Sunday, May 17, 2009

شرنقة




احتضنت قلبها براحة يديها

و هو يبكى من الفراق

لتضعه داخل شرنقة

صادرة الحكم عليه بعدم الخروج منها

مهما كان



و سارت رافعة الرأس

وهى فخورة بأنها لا تملك الا العقل

فيثنى على عقلها الكثيرين

و يتمنى ان يلمح قلبها اخرين



حتى اتى هو

سار بجانبها يحكى لها

و يتسلل لعقلها بصراحته

و هى تجرى خلفه

حتى تستمع لحكاياته

ناسية انه يتجه الى اعماقها



حتى سألها فجأة بهدوء

اسمحى لى
ان ارى ما بداخل تلك الشرنقة

ترددت

ثم وافقت



لمس قلبها المهجور

فانتفض قلبها

و تفتح مثل زهرة التيوليب

ورقص كبلارينا صغيرة



و ادركت وقتها

انه ملك قلبها

و انها اصبحت مرة اخرى اسيرة



تملكها الخوف

وسقطت فى بحر من الحيرة
اتترك جناحى قلبها
للحياة كالبترفلاى

ام تدخل مرة اخرى الشرنقة

قبل الم الفراق

53 comments:

عمرو said...

هل الخوف من الفراق و من ألمه و من بكره و ما يحمل من مفاجآت كتبتها الأقدار من الممكن أنه يخلينا نفضل الاٍختناق داخل شرنقه على خوض التجربه ؟؟
يجوز أيوه و يجوز لأ و لكن التجربه نفسها تستحق المحاوله ..
تقبلى تحياتى و تقديرى ..

همس الاحباب said...

احساس
مشاعر
تجربة
والاصعب الاختيار
ان نظل احرار ام ندخل الشرنقة
مع الاسف الاختيار واضح
دخول الشرنقة
تحياتى

Empress appy said...

انا هتفرج على التعليقات بس انتى عارفه احساسي بيه فعلا عامل ازاي تسبم ايديكى وقلبك يا رب
بس هم الاحباب قفلها اهو من اولها حسبى الله فى وينس وعياله ههههههههههههه

شمس النهار said...

اعتقد انها تسأل السؤال ده او لا
خلاص متأخر هي كده كده خلاص طارت
وبم انها فراشه فلابد ان تنتظر الاحتراق فهو قادم قادم
المقطوعه جميله جدا

صبرني يارب said...

دوووووووولي ايه الحلاوه دي ؟؟

اعتقد ان الشرنقه دي هى مش هاتستحملها العمل كله

يبقى تخرج دلوقتي احسن طبعا

تحياتي يا جميل على الكلام الجميل

Anonymous said...

ممممممممممممم
السؤال محير
الألم موجود فى كل الحالات
سواء داخل الشرنقة
او بسبب الفراق
مع اختلافه طبعا
و لكن من لمس هذا القلب المهجور -اللى المفروض ما يكونشي مهجور لان الحب موجود فى كل مكان مع كل الناس و الحب فى العموم يروي نبتة القلب دائما
-اذا كان سوف يعتنى بهذا القلب و يروى زهرة التوليب
و يجعل الفراشة محلقة دائما فأهلا بيه
اما اذا كان سرابا
فوجود القلب داخل الشرنقة احسن له و حماية له

الطائر الحزين said...

ساعات فرحة تستحق التجربة حتى لو عادت بالم فراق
===

Ehab said...

بصي يا داليا
هو البني ادم كده

يعشق حالة الحب
اتخلقنا مينفعش منحبش
تلاقي الواحد او الواحده واخد قلم لسه معلم في وشه والصوابع مرسومه عليه من قصه قديمه
وهوب يلاقي قلب جديد بيقرب منه غصب عنه تلاقيه بيجري ناحيته مستني يلاقي فيه تعويض ن العذاب اللي شافه

مع انه ممكن يكون اخد على نفسه عهود انه هيمشي بعقله بس
وان قلبه مش هيوقعه تاني

لكن غصب عنه حتى العقل الخاين العميل للقلب القلب يغمزله بس ويقوله سيب ده يعدي تلاقي العقل عامل فيها عبده العبيط وسايبه يعدي

وتلاقي العقل بقى متواطء مع القلب ويخليه يعدي
لأن حتى العقل عارف ان كلنا بشر ومحتاجين حد جنبنا يحبنا ونحبه

هي قررت تنسى قلبها بعد ما اتجرح في قصه قديمه
لكن قلبها بالتعاون مع عقلها دخلوا البرنس الجديد
مهما قلنا هنقف قلبنا هو غصب عننا بيفتح اوتوماتيكي


بس بجد حلوه الفكره بتاعتك قوي

تسلم ايدك

وسلامي لأحمد جوزك
ومالكيش دعوه بالجمعيه يا داليا انا بقولك اهو خلونا نتجوز بقى


كل سنه وانتي طيبه وعقبال ميت سنه صحه وهنا

سلاااااااااااااااااااااام
اخوكي ايهاب

Anonymous said...

أقول لهذه الجميلة

لاتدعى الخوف يلتهم حتى الساعات القليلة من السعادة التى تمنحها الحياة

فهى ان ذهبت .. لاتعود

ولايمكن لنا ونحن قادمون للتو .. أن ننشغل بالرحيل

أسعد الله أيامها بالا تعود لهذه الشرنقة

V.Hayat said...

ما اجمل الدخول للشرنقة فهى كالدنيا عندما تدخلها لا تعرف ما بداخلها الا لحظة الخروج

تحياتى

قوس قزح said...

عمرو

مش كل الناس بتقدر تستحمل الم الفراق
حتى لو كانت حلاوة مذاق الحب ليس لها مثيل


تحياتى

قوس قزح said...

همس الحباب

و فى حالة دخول الشرنقة
تظهر مشاعر اخرى

حزن
شوق
حنين
رغبة

تحياتى

قوس قزح said...

appy

زى ما فى رد همس الاحباب فى رد لاخرين

و الاهم ردها هى :)

قوس قزح said...

شمس النهار

تقدرى تقولى انها حلاوة روح :)

نورتنى بزيارتك

قوس قزح said...

صبرنى يا رب

ازيك يا جميل وحشتنى و الله

الخوف مش من الخروج من الشرنقة

الخوف من الجرح مرة اخرى و الرجوع للشرنقة بالم اكبر

تحياتى

قوس قزح said...

Anonymous...
ما انت رجعت فى الاخر للحيرة تانى

ازاى الواحد يقدر يعرف اذا كان الحب ده هيستمر ولا لا ؟؟
اذا كان اللى قدامه بيحمل له نفس القدر من المشاعر او على الاقل مش مجرد نزوة و انها حب حقيقى ؟؟

حيرة مش كده ؟

تحياتى

قوس قزح said...

الطائر الحزين

وساعات تذكر الم الجرح بيقتل الفرحة دى

بس انا معاك الفرحة تستاهل التجربة :)

قوس قزح said...

الشنكوتى الكبير

ماهو علشان كده الحب معليهوش سلطان
بيدخل القلب وقت ما يحب و يلعب بالمشاعر و يصحى الرغبات و يولع فى نار الغيرة
و فجاة تلاقى نفسك مسكون به

بس فى فترة كده صغننة اوى
تقدر تقول برهة
اللى هى وقت الانجذاب
لو العقل اشتغل فيها بطريقة مخالفة للقلب
ممكن فعلا يتغلب عليه

المهم
الجمعية بالنص
يا اما تعزمنى على الفرح

اختار انت بقى

و سلامى للعروسة و المعازيم لا :)

تحياتى

قوس قزح said...

sherif

الزهرة لكى تتفتح تحتاج لدفا الشمس
و الفراشة للخروج من الشرنقة تحتاج للنور

قد يكون قلبها يحتاج الاحتواء المغلف بالامان

اسعد الله ايامها بوجوده فيها

Ehab said...

بص يا عم الحاج
اعزمك اه
تنوريني
اقاسمك في الجمعيه اهو ده اللي لا ممكن ابدا
المثل بيقول يا واخد قوتي يا ناوي على موتي

العبي بعيد عن الجمعيه لحسن ابعت تلاته من البلد عندينا يخطفولك احمد وتقعدي من غير الأحمدات تبعك
وساعتها لا هتنفعك الجمعيه ولا غيره
والدهاشنه مبيعرفوش ابوهم
هاااااااااع

سلااااااااااااااااااااام
اخوكي ايهاب

Diyaa' said...

الإجابة بتعتمد علي ظروف أو وضع كل إنسان فينا..مفيش حلول مطلقة
ممكن الدخول للشرنقة يبقي أكثر راحة للبعض فينا ..
وممكن الخروج منها وفرد أجنحة الفراشة والإستمتاع بالجمال لوهلة مهما كانت العواقب هو الأكثر راحة للبعض الآخر

الموضوع نسبي في رأيي..والأهم إن الرحلة هي المتعة..مش لحظة التيقن والإطمئنان لأبدية المشاعر..يعني رحلة التسلل لعقلها والتوجه لأعماقها ومحاولات فتح الشرنقة هي المتعة الحقيقية اللي عمرها كان أطول..فممكن ببعض من القناعة نكتفي بهذا القدر..واللي بيفوت في الدنيا هيتعوض في الآخرة ..وممكن ببعض من الجرأة نكمل

بس يا ستي :) تسلم إيدك بقي

أنترنتاوي said...

بالتوفيق

يا مراكبي said...

صراع طبيعي بين القلب والعقل

ودايما الناس بتميل للعقل كأمان

لكن الطبيعة البشرية بتعشق الميل للقلب ودي طبيعة هوى الإنسان

---

أعتقد إنها هتختار الخروج من الشرنقة في الآخر

dreem said...

دا وجع قلب
حلوة الشرنقة نخلينا فيها احسن
انتى ازيك ؟

أم أحمد المصرية said...

اولا فينك من فترة وحشتينا
ثانيا تدوينة في منتهي الرقة
و السؤال في اخر التدوينة و كأنه اختيار بين ان تعيش الحياة ام لا
انا شخصيا اختار ان يعيش الانسان حياته مهما كان بها م الام فذلك افضل من السجن داخل الشرنقة و يظل القلب يسأل نفسه طول العمر يا تري كان حيحصل ايه لو كنت تركت نفسي اعيش
دمتي بخير

mahasen saber said...

دوللى كتبتى فأبدعتى
فنكشتى مخاوفى فوجعتيلى قلبى

وفوق ده كله الله ينور عليكى

وحشتينى قوى قوى قوى

عين فى الجنة said...

كلمات رقيقة واحساس عال

Mkjwe said...

جميل جداً

Anonymous said...

رائعة في منتهي الجمال

بس انا رائي تتفتح وتظهر جمال قلبها

لان اللي يلاقي فرصة بأنه يشوف الحياة جميلة من تاني
ويضيعها
هيعيش عمره وكانه نص ميت

ولو في إحتمال للفراق وخوف من المستقبل
فهنلاقي دايما مليون سبب يخلينا نخاطر ونتنازل عن احتمال الخوف وندي ثقة لغيرنا وندي لقلوبنا فرض تانية عشان تنطلق وتطير
وننسي اي احتمالات

وعلي رائ المثل الشعبي
اللي يخاف من العفريت يطلعله

يعني من الاخر كده خليها طايرة بلا شرنقة بلا غيرها

حد يلاقي فرصة بانه يحلق في السما من جديد ويظهر اجل ما عنده ويشوف اجمل ما عند غيره ويرفضها

فكرة رائعة
تقبلي مروري الاول
تحياتي

طارق هلال said...

يا صائد الفراشات
قلبى الذى فى يديك
يتردد فى حبك له
هل ستعذبنى على حوائطك القديمة
هل ستحبسنى فى علبتك الزجاجية
هل ستحرمنى أزهارى البرية
وترمي لى زهرات بلاستيكية
يا صائد الفراشات وقلبى أسيرك
لماذا اخترتنى
ألوانى ام حريتى
أم ندرة صبرى على السكون
وكيف اصطدتنى
على أفخاخ مضيئة أعمتنى
أم بغفلة منى عن حرصى

كيف آمنك وانت رأيت كل ضعفى
وكل مهاربى بيديك

Anonymous said...

تحول دراماتيكي في الاسلوب والصياغه أعشق ذلك الاسلوب في الكتابة
أعتقد ان نحتكم الي العقل افضل من الاحتكام الي العاطفه
احييكي جدااااااا
عبد الجليل

سبهللة said...

انا داخلة اقولك كل سنة وانتى طيبة

kochia said...

الحياة قرارت
وكل قرار له توابعه من سعادة وفرح او الم
وعليها ان تختار
هل هي مستعدة للخروج من الشرنقة مع احتمال كل ما يلي ذلك
ام لا

موضوع حساس اوي
تحياتي

الـسـيـدة نـون said...

شكرا يا دودو على القاعدة الجميلة بتاعة اخر اليوم

وكل سنة وانتى طيبة

قوس قزح said...

الشنكوتى الكبير

انا موافقة اتعزم بس بالجمعية :)

و بعدين انت عاي تخطف احمد ؟
لا لا لا كده الفرح بايظ يا رجالة و هعملك احلى كرسى فى الكلوب فيه
قال هاااااااااااع قال
طيب بخ
هههههههههههههههههههه

سلااااااام

قوس قزح said...

ضياء

لو الرحلة هى المتعة ..يبقى ده معناه انها تعيش الحب
لان الحب احلى متعة فى الحياة
من اول التسلل حتى الم الفراق او فرحة لم الشمل

الخوف من الموت مش المفروض يمنعنا من الحياة :)


تحياتى

قوس قزح said...

انترنتاوى

اشكرك

قوس قزح said...

يا مراكبى

انا بردو بقول كده
غالبا القلب اللى بيكسب فى الاول
لكن دايما بيخسر فى الاخر و هنا العقل بيكون الجلاد

و بالرغم من كده محدش بيتوب و بيرجع تانى القلب يدخل الصراع ده

نورتنى

قوس قزح said...

دريم

وجع القلب ساعات بنكون محتاجينه نحسه علشان نعرف اننا عايشين
بس فى نفس الوقت الاحساس بالامان مريح اوى

انا رائى انها متخرجش من الشرنقة الا لما تتاكدة انه حب حقيقى

قوس قزح said...

ام احمد المصرية
و الله انا كنت بفكر ابعد عن التدوين لكذا سبب
اهمهم انى مش قادرة اتابع الكم الهائل من المدونات و محبش حد يزعل منى

انا معاكى انها تعيش الحياة بس الفرق هنا ان الحياة دى باختيارها
يعنى لازم تتاكد ان اختيارها صح

سعيدة بزيارتك جدااا

قوس قزح said...

محاسن صابر

انا زعلانة منك
ليه مجيتيش يوم الجمعة ؟
كانت القاعدة جميلة جدااااااااا
المرة الجاية مفيش زوغان
علشان انتى كمان وحشتنى اوى

سلامة قلبك يا جميل :)

قوس قزح said...

راجى

اسعدنى رايك كثيرا

قوس قزح said...

eAi

اشكرك جدا :)

قوس قزح said...

hérisson

و الله انا معاك فى كلامك
و يمكن اغلبنا مختار الراى ده
الحياة من جديد

بس لى سؤال
تفتكر اللى يمر بتجربة الموت البطىء
يحب يمر بها تانى حتى لو الحياة رائعة ؟
اظن اللى جرب الموت بس هو اللى يقدر يرد :)


اشكرك على مرورك الاول
تحياتى

قوس قزح said...

arabic ID

صائد فراشات !!
كلمة تفتح ابواب خوف جديدة
اتكون مجرد فراشة وقعت فى شباكه
ايحملها بين يديه ليرضى حبه للامتلاك
و يضعها فى قائمة انتصاراته
فتصبح مجرد اسم لفراشة
حلقت فى سماءه
.
.
لا
فتلتف بشرنقتها اكثر
و تخفى قلبها عن العيون
عيون تريد المتعة
لا تريد الحب

قوس قزح said...

عبد الجليل

اشكرك على رايك
و ان كان تحكيم العقل فى بعض الاحيان قاسى بعض الشىء

اسعدنى مرورك

قوس قزح said...

سبهللة

و انتى طيبة يارب و دايما سعيدة
زيارتك مفاجاة جميلة جدا
اشكرك عليها

قوس قزح said...

kochia

عارفة اكتر فنرة بتكون صعبة هى انهى
مش اتخاذ القرار
لكن تحمل عواقبه
هى دى اللى الواحد بيفكر فيها دايما و يحاول ميقعش فيها

تحياتى

قوس قزح said...

بت خيخة و اى كلام

انا اللى بشكرك على اليوم الجميل ده
فعلا كان راااااااااائع

تيجى نعملها تانى ؟؟

micheal said...

جميلة يا داليا وكلامها مختلف
تحياتي

سمكه واحده said...

جايه اسلم واقول وحشتيني
اخبارك ايه وعامله ايه
يعني بقالي كتير مسلمتش عليكي ياقمر
يارب تكوني بخير
وطبعا كلامك جميل
دمتي مبدعه

سمكه واحده said...

زي انتي ما حاسه انك تعرفنيني نفس احساسي بظبط اني اعرفك
سبحان الله
ربنا يديم الود

MaNoOoSh said...

محدش في الكون يقدر يستحمل ان قلبة يستخبى في شرنقة طول العمر


ممكن العقل لما يقتنع بحد ويثق فيه قوي القلب بيعمل ثورة علي الشررنقة ساعتها