Wednesday, November 26, 2008

البؤجة الشتوية






احب افكركم تانى ان البؤجة يوم الجمعة ان شاء الله 28 نوفمبر



و ان كل المطلوب منك انك تشارك بأى حاجة عندك مش محتاج لها زى اللبس او الاحذية او الشنط او بطاطين او حتى لعب اطفال و اقلام و كراسات و ادوات تلوين



و ممكن مشاركتك تكون بالحضور فقط و نقل الصورة للاخرين فالدال على الخير كفاعله

لان ممكن من مشاركتك معنا و التحدث عنها يصل صوتك لاخرين قد يكونوا من زوار مدونتك او معارف متابعين لك




و اللى يحب يشارك بتبرع مادى عن طريق رقم حساب بنكى فده رقم الحساب البنكى لجمعية صحبة خير



129/1/66371



بنك مصر



فرع المنيل



و اللى ناوى يحول مبلغ عليه ياريت بس يبلغنى علشان اطمنه ان التحويل تم









و على فكرة الموقع عليها منتجات من انتاج المشغل هناك ممكن تساعدوا من خلال شراءها






معادنا هيكون من الساعة 11 الصبح حتى الساعة 2



ولا يفوتكم ثواب صلاة الجمعة جماعة مع اصدقاءكم من المدونين فهى تقرب بين النفوس




المكان مسجد زهراء مصر القديمة فى الزهراء




خريطة المكان

هنا الطريق من على كورنيش المعادى و المربع الازرق ده البنزين اللى قبل دخلة المعادى و المربع الاحمر هو مكان المسجد و الخط الاخضر بيوضح الطريق







و هنا الخريطة لمحطة مترو الانفاق اللى اسمها الزهراء و لونها بالازرق اما اللون الاحمر فهو لمكان المسجد
و ده سهل اوى للناس اللى هتستخدم المترو







فى حالة ان حد تاه ممكن يتصل على الارقام دى
0124433543
الاستاذة صبرية جمعية صحبة خير
0120667739 - 0106011712
الاستاذ احمد سكر صاحب مدونة
احمد سكر
0101345140
الاستاذ خالد صاحب مدونة
همس الاحباب
0106252126
الاستاذ محمد فاروق صاحب مدونة قلب مصرى


و ياريت كل مدون يقدر ينزل بوست عن الموضوع النهارده او بكرة علشان نبلغ اكبر عدد ممكن يكون جزاه الله خير


اما عن المسرحية فللاسف المسرحية هتتأجل لبعد العيد و ده لان فى نفس اليوم هيكون فى يوم الالف طفل



و اليوم ده بيتجمع فيه اطفال الشوارع من ايتام او غير الايتام من مناطق عشوائيات مختلفة و جمعيات خيرية مختلفة و بيكون التجمع فى اى مدرسة من المدارس و هدف اليوم ده هو اندماج الاطفال مع المجتمع لانه للاسف بالرغم من محو امية البعض منهم و مساعدتهم على الحصول على عمل بتظهر مشكلة اندماجه مع المجتمع و بتكون النتيجة رجوعه مرة اخرى لما كان عليه



اليوم ده بتكون فيه مسابقات مختلفة من مسابقات دينية او ترفيهية او فنية او رياضية



و بيكون مشارك فيه متبرعين بتكون مهمتهم التنظيم و التحكيم و الاشراف على الاطفال



التجمع السنة دى هيكون فى مدرسة نيو جينيريشن فى طريق مصر الاسماعيلية و فى باصات هتكون موجودة الصبح من الساعة 8:30 امام مسجد الزهراء او دار التربية بجوار كوبرى ثروت فى الجيزة او مبنى التليفزيون



اللى يحب يشارك في اليوم ده يا ريت يبلغنى و انا احاول ارتب له مع مدام غادة جبر المسئولة عن الجمعية
جزاكم الله كل خير






40 comments:

محمد فاروق الشاذلى said...

ربنا يكرمك يا داليا يارب وتفضلى دايما بتدلينا على فعل الخير وربنا يتقبل منا جميعاً

Anonymous said...

انا كنت سألتك عن حاجات معينه لموضوع البؤجه فى مسج على الفيس بوك

الطائر الحزين said...

وفقكم الله لما فيه رضاه

Ahmed Kamal said...

جزاك الله خيرا يا داليا

بس غادة رجب مش حاتغني ، غادة جبر بس اللي رايحة :)

محمد حمدي said...

بجد ربنا يوفقكم دايما لفعل الخير
انا بجد كان نفسى اكون موجود معاكم فى اليوم ده لكن للاسف رجلى مكسوره ومش بتحرك غير فى اضيق حدود

تحياتى ليكى وربنا يجعله فى ميزان حسناتكم ان شاء الله

سمكه واحده said...

عايزه اقلك حاجه
بجد ربنا يكرمك ويجزيكي خير ويرضي عنك
بجد والله ربنا يكرمك
جزاكي الله كل خير
كمان يابختكوا
والله شرف ليا اني اتعرف عليكي من قريب مش من خلال عالم التدوين فقط انتي شخصيه جميله اوي ربنا يذيدك
سمكه

(صندوق الدنيا) said...

بارك الله فيكم وجزاكم الله خيرا كثيرا

!!! عارفة ... مش عارف ليه said...

جزاك الله خير
وإن شاء الله في ميزان حسناتك

دايماً في أي عمل جماعي حضورك مميز وموجود

"والدال على الخير كفاعله"

دومتي بكل خير
وليد

عاشقة القمر said...

بجد انا مبوسطه منكم جداااااااااا كنت اتمناها ان اكون معاكم بس مسافه بينكم

يرنا يجعل لكم في ميزان حسناتكم

عاشقة القمر said...

كنت اتمناه ان اكون معاكم بس مسافه بينا
بجدانامبوسطه جدا منكم
ربنا يجعل في ميزان حسناتكم

همس الاحباب said...

جزاءكم الله خيرا
وجعله فى ميزان حسناتكم
ان شاء الله الجميع يحضر
والكل يشارك بقدر استطاعته
حتى لو بكلمة تشجيع
تحياتى

الـسـيـدة نـون said...

انا جاية ان شاء الله

بس مش فاهمة حكاية يوم الالف طفل دى
هتكون فى نفس يوم البؤجة
طب واللى يحب يروح المكانين
يعمل ايه

متهيالى كدة الموضوع محير شوية


طب مش محتاجة منى اى خدمة يا دودو

لو احتجتى حاجة بغينى

سلام
اختك خيخة

شفـقــة و إحســــان said...

جزاكى الله كل خير بس انتى اتاخرتى شوية فى عرض البوست
انا كنت عايزة استفسر عن حاجة
هو انتم هتروحوا اسطبل عنتر والمدرسة اللى فيها الاطفال الايتام فى نفس اليوم؟؟
ولا فى ناس هتروح المدرسة وناس هتروح منطقة اسطبل عنتر؟؟
اصل بصراحة مش فاهمة اليوم هيكون ازاى
تحياتى

داليا ..قوس قزح said...

قلب مصرى

و يكرمك يا محمد على اهتمامك و مشاركتك و يحفظ لك بيتك و بنتك


.........
اسامة عبد العال

حاضر حالا هروح اشوف اسئلتك و ارد عليها




.........
الطائر الحزين

جزاك الله كل خير

داليا ..قوس قزح said...

احمد كمال

ههههههه اعملكم ايه بقى ما انتم اللى مختارين اسماء لما اتغلبط فيها تطلع كده

عموما انا ظبطت يا فندم الاسم مع ان الاسم التانى كان ممكن يكون عامل جذب اكتر :))

..............

Mohamed Hamdy

الف سلامة عليك و ربنا يتمم شفاءك على خير يا رب

............

سمكة واحدة
ياريت تيجى انا كمان نفسى اتعرف عليكى
و اهى فرصة كمان تاخدى ثواب و تتعرفى على الناس الجميلة اللى بتشارك فيه
يا ريت تحاولى
تحياتى

داليا ..قوس قزح said...

ام البنين

جزاكى الله كل خير


..........
عارفة .. مش عارف ليه

اشكرك على دعاءك و ان شاء الله فى مرة من المرات تقدر تشارك معنا و نتعرف عليك
جزاك الله كل خير

...........

عاشقة القمر

جزاكى الله كل خير و كفاية اهتمامك بالمتابعة معنا و دعاءك لنا

داليا ..قوس قزح said...

همس الاحباب

ربنا يسمع منك يا خالد
الناس مش متخيلة المشاركة بتفرق ازاى سواء معنا او مع الناس هناك
جزاك الله خير


.........
بت خيخة و اى كلام

يوم الالف طفل ده فى نفس يوم البؤجة
و اللى يحب يشارك فى الاتنين وقتها هيروح هناك بطريقته يعنى بمواصلات او عربيته

لكن عايز يشارك فى يوم الطفل بس و مش عنده وسيلة مواصلات لازم يكون من بدرى فى الاماكن اللى قلت عليها و وقتها مش هيكون فى فرصة انه يحضر البؤجة بس ممكن يسلم حاجات البؤجة فى يوم تانى او لغادة جبر

ربنا يخليكى يا نوران
انا بس عايزاكى لو كنتى يومها جاية من 6 اكتوبر متنسيش على اللى قلته لكى تعدى تاخديه فى طريقك :)

تحياتى

Mony said...

شكرا للتنويه يا قوس قزح

بس ميعاد من 11 ل 2 ده هيكون تقريبا وقت الصلاة

يعني احنا هنروح نسلم الحاجة هناك و نمشي ولا ايه


طبعا كده مش هينفع اروح الميعاد بتاع الساعة 8 الصبح ده

فلو سمحتي ردي علي بخصوص اسطبل عنتر ضروري

لاني هيكون معايا الاولاد وهاجي بمترو الانفاق و هكون شايلة الحاجات معايا

و مش عايزة اتبهدل الله يكمك

فياريت تفهميني بالتفصيل ايه اللي هيحصل بالضبط من 11 ل2


و جزاك الله خيرا علي مجهودك و جعله في ميزان حسناتك

و اسفة علي التطويل

داليا ..قوس قزح said...

شفقة هانم و احسان بيه

حضرتك انا منزلة البوست من زمان و ده بس مجرد تذكرة به لعل و عسى حد جديد يشارك او حد يكون نسى و يفكره البوست ده

اما عن يوم الالف طفل فهو فى نفس يوم البؤجة و هم بيحتاجوا متطوعين له
فاللى يحب يشارك فيه بدل البؤجة يبلغنى بس وانا ارتب له مع مدام غادة علشان يتفق معها على المكان اللى هيقابلها فيه من الاماكن التلاتة الموجودة فى البوست

اى استفسار تانى انا تحت امركم

تحياتى

محمد شوقي said...

السلام عليكم ورحمة الله وبركاته
لدي مشكلة عرضتها في مدونتي
http://la7zat200.blogspot.com/
ارجو اعاطئ رأيك

شكرا

الـسـيـدة نـون said...

ما تخافيش يا دودو

منستش ولا حاجة

وهاتصل بكرة ان شاء الله
علشان ارتب المواعيد



اشوفك الجمعة ان شاء الله
سلام
اختك خيخة

ahmed_k said...

ربنا يكرمك يا داليا ويجعله في ميزان حسناتك
طيب مادام المسرحيه إتلغت يا ترى أيه حيكون برنامج تجمع المدونين في هذا اليوم
تقبلي تحياتي

قوس قزح said...

mony

متقلقيش كل الحكاية ان الوقت ده علشان اللى يحب يجى قبل الصلاة و يشارك فيها
او اللى يحب يجى بعد الصلاة
لكن كل اللى هتعمليه انك تسلمى الحاجة اللى معاكى و بس
لو حابة تكملى اليوم معنا لو اتفقنا اننا نروح نتغدى فى اى مكان ده طبعا شىء يشرفنا

و اسفة على المودريشين اللى زهقك كده :)

قوس قزح said...

الراجية عفو الله
انا روحت عندك وتركت تعليق بالفعل
يارب يكون مفيد لكى

قوس قزح said...

بت خيخة و اى كلام

جزاكى الله خير
انا عارفة انك قدها :)

ربنا يكرمك فى شريف ان شاء الله

قوس قزح said...

ahmed_k

انا سعيدة انك هتشارك بحضورك كمان المرة دى

و ان شاء الله نتفق بكرة هنعمل ايه بعد ما نسلم الحاجات

فى انتظارك

رئيس جمهوريه نفسى said...

للساف ارتباطات الشغل بتمنعنى انى اكون معاكم المرة دى للاسف بس عموما ربنا يقدركم على فعل الخير ان شاء اللة

Gannah said...

داليا
جزاكم الله خيرا
ووفقكم وجعله يوم خير
يارب يكون يوم يفرح أهالى المنطقة ويحسسهم ان فيه ناس مهتمة بيهم
كان نفسى أكون موجودة لكن قدر الله وما شاء فعل
يارب يكون فيه بؤجة صيفية وأقدر أحضرها
ان شاء الله
سلامى للجميع ولكل اللى هيشارك
وللمنظمين
انت وآبى والبشمهندس أحمد
تحياتى

البت المشمشية حلوة بس شقية said...

ربنا يقدرك على عمل الخير يارب ويكرمك بجد انتى انسانة جميلة ياريت تنورى مدونتىالمتواضعه هستنا زيارتك ليا

Anonymous said...

السلام عليكم
ربنا يجزيكى خير يا داليا والله على المجهود الرائع ده
واناا بصراحة نفسى اشارك معاكم بس الموضوع ان بطوط باعنى ومش هيقدر يييجى معايا وانا اصلا مش عارف حد من المدونين فبجد ده عائق كبير ليا فمش عارف هاقدر ااجى واللا ايه بالاضافة بقى للمشكلة ان عند امتحان الاسبوع القادم
المهم مش بشيلكم همى والله بس حبيت بس اشرح الموضوع بكل بسادة وان كنت هاحاول اجى لانى فعل اعاوز اشارك فى الخير الكبير ده

وعلى العموم ربنا يجزيكى كل خير
ويلا سلام

البت المشمشية حلوة بس شقية said...

ربنا يجازيكى كل خير يارب ياريت تنورى مدونتى

Anonymous said...

اللهم ما تقبل منكم صالح اعمالكم

و اعانكم على فعل الخيرات و الأكثار منه

و ان شاء الله نتواصل معكم باذن الله

شفـقــة و إحســــان said...

سعدنا جدا جدا جدا بلقاءك يا داليا وان شاء الله نكون مشاركين معاكى علطول
بجد انتى انسانة طيبة وجميلة جدا وروحك مرحة ....سعداء بمعرفتك

قوس قزح said...

Gannah

جزاكى الله خير يا جنة
انا مش عارفة اقولك ايه
بس يكفى ان ناس كتير اوى هتكونى انتى سبب رحمتهم من برد الشتا
و ان شاء الله ربنا هيجزيكى خير و تكونى من اهل الجنة

بشكر ربنا على ان فى ناس زيك حوالينا

قوس قزح said...

رئيس جمهورية نفسى

انا متاكدة ان انت بتعمل الخير كل ما بتكون الفرصة قدامك
ادى الفرصة بقى لغيرك :) ولا انت عايز تعمل الخير هنا و هناك ؟؟
ربنا يسعد قلبك بالخير دايما بينا او من غيرنا

قوس قزح said...

البت المشمشية

جزاكى الله كل خير
و تمت الزيارة بالفعل لمدونتك و لاقيت خناقة مع الجيران :)

قوس قزح said...

جمعاوى
انا سعيدة ان امنيتك اتحققت و قدرت تشارك معنا
و يارب نكون طلعنا عند حسن ظنك بينا
و ان مشاركتك و حضورك حسيت انك استفدت بهم معنا

تحياتى لك

قوس قزح said...

شوكت

جزاك الله خير

قوس قزح said...

شفقة هانم و احسان بيه

انا بعتذر لكم جدا لانى لحظات شكيت فى نيتكم للحضور

و يمكن انتم من الناس اللى فرحت بهم لان الواحد لما بيكون حاسس ان الناس دى مش هتشارك و يلاقيها بتشارك بتكون فرحته اكبر لان حسن نيتهم اكبر من حسن نيته

جزاكم الله كل خير يا رب

يا مراكبي said...

شيء أكثر من رائع

وإن شاء الله ربنا هيجازيكم خير الجزاء دنيا وآخرة إن شاء الله

خالص تحياتي وتقديري