Saturday, December 11, 2010

لقاء الحب و الخير





امبارح كان يوم من اجمل ايام البؤجة

يوم ملون باحلى الالوان

كان نقصه بس ناس عزيزة علينا كنا متعودين انهم يشاركوا معنا لكن مكنش فى نصيب اننا نتجمع بهم المرة دى
بس الحمدلله على كل شىء

ناس كتير جات
و ناس كتير شاركت
وناس اهتمت تعرف ازاى تشارك بحاجات تانية مع الجمعية
يعنى حصيلة اليوم الخيرية ..الحمدلله كانت كبيرة

من الناس اللى حضرت اليوم

من اسكندرية
لولو الحب الجميل و بنتها الجميلة علياء
قلب القطة
و دودو عاشقة الرومانسية


من بورسعيد
ايناس نهر الحب
نسمة هى فوضى

من المنصورة
صبرنى يا رب و اسرتها الجميلة


من القاهرة

ساجى
ابو حميد
وليد الدغورى
هانى نط فى الكوز
د/ستيته
غادة محسن و اختها و صديقة لهم
نيرفانا
شفقة و احسان

سونى 2000
حفيدة عرابى
ريم رسائل بلا بريد
شريف هجايص و خطيبته الجميلة
احمد سكر
ضياء
كيارا
شاب فقرى
عمر فضفضة
حسنى مدونة مستفز
كيمو صوت من مصر
مصطفى ريان
خالد همس الاحباب
و انا


و من خارج التدوين


من الاسماعيلية
عبير
و من القاهرة
ريهام
مروة
ياسمين


و بما ان مؤرخ المدونين - فاتيما - زوغ المرة دى من المشاركة
فانا هحاول احكى عن اليوم بس طبعا مش هاكون زيها ابدا

الصبح الساعة 9 عديت على ساجى
و اخدتها و روحنا للمدونة الجميلة شمس النهار
و كان عندها كالعادة كمية كبيرة من الحاجات للبؤجة
و بعد كده طلعنا على الزهراء
و هناك كان موجود اهل اسكندرية
لولو و قطة و دودو
و خالد همس الاحباب
و ضياء و عمر و محمد
و ريهام و ياسمين
و مروة
كانوا قاعدين على القهوة اللى تحت الجمعية
شوية و بدات باقى الناس تهل
ايناس و نسمة
وحفيدة عرابى
شريف هجايص و خطيبته
و كريم شاب فقرى

الولاد راحوا يصلوا الجمعة
و خالد طبعا عمل فيها سبع الرجال و قال لنا اطلعوا فوق و مش تقعدوا على القهوة لوحدكم
وفعلا البنات كلها طلعت فوق ..و من كتر الضحك و الهزار الجيران اشتكوا كالعادة

شوية و جات الدكتورة ستيته و كانت مفاجاة بصراحة
و الكل كان سعيد بوجودها و البنات كلهم اتشعلقوا فى رقابتها
وجيه استاذ هانى و جزاه الله خير وزع علي الموجودين كتيب قيم جدا عن الطاعات و العبادات اللى بنعملها طول السنة
و ابدى اهتمامه بالادوية الموجودة و استعداده للمساعدة فى توفير بعض الادوية
وصلت ريم رسائل بلا بريد بعد ما كانت تايهة شوية فى الطريق
و سلمت بؤجتها و كان جايبة لى معها خيرات جميلة من طنطا مش هاقولكم ايه هى علشان محدش يقولى هاتى حتة :))
نجلاء صاحبة مدونة نيرفانا حضرت و معها شنطة للبؤجة
اد ايه الحاجة منظمة و زى الفل كانها خارجة من التنضيف حالا
بس للاسف مش قعدت كتير و مشيت على طول
لما الولاد رجعوا من الصلاة
قاعدنا ساعة كمان علشان نستنى لو حد تانى وصل
واخيرا وصل شفقة و احسان
الاتنين دول ما شاء الله عليهم زى عصافير الكناريا و تحسوا انهم دمااااااااااغ
و لما مشينا عرفت ان فى بنت كمان جاية و هى غادة
و اضايقت جدا
بس الحمدلله حصلتنا فى الحسين هى و اختها و صاحبتهم
و كانوا عايزين يزوغوا مننا بدرى علشان عندهم ميعاد بس اقنعتهم يكملوا معنا اليوم
و يمشوا قبل الميعاد على طول
المهم اتجاهنا للحسين زى ما كنا متفقين
و طبعا كانت الركنة هناك اهم مشكلة قبلتنا
قاعدنا اكتر من ساعة علشان نعرف ندخل الباركينج
و عربية تخبطنا و ناس يصوتوا فينا
حتى الاجانب بقى بيعرفوا يتخانقوا و ياخدوا دور غيرهم
و ساجى كانت خلاص هتاكل اى حد يقرب منها

روحنا لبيت زينب خاتون
علشان نقعد على الكافيه هناك
لاقينا الكافيه بيشتغل من الساعة 6
فقررنا نزور البيت و بعد كده نشوف مكان ناكل فيه

البيت كبيررررررررررررر
و كلنا بقينا نحقد على الست زينب دى
و بيعمل صدى صوت غريب
و البنات انطلقوا بقى فيه زغاريد و ضحك
و لولو الحب الجميل كل شوية تنده على عليا بنتها بصوت عالى و انا افتكر انها بتنده عليا و ارد عليها بردو بصوت عالى و صوتنا بقى جايب اخر الحسين
و محمد كمال هو و ضياء طلعوا على سطح البيت و بقوا يحكوا على المنظر الرائع من فوق
لحد ما اتشجع مصطفى ريان و طلع هو كمان
و هنا محمد عمل حركة ندالة و شال السلم اللى بيطلعوا عليه و ساب مصطفى فوق ونزل
و فضلت اتحايل عليه لحد ما طلع لمصطفى و رجع السلم تانى مكانه

جات لنا فى البيت شيماء صبرنى يارب و اسرتها
بعد ما ذنبناهم على الفيشاوى اكتر من ساعة فى انتظارنا
بعد كده قاعدنا نشوف هناكل فين
و كانت الاختيارات بين الدهان و فرحات و جاد
و الكل اجمع على جاد علشان عنده كل حاجة
و بصراحة المكان كان كويس
والخدمة كويسة
و الاكل طعمه جميل
وصل وقتها وليد الدغورى
و احمد سكر
و طول ما احنا قاعدين كانت ساجى و ابوحميد عمالين يناقروا فى بعض
و شيماء ملغومة بالاطفال و مش عارفة تقعد معنا
و بعد ما خلصنا
اهل الماريا قالوا لا خلاص الوقت يا دوب نلحق نمشى
و خالد قال هوصلهم و ارجع و زوغ و مش رجع
كيارا كمان مشيت
اتفاقنا نروح تانى عند بيت زينب خاتون و نكمل القاعدة على الكافيه هناك
كنت انا و ساجى و سكر و ريم و عبير و ايناس و نسمة و شفقة و احسان و كريم شاب فقرى و محمد صوت من مصر و عمر فضفضة و مصطفى ريان و سونى و رشا حفيدة عرابى و ضياء و وليد الدغورى و شريف هجايص و ابو حميد
القاعدة كانت راااااااااائعة
المكان هناك فعلا جميل
و تحسوا فيه بعبق التاريخ زى ما بيقولوا
و كان صوت محمد منير مدى طعم خاص للمكان
و طبعا المشروبات هناك تضرب اى كافيه تانى
كفاية بس براد الشاى اللى بيجى معاه النعناع و القرفة و الحبهان و كل واحد يختار بذوقه
قاعدنا لحد الساعة 9 و نص تقريبا
و بدا كل واحد يشد الرحال على بيته
على امل نتجمع تانى على خير قريب فى المنصورة اخر الشهر


اهل اسكندرية
قطة
انتى اجرااااااااااااااااااااااام و خفة دم مش حصلت
دودو
برغم فرحتك باليوم لكن كنت حاسة انتى اد ايه مضايقة من غياب فاتيما ..بس الحمدلله خفف من الحكاية دى حضور د/ستيته و استاذ هانى
لولو الحب الجميل
انتى كنتى صعبانة عليا اووووووووى و لو مش كنت لابسة بوت كنت بدلت معاكى الشوزاللى قريفتك طول اليوم دى ..المرة الجاية تضربى بنطلون و كوتشى و تريحى نفسك


اهل بورسعيد

ايناس اميرة بورسعيد
اليوم ده مش كان عجبنى موودك ابدا ..بس اتمنى ان اليوم خفف عليكى شوية
نسمة الرقيقة
هو انتى يا بنت انتى عسولة كده على طول ؟؟ الاصفر تحفة عليكى ..كتكوتة خاااالص


اهل الاسماعيلية
عبير
انتى بنوتة جدعة جدااااا و زى السكر و اول مرة اشوف بنوتة متعصبة اوووووى فى الكرة كده

اهل المنصورة
شيماء صبرنى يارب
مش هاقولك حاجة غير انى بحبك اوووى يا ست انتى


اهل القاهرة
خالد همس الاحباب
جزاك الله خير يا خالد على تعبك و اهتمامك و جدعنتك مع الكل
ضياء
يارب دايما محب للخير و دايما تزن كده على نشر الحاجات المفيدة لكل الناس
ساجى
وانا باصنف الحضور احتارت احطك فى القاهرة ولا اسكندرية ..فى المدونين ولا غير المدونين ..بس لاقيت فى الاخر انه مش مهم لان اكيد مكانك موجود فى قلوب كل اللى حضروا
ريم
انتى زى نسمة الصيف ..بنقعد نستنا كتير على ما تهل علينا و لما تيجى بتكون رقيقة اوى و تمشى بسرعة و مش بنشبع منها
رشا حفيدة عرابى
عجبانى شخصيتك جدا و هدوءك و رصانتك و كلامك اللى برغم انه قليل لكن فى الجول
احمد سكر
قال كنت عايز تزوغ و مش تيجى قال ..هأأأو هههههه
سونى
انتى كميلة اوى و عجبنى موبايلك جداااا و بافكر اجيب لبنوتى واحد زيه
نيرفانا
كان يسعدنى تقعدى معنا اكتر من كده علشان نتعرف عليكى اكتر
غادة محسن و مروة
انتم عسولين اوى يا بنات و عجبنى التزمكم بالحاجات المفروض تعملوها و ادعولى اكون زميلتك قريب :)
كيمو صوت من مصر
ااااايه ياااا ابنى العفرتة و الشقاوة اللى انت فيها دى انت زى ما بيقولوا معجون بميه عفاريت :))
كريم شاب فقرى
مش عارفة ليه كل ما اشوفك اتاكد انك مش فقرى و لا حاجة
وليد الدغورى
اهو انت بقى الواحد يحتار فيك ..ما بين جدعنتك و فهلوتك ..يعنى مصرى مطراوى اصيل :))
شريف هجايص
سعيدة انى اتعرفت على خطيبتك و عرفت ازاى الخطوبة اصلاح و تهذيب :))
شفقة و احسان
اللى يقرا كلامك يا شفقة مش يصدق و انا كل ما اسالك على حاجة تقولى زى ما يقول احسان ..ربنا يخليكم لبعض يارب
كيارا

انت حد عسووول اوى و بزعل كل ما اسمع انك بتفكرى مش تحضرى لقاءات علشان محدش يضايقك ..اوعى تخلى حد يخليكى تبطلى تعملى حاجة بتحبها بدام انتى صح
مصطفى ريان
انت حد طيب اوى يا مصطفى و حتى لما بتتنرفز و تحاول تبقى شرير مش بتعرف :)
ابو حميد
انت من الشخصيات اللى كنت سعيدة بالتعرف عليها اكتر المرة دى ..و ربنا يخلى لك اولادك يارب
هانى
شرفتنا بحضورك و اهتمامك بمتابعة الخير و ان شاء الله اجيب لك تفاصيل اكتر عن موضوع الادوية
د/ستيتة
حضورك كان زى البلسم على قلوب البنوتات ..يارب دايما يكون حواليكى كل احبابك
عمر فضفضة
انا تقريبا مش سمعت صوتك ..انت هادى اوى :)
حسنى مدونة مستفز
مش اسعدنى الحظ اتعرف عليك ..بس ان شاء الله الجايات اكتر
ريهام و ياسمين و مروة
سعيدة بكم جدا و باشتراكم لانكم رغم انكم غير مدونين لكن بردو حضرتوا معنا ..اهى دى الايجابية و لا بلاش
و انتى وعدتى يا ريهام ان هيكون لكى مدونة قريب ..و انا فى انتظارها :)


الناس اللى اتصلت بينا يومها علشان يسلموا علينا و يطمنوا على اليوم
سوما عاشقة القمر
محمود رئيس جمهورية نفسى
علا صيدلانية
حنين القلب
احمد قاسم دردشة عربى

اكيد فى كتير تانين كلموا خالد بس مش اسعدنى الحظ اسمع صوتهم
يارب اكون قدرت احكى عن اليوم
بس اكتر من كده خلااااص صوابعى وجعتنننننننننننى
الله يكون فى عونك يا طمطم بجد


قبل ما امشى
آبى انتى وحشتنا كلنا
والكل بعت لكى السلامة و افتكرك بالخير
كل سنة و انتى طيبة يا جميل
و كل عيد ميلاد و انتى محبوبة من كل الناس
التورتة دى لكى يا جميل من مانتك حبيبتك


42 comments:

أحمد عبد الحميد said...

يافندم اليوم كان جميل قوى
وسعيد بالتعرف على حضرتك

بس مش عارف إنتم حوشتونى عن ساجى ليه
:)

Empress appy said...

حسيت انى معاكوا بس زعلت من البت الخيخه وفاتيما انهم محضروش اول مره تحصل بس بجد افتقدت الناس كلها
وسعيده ان اليوم جميل زى المعتاد والناس عملت كتير
ربنا يجمعكوا فى الخير دايما
وشكرا لكل اللى سال عليا هما وحشونى كمان
وانتى يا مانتى والله وحشتينى جدا جدا
كل سنه وانتى وانا طيبين يا حبيبتى

ahmed_k said...

ربنا يديمها عاده ولا يقطعها أبدا
فعلا انا افتقدت هذا الجو الجميل لكن ملحوقه في لقاء المنصوره بإذن الله،
تقديري ليكي ولكل القائمين على تنظيم مثل هذه التجمعات الرائعه

شاب فقرى said...

داليا
ربنا يقدرك دايما على فعل الخير
وكل لقاء وانتى طيبة يارب
فقرى لو دققتى فى التفاصيل شوية :)
ههههههههه
كل سنة وانتى طيبة
وكان يوم جميل
كفاية اننا اتجمعنا
دى لوحدها كفاية والله
بيس
شاب فقرى

Kiara said...

والله يادودو اليوم امبارح كان ناقصه فاتيما ويبقي اجمل يوم

كنت حاسه انه زي لقاء رمضان كدا

مش يوم عادى

Anonymous said...

بسم الله الرحمن الرحيم

اما أخش برجليا الاتنين علشان دي اول مره


خلاص كفايه أدب كدا

ارجع لطبيعتي بئا

ايه دا بئا ان شاء الله

البوست مافيهوش غير كلمتين بس عني


لا يمكن أبدا

يتعاد من أول وجديد وتشيلي كل العالم دي

وتخليه عني اني وبس

أصلي متواضع جدا


أسعدني جدا وجودي معاكو

ويا رب المره الجايه تكمل بمن لم ستطيعوا الحضور

مش هحدد واقول فاتيما

لأني ما بحبش السياحه

مستني

قائمة الادويه
والبوست الجديد
تحياتي

صيدلانيه طالعه نازله said...

لااااااااااااا يا داليا
انتى الحمد لله شربتى الصنعه من تيما تمااااااام
البوست حسسنى انى كنت موجوده معاكم تومااااااااام
ناس كتير حضرت كان نفسى اشوفهم و ناس شفتهم قبل كده و كان نفسى تتكرر مقابلتى ليهم
ربنا يهنيكم و يسعدكم و دايما يارب متجمعين فى الخير

همس الاحباب said...

الحمد لله اليوم كان جميل
بالصحبة الحلوة والنية الخالصة لفعل الخير وده اهم سمات اليوم
وكويس انك كتبتى بوست تفصيلى لان غياب فاتيما اثر على الجميع بما انها المتحدث الاعلامى للتجمعات
كل سنة وانتم طيبين وبعدين المستفز اسمه حسنى مش محمد جننتونا معاكم وانا بدور على محمد المستفز هههههههههه
انا زوغت لانى بصراحة كنت ميت من التعب وعارف ان القعدة هتحلومعاكم ومش هروح غير الصبح
كل سنة وانتم بخير
وعيد ميلاد سعيد يا ابى
وعقبال 100 سنة
تحياتى

Anonymous said...

وحياتك اول ما ركبت القطار قلعتها
ههههههههههههههههه
يا خرابى يا دوللى كنت هموت ومحش حاسس بيا
اصلى بحسبكم هتدلعونا ومش هتمشونا ولا نتحرك كتير
لو اعرف كدا كنت ضربت الترننج والكوتشى وجيت
يالله
اقول ايه
الله يسامح الجذمه بقا تعبتنى اخر تعب
ههههههههههههههههههه

مبسوطه كتير انى شوفتك يا ام ابتسامه جميله

كنت عايزة ارغى معاكى كتير بس رجلى كانت بتوجعنى
هههههههههههههههههههههه

يالولووووووووووووووو
هههههههههههه
كنت خايفه على البنت
بيت الست المرحومه دى كبير اووووووووى وكنت قلقانه على علياء يا اوختى
انتى عارفه بقا البنت الحيله

مرسيى ليكم كتير يا اهل كايرو الكرام على اليوم الممتع والجميل دا

كان فعلا ناقصنا فاتيما
ربنا يريح بالها ويسعد قلبها ويفك كربها
اللهم امين

ســــــــــاجى

وحشتينى مووووووت يا ساجى
انتى عثوله خالص
كلامك زى الثكر
طبعا اسكندرانيه
هههههههههههههه

وحشتينى يا دوللى

sony2000 said...

ميرسييييييييي
اهو انتي اللي كميله
بصي
النوبيل اسمو الكاتيل ot_808
وابحثي عنو هتلاقي كتيييييييير
ميرسي عليوم الرائع دا
يمجمعانا فالخير ديمن:)
امواااااااااااه

كيكى عوووووو said...

تصدقى
رغم انى كنت محتاجه اجئ
وكنت مفتقده حاجات كتير
ومن اهمهم
واشدهم
كنت محتاجه
وبشده
شديده
وفظييييييييييييييييييعه
(حضن المطارات بتاعك)
افقتد حضنك جداااااااا
بجد
المره الجايه نخليها دوبل ياجميل
مبسوطه انكم كلكم اتبسطوا

إيمان قنديل said...

متجمعين في الخير دايما يادولي يارب

عين فى الجنة said...

حاجة جميلة

شمس النهار said...

انبسطت جدا ان الناس انبسطت
واليوم كان جميل
مافيش احلي من الصحبه الحلوة
المبنيه علي الخير وفعل الخير
المحبه في الله

دايما ياداليا انتي وخالد مجمعنهم في الخير
انتي انسانه جميلة محترمة
لكي مني كل الحب والود

عمرو يسرى said...

كان يوم جميل يا استاذه
وان شاء الله اللقاء القادم هتكلم وهتسمعى صوتى بس يارب مازعجك ههههههههههههههههه

Remas said...

داليا جبيبة قلبي
بجد اليوم كان رااااائع واكتر من رائع
بوجودك ووجود كل الناس الحلوين
دكتور ستيتة طبعا زى ما قلتى يا دودو كان وجودها مفاجأة للكل واولهم انا وفرحت جدا بوجودها

افتقدت فاتيما انا جدا جدا

انتى بقى يا دودو انتى وخالد بجد ربنا يجازيكم كل خير يارب على المجهود اللى بتعملوه

وانا اللى مش بشبع منكو والله ولو انى متأكده انى لو حتى قعدت معاكو سنين مش هاشبع بردو وهاتفضلو واحشينى

وبجد يا داليا انا سعيدة جدا لوجودى وسط ناس في منتهى الروعة زيكو
وانتى تحديدا يا دودو عارفه معزتك وغلاوتك عندى
ربنا يخليكى ليا يارب
وعقبال البؤجة اللى جاية يا قمرنا كلنا

فاتيما said...

الحمدلله


و عقبال كل مرة
يا وش الخير

richardCatheart said...

هههههههههجههجهههههه

اجرام اي بس انت شوفتى حاجه دا انا كنت واخده اجازه هههههههه

انا مبسوط بمعرفتك اوى يا دودو انت جميل من برا ومن جوا وحبوب اوىىىىىىىىىىىىىى

ان شاء الله تنورينا فى اسكندريه ونعملو معاكى احلى واجب يليق بالسكر دودو
ياريت تبلغى سلامى لساجى البونبوناي الاسكندرانى جاااااااااااااامده اوووووووووى وان شاء الل اطمن عليكى على طول ربنا يجعل فى ميزانك يارب وديما متجمعين فى الخير

Unknown said...

يا دولى يا روح قلبى
انتى عارفة انا بموت فيكى والله ولولا كدة انا كنت هبعت الشنطة واخلع
لكن للاسف يموت الزمار وصوابعه فى البؤجة برضة هاهاهاها
الظاهر انى اتعودت على الانشطة ولا اية
انا فعلا حالتى النفسية من قبل العيد مش لطيفة لكن الحمد لله برؤيتكم كلكم اتغيرت

بجد ميرسى وجعله الله فى ميزان حسناتكم
والبقاء لله على وفاة عمك

Anonymous said...

لدي بعض الحكمة الرائعة.

ghada mOhsen said...

دولي العسوله

بجد بجد أنا مبسوطه بشوفتك
^^

واليوم كان حلو بالخير إللي ماليكم
وبالإبتسامه المريحه إللي على وجوهكم

بجد حبيتك أووووي
وياااارب تبقى فعلا زميله
ياااااااه ده أنا هاطير من الفرحه ساعتها

بجد ربنا يحميكي للحواليكي يااااارب
^_^

رحاب صالح said...

انا عرفت كل شيء من غادة والله يا استاذة داليا
لاني محضرتش اللقاء
وعرفت كمان انك حابة تكملي معانا في التعليم المفتوح
وانا ان شاء الله هبقي ابعت لك رسالة بالتفاصيل كلها
يارب يجمعكم دايما علي خير

عاشقة القمر said...

ربنا يجعلها في ميزان حسناتكم
يارب ديما مجمعين على الخير
ديما سعيدا
انا زعلانه منك نورته فقط لي ابي
ليه
انا مش عندي
بارغم عيد ميلاد يوم تجمعتو فيه
ههه كده انا زعلان

r said...

السلام عليكم يا صاحبه الخير
الصراحه مش هقول كان نفسى اكون معاكم
علشان انا نفسى كنت عايزه مساعده
معنويه من الجميع
بس الحمد لله فضيت
ولو فى تجمع تانى لازم اعرف
وربنا يكرم كل صاحب مبادره وفعل خير
التحيه دائمه يا داليا

قوس قزح said...

اولا باعتذر على التأخير فى الرد على التعليقاتكم لان كان عندى حالة وفاة

قوس قزح said...

ابو حميد

هههههههههههههههه
معلش اصل ساجى بنوتة غلبانة ومش حملك

سعيدة انى اتشرفت بالكلام معاك
ومبسوطة ان اليوم عجبك :)

قوس قزح said...

appy
محدش عارف ظروف الناس ايه
اهم حاجة انهم يكونوا بخير

انتى وحشتى الناس كلها
و انا بالاخص
بس هى الدنيا كده
هنعمل ايه بقى
ربنا يسعدك سارب و يرضيكى و يصبرنا على البعد ده

قوس قزح said...

احمد
معلش تتعوض ان شاء الله
و بعدين انت من الناس اللى دايما بتشارك فى البؤجة
مفيهاش حاجة لو مرة ماليكش نصيب فيها
ان شاء الله يكون يوم المنصورة احلى كمان

قوس قزح said...

شاب فقرى اللى مش فقرى

ماهو رائى ده بعد التدقيق هههههههههههههه

و الله باكون مبسوطة اوى لما تجمعنا يفضل ذكرى جميلة و نتمنى انها تتكرر
طبعا بيس و نص :)

قوس قزح said...

كيارا

اه و الله يا كيارا
بس البوست اللى كتبته فاتيما قبل اللقاء
خالانى اعذرها فى عدم حضورها

الحمدلله على كل شىء

قوس قزح said...

مصرى جدا
اتفضل يا فندم
نورت المنطقة :)
معلش اعذرنى على التأخير كان عندى ظروف و لما حاولت اتصل بصاحبة الجمعية مش ردت عليا
هاجرب تانى ان شاء الله
اسعدنى حضورك

قوس قزح said...

صيدلانيه طالعة نازلة
ههههههههههههههههههههههههه لا طبعاااااااااا
و انا هاجى فى فاتيما ايه
دى هى حروفها بتلعب على اوتار اجدع قلب بيقرا
ان شاء الله البؤجة الجاية تكون المدارس خلصت و تشرفينا انتى والفاميلة :))

قوس قزح said...

خالد
معلش يا خالد العيب على المصدر اللى ادانى المعلومة
مع انه كان قاعد معاه بس بردومعرفش يلقط اسمه :)

و الله انا بأعذرك كفاية وقفتك من الصبح
بس الواحد بيستخسر الايام اللى مش هتتعوض دى
و بعدين يعنى انت تشجعنى انى اكمل اليوم وفى الاخر تزوغ ؟ ينفع الكلام ده ؟ :)

كل بؤجة و انت طيب يا ابوهمس

قوس قزح said...

الحب الجميل
هههههههههههههههههههههه و الله كنت متوقعة انك تعملى كده
المهم انك عرفتى اهو ان مفيش دلع
وتعملى حسابك المرة الجاية

انا كمان مبسوطة انى شوفتك جداااااا
و منها لله بقى الجزمة اللى خاليتك قاعدة طول الوقت مش قادرة تشاركى دى

ربنا يخلى لكى لولو و يحفظها يارب
ده انا نفسى كنت قلقانة على البنات من كتر ما البيت كان كبير

الحمدلله ان اليوم عدى على خير
و ان شاء الله اللقاء الجاى تكون فاتيما معنا

هابلغ ساجى برسالتك ياجميل :)
انتى كمان وحشتنى اووووووووووى

قوس قزح said...

سونى
ميرسى يا جميل على المعلومة دى
و ان شاء الله اشتريه لها لانه عجبنى جدااا

يارب نتجمع تانى قريب على يوم احلى و اجمل
موااااااااااااااااااه

قوس قزح said...

كيكى
عوووووووووووو
انازعلانة منك
مش جيتى ليه ؟
وحشتنى يا مجرمة انتى
و عايزة اشوفك و اطمن عليكى
المرة الجاية انتى حرة بقى لو مش جيتى اوووكى ؟

قوس قزح said...

مكسوفة
ربنا يخليكى يا جميل
الخير هيفضل موجود طول ما فى ناس جميلة زيكم

قوس قزح said...

راجى
ميرسى على تشجيعك :)

قوس قزح said...

شمس النهار
ايوه والله يا شمس
مفيش احلى من الصحبة الحلوة و الخير

كنت اتمنى انك تكونى معانا
و ان شاء الله املى فى ربنا كبير انك تشاركى فى يوم معانا بحضورك الطيب

قوس قزح said...

عمرو

ان شاء الله يا عمرو
هو الهدوء مش وحش بالعكس
بس يمكن فى التعارف بيصعب علينا شوية اننا نقدر نشوف ملامح شخصية اللى قدامنا :)

عاشقه الرومانسيه said...

للاسف يادودو انا مش شفت البوست الا دلوقتى
لانى للاسف مش باتابع

وراى اللى مش هاغيره انك هديتينى باجمل هديه خلقها ربنا
ساجى
انسانه راااائعه وانا مش بس معجبه بيها ده انا مبهوره بشخصيتها وبحبها جدا وبقينا اصحاب جامدين جدا من يوم البؤجه
وعلى فكره ساجى اسكندرانيه بشده بنت بلدى ولو بايدى كنت خطفتها منكم

وعلى فكره يادودو
ضحكتك جمييييييييله جدا
انتى جايبه الرقه دى كلها منين؟



هو انا كان باين عليا انى كئيبه للدرجه دى؟
بصراحه غياب فاتيما كان مسبب لى احباط
بس الحمد لله الضيق راح شويه لما شفت الدكتوره ستيته فرحت جدااااااااااا


متجمعين دايما فى الخير ياقمرى

Sagy said...

داليا هانم @
اولا تسلم ايديكى وافكارك ياقمر والله المجازى للجميع بحسن النوايا ان شاء الله

ثانيا القاهرة اسكندرية انا بقيت نصين ولا انكر عشقى للقاهرة رغم طعنتها الاخيرة وحبى للإسكندرية رغم وغزاتها المترامية يعنى الخلاصة الاثنين حلوين الاثنين طعمين وانا اصبحت قاهرية من اصل سكندريى

ثالثا يارب ابقى رقية زيك كده فى يوم من الايام انت رقيقة قوى قلبا وقالبا ومهما اقول ميكفيش الكلام

رابعا كفاية عليكي كده لحسن انا اتكسفت وهعيط

أبوحميد @
ههههههههههههههههههههه

لا محدش مسكك يابوحميد...تعالالى فى الوسع ياخويا
ههههههههههههههه


الحب الجميل @
وانت كمان وحشتينى جدا ونورتينا فى القاهرة وعاجبنى انك هادية وعاقلة ودمك ثربااااااااااات خالص خالص وكنت حاسة بيكي وبرجليكي طبعا وصورتك وانت قاعدة على الكورسي ولا كأنك الست زينب خاتون فى زمانها

richardCatheart @

ونبى يا ماروو انتى الى جامدة موووووووت وحقيقي حقيقي مسخرة
نورتى القاهرة وبيت ستك زينب خاتون