مفروسة.. بتنجانى.. هستلفكم

تحديث

يا جماعة من تعليق الاخت العزيزة دريم عرفت ان اللى العريس اخده مش الاندروير لكن استيك بيتحط على الرجل اسمه جوتيير ..بس مع ذلك انا مش فاهمة ايه معناها انه يعرى مراته علشان ياخد استيك من رجلها و يحطه فى الويسكى و يشرب منه و يهديه لواحد من اصحابه .. حتى لو دى تقليعة من تقاليع بره ..مينفعش ابدا تكون من عاداتنا فى العالم العربى كله سوا مسلمين او مسيحين

فى حديث تليفونى عن اللى يصح و الى ميصحش فجاة اتقالى قوس قزح اشترى جريدة صوت الامة و شوفى اخر صفحة و بعدين كلمنى

انا اسأل ليه طيب فيها ايه .. لازم تشتريها و تقرا الاول و بعدين نتكلم

انا انزل اشترى جرنال !! .. ده الجرنال بيكون مرمى فى البلكونة و اكسل اقوم اجيبه .. ده انا مقاطعة الجرايد من ايام العبارة الغرقانة و القطار المشتعل و الاتوبيس النايم على جنبه ( كنت غاوية صفحة الحوادث ) .. بس الفضول مسبنيش غير اما اعرف صوت الامة دى فيها ايه

و فعلا نزلت جيبت الجرنال و انا واقفة عن الرجل قريت الخبر

لاقيت كل الفرسة بتاعت مفروسة بتنط من عيونى و ودانى و صرخت يالهوووووووووووووووى

و كل الخرفان و الجديان بتوع آبى بتنجانى قدامى و ابو وردة هيتحدف فى وش اى حد هيكلمنى

و كل الوان قوس قزح دخلت على بعض و بقت غيوم رعدية

ليه بقى .. لان زمان ليلة الدخلة فى بعض القرى و المناطق الشعبية كان لازم يخرج للناس منديل الشرف و بالرغم من وحشية الموضوع و كسفته الا كنت بقول لنفسى يمكن هى دى الطريقة اللى تخرس لسان الناس و تثبت ان البنت شريفة و يمكن نوع من انواع اثبات الرجولة

لكن ان العريس فى الفرح و وسط الناس و الفيديو بيصور و قناة فضائية يدخل تحت فستان العروسة و يقلعها ملابسها الداخلية ببوءه و ياخده و يحطه فى كاس ويسكى و يرقص به و يرمه زى بوكيه الورد كده لاصحابه الولاد و اللى يمسك الاندر وير ياخده العريس بالحضن و يتصور معاه للذكرى المهببة دى .. ده معناه ااااااااااايه

بيثبت ايه البيه لما يعمل كده مع مراته و يهدى اندرويرها لرجل تانى ؟؟

و لما يمسكه و يرقص به زى ما كانوا بيرقصوا بمنديل الشرف زمان ده يعنى اثبت ان الكتكوتة اللى ميتة من الضحك و هو تحت فستانها و بيقلعها خضرا الشريفة مثلا ؟؟

ولا يعنى خلاص الناس دول كده شيك و عدوا حاجز التخلف العقلى و الاخلاقى و بقوا عايشين الحرية صح ..و ممكن نلاقى ولادهم فى فرحهم بيدخلوا على العروسة فى الفرح نفسه بقى عادى و ممكن يشارك معاه المعازيم

انا مش دمى محروق لا انا خلاص من الغيظة بقيت عاملة زى النيجاتيف بتاع الصور المحروقة

و من موقعى هذا اقول انتم كنتوا مستغربين على ام فتحى اللى عند اسامة عبد العال علشان فاتحة مكتب جواز شرعى لرجال الاعمال و العرب فى العشوائيات .. طيب ايه رايكم فى ام كيكى اللى جوزت ميمو لفوفو اللى فاز باندرها توتو عضلات و اتصورا كلهم على قناة الجرس الفضائية و معهم الاندر ابو ترتر

فعلا جاتها نيلة اللى عايزة جواز