Monday, September 22, 2008

تجربة الخير للخير

تحديث
ياريت كل واحد عنده اقتراح او مكان محتاج او حتى شاف حاجة معجبتوش و يحب انها تتغير يقول فى تعليقه و نحاول مع بعض نوصل
لافضل الحلول
............
كنت بافضل دايما بعد اى يوم تبرع متكلمش عن اليوم و اسيب تفاصيله للناس اللى شاركت علشان اعرف انطباعهم عن اليوم و اعرف ايه عيوبه
و مميزاته
لكن بناء على طلب الاخ العزيز احمد كمال حبيت اتكلم عن الخطوات اللى عملتها انا و ابى و غيرنا علشان اليوم يطلع كده و الحاجات اللى كان مفروض نتفادها
و يمكن يكون تجربة خير لحد غيرنا و يعمل الخير فى بلده او مدينته او فى منطقته
و هبدا بجزء جزء

المكان
يفضل اختيار مكان يكون غير معروف اعلاميا لان الاعلام بيقدر يوجه نظر الناس للمكان و بالتالى بيجى له مساعدات كتير
السؤال عن المكان الاكثر احتياجا و ده ممكن من خلال طبيب بتتعامل معاه او جمعية اتبرعت لها او حتى حد معرفة مهتم بعمل الخير
يفضل زيارة المكان قبل توجه التجمع له و التعرف على المسئول عن العلاقات العامة او الاخصائى الاجتماعى للمستشفى
ان كانت المستشفى كبيرة يفضل تحدد اكثر الاقسام احتياجا للتبرع زى عمليات القلب و المخ و الكلى و الكبد
يفضل اختيار وقت الزيارة بعيد عن اوقات الزيارة العادية و عن ايام الاجازات حتى يكون سهل توزيع التبرع بهدوء و بدون احراج للمرضى

الدعاية لليوم
لا نكتفى بعمل بوست او اعلان فى المدونة لان كده هيكون متروك لمن يراه بالصدفة
يجب ارسال ايميلات لكل الناس
عمل جروب على الفيس بوك بالموضوع
عمل بانر ينشر فى المدونات المشاركة
اعلام كل من شارك فى خير سابق او كان يتمنى المشاركة بترك تعليق فى مدونته للمشاركة
مهمة كل من يشارك ان يقوم بالدعاية لليوم وسط مجتمعه و لا ننسى ان الدال على الخير كفاعله فالمشاركة ممكن جدا بعمل الدعاية و جمع اكبر قدر من المتبرعين

التبرعات و الهدايا

الادوية
معرفة الادوية مسبقا من المستشفى او الدكتور المسئول عن الحالة
التاكد من كتابتها صح و التاكد من المطلوب منها ان كان حقن ولا كبسول ولا شراب( و اظن كلنا شوفنا ان اللغبطة اللى حصلت فى اسماء الادوية كانت عاملة ازاى ) و يفضل نسخ ورقة الاسماء و توزعها على المتبرعين
عدد علب من نفس الدوا افضل من علبة من انواع مختلفة لان الطفل بيحتاج لعلاجه اكتر من علبة دوا للشفاء و ممكن علبة لا تفيد لانها لا تكفى للعلاج فيلجا الدكتور للدوا البديل اللى غالبا بيكون اضعف فى تاثيره
التبرع المادى
و ده افضل تبرع للطفل لانه بيسمح له بحرية الاختيار و استغلال المبلغ فى اللى فعلا محتاجه
يفضل تجميع المبلغ من المتبرعين و تقسم بالتساوى فى اظرف و يتم توزعها على الاطفال
ممكن عمل اظرف مميزة يكون فيها المبلغ اكبر للحالات الاشد احتياجاً بدون ما يشعر الاطفال بانه مميز

اللعب
اختيار لعب تكون مناسبة لسن الطفل و تكون من غير بطاريات علشان متكونش مكلفة له بعد كده
تكون العاب لا تشجع على العنف يعنى نبعد عن المسدسات و الخناجر
تكون اللعب اسعارها بسيطة لانها مجرد رمز بسيط للفرحة و الاهم منه الدوا و التبرع المادى
تكون اللعب كلها متشابه فى الشكل و ممكن تكون مختلفة فى الالوان علشان محدش من الاطفال يبص للعبة فى ايد طفل تانى
الحلويات و العصائر
تكون حاجات مضمونة و معروفة و متاكدين من تاريخ صلاحيتها
تكون حاجات مش محتاجة تلاجة ولا تسخين
يتم التنبيه على المرافق للطفل بسؤال الطبيب الاول قبل ما ياكلها الطفل لان فى حالات بيكون ممنوع تاكل اى حاجة
و اخيرا تشجيع المتبرعين بنقل تفاصيل اليوم لكل من يعرفه
توجيه الشكر لكل مشارك و توضيح نتيجة عمله حتى يشعر بقيمة عمله و اهميته

يارب اكون قدرت افيدكم بتجربتى
و اى حد حابب انه يعمل يوم تجمع للخير انا تحت امره فى اى مساعدة

33 comments:

رئيس جمهوريه نفسى said...

ربنا يجعل كل اللى عملتية قبل كدة والشرح بتاع البوست ده وكل ما حيتعمل مستقبلا فى ميزان حسناتك ان شاء اللة

(احمد سكر ) said...

السلام عليكم ورحمة الله وبركاته

فعلا ياداليا

اليوم فعلا كان منظم

ومكنشى فيه هرجله

ودا اللى كان مخوفنى جدا


بس ماشاء الله عليكم

كنتم حاسبينها صح

ربنا يارب يجعله فى ميزان حسناتكم

ربنا يغفر لينا وليكم يارب

ودمتى بكل الود والخير

احمد

قلب مصرى said...

ما شاء الله عليكى ياداليا وربنا يكرمك انتى وكل الناس اللى بتدور على فعل الخير.
اسمحى لى احيى الكل الناس اللى مش بتستنى الحكومة تعمل أو رجل الأعمال الفلانى يسوى، أنا بحييى الناس اللى بتاخد المبادرة وتسعى بنفسها لتصحيح الأوضاع.

أشكرك جدا يا داليا

بت خيخة وأى كلام said...

برافو عليكي يا دودو
بجد الخطوات دي هتفيد اى انسان
وكويس انك نشرتيها علشان الكل يستفيد

انا فرحانة بيكي اوى انتي وكل اللى تعبوا معاكم فى يوم ابو الريش
ربنا يكتر من امثالكم

تحياتي ليكي
اختك خيخة

ojg said...

شطورة يا قمرة
الدال على الخير كفاعله
ربنا يصلح حالنا وحالك ويجمعنا في الخير على طول
على فكرة
انا ماتكلمتش معاكي كتير
بس حبيتك
تعملي فيا ايه بقى؟؟
:)

Gannah said...

السلام عليكم
ازيك يا داليا؟؟؟؟
يا رب تكونى فى خير حال
فكرة نقل الخبرة إلى الأخرين هى فكرة رائعة لانها تفتح الباب لكل من يريد تكرار مثل هذا العمل الخيرى لان يعمل وفق خطوات منظمة وتوفر عليه الكثير من الجهد
كما انها تفتح أيضا الباب لكل من يريد أن يعرض مقترحات أو أفكار
اليوم والحمد لله كان ناجحا بفضل الله ثم بفضل جهودكم والأهم من هذا كله هو صدق النوايا والتى نسأل الله لنا جميعا الاخلاص
أود أن أكرر شكرى لكِ ولآبى وللمهندس أحمد كمال
فقد قدمتم نموذجا رائعا للعمل الجماعى
أرجو من الله أن يوفقكم الى المزيد وفى أول يوم تنظموه ان شاء الله سأتولى الدعاية فى المدونات محاولة منى للمشاركة
تحياتى

Appyplanet said...

يا رب الكل يستفيد منها ويطبقها فى كل مكان على قد ما يقدر



بس تعالى هنا انا اساسا جايه الخبط لكى الوان قوس قزح دى بطلى تلسنى على خرفانى اصل دابسك فيهم فى الاخر ههههههههههه
ابقى شوفى ردى عند محمود
كل سنه وانتى طيبه

عايش ولكن said...

ماشاء الله
بجد حاجه تفرح
ربنا يجعله فى ميزان حسناتك

عاشــــــ النقاب ـقــــة"نونو" said...

الله يبارك فيكم يارب
كل عام وانتم الى الرحمن اقرب

وومن said...

بجد هايل جدا

هو ده الكلام محدش بعد كدة يبقي ليه حجة طالما النية متوفرة

ادينا عرفنا الطريقة واللي ربنا يقدرة علي حاجة يعملها

او عنده فكرة يقترحها علي مدونته ونتناقش فيها كلنا

تسلم ايديكي يا داليا

ربنا يجازيكي خير ويجعلة في ميزان حسناتك

Anonymous said...

ى نعمل اسم للمجموعة مثلا مدونون من اجل الخير وكمان نعمل مدونة تضم كل المدونين المشاركين فى المجموعة
ونصور زيارتنا ونرسلها لكل ايميلاات اصدقائنا علشان يشاركوا معانا

مواطن مصرى نايم said...

ربنا يجازيكى خير عن كل اللى بتعمليه
و يجعله فى ميزان حسناتك
بجد انا مش عاوز امدح فيكى او افضل اقول انك حد كويس و الكلام ده
عشان كلامى ما يكونش هو جزاء عملك
و يكون جزاء عملك عند ربنا ان شاء الله

ربنا يبارك لك

تحياتى

اسلام

حنين القلب said...

ربنا يجعل كل عمل خير فى ميزان حسناتك
كل سنه وانتى طيبه يا دوللى
ويا رب يبارك ليكى فى زوجك واولادك
تقبل الله منك صالح الاعمال

عاشقة القمر said...

كل عام انتي بخير سمعت انيك الجهد قامت به ربنا يكرمك ويجعل في ميزان حسناتك
اختك في لله عاشقة القمر من السودان

قوس قزح said...

رئيس جمهورية نفسى
ربنا يجزيك كل خير على تشجعيك و دعاءك


.................

احمد سكر

احمد انت من الناس اللى ساعدتنا من غير ما تشعر ويمكن كتير ميعرفوش انك بتروح للترجمان تستلم تبرعات من السوبر جيت و علشان كده بتتاخر علينا شوية
انا بشكرك على وقوفك معنا و استعدادك الدائم لأى مساعدة

.......................

قلب مصرى

و الله ده كان سبب رئيسى اننا نتحرك و نعمل حاجة بدل الكلام و ممكن نكون شايفين انها حاجة بسيطة بس بكرة تكبر و تبقى خطوة كبيرة لنا و للمدونين اللى سمعتهم بقى انهم ناس مشاغبين و غاويين مشاكل

قوس قزح said...

بت خيخة واى كلام
اشكرك على تشجيعك و الفضل يرجع لكى فى الاساس من يوم التبرع لما شوفت الناس و هى مبسوطة و بتتبرع عن طيب خاطر و ده اللى شجعنى اجمعهم تانى و تالت
جزاكى الله خير


................

ojg
انا تعبتك معنا يومها و دبستك فى اوضة المخزن معنا
بس كنت سعيدة بكى لان برغم من ان دى اول مرة تشاركى معنا لكن كنتى متحمسة و بتتعاملى كانك تعرفينا من زمان

اعمل فيكى ايه ؟ اممممم
هحبك كمان :)

..................

جنة
انا حبيت فيكى حرصك على الامانة اوى و ده شىء جميل و يدل على انك انسانة بتراعى دينها و مبادئها
جزاكى الله خير على وجودك
و عايزة اسمع بقى اقتراحاتك ان شاء الله

قوس قزح said...

ابى هانم

الوانى مش بتتلغبط بسهولة :)
ابقى بصى فى ايدك كده هتلاقيها بقت ملونة
اخدتى الوان منى اهو
هاتى بقى الخروف البمبى :)

.....................

عايش و لكن

اشكرك على مرورك و جزاك الله خير على الدعاء

....................

عاشقة النقاب نونو

جزانا و اياكم
و يارب يكون العمل ده قربنا كلنا من ربنا

الاخوان حياتى said...

ربنا يكرمكم كلكم على الجهد المبذول ونتمنى نوحد الجهود من اجل الخير وفكرتى عمل مدونة تضم اسماء كل المدونات الى بتشارك فى الخير ونبرز نشاطتنا للناس علشان شجعهم على الخير

mahasen saber said...

ربنا يكرمك ويجازيكى خير
انا سمعت ان فيه تجمع بعد العيد
ارجو تبلغينى قبله بفتره
واطلب منك طلب بجد ادعيلى اقدر احضر واشاركو وربنا يتقبل ويتقل ميزان الحسنات باذنه سبحانه وتعالى...

mahasen saber said...

وبمناسبة بقه حلول العيد...
كل عيد وانتى واسرتك كل من تحبين بالف خير
وعيد مبارك وسعيد عليكى ان شاء الله...
وربنا يكتبنا من العتقاء فى هذا الشهر الكريم...
فى رعاية الله يا قوس..

بنت مصريه said...

ربنا يجعله ف ميزان حسناتك يا رب
انتى وابى وكل اللى حضروا ولكم منى كل تقدير واحترام

قوس قزح said...

وومن

يارب فعلا ناس تستفيد به و ميكونش مجرد حجة عليهم يوم الدين

...................

anonymous

فكرة جميلة طبعا ان يكون مدونة او موقع خاص بالخير بس هو مؤقت دلوقتى بنستخدم مدونة بيكيا و صالون احمد الصباغ وممكن اى حد يحب يعمل خير ننشره له فى الاتنين

...............

مواطن مصرى نايم

اسلام جزاك الله خير و الافضل عندى المدح انك تدعى لنا كلنا اننا نقدر نكبر و نعمل خير اكتر و ان ربنا يتقبله منا

و ان شاء الله تشارك معنا :)

قوس قزح said...

حنين القلب
جزاكى الله خير
و كل سنة وانتى طيبة و عيد ميلاد سعيد

.................

عاشقة القمر
اشكرك على مرورك
نورتى مدونتى و اهلا بكى و باهل السودان كلهم

................

الاخوان حياتى

كل المدونين المصريين مرحب بهم انهم يشاركوا و يوحدوا جهدهم معنا و بالنسبة للاسماء المدونات المشاركة فى كتير من المشاركين بيفضلوا ميتذكرش اسماءهم

قوس قزح said...

mahasen saber

ان شاء الله التجمع القادم للخير هيكون فى العيد الكبير
يكون كل واحد حجه حاله للمشاركة و يكون الناس بدات تفضى من دخول المدارس و الجامعات
و هبلغك ان شاء الله

..................

mahasen saber

و انتى طيبة و بخير و سعيدة يارب
و اللهم تقبل دعاءها يارب و اعتقنا من النار جميعا

...................
بنت مصرية

شرفتنى بزيارتك و جزاكى الله خير على دعاءك لنا
تحياتى

همس الاحباب said...

بجد بجد
ولا بلاش
احسن تتعودى على كده
ههههههه
لا بجد ربنا يجازيكى خيرا
فعلا اليوم كان مبذول فيه مجهود جميل قوى من حيث التنظيم
ومن حيث التنسيق مع ادارة المستشفى وتجهيز المطلوب
والخطوات اللى انتى ذكرتيها
غاية فى الاهمية ودليل للتطبيق فى اى مكان
تحياتى وتقديرى

أحمد كمال said...

مثل الذين ينفقون أموالهم في سبيل الله كمثل حبة أنبتت سبع سنابل في كل سنبلة مائة حبة والله يضاعف لمن يشاء والله واسع عليم

ربنا يجعل المجهود ده صدقة جارية ، و حبة نجد أثرها في الدنيا و الآخرة .

شمس النهار said...

ربنا يكرمك ويعينك علي الخير
ويكتر من امثلك
انت وابي بتحسسوني ان لسه في خير وخير كتير كمان

تابعوا الجديد said...

مشكلة الصباغ والدكتور زعبولا
بنظرة حيادية لصديق كليهما
مدون يدعى محمد الجوهري
http://goharyblog.blogspot.com/
شوفوها ضروري

SMA said...

أهلاًوسهلاً بيكي بعد طول غيابِك
وعل العموم كلنا بنتشغل في رمضان
وأحيكي على مبدرتك في فعل الخير للناس
لأن أغلب الناس بتفكر في مصلحتها الشخصية
وياريت كل الناس يعملوا زيك
وإن شاء الله تبقى في ميزان حسناتك


وشكراً

medolegend said...

كلام جميل فى شهر الخيرات شكرا ليكى

ورجاء زيارة المدونة

عاشقة القمر said...

سلام عليكم
هلا فيك انتي واهله مصر
واتمني ان تزورني في مدونتي شكرا

Diyaa' said...

هو ده الكلام ..وربنا يديمها عليكي نعمة وتبقي تحت أمر الخير علي طول :)
خاااااااااااااااااالص التحية

وجزاكي الله كل خير

جنّي said...

السلام عليكم


تقبال الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر