Thursday, January 28, 2010

الحب وحده لا يكفى


بعد ما اتكلمنا عن الحب و ناس جميلة قالت رايها فيه ..لازم ننصدم و نعرف ان الحب وحده لا يكفى للارتباط
يعنى فى شباب كتير بمجرد ما يتعلقوا بحد و يحبوه بيشوفوا ان هو ده الشريك المناسب للحياة و انهم هيحاربوا الدنيا علشانه هنا انا اقولهم لا مش شرط علشان فى حب بينكم يكون هو المناسب لك كشريك حياة لان الجواز حاجة و الحب حاجة تانية .. ايوة للاسف الجملة دى صح ..و هقولكم ليه
الحب حالة من المشاعر بنعيشها بنشوف حبيبنا مفيش زيه و بنشوف بس كل الحاجات الحلوة فيه حتى الوحشة بنلاقى لها عذر يريح بالنا و يرضينا ..فعلا الحب اعمى ..وبيكون الشوق و البعد هو الحطب اللى بيزود نار الحب دى الجواز بقى حالة واقعية تماما بيدخل فيها احداث كتير و بينحسر فيها الخيال اللى كان بيغذى الحب و كمان الشوق و البعد بينتهوا مش معنى كده ان الحب راح بس بيكون اخد شكل اهدى بكتير ..و بتظهر حاجات تانية مهمة زيها زى الحب و يمكن الحاجات التانية دى اللى لازم تكون موجودة من الاول بجانب الحب علشان يكون الارتباط ناجح و بردو الحاجات دى اللى ممكن تخلى الارتباط ناجح لو مفيش حب اصلا اول الحاجات دى التفاهم و التقارب .. يعنى لازم يكون فى مبادىء مشتركة بين الطرفين و تقارب فكرى ..لان الاختلاف الشاسع بين فكر اى شخصين بينتج عنه دايما مشاحنات و مجادلات و بعد الجواز للاسف بنلاقى ده اثره واضح على مسار الحياة الزوجية و طريقة تربية الاولاد و حتى التعامل مع المجتمع
تانى حاجة الجواز مش ارتباط بين شخصين بس لكن ارتباط بين عيلتين يعنى مينفعش نختار شريك لنا غير مناسب انه يعيش وسط اهلنا سوا لاختلاف الطبقة الاجتماعية او الثقافية او المادية ..هتحصل مشاكل كتير و هنلاقى فجوة فى التعامل ..فلو كان الزوج هو اللى اقل من مستوى الزوجة ده هيخليه دايما عنده احساس بالنقص ويخليه يحاول بكل الطرق يفصل زوجته عن اهلها او انه يحاول يكون فى مستواهم اما بالمنافسة او بالتحايل و فى الحالتين بردو بتحصل مشاكل
لكن لو الزوجة هى اللى اقل فى المستوى - و بردو مش اقل كتير - بيكون الوضع مقبول شوية و طبيعى

ثالثا الاحترام من الحاجات الاساسية اللى بتحاقظ على الارتباط ..بلاحظ الايام دى ان الالفاظ بين الشباب بقت اقل احتراما سوا بنات و اولاد و ممكن يكون من ضمنها شتيمة و تريقة و كده ..الحاجات دى للاسف بعد الجواز ممكن غصب عنا نتيجة تعودنا عليها تدخل فى كلامنا وقت الخناق او المشاكل ..و بيفضل اثرها جوانا حتى بعد انتهاء الموقف ..فمن الاول لازم يكون فى حدود لطريقة كلامنا و تصرفاتنا تحافظ على احترمنا لنفسنا اللى بتخلى اللى قدامنا غصب عنه يحترمنا

رابع حاجة فارق السن بين الطرفين لازم يكون مناسب لان فى رائى لو زاد سن الرجل عن 10 فرق بينه و بين سن زوجته هتظهر مشاكل كتير زى الغيرة و عدم التفاهم و فرق الاهتمامات
و لو البنت اكبر من الولد بازيد من 5 سنين هتحس انه بالنسبة لها غير ناضج او هو هيحس انها مش مناسبة له لما يقارنها بالبنات اللى اصغر منه و خصوصا لو هى مش مهتمة بنفسها
و عموما يفضل الزواج فى المرحلة العمرية ما بين 25 و 35 للجنسين
لان المرحلة دى بتكون بين بداية بناء المستقبل و بداية النضج

طبعا فى مطلبات تانية لازم تتوفر فى الشريك بتكون خاصة بالشخص نفسه زى الطباع اللى بيحبها و اللى مش بيحبها و هنا اقولكم ان غلط جدا لما الواحد يفتكر انه ممكن بعد الجواز يغير طبع او عادة فى الشخص اللى قدامه
لان ده صعب جدا و عايز صبر سنين و ممكن ميحصلش فى الاخر

اخر الكلام الحب لوحده مش كفاية علشان نرتبط بالشخص اللى نعرفه ..و بردو هو اللى بيخلينا نستحمل اى حاجة مش موجودة فى الارتباط ده .. معادلة صعبة مش كده ؟؟

28 comments:

صيدلانيه طالعه نازله said...

عن تجربه يا داليا
الحب اللى بيجى بعد الجواز بيبقى احلى بكتير من اللى قبله
اقولك ليه
لان كل اللى بيحبوا قبل الجواز بيبقوا راسمين صوره ملائكيه للى بيحبوه و مش بيصدقوا انه ممكن يغلط او يعمل حاجه مش مظبوطه و بتبقى الصدمه كبيره اما ده بيحصل
لكن الحب بعد الجواز بيبقى الاتنين فى اول العلاقه صادقين وواضحين و عقلانيين و مش محتاجين ينافقوا بعض

عشان كده بيبقى ارتباطهم اقوى و اعمق

لاسع افندى said...

الحب يختلف تماما عن الجواز
فيه صفات كتير فى الحبيب ممكن نتغاضى عنها
لكن صعب نتغاضى عنها فى شريك الحياه
لان الجواز هو مشاركه24ساعه مش مقابله وخروجه وكلام
ارجوكم اللى مش متأكد من صفات شريك حياته يفكر كتير قبل الارتباط
الحب حلو بيخلينا نتحمل كتير لكن مش كل حاجه ممكن يغطيها الحب

تحياتى

Lyssandra said...

كلام جميل وموزون جداً

فعلاً الحب لوحده لا يكفي
ولوحده .. لازم يموت

....

تحياتي يا داليا

Lyssa

أمل حمدي said...

تسلم ايدك ياداليا

فعلا الحب وحده لايكفي

ربنا يهدي كل أولادنا ويهديهم للخير يارب

موناليزا said...

كلامك زين ومليح أوى:)
طبعا متفقة معاكِ جدا

عاشقة القمر said...

بجد دليا مش عارفه بقول مفيش الحب قبل زواجه يمكن الاعجاب لكن بعد زواجه معاشرها يظهر الحب الحقيقه
لان قبل زواجه احد بيكون عامل حسبوا اوي مش يغلط بقول كلمات جميل هكذا ام بعد زواج اهظر انو فعلا الحب الحقيقه او كان مزيفه
تقبلي مروري

طارق هلال said...

كلامك صح
وأنا موافقك

Anonymous said...

ازيك يا داليا

اول مره آجي هنا الصراحه . بس ان شاء الله من المتابعين دوما مع حضرتك

اسلوبك راقي ما شاء الله و البوست تحفه بجد .. كلامك صح على فكره و تحسيه صادق و من واقع تجربه شخصيه

برافو عليكي و الله .. أمتعتيني في اللحظات اللي كنت بقرأ فيها

يا ريت اتشرف بيكي عندي و تنوريني هنا

http://ra7alaat.blogspot.com/

شكرا يا قوس قزح

كيكى عوووووو said...

الجواز بقى حالة واقعية تماما بيدخل فيها احداث كتير و بينحسر فيها الخيال
!!!
الله يطمنك انا بقى وقتها هبقى اشغل روتانا سينما مش هتقدر تغمض عينيك

بنت مصريه said...

عندك حق والله يا داليا
الحب وحده لا يكفى ولا حتى بيصنع المعجزات زى ما بيقولوا
عارفه ليه لان دلوقتى معدش فيه حب زى اللى كان موجود ف الزمن الجميل دلوقتى زماننا ما يعلم بيه الا ربنا
بوست جميل ومهم يا دوللى

شمس النهار said...

بجد مبسوطة من لقاء النهارده جدا

ومبسوطة اني شوفت العروسة ابي


والبوست عاجبني جدا

علي فكرة موضوع السن ده من اخطر المواضيع
هرجع تاني اعلق

بس مش النهاردة

حاسة اني في دماغي فريق كورة بامشجعين
وراسي هي الاستاد

سلامي

KING TOOOT said...

الحقيقة أنا بأختلف معاكي مش في إن الحب وحدة لا يكفي ، لكن في مدلول الكلمة
كلمة الحب
اصلي شايف إن الحب كلمة لها مدلول شامل
يعني حب من غير تفاهم مايبقاش حب
وحب من غير إحترام مايبقاش حب
وحب من غير صدق مايبقاش حب
وحب من غير صبر مايبقاش حب
يعني الحب من وجهة نظري لازم يجمع جنب الإعجاب بالحبيب صفات تانية زي التفاهم و الصدق و الإحترام و الصبر و حاجات تانية كتير
لو كل المشاعر و الصفات دي مع بعض يبقى إسمه حب
لو مافيش الحاجات دي مايبقاش حب أصلا
يبقى إنجزاب
أو إعجاب
أو سراب
إنما مش حب
تحياتي و تقديري
KING TOOOT

hend mossallam said...

اللقاء كان حلو اوي بس للاسف متكلمتش معي خالص بس نوارتي اللقاء :]:]

Diyaa' said...

المعادلة الصعبة الوحيدة في رأيي
بتبدأ من الطفولة وبتكبر معطياتها مع المراهقة وهكذا
وهي تكوين الشخصية السوية اللي ترضي ربنا تماماً
وفي نفس الوقت تنجح في امتحان تكوين الأسرة وإسعاد شريك الحياة والتفاهم والتحمل :)

Unknown said...

أسمحوا لي أن أختلف .. و أستهل بهذه العبارة ... فين نصفك الثاني ؟!!! في رأي هذا أجمل وصف لحالة حب،عندما نحب لا نكون أثنين ، بل نكون شاطئين لنهر .. الحب وحده يكفي .. الحب ليس أعمى بل أحلى ، الحب لا يناقش لا يساوم لا يفاضل .. العقل يفعل .. والذين يبادرون بخطوة المقارنة ينهون مشوار الحب .. المحبون حقا لا يتوقفون عند أختلافات وتفضيلات العقل .. حين يشرق المحبوب تغرب كل تفاصيل الحياة الصغيرة .. تتقزم تفاوتت مستويتنا المعيشية .. تقصر مساحة العمر الميتة قبل لقائنا .. عندها ونحن نتقاسم بهجتنا نجد حل لزيارة الأهل غير المتوقعة و نتحايل على تدبير ايجار الشقة و نعيد تدوير ملابسنا لفصول السنة ومصاريف النقل و عشاءاتنا الصغيرة على ضفاف النيل وصعود درجات السلم وغسيل ملابسنا وهدايا أصدقأتنا في مجاملتهم .. الحب يرمم كل لحظة شقاءات العمر بنظرة تساوى العمر ، ببسمة تختصر الدنيا في شفتين ، الحب وحده يمتلك قلوبنا فحين تترجل صورة أحبائنا ـ أنصاف أرواحنا ـ من جوارنا نذبل نحن و الحياة معهم .. و غير الحب ما هي إلا أشياء نقتنيها و حين نغيب يمتلكها غيرنا .. فتكون لهم كما كانت لنا .. تتساوي في ذلك عشتنا أو قصرنا .. سيارتنا الجديدة أو العتيقة ، خزانة ملابسنا ، حوض أسماكنا الصغير، مرآة حمامنا ، ستائر غرفة نومنا التى أشترينها سويا ، زجاجات عطورنا نصف الفارغة ، ولهذا محظوظ ذلك الشخص الذي يقع في الحب أو يقع عليه الحب .. هذا الحب هو أصل العلاقة الزوجية .. فأحبائنا ما هم إلا نحن أو نصفنا الساكن في الفارغ المقابل .. فالمحبون لا يغضبون من أنفسهم .. فحبيبي هو .. وطنى .. وسكنى .. ومأذن نبضي .. وعكاز عمر و زكرياتي ، و أجراس فرحتي ، ونصفي الذي حقا لا يكتمل شطري دورتي التنفسية إلا وعبق أنفاسه مزروعة في وجهي .... وغير ذلك تبقى مجرد أشياء تسير معنا و يأخذها غيرنا حين نرحل عنها أو ترحل عنا .... شكرا لسعة صدركم لطول حديثي

Diyaa' said...

بالمناسبة :) في نوعين من الحب بين الأغراب
حب الأنسانة لأنها متميزة بما فيه الكفاية إني أحبها حتى لو مينفعش أعيش معاها وحتى لو هي من نصيب غيري هيفضل ليها برواز في ذكرياتي :) ودي بتحصل كتير .مش شرط الحصول على مقابل للحب ده أو نهاية سعيدة ليه

وفي الحب التاني .الحب لفلانة لأنها متميزة ولأن ينفع نعيش مع بعض ونستحمل بعض وناخد وندي من بعض ولبعض :)
ودي حصلت مرة والله يرحمها مكانش في أي فرصة أقتنع بفوارق المستوى.الفارق الوحيد اللي كان ممكن يقنعني.عدم الاتفاق على مخططاتنا للأسرة اللي هنبنيها

بس خلاص خلصت الإضافة
فوتكم بعافية بقى :)

سمكه واحده said...

كده ونص
كلام جميل جدااااااااااااا
وانا موفقه

مجرد حلم صغنتوت said...

الحب اعمى.. الجملة دي صح في أغلب الوقت لكن متهيألي في بداية الحب بس
حكاية ان الشخصين بيحاولو يتجملو ويظهروا بأحسن صورة مفيش حد بيعرف يمثل طول حياته.. بييجي في نقطة معينة وهيبان على حقيقته لو بيمثل
الحب مش كفاية للارتباط ويمكن الحب بعد الجواز احسن.. يمكن اضمن بمعنى اصح
بس برده في حالات ناجحة لارتباط وصل بعدها لارتباط رسمي.. مش شرط معنى الارتباط انه يكون بالصورة المنتشرة دلوقتي .. فيه حالات بيبقى فيها الارتباط الحل المؤقت قبل الخطوبة وساعات كتير بيبقى بمعرفة الاهلين وبموافقتهم لحد ما تبقى الفرصة متاحة للارتباط الرسمي

شفـقــة و إحســــان said...

عندك حق يا داليا
تعرفى الحب حاجة والجواز حاجة تانية خالص
وفى ناس كتير بتتجوز عن حب ولكن للاسف ممكن تنفصل وبعد فترة قصيرة جدا لان الحب خلى طرف منهم يتنازل عن حاجات كتير واللى منها ممكن تكون الكرامة علشان خاطر اللى بيحبه
ولما بيصطدموا بالحياة الزوجية بيلاقوها مختلفا تماما عن الحب والمشاعر والرومانسية.... فبيحصل الخلاف والانفصال
والعكس صحيح ممكن ناس تانية تحكم عقلها وجوازها يبقى ناجح جدا لانه بيبقى مبنى على اسس صحيحة منها فارق السن والحالة الاجتماعية والمادية والاحترام المتبادل وبكده بتبقى العلاقة ناجحة ومستمرة
فياريت الناس كلها تحكم عقلها مع قلبها بس عقلها الاول علشان الحياة تبقى صح
وحشتينى جدا

rovy said...

السلام عليكم

أزيك يا داليا ؟
ياارب تكونى فى أحسن حال أختى الغاليه
البوست جميل جداا و عجبنى و بأتفق معاكى جداا فى كل اللى قلتيه..
ان شاء الله يستفيد به الشباب المقبل على الجواز ..

تقديرى و تحياتى لكى

Anonymous said...

بالله عليكى تطمنينا على رحاب ايه اخبارها هى بطلت تكتب ولاايه

شمس النهار said...

كل سنة وانتي ماما جميلة ياجميلة

عيد ام سعيد

سلامي

momken said...

اه صح جداً طبعا

لكن كل حد له وجه نظر فى الحب والجواز

سيبك من الحب ونيجى للجواز

انا مثلا.... مثلا يعنى

لما ربنا يرزقنا جميعا وانا بالخصوص بشريكه العمر...هتجوزها علشان اتحايل على المجتمع
ازاى يعنى؟؟؟؟

يعنى هحبها ونتاكد ان فى نكافؤ وان فى تطابق نسبى بينا

المهم بكل المعاير اننا ينفع نعيش ونكمل سوا
وخلاص مش هنقدر نعيش بدون بعض

الطبيعى ان المجتمع يقاوم علاقه الحب الى هى الارتباط الغير شرعى

انا بقى كل الى هعمله انى اخدع المجتمع واكسب هذا الارتباط الصفه الشرعيه علشان بس اسكت المجتمع
وافضل احبها طول العمر
وانسى اننا اتجوزنا اصلا
ونعيش لحد ما نموت اتنين بيحبوا بعض

تخريف صح؟

بس هو ده الموضوع فدماغى ولو محصلش يبقى هعنس
ومش هاكون اول راجل يعنس

موضوعك جميل

تحياتى

عايزه أشتغل said...

تابعوا مدونه مش عايزين نتجوز
http://entoeah.blogspot.com/

صوت من مصر said...

مش لاقى كلمة شكر
كيمو

Maha Shahen said...

والله يمكن يكون عندك حق لأنك ناقشتى الموضوع بتفكير كويس جدا وتآنى
هى نظره موضوعيه جميله بس احنا دايما وللاسف بندور علي حلم صعب تحقيقه وبنتمنى نعيش قصه لا قبلها ولا بعدها
يمكن لازم ناخد بالنا احنا رايحيين علي فين بقلوبنا بس منقدرش نقول لنفسنا بلاش احلام
هتقوليلى لو احلام كدا تبقى مضره مهو العقل ساعتها مبيفكرش للاسف الشديد
لما القلب بيشتغل العقل بيتأثر وعند ناس بيقف خالص
بس عارفه اجمل اختيار هو اللي بيتفق عليه القلب والعقل سوا
ومع ذلك ممكن ميكونش اختيار صح
بينى وبينك الحكايه قدر ونصيب
مهما حاولنا او كنا بنفهم وعملنا حسابنا واقتنعنا بالكلام وحاولنا تحقيقه او لا
فى النهايه الحكايه محتاجه لصدق شديد من الطرفين
موضوع جميل وعجبنى مناقشتك ليه
خالص تحياتى واحترامى

رحاب صالح said...

صباح الورد
اكيد الحب وحدة مش كفاية بس اكيد مهم لكن ممكن نترجم الحب بكلمة تانية زي الود والتفاهم والعقل له اهمية في الاختيار برغم اني حاسة ان مفيش شيء يعوض الحب بس بقيت اتعامل بعقل اكتر عشام رومانسيتي اللي تودي ف داهية
دي اول زيارة لي وان شاء الله متكونش الاخيرة

Anonymous said...

عارفه عندك حق
الحب بعد الجواز او فى الخطوبه احلى ومضمون
ع الاقل مافيهوش شى معتم ولا مصير مجهول