Tuesday, January 19, 2010

الحب القرمزى



اعتقد بعض المدونين من البوست اللى فات انى باشجع البنت انها تظهر مشاعرها عمال على بطال لاى حد و لكن كان المقصود منه انها تعبر عن مشاعرها للناس القريبة منها سوا الانسان اللى هتتجوزه او لاهلها و الناس تتقبل ده مش ترفضه و تشوفه قلة حياء لان مشاعر الحب لا تساوى قلة الحياء ولا قلة الادب

طيب ازاى نعرف اننا بنحب و ايه هو الحب
الحب صعب نوصفه .. لكن ممكن نحط خطوط عريضة تخلينا نعرف اللى جوانا ده حب ولا لا
الحب عموما بنقدر نحسه مع ناس كتير ..زى اهلنا و اولادنا و اصحابنا
و بتتفاوت درجات الحب دى منا لشخص عن اخر
بس تقريبا مظاهر الحب واحدة
منها مثلا اننا نخاف على الشخص ده من اى حاجة و نحاول نهتم به و يمكن كمان نيجى على تفسنا فى حاجات علشانه
بيهمنا اوى انه يكون ناجح و محبوب وسط الناس
بنحاول بكل الطرق اننا نسعده و نريحه
كل ده ممكن يعمله اى حد بيحب حد
ام لاولادها
اخ لاخواته
صديق لصديقه الانتيم
اى حد بيحب حد بجد
بيفرق فى نظرى الحب ده - هاسميه الحب الابيض- عن الحب العاطفى - و هاسميه الحب القرمزى - بيفرق فى حاجات معينة ممكن تكون مش موجودة فى الحب الابيض زى مثلا

اولا:
تبادل المشاعر
بمعنى ان الحب القرمزى مينفعش يكون من طرف واحد و الا يموت ..يعنى لازم اهتم بك تهتم بيا.. اتنازل عن حاجات علشانك تتنازل علشانى ..يعنى الاخد و العطاء بيعمل توازن مهم للحب
الحب الابيض ممكن نلاقى حد بيتنازل بصفة مستمرة علشان حد و فى نفس الوقت ممكن يستحمل جفاء الشخص ده .. و ممكن ده يكون واضح فى علاقة اب بيحب ابنه و بيحاول يرضيه و الابن شايف ابوه شخصية متسلطة او مش بيحبه


ثانيا :
الغيرة
الغيرة على الحبيب مش بتكون موجودة الا فى الحب القرمزى ولو اتوجدت فى الحب الابيض تبقى مرضية
و الغيرة بيكون غالبا سببها خوف من فقدان الحبيب ده و تعلقه بانسان تانى فى حالة قربه منه
انعدام الغيرة تمام مش كويس و بردو زيادتها لحد الرغبة فى التملك مش كويس

ثالثا :
مراة الحب
اللى يبص فى مرآة الحب بيشوف حبيبه بدون عيوب و فى نفس الوقت بيشوف انه لازم يكون هو كمان حلو فى عيون حبيبه

رابعا :
الرغبة
و دى لا يمكن ان توجد الا فى حالة الحب القرمزى .. و دى غريزة فى الانسان ان بمجرد انجذابه للطرف التانى بتظهر رغبته فى القرب منه .. و كل ما فترة الارتباط تطول و مشاعر الحب تزيد كل ما رغبة القرب تزيد

فى اكيد حاجات تانية
و مشاعر بنخص بها بس الحبيب
بس انا حسيب التكملة عليكم
و كل واحد يعبر عن مفهوم الحب براحته

و لى تكملة بعد اراءكم فى بوست تانى


تحديث

قالوا عن الحب

الحب امتلاك لقلب الاخر حتى يرضخ للحب .. تامر

الحب يجمع كل المشاعر و هو سبب الحياة .. بسكوتة

الحب حالة نورانية مزدحمة متمردة لا تناسق فيها عارمة فاعلة منفعلة كالطوفان .. عابر سبيل

الحب عطاء مطلق و توحد و ان لم نجده اخترعناه .. وليد عارفة مش عارف ليه

الحب احتياج يشبعه كل طرف للاخر .. صيدلانية طالعة نازلة

الحب اتنين كل حاجه اتقسمت بينهم ، اتنين عايشين بي وفي بعض .. شمس النهار



19 comments:

Anonymous said...

هو بس ان شخص يحس انو فيه طرف تاني بيسيطر علي قلبه ومشاعره
في البداية يقاوم الشعور دا وينكره ويتصور انو شخص مغلق غير قابل للأختراق اذا فشل في مقاومته
بيتحول لطاقة مضاعفة
وسعي انو يمتلك الطرف التاني


تامر وهبه

Baskouta said...

حبيت اصبح واقول بوست جميل
الحب ايا كان لونه احساس بيجمع كل الاحاسيس اللى ربنا خلقها جوانا
ويمكن يكون الحب بكل الوانه هو اللي بيخلينا نعيش الدنيا دي
حتى لو حبنا كان مجرد عذاب لقلبنا

تحيات بسكوتية قرمزية لارق قوس قزح

Samanello said...

الوقوع في الحب من وجهة نظر ( قلبوعاطفية بشرية ) هو حالة شديدة الخصوصية تنطلق بين كائنين ( ذكر وأنثى ) و أكرر تنطلق ـ لأنها حالة نورانية مزدحمة متمردة لا تناسق فيها عارمة فاعلة منفعلة كالطوفان .. قد تدمر حالة سكوننا العتيق و تجرف ذواتنا لتمهد تربتنا القلبية لزراعة نبض وليد ـ فالحب هو ـ فعل بالإقامة الجبرية مشبعة بالرضى عنها سلفا ـ فنحن لا نقيم في مكان ( حسوعشوائي .. حبيب تحت الأختبار أو التجربة ) ريثما تتحسن ظروفنا و معطياتنا الشعورية فنختار الأقامة في ( حبيب دائم مزود بحديقة و مسبح وكماليات لزوم الإسترخاء العاطفي ) ........ هكذا بدئت فستثارني أن أكمله في مدونة ... فشكرا لك على حثي غير المباشر على ممارس فعل الجناية بالكتابة و عفوا لأني أكملت تأملتي في مدونتي

!!! عارفة ... مش عارف ليه said...

افتكر ان البوست ده من البوستات اللي ميحبش حد يجي فيها بدري ويعلق

على الأقل هيشوف الناس قالت أيه علشان ميعكش في الكلام

على أي حال أنا ادبيت وخلاص

وربنا يستر

دايما لما بتيجي السيرة دي بيكون مرادفها على طول بالنسبة لي بيت شعر لنزار قباني اللي هو

الحب في الأرض بعض من تخيلنا
لولم نجده عليها لاخترعناه

لما يحققه الحب القرمزي من نشوى للمصابين به

ومن سماته
إنه حالة من العطاء المطلق
في أن يتوحد كل منهما في الآخر
زي مثلا لما تشوفي اتنين بيحبوا بعض وتقولي لأ مش معقول دول اخوات وشبه بعض خالص
الشبه ده بيجي من حالة الحب اللي بيعيشوها
كل طرف يتأثر بالأخر
وتجدي سلوكياتهم وردود أفعالهم متشابه في الإبتسامة في الإيمائة حتى في حالة الغضب

إن كل واحد يشوف التاني في كل حاجة حواليه يتصرف وكأنه معاه

هذا التطابق يأتي لأنه توحدوا مع بعض

أو تقدري تقولي

عاشوا بعض

وافتكر إن دي مش حاجة
سهلة خالص إنها تحصل

صيدلانيه طالعه نازله said...

بصى يا دودو يا حبيبتى
انا شيفه ان الحب تكامل مش اتنين شبه بعض فى الطباع و بس لازم تكون فيه حاجه ناقصه فى طرف و التانى يكملها لانى برضه شايفه ان الحب اساسه احتياج يعنى انا لو عطشانه حاشرب لو جعانه حاكل لو محتاجه انسان يؤنس حياتىو دنيتى ساعتها حادور على الحب
الحب انى ازاى اخلى اللى بحبه ميقدرش يستغنى عنى ميقدرش يشوف غيرى
ميحسش بطعم حياه اللا و احنا مع بعض و افتقاده لى و افتقادى له يفقد الحياه طعمها و بهجتها
و حاجات كتييييييييير قوى تانى
نكملها انا و انتى بقى بعدين
هههههههههههههههههه

شمس النهار said...

طبعا بداية البوست ماصدمتنيش
علشان لما كنت بكتب سلسلة الحب
اتقالي اكترمن كده
بس ماهمنيش

الحب عندي كلمتين
اتنين كل حاجه اتقسمت بينهم
اتنين عايشين بي وفي بعض

تعشني واعيشك

المهم نكون صح وفي ظروف صح

البوست جميل ياداليا جدا

سلامي

Tears said...

جديدة حكاية الحب القرمزى دى :)

اقصوصه said...

فقرة قالوا عن الحب

عجبتني كثيرا :)

mostafa rayan said...

داليا انا متفق معاك في رايك هنا
بس مايمنعش بردو ان البنت تلمح للراجل اللي بتحبه .. تفتح الباب علشان يدخل وتديله طرف الخيط علشان هو يشد
بلاش نعقد حاجه سهله يا داليا
تحياتى لك ودمت بكل الخير

Kiara said...

من اجمل البوستات يادودي

ومش يهمك من كلام الناس

الناس عاوزه حاجه تتفصلهم

رغم انهم مؤمنين بالكلام دا واكتر منك

لكن ازدواجيه معهوده من قديم الازل ولا يهمك البوست مهم جدا ومسج تحفه

فاتيما said...

يا دوللى
يا حبيبتى

انا كنت كاتبة تعليق رهيب
طويل عريض بيقول
كل حاجة


و فجأة
النت فصل
و اتمسح كله
قبل ما انشره

و دى تقريباً
دلالة و إشارة
انى مكتبوش من تانى
عشان ملوش نصيب
ينكتب

يمكن السكوت مصيره
ومصيرى انا كمان


فمؤقتاً هسكت

يمكن لما آجى تانى
اتابع باقى التعليقات
اتشجع انى اكتبه تانى

يمكن


خالص حبى
يا ألوان السما السابعة

ستيتة said...

الحب بيجي في ثانية ملوش وقت ومواعيد

ملوش اسباب ولا منطق عقلي وان كان العقل يميل لتفسيره ومنطقته بالغصب

الحب نظرة يزرعها الله وردة في قلب الطرف الأخر .. فيفوح شذاها .. تغير وتبدل طعم الحياة

الحب احساس خاص لإنسان خاص وبصمة إبهام أصلية لا تحدث إلا مع صاحب الكود الوحيد

الحب جاكت على كتفي في ليل الشتاء القارص
الحب حماية وغيرة وطبطبة وحنية
الحب حضن معنوي قبل الحضن المادي
الحب ورد وشيكولاتة ونظرة عين شقية
الحب
مش مشكلته انه بيجي في ثانية
مشكلته ازاي يستمر
مشكلته لو لم يلقى الحب القرمزي من الطرف الآخر .. كيف ينسى؟
الحب بيجي في ثانية
لكن مش بيروح ألم الهجر الناتج عنه في سنين
مش بيتنسي لو الظروف قتلته
بتفضل روحه تحوم حول القتيل تطالب بالحياة مرة أخرى

Cute Kitty **sookra said...

صباح الخير ياام هنا
اشوفك على خير انشاءالله يوم اللقاء اذا اراد ربنا
اما عن الحب فهو حفره يقع فيها كل من القلبين المبصر والاعمى
تحياتى

مجرد بنت said...

بجد كلامك عن الحب ده جميل اووى
تسلم ايديكى
ومش عارفة ارد بصراحة من حلاوة كلامك

واحدة وخلاص said...

الحب احلى ما فينا
قوته من ضعفنا فيه
حلاوته من عذابنا بيه
ورقته من شوقنا ليه
وشقاوته من لهفتنا عليه

sabry abo-omar said...

كل يرى من وجهة نظره وتجاربه وخبراته فى عالمه وعالم من حوله... ولكن تبقى الحقيقة واحدة أن حبنا للاخر يبدأ وينتهى بحب الذات .. ويلخصه علم النفس فى كلمتين إنتماء للذات ومشاركة لنا فى الحياة وشكرا عزيزتى

طارق هلال said...

قلت ذات مرة

ونحن لسنا قلبين
انما نحن قلب بوريدين

---
تحياتي

حنين said...

بوست رائع بجد
وكلام جميل
الحب شىء جميل والمهم زى ما قلته
الطرفين زى ما اضحى تضحى
زى ما ارضيك ترضينى
ربنا يوفقك ويسعدك

يا مراكبي said...

جميل البوست ده

أنا بحب الحب الللي بالألوان ده: أبيض وقرمزي

:-)

بس أقولك إيه بس .. إنتي عارفة كويس قد إيه مجتمعنا مريض نفسيا بشكل يجنن .. يمكن كل مجتعاتنا الشرقية كمان

نظرية جحا وحماره هي اللي ماشية وبشدة كمان .. شيزوفرينيا من أسوأ الأنواع

الموضوع عايز مقاومة ومحاولة وصراع لحد ما العقول تتغير .. والدعوة اللي انتي بتوجههيها من هنا للبنات دي مجرد بداية لكن لازم تحصل .. لازم نعالج نفسنا ونتعود على اننا نكون على طبيعتنا في يوم من الأيام .. يمكن مش الجيل ده .. بس على الأقل يكون الجيل اللي جاي كده