هات كتابك القديم

زمان فى المدرسة كان من اهم النشاطات اللى بحبها ان مدرسة الفصل تقول هنعمل مكتبة فى الفصل صغيرة و نشارك فيها بكتب و نتبادل الكتب والقصص مع بعض و كان من حقى استعير الكتاب لمدة اقصها اسبوع و ده كان بيشجعنا اننا كل اسبوع ناخد كتاب جديد

و لانى حاليا معنديش وقت للقراءة بالرغم من وجود كتب جديدة نفسى اقرها ..اكتشفت ان فعلا اكتر وقت كان الواحد بيقرا فيه هو من سن 9 سنين لحد دخول الجامعة

و من هنا جات لى فكرة الخير اللى جاى

ان فى اطفال فى السن ده ممكن لو اتوفر لهم الكتاب يقدروا من خلال القراءة يصقلوا شخصيتهم و يوسعوا خيالهم و ينموا موهبتهم .. لكن مش كل الاطفال بيتوفر لهم الكتاب و ده لان تمن الكتاب لهم ممكن يكون تمن وجبة او تمن دوا

علشان كده .. المرة دى هيكون تجمعنا ثقافى ...ازاى ... يعنى كل واحد عنده كتاب قراه و مركون على الرف او قصة جميلة يحب يوسع بها خيال غيره او حتى مجلات اطفال تضيف بسمة على وشهم .. يحضرهم علشان يشارك بهم معنا فى يوم المكتبة ..

اليوم ده هنروح لمكان فيه اطفال ايتام او مكان بيوفر محو الامية لاطفال الشوارع .. و نعمل رفوف مكتبة و نحط عليها الكتب و المجلات و نكون حريصين ان المكان ده يكون متواجد فيه الشخص المناسب انه يكون امين المكتبة علشان يقدر يحافظ عليها

اختيارى للمكتبة لسببين

الاول حديث الصدقة الجارية ..علم ينتفع به

التانى اننا نشارك فى مساعدة الاطفال على تنمية شخصيتهم و متكونش مساعدتنا لهم بس مادية

يمكن فعلا هم محتاجين المساعدة المادية و العينية علشان يتوفر لهم عيشة ادمية .. لكن فى نفس الوقت هم محتاجين يندمجوا مع المجتمع اللى حواليهم و يتعرفوا على ثقافات تانية و يتعلموا ازاى يشاركوا فيها و ده مش هيحصل غير طريق حاجتين القراءة او الاحتكاك الفعلى من خلال شغل او دراسة .. و اعتقد ان القراءة هتمهد الطريق لبر الاندماج ده

مهمتكم التانية المرة دى غير انكم تشاركوا بحاجة .. هى انكم تساعدونى فى البحث عن المكان المناسب لعمل المكتبة دى

ممكن ملجأ ..او دار تربية ..او فصول محو امية ..

المهم ان يكون الاطفال فيها فى سن القراءة

و ان شاء الله هحاول ان يوم المكتبة دى يكون فى ايام معرض الكتاب ..لسببين الاول ان سهل اى حد رايح المعرض انه يشترى كتاب او قصة باسعار كويسة . و التانى ان الاطفال يحسوا انهم شاركوا فى المعرض بطريقة ما حتى لو كانت الكتب راحت لحد عندهم

فى انتظار ارائكم و اقتراحتكم

ملحوظة : خيخة انا كده حجزت شهر يناير علشان الاتفاق ان كفاية يوم واحد فى الشهر للخير علشان ميكونش صعب على الناس

ملحوظة تانية : اللى مش هيقدر يشارك بكتب او مجلات ممكن يشارك بادوات مدرسية يعنى اقلام او الوان او كراسات