون تلات سطور ابعتة لصالون المدونين

عشان تبقى المشاركة اكبر

اشكرك مرة تانية

تحياتى

احمد

كلبوزة لكن سمباتيك said...

ربنا يتقبل منكم و يعينكم

تحياتي

حزيــــــــــــــــــن said...

ربنا يبارك فى حضرتك
لو تحبوا نعلن عن الموضوع فى جروب مدونات مصرية للجيب
كلمونا وابعتولنا اللى عايزين تقولوه ونبعته للجروب كله وممكن نعمله ايفنت

0121479391
احمد مهنى

canary said...

مش هقولك فكرتك جميله ورائعه وانك انسانه طيبه وجزاكى الله كل خير وكل الكلام دة
بس انا هقولك حاجه واحدة وهى ان سلوكك دة المفروض يبقى سلوك شعب ودة اسمه التكافل فى الاسلام
وكان الاولى انهم يعملوة كل اللى اغتنى واثرى من البلد دى لكن طول ما فيه ناس زيينا مستوياتهم عاديه لكن بيحاولو يعملو الخير يبقى مش مهم اى حاجه تانى لان دة معناة انه لسه فى بارقه امل
طبعا كان نفسى اشترك معاكى لكن عندنا فى البلد فيه مشروع رساله وبيقومو تقريبا بنفس المجهود اللى انتى بتدعى ليه لكن هنا فى بلدنا والاقربون أولى بالمعروف . طولت عليكى لكن اسعدنى جدا مجهودك الرائع دة .... تحياتى

Anonymous said...

fekra momtaza w kont 3ayza asta2zenko lw tet3emel group 3ala el-facebook w a7`od moktatafat mn kalam 7adretko (appy w koos koza7) w akteb eno man2ool 3an modawenatko fa lw 2olto ok hab3atloko el link w in sha2 allah nl7a2 neb3at le nas ysharko bardo...fa eih ra2yoko..? ana hatabe3 rododko 3shan a3raf momken wala la2...w ay contact information about me ana akon sa3eda adehalko...shokrn gedn

مدحت محمد said...

ربنا يتقبل منكم يارب

Anonymous said...

فكرة رائعة جدا وجزاكى الله كل خير كان نفسى اساعد بس للاسف احنا بعيد اوى عن القاهرة .عشان كدة انا هاعمل اللى المفروض يتعمل بس للناس القريبة منى فى بلدى..وربنا يتقبل منا ومنكمز

قوس قزح said...

احمد الصباغ

اشكرك على اهتمامك و على الجروب اللى على الفيس بوك

جزاك الله كل خير

dina said...

بجد فكرة تجنن و ربنا يكرمكم يا رب..و احنا شغالين فى مشروع شبه دا فى اسكندرية و بدأنا نطلع قوافل للناس المحتاجة دى و بجد سعادتهم بتبقى حاجة تفرح لما تشوفيها
بجد جزاكم الله خيرا يا شباب

يا مراكبي said...

ربنا يبارك فيكم ويجعله في ميزان حسناتكم إن شاء الله

ياريت كل واحد في منطقته يعمل كده .. لو كل واحد تفقد أحوال المحتاجين حواليه هيكتشف مفاجأة مذهلة .. تجربتنا في الجمعية الخيرية اللي بيديرها الوالد في مصر علمتنا كده .. وعرفنا منها قد إيه فيه جيوش من الناس محتاجة وإحنا مش عارفين

بارك الله فيكم

Anonymous said...

قوس قزح
اولا الف مبروك تمام يوم بؤجة الخير على خير وربنا يجعلة فى ميزان حسنات كل من شارك وساهم فى اليوم ده بطريقة او باخرى
ثانيا: كل سنة وانتى طيبة ايام وحيهل علينا رمضان وكان عندى اقتراح لو كان ممكن يتنفذ هو مش محتاج تجمع بين المدونين وكل واحد حيعملة لواحده فى المنطقة بتعته مع القريبين منه تحت شعار افطار صائم
بمعنى انى كل واحد خلال ايام الشهر بيكتر السائلين فى الشوارع او بمعنى ادق الشحاتين وناس كتيرة من منطلق انه شهر رمضان بيخرجوا اللى بيقدرهم عليه ربنا الفكرة كالاتى
انى كل واحد خلال ايام الشهر الكريم ومن السلع الرمضانيه اللى بنجيبها كتير جدا ممكن كل اسبوع يعمل فطار لحد من المحتاجين حواليه بواب العمارة لو فيه اى حد بيكون محتاج هو عارفة او يتبرع بمبلغ معين لمائده رحمن قريبه منه المهم ينفذ الفكرة باى طريقة ما انا جاتلى الفكرة ياريت انتى تفكرى فيها وتشوفى طرق تانيه للتنفيذ وتنزليها فى بيكيا للبيع عسى الله ان ينفع بها

momken said...

انا جاى المره دى اعيد عليكى
واقولك كل سنه وانتى طيبه
وبالف خير

تحياتى

أمل حمدي said...

الغالية قوس قزح

ربنا يتقبل منك ومن كل من ساهم في هذا الخير

إن شاء الله ربنا يعيني واقدر احضر

دمتي بكل الخير

MO7AMED said...

جزاكى الله خيرا
وانا اخدت الموقع وواضفتة على المونة الخاصة بى وربنا يتقبل منك ان شاء الله

تحياتى