الحب وحده لا يكفى

بعد ما اتكلمنا عن الحب و ناس جميلة قالت رايها فيه ..لازم ننصدم و نعرف ان الحب وحده لا يكفى للارتباط
يعنى فى شباب كتير بمجرد ما يتعلقوا بحد و يحبوه بيشوفوا ان هو ده الشريك المناسب للحياة و انهم هيحاربوا الدنيا علشانه هنا انا اقولهم لا مش شرط علشان فى حب بينكم يكون هو المناسب لك كشريك حياة لان الجواز حاجة و الحب حاجة تانية .. ايوة للاسف الجملة دى صح ..و هقولكم ليه
الحب حالة من المشاعر بنعيشها بنشوف حبيبنا مفيش زيه و بنشوف بس كل الحاجات الحلوة فيه حتى الوحشة بنلاقى لها عذر يريح بالنا و يرضينا ..فعلا الحب اعمى ..وبيكون الشوق و البعد هو الحطب اللى بيزود نار الحب دى الجواز بقى حالة واقعية تماما بيدخل فيها احداث كتير و بينحسر فيها الخيال اللى كان بيغذى الحب و كمان الشوق و البعد بينتهوا مش معنى كده ان الحب راح بس بيكون اخد شكل اهدى بكتير ..و بتظهر حاجات تانية مهمة زيها زى الحب و يمكن الحاجات التانية دى اللى لازم تكون موجودة من الاول بجانب الحب علشان يكون الارتباط ناجح و بردو الحاجات دى اللى ممكن تخلى الارتباط ناجح لو مفيش حب اصلا اول الحاجات دى التفاهم و التقارب .. يعنى لازم يكون فى مبادىء مشتركة بين الطرفين و تقارب فكرى ..لان الاختلاف الشاسع بين فكر اى شخصين بينتج عنه دايما مشاحنات و مجادلات و بعد الجواز للاسف بنلاقى ده اثره واضح على مسار الحياة الزوجية و طريقة تربية الاولاد و حتى التعامل مع المجتمع
تانى حاجة الجواز مش ارتباط بين شخصين بس لكن ارتباط بين عيلتين يعنى مينفعش نختار شريك لنا غير مناسب انه يعيش وسط اهلنا سوا لاختلاف الطبقة الاجتماعية او الثقافية او المادية ..هتحصل مشاكل كتير و هنلاقى فجوة فى التعامل ..فلو كان الزوج هو اللى اقل من مستوى الزوجة ده هيخليه دايما عنده احساس بالنقص ويخليه يحاول بكل الطرق يفصل زوجته عن اهلها او انه يحاول يكون فى مستواهم اما بالمنافسة او بالتحايل و فى الحالتين بردو بتحصل مشاكل
لكن لو الزوجة هى اللى اقل فى المستوى - و بردو مش اقل كتير - بيكون الوضع مقبول شوية و طبيعى

ثالثا الاحترام من الحاجات الاساسية اللى بتحاقظ على الارتباط ..بلاحظ الايام دى ان الالفاظ بين الشباب بقت اقل احتراما سوا بنات و اولاد و ممكن يكون من ضمنها شتيمة و تريقة و كده ..الحاجات دى للاسف بعد الجواز ممكن غصب عنا نتيجة تعودنا عليها تدخل فى كلامنا وقت الخناق او المشاكل ..و بيفضل اثرها جوانا حتى بعد انتهاء الموقف ..فمن الاول لازم يكون فى حدود لطريقة كلامنا و تصرفاتنا تحافظ على احترمنا لنفسنا اللى بتخلى اللى قدامنا غصب عنه يحترمنا

رابع حاجة فارق السن بين الطرفين لازم يكون مناسب لان فى رائى لو زاد سن الرجل عن 10 فرق بينه و بين سن زوجته هتظهر مشاكل كتير زى الغيرة و عدم التفاهم و فرق الاهتمامات
و لو البنت اكبر من الولد بازيد من 5 سنين هتحس انه بالنسبة لها غير ناضج او هو هيحس انها مش مناسبة له لما يقارنها بالبنات اللى اصغر منه و خصوصا لو هى مش مهتمة بنفسها
و عموما يفضل الزواج فى المرحلة العمرية ما بين 25 و 35 للجنسين
لان المرحلة دى بتكون بين بداية بناء المستقبل و بداية النضج

طبعا فى مطلبات تانية لازم تتوفر فى الشريك بتكون خاصة بالشخص نفسه زى الطباع اللى بيحبها و اللى مش بيحبها و هنا اقولكم ان غلط جدا لما الواحد يفتكر انه ممكن بعد الجواز يغير طبع او عادة فى الشخص اللى قدامه
لان ده صعب جدا و عايز صبر سنين و ممكن ميحصلش فى الاخر

اخر الكلام الحب لوحده مش كفاية علشان نرتبط بالشخص اللى نعرفه ..و بردو هو اللى بيخلينا نستحمل اى حاجة مش موجودة فى الارتباط ده .. معادلة صعبة مش كده ؟؟