Saturday, December 27, 2008

هات كتابك القديم


زمان فى المدرسة كان من اهم النشاطات اللى بحبها ان مدرسة الفصل تقول هنعمل مكتبة فى الفصل صغيرة و نشارك فيها بكتب و نتبادل الكتب والقصص مع بعض و كان من حقى استعير الكتاب لمدة اقصها اسبوع و ده كان بيشجعنا اننا كل اسبوع ناخد كتاب جديد


و لانى حاليا معنديش وقت للقراءة بالرغم من وجود كتب جديدة نفسى اقرها ..اكتشفت ان فعلا اكتر وقت كان الواحد بيقرا فيه هو من سن 9 سنين لحد دخول الجامعة


و من هنا جات لى فكرة الخير اللى جاى

ان فى اطفال فى السن ده ممكن لو اتوفر لهم الكتاب يقدروا من خلال القراءة يصقلوا شخصيتهم و يوسعوا خيالهم و ينموا موهبتهم .. لكن مش كل الاطفال بيتوفر لهم الكتاب و ده لان تمن الكتاب لهم ممكن يكون تمن وجبة او تمن دوا




علشان كده .. المرة دى هيكون تجمعنا ثقافى ...ازاى ... يعنى كل واحد عنده كتاب قراه و مركون على الرف او قصة جميلة يحب يوسع بها خيال غيره او حتى مجلات اطفال تضيف بسمة على وشهم .. يحضرهم علشان يشارك بهم معنا فى يوم المكتبة ..


اليوم ده هنروح لمكان فيه اطفال ايتام او مكان بيوفر محو الامية لاطفال الشوارع .. و نعمل رفوف مكتبة و نحط عليها الكتب و المجلات و نكون حريصين ان المكان ده يكون متواجد فيه الشخص المناسب انه يكون امين المكتبة علشان يقدر يحافظ عليها



اختيارى للمكتبة لسببين

الاول حديث الصدقة الجارية ..علم ينتفع به

التانى اننا نشارك فى مساعدة الاطفال على تنمية شخصيتهم و متكونش مساعدتنا لهم بس مادية

يمكن فعلا هم محتاجين المساعدة المادية و العينية علشان يتوفر لهم عيشة ادمية .. لكن فى نفس الوقت هم محتاجين يندمجوا مع المجتمع اللى حواليهم و يتعرفوا على ثقافات تانية و يتعلموا ازاى يشاركوا فيها و ده مش هيحصل غير طريق حاجتين القراءة او الاحتكاك الفعلى من خلال شغل او دراسة .. و اعتقد ان القراءة هتمهد الطريق لبر الاندماج ده





مهمتكم التانية المرة دى غير انكم تشاركوا بحاجة .. هى انكم تساعدونى فى البحث عن المكان المناسب لعمل المكتبة دى

ممكن ملجأ ..او دار تربية ..او فصول محو امية ..

المهم ان يكون الاطفال فيها فى سن القراءة


و ان شاء الله هحاول ان يوم المكتبة دى يكون فى ايام معرض الكتاب ..لسببين الاول ان سهل اى حد رايح المعرض انه يشترى كتاب او قصة باسعار كويسة . و التانى ان الاطفال يحسوا انهم شاركوا فى المعرض بطريقة ما حتى لو كانت الكتب راحت لحد عندهم


فى انتظار ارائكم و اقتراحتكم


ملحوظة : خيخة انا كده حجزت شهر يناير علشان الاتفاق ان كفاية يوم واحد فى الشهر للخير علشان ميكونش صعب على الناس

ملحوظة تانية : اللى مش هيقدر يشارك بكتب او مجلات ممكن يشارك بادوات مدرسية يعنى اقلام او الوان او كراسات




46 comments:

Diyaa' said...

:)

محمد عبد الغفار said...

فكره اكثر من رائعة ، بس المشكله انى مقدرش افرط فى كتبى حتى القديمه

انالسه عندى قصص اللى كانت مقرره عندى فى خامسه ابتدائى و سادسه ابتدائى

بس فى ناس كتير تقدر تستغنى بدل مترميهم

فاتيما said...

دوللى
ازيك يا حبيبتى
فكرة ممتازة
بصى
أنا عندى مجلات كتير قوى بتاعتى من و أنا صغيرة
ممكن اجيب من كل مجلة أعداد كويسة كدا
حكاية المكان دى صعبة بالنسبالى
بس اعتقد أحمد كمال ممكن يقترح اماكن مناسبة لأنه ما شاء الله عليه بيسعى فى الخير كتير
أنا معاكم يا ست الستات
حددوا المعاد و إعمليلنا لوجو حلو من تفانينك عشان نحطه فى مدوناتنا
تحياتى و إحترماتى يا حبيبتى

قوس قزح said...

Diyaa
يارب تكون ابتسامتك دى ابتسامة رضا

قوس قزح said...

محمد عبد الغفار

لا انت حالة نادرة .. انا بتكلم عن الناس اللى بتقرا الكتاب و بيكون خلاص انتهى دوره فى وجوده عندها

بس انت هتعمل بهم ايه ؟؟
مش الافضل ان حد يستفيد بهم بدل ركنة سنين و فى الاخر بعد عمر طول يترموا لانهم بقوا كراكيب !!!

عموما دور وسط كتبك و كتب اولادك يمكن تلاقى و لو كتاب يستفيد به الاطفال بدل الركنة

تحياتى

قوس قزح said...

فاتيما

انا فعلا سالت احمد كمال و هو هيحاول يساعد فى الحكاية دى
بس كان هدفى ان يكون فى اماكن كتير علشان نختار مين هيكون اكثرهم استفادة بالمكتبة

المجلات طبعا بدام من اختيارك هتكون رائعة لانك عارفة الاطفال فى السن ده بيحبوا ايه

و اول ما احدد المعاد هيكون اللوجو جاهز قبلها ان شاء الله

نورتنى بزيارتك و تشجيعك :)

المـــفـــــــقــــــــوعـــــة مــرارتـهــا said...

بصراحة انا سعيدة بيكي انتي وخيخة وآبي علي النشاط الرائع ده ربنا يجعله في ميزان حسناتكم
بس هو فيه في مصر مكتبة بتهتم انها تمحي امية اولاد الشوارع
لو فيه قوليلنا عليها لان اطفال الشوارع دول لو اتحلت مشكلاتهم اكيد بلدنا هاتبقي احسن واكثر تقدما وكثر رقيا
سلام ياجميل

romansy said...

فكره كويسه ياريت نقدر نحقق دا فعلا فيه كميه كتب كتير
بتضيع لما السنه الدراسيه تخلص ليه مش نستفاد منها بدل ما بيتعمل بيها
قراطيس لب وسودانى
وترمس على الكورنيش
ويتلف فيها بطاطا

صبرني يارب said...

فكره حلوه اوي يا دالي بجد فكره جميله

انا فعلا كتير اقول الملاجيء ان كانت توفر شيء فيه توفر سرير للعيال يناموا عليا
وبالكاد اكل
لان ميزانيتهم قليله وبتتسرق كمان

لا اكل ولا تربيه وحنيه ولا اي حاجه

وبالنسبه للتجمع طبعا طبعا لو عرفت اجي الكراست والالوان تبعي انتى عارفه
والكتب انا عندي برضه كتبي الى كت باقراها وانا صغيره لكن فى مكتبة بابا لانها كانت متوارثه بينى وبين اخواتي
وحاليا ولادي بيقروها ما اقدرش افرط فيها لكن نجيب جديد بس اعرف اجي انا

ربنا معاكم يا دولي وحشاني يا كوتي

موناليزا said...

فكرة جميلة بجد
بس المهم يكون المكان امين جدا على الكتب ومايتباعوش بالكيلو لبتاع اللب بعد كده

Sherif said...

معاكم بالتأكيد

تحياتى لفكرة ممتازة

جنّي said...

السلام عليكم

كان الله مع اهل غزة وليغفرالله لنا تقصيرنا معهم ..

لا للوقفات والاستنكارات ولكن اجمعوا المال والسلاح وليفعل كل منا ما يستطيع لايصال المال والسلاح لاهل غزة ..

ويارجال سيناء الشرفاء قوموا بايصال المال والسلاح لاخوانكم في غزة الصامدة..

ولعنة الله على الكلب الذي استقبل العاهرة اليهودية امس للتواطؤ لضرب غزة ..

وحسبنا الله ونعم الوكيل

مصطفي زهران said...

غزة تحتضر يا شباب اين انتم في مدوناتكم من غزة

مسدس صغير said...

فكرة حلوة تنتظر التنفيذ. تقبلى تحيتى

kochia said...

فكرة جميلة وفعلا مفيدة
يارب اقدر اشارك معاكم ان شاء الله

سمكه واحده said...

بجد فكره تحفه تحفه تحفه
ماشاء الله عليكي والله البلد شكلها هتتغير قريب ان شاء الله
جزاكي الله كل خير
مش عارفه اقول ايه ياريت كلنا نفكر الافكار دي والله قريب جدا هينصلح الحال ان شاء الله طول ما في ناس جميله كده
احترامي وتقديري ليكي وكل الناس الحلوه دي بجد
بوسه كبيره لصاجبه الفكره
ربنا يحميكي

mony said...

فعلا فكرة ممتازة


رتبي الموضوع و احنا ان شاء الله معاكي



جزاك الله خيرا يا جميل

~*§¦§ Appy §¦§*~ said...

داليا انا سرقت البوست وحطيته فى بيكيا وش بيطلع دماغه من العربيه

سمكه واحده said...

انا علقت ومعرفش التعليق فين
بس بجد جزاكي الله كل خير
ووحشتيني
بس انا زهقانه ومضايقه ومش عارفه ايه هيحصل في الدنيا ايه اللي بيحصل في غزه وفي مصر وفي ايه؟؟؟؟؟؟؟
بجد في ايه اول السنه الجحديده!!!!
الله يحرقهم اليهود

كيكى said...

انتى دايما جميلة اوى كدة**
طب هاتى بوسة بقى
عوووووووووووووووووو

Anonymous said...

دوما افكاركم بناءة وخلاقه واتمني ان تسمح لي الفرصه للمشاركة

عبد الجليل

AhMeD RaDy said...

مع غزة .. ولو باضعف الايمان

بسم الله الرحمن الرحيم

شارك

بدعاء واحد

فى

صلاة الفجر ليوم الاربعاء القادم

31-12-2008

وصيام الخميس تطوعا

1-1-2009

وومن said...

دودو

ماشاء الله علي افكارك ايه ده حلوة قوي
فكرة بمليون جنية قصدي بمليون كتاب

بس لا اخفيكي سراً كله الا كتبي مكتبتي دي بعتبرها كنزي الغالي

علشان كدة إن شاء الله هاخد طرق اني اشتري الكتب

تحياتي لقلبك الرائع

AhMeD RaDy said...

اشتركوا معانا يارجالة .. وقولوا يارب

وانشر الفكرة

مع غزة .... ولو باضعف الايمان


http://yallaqalb.blogspot.com/2008/12/blog-post_9396.html

صحفية روشة said...

انا كنت بعشق قرايه القصص وانا صغيرة اوى
ولحد دلوقتى
لان من شب على شئ شاب عليه
انما الكبار اللى متعودوش يقروا فى الصغر
لايمكن يقروا فى الكبر
تحياتى

meshmesha said...

فكرة جميلة احييكى عليكى
ويارب اقدر اشارك معاكو باذن الله

قوس قزح said...

المفقوعة مرارتها

احنا كمان بنكون سعداء بمشاركتك الدايمة معنا انت و اخواتك ..و طبعا فى اماكن بتهتم بمحو امية اولاد الشوارع و بتكون تبع الجمعيات الخيرية المسئولة عن المناطق دى .زبس الهدف من المكتبة اللى هنعملها مش محو الامية اللى هى القراءة و الكتابة و لكن محو امية الثقافة عموما

اسعدنى مرورك

قوس قزح said...

romansy

دى حقيقة فعلا فى كتب كتير بنرمها مع ان غيرنا كتير بيكون محتاجين الكتاب ده علشان يدرسوا فيه خصوصا لو كتاب مدرسى او جامعى
همتك يا بطل بقى تجمع لنا الكتب دى

تحياتى

قوس قزح said...

صبرنى يا رب

ياريت بجد تقدرى المرة دى تيجى .. هتكون اجازة نص السنة بدات يعنى مفيش حجة
و هاتى الولاد معاكى لو تحبى

و بعدين انا كوتى انا ؟؟
هههههه انتى فظيعة

انتى كمان وحشتينى يا كميلة

قوس قزح said...

موناليزا

هنحاول نشوف مكان فعلا امين
و لو عندك مكان ياريت تقترحيه علينا

نورتينى

قوس قزح said...

sherin

ايوه كده فى ناس خلاص بقى مشاركتها مفيش فيها تفاهم زى حضرتك كده :)

تحياتى

قوس قزح said...

جنى

ان شاء الله تجمع يوم الاربع نقدر نعمل فيه حاجة و لو بسيطة تساعد اهل غزة

و ياريت تشارك فيه
تحياتى

قوس قزح said...

مصطفى زهران

و الله احنا بنعمل كل شىء ممكن للمساعدة بس يمكن حضرتك مش بتزور كل المدونات
عموما لوتحب انت تشارك معنا تعالى يوم الاربع مستشفى الهلال الاحمر

قوس قزح said...

مسدس صغير

اشكرك على مرورك و تشجعيك
تحياتى

قوس قزح said...

kochia

و احنا فى انتظار محاولاتك للمشاركة معنا
هتنورينا

تحياتى

قوس قزح said...

سمكة واحدة
ربنا يخليكى و ميرسيه على البوسة الحلوة
بس مستنية اخدها منك بجد يوم التجمع
ياريت تحاولى تشاركى معنا

تحياتى

قوس قزح said...

mony
ان شاء الله هحاول يترتب كويس
و هيسعدنى طبعا وجودك معنا

تحياتى

قوس قزح said...

appy

هو انتى كنت كل ده لسه مش اخدتيه ؟؟
يا بنتى اومال لانا قلت لك ليه انا نزلت بوست روحى
معلش معلش .. انا عذراكى بس علشان النحلة و الدبور اللى مش سايبينك اليوم دول

قوس قزح said...

سمكة واحدة
و الله كلنا مضايقين
و كفاية الصور اللى الواحد بيشوفها للاطفال و هم مقتولين و مجروحين

ربنا ينتقم منهم

قوس قزح said...

كيكى
و انتى دايما بتخضى الواحد كده
طيب خدى البوسة تانى

مووووووووه

قوس قزح said...

عبد الجليل

اشكرك على كلامك الرقيق
و اتمنى المرة دى تقدر تشارك
لانها هتكون اجازة نص السنة

تحياتى

قوس قزح said...

AhMeD RaDy
ان شاء الله هنحاول نشارك فى المساعدة يوم الاربع
ياريت تشرفنا بالمشاركة

تحياتى

قوس قزح said...

وومن

انا مختارة الوقت ده علشان هيكون فى وقت معرض الكتاب
يعنى ممكن تشترى كتاب من المعرض و بتكون اسعارهم رخيصة و تبدا من 2 او 3 جنيه لو كل واحد جاب كتابين هنعمل مكتبة كويسة اوى

نورتنى يا قطتى

قوس قزح said...

صحفية روشة
ماهو علشان كده احنا اختارنا السن الصغير علشان نعوده على القراءة

تحياتى

قوس قزح said...

meshmesha

اشكرك على تشجعيك
و اتمنى مشاركتك معنا

تحياتى

حسام شعبان said...

أنا أول مرة أدخل علي المدونة,
وبجد حاسس انها مختلفة ورائعة
وأفكارك حلوة وجميلة وربنا يكرمك
-----------------------------
أنا عندي مدونة وبكتب فيها ملخصات للكتب اللي بقرأها, عشان الناس اللي معندهاش وقت تقرأ.وعشان يحصل تبادل ما بيننا وبين بعض في المعلومات بصورة أوسع وأكبر.
يا ريت تشرفوني وتقولولي ايه رأيكم فيها
http://nazramokhtalefa.blogspot.com/