Thursday, February 19, 2009

رحلة لارض الفيروز

من اجمل الاراضى المصرية هى مدينة شارم الشيخ و دى مش اول مرة لى لزيارتها و مع ذلك كل زيارة يزداد انبهارى بها و فى نفس الوقت فى حاجات تمنيت ان تتغير بها




من الحاجات التى عجبتنى وجود رجل قدام كل فندق مسئوليته يعدى الناس الشارع .. و ده طبعا علشان الاجانب مش متعودين على سواقتنا الجميلة اللى مش بيفرق معها اشارات عبور المشاة ولا علامة هدى السرعة





السوق مستغلين فيه جزء من الجبل و عاملين عليه كافيهات و شلالات و استيدج صغيرة بيتقدم عليها عروض من الفولكورللناس مجانا





انتبه لعدم القاء قمامة فى الطريق فهو مراقب والغرامة 300 جنيه .. دى اول لافتة قاريتها اول ما دخلت المدينة و فعلا كانت فى كاميرات مراقبة على الطريق ..المدينة فعلا نضيفة جدا ..عقبال باقى مصر




معاملة المصريين للاجانب فيها شياكة جميلة ..بمعنى انها معاملة بمنتهى الود بدون استظراف ولا فضول ولا فهلوة




التعاون بين الناس الشغالة هناك ..من ابسط الامور زى الفلوس الفكة ..لحد التنويه على الخدمات الموجودة فى اماكن تانية ممكن الواحد يستمتع بها .. يعنى الناس هناك تحس انها عايزة الكل يشتغل كويس و يكسب و بيساعدوا بعض فى ده .. حتى لو الزبون مش بتاعه بيساعده برضه و ده حسيته لما تاه مصرى فى السفارى من الجروب بتاعه و اخده جايد جروب تانى يكمل معاه السفارى عادى و قاله كلنا هنا واحد متقلقش


بس كالعادة للاسف الحلو ميكملش مش عارفة ليه



كان فى عيوب برضه لاحظتها زى المعاملة بين البائع المصرى و الشارى المصرى .. الشارى شايف البياع نصاب و بيبيع بالغالى ..و البياع شايف الشارى شايف نفسه فهلوى و هيفضل يفاصل و فى الاخر يمشى .. و لو بصينا للموضوع هنلاقى ان هناك لهم حق يرفعوا سعر الحاجات لان الايجار فى السكن و المحل غالى و الاكل و الشرب غاليين .. و بعدين انت رايح تشترى من شارم ..طيب ما عندك الخان تشترى منه ..مفروض الواحد ميشتريش الا الحاجات الضرورية و بس هناك



الاجانب لاقيت بعضهم اتعلم انه يكون غير ملتزم بالقانون خصوصا انه بيشوف المصريين غير ملتزمين و سمعت اكتر من اجنبى بيطلب حاجة مش من حقه سوا فى الفندق او فى الرحلة البحرية




الاسعار هناك نوعين نوع للاجانب و دى بقى نااااااااار و نوع للمصريين و دى بقى ناار بس ..اظن مصر هى البلد الوحيدة اللى بتبيع على حسب جنسية الشخص .. مفروض سعر الحاجات يكون ثابت للاتنين ..يمكن بس الفنادق ممكن يحصل فيها ده لكن فى المحلات صعب


اخر حاجة بقى مش فاهمها هى الناس اللى بتنزل تقعد على البحر بلبس مش مناسب ابدا زى التاييرات و الكعب العالى و الكوتشى و البدل .. يا عالم رمل و ميه ازاى بس نلبس كده .. كل مكان له لبسه مينفعش اروح فرح بجينز و تيشرت و مينفعش اروح اقعد على البحر بفستان طويل بترتر و كعب عالى و 5 كيلو دهب



الافكار اللى عجبتنى اوى



الفاملى روم و دى اوضة مخصص فيها جزء صغير للولاد .. بدل ما الواحد ياخد اوضة واحدة دوبل و ياخد عليها سرير زيادة و ينام عليه الاطفال و بيكون سرير صغير .. او ياخد اوضتين و هنا بتكون صعب برضه ان الولاد يكونوا فى اوضة لوحدهم .. الفندق كان عامل اوضة فيها ركن صغير للاطفال و دى صورة الركن المخصص لها




اد ايه جميل و بسيط و مش متكلف فى نفس الوقت كتير



الطربوش المصرى بتاعنا استغلوه فى الاضاءة منها توفير تمن الشابوهات الغالية و فى نفس الوقت ادى طابع مصرى للاوضة



و دى صورته







منطقة الالعاب الخاص بالاطفال فى الفندق مش بس مجرد شوية مراجيح و حمام سباحة صغير لكن فيها كمان فصول صغير للممارسة الهويات و تعليمها زى الرسم و الاشغال اليدوية و الرقص و الايربوكس




فى دخلة الطريق لشارم عاملين تماثيل على جنب الطريق لبعض الحيوان اللى ممكن تلاقيها هناك فى الصحرا زى الجمال و الذئاب و الغزلان شكلها حلو اوى






طبعا مش هحكى على الجو الجميل و المناظر الرائعة اللى ربنا حابنا بها لان مهما قلت مش هقدر اوصف اد ايه هى جميلة



بس اللى نفسى اقوله ياريت نحافظ على بلدنا لانها فعلا جميلة

56 comments:

Mafrousa said...

الله يا دودو الله
جميلة شرم اشيخ
و محافظين عليها علشان الريس بيقيم هناك اغلب الاوقات
و بيعملو فيها مؤتمرات

هيه جميلة الصراحة جدااا و البحر تحفة

الفاميلي روم ديه لطيفة فعلا بدل ما الاهل تدبس فى اوضة تانية للاطفال

انا بقالى كتير مش رحتها الصراحة و نفسي اروحها
يارب تكوني غيرتي جو انتى و الاولاد

اه بالمناسبة
مبروك علي الفستان الجديد البمبي بتاع المدونة
ههههههههههه
ده بمناسبة ان الربيع على الابواب؟؟؟؟
:)
تحياتي ليكي

محمد حمدي said...

حمد لله على سلامتك يا داليا والحمد لله ان الرحلة كانت موفقه

ياترى نزلتى فى انهى فندق؟ والاسعار كام ؟ انتى عارفه انا شغال فى السياحه ويهمنى اعرف رأى العملاء فى الحاجات دى :) : ) :)

حمد لله على سلامتك مره تانيه وان شاء الله تقدميلنا تقرير جامد زى ده مع كل رحله ليكى

سلام

قوس قزح said...

واحدة مفروسة

و الله كان نفسى تبقى معايا هناك
كان عجبنى اوى جروب ستات بس بشوفهم كل يوم بيسهروا للصبح

قلت لو مفروسة و بتنجانى هنا و نلم بقى باقى الشلة رندا و صبرنى و حنين و كاميليا
يالهوووى كنا قلبنا شرم كلها
هههههههههههههههههه

اكيد لازم نعملها مرة


الله يبارك فيكى :)
عقبالك

قوس قزح said...

محمد حمدى

انت عايزنى اعمل اعلان عن الفندق الناس تقول انى باخد عمولة هههههههههههههههه

عموما يا سيدى هو اول حرف منه نوفوتيل :)

و بالنسبة للاسعار فالايام دى الاسعار نازلة جامد علشان السياحة حالها مش اوى

و بعدين بدام انت فى السياحة طيب ما تعمل لنا رحلة كده تكون كويسة و اسعارها معقولة

الله يسلمك و ميرسى على مرورك
سلام

!!! عارفة ... مش عارف ليه said...

استمتعت بالرحلة معاكي وعينك ماشاء الله كانت حلوة في ملاحظة كل حاجة
موجودة هناك ومفيدة الملاحظات دي لأي حد ناوي يروح ،



الرحلة واضح انها كانت لطيفة وتجديد لنشاطك وواضح تأثيرها على البلوج



تحياتي
وليد

همس الاحباب said...

رحلة موفقة
واجازة سعيدة
ويارب تكونى انبسطتى انتى والاولاد
ويارب نشوف مصر كلها كده زى شرم الشيخ
تحياتى

dreem said...

حمد الله على سلامتك ويارب دايما تقضى وقت سعيد
يمكن الفرق اللى بينى وبينك ان دايما عينى بتقع على الحاجة المش ولا بد ههههه
تفتكرى دى عقد ولا بسبب السن ؟؟
عالعموم يارب دايما تستمتعى بوقتك وتشوفى اللى حواليكى جميل
كل التحية

dodda said...

انا مبسوطه اوى من البوست يا داليا

اولا انك اتفسحتى
ثانيا مصر حلوه ولسه فى عيون حلوه عشان تشوفها
واكتر حاجه عجبتنى الغرامه
ده موجود بره
وهنا لو اتعمل الدنيا حتختلف كتييييير

المشكله الناس بتستخسر تعمل اى حاجه تحلى الدنيا

*البت المشمشية *حلوة بس شقية * said...

يا بختك يا دودو
اخس عليكى مخدتنيش معاكى ليه
كان نفسى اروح شرم اوى

ahmed_k said...

حمدالله على السلامه
وإن شاء الله تكونوا إستمتعتوا اوي بالرحله
وفعلا شرم الشيخ مدينه رائعه
وجميله جدا وتم إختيار موقعها بعنايه
فهي ذات جذب سياحي عال وذات موقع يسهل تامينه لذلك يقيم فيها الرئيس بصفه شبه دائمه ويعقد بها معظم المؤتمرات الرئاسيه
ولكن التواجد والتضييق الأمني الكثيف بها يعطيها طابع المعسكرات بحيث لا يتمكن أي مواطن من الدخول إليها

عموما هي قطعه جميله من أرض مصر
نتمنى أن تكون نموذجا في نظافتها وتخطيطها لباقي مدننا

خالص تحياتي

عايش... ولكن !!!! said...

شرم الشيخ
يعنى لازم تكون كده
انا زورت الغردقه
لسه ان شاء الله المره الجايه شرم
واديكى عرفتينى كتير عنها

صوت من مصر said...

جميل جدا

محمد فارس said...

السلام عليكم
زيارتي الاولي للمدونه الجميله
بأقول لحضرتك ايه انا كان نفسي اروح شرم الشيخ لكن تقريبا الشيخ مش راضي اروح شرمه لكن فكرت اروح غصب عنه بعد ما سمعت وصفك الجميل لارض الفيروز لكن خوفي احسن الجماعه اصحابنا اللي هناك يقولولي اوعي تدوس علي الارض بجزمتك احسن احسن تدهولها او حتي تتنفس علشان ما تغيرش من طقسها الجميل قوليلي هو ممكن حد من شبرا يروح هناك ولا ممكن يرحلوه انا باهزر اوعي تصدقي المكان الوحيد في مصر هو اللي ما رحتهوش هو شرم الشيخ بلدنا جميله جدا جدا بس ياخسااااااااره مش لينا اسف علي الاطاله مع تمنياتي لك برحلات سعيده تملاء حياتك بهجه وسرور

رئيس جمهوريه نفسى said...

نسيتى تضيفى انى شرم الشيخ هي العاصمة السياسية لمصر حاليا كمان انا بصراحة ما رحتش شرم قبل كدة بس بثق فى رائيك

مبروك النيو لوك

ميرا ( وومن ) said...

ايه ده انا مش شايفة نفسي معزومة علي شارم يعني

ماشي ماشي هاروح لوحدي مش هاقول لحد :P
ههههههههههههه بهنزر
عموما أجازة سعيدة سحرتينا بأرض الفيرزو

Empress appy said...

ابقى احجزى ليه فى بتاعت الاطفال دى او سمحتى المره الجايه
بس يا دوللى المصريين بياخدوا خصم 50% اى والله فى كل حاجه يعنى فى الاسبا اخدت كده والشاى ولاوزمه اخدت كده برضه طبعا عارفه ايه لوازمه هههههههههه
ايوه النعناع يعنى
رحله سعيده يا قمر

محمد عتلم said...

جميله اوى شرم الشيخ

موناليزا said...

فعلا بلدنا جميلة اوى
عجبتنى برضه طابا جدا رغم احساسى ان المصريين فيها غرباء من نظرة الاجانب لنا

قيس بن الملووووح said...

رحله سعيده وربنا يجعل ايامك سعيدة
زورينا نسعد بك ونستفيد من رايك

قوس قزح said...

عارفة مش عارف ليه

ميرسى على كلامك يا وليد
و اى حد هيروح هناك صدقنى هتلقط عينيه جمال صعب ميتشفش

تحياتى

قوس قزح said...

همس الاحباب

الحمدلله كانت رحلة جميلة و كان نفسى بصراحة تكون اطول من كده
بس ظروف الشغل بقى الحمدلله

قوس قزح said...

dreem
الله يسلمك يا جميل
لا ما انا كمان شوفت اللى مش ولابد

سن ايه ؟؟ هى مش لسه الممرضة قايلة لكى يا انسة ؟؟
هههههههه
ميرسى على زيارتك الغالية
و سلامى للبنوتات

قوس قزح said...

dodda

مصر فعلا جميلة و بردو ناسها جميلة
بس معرفش ليه هم مش لاقين على بعض

يعنى مصر من غير ناسها حلوة و المصريين من غير مصر حلويين

تفتكرى احنا زى ميه البحر و النهر !!!

قوس قزح said...

مشمشية الحلوة و الشقية

متزعليش يا ستى المرة الجاية هاخدك معايا
بس انتى جهزى نفسك لاى وقت نروح سوا

قوس قزح said...

ahmed_k
كلامك صح يا احمد فعلا البلد مهتمين بها اوى و يمكن كمان اكتر من الغردقة
بتمنى بس الاهتمام ده يدخل فيه مدن جديدة لان فى كل مدينة سحر خاص

تحياتى

قوس قزح said...

عايش .. و لكن

اهلا بك
و ان شاء الله تزوها وتعجبك

Diyaa' said...

مبروك الخلفية اللطيفة للمدونة
بقيتي بتتكلمي ياباني باين :))

أرض الفيروز...هممم لما روحت مرة واتعاملت معاملة مش لطيفة من الأمن
وكمان لقيت إن في سياحة صهاينة هناك
جالي إحباط بصراحة

بس هو المكان جميل فعلاً..يعتبر من أجمل المدن في مصر وزي ما مفروسة قالت
عاملين لها مقام عشان زعيم العصابة بس

وعشان طبعاً الأجانب مش عشان المصريين

هممم مش عاجباني نقطة بس

يعني يا داليا..الناس بتمشي بكيني وبتمشي بتعمل اللي ما يعمل علي الشط ومن غير شط هناك..حرية نصف مطلقة..فخلاص بقي اللي يلبس ترتر أو تايير أو عباية أو حتي لبس تنكري

براحته ..هو لو بيضر عينين الناس..خلاص الناس مش هتبص..وأعتقد إنه بكده مش بيغضب ربنا كمان..مفيش أي شبهة في الموضوع غير إنه مش ملائم للمكان..والقواعد بتاعة المكان دي قواعد وضعها بشر..ممكن تتغير يعني الدنيا مش هتخرب
واللي بيدفع بيروح..مش متحددة بزي معين

فبراحتهم بصراحة زي اللي بيلبسوا بكيني أو من غير هدوم بيكونوا براحتهم برضه ومحدش بيعرف يقول تلت التلاتة كام



المهم إنك اتبسطتي ..ويا رب فعلاً يعرفوا يحافظوا علي اللي فضل من البلد يتحافظ عليه :)

وحمد الله علي السلامة

Anonymous said...

عجبتنى قوى ناااااااار ونااار بس للمصريين

أرض الفيروز رائعة ولكنى لم اكن ادرى انها تزداد روعة مع الايام

... وكمان

حمدلله عالسلامة

قوس قزح said...

صوت من مصر

اشكرك

قوس قزح said...

محمد فارس

لعلمك يا محمد احلى حاجة فى شرم ان اغلب الناس المصريين المقيمين فيها و بيشتغلوا هناك انهم اغلبهم من جونب مصر و مع كده تمكنهم من اللغات التانية قوى جدا

شرم عمرها ما هتكون كده غير بالمصريين

مش مهم انت جاى منين .. المهم انت هتعمل ايه هناك

تحياتى

قوس قزح said...

رئيس جمهورية نفسى

لازم تروح و يكون لك مقر هناك كمان .. هو انت اقل من اى ريس ولا ايه

ميرسيه :)

قوس قزح said...

وومن

هو انتى فاضية تشوفينا .. انت على طول مشغول يا جميل

بس كده لازم نعمل رحلة جماعية لشرم لان واضح ان كتير معجبين بها

قوس قزح said...

appy

لا يا حبيبى انا بتكلم عن حركة البيع و الشرا و كمان الرحلات

مفروض سعر الحاجة واحد مش حسب جنسية الزبون

و ان كان على الاوضة هحجزلك واحدة مع نور :))

قوس قزح said...

محمد عتلم

ناقصها بس العدسة بتاعتك و هى تزيد جمال

على فكرة صورة الاوضة تلات لقطات و انا جمعتهم فى واحدة .. ايه رايك ؟

قوس قزح said...

موناليزا

و الله انا سالنى واحد من البياعين هناك و قالى هم ليه فى مصريين كتير قلت له اجازة نص السنة .. قالى يارب تخلص و لما سالته ليه ماهم هنا علشان السياحة تتحرك قالى دول مش زباين دول غاويين يفصلوا و بس احنا مش بنستفيد بوجودهم لكن الفنادق ممكن

يعنى حتى اهل البلد شايفين ان المدينة لازم تكون للاجانب

قوس قزح said...

قيس بن الملووح
اشكرك على الزيارة
و ان شاء الله هكون فى زيارتك قريب

قوس قزح said...

Diyaa'

ليه اخدت كلامى على انه المقصود به الحشمة او غير الحشمة و التعرى او لا

انا اقصد المناسب للمكان و قلت الاتى
يا عالم رمل و ميه ازاى بس نلبس كده .. كل مكان له لبسه مينفعش اروح فرح بجينز و تيشرت و مينفعش اروح اقعد على البحر بفستان طويل بترتر و كعب عالى و 5 كيلو دهب


مش معنى كلامى ان بدعو للذهاب بالبيكينى ولا الشورت بس فى حاجة اسمها اقطان و كتانات و فى منها العريان و الغير عريان و فى حاجة اسمها جزم ميه و فى شباشب بلاستيك

و على فكرة انا مشوفتش اى واحدة اجنبية رايحة بصندل عالى و لا حتى بادى حملات بترتر مع ان ده لبس هم بيلبسوه بس فى اوقات تانية

المشكلة فى اننا مش بنعرف نلبس ايه امتى و فين
مش ابدا فى ان كل واحد يلبس اللى على مزاجه بقى بدام فى حد قالع هدومه.. النزيه نزيه حتى لو وسط ناس غلط فى كل حاجة

بالمناسبة
الحمدلله مش صدفنى هناك اى معاملة مش لطيفة من اى حد لا امن و لا غير امن
بالعكس الكل بيعامل الناس باحترام


الله يسلمك

قوس قزح said...

sherif

طبعا عجبتك لانك من عشاقها :)

اكثر من رائعة يا شريف .. بس الاروع منها الاماكن هناك اللى لسه بكر

و الله يسلمك :)

ميرا ( وومن ) said...

اممممممم ماشي يا دودو كلها كام شهر وإن شاء الله افضالكم علي طول
:))

وإن كان علي الرحلة الجماعية اوكي انا موافقة انتي اعملي إعلان عندك علي المدونة وجمعي الناس وانا اظبتكم واجيبلكم ديسكونت محصلش
بس اعرفيلي الأول هايطلعوا اتوبيس ولا طيران ولو اني أفضل اننا ناخدها بالعجل في مارثون أحسن وارخص

ههههههههههههههههههههههههههههه

عالم ماريونت said...

الله عليها شرم
بجد نفسي اروحها وكمان اروح الاقصر واسوان
ربنا يكتبهالي
بوست لذيذ
ربنا يوفقك دايما
تحياتي
رنا

الـسـيـدة نـون said...

دودو بالله عليكى يا شيخة
لا تقوليلى اسم الفندق ايه اللى كنتى نازلة فيه
لان انا عاجبانى جدا حكاية الفامليى رووم دى

هل دى موجوةدة فى كل الفنادفق الى هناك
ولا الفندق الى انتى كنتى فيه بس؟



واجازة سعيدة عليكى يا جميلة

سلام
اختك خيخة

عين فى الجنة said...

حمدا لله على السلامة

صفــــاء said...

.
جميل وصفك جدا لدرجه انه رسم صورة
كمان الصور اللى حطاها حلوة اوى
انت كدة عامله دليل سياحى من الطراز الاول للدعايه لبلدك
بس معلش السلبيات دى بقت جزء من طبيعتنا
بس الناس اللى بتقعد على البحر لابسه تايرات وكعب عالى وخمسه كيلو دهب دول ممكن من فضلك العنوان بس
يمكن الواحد لو حب يروح هناك يومين يجيب مصاريفه
.

ahmed_k said...

يا داليا لالالالالالالا
الغردقه دي حاجه وشرم حاجه تانيه خالص
تيجي أيه شرم جمب الغردقه
الغردقه القمر وشرم النجوم
الغردقه مدينه ليها ناس وحياه ومجتمع لكن شرم بلد زي المعسكر مخصصه للشغل وبس أو سياحه وبس غير هنا الحياه ليها طابع مختلف خالص
وأهو خلال أزمة السياحه وحادثة الحسين
حتلاقي شرم الشيخ شبه بلد ميته
بعكس الغردقه ممكن تفقد السياحه كمرفق لكنها لا تموت ههههه

Tamer Nabil Moussa said...

شرم الشيخ جميلة

وزى ما فى مميزات فى عيوب وسلبيات اتمنى زيك انها تختفى

رحلة سعيدة ليكى ولااسرتك الكريمة

تحياتى

صيدلانيه طالعه نازله said...

تخيلى انا رحت معظم اماكن مصر بس مروحتش شارم انشاء الله نروح قريب
انا باتفق معاكى فى موضوع توحيد الاسعار و الالتزام لان احنا بالتزامنا حندى صوره حلوه للبلد و نخلى اللى جاى من بره يلتزم زينا و اكتر كمان

doaa said...

يااااه بجد شوقتيني قوي إني أزورها
أنا مرحتش قبل كده خالص بس نفسي أروح
وصفك جميل قوي بجد بلدنا حلوة قوي

تحياتي

قوس قزح said...

وومن
و احنا مستنينك اما تفضى و نعمل الرحلة ههههههههه

قوس قزح said...

يوميات نائمة فى الارياف

ان شاء الله تروحى
انا روحت الاقصر بس اسوان لسه
تعالى نروح سوا :)
نورتنى

قوس قزح said...

بنت خيخة و اى كلام

فندق نوفوتيل يا خوخة و ده سبب اختيارنا له
و مش عايزة اقولك ان هناك حمام السباحة بيدفوه علشان يكون مناسب للاطفال بس الميه تكون فاترة و فيها اماكن و حفلات للاطفال اكيد شريف هيكون مبسوط هناك
فكرى فعلا فيها الحكاية دى انتم محتاجين تغيروا جو

قوس قزح said...

راجى

الله يسلمك ..عقبالك :)

قوس قزح said...

صفاء

اولا نورتنى :)
ثانيا شرم احلى كتير من وصفى لها
ثالثا استنى بقى للموسم الجاى لان دلوقتى مفيهاش مصريين ممكن تيجى القاهرة و تدخلى اى عزاء و انتى تلاقى نفس كيلوهات الدهب هههههههه

قوس قزح said...

ahmed_k

هههههههههههههه ده تحيز واضح جدا جدا جدااااا
بس بصراحة انا اللى عجبنى فى الغردقة هى الجونة
و يمكن الغردقة شغالة طول السنة لانها مدينة سكنية اكتر منها سياحية
مش لانها احلى يا احمد يا متحيز :))

قوس قزح said...

Tamer Nadil

ياريت فعلا العيوب تختفى بس صعب لان اغلبها عيوب نتيجة ثقافة شعب و دى بتاخد سنين علشان تتغير

ميرسى لزيارتك
تحياتى

قوس قزح said...

صيدلانية طالعة نازلة

الاوحش من كده ان دليل السياحة اللى جيه به السائح الاجنبى من بلده بيقوله ان فى مصر البياعين و سواقين التاكسى بيزودوا الاسعار على الاجانب فلازم تفاصل معهم ..يعنى سمعتنا بقت وحشة اوى
نورتنى بزيارتك

قوس قزح said...

doaa

ان شاء الله تروحى
شرفتنى بزيارتك الاولى :)