Wednesday, September 23, 2009

شخابيط


شجرة الحياة
خطوطها شخابيط

لو قلت لى
طول الخط سعيد
اقول فى بالى بيدارى خيبته
و لو قلت لى
طول الخط تعيس

اقول فى بالى
مش مقدر عيشته
خط الحياة بياخدك لفوق اوقات
تحس ان مفيش فى السما غيرك
و ينزل بك اوقات
تقول يارب ارحمنى ماليش غيرك
يا طالع و نازل
الخط لو يستقيم
تكره حياتك و تمل
ما الحلو متعرفوش حلو
الا لما تدوق طعم المر

102 comments:

رئيس جمهوريه نفسى said...

ميزة الفيس بؤك انه فيه ليك ومش لاقيها هنا
بس كلماتك على بساطتها وبعدها عن الفلسفة عبرت بجد عن معني الحياة بمعناها الشامل

يوم حلو يوم مر

ودة صحيح وعن تجربة

Empress appy said...

ايه الطلوع والنزول ده تعبتينى
فيه ناس بتقدر عيشتها بس اكيد بيجى عليها وقت وبتتعب وفيها ناس بتضحك من الوجع اللى جواها ابقى فكرينى انكد عليكى علشان تعرفى ان الضحك فى الوش احسن
:PPP

صبرني يارب said...

ما الحلو متعرفوش حلو
الا لما تدوق طعم المر




تصفيق حاد يا رجاله على البؤ ده عشان جامد جدا جدا

وحشااااااااني

Aиgel said...


دودو

رائعة أنتي في رسم صور

حد الذهول

مشاعرك فياضة

وكلماتك الشاعره آثره

مع خالص الحب والاحترام لكِ


Angel love

adel said...

ممممممم
هو اكيد مش بنعرف قيمة الحلو الا لما نجوق المر
بس المر ده بقي كتير قوي الصراحة
عاوزين نغير شوية

*البت المشمشية *حلوة بس شقية * said...

أنتى اللى كاتبها ولا ايه يا دودو

يا مراكبي said...

ما الحلو ما تعرفوش حلو .. إلا لما تدوق طعم المر

جميلة الحكمة الختامية دي .. وعكسها برضه صحيح

هي الحياة كده .. هي الدنيا كلها كده .. خليط بين المرارة والسعادة .. وفي النهاية الفائز هو من يرضى

أحــوال الهـوي said...

عجبي
دي الكلمة اللي طلعت بعد لما قرات كلامك
فعلا حكمه جميله و موجزة و ياريت الناس تفهم
كان العقاد كاتب بيقول و هو ليس مصنف كشاعر

صغير ود لو كبر
كبير ود لو صغر
و خال يشتهي عملا
و ذي عمل به ضجر

تحياتي

dreem said...

التغير والتغيير من الثوابت يا دو
سبحان الله
صيف وخريف وشتا وربيع
صبح ليل
وكما يقال : دوام الحال من المحال

موناليزا said...

صح جدا:)
تسلمى يا دودو يا جميلة

Mafrousa said...

ازيك يا دودو
ما هيه الحياة كده

طالع نازل
ضحك و بكاء
ضيق و فرج
فرح و حزن
نهار و ليل
ظلام ونور
حكمة المولى سبحانة و تعالى
حلو اوي البوست
انتى دماغ برضه
ههههههههه

سبهللة said...

كلمات مست قلبى وعقلى بجد
عندك حق

========
كل سنة وانتى طيبة يا داليا

صفــــاء said...

كل سنه وانت طيبه يا جميله

ولو انها متاخرة بس معلش
كمان حبيت اشكرك على تنظيم اللقاء الجميل دة

والشخابيط منطقيه جدا
ازاى هنعرف الحلو الالو دوقنا الوحش


كل سنه وانت والعائله بكل خير

الازهرى said...

حكمة الحياه الأزليه
الدنيا يومان يوم لك ويوم عليك
ولا يعرف اانسان قيمة الصحه حتى يرى المرض
ولا الأصدقاء إلا حين يفقدهم

ويبقى الصبر والشكر معينين لنا على الحياة بشقيها

تحياتى دوما

أميرة علي كوكب مهجور said...

فعلا هي الحياه كده يوم حلو ويوم مر والغبي اللي يضيع يوم حلو في ذكريات و حزن ع يوم مر عدي وفات و ميعيش اللحظة ويستمتع بيها ويشكر ربنا ع كل حال

Anonymous said...

ايه الجمودية دي يا دودو

تحفة

مها ميهوووو

الـسـيـدة نـون said...

وبالتضاد تتميز الأشياء


واللون الاسود لازمله لون ابيض علشان نعرف اد ايه هو كان اسود
والعكس صحيح

والدنيا على كدة
يوم كدة ويوم كدة


تحياتى ليكى يا دودو
اختك خيخة

عاشقه الرومانسيه said...

الحمد لله على كل حال

rony said...

دوام الحال من المحال
والدنيا يوم طالع ويوم نازل
يوم حلو ويوم مر
بس الازمات والشدائد
بتدينا خبرات لعبور الازمات دى
وفى كل الاحوال بنقول الحمدلله
على كل حاجه حلوه ووحشه
وربنا بيعدينا من الازمات دى
بجد كتبتى بكل بساطه معنى الحياه والدنيا
تحياتى

قوس قزح said...

رئيس جمهورية نفسى

اهلا يا ريس
نورت البلوج

بس كده نضيف لك الليك فورا :))

قوس قزح said...

Appy

اهى رياضة شوية بعد الكحك و اخواته

و بعدين عايزة تنكدى عليا ليه بس
ده انا بقولكم ارضوا بأى حاجة كويسة او وحشة

و اكيد الضحك فى الوش احسن من القفا :))

قوس قزح said...

صبرنى يارب

انحناء للتصفيق
مع عمل الرجلين على شكل المقص
و الفستان على شكل نص مروحة سقف :))

انتى كمان وحشتنى اوى

قوس قزح said...

Angel


نورتينى بكلماتك الملائكية

و اسعدنى ان كلماتى البسيطة نالت اعجابك

لكى كل المحبة و التحية

قوس قزح said...

adel

انت لسه صغير يا عادل
الدنيا لسه كلها قدامك
و ان كان مرها فى الاول
يبقى احسن كتير ما يكون فى الاخر

ولا ايه ؟

قوس قزح said...

الشقية المشمشية المقطقطة

ايوه يا فندم

ايه رايك ؟

قوس قزح said...

يا مراكبى

انت جيبت الهدف من البوست

الفائز هو من يرضى

تحياتى

قوس قزح said...

احوال الهوى

هههههههه
يظهر فعلا ان جاهين عامل شغل كبير معايا فى الوزن

اصل كلامه حكم الراجل ده و بحبه

بس كلام العقاد بردو حلو زى كلام جاهين

قوس قزح said...

dreem

اكيد مفيش شىء ثابت الا الله سبحانه و تعالى

بس المهم اننا نقتنع ان مفيش حد دايما فى هنا
ولا حد دايما فى شقا
فنرضى

قوس قزح said...

موناليزا

تسلمى يا قمر
نورتينى

Diyaa' said...

وما الحياة إلا مسرح كبير
بفصولها وتقلباتها
ومجرد إمتحان
زادت أوراقه أو قلت
اسئلة
يسعدنا الإجابة عن بعضها
ويحيرنا الإجابة عن البعض الآخر
ويؤلمنا الإجابات الخاطئة مع عدم وجود مجال للكشط أو للتصحيح

ولكن يظل رحمة ربنا ثابتة
علي صعوبة الإمتحان..الإيمان آمان برضه
وتسلم الأيادي :)

rovy said...

حبيبتى ما شاء الله عليكى بجد تسلم ايديك كلماتك رائعه مثلك
كل عام و انت بالف خير
بارك الله فيكى و بارك لكى دائما
اعتذر بشده عن تأخيرى عنكى و ذلك لعدم وجود نت عندى اليومين دول ..



دمتى رائعه و دمتى انسانه جميله كما انتى


خالص تحياتى و مودتى لكى دوما
..

Asmaa mahaba said...

بما انى شخصيه نكدبه انا عندى الحلو والمر واحد يعنى المفروض حتفسح اقوم ابص للى حخسره مش للفسحه
جايبينلى ساندوتيش محسش بان طعمه حلو افكر لو ملوث حيجيلى امتى كبد وبائى ههههههههههههه شغل مجانين بقى

mohamed ghalia said...

صح
هى الحياة كما عادتها دول من سره زمن سائته أزمان

همس الاحباب said...

وعجبى ...!!!!
كل سنة وانتى طيبة وعيد سعيد عليكى
تحياتى

مهندس مصري بيحب مصر said...

جميلة كلمات قوي و حقيقية
و الصورة حلوة
بس صورة ايه دي ؟
كل سنة و انتي طيبة

mahasen saber said...

جميله يا داليا وصفتى الدنيا وحالها بينا ولعبها بينا واليى بتعمله فينا بشكل جميل وبسيط ورائع

kochia said...

شجرة الحياة
جميل البوست ده
وفعلا الحلو يبان بعد المر
والمرض بعد الصحة
المهم نكمل للاخر من غير ياس وبامل في الله

تحياتي

ابو على said...

اى دمعه حزن لا لا لا

Yusuf said...

خط الحياة بياخدك لفوق اوقات
تحس ان مفيش فى السما غيرك
و ينزل بك اوقات
تقول يارب ارحمنى ماليش غيرك

جميل أوي المعني ده

تحياتي

مواطن شووجااع said...

إن نظرتنا للحياة ماهي إلا صورة منعكسة عن الأجواء الكامنة في نفوسنا وضمائرنا.فلمَ نرضى لنفوسنا أن تستسلمَ لليأس ، وأن تبقى غارقة في عتمة ٍ زائفة !
محاذاة إلى الوسطلمَ لا نشعل شموع الأمل ..
ونفتح للسعادة والفرح كلَّ أبوابنا المغلقة ..
الحياة جميلة .. صدقوني ..
كل ما فيها جميل ..
لكن لابد لنا أن ننظر للأمور بنظرة يملؤها التفاؤل والخير ،
والصعاب التي تواجهنا في الحياة ما هي إلا تجربة جديدة للشجاعة ،
الأحزان تهذبُ النفوس ، وتصفّي الأرواح ، وتؤدب القلب !!
الدموع تغسل ُ الأوساخ داخل عيوننا ، فنرى الوجودَ بعدها أنقى ،
ولا تسأل الله أن يخفف عبأك بل اسأله أن يشد أزرك ،
واليأس كلمة تجهلها النفوس الكبيرة ،
كن أنت مشرقا ً أولا ً ..
وتأكد من أنه لن تغبَ عنكَ شمس الأمل

نقاش بين متفائل ومتشائم
قال المتفائل:
- أنا سعيد لأنني حي .
وقال المتشائم :
- وأنا حزين لأنني سأموت !

كن أملا ً أنت أولا ً
وبعدها سوف تحصد البسمات التي لا تذبل
وسوف تستقر الطمأنينة بقلبكَ ولن تبرحها !
وخذ من الأمس النصيحة ، ومن اليوم العمل ، ومن الغد الأمل

dr.lecter said...

no sweet witout sour

لاسع افندى said...

هى الحياه كده
يوم كده
ويوم كده





تحيه لاسعه

Anonymous said...

هل بايدينا نتسلق الخط الصاعد؟

واحيانا أخرى ننزلق سريعا ؟

لو اننا اطلنا الخط الصاعد بكل قوة فلا ندع مرا يتسلل الى ارواحنا .. دون ان نلوم حتى انفسنا .. الا نزيد قليلا فى ميزان سعادتنا؟

شمس النهار said...

كل سنه وانت طيبه

كلامك جميل يمس حاجات كتير

وفعلا ماحدش بيعرف طعم الحلو الا لو جه بعد مر

وربنا يكفينا العكس


ويكفينا المر اصلا


بس كنتي حطي اسنسير مع البوست تعبتيني طالعه نازله وانا ست كبيره

نور الدين (محمد الجيزاوى) said...

إحم أولا اعتذار كبير على التاخير
نيجى بقى للكلام الجامد جدا دة اعتقد يمشى تحت دائرة الزجل
بجد الموضوع اكثر من رائع وحقا إذا استقام خط الحياة فلن يرضى باستقامته أحد لا على حلوه ولا مره
لكن لأن حياتنا إنحنائات تدور حول بعضها تارة نعلو تارة نهبط وساعتها وساعتها فقط ندرك ان الجميل جميل لأننا قد عرفنا القبيح ونفرق بين الحق والباطل والابيض والاسود
ولو لم يطرد الله آدم من الجنة لما عرفنا قيمتها أبدا
..
تحياتى لقلمك الرائع وشخصك المميز
...
نورالدين محمود

maha zein said...

حلووووووووووووووووة فعلا جدا

خيرالكلام ما قل و دل

اجمل حاجة الجزء الى بيقول ان لما الواحد بينزل تحت بيدعي يقول يا رب

هوكده الانسان
إذا مسه الشر جزوعا و اذا مسه الخير منوعاً

قوس قزح said...

واحدة مفروسة

و الله انتى اللى دماغ
بس لوتبطلى فرسة :)

قوس قزح said...

سبهللة

سعيدة ان كلماتى اعجبتك
كل سنة و انتى بخير يارب

قوس قزح said...

صفاء

و انتى طيبة و رقيقة المعانى كما انتى

انا اللى اشكرك على حضورك الجميل
سعيدة انى اتعرفت عليكى اميرة الوجه القبلى كله

قوس قزح said...

الازهرى

الصبر والشكر
و هنا الاختبار اللى بتقوم به الحياة معنا

هل هنصبر على اليوم المر و نشكر فى اليوم الحلو ولا لا

محمد عتلم said...

صباح الخير

تامر حسين said...

مكنتش عارف ان الواحد لازم يخش يعمل تعليق عشان الناس تسأل في وبس يعني
طب حتي قولوا كل سنه وانتوا طيبين
تحياتي الحزينه

طارق هلال said...

أسألنى عن طعم المر
ما أنا دقته وحبيته
وعلشان سعره الرخيص
بوجعي غليته
تسأل عليا
بدمعة ترد عليك غيمة
سافرت ورايا بلاد
واتوجعت من حلمي
حلمي في يوم أدراي عيونى
ويستريح قلبي من همى

قوس قزح said...

اميرة على كوكب مهجور

سعيدة انى سمعت صوتك يوم اللقاء الحريمى
و سعيدة بتشريفك ليا بالزيارة
و عندك حق حرام نضيع ايامنا فى الحسرة على ما فات

قوس قزح said...

احسن تستاهل
مهاميهوو
نورتينى يا جميل
ربنا يخليك على تشجيعك لى

قوس قزح said...

بت خيخة

ماهو التضاد ده علشان نتعلم
نتعلم نحافظ على الابيض على اد ما نقدر
و نبعد عن الاسود فى نفس الوقت لو نقدر
بس لو نقدر بقى

نورتينى ياخوخة

قوس قزح said...

عاشقة الرومانسية

و نعم بالله

قوس قزح said...

rony

الخبرة جوانا بتتبنى زى البيت كده
كل ما كانت الازمات كبيرة و استحملنها
كان البناء بعدها اقوى
و مع الوقت هنلاقى ان اى ازمة تمر علينا بسيطة و سهلة
المهم اننا نستحمل

نورتنى بزيارتك لمدونتى

قوس قزح said...

diyaa'

للاسف امتحان لسه له دور تانى

تحياتى لتحليلك

قوس قزح said...

rovy

كل سنة وانتى طيبة و بخير
و يكفينى مرورك فى اى وقت و ان كان متاخرا
و ربنا يصلح لك حال النت حتى لا تغيبى عنا

قوس قزح said...

سومة ..مجنونة

لا ده مش شغل المجانين
انتى يا حبيبتى غلبتيهم على الاقل هم فيهم كتير مهيص و بيضحك و يرقص
مش غم كده
خايفة من الكبد الوبائى ليه ان كان المخ و السلاطات ضربوا خلاص :)

قوس قزح said...

mohamed ghalia

من سره زمن سائته ازمان
نفسى تبقى من سائه زمن سرته ازمان

Aaya said...

السلام عليكم ورحمة الله وبركاته

كلمات رائعة كصاحبتها
دمت بخير وعافيه

...

آية

قوس قزح said...

همس الاحباب

و انت طيب و بخير دايما يارب

قوس قزح said...

مهندس مصرى

دى صورة شجرة الحياة
و فى الصورة الاصلى لها على النت
كل سنة وانت طيب

قوس قزح said...

mahasen saber

ربنا يخليكى يا محاسن
انت اللى جميلة

قوس قزح said...

kochia

كنت هسميه شجرة الحياة
بس لاقيت انه لى شخابيط و خلاص
و الحمدلله انها عجبتك

تحياتى

قوس قزح said...

ابو على

لا مش للدرجة ..بس كفاية دمعتين تلاتة

Anonymous said...

هو ده طبع الحياه :)

!!! عارفة ... مش عارف ليه said...

وعجبي


عظمة على عظمة يااااااا ست


ايه الكلام الكبير ده

وصفتي إحساس حد عادي

بشيء بيحصل له كل يوم عادي

بشكل مش عادي

وخرجتيه من الخاص للعام

وكل واحد بيسأل نفسه

وياترى هو فين من الشخابيط النهاردة ؟


طالع ولا نازل


------------
هايل داليا

المنطقة دي انت ماشاء الله متميزة فيها جداااا

وبتكتبيها حلو اوووي بصراحه

رغم بساطة الأسلوب

إلا إن المعنى عميق

وده السهل الممتنع

Anonymous said...

جميل جدا
كلمات معبرة كعادتك بصراحة استمتعت
عبد الجليل

amr imam said...

اولا مدونتك جميلة وكلامك كمان
وثانيا انا جاى ادعوكى لتشريفى مدونتى انا بتكلم فى موضوع مهم عن الادمان وتجربتى الشخصي معاة
ونفسى اكبر عدد من الناس يقدريستفيد ولو باقل الاشياء الى هى العظة
مع فائق احترامى

ستيتة said...

ايه القلم الرشيق العاقل ده؟
طيب ما البوست ده رد على تعليقك عندي
عجبني قوي تعليقك وعجبني قوي قوي اني اعرف انك صاحبة عقل راجح وموهبة محترمة جدا

تقبلي كل تقديري يا دوللي هانم

أم أحمد المصرية said...

حبيبتي
كل سنة و انت طيبة معلش متأخرة شوية :)
بس قلت استني لما تصوموا السته البيض

amr imam said...

شكرا اوى لاهتمامك وتشريفك لية
وانا تحت امرك اى حاجة عاوزة تعرافيها
مع فائق احترامى

عاشقه الرومانسيه said...

لحد دلوقتى عندنا دعوتين واحده لنادى المحامين وواحده لنادى المهندسين
المؤكده منهم نادى المهندسين
وعموما الاتنين جنب بعض بالضبط
يعنى مش هتفرق
انا قلت اعلن عن المضمون
مبسوطه جدا انك هتيجى
نفسى بجد اشوفك

احساس طفلة محبة للرومانسية بس واقعية said...

صح جدا كلامك
استنى اقولك بس الاول بجد سعدت
بزيارتك وزيارة مدونتك

بعد كدا نقول حقيقى الدنيا ميبقاش اسمها دنيا لو مكنش فيها الحلو والوحش فى كل حاجة حتى فى الايام لازم يكون فى فرح وحزن

اسلوبك بسيط جدا
بس فيه عقلانية وهدوء عالى جدا

دمتى بكل خير
تقبلى مرورى

فشكووول said...

بنتى العزيزه قوس قزح

ولا مر ولا حلو .. بس هى اقدار وربنا بيمشيها ولازم نتقبلها ... صحيح احنا بشر لازم نحس .. لاكن برضه لازم نفكر بمخنا شويه

ولازم حييجى اليوم اللى تكون فيه كل حاجه حلوه

تحياتى

فشكووول said...

وعلى فكره المر ساعات بيكون له عوزه برضه

طهر فؤادك said...

السلام عليكم ورحمة الله وبركاتة
جزاكم الله خيرا على مشاركتى فى حملة (مدونتك هتنقذ طفلك)...و النشر الجماعى لموضوع الحملة الموجود
بمدونتى عن طريق كوبى وبست (نقل ) للموضوع بأكملة ووضعة بمدونتك الجميلة مع اى تعديل تجدوة مناسب مع الاحتفاظ بصلب موضوع الحملة المتمثل فى الاسم و طرق
التبرع الجديدة حتى يتسنى لنا مشاركة عدد اكبر فى الحملة . .
وربنا يكرمك يارب على التعاون ويجعلة ان شاء الله فى ميزان حسناتكم والمسلمين اللهم امين .
ملحوظة :- النشر مستمر ان شاء الله بس البداية كانت فى و29/9 ومن دواعى سرورنا ان تشتركوا معنا فى اى وقت تجدوة مناسب (ساعدونا ليعم الخير بأذن الله )1

سمكه واحده said...

عندك حق والله هي فعلا شخابيط الحياهع عباره عن شخابيط طالعه نازله
والحلو متحسيش بيه الا لو عرفتي المر
كل سنه وانتي طيبه ياسكره
انتي هتنوري اسكندريه

يارب اعرف اجي بس مش عارفه وعموما ياستي انا ابقي اجلكوا لحد عندكوا لو محصلش نصيب المره دي نفسي اوي اشوفك وده من زمااااااااااااان

micheal said...

تسلم إيدك يا داليا ولو أني حتى اللحظة بخالف كلامك الجميل ده لأني مشفتش من الدنيا غير المر من ساعة ما فتحت عيني
بس بجد كلماتك عجبتني
تحياتي

شفـقــة و إحســــان said...

طيب واللي خط الحياه نزل بيه من خمس سنين ومش باين له طلوع تاني ؟؟

ماهو الحلو ماتعرفوش حلو
إلا لما تدوق طعم الجواز يا عيني

وعجبي ....!!
إحســــان الراوي
اللي سارح بربابة

قيس بن الملووووح said...

كلمات بسيطه ومعبره
تسلم ايدك

نور الدين (محمد الجيزاوى) said...

ازيك ياداليا مش ناوية تنزلى جديد ولا ايه كل يوم آجى وبردو مفيش
شدى حيلك شوية يا افندم

أم بتول said...

ما بين و بين نعيش الحياة
يوم فى سابع ارض
ويوم يمكن بالكتير فوق الأرض
نوهم نفسنا بالسعادة
و ان لسة فينا نفس نكمل باقى المشوار
نقول أننا اليوم فى فرح و سعادة
ويجى يوم نكدة زيادة
نعيش و نقول ها يمر
زى الى مر
ماهو مش ممكن ها يكون من الى فات أمر

طهر فؤادك said...

السلام عليكم ورحمة الله وبركاتة ,,,
موضوع جميل ومعبرا جدااااا
وياريت تشاركى معانا فى حملة نصرة الاقصى والموضوع بسيط جدا وياريت تشوفى موضوعى على مدونتى وتقوليلى رأيك.. رأيك يهمنى اكيدددد ..

طهر فؤادك said...

السلام عليكم ورحمة الله وبركاتة ..
الله يكرمكوا يارب شاركونى يوم مقاطعة الفيس بوك يوم 24 /10 وياريت تشوفوا موضوع المقاطعة على مدونتى ومعاية بأذن الله

ملح الحياة said...

كلمات رقيقة تعبر عن حقيقة الحياة.
اعجبني تعبيرك الصادق.
ومن قبل اعجبت بردك علي بخصوص الاسم.
اتمنى لك كل الخير ومسيرة موفقة ان شاء الله.
اختك

Asmaa mahaba said...

فعلا هى لو ديما حلوه مش حنعرف قيمتها
وبعدين ربنا سبحانه وتعالى بيقول(لقد خلقنا الانسان فى كبد)

تامر حسين said...

انا مستني رايك في مدونتي علي 3 تراكات جداد اتمني تعجبك وتعجب كل اصحابك في المدونه متتأخروووووش

تحياتي الاخويه البلوجريه المهلبيه

عين فى الجنة said...

حلوة

mostafa rayan said...

( الحلو ماتعرفوش حلو إلا لما تدوق طعم المر )
يمكن يا داليا كلامك يكون صح
بس كتير بتبقى عارفه ان الحلو حلو من غير الحاجه لتذوق طعم المر القاسي جدا
تحياتى لك

Ahmed Kamal said...

حلو قوي ، واضح إن المعنى كان مالي ذهنك و انت بتكتبي .. بقى لك شوية ماكتبتيش حاجة كده ، من وقت موضوع الضلمة و العتمة

تحياتي دائما

Anonymous said...

ليه مفيش بوستات جديده ؟؟؟؟؟؟؟؟؟

ياسمين said...

محتاجة استفسار منكم من فضلكم
اتفضلوا عندى فى المدونة
ضرورى وشكرا

فاتيما said...

وحشتينى ى ى ى ى
قوى

Cute Kitty **sookra said...

داليا العسوله
ازيك ياقمر
المر لازم ندوقه عشان لو يوم جه الحلو نقدر نحس بيه
تحياتى

Anonymous said...

قوس قزح
سعيد بالتعرف على مدونتك هاقرأ بمزاج بقى سيبنى اغطس كده براحتى

Unknown said...

دى غيبة طولية من سبتمبر يلا عاوزين جديد

Soul.o0o.Whisper said...

داليا الجميلة...

إزيك ؟؟؟ عاملة ايه؟؟
يارب تكونى بخير دايما

و بجد مبسوطة جدا بيوم اللقاء
و سعيدة بالتعرف عليكى

ربنا يبارك لك يارب
و يديم تجمعنا على الخير دايما


دمتى بكل الخير

محمد عبدالرحمن شحاته said...

قوس قزح
جميل جدا ما كتبتي
تقبلي مروري
بلاد السحر والخيال