Sunday, September 28, 2008

موائد الرحمن

لو ادان المغرب ادن علينا فى الشارع و لسه قدامنا وقت على ما نفطر عمرنا ما بنفكر نقعد على مائدة رحمن و نفطر مع ان المفروض انك لما تعمل كده بتخلى صاحب المائدة ياخد ثواب افطارك و فى نفس الوقت بتشارك ناس يمكن اقل منك فطارهم و بتحس بجو رمضان فعلا فى وجودهم ماهو رمضان مش انك تاكل خشاف و كنافة و قطايف لكن انك تحس بالفقير ازاى بيجوع و فى الاخر بياكل لقمة قليلة و ممكن تكون بايتة كمان .. ياريت نغير مفهومنا ان موائد الرحمن للفقراء بس وانها عيب و نعرف انها موجودة لكل انسان ادن عليه المغرب و مفيش فطار قدامه لاى سبب
اما بقى عن موائد الرحمن اللى بتعملها بعض الفنانات و الرقصات و بتتباهى بانها افخر مائدة فهنا انقسم راى الدين فيها لرأيين
الاول ان الله طيب لا يقبل الا طيباً و ان المال اللى بتقام به الموائد دى حرام و بكده هى موائد محرمة و طعامها حرام
و التانى ان الله غفور رحيم و ان من حق كل مسلم انه يطلب العفو و المغفرة فى رمضان بالصدقات و غيرها و بكده فهى موائد حلال
انا بقى بشوف الحكاية دى من وجهة نظر الصائم الفقير لو قدامى مائدة رحمن يعنى اكل لوجه الله و انا جعان وقتها مش هفكر الاكل ده مصدره ايه لكن اللى يهمنى ان الاكل ده من حقى اكل منه لانه لله و ربنا محلله ليا
اما بقى عن اصناف الاكل اللى بتتقدم على الموائد المنتشرة هى عبارة عن معلقين شوربة لسان عصفور و طبق رز صغير و طبق خضار صغير و بيكون فيه قطعة لحمة و كوباية عصير .. طبعا الاكل ده ممكن يكون حلو اوى لفقير بيفطر لكن سؤالى هنا هو مش مفروض لما نطعم صائم نطعمه من نفس اكلنا .. يعنى ياكل زى ما بناكل من الصوانى و المحاشى و البط و الفراخ و الحمام و الحلويات و البقلاوات و المكسرات
هل لو انا بفطر 100 اى كلام احسن ولا افطر 20 من نفس اكلى احسن
يمكن كتير يقول 100 احسن طبعا
لكن انا شايفة ان ده شهر فى السنة للناس دى تاكل اكل كويس من نفسها
ده غير كمان ان لما اعمل مائدة بالشكل ده ممكن اكون قدوة لغيرى انه يكون بنفس المستوى
المائدة مش انى اقطع خضار على لحمة و ارميه فى حلة و اغرف لكل واحد معلقتين تلاتة
المائدة انى اتعب و انا بجهز و احضر الاكل ده و اكلفه لان اللى هيجى ياكل عندى ده ضيف الرحمن
ده لما الواحد بيجى يزوره حد مهم بيكون مش عارف يعمل ايه ولا ايه فما بالكم بضيف الله سبحانه و تعالى
الحاجة اللى فرحانة بها فى موضوع مؤائد الرحمن
الشباب اللى بشوفه بيجهز و يحضر الموائد و الشباب اللى بيقف فى الاشارات يوزع بلح او عصير او ميه
الشاب ده سهل له اوى انه يكون فى نفس الوقت ده قاعد مستنى الاكل قدام التليفزيون بس هو اختار انه يعمل كده
ده معناه ان فيكى يا مصر شباب زى الفل و مش شبابك هم بس اللى بيدخلوا على اليوتيوب يعملوا كليب هايف ولا يصورا بنات ولا هم اللى واقفين على النواصى يتحرشوا باللى رايح و اللى جاى
شبابنا مش كده
فى شىء مهم اوى بالنسبة لموائد الرحمن
و هى النية
لو اى حد عامل المائدة دى بنية اى شىءفى الدينا غير افطار الصائمين لوجه الله يبقى مش هياخد ثواب الافطار ده
يعنى لازم اى حد يشارك فى الموائد دى لازم يخلص النية انها لوجه الله تعالى علشان يتقبل الله منه
فى سؤال اخير
ليه موائد الرحمن بتتعمل فى رمضان بس
ليه محدش بيفكر يعملها و لو يوم الجمعة من كل اسبوع طول السنة
مش بردو يوم الجمعة ده عيد من اعياد المسلمين
ليه بنعمل الحاجة و احنا مش بنفكر انها تستمر و انها مرة و عديت و عملت اللى عليا
حاجة بقى غايظنى جدا و مالهاش علاقة بالموضوع
لما يبقى فى فتوى ان ممثلة زى صابرين ممكن تلبس باروكة و هى بتمثل لو الدور تطلب ده و بكده تبقى محافظة لسه على حجابها.. وقتها ايه يمنع باقى المحجبات تلبس بواريك و يبقى كل واحدة منهم لها دور بيتطلب كده .. هى مش الباروكة تعتبر زينة و تبرج بردو ولا احنا هنتحايل على الدين فى حاجة زى دى ؟؟
حسبى الله و نعم الوكيل

38 comments:

رئيس جمهوريه نفسى said...

ساء الخير
اولا كل سنة وانتى طيبة يارب يكون عيد سعيد عليكى ان شاء اللة وعلى الاسرة الكريمة
موضوع مائدة الرحمن اللى شهر واحد بس لا فى مائدة رحمن فى مسجد الفتح بتقدم وجبة غداء للناس كل يوم طوال العام واللى متبرع بيها فرد واحد بس جزاء اللة خيرا يعنى
موضوع الفنانات بقاء وموائدهم كل اللى نقدر نقولة على اللة القبول بس منمنعش حد لمصلحة المحتاجين
اما شباب مصر واللة يا داليا شباب مصر مهيف مش هايف وفى فرق كبير شباب مصر لما بيلاقى مساحة يتحرك فيها بيعمل المعجازات منهم للة اللى قافلينها فى وشة

kochia said...

هبدا من الاخر
يعني ايه تلبس باروكة وتمثل صحيح حد قال كدة ؟ يعني انا ممكن البس باروكة واخرج مثلا وهكذا ؟؟؟
حكاية غريبة اوي ومردود عليها طبعا

بالنسبة لموائد الرحمن انا وحدة من الناس اتكسف مش اتعالي
بس مش اكتر من كدة وبفضل اكل لما اروح البيت حرجا
بس ربما حد غيري مش بيتكسف طبعا لا مانع ابدا .. بالعكس هو ده الهدف
ان كل الناس تاكل مع بعض

وموائد الفنانيين انا رايي ان ربنا هو اللي بيحاسب والنية لا يعلمها الا الله

تحياتي

الباحث عن الحقيقة said...

السلام عليكم ورحمة الله وبركاته
شوفي يا ستي
قبل الكلام شرفنا وسعدنا بالتعرف عليكم في لقاء جمعية المعادي ومستشفى ابو الريش

موائد الرحمن
النوع الفاخر ..بتاع الفنانين وغيرهم اظن ده ما يتقالش عليه ليه مايكونش من نفس اللى بياكلوا منه لانه بيكون فاخر فعلا
وهو لا يجوز إلا للمضطر ان يأكل منه لأن الله طيب لا يقبل إلا طيبا
اما ثوابه فلا ثواب إلا ان كان انفاقه بنية التوبه والتخلص من المال الحرام فيما ينفع الناس فهنا لهم ثواب التوبه والتطهر وهذا غير متوافر والله اعلم

الموائد التانية العادية
مش مهم نوع الوجبة ولا هي من نفس ما يأكل منها القائم عليها او لا لان هذه صدقه فمن تصدق بتمرة وهي كل ما لديه كان ثوابه اكبر ممن تصدق بفرخة وهو عنده مزرعة كبيرة
هي هتفرق في الثواب وكله مقبول عند الله طالما صلحت النوايا

المشكلة بقى ان فيه موائد دعائية يعني تلاقي مطاعم او محلات وشركات عامله الموائد بنية الدعاية او تدخل فيها نية الدعاية يعني مش خالصة تماما لوجه الله ..ما علينا اهي ناس ربنا مسخرها لخدمة ناس وربنا استغل اطماعهم في الدنيا بأن جعلهم يطعمون الفقراء " يمكرون ويمكر الله والله خير الماكرين " صدق الله العظيم

انا كمان مره وقت الفطار كنت بره وشفت الشباب اللي بيهجم على العربيات علشان يناول الناس كوباية ميه او عصير او تمر
ما شاء الله ربنا يباركلهم

موائد الرحمن يوم الجمعة ..فكرة ممتازة

اللى افتى بجواز لبس الباروكة حمااااار ومحدش هيميع الفقة غير الحمير اللي مش فاهمه حاجه

Empress appy said...

اصبت كبده وفشت وقلب الحقيقه انا زيك راي يفطر 20 كويس ولا 100 اي كلام اما عن الفته بتاعت البواريك فده هيخليها تغلى يا بنتى وبكده القرع بتوع الفته هيتكشفوا هههههههههه
يا ريت تبقى طول السنه علشان الناس اغلبية الشعب بقى جعان والله مصر فيها شباب وناس زي الفل بس الاغلبيه الوحشه هي اللى طاغيه على الحكم بس ههههههههه

maha zein said...

كل سنة وانتي طيبة يا داليا
يا رب تكوني بخير
طبعا يا ستي انا سعيدة بيكي اوي لانك عملتي خير جميل اوي وساعدتي فيه واكيد ربنا ان شاء الله يتقبل منك

طبعا اشاركك الراى في موضوع ان الشباب في مصر رائع بجد وبيقوموا بافضل دور في توزيع الاكل والمساعدة وكل ده

بخصوص موائد الفنانات انا شايفة انه فعلا الفقير من حقه ياكل
ياكل بس
وربنا يجازي الشخص اللى قائم علي المائدة
اما يتقبل منه او لا


بخصوص اننا نتوصي بموائد الرحمن
بصي يا داليا
انا شايفة ان الشخص اللى بيعمل مائدة
مينفعش يعد يزوء ويظبط في الاكل ويعمل محمر ومشمر
لانه بيعمل اعداد كبيرة جدا
وبعدين وخاصة الناس اللى بتداوم علي عمل المائدة كل يوم
بيجدوا مشقة في الطبخ
خاصة وان الستات اللى في بيوتهم هما اللى بيطبخوا
تخيلي بقه لو اعدوا يلفوا حشي ويطبخوا طبيخ جامد ومكرونة بالباشاميل
مش هيلحقوا ولا هيقدروا يفطروا الكمية الكبيرة

وبعدين في ناس نفسها تفطر الصائم بس هي بردو مش ناس اغنية للدرجة
يعني بيعمل اللى في استطاعته
بعدين بقه
العينة مش بالصائم اكل ايه
العينة بانه فطر
وملا بطنه
رسول الله كان بيفطر بتمر
ومكنش فيه محمر ولا مشمر
كان سريد
او لحمة
او كده
يعني الفقير مش هتفرق معاه انه ياكل مكرونة ولا بوفتيك
الاهم انه ياكل
ويبع
وبيتهيقلي ان لسان عصفور وشوربة ولحمة ورز حلو اوي
ونفطر عشرة احسن ما نفطر 3
نعمل الخير افقي احسن ما نعمله راسى
يعني بالذات هنا نعمل الخير بالكم ومش بالكيف
لان الاكل هو الاكل
حتي لو تمر
او شوية مية

فعلا ي ريت اللى بيفطر حد في رمضان
يبقه يعمل اكل للفقير
يوم للفقرا والحجات دي


بخصوص الباروكة بقه
هى اساسا حرام
لعن الله الواصلة والمستوصله
فأحب اقولك ان العالم دي بتستهبل
ربنا يجازيهم
واصلا اساسا
انا شايفة ان واحدة اعتزلت مينفعش تمثل
تمثل ايه وغلب ايه
ما خلاص
التمثيل اصلا حرام
ولا هيمثلوا في دي كمان
جزاكي الله خير

أبو خالد said...

سأغرد خارج السرب أبنتي الغالية داليا
أولا جزاك الله عني و عن كل فقير أو مريض طاله جزء من جهدك في يومي البؤجة و المستشفي
ثانيا تصوري الأستاذ شريف آتي من الإمارات بالطائرة إلي مطار القاهرة إلي ساقية الصاوي حرصا منه علي الموعد و لقاء المدونين ياليت كل المدونين يكونوا مثله حرصا علي المواعيد و خاصة لم يكون هو الداعي للقاء و الأفطار
علي العموم دمتي أعز الناس

عاشقة القمر said...

سلام عليكم
اخنا هنا عدنا في السودن ناس الجيران كله طالعوا فطور بفطرو في شارع مع بعض احشن لو جيه احد في الطريق بيكون نفس الاكل
يس ياخساره بداءت تلاش بدلا ان تزيد مش عارفه ناس حصلوهم ايه
بعايدين ممكن اح كل الجمعه بعمل الاكل في منزل اي شي مثل كبسه في كميات لي دار المسنين او ملأجي
يتلتزم بها ربنا بؤفق لي عمل الخير يكثر من امثالك
ربنا يجعل في ميزان حسناتكم

حنين القلب said...

كل سنه وانتى طيبه يا دوللى
بصى انا عارفه ان الافطار فى موائد الرحمن مش عيب ولا حرام بس مش عارفه ليه بنبص للى بيفطروا عليها انهم محتاجين واننا بما اننا مش محتاجين يبقى نسيب المكان لحد تانى يكون محتاجه اكتر مننا
وبعدين حكايه الباروكه زى ما انتى قولتى ده تحايل على ربنا
ربنا يصلح حال المسلمين اجمعين

nona said...

كل سنة و انتى طيبة و يا رب يكون عيد سعيد عليكى و علينا كلنا
بالنسبة لموائد الرحمن لما بنشوف حد بيعمل حاجة لله الواحد بيفرح و يقول فعلا الخير هيفضل فى امة المسلمين ليوم القيامة
و الشباب ما شاء الله عليهم ربنا يبارك فيهم
اما الاى بيعملها عشان دعاية او اى حاجة تانية فادة جزاءة عند ربنا
و على فكرة فى جامع فى رمسيس بيعمل مائدة طول السنة
و يا رايت فكرة مائدة ان شاء الله يوم واحد فى الاسبوع
اما بالنسبة للباروكة
دية اول مرة اسمع عن الفتوى دية و اظن و الله اعلم لبسة الباروكة حرام
و هى ما دام لبست الحجاب و اعتزلت الفن اية رجعها تانى يبقا هى توبتة مش خالصة لله
و ربنا يهدينا جمعيا

nona said...

كل سنة و انتى طيبة و يا رب يكون عيد سعيد عليكى و علينا كلنا
بالنسبة لموائد الرحمن لما بنشوف حد بيعمل حاجة لله الواحد بيفرح و يقول فعلا الخير هيفضل فى امة المسلمين ليوم القيامة
و الشباب ما شاء الله عليهم ربنا يبارك فيهم
اما الاى بيعملها عشان دعاية او اى حاجة تانية فادة جزاءة عند ربنا
و على فكرة فى جامع فى رمسيس بيعمل مائدة طول السنة
و يا رايت فكرة مائدة ان شاء الله يوم واحد فى الاسبوع
اما بالنسبة للباروكة
دية اول مرة اسمع عن الفتوى دية و اظن و الله اعلم لبسة الباروكة حرام
و هى ما دام لبست الحجاب و اعتزلت الفن اية رجعها تانى يبقا هى توبتة مش خالصة لله
و ربنا يهدينا جمعيا

Anonymous said...

اولا باشكرك على اليوم الرائع الذى تجمعنا فيه ويارب على طول

ان الله طيب لايقبل الا طيبا ده حديث .. الاقوى منه كلام ربنا نفسه فى القرآن .. أنا اعمل بما انتهى اليه العلماء ومنهم الشيخ القرضاوى بان السنة ظنية قد يعتورها خطأ النقل .. اما النص فقطعى لانه محفوظ بذات الله نفسه

يقول المولى فى سورة الزلزلة
يومئذ يصدر الناس ليروا اعمالهم ، فمن يعمل مثقال ذرة خيرا يره ومن يعمل مثقال ذرة شرا يره

معنى كده ان فيفى عبده لما تعمل مائدة رحمن فهذا عمل خير .. اما اعمالها الاخرى فحسابها عند الله ولاشأن لى بها

ثانيا الرسول عليه السلام كان يجمع الجزية من الذميين وفيهم اليهود .. وقولى انت ماهى مصادر أموال اليهود غير الربا والميسر وغيره؟

لكنه يصرفها على الوجه الحسن .. وعلى نفس الغرار .. فالحكومات تصادر الاموال المهربة وغيرها .. وتصرفها فى اوجه الخير

من هنا فعمل الخير هو خير باذن الله والذى يبحث عن عالم الملائكة والمثالية لن يجده .. لانك لو تتبعت الجنيه الذى وصل اليك ومشيت وراه فلابد ان تمر على نشال فى السكة او افاق وغيره ومن هنا جاءت فلسفة الزكاة

خذ من اموالهم صدقة تطهرهم وتزكيهم بها
تزكيهم من ماذا .. من هذه الاشياء

على فكرة واحنا صغيرين كانوا يعلمونا خطئا ان الصوم لنحس بجوع الفقير .. ولطالما كنت ارفض هذا المنطق لان الفقير نفسه غير مرفوع عنه الصيام .. فلماذا يصوم؟ وكنت اتمنى ان يعلمونا كما اعلم اولادى ان الصوم هو تكليف من الله وكفى ..لنتعلم جهاد النفس والصبر ..

انا مثلك مؤمن بان هناك شباب زى الفل وعلى خلق وقيم .. واتمنى الا نشير لغير هؤلاء لانهم المثل والامل الجميل

آسف للإطالة وعيد سعيد عليكى وعلى الاسرة الكريمة

همس said...

ازيك يا داليا

يارب تكونى بخير

فعلا عندك حق

بصراحه انا دققت مرة فى مائدة الرحمن لقيت والله ربع كوبايه عصير كانهم حطينها عينه

لو عجبهم يزودو

وكان نفسى اسالهم دى مائدة رحمن ولا مائدة تحنيس

بيحنسو الناس يعنى


يلا ربنا يشفى الجميع

اما بخصوص الفنانات دول لابسين الحكاب بس علشان المملل
مقدامك المحروسه كانت محجبة وقدمتك برنامج لون حياتك فى اقرا

وشوفيها دلوقتى مسخره من لبس القط والبدى



واتشرفت بعرفتك يوم مشتسفى ابو الريش

وكنتى قاعده قدامى فاتحه نفسى عن الاكل والميه الساقعه

ههههههههههههه

وكل سنه وانتى طيبة

Sagy said...
This comment has been removed by the author.
Sagy said...

السلام عليكم
والله يا أبو خالد المهندس/ شريف ده راجل جميل فى جوهره ومظهره - اللهم أكثر من أمثالكم جميعا - ويبارك فى داليا ويبقى فيه منها 60مليون داليا والباقيين احنا بقى - بجد من يوم ما عرفتكم وانا حاسه انى برجع بنى آدمة تانى - اسواء شئ فى الدنيا الوحدة بس مش وحدة العدد لا وحدة المشاعر وعلى فكر انا سمعت كلامكم انت وسووووو وكل الى قالى اعملى مدونه واكتشفت انى كنت امله من 2006 او 2007 بس مش منشطاها فنشطها وكل الى كتبته نورتونا - يارب أكون عن حسن ظن كل الى شاف فيه حاجة خير - وبجد يا داليا جزاكى الله كل خير وغفر لكى ولنا يا قوس قزح يا جميل انت
دايما كنت بشوف قوس قزح فى اسكندرية بعد االشتواية التمام (المطره يعنى) بس عمرى متخيلت انه هلاقى جماله وسحره فى بنى آدمة زيك جميلة الجوهر اللهم أكثر من أمثالك

أختك فى الكباب النئ
ساجى

ahmed_k said...

السلام عليكم
مصر دايما مليئه بالخير في رمضان مما لا نجده في مكان آخر
فلكي أن تري في بلاد الصعيد كيف يقف الأهالي ليجبروا السيارات على التوقف وتناول الإفطار أمام مداخل القرى
في مشهد مهيب فما تكاد تمر سياره حتى يشاورون لها وقد يقفون امامها هههه
ليجبروه على التوقف قمة الكرم
الذي لن تجديه غير في أبناء مصر
وكل مصر مليئه بتلك النماذج وبأشكال مختلفه
بارك الله لهم ورزقهم جزاء طيب نيتهم

وعيدك سعيد يا داليا

على عبدالله said...

السلام عليكم ورحمة الله وبركاته

كل سنة وانتى طيبة
وتقبل الله منك الصيام والقيام وخالص الاعمال

وكل سنة وانتى طيبة بمناسبة عيد الفطر المبارك


بس ايه حكاية البروكة ؟؟؟؟

صباح الصباح said...

اية دة

انتى بتتكلمى بجد
هوة ممكن الممثلة عشان محجبة تلبس باروكة!!!!

يحلاوة ياولاد
صباح الفتاوى المضروبة

بجد حرام جدا

عارفة يا داليا اللى حلو اوى فعلا الشباب اللى بيكونو ا فى الشوارع واقفين بعربياتهم وبيوزعوا تمر او عصير على الناس بجد بافرحهم بيهم اوى ونفسى ابقى زيهم

يارب فعلا اكون زيهم

اما موائد الرحمن فالمشكلة ان الغلابة كتير اوى هنا فى مصر يا داليا طب لو حسنوا الاكل وقللوا الترابيزات اوى اوى الناس دى هتفطر ازاى؟ وللاسف فية كمان ناس من القائمين على المواءد بيعاملوا الناس مش كويس وفية بالعكس وشفتها اداى ناس اغنيا جدا جدا وبيفطروا على المائدة اللى همة عاملينها

مواطن مصرى نايم said...

اولا كل سنة و انتى طيبة

ثانيا
بالنسبة لموائد الرحمن
و الله انا فعلا بشوف انها للفقير بس
و مينفعش انى اشاركه فاكله
يمكن اللى انا كنت حاكله حد غيرى ياكله و يكون محتاجه اكتر منى
يعنى هى مسألة انى اسيب غيرى يشبع مش مشكله انا
مش تكبر منى انى اكل من حد اقل منى او كده
لا ابدا
و حكاية موائد الفنانات و كده
لا انا مع الرأى التانى
ـــــــــــــــــــــــ

عاوز اقول لك حاجة بقى ممكن متصدقيهاش
موضوع الباروكه ده
و الله و الله و الله
اول ما حلا شيحه اتحجبت
و حنان ترك
و الكام ممثله اللى فالاخر دول

قلت و الله بعد كده يقولوا ان الباروكه حلال فالتمثيل

لا و تبقى الواحده داعيه و بتعمل برامج دينية
و كمان زى عبله الكحلاوى
داعيه و بتعمل حواجبها
متعرفش ان الله لعن النامص و المتنمص
و فالاخر يقولوا عليها داعية
ربنا يرحمنا

بس بجد حاجة تنرفز فعلا
ربنا يهدى بجد

Gannah said...

داليا
كل سنة وانت طيبة
أسئلتك فى محلها تماما وفيه حاجات كتير محتاجين نعيد التفكير فيها
ومنها موائد الرحمن
أما موضوع الباروكة فبجد مش عارفة بيصدروا الفتاوى دى على أساس ايه؟؟؟ ومش بيخافوا
ليه اصدار الفتاوى بقت عملية سهلة كده
وبصراحة أى محجبة اعتزلت التمثيل المفروض تقعد فى بيتهم وتحترم الحجاب اللى لبسته بارادتها
كل سنة وانت طيبة
عيد سعيد
تحياتى

Beram ElMasry said...

سيدتى
عيد فطر سعيد اعاده الله عليكم باليمن والخير والبركة ، وادام سعدكم وحقق احلامكم

Unknown said...

اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد

Unknown said...

اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد

د/ رامي شهاب الدين said...

خلينا بالمنطق نفكر
لو فى أحد الأحياء مثلا 100 فقير
فى رأيك ايهما الافضل
أنى أعمل مائدة فخمة لعشرين شخص وأسيب الـ80 التانيين من غير فطار فى رمضان
ولا أقلل الجودة والكمية شوية وفى المقابل أزود العدد عشان نعمل إفطار للباقى
كلامك مظبوط فى حالة توافر الكثير من المتبرعين لإقامة مائدة رحمن ، ولكن أحيانا بيكون فيه عجز

على فكرة إقامة مائدة رحمن فى ايام غير رمضان فكرة جميلة جدا ..لكن للاسف سلوك الناس فى رمضان يختلف عن باقى شهور العام ، دا حتى فيه ناس مش بتصلى غير فى رمضان بس ، رغم إن رب رمضان هو رب الشهور الأخرى

كل سنة وإنتى طيبة
تحياتى

الـسـيـدة نـون said...

فكرة مائدة الرحمن كل يوم جمعة فكرة احييكي عليها



باروكة
!!!!!!!!!!!!!!!!!!

بجد مكن البس باروكة وافضل محافظة على حجابي؟

يا حلاوة يا عياااااااااااااال

بيفكرونى ببات مان
لما يلبس الأندر وير بتاعه فوق الهدوم


كل سنة وانتي طيبة يا دودو
ومستنياكي يوم 10 اكتوبر

اختك خيخة

د. إيمان مكاوي said...

حبيبتي داليا
بالنسبه للفتوى بتاعة الباروكه ..فدي نقطه في بحر من الفتاوى المضله التي تسيء للإسلام والإسلام منها بريء وحسبي الله ونعم الوكيل
كل سنه وإنت طيبه ..وعيد سعيد

Beram ElMasry said...

الاخت الفاضلة . قوس قزح
السلام عليكم ورحمة الله وبركاته
لا حرمنا الله من صالح دعاءك ، وجزاك الله عنى خيرا ، وكل عام وانت بالصحة والسلامة وجميع الاهل فى خير وبركة
لا تحرمى مدونتى معاودة الزيارة

قوس قزح said...

رئيس جمهورية نفسى
كل سنة و انت طيبو بخير يارب انتى و اسرتك و اهل الصعيد كلهم
جمميل ان فعلا فى حد بيعمل المائدة طول الشهر و يارب يكون قدوة لغيره
و الله يا محمود مش قصة حد قافل فى وش الشباب الطريق القصة ان للاسف فى شباب كتير نفسه مش طويل و عايز الحاجة تيجى له بالساهل
احنا محتاجين بس السعى
السعى فى الخير
و السعى فى الشغل
و السعى للافضل

تحياتى

قوس قزح said...

kochia

لا مش صحيح حد قال كده لكن صحيح حد بيعمل كده و بيقول ان دى فتوى انه مش حرام
لكن طبعا هى فتوى غلط لا الشعر هنا تبرج و زينة و ده اصلا حرام لغير الزوج

بالنسبة لموائد الرحمن مفيهاش حاجة تكسف بالعكس هتلاقى الناس الغلابة هترحب جدا بيكى مجرد ما تقولى لهم ممكن افطر معاكم لانى متاخرة على الفطار
صدقينى هيرحبوا بكى جدا
انا بردو راى ان ربنا هو اللى يحاسب مش احنا و يمكن على العلماء و الشيوخ بس الدعوة للهداية اكتر من كده لا

تحياتى

قوس قزح said...

الباحث عن الحقيقة
انا كمان سعيدة بمعرفتك بالرغم من ان الوقت كان ضيق و مقدرتش اتعرف عليك اكتر

عجبنى فى كلامك ان انت ارجعت كل عمل للنية و ده مهم جدا
لان ده الاساس فى الاعمال نية الشخص حتى لو كانت النتيجة غير ما كان متوقع

تصدق انا باخد من الشباب دول التمر وقت الفطار و بدعى لهم علشان احسسهم بس انهم فعلا بيسعدوا الناس و بياخدوا ثواب افطار صائم
لان سهل اوى نستنى ربع ساعة زيادة لمعاد الفطار لكن الهدف هو التشجيع و الثواب

صاحب الفتوى ربنا يهديه و يكون بس مش من علماء الدين

قوس قزح said...

Appy

هههههههههههههه
متقدريش تعليقى من غير ما النحلة و الدبور يشتغلوا
مالنا و مال القرع و الحكم ؟؟
احنا نبقى كويسين لنفسنا الاول
و كفاية علينا كبدة و فشت و قلب الحقيقة بلاش حاجة تانية مش ناقصين قرف ههههههههههههههههههههه

قوس قزح said...

maha zein

و انتى طيبة و بخير يارب و دايما سعيدة
و شباب مصر فعلا رائع و انتى اهو خير مثال على كلامى :)

اما عن الافطار
انا مش بس بتكلم عن نوعية الاكل لكن بتكلم على طريقة طبخه
يعنى هل اللى بيعمل المائدة ممكن يرضى ياكل نفس الاكل لو معمول بنفس الطريقة ؟؟
و بعدين لو انا عايزة اعمل مائدة رحمن ليه مخليش حد يشارك معايا فى التحضير ممكن يكون معهوش فلوس بس عنده مجهود و وقت
و صدقينى فى كتير ممكن يعملوا كده
الهدف ان الواحد يحاول يعمل اللى يقدر عليه انه يحسن مستوى الفطار
مش يستسهل انه يرمى اللحمة فى ميه و لما تستوى يعمل صلصة بالخضار
الاجتهاد يا مها هو المطلوب و كل واحد على اد طاقته
اما عن فطار الرسول الكريم متنسيش ان البيئة اللى كان عايش فيها بيئة صحراوية يعنى اغلب اكلهم بيعتمد على الاغنام و الالبان و اصناف طعام جايبها القوافل لان مفيش زراعة
ده غير ان مكانش فيه مكرونة :)

القصد ايه ان الواحد يهتم بالاكل و زى ما انت تحب يكون الاكل فى رمضان مختلف عن باقى ايام السنة اكيد الفقير من نفسه ده
و الفرق كمان ان الفقير صحيا ممكن جدا يكون محتاج غذا اكتر منا و ده لان طول السنة اكله ما بين النشويات و السكريات لرخص سعرها فممكن جدا رمضان يكون له فرصة لتحسين صحته

و مش بقول نفطر بدل العشرة تلاتة
بس ممكن نفطر بدل العشرة تامنة و نتوصى بالاكل اكتر شوية


اما عن الباروكة
لما قلت الحديث ده بتاع الواصلة و المستوصلة اترد عليا بان الباروكة مش وصل للشعر ولا هى من شعر طبيعى ده شعر صناعى
يعنى اللى بيفتى بيكون عامل حسابه على الرد
اما عن التمثيل حرام او لا
انا اعتقد انه حرام
كفاية انه نوع من انواع الكدب
تحياتى لكى و جزاكى الله خير

قوس قزح said...

ابو خالد

حضرتك تغريدك يسعدنى سوا كان مع السرب او خارجه

اولا و جزاك الله خير على تواجدك معنا برغم مشقة السفر
ثانيا الاستاذ شريف ده انسان جميل و فعلا هو قالى انه كان راجع من ابو ظبى بس مكنتش اعرف انه رجع من المطار على الساقية
ده بياكد ان كان عندى حق لما وجهت له الدعوة لانه فعلا انسان جدير بالاهتمام

دمت ابتى اعز الناس و اغلاهم

قوس قزح said...

عاشقة القمر
و عليكم السلام و رحمة الله و بركاته

دى فكرة جميلة اوى و خسارة انها بدات تتلاشى
ربنا يوفقنا جميعا للخير و كل اللى يقدر على حاجة يعملها

تحياتى

عالم ماريونت said...

اولا: كل سنة وانتي طيبة وعيد سعيد عليكي وعلى كل الشعب المصري المسلمين والمسيحين
ثانيا: اتفق معاكي في كل كلمة قلتيها واكتر حاجة بتتعبني بعد رمضان هي ان كل الخير الي بنعمله في رمضان مش بنعمله باقي السنة
ثالثا: اكتر جزئية عجبتني بجد ان الشباب بيكون متحمس وبينزل يوزع اكل على الصايمين
لأني مجربة احساس المتعة بعمل الخير في رسالة واقدر اقولك ان مفيش امتع من انك تنزلي ساعة الفطار توزعي اكل على الصايمين بجد ممتعة جدا جدا
رابعا: نفسي بجد نعمل دعوة للخير في باقي السنة وننشر الدعوة دي
نعمل حفلات للأيتام طول السنة مش في يوم اليتيم بس
نوزع اكل على المحتاجين طول السنة مش رمضان بس
طبعا مش بتكلم على مستوى الجمعيات الاهلية لأن ده بيحصل فعلا
بتكلم على مستوى الافراد
شوفي كدة وربنا يكرمنا كلنا
اختك رنا

احمد الشاعر said...

أنا جيت متأخر

دايما متأخر

طيب ..كل سنه وأنتي بكل الألوان

قوس قزح said...

حنين القلب
كلامك صح يا حنين المحتاجين اولى بالفطار على الموائد بس انا بقول لو مرة عملتيها كمشاركة للناس علشان تحس ان مش معنى وجودها على الموائد دى انها ناس محتاجة و غلبانة
بس مش اكتر

كل سنة وانتى طيبة و سعيدة

قوس قزح said...

Nona
جميلة معلومة الجامع اللى فى رمسيس دى
يبقى كده فى جامعين بيعملوا موائد طول السنة
و دى بادرة طيبة لان ممكن الوقت تتعمم و تبقى فى مساجد كتير

انا من رايك
ان اللى تتحجب لو يعنى مزنوقة اوى فى التمثيل كفاية عليها الحاجات الدينية
تحياتى

قوس قزح said...

sherif
انا اللى كنت سعيدة بتشريفك يومها برغم وصولك من السفر فى نفس اليوم

عجبنى استشهادك بجمع الجزية و ان فلوسها اكيد حرام

و تصدق انى بعمل نفس الغلطة و اقول للولاد ده علشان نجرب معاناة الفقير
بس بعد كلامك وضحت لهم ان الموضوع مش كده
جزاك الله خير

تحياتى