Sunday, November 2, 2008

و اتفرج يا سلام

قوس قزح : صباح الخير يا آبى
أبى : صباح النور
قوس قزح : شوفتى الجو بقى برد ازاى
آبى : لا عادى يمكن بس بالليل
قوس قزح : لا لا بقى برد و لازم تطلعى الشتوى بقى
آبى : لا مش دلوقتى لسه بدرى
قوس قزح : خلاص قدامك لحد يوم 28 نوفمبر
آبى : اشمعنى اليوم ده
قوس قزح : علشان ده اليوم اللى هنعمل بؤجة فيه
آبى : لا لو كده يبقى انا هطلع الشتوى حالااا

ايه رايكم تشاركوا معنا تانى فى يوم بؤجة خير ؟
و المرة دى مختلفة لان كل واحد هيكون بالفعل مطلع الهدوم الصيفى و الشتوى فى نفس الوقت و بيبدل دى مكان دى
يعنى لو لاقيت حاجة صيفى طول الصيف مستخدمتهاش يبقى مش هتستخدمها و حطها فى البؤجة
و لو فى حاجة شتوى اى حاجة لبس او بطانية او حتى احذية لاقتيها لاى سبب مش محتاجها حطها فى البؤجة
فى ناس هتقول صيفى ايه اللى فى الشتا .. هقولهم الناس الغلابة ممكن تلبس كذا حاجة فوق بعض و كلنا بنشوف الولاد اللى فى الشارع بيلمعوا العربيات ازاى بيكونوا لابسين حاجة نص كم و تحتها حاجة بكم علشان تدفيهم
و اى حد عنده حاجة غير اللبس مثلا ادوات منزلية او لعب او شنط او حتى سجاجيد ممكن يشارك بها

و اللى هيقول لا معنديش حاجة تنفع للبؤجة و كل الحاجات بستخدمها هقوله اشترى بطانية حتى لو بتاعت طفل صغير و هاتها يدفى بها طفل من برد الشتا و تدفيك انت يوم الدين

ده غير كمان يومها الاطفال هناك هيعرضوا لنا مسرحية من تمثليهم و تاليفهم
و اتفرج يا سلام على الاطفال اللى مكنوش بيلعبوا الا بالزبالة و هم بيحاولوا يقدموا فن لنا
وعلشان كده وجودنا مهم جدا لهم علشان يعرفوا ان تعبهم فى التحضير للمسرحية الناس فعلا قدرته و جات تشوفهم
و تذاكر المسرحية بمبلغ رمزى و هو 5 جنيه و ده بس علشان يحسوا اننا جينا و كمان دفعنا علشان نتفرج على شغلهم
و العائد المادى من التذاكر هيستفيد به الاولاد فى حاجة تانية

يعنى اللى مش هيقدر يشارك فى البؤجة ممكن يحضر المسرحية
المسرحية مدتها حوالى نص ساعة
وهيكون ميعاد عرضها من الساعة 2:30 ظهرا


هنروح ان شاء الله نفس المكان اللى روحناه قبل كده
جامع الزهراء اللى فيه جمعية صحبة خير وصف المكان بالتفاصيل هنا
و هيكون تجمعنا هناك من 11 الصبح
اللى يحب يجى و يصلى فى الجامع هناك صلاة الجمعة اهلا به
و اللى يحب يجى بعد الصلاة هنكون فى انتظاره
بس يفضل يكون الناس كلها حاضرة على الساعة 2 الضهر

و اخر حاجة فرحت جدا لما عرفتها
ان الجمعية قالت ان البؤجة اللى عملنها كانت احسن ملابس وصلت لهم من سنين
ياريت تانى نحاول نكون ايجابيين و كمان بمستوى كويس
و متنسوش تبلغوا كل اللى تعرفهم فالدال على الخير كفاعله

و احب افكركم


بيوم 7- 11 و ده يوم التبرع بالدم بدعوة من مدونة خيخة

و يوم 14 - 11 و ده يوم لعمل خيرى بدعوة من مدونى بورسعيد و التفاصيل هتكون هنا او على الفيس بوك هنا



و اخيرا

اتمنى يا بابا ابو خالد تقدر تيجى و تشارك معنا كعادتك فى عدم التأخر فى فعل الخير .. يارب تيجى


42 comments:

ahmed_k said...

إن شاء الله دايما يا داليا داعيه للخير
وربنا يقدرني وأقدر أشارك معكم المره دي
وأتفرج عالمسرحيه كمان
جزاكم الله خيرا وكل القائمين على الفكره

وتقبلي خالص تحياتي وتقديري

Unknown said...

شكرا يا داليا
وجزاك الله خيرا
انت دائما معنا بمجهودك


يوم الجمعه 14/11بأذن الله
هنروح نزور دار ايتام فى بورسعيد اللى يحب يشرفنا
ياريت تنورنا ونحاول نرسم بسمه ونتعاون على البر والتقوى
وبعدها هنقعد مع بعض شوية طبعا لو تحبوا
التفاصيل عندى بالمدونة
اعتذر لكنه ليس اعلان لكنها دعوه للخير

Mafrousa said...

دوللى
دايما فى الخير ساعية يا قمرة
ربنا يبارك فيكي
بس هوه شهر 11 شهر الخير كله ولا ايه؟؟
لو كجه يبقى انا و اختي محظوظين
لاننا من مواليد هذا الشهر
المهم
بالنسية لبؤجة الخير
ممكن انا اعمل بؤجة و اديها لمكان انا اعرفه
اصلي انا لسة كنت بفكر فى الموضوع ده خصوصا فعلا الوقت ده من السنة الصيف و الشتوي بيكونوا برة

Gannah said...

داليا
بجد أول مرة أحس انى حزينة لانى مش فى مصر
كان نفسى جداا أكون معاكم
لان اليوم السابق ترك فى نفسى تأثير كبير والحمد لله انه نجح ويارب اليوم القادم يكون أحلى وأحلى
لو ممكن حد يسجل فيديو -طبعا لو أهل الاطفال معندهمش مانع- علشان بجد نفسى اشوفهم
ربنا يوفقكم جميعا يارب ويقدركم على فعل الخير
وانا برضه لو قدرت اعمل حاجة مش هتأخر لانى بجد نفسى اعمل حاجة
مؤقتا هدعى لكم وربنا يجعله فى ميزان حسناتكم جميعا
تحياتى

nona said...

هو فى اية انت بجد عايزين تغظونى لان شهر 11 مليان حجات جميلة و انا مش هعرف اكون معكم فى اية حاجة
ماليش دعوة اتصرفوا باة
ربنا يجزيك خير يا داليا انتى و رحاب و ايناس و خوخة و يجعلة فى ميزان حسناتكم يا رب

فاتيما said...

دوللى
أزيك يا وش الخير
وحشتينى يا حبيبتى قوى
أنا المرة دى بكل تاكيد و ثقة لو ربنا احيانى جاية التبرع بالدم إن شاءالله
و بؤجة الخير أكيد هاجى لو مقبلونيش فى الشغل الجديد
و لو إبتديت الشغل ساعتها هتصرف إن شاء الله
هتوحشينى لحد الجمعة الجاية
ربنا يقدرك دايما على قيادتنا للخير
و ربنا يرجع بابا ابو خالد بألف سلامة عشان الفرحة تبقى فرحتين
تحياتى يا حبيبتى من قلب قلبى

Diyaa' said...

أنا جااااااااااااااااااااااااااااااي ..بإذن الله لو ليا عمر يعني
ومسألة مسرحية الأطفال دي تحديداً
بتفكرني بفيلم
finding neverland
وإزاي الطفل اللي ظروفه صعبة ممكن الإهتمامات البسيطة بتاعته لو اتقدرت حق قدرها تغير في مسار حياته ازاي وتحول شخصية ممكن تتعلم النشل أو السرقة أو التشرد أو يبقي مصيره عامل في مصنع يا دوب بيجيب لقمة عيشه لبني ادم تاني خالص ..
ما علينا كفاية استطراد المفروض أقفل ..أخر يوم وبعد كده مفيش نت لول
جزاكي الله كل خير وهبقي أعرف التفاصيل فيما بعد..المكان والزمان
ويا رب نفضل علي طول متجمعين في الخير
سلام

Anonymous said...

ان شاء الله متجمعين فى الخير
طيب انا عاوز اجي وان شاء الله هكون موجود بعد الصلاه فى اى حاجه تانيه المفرروض اعرفها

Anonymous said...

بس هو انا عايز اتاكد هوا الميعاد يوم 28/11

Empress appy said...

اممممممممممم
انا طلعت الشتوى ولسه بلبس صيفى
عبقريه يا مصيبه انتى المرة دى هنقله على بيكيا بس ايدك معايا بقى اصل مش قادره اشيل لوحدى

عين فى الجنة said...

ربنا يسهل واحضر ان شاء الله

romansy said...

بجد شئ جيل اننا نلاقى لسه فيه خير فى الدنيا
ربنا يوفقك يارب

klmat said...

يارب دايما يقدرك على عمل الخير ونشره
انا من اسكندريه فى الحقيقه مش حااقدر احضر بس انا الحمد لله بطبق الفكره الكل بيستفيد الغلبان وللى بيعطى بيكسب الثواب وبينظم دولابه .وفكره المسرحيه رائعه ربنا يوفقك ويوفق كل من يشارك
استأذنك اناشد ابو خالد للرجوع للتدوين
خالص تحياتى

الازهرى said...

بالطبع دعوة جميلة وساحرص على تلبيتها
ولكن
اى جمعة بالضبط
تحياتى

(صندوق الدنيا) said...

ربنا يبارك فيكم...والبؤجه
وأتخيلكم الآن وأنتم تسيرون بها يوم القيامه..على الطريق إلى الفردوس الأعلى
اللهم حقق أحلامنا وأرزقنا جنتك

محمد فاروق الشاذلى said...

إن شاء الله يارب أكون موجود ولو ظروف الشغل حكمت إنى أكون مسافر وقتها فـ رقية وأم رقية هايحضروا بدالى.
ألف شكر ياداليا وربنا يكرمك يارب

الـسـيـدة نـون said...

عارفة يا دودو لما تبقى عايزة تفلفصى من حاجة واللى قدامك يسد عليكى جميع الطرق للفلفصة

اهو انتى عملتى كدة
انا لسة بقرا اول كام سطر من البوست قلت اكتب تعليق واقولك ما ينفعش بؤجة الخير تبقى كل فترة صغنونة
لازم تكون كل فترة كبيرة علشان الناس يبقى عندها حاجة تقدر تتبرع بيها
لان الواحد لما يطلع لوجه الله كل شئ مش بيستخدمه من حوالى شهرين
اكيد مش هيكون عنده حاجة دلوقتى يتبرع بيها
لسة يعنى الواحدمالحقش يثشيل حاجات على جنب غير مستخدمة

بس لاقيتك بتقولى واللى معندهوش حاجة يتبرع بيها ممكن يشترى بطانية

فقلت خلاص بقى يا بت يا خيخة مالكيش حجة
هتروحى يعنى هتروحى

بس بصراحة انا مش فاهمة ايه حكاية المسرحية دى

مين اللى هيمثل
اطفال الشوارع هما اللى هيمثلوا
ولا مين بالظبط؟


عموما ان شاء الله اكون مشاركة معاكم
وربنا يقدرك على فعل الخير دايما يا دودو
انتى ونصك الحلو التانى ابى

والف شكر على اعلانك عن التبرع بالدم

سلام
اشوفك على خير

اختك خيخة

ذو النون المصري said...

مشروعكم متاز و فعلا مفيد لان فيه ناس بترمي ملابسها القديمه في الزباله و بعضهم بيحشر ملابسه الداخليه في الصرف و بينسد بسبب التصرفات دي

قوس قزح said...

ahmed_k

انت ما شاء الله عليك عمرك ما اتاخرت عن مشاركة رغم سفرك بس ياريت فعلا تقدر يا احمد المرة دى تشارك بحضورك كمان
لان حضورنا مهم المرة دى للاطفال

تحياتى

قوس قزح said...

نهر الحب

انا سعيدة و فخورة بكى انك عاملة يوم خير فى مدينتك
و ياريت كل مدون يعمل كده

هكون طماعة و اتمنى منك انك تشاركى معنا يوم البؤجة و لو بالحضور للعرض المسرحى انتى و مدونى بورسعيد

ربنا معاكى

قوس قزح said...

واحدة مفروسة
كل سنة و انتى طيبة و مش مفروسة يارب

انا نفسى المرة دى تجيبى بوءجتك و تيجى تشاركى معنا

يا ريت تحاولى

قوس قزح said...

Gannah

ابدا متحزنيش انتى موجودة معنا دايما
و عمرى ما هانسى مشاركتك الطيبة يوم المستشفى
و ازاى كان يوم جميل اوى

ربنا يرجعك بالسلامة

رئيس جمهوريه نفسى said...

واااااااااااااااااااااااااا
طبعا انا لسة راجع من القاهرة ولظروف الشغل صعب انى جاى اى تجمع الشهر دة بس محدش عارف اية اللى ممكن يحصل ما بين عشية وضحاها فمش حقدر اكد حضورى او انفية وربنا يسهل
وربنا يقدركم يارب دائما على فعل الخير

Gannah said...

داليا
التعليقات دى جت على بوست "لحظة انكسار " النهاردة اللى كتبته عن منطقة اسطبل عنتر
التعليق من واحد اسمه العشوائى
واللينك مش له بتدل على انه عنده مدونة
هنقلها علشان انت وزورارك تحسوا قد ايه اللى بتعملوه هيفرق فى حياة الناس دى
انا طبعا مش عارفة مين الشخص وازاى لقى البوست بس بجد لو من اسطبل عنتر فاحنا فعلا محتاجين نقولهم والله احنا حاسين بيكم
----------------------------------
انا العشوائي ومن مكان اسطبل عنتر ويارين تبصوا بعين الاعتبار للمنطقه دي والناس اللي فيها فيها والله غني وفيها اللي مش لاقي ياكل ولا يوفر لولاده رغيف العيش


تعرفوا يعني ايه طفل ميفرحش بعيد تعرفوا يعني ايه رب اسره مطحون ليل نهار علشان يوفر عيشه كريمه لاطفاله تعرفوا يعني ايه ام تستني اي شيئ من اهل الخير في الشهر الكريم علشان توفر ملابس جديده لاولادهاتعرفوا تعرفوا كتير وكتير علي المكان ده اللي هو اسمه اسطبل عنتر اراهن اي حد ييجي زياه للمكان ده هيشوف العجب فيه الناس هنا من كوكب اخر غير الارض

-------------------------------
انا مستغربة لكن مش ممكن حد يختار البوست القديم ويكتب التعليق بطريقة عشوائية
الله أعلم هو مين ويعين كل الأهالى على حياتهم
تحياتى

Gannah said...

أخى الكريم العشوائى
والله ما ذهبنا الى هناك ولا انا كتبت هذا البوست الا لاننا نشعر بكم
وسبحان الله انت ارسلت التعليق فى وقت يستعد الاخوة لعمل زيارة اخرى للمنطقة للمساعدة
ومع ذلك لو ان لديك اقتراحات محددة فارجوك اكتبها ونحن على اتم استعداد لعمل ما نستطيع
نحن والله نشعر بكم ولو ان الامر بايدينا ما كان هناك محتاج
ولكن لله فى خلقه حكمة والفقر ابتلاء والغنى ايضا
فلا تدرى لعل الله فرجه قريب
انا لانى خارج مصر فلا املك حاليا الا الدعاء ولكن الاخوة فى مصر جزاهم الله خير سيذهبون الى المنطقة اخر هذا الشهر
ارجو ان تبلغ تحياتى واحترامى وتقديرى لكل اب يعمل من اجل اولاده ولا يرضى الحرام
ولكل ام تتحمل كل ذلك من أجل اولادها
ربنا معاكم
تحياتى
---------------------------------
هذا ما كتبته له لعله يزيل بعض المرارة التى يستشعرها

اقصوصه said...

ماشالله عليج

افكار جدا جميله

جزاج الله كل خير

همس الاحباب said...

موافقة
موافقة
موافقة
انا جاااااااااى
باذن الله
وانا هقدر اتاخر
اجى بالذوق احسن

بجد
ربنا يجازيكم خيرا
ويجعله فى ميزان حسناتكم
تحياتى

mahasen saber said...

جزاكىم الله كل خير يا داليا
بس اليى ممكن ميعرفش يحضر وحابب يشارك بشئ يوصله ازاى
.......
بس عارفه المشكله فى اليوم انه جمعه صعب قوى يوم الجمعه عندى بالذات
بس ربنا يباركلك يا داليا
وارجوكى عرفينى زى ما قولتلك

د/ رامي شهاب الدين said...

الدال على الخير كفاعله


وفقكم الله دائما إلى كل ماهو خير


تحياتى ومودتى

Anonymous said...

السلام عليكم قوس قزح
بجد ربنا يجزيكى كل خير على فرص الخير العظيمة اللى بتجيبيها ليما
وربنا يقدرنى واشارك ان شاء الله فى البؤجة المرة دى ودمتى لنا بكل خير
ويلا سلام

ميرا ( وومن ) said...

دودو

ان شاء الله هاجي

وفرحتيني قوي بجد والله ربنا يقدرك علي فعل الخير وتدلي دايماً علية

يارب

يا مراكبي said...

بسم الله ما شاء الله

ربنا يبارك فيكم ويجعل كل ده في ميزان حسناتكم إن شاء الله

خالص تحياتي ودعواتي بجد

وائل مصطفى said...

ربنا يبارك فيكم والله

ان شاء الله متواجد معاكم الجمعه

كان لى بعض النشاطات الفرديه مع مدام صبريه من حوالى سته شهور لكن دايما الواحد محتاج تشجيع لان العزيمه بتقل

نجدد النيه والله المستعان

جزاكم الله خيرا

شفـقــة و إحســــان said...

ان شاء الله نحاول نيجى
وجزاكم الله كل خير على فعل الخير

قوس قزح said...

انا سعيدة جدا بردودكم كلكم
و خصوصا ان فى ناس جديدة هتشارك معنا ان شاء الله

اسامة
ايوه المعاد 28 - 11

الازهرى
الجمعية هى جمعية صحبة خير و هى المسئولة عن المنطقة هناك

خيخة
المسرحية من تاليف و تمثيل اولاد الشوارع اللى الجمعية اتبنتهم من سنة و نص و علمتهم الكتابة والقراءة و بتحاول انها تدمجهم مع المجمتع و يحسوا انهم مش منبوذين

Gannah

تعليقك اد ايه بيبين ان الناس هناك ازاى حاسة بالقهر و الفقر
و يارب مشاركتنا فعلا تزيل بعض المرارة اللى الناس دى حاسة بها

mahasen saber

ممكن لو تحبى حد ياخد منك تبرعك لو انتى فى القاهرة
و لو بره القاهرة ممكن تبعتيها بالسوبر جيت و نستليمها منه
لو صعب الحالتين ممكن انتى توصليها للجمعية يوم تانى



تحياتى لكم جميعا و دائما نتجمع فى الخير
و جزاكم الله كل خير

أمل حمدي said...

ازيك يا داليا

ربنا يجعله في ميزان حسناتك اللهم امين

ان شاء الله احاول اشارك معاكم

ادعيلي ربنا يقدرني

كيكى عوووووو said...

ربنا يا حبيتى دايما يجعلك سباقة فى الخير
ويرضيكى ويسعدك ويهنيكى
وحشتينى
عوووووووووووووووووووووووو

Ahmed Kamal said...

سلام عليكم

بسم الله ما شاء الله ، لسه في أسماء جديدة بتنضم للبؤجة :)

أتمنى أشوف اليوم اللي نحس فيه إن المجهود ده أثمر واقع جديد ، واقع نفتخر كلنا به .

جزاكم الله خيرا ، و نفع بكم ، و نلتقي على خير بإذن الله .

دينا فهمي said...

ما شاء الله يا داليا
هو الميعاد امتى؟؟

دينا فهمي said...

هحاول والله على أد ما أقدر
المكان بالنسبة لي بعيد جدا وما اعرفوش جدا

جنّي said...

ولا زال الخير يتدفق من قوس الخير ..

بارك الله فيكي وجزاكم كل الخير ..

دعاء مواجهات said...

ياريت تراعو ان فية ناس مش مناسب ليها الجمعه

وتحاولوا تغيروة المرة الجايه

متضايقة اوى انى مش هعرف اجى

سلااام