Sunday, August 12, 2012

فرحة ما بعدها فرحة



مهما الواحد اتكلم عن اليوم ده مش هيعرف ينقل احساسه 
اليوم ده خالانى عرفت ليه ربنا بيطلب منا اننا نتصدق و نعمل الخير 
مش علشان الغلابة بس 
لا علشاننا احنا كمان 
لانه بيخلى النفس راضية بطريقة غريبة 
الواحد لما بيساعد حد فى حاجة و يشوف فرحة فى عينيه ..بيفرح اكتر منه كمان لانه سبب لسعادة غيره 
اليوم ده كده 
بنشوف كلنا فرحة الخير فى عيون بعض
ده غير فرحة اللقاء مع ناس معنا من اول يوم خير 
خالد ..فاتيما .. ضياء .. شيرين .. سكر .. ميرا ..سوو ..الدوح ..وغيرهم 
و ناس جديدة  بتنضم كل سنة و اتعودت تشارك 
احمد عبد الحميد .. محمود بهجت .. ازهرى .. سونى ..عبير ..ريم .. رشا عرابى..سامح و غيرهم 
وناس اول مرة و دول الامل ان الخير هيفضل حتى لو غاب ناس ..ففى ناس جديدة هتيجى 
داليا العقاد .. اوشا ..احمد سلامة ....منى.. وغيرهم
و الناس اللى غابت غصب عنها او بمزاجها 
انا عارفة ان اليوم ده عمركم ما هتنسوه و لا احنا هننسى انكم  كنتم  معنا فيه 
و كل وش منكم لما بيجى فى بالنا ..بيجى بالخير 
متحرموناش من وجودكم لو تقدروا 
وربنا يردكم بالسلامة من غيبتكم لو مسافرين 

رحاب ..مينا ..خيخة 
وحشتونى 


اعملوا الخير مش علشان الناس الغلابة محتاجة .. لكن علشان احنا محتاجين نحس اننا كويسين و قلوبنا مش قاسية 
حلو اوى احساس انك حنين و بتنشر الخير 
متخلوش الخير يقف عند حد و لا عند مكان ولا عند يوم 
كل ما تقدر تعمل الخير و لو بسيط ..اعمله 
لنفسك قبل اى حاجة
القليل لما بيتجمع يبقى كتير
لما نجمع 16 الف جنيه من تبرعات اغلبها 50 او 100
معناه اننا نقدر نعمل حاجة بالقليل
بس نكون سوا
و يارب نفضل سوا

انتم ناس جميلة اوى و انا بحبكم اوى 

27 comments:

Mahmoud Bahgat said...

كلنا بنحب اللى يدل على الخير
و شكرا لك

شمس النهار said...

ربنا يقدرك ياجميلة علي فعل الخير
بس ونبي ماتبقوش تنشنوا علي التجمع العائلي السنوي بتاع العيلة عندنا
نفسي احضر معاكم اليوم ده
:)

Unknown said...

فعلاً يا داليا إحنا محتاجين نحس إننا كويسين مش بس عشان إحساسنا ببعض و بالناس الغلابه لأ عشان نحس بالراحة و الفرحة الحقيقيه اللي بتتبع عمل خير.
أشكرك بجد و كان من أجمل أيامي بيكم

كل سنة و إحنا مع بعض في الخير
و إحنا كمان بنحبك يا وش الخير :)

!!! عارفة ... مش عارف ليه said...

ربنا يقدرك على فعل الخير داليا
ويتقبل منك

basma bahaa said...

بيقولوا ان الاحتياجات الانسانية أولها وأهمها الاحساس بالأمان واخرها العطاء..الغريب انى اعرف ناس بتفكر ف العطاء وسعادتها كلها فيه وهما مش لاقيين ياكلوا:)
ربنا يقدرك ويقدرنا كلنا اننا نوصل للاحساس الحلو دا
الواحد بيحس ساعتها ان حياته لها لازمة

داليا ..قوس قزح said...

محمود
الشكر لكم انتم و الله ..الخير من غيركم ماكنش له نفس احساس الفرحة ده

داليا ..قوس قزح said...

شمس النهار

والله ناس كتير بتقول نكرر اليوم تانى .. ربنا يسهل و هاعمل تصويت و اشوف راى الناس ايه
ووقتها تقدرى تكونى معنا باذن الله ..لان وجودك يخلى اليوم له ثقله

داليا ..قوس قزح said...

شيرين سامى
الحمدلله ان ده انطباعك عن اليوم
و يارب دايما تكونى من المشاركين معنا

اينعم انا مكلتش من الكيك ولا حتى شوفته .. بس تتعوض المرة الجاية بصينيتين بس و امرى لله :)))

انا بحبكم كلكم جداااا يا صحبة الخير

داليا ..قوس قزح said...

وليد

و الله كان نفسنا تكون معنا .. بس قدر الله و ما شاء فعل
ربنا يقومك بالسلامة يارب

داليا ..قوس قزح said...

بسمة

حقيقى .. الناس الغلابة بتحس ببعض و علشان كده بيساعدوا بعض على اد ما يقدروا
الخير فى قلوبنا يخلينا احسن ناس فى الدنيا ..ناقص بس لنا الارادة

فاتيما said...

صح يا وش الخير
اللى قولتيه كله صح

كنت بحس بكدا كل مرة
نشيل البؤجة ونيجى
كنت بحس اننا مش بندى حاجة
ل احنا اللى بناخد

ربنا بيراضى الكل
مش طرف واحد وبس


بس كمان ربنا بيختص بعض من عباده
الطيبين الوش خير
تحديدا عشان يكونوا هما السبب
والطريقة والوسيلة
وييسر الخير على اياديهم
ويخلى الناس تثق فيهم وتحبهم ف الله
وتيجى كل ما يندهوا
ويقولوا يلا نعمل حاجة كويسة


ربنا يخليكم لينا انتى وخالد
ويقوم آبى بألف سلامة
و الواد مينو يرجع بقى
وخيخة تيجى
وكل الغايبين ...
وكل حد شارك وبيشارك بكل طريقة
جزاه الله ألف خير عن اللى ف ابو الريش
وعنا احنا كمان



كل سنة واحنا متجمعين ف الخير
و ف حضن قلبك
يا وش الخير




8000
بوسة
و
8000
حضونة
يعنى
16000
بوسة وحضونة
بالتمام والكمال
:)


داليا ..قوس قزح said...

فاتيما

انا باحب يا ست انتى
و صدقنى .. الخير بكم انتم
كلنا وشوش خير و اتقابلت
يمكن انا بس نديت عليكم
لكن كلكم وشوش خير
و اكتر حاجة بلاحظها و بتسعد قلبى
ان كل واحد منكم و هو بيتبرع
بيكون مكسوف و حاسس ان تبرعه قليل
لان جواه عايز يدى اكتر
مشوفتش حد اتبرع و هو فى عينه نظرة استكتار
المصريين فعلا طيبين و غلابة ..بس عليهم طبقةعملها الظلم اسمها الفهلوة وتقليب رزقك
ان شاء الله تنشال الطبقة دى لما كل واحد يحس انه بياخد حقه كبنى ادم

قريب يارب

محمد عبد الغفار said...

تقبل الله منكم ووفقكم لما فيه الخير ويحبه الله ويرضاه

dalia said...

شكرا على اليوم الجميل وعلى البسمة اللى عمرها ما حتتنسي يارب يتقبل منا صالح الأعمال ونشوفك يا داليا مرة تاني على خير
مع حبي

الازهرى said...

هو يمكن

Ramy said...

كل سنة و حضرتك طيبة

و عيد فطر سعيد عليكى و على الأسرة

(:

حسن ارابيسك said...

جميلة تلك المشاعر
وبلا شك عمل الخير أكثر جمالاً
والاجتماع والترابط على المحبة في الله وفعل الخير أكثر وأكثر وأكثر جمالاً
والحقيقة صدقتي فيما ذكرتيه حول سحر عمل الخير على قلوب فاعليها ، ففعل الخير يجعل القلوب لينة ورحيمة
بارك الله فيكي وفي الجميع والحقيقة مصر طول عمرها عامرة بأصالة شعبها في تراحمهم ومحبتهم في اوقات الشدة وفي غيرها
عيد سعيد عليكي وعلى كل من يفعل الخير وعيد سعيد على كل فقراء مصر وعلى كل شعب مصر
كل سنة وانتي طيبة
تحياتي
حسن أرابيسك

مهندس مصري بيحب مصر said...

ربنا يسعدكم زي ما بتسعدوا الناس
كل سنة و انتي طيبة

Tamer Moghazy said...

ربنا يحببك في الخير كمان وكمان يا داليا..
كل عيد وانت اكتر حد سعيد :)

P A S H A said...

كل سنة وأنتِ طيبة وبألف خير وصحة وسعادة أنتِ وأسرتك الكريمة وإن شاء الله يكون عيد سعيد عليكم جميعاً بإذن الله :)
تحياتنا

sony2000 said...

الخير بيفرح اوي
والتجمع بردو بيفرح

داليا ..قوس قزح said...

محمد عبد الغفار

جزاك الله كل خير على دعاءك :)

KING TOOOT said...

ربنا يوفقكم دايما للخير
ويارب كل مرة يزيد المبلغ صفر على اليمين
KING TOOOT

لعبة زوما said...

جزاكم الله خيراا

يا مراكبي said...

بسم الله ما شاء الله

والأجمل دايماً هو مُثابرتك على تجميع الناس في الخير، ودي حاجة أصعب مِن المُشاركة العادية

بارك الله فيكي وفي المجموعة الجميلة كلها ويجعله دايماً في ميزان حسناتكوا

Doaa Ebrahim Aaql said...

وأنتِ جميلة :)

Hannoda said...

دايما انت سبب للخير يا وش الخير : )