Sunday, August 23, 2009

افطار رمضانى


كل عام و انتم بخير

و رمضان كريم

و يارب يتقبل صيامنا و صلاتنا و قيامنا فيه


السنة اللى فاتت ربنا وفقنا و عملنا يوم جميل التقينا فيه على الخير و اسعدنا اطفال كتير معنا فى مستشفى ابو الريش

و يمكن يومها شوفنا ان اغلب الاطفال سنهم صغير و بيحتاج وجود مرافق معهم و
غالبا بيكون المرافق ده ام الطفل او باباه .. الناس دى لاحظنا انهم وقت الفطار
بيدور على اى حاجة بسيطة تنفع يفطروا بها لدرجة ان فى امهات فرحت بشوية
البسكويت اللى وزعناهم للاطفال علشان تخليها للفطار


طفل مريض و بيتالم حاجة صعبة جدا .. لكن فى نفس الوقت المرافق له بتكون حالته اصعب لانه مش
عارف يخفف عنه ازاى .. و علشان كده الفكرة المرة دى هتكون للناس دى .. محاولة للتخفيف عنهم و نقولهم اننا بنشارككم حتى لو بوجبة افطار بسيطة


و طبعا اللى يحب منا يقدم تبرع مادى او عينى بجانب الوجبة يبقى جزاه الله خيرا


الوجبة هتكون عبارة عن : رز + خضار + قطعة فراخ او لحمة + مخلل
عيش + ثمرة فاكهة

و هيكون تكلفيتها 10 جنيه
و المعاد هيكون يوم 5 سبتمبر

الساعة 3 قدام باب مستشفى ابو الريش اليابانى للاطفال

نفس المستشفى اللى اتجمعنا فيها قبل كده


و لو ربنا اكرمنا و كان عدد الوجبات يفرح و عددها كتير ممكن نفطر التمرجية
بتوع المستشفى او نطلع على المستشفى اللى جنبها و هى مستشفى المنيرة لاطفال و
نوزع على المرافقين هناك


و اليوم ده مش بس للناس ده كمان لنا احنا لان الرسول الكريم قال " مَن فطَّر
صائماً كان له مثل أجره غير أنه لا ينقص من أجر الصائم شيء "يعنى ان شاء الله ناخد اجر صيام كل شخص قدمنا له وجبة


و فى حاجة عايزة اقولها للناس اللى مش هتقدر تشارك فى التبرع انهم ممكن
يحضروا معنا و يشاركوا فى توزيع الوجبات و التخفيف عن الاطفال و اكيد ده
بردو له اجر عند الله


و طبعا لاننا مش هنلحق نرجع بيوتنا على وقت الفطار ممكن بعدها نروح نفطر مع
بعض فى نفس المكان اللى روحناه المرة اللى فاتت - جزا الله سوو خيرا هو اللى راح
صور المكان و جاب قائمة الاسعار منه - محل ابو خالد فى شارع شمبيليون و
ده بيقدم مشويات و رز و سلطات و سعر الفطار عنده ممكن يكون فى حدود ال 30 جنيه

و لو حد عنده اقتراح بمكان تانى للفطار ياريت يقول لو المكان ده مش مناسب
وممكن لو تحبوا نعمل حسابنا اننا نفطر من نفس الوجبات اللى هنقدمها للناس معهم


اما بقى عن الوجبات اللى هنقدمها للناس فيفضل كل حد ناوى يشارك معنا يبعت يقولنا على الايميل او برسالة على الموبايل بالعدد اللى ناوى يشارك به علشان احجزه

المرة دى مينفعش نحدد يومها لازم على الاقل يوم الاربع اكون عارفة عدد الوجبات اللى هحجزها علشان تتحضر ليوم السبت


ده ايميلات الناس المسئولة عن اليوم





و ده ارقام ممكن تبعتوا رسالة عليها او تسالوا على اى شىء خاص باليوم ده

استاذ خالد صاحب مدونة همس الاحباب

0101345140




اللهم ارزقنى و اياكم فى هذا الشهر رحمة الايتام و إطعام الطعام و إفشاء السلام و
صحبة الكرام يا ارحم الراحمين

78 comments:

همس الاحباب said...

كل سنة وانتى طيبة
ورمضان كريم
ربنا يكرمك ويجعله فى ميزان حسناتك

قوس قزح said...

و انت طيب يا خالد
و جزاك الله خيرا على المشاركة من قبل حتى ما تعرف التفاصيل
ان شاء الله يكون يوم يشرفنا كلنا يوم الدين
اشكرك

Pink Dreams said...

جزاكم الله كل خير بجد فكره اكتر من رائعه

كل سنه وانتى طيبه يا قمر

ربنا يجعله فى ميزان حسناتكم يا رب

تقبلى تحياتى

------ said...

كل سنة وانت طيبة

تسلمى على الفكرة الرائعة دى

وربنا يجعله فى ميزان حسناتكم

mimi said...

تقبل الله منكم

ان شاء الله أقدر أساعدكم

رمضان كريم

ربنا يوفقكم

يارب في ميزان حسناتكم جميعا

زهرة الجنة said...

كل سنة وانتي طبة يادوللي
رمضان كريم عليكي يارب
ربنا يتقبل منا جميعا

لاسع افندى said...

كل سنه وانتى طيبه ورمضان كريم

تحياتى

kochia said...

كل سنة وانتي طيبة وبكل خير
واعاده الله عليكي بكل الصحة والسعادة

يا مراكبي said...

بسم الله ما شاء الله

دايما بتبهرينا بالإيجابية وتحويل الشعارات الجميلة إلى واقع

شيء يفرح بجد

كل سنة وأنتم طيبين

شمس النهار said...

ازيك
يارب تكوني في احسن حال
كل سنه وانت طيبه ان شاء الله احب اشارك معاكم وياريت نتواصل علشان اعرف انا هعمل الوجبه والا هتخدوا الفلوس وتعملوهافي مطعم
ان شاء الله نتكلم علي الموبايل ونشوف وربنا يكرمكم علي اللي بتعملوه

مصري بالغربة said...

كل سنة وانتي طيبة وبكل خير
واعاده الله عليكي بكل الصحة والسعادة

بس انا كنت قلت ل نوران ( خيخه سابقا ) انه لو كنتوا خلتوه في العشر الاواخر من رمضان
كنت جيت معاكم
لاني مسافر بره مصر اساسا
بس عموما تتعوض واقابلكم قريب ان شاء الله

وعاوز اتبرع معاكم بس اعمل ايه بالظبط واتصل بمين ؟

مهندس/ محمود مرسي

ahmed_k said...

جزاكم الله كل خير
وجعل مجهوداتكم في ميزان أعمالكم
وكل عام وأنتم بخير

مصطفى ريان said...

ربنا يوفقكو دايما لعمل الخير

Unknown said...

السلام عليكم ورحمة
الله تعالى وبركاته
كل سنة وانتِ طيبة
ويارب ربنا يوفقكم
كمان وكمان لعمل الخير
ودايماً متجمعين فى حب الله ولله.

karim said...

جزاكى اللة كل خير ويارب يكون فى حساناتك , بس فى مشكلة كبيرة واضح انك مخدتيش اللك منها نفس الميععاد اللى انتى كتباة ونفس الساعة فى مبارة مصر ورواندا فى كاس العالم و هى مبارة هامة جدااا, وبكدة ممكن الحضور يتاثر جدااا خلى بالك لابد من التعديل, تحياتى

فاتيما said...

معاكى يا وش الخير
و هتفق بس مع صديقتى داليا عشان جاية معايا و حابة تشترك
واقولك العدد النهائى كام
اشوفك يوميها بكل الخير
يا وش الخيييييييييير
بوسة و حضونة

أميرة said...

كل عام وانتم جميعا والمسلمين بخير
جعله الله في ميزان حسناتكم
وتقبل طاعاتكم
وجعلكم وايانا ممن حق فيهم قوله سبحانه وتعالي وتعاونوا علي البر والتقوي

(حلـم) said...

كل عام وانتم بخير



رمضان كريم

داليا ..قوس قزح said...

pink dreams

جزانا و اياكم
كل سنة و انتى جميلة و بخير

داليا ..قوس قزح said...

دموع القمر

و انتى طيبة و بخير يارب

اشكرك على تشجيعك

داليا ..قوس قزح said...

mimi

تقبل منا و منكم ان شاء الله
و انتظار مشاركتك العزيزة

تحياتى

داليا ..قوس قزح said...

زهرة الجنة

و انتى طيبة يا قمر و دايما الى الله اقرب

داليا ..قوس قزح said...

لاسع افندى

الله اكرم
شرفتنى بمرورك

داليا ..قوس قزح said...

kochia

و انتى طيبة و بخير دايما
اسعد الله ايامك و متغبيش كتير عنا

داليا ..قوس قزح said...

يا مراكبى

الله يكرمك :)
ما انت كمان لك جزء كبير من الايجابية بمشاركتك بنقل المدونات لخارج الانترنت من خلال كتابك

كل واحد بيعمل اللى يقدر عليه

كل سنة و انت طيب و بخير

داليا ..قوس قزح said...

شمس النهار

شموسة المدونات نورتينى بزيارتك
و سعيدة بمكالمتك
الناس اللى زيك بيكونوا دايما هم الدافع لى انى استمر فى عمل الخير

جزاك الله كل خير

hasona said...

السلام عليكم

كل سنة وانت طيبة
كل سنة والجميع بخير وبصحة

ربنا يجمعكم دايما علي الخير وفعله

أم بتول said...

جزاك الله كل خير داليا ، و أكثر الله من أمثالك ، وجعل الله كل ما تقومين به فى ميزان حسناتك

Anonymous said...

طيب تمام اوي
هي فين أصلا المستشفى دي؟ مش دي ابو الريش اللي في السيدة ولا ربنا يشفيني بألف؟؟!!

عموما حلو معاد اليوم وانا كده هخلص شغل واجيلكو جري ولما اوصل هتصل بحد فيكو اقوله اني جيت فتعملولي نشيد الترحيب وكده ماشي؟؟

اسيبكو دلوقتي في انتظار وصول بابا من الشغل عشان اقوله وكده بأه احم ماشي؟؟

سلام بأه عشان انا ماشي :)

مها ميهوووو

Diyaa' said...

welcome back :)

*البت المشمشية *حلوة بس شقية * said...

كل سنة وانتى طيبة يا دودو

rovy said...

كل سنه وانتى طيبه اختى الحبيبه
رمضان كريم عليكى و على اسرتك الكريمه يارب
جزاكى الرحمن و كل المشاركين معكى كل الخير

و وفقنا جميعا لما فيه الخير دائما

Anonymous said...

داليا


خلى الوجبات تكون فراخ مش لحمة

علشان حكاية انفلونزا الخنازير

وكمان فيه اقتراح من مفروسة عند خيخة ان احنا ناكل من نفس الوجبات بتاعة التبرع

وفيه ناس موافقين على اقتراحها
وانا كمان موافق
وممكن ناكل مع الناس فى المستشفى وبعد كدة نروح فى اى مكان نشرب حاجة وبعد كدة كل واحد يروح بيته

فاتيما said...

يا انونميس
الاقتراح بتاع مفروسة ناقصه حتة مهمة
انا معاها ناكل من نفس الوجبات
بس ف المستشفى ...مستحيل ؟!!!
انت عارف ممكن يكون عددنا كام وقتها و هل فيه مكان هيكفينا و هنعرف نقعد بدون ما نسبب زحمة و مشكلة للناس و كمان لينا ؟!!
ممكن حد يشوفلنا نادى بس ينفع ناخد معانا الوجبات دى النادى ناكلها هناك ( أصل لو كلنا من اكل النوادى نفسه يبقى لأ خااالص لأن اكلهم غالبا بشع )

Anonymous said...

فيها لا اخفيها .. وكل عام وانتم بخير

داليا ..قوس قزح said...

مصرى بالغربة

جزاك الله خير على اهتمامك
حضرتك ممكن تحول من خلال ويستر يونيون
او على حساب بنكى
شوف المناسب لك ايه و ابعت ايميل على اى ايميل موجود فى البوست و احنا هنرد عليك بالبيانات المطلوبة

تحياتى لك

داليا ..قوس قزح said...

ahmed-k
كل سنة وانت طيب و اهل البحر الاحمر كلهم بخير
انت مش ناوى تعزمنا على الفطار عندك ولا ايه ؟اخوة اى كلام هى و لا ايه ؟

المهم حاول تيجى و متقولش الدنيا صيام و صعب لانك هتكون على سفر و ممكن تبقى الفاطر الوحيد فينا و نقعد نأنب فيك :))

تحياتى لك

داليا ..قوس قزح said...

مصطفى ريان

اشكرك على دعاءك و تشجيعك

تحياتى

داليا ..قوس قزح said...

نورهاتى

نورتنى :)
كل سنة وانتى طيبة و بخير دايما

داليا ..قوس قزح said...

karim

تعليقك ده خالانى الف حوالين نفسى
ما انا عارفاكم مش بتتحركوا يوم الماتش من قدام الشاشة .. بس عارف اليوم ده هيكون اختبار لكم .. انهى له اولوية اكتر فى حياتكم .. الماتش و لا عمل الخير

نياهاهاها
شوفت بقى التدبيسة ؟؟ اياك بقى متجيش ( وش مطلع لسانه )

داليا ..قوس قزح said...

فاتيما

ربنا يخليكى دايما سباقة بالمشاركة بالخير
و كويس ان داليا هتيجى معاكى لانها بصراحة متتخيرش عنك فى الطيبة و عمل الخير

و قدامك لحد يوم الاربعاء 2 سبتمبر
علشان انا هحجز الخميس ان شاء الله
فلازم اكون عارفة العدد

كل سنة وانت طيبة و بخير
بوسات و حضونات كتير كتير

داليا ..قوس قزح said...

اليس فى بلاد العجائب

جزاك الله كل خير و يارب فعلا نكون من اهل البر و التقوى

كل سنة وانتى طيبة و بخير

داليا ..قوس قزح said...

حلم

و انت بخير و صحة

الله اكرم

داليا ..قوس قزح said...

hasona

و انت طيب و بخير

أحــوال الهـوي said...

اثابك الله و سدد خطاك الي كل الخير

سيدتي الكريمة الخلوقة اكرمك الله

و احزن لعدم استطاعتي المشاركه نظرا لسفري

و اذا امتلكت طريقة للمشاركه غير الدعاء سوف اخبرك

تحياتي

داليا ..قوس قزح said...

ام بتول
جزاكى الله كل خير على دعاءك
و كل سنة وانتى طيبة و بخير

داليا ..قوس قزح said...

احسن تستاهل

المستشفى يا ستى جنب محطة السيدة زينب لمترو الانفاق
انتى صح و صحتك بومب

كويس ان اليوم مناسب لكى
و احنا بنكتب كلمات النشيد اهو بس انتى تعالى

و يارب باباكى يوافق :)

سلام يا جميل

داليا ..قوس قزح said...

Diyaa'

thanx :)

داليا ..قوس قزح said...

البت المشمشية الشقية

و انتى طيبة يا جميل

داليا ..قوس قزح said...

rovy

و انتى طيبة و بخير يا حبيبتى
جزاكى الله خير
و تقبل منا جميعا

داليا ..قوس قزح said...

انونيمس

ماهو بردو فى انفلونزا طيور
بس مفيش مشكلة انها تكون فراخ على الاقل معروف انها طيور مش اى حاجة تانية
بس ان شاء الله الوجبات تكون كويسة

اما عن اقتراح مفروسة هو كويس اوى بس المشكلة هناكلها فين ؟
حكاية اننا ناكلها فى المستشفى صعب اوى
لانها مستشفى و مينفعش نعملها مطعم
السرير هناك بيكون عليه الطفل و المرافق
و مفيش مكان نقدر نقعد فيه
غير ان الناس نفسها ممكن تحرج من وجودنا و متعرفش تاكل براحتها

بس انت واضح انك ناوى تيجى .. طيب مش تقول انت مين !!!

داليا ..قوس قزح said...

فاتيما

كلامك تمام
اما عن المكان فاحنا بندور و ربنا يسهل

داليا ..قوس قزح said...

sherif

انت فيها من غير ما تقول .. ولا انت فاكر هتروح مننا فين ؟

رمضان كريم

داليا ..قوس قزح said...

احوال الهوى

زعلتنى :(
انا افتكرت ان اجازتك هيدخل فيها رمضان
ان شاء الله الاجازة الجاية تصادف مع تجمع تانى
كل سنة و انت طيب

الـسـيـدة نـون said...

بقولك يا دودو

هو استاذ شرين جاى؟

لو جاى قوليلى علشان استحمى يوميها والبس الحتة الزفرة

علشان اكون فى شرف استقبال هذا الرجل اللى يجننننننننن



سلام

اختك خيخة

الـسـيـدة نـون said...

ده كاتب اهوه
فيها لا اخفيها

كويس
يعنى جاى


يلا مش خسارة فيه استحمى واحط كولونيا خمس خمسات

نيهاهاهاهاهاهاهاهاهاهاهاهاهاهاهاهاهاهاهاع

كيكى عوووووو said...

وحاوى ياوحاوى
*************
بخخخخخخخخخخخخخخخخخخخخخخخخخ
داليا اهى
داليا اهى
والله داليا اهى
الواحد بيشوفها من السنة للسنه!!!
يعنى بعد كدة الواحد يمسكلك فانوس ولا ايه؟؟!!
انا مع الناس الى بتقول ان احنا ناكل من الا الوجبات ونهرب بيها اقصد ناكل ونروح اى حته
بصى والى مش متاكدة انه هياجى عشان متاجزيش وجبات وح يدبس فيها نعمل اقتراحك ونديكى فلوس وتفريقيها انتى احسن
وبكدة نشوف انى مقترحتش حاجة ودة اصلا اقتراح فى البوست!!
اقولك احسن انا هتفرج ع المسلسل الفاشل واقولك اقتراح احسن بس فى بوست وهقتبس منك التفاصيل
وربنا يقدرنا ع الاقتباس
ادعى بس ماما تكون غزلتها تكون ريقها ساعتها
يااااااااااااااااااااااااارب

فاتيما said...

يا وش الخير
انا بعتلك إيميل
يا رب يكون وصل و كله تمام
طيييييييب

صبرني يارب said...

عاااااااااااا

مش راضي يجيبنى يا داليا تعالوا خدووووووني

هاستعمل كل وسائل الضغط المشروعه والغير مشروعه واشوووووووف واقولك

عدى النهار said...

كل سنة إنتم طيبين وربنا يتقبل منكم ويوفقكم دايماً لفعل الخير

كيكى عوووووو said...

ايه ياداليا اختفيتى فى ظروف غامضة ليه؟؟
بتفكرى لسه فى الاماكن انا خلاص حليت المشكله فى بوست عندى

... amr said...

كل سنة و انتي طيبة .. و ربنا يعيد عليكي و على المسلمين الايام دي على خير

شوفي يا سيدتي .. انا عشان بخلص شغلي الساعة 4 فهيكون صعب اني أحضر اليوم من اولة للأسف , فأنا بقترح لو ابعت المبلغ اللي هشارك بية لأي حد , سواء انتي أو أستاذ خالد - قبل يوم الاربع - و اجي لكوا على المكان اللي هاتتفقوا علية ان شاء الله
اية رأيك ؟ مناسب الحل دة و لا اية ؟

كل سنة و انتي طيبة

إيمان قنديل said...

كل سنه وانت بصحه وسلامه وخير،،ودايما بتعملي الخير،،إن شاء الله لما أستقر في مصر قريبا جدا سأكون معك في كل ماتفعلينه للخير بإذن الله


قبلاتي

فاتيما said...

دودى
انا قريت عند كيكى عووو إن غالبا تسيباس هو الرأى النهائى
بصراحة اسعارد مقارنة بالوجبة و محتوياتها و المكان و نضافته و القعدة اللى عتكون بعد الفطار أعتقد إن مناسب نوعا ما
لو خلاص تسيباس اوكيه قوليلولى عشان أحط الامينو اللى كاتباه ميرا عندى ف البوست و كل واحد يختار وجبته و يرسى على بر عشان نقولهم ف المحل
منتظرة ردك يا حبيبتى
بوسة و حضونااااااااااات

dreem said...

كل سنة وانتى طيبة يا دودو ورمضان كريم يارب عليكى
بصى بقى
بما انى ان شاء الله بأمره هاجى وهجيب معايا الانسات
لقيت ايمان - بنتى - بتقولى ان فيه محل هنا .. عند بيتى يعنى فى فيصل والمحل ده بتاع ابو صاحبتها بيعمل وجبة افطار مكونة من ربع فرخة وخضار وسلاطة وارز وعيش ب 8 جنيه ونص
وقالتلى ما تقوليلهم عليها وانا بسمع الكلام اهه
شوفى لو عايزين قولولى
عامة ان شاء الله كده كده اعملى حسابى فى 20 وجبة
وكل سنة وانتى واسرتك والامة الاسلامية بخير

Maryama Qandil said...

كل سنة وانتي طيوبة يا دالياا
رمضاان كريم عليكي
وطلعا جزاكم الله كل خير على الحدث الجميل ده

ان شاء الله بمقدار 80% جاية اليوم ده
بالاضافة لبضع من الصديقات لكنهم غير مدونااات بس ان شاء الله يجواا

هاكونتاكت معاكي على التليفون بعد ما اعرف الاكيد بتاعهم

بس بالنسبة للافضار بتاعنا بعدها,,,
رجااءاً عشان مليش في اكل برى كتير
يكون مضمون المكان المعلن عنه من حيث جودته و مأكولاته
عشان افطار السنة الي فاتت كان مجازفة في حيااتي لا تغتفر) في مكاان برى)
:D

(احمد سكر ) said...

كل سنه وانتم طيبيين

وربنا يتقبل يار ب

قوس قزح said...

خوخة

و الله يا خيخة شكل اليوم ان شاء الله هيكون كله ناس تجنن
و مش خسارة فيهم افتر شيف كمان هههههههههههههههههه

قوس قزح said...

كيكى عوووو

انا قريت الامكان اللى انتى اقتراحتيها
كلها تجنن بصراحة
بس ممكن نبدل عبده تلوث بزيزو النتن علشان ده مجربيته على الاقل
هههههههههههههه

قوس قزح said...

فاتيما
وصلونى كلهم يا جميل
و رديت عليهم

قوس قزح said...

صبرنى يا رب

صبرنى يا رب عليييييكى و على جوزك
كل الايام مش مناسبة لكى ؟
اعمل فيكى ايه

طيب هكلمك فى التليفون و اشوف حكاية نيجى ناخدك دى

قوس قزح said...

عدى النهار

و انت طيب و بخير يارب

و ياريت تقدر لما تنزل مصر تشاركنا فى تجمعتنا سوا الخيرية او الاجتماعية

قوس قزح said...

amr

اوكى يا عمرو مفيش مشكلة
عندك فى البوست ارقام موبايلاتنا
او لو تحب نتحاسب يوم التجمع
بس قولى على الايميل انت هتتبرع بكام وجبة
و كمان هتفطر ايه من المينو

كل سنة وانت طيب

قوس قزح said...

GHARAM

و انتى طيبة و بخير يارب
و ان شاء الله رمضان الجاى تكونى معنا فى الخير يارب

سعيدة بخبر قرارك بالرجوع :)

قوس قزح said...

فاتيما

انا عملت تحديث
اسفة على التاخير
بس انا دايما الويك اند بكون مطحونة و مش بدخل

قوس قزح said...

dreem

كل سنة و انتى طيبة يا جميل انتى و بنوتاتك القمرات دول

اولا بوسى لى ايمان بوسة كبيرة على فكرتها و اصرارها انك تبلغينى

بس الفكرة انى غيرت الناس اللى كانوا هيعملوا الوجبات بناس تانية محتاجة مساعدة
يعنى قلت يبقى الخير هنا و هنا

هستناكم يومها ان شاء

قوس قزح said...

♥ Am fOpa'D ♥

يا ستى متقلقيش احنا غيرنا المكان اهو
و هو فى اول شارع الهرم و انتى جاية من الجيزة اول ما تطلعى النفق على الشمال

ان شاء الله يعجبك
هتشرفونا

قوس قزح said...

احمد سكر

و انت طيب و بخير يا احمد انت و كل احبابك

و مفيش تزويغ يكون فى علمك :)